| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၂. ပဋိဘာနသုတ္တဝဏ္ဏနာ
2. Paṭibhānasuttavaṇṇanā
၁၃၂. ဒုတိယေ ပဋိဘာနံ ဝုစ္စတိ ဉာဏမ္ပိ ဉာဏသ္သ ဥပဋ္ဌိတဝစနမ္ပိ, တံ ဣဓ အဓိပ္ပေတံ, အတ္ထယုတ္တံ ကာရဏယုတ္တဉ္စ ပဋိဘာနမသ္သာတိ ယုတ္တပ္ပဋိဘာနော။ ပုစ္ဆာနန္တရမေဝ သီဃံ ဗ္ယာကာတုံ အသမတ္ထတာယ နောမုတ္တပ္ပဋိဘာနမသ္သာတိ နောမုတ္တပ္ပဋိဘာနော။ ဣမိနာ နယေန သေသာ ဝေဒိတဗ္ဗာ။ ဧတ္ထ ပန ပဌမော ကဉ္စိ ကာလံ ဝီမံသိတ္ဝာ ယုတ္တမေဝ ပေက္ခတိ တိပိဋကစူဠနာဂတ္ထေရော ဝိယ။ သော ပန ပဉ္ဟံ ပုဋ္ဌော ပရိဂ္ဂဟေတ္ဝာ ယုတ္တပ္ပတ္တကာရဏမေဝ ကထေတိ။ ဒုတိယော ပုစ္ဆာနန္တရမေဝ ယေန ဝာ တေန ဝာ ဝစနေန ပဋိဗာဟတိ, ဝီမံသိတ္ဝာပိ စ ယုတ္တံ န ပက္ခေတိ စတုနိကာယိကပိဏ္ဍတိသ္သတ္ထေရော ဝိယ။ သော ပန ပဉ္ဟံ ပုဋ္ဌော ပဉ္ဟပရိယောသာနမ္ပိ နာဂမေတိ, ယံ ဝာ တံ ဝာ ကထေတိယေဝ, ဝစနတ္ထံ ပနသ္သ ဝီမံသိယမာနံ ကတ္ထစိ န လဂတိ။ တတိယော ပုစ္ဆာသမကာလမေဝ ယုတ္တံ ပေက္ခတိ, တံခဏံယေဝ စ နံ ဗ္ယာကရောတိ တိပိဋကစူဠာဘယတ္ထေရော ဝိယ။ သော ပန ပဉ္ဟံ ပုဋ္ဌော သီဃမေဝ ကထေတိ, ယုတ္တပ္ပတ္တကာရဏော စ ဟောတိ။ စတုတ္ထော ပုဋ္ဌော သမာနော နေဝ ယုတ္တံ ပေက္ခတိ, န ယေန ဝာ တေန ဝာ ပဋိဗာဟိတုံ သက္ကောတိ, တိဗ္ဗန္ဓကာရနိမုဂ္ဂော ဝိယ ဟောတိ လာဠုဒာယိတ္ထေရော ဝိယ။
132. Dutiye paṭibhānaṃ vuccati ñāṇampi ñāṇassa upaṭṭhitavacanampi, taṃ idha adhippetaṃ, atthayuttaṃ kāraṇayuttañca paṭibhānamassāti yuttappaṭibhāno. Pucchānantarameva sīghaṃ byākātuṃ asamatthatāya nomuttappaṭibhānamassāti nomuttappaṭibhāno. Iminā nayena sesā veditabbā. Ettha pana paṭhamo kañci kālaṃ vīmaṃsitvā yuttameva pekkhati tipiṭakacūḷanāgatthero viya. So pana pañhaṃ puṭṭho pariggahetvā yuttappattakāraṇameva katheti. Dutiyo pucchānantarameva yena vā tena vā vacanena paṭibāhati, vīmaṃsitvāpi ca yuttaṃ na pakkheti catunikāyikapiṇḍatissatthero viya. So pana pañhaṃ puṭṭho pañhapariyosānampi nāgameti, yaṃ vā taṃ vā kathetiyeva, vacanatthaṃ panassa vīmaṃsiyamānaṃ katthaci na lagati. Tatiyo pucchāsamakālameva yuttaṃ pekkhati, taṃkhaṇaṃyeva ca naṃ byākaroti tipiṭakacūḷābhayatthero viya. So pana pañhaṃ puṭṭho sīghameva katheti, yuttappattakāraṇo ca hoti. Catuttho puṭṭho samāno neva yuttaṃ pekkhati, na yena vā tena vā paṭibāhituṃ sakkoti, tibbandhakāranimuggo viya hoti lāḷudāyitthero viya.
ပဋိဘာနသုတ္တဝဏ္ဏနာ နိဋ္ဌိတာ။
Paṭibhānasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. ပဋိဘာနသုတ္တံ • 2. Paṭibhānasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. ပဋိဘာနသုတ္တဝဏ္ဏနာ • 2. Paṭibhānasuttavaṇṇanā
