| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၆. ဆဋ္ဌဝဂ္ဂော
6. Chaṭṭhavaggo
(၅၄) ၂. ပဋိစ္စသမုပ္ပာဒကထာ
(54) 2. Paṭiccasamuppādakathā
၄၄၈. ပဋိစ္စသမုပ္ပာဒော အသင္ခတောတိ? အာမန္တာ။ နိဗ္ဗာနံ တာဏံ လေဏံ သရဏံ ပရာယနံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပာဒော အသင္ခတော, နိဗ္ဗာနံ အသင္ခတန္တိ? အာမန္တာ။ ဒ္ဝေ အသင္ခတာနီတိ? န ဟေဝံ ဝတ္တဗ္ဗေ။ပေ.။ ဒ္ဝေ အသင္ခတာနီတိ? အာမန္တာ။ ဒ္ဝေ တာဏာနိ ဒ္ဝေ လေဏာနိ ဒ္ဝေ သရဏာနိ ဒ္ဝေ ပရာယနာနိ ဒ္ဝေ အစ္စုတာနိ ဒ္ဝေ အမတာနိ ဒ္ဝေ နိဗ္ဗာနာနီတိ? န ဟေဝံ ဝတ္တဗ္ဗေ။ပေ.။ ဒ္ဝေ နိဗ္ဗာနာနီတိ? အာမန္တာ။ အတ္ထိ ဒ္ဝိန္နံ နိဗ္ဗာနာနံ ဥစ္စနီစတာ ဟီနပဏီတတာ ဥက္ကံသာဝကံသော သီမာ ဝာ ဘေဒော ဝာ ရာဇိ ဝာ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
448. Paṭiccasamuppādo asaṅkhatoti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… paṭiccasamuppādo asaṅkhato, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni dve leṇāni dve saraṇāni dve parāyanāni dve accutāni dve amatāni dve nibbānānīti? Na hevaṃ vattabbe…pe… dve nibbānānīti? Āmantā. Atthi dvinnaṃ nibbānānaṃ uccanīcatā hīnapaṇītatā ukkaṃsāvakaṃso sīmā vā bhedo vā rāji vā antarikā vāti? Na hevaṃ vattabbe…pe….
၄၄၉. ပဋိစ္စသမုပ္ပာဒော အသင္ခတောတိ? အာမန္တာ။ အဝိဇ္ဇာ အသင္ခတာတိ? န ဟေဝံ ဝတ္တဗ္ဗေ။ပေ.။ အဝိဇ္ဇာ သင္ခတာတိ? အာမန္တာ။ ပဋိစ္စသမုပ္ပာဒော သင္ခတောတိ ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပာဒော အသင္ခတောတိ? အာမန္တာ။ အဝိဇ္ဇာပစ္စယာ သင္ခာရာ အသင္ခတာတိ? န ဟေဝံ ဝတ္တဗ္ဗေ။ပေ.။ အဝိဇ္ဇာပစ္စယာ သင္ခာရာ သင္ခတာတိ? အာမန္တာ။ ပဋိစ္စသမုပ္ပာဒော သင္ခတောတိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပာဒော အသင္ခတောတိ? အာမန္တာ။ သင္ခာရပစ္စယာ ဝိညာဏံ အသင္ခတန္တိ? န ဟေဝံ ဝတ္တဗ္ဗေ။ပေ.။ သင္ခာရပစ္စယာ ဝိညာဏံ သင္ခတန္တိ? အာမန္တာ။ ပဋိစ္စသမုပ္ပာဒော သင္ခတောတိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပာဒော အသင္ခတောတိ? အာမန္တာ။ ဝိညာဏပစ္စယာ နာမရူပံ အသင္ခတန္တိ? န ဟေဝံ ဝတ္တဗ္ဗေ။ပေ.။ ဝိညာဏပစ္စယာ နာမရူပံ သင္ခတန္တိ? အာမန္တာ။ ပဋိစ္စသမုပ္ပာဒော သင္ခတောတိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပာဒော အသင္ခတောတိ? အာမန္တာ။ ဇာတိပစ္စယာ ဇရာမရဏံ အသင္ခတန္တိ? န ဟေဝံ ဝတ္တဗ္ဗေ။ပေ.။ ဇာတိပစ္စယာ ဇရာမရဏံ သင္ခတန္တိ? အာမန္တာ။ ပဋိစ္စသမုပ္ပာဒော သင္ခတောတိ? န ဟေဝံ ဝတ္တဗ္ဗေ။ပေ.။။
449. Paṭiccasamuppādo asaṅkhatoti? Āmantā. Avijjā asaṅkhatāti? Na hevaṃ vattabbe…pe… avijjā saṅkhatāti? Āmantā. Paṭiccasamuppādo saṅkhatoti ? Na hevaṃ vattabbe…pe… paṭiccasamuppādo asaṅkhatoti? Āmantā. Avijjāpaccayā saṅkhārā asaṅkhatāti? Na hevaṃ vattabbe…pe… avijjāpaccayā saṅkhārā saṅkhatāti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Saṅkhārapaccayā viññāṇaṃ asaṅkhatanti? Na hevaṃ vattabbe…pe… saṅkhārapaccayā viññāṇaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Viññāṇapaccayā nāmarūpaṃ asaṅkhatanti? Na hevaṃ vattabbe…pe… viññāṇapaccayā nāmarūpaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Jātipaccayā jarāmaraṇaṃ asaṅkhatanti? Na hevaṃ vattabbe…pe… jātipaccayā jarāmaraṇaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe….
၄၅၀. န ဝတ္တဗ္ဗံ – ‘‘ပဋိစ္စသမုပ္ပာဒော အသင္ခတော’’တိ? အာမန္တာ။ နနု ဝုတ္တံ ဘဂဝတာ – ‘‘ဇာတိပစ္စယာ, ဘိက္ခဝေ, ဇရာမရဏံ။ ဥပ္ပာဒာ ဝာ တထာဂတာနံ အနုပ္ပာဒာ ဝာ တထာဂတာနံ ဌိတာဝ သာ ဓာတု ဓမ္မဋ္ဌိတတာ ဓမ္မနိယာမတာ ဣဒပ္ပစ္စယတာ။ တံ တထာဂတော အဘိသမ္ဗုဇ္ဈတိ အဘိသမေတိ။ အဘိသမ္ဗုဇ္ဈိတ္ဝာ အဘိသမေတ္ဝာ အာစိက္ခတိ ဒေသေတိ ပညာပေတိ ပဋ္ဌပေတိ ဝိဝရတိ ဝိဘဇတိ ဥတ္တာနိံ ကရောတိ။ ‘ပသ္သထာ’တိ စာဟ – ဇာတိပစ္စယာ, ဘိက္ခဝေ, ဇရာမရဏံ ။ ဘဝပစ္စယာ, ဘိက္ခဝေ, ဇာတိ။ပေ.။ အဝိဇ္ဇာပစ္စယာ, ဘိက္ခဝေ, သင္ခာရာ။ ဥပ္ပာဒာ ဝာ တထာဂတာနံ အနုပ္ပာဒာ ဝာ တထာဂတာနံ ဌိတာဝ သာ ဓာတု။ပေ.။ ‘ပသ္သထာ’တိ စာဟ – အဝိဇ္ဇာပစ္စယာ, ဘိက္ခဝေ, သင္ခာရာ။ ဣတိ ခော, ဘိက္ခဝေ, ယာ တတ္ရ တထတာ အဝိတထတာ အနညထတာ ဣဒပ္ပစ္စယတာ – အယံ ဝုစ္စတိ, ဘိက္ခဝေ, ပဋိစ္စသမုပ္ပာဒော’’တိ 1။ အတ္ထေဝ သုတ္တန္တောတိ? အာမန္တာ။ တေန ဟိ ပဋိစ္စသမုပ္ပာဒော အသင္ခတောတိ။
450. Na vattabbaṃ – ‘‘paṭiccasamuppādo asaṅkhato’’ti? Āmantā. Nanu vuttaṃ bhagavatā – ‘‘jātipaccayā, bhikkhave, jarāmaraṇaṃ. Uppādā vā tathāgatānaṃ anuppādā vā tathāgatānaṃ ṭhitāva sā dhātu dhammaṭṭhitatā dhammaniyāmatā idappaccayatā. Taṃ tathāgato abhisambujjhati abhisameti. Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttāniṃ karoti. ‘Passathā’ti cāha – jātipaccayā, bhikkhave, jarāmaraṇaṃ . Bhavapaccayā, bhikkhave, jāti…pe… avijjāpaccayā, bhikkhave, saṅkhārā. Uppādā vā tathāgatānaṃ anuppādā vā tathāgatānaṃ ṭhitāva sā dhātu…pe… ‘passathā’ti cāha – avijjāpaccayā, bhikkhave, saṅkhārā. Iti kho, bhikkhave, yā tatra tathatā avitathatā anaññathatā idappaccayatā – ayaṃ vuccati, bhikkhave, paṭiccasamuppādo’’ti 2. Attheva suttantoti? Āmantā. Tena hi paṭiccasamuppādo asaṅkhatoti.
၄၅၁. အဝိဇ္ဇာပစ္စယာ သင္ခာရာတိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင္ခတာ, နိဗ္ဗာနံ အသင္ခတန္တိ? အာမန္တာ။ ဒ္ဝေ အသင္ခတာနီတိ? န ဟေဝံ ဝတ္တဗ္ဗေ။ပေ.။ ဒ္ဝေ အသင္ခတာနီတိ? အာမန္တာ။ ဒ္ဝေ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
451. Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
အဝိဇ္ဇာပစ္စယာ သင္ခာရာတိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင္ခတာ, သင္ခာရပစ္စယာ ဝိညာဏန္တိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင္ခတာ, နိဗ္ဗာနံ အသင္ခတန္တိ? အာမန္တာ။ တီဏိ အသင္ခတာနီတိ? န ဟေဝံ ဝတ္တဗ္ဗေ။ပေ.။။ တီဏိ အသင္ခတာနီတိ? အာမန္တာ။ တီဏိ တာဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, saṅkhārapaccayā viññāṇanti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Tīṇi asaṅkhatānīti? Na hevaṃ vattabbe…pe…. Tīṇi asaṅkhatānīti? Āmantā. Tīṇi tāṇāni…pe… antarikā vāti? Na hevaṃ vattabbe…pe….
အဝိဇ္ဇာပစ္စယာ သင္ခာရာတိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင္ခတာ, သင္ခာရပစ္စယာ ဝိညာဏန္တိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင္ခတာ။ပေ.။ ဇာတိပစ္စယာ ဇရာမရဏန္တိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင္ခတာ, နိဗ္ဗာနံ အသင္ခတန္တိ? အာမန္တာ။ ဒ္ဝာဒသ အသင္ခတာနီတိ? န ဟေဝံ ဝတ္တဗ္ဗေ။ပေ.။ ဒ္ဝာဒသ အသင္ခတာနီတိ? အာမန္တာ။ ဒ္ဝာဒသ တာဏာနိ ဒ္ဝာဒသ လေဏာနိ။ပေ.။ အန္တရိကာ ဝာတိ? န ဟေဝံ ဝတ္တဗ္ဗေ။ပေ.။။
Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, saṅkhārapaccayā viññāṇanti yā tattha dhammaṭṭhitatā dhammaniyāmatā asaṅkhatā…pe… jātipaccayā jarāmaraṇanti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Dvādasa asaṅkhatānīti? Na hevaṃ vattabbe…pe… dvādasa asaṅkhatānīti? Āmantā. Dvādasa tāṇāni dvādasa leṇāni…pe… antarikā vāti? Na hevaṃ vattabbe…pe….
ပဋိစ္စသမုပ္ပာဒကထာ နိဋ္ဌိတာ။
Paṭiccasamuppādakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၂. ပဋိစ္စသမုပ္ပာဒကထာဝဏ္ဏနာ • 2. Paṭiccasamuppādakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၂. ပဋိစ္စသမုပ္ပာဒကထာဝဏ္ဏနာ • 2. Paṭiccasamuppādakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၂. ပဋိစ္စသမုပ္ပာဒကထာဝဏ္ဏနာ • 2. Paṭiccasamuppādakathāvaṇṇanā
