| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৬. ছট্ঠৰগ্গো
6. Chaṭṭhavaggo
(৫৪) ২. পটিচ্চসমুপ্পাদকথা
(54) 2. Paṭiccasamuppādakathā
৪৪৮. পটিচ্চসমুপ্পাদো অসঙ্খতোতি? আমন্তা। নিব্বানং তাণং লেণং সরণং পরাযনং অচ্চুতং অমতন্তি? ন হেৰং ৰত্তব্বে…পে॰… পটিচ্চসমুপ্পাদো অসঙ্খতো, নিব্বানং অসঙ্খতন্তি? আমন্তা। দ্ৰে অসঙ্খতানীতি? ন হেৰং ৰত্তব্বে…পে॰… দ্ৰে অসঙ্খতানীতি? আমন্তা। দ্ৰে তাণানি দ্ৰে লেণানি দ্ৰে সরণানি দ্ৰে পরাযনানি দ্ৰে অচ্চুতানি দ্ৰে অমতানি দ্ৰে নিব্বানানীতি? ন হেৰং ৰত্তব্বে…পে॰… দ্ৰে নিব্বানানীতি? আমন্তা। অত্থি দ্ৰিন্নং নিব্বানানং উচ্চনীচতা হীনপণীততা উক্কংসাৰকংসো সীমা ৰা ভেদো ৰা রাজি ৰা অন্তরিকা ৰাতি? ন হেৰং ৰত্তব্বে…পে॰…।
448. Paṭiccasamuppādo asaṅkhatoti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… paṭiccasamuppādo asaṅkhato, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni dve leṇāni dve saraṇāni dve parāyanāni dve accutāni dve amatāni dve nibbānānīti? Na hevaṃ vattabbe…pe… dve nibbānānīti? Āmantā. Atthi dvinnaṃ nibbānānaṃ uccanīcatā hīnapaṇītatā ukkaṃsāvakaṃso sīmā vā bhedo vā rāji vā antarikā vāti? Na hevaṃ vattabbe…pe….
৪৪৯. পটিচ্চসমুপ্পাদো অসঙ্খতোতি? আমন্তা। অৰিজ্জা অসঙ্খতাতি? ন হেৰং ৰত্তব্বে…পে॰… অৰিজ্জা সঙ্খতাতি? আমন্তা। পটিচ্চসমুপ্পাদো সঙ্খতোতি ? ন হেৰং ৰত্তব্বে…পে॰… পটিচ্চসমুপ্পাদো অসঙ্খতোতি? আমন্তা। অৰিজ্জাপচ্চযা সঙ্খারা অসঙ্খতাতি? ন হেৰং ৰত্তব্বে…পে॰… অৰিজ্জাপচ্চযা সঙ্খারা সঙ্খতাতি? আমন্তা। পটিচ্চসমুপ্পাদো সঙ্খতোতি? ন হেৰং ৰত্তব্বে…পে॰… পটিচ্চসমুপ্পাদো অসঙ্খতোতি? আমন্তা। সঙ্খারপচ্চযা ৰিঞ্ঞাণং অসঙ্খতন্তি? ন হেৰং ৰত্তব্বে…পে॰… সঙ্খারপচ্চযা ৰিঞ্ঞাণং সঙ্খতন্তি? আমন্তা। পটিচ্চসমুপ্পাদো সঙ্খতোতি? ন হেৰং ৰত্তব্বে…পে॰… পটিচ্চসমুপ্পাদো অসঙ্খতোতি? আমন্তা। ৰিঞ্ঞাণপচ্চযা নামরূপং অসঙ্খতন্তি? ন হেৰং ৰত্তব্বে…পে॰… ৰিঞ্ঞাণপচ্চযা নামরূপং সঙ্খতন্তি? আমন্তা। পটিচ্চসমুপ্পাদো সঙ্খতোতি? ন হেৰং ৰত্তব্বে…পে॰… পটিচ্চসমুপ্পাদো অসঙ্খতোতি? আমন্তা। জাতিপচ্চযা জরামরণং অসঙ্খতন্তি? ন হেৰং ৰত্তব্বে…পে॰… জাতিপচ্চযা জরামরণং সঙ্খতন্তি? আমন্তা। পটিচ্চসমুপ্পাদো সঙ্খতোতি? ন হেৰং ৰত্তব্বে…পে॰…।
449. Paṭiccasamuppādo asaṅkhatoti? Āmantā. Avijjā asaṅkhatāti? Na hevaṃ vattabbe…pe… avijjā saṅkhatāti? Āmantā. Paṭiccasamuppādo saṅkhatoti ? Na hevaṃ vattabbe…pe… paṭiccasamuppādo asaṅkhatoti? Āmantā. Avijjāpaccayā saṅkhārā asaṅkhatāti? Na hevaṃ vattabbe…pe… avijjāpaccayā saṅkhārā saṅkhatāti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Saṅkhārapaccayā viññāṇaṃ asaṅkhatanti? Na hevaṃ vattabbe…pe… saṅkhārapaccayā viññāṇaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Viññāṇapaccayā nāmarūpaṃ asaṅkhatanti? Na hevaṃ vattabbe…pe… viññāṇapaccayā nāmarūpaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Jātipaccayā jarāmaraṇaṃ asaṅkhatanti? Na hevaṃ vattabbe…pe… jātipaccayā jarāmaraṇaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe….
৪৫০. ন ৰত্তব্বং – ‘‘পটিচ্চসমুপ্পাদো অসঙ্খতো’’তি? আমন্তা। ননু ৰুত্তং ভগৰতা – ‘‘জাতিপচ্চযা, ভিক্খৰে, জরামরণং। উপ্পাদা ৰা তথাগতানং অনুপ্পাদা ৰা তথাগতানং ঠিতাৰ সা ধাতু ধম্মট্ঠিততা ধম্মনিযামতা ইদপ্পচ্চযতা। তং তথাগতো অভিসম্বুজ্ঝতি অভিসমেতি। অভিসম্বুজ্ঝিত্ৰা অভিসমেত্ৰা আচিক্খতি দেসেতি পঞ্ঞাপেতি পট্ঠপেতি ৰিৰরতি ৰিভজতি উত্তানিং করোতি। ‘পস্সথা’তি চাহ – জাতিপচ্চযা, ভিক্খৰে, জরামরণং । ভৰপচ্চযা, ভিক্খৰে, জাতি…পে॰… অৰিজ্জাপচ্চযা, ভিক্খৰে, সঙ্খারা। উপ্পাদা ৰা তথাগতানং অনুপ্পাদা ৰা তথাগতানং ঠিতাৰ সা ধাতু…পে॰… ‘পস্সথা’তি চাহ – অৰিজ্জাপচ্চযা, ভিক্খৰে, সঙ্খারা। ইতি খো, ভিক্খৰে, যা তত্র তথতা অৰিতথতা অনঞ্ঞথতা ইদপ্পচ্চযতা – অযং ৰুচ্চতি, ভিক্খৰে, পটিচ্চসমুপ্পাদো’’তি 1। অত্থেৰ সুত্তন্তোতি? আমন্তা। তেন হি পটিচ্চসমুপ্পাদো অসঙ্খতোতি।
450. Na vattabbaṃ – ‘‘paṭiccasamuppādo asaṅkhato’’ti? Āmantā. Nanu vuttaṃ bhagavatā – ‘‘jātipaccayā, bhikkhave, jarāmaraṇaṃ. Uppādā vā tathāgatānaṃ anuppādā vā tathāgatānaṃ ṭhitāva sā dhātu dhammaṭṭhitatā dhammaniyāmatā idappaccayatā. Taṃ tathāgato abhisambujjhati abhisameti. Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttāniṃ karoti. ‘Passathā’ti cāha – jātipaccayā, bhikkhave, jarāmaraṇaṃ . Bhavapaccayā, bhikkhave, jāti…pe… avijjāpaccayā, bhikkhave, saṅkhārā. Uppādā vā tathāgatānaṃ anuppādā vā tathāgatānaṃ ṭhitāva sā dhātu…pe… ‘passathā’ti cāha – avijjāpaccayā, bhikkhave, saṅkhārā. Iti kho, bhikkhave, yā tatra tathatā avitathatā anaññathatā idappaccayatā – ayaṃ vuccati, bhikkhave, paṭiccasamuppādo’’ti 2. Attheva suttantoti? Āmantā. Tena hi paṭiccasamuppādo asaṅkhatoti.
৪৫১. অৰিজ্জাপচ্চযা সঙ্খারাতি যা তত্থ ধম্মট্ঠিততা ধম্মনিযামতা অসঙ্খতা, নিব্বানং অসঙ্খতন্তি? আমন্তা। দ্ৰে অসঙ্খতানীতি? ন হেৰং ৰত্তব্বে…পে॰… দ্ৰে অসঙ্খতানীতি? আমন্তা। দ্ৰে তাণানি…পে॰… অন্তরিকা ৰাতি? ন হেৰং ৰত্তব্বে…পে॰…।
451. Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
অৰিজ্জাপচ্চযা সঙ্খারাতি যা তত্থ ধম্মট্ঠিততা ধম্মনিযামতা অসঙ্খতা, সঙ্খারপচ্চযা ৰিঞ্ঞাণন্তি যা তত্থ ধম্মট্ঠিততা ধম্মনিযামতা অসঙ্খতা, নিব্বানং অসঙ্খতন্তি? আমন্তা। তীণি অসঙ্খতানীতি? ন হেৰং ৰত্তব্বে…পে॰…। তীণি অসঙ্খতানীতি? আমন্তা। তীণি তাণানি…পে॰… অন্তরিকা ৰাতি? ন হেৰং ৰত্তব্বে…পে॰…।
Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, saṅkhārapaccayā viññāṇanti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Tīṇi asaṅkhatānīti? Na hevaṃ vattabbe…pe…. Tīṇi asaṅkhatānīti? Āmantā. Tīṇi tāṇāni…pe… antarikā vāti? Na hevaṃ vattabbe…pe….
অৰিজ্জাপচ্চযা সঙ্খারাতি যা তত্থ ধম্মট্ঠিততা ধম্মনিযামতা অসঙ্খতা, সঙ্খারপচ্চযা ৰিঞ্ঞাণন্তি যা তত্থ ধম্মট্ঠিততা ধম্মনিযামতা অসঙ্খতা…পে॰… জাতিপচ্চযা জরামরণন্তি যা তত্থ ধম্মট্ঠিততা ধম্মনিযামতা অসঙ্খতা, নিব্বানং অসঙ্খতন্তি? আমন্তা। দ্ৰাদস অসঙ্খতানীতি? ন হেৰং ৰত্তব্বে…পে॰… দ্ৰাদস অসঙ্খতানীতি? আমন্তা। দ্ৰাদস তাণানি দ্ৰাদস লেণানি…পে॰… অন্তরিকা ৰাতি? ন হেৰং ৰত্তব্বে…পে॰…।
Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, saṅkhārapaccayā viññāṇanti yā tattha dhammaṭṭhitatā dhammaniyāmatā asaṅkhatā…pe… jātipaccayā jarāmaraṇanti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Dvādasa asaṅkhatānīti? Na hevaṃ vattabbe…pe… dvādasa asaṅkhatānīti? Āmantā. Dvādasa tāṇāni dvādasa leṇāni…pe… antarikā vāti? Na hevaṃ vattabbe…pe….
পটিচ্চসমুপ্পাদকথা নিট্ঠিতা।
Paṭiccasamuppādakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ২. পটিচ্চসমুপ্পাদকথাৰণ্ণনা • 2. Paṭiccasamuppādakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ২. পটিচ্চসমুপ্পাদকথাৰণ্ণনা • 2. Paṭiccasamuppādakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ২. পটিচ্চসমুপ্পাদকথাৰণ্ণনা • 2. Paṭiccasamuppādakathāvaṇṇanā
