| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༦. ཚཊྛཝགྒོ
6. Chaṭṭhavaggo
(༥༤) ༢. པཊིཙྩསམུཔྤཱདཀཐཱ
(54) 2. Paṭiccasamuppādakathā
༤༤༨. པཊིཙྩསམུཔྤཱདོ ཨསངྑཏོཏི? ཨཱམནྟཱ། ནིབྦཱནཾ ཏཱཎཾ ལེཎཾ སརཎཾ པརཱཡནཾ ཨཙྩུཏཾ ཨམཏནྟི? ན ཧེཝཾ ཝཏྟབྦེ…པེ॰… པཊིཙྩསམུཔྤཱདོ ཨསངྑཏོ, ནིབྦཱནཾ ཨསངྑཏནྟི? ཨཱམནྟཱ། དྭེ ཨསངྑཏཱནཱིཏི? ན ཧེཝཾ ཝཏྟབྦེ…པེ॰… དྭེ ཨསངྑཏཱནཱིཏི? ཨཱམནྟཱ། དྭེ ཏཱཎཱནི དྭེ ལེཎཱནི དྭེ སརཎཱནི དྭེ པརཱཡནཱནི དྭེ ཨཙྩུཏཱནི དྭེ ཨམཏཱནི དྭེ ནིབྦཱནཱནཱིཏི? ན ཧེཝཾ ཝཏྟབྦེ…པེ॰… དྭེ ནིབྦཱནཱནཱིཏི? ཨཱམནྟཱ། ཨཏྠི དྭིནྣཾ ནིབྦཱནཱནཾ ཨུཙྩནཱིཙཏཱ ཧཱིནཔཎཱིཏཏཱ ཨུཀྐཾསཱཝཀཾསོ སཱིམཱ ཝཱ བྷེདོ ཝཱ རཱཛི ཝཱ ཨནྟརིཀཱ ཝཱཏི? ན ཧེཝཾ ཝཏྟབྦེ…པེ॰…།
448. Paṭiccasamuppādo asaṅkhatoti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… paṭiccasamuppādo asaṅkhato, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni dve leṇāni dve saraṇāni dve parāyanāni dve accutāni dve amatāni dve nibbānānīti? Na hevaṃ vattabbe…pe… dve nibbānānīti? Āmantā. Atthi dvinnaṃ nibbānānaṃ uccanīcatā hīnapaṇītatā ukkaṃsāvakaṃso sīmā vā bhedo vā rāji vā antarikā vāti? Na hevaṃ vattabbe…pe….
༤༤༩. པཊིཙྩསམུཔྤཱདོ ཨསངྑཏོཏི? ཨཱམནྟཱ། ཨཝིཛྫཱ ཨསངྑཏཱཏི? ན ཧེཝཾ ཝཏྟབྦེ…པེ॰… ཨཝིཛྫཱ སངྑཏཱཏི? ཨཱམནྟཱ། པཊིཙྩསམུཔྤཱདོ སངྑཏོཏི ? ན ཧེཝཾ ཝཏྟབྦེ…པེ॰… པཊིཙྩསམུཔྤཱདོ ཨསངྑཏོཏི? ཨཱམནྟཱ། ཨཝིཛྫཱཔཙྩཡཱ སངྑཱརཱ ཨསངྑཏཱཏི? ན ཧེཝཾ ཝཏྟབྦེ…པེ॰… ཨཝིཛྫཱཔཙྩཡཱ སངྑཱརཱ སངྑཏཱཏི? ཨཱམནྟཱ། པཊིཙྩསམུཔྤཱདོ སངྑཏོཏི? ན ཧེཝཾ ཝཏྟབྦེ…པེ॰… པཊིཙྩསམུཔྤཱདོ ཨསངྑཏོཏི? ཨཱམནྟཱ། སངྑཱརཔཙྩཡཱ ཝིཉྙཱཎཾ ཨསངྑཏནྟི? ན ཧེཝཾ ཝཏྟབྦེ…པེ॰… སངྑཱརཔཙྩཡཱ ཝིཉྙཱཎཾ སངྑཏནྟི? ཨཱམནྟཱ། པཊིཙྩསམུཔྤཱདོ སངྑཏོཏི? ན ཧེཝཾ ཝཏྟབྦེ…པེ॰… པཊིཙྩསམུཔྤཱདོ ཨསངྑཏོཏི? ཨཱམནྟཱ། ཝིཉྙཱཎཔཙྩཡཱ ནཱམརཱུཔཾ ཨསངྑཏནྟི? ན ཧེཝཾ ཝཏྟབྦེ…པེ॰… ཝིཉྙཱཎཔཙྩཡཱ ནཱམརཱུཔཾ སངྑཏནྟི? ཨཱམནྟཱ། པཊིཙྩསམུཔྤཱདོ སངྑཏོཏི? ན ཧེཝཾ ཝཏྟབྦེ…པེ॰… པཊིཙྩསམུཔྤཱདོ ཨསངྑཏོཏི? ཨཱམནྟཱ། ཛཱཏིཔཙྩཡཱ ཛརཱམརཎཾ ཨསངྑཏནྟི? ན ཧེཝཾ ཝཏྟབྦེ…པེ॰… ཛཱཏིཔཙྩཡཱ ཛརཱམརཎཾ སངྑཏནྟི? ཨཱམནྟཱ། པཊིཙྩསམུཔྤཱདོ སངྑཏོཏི? ན ཧེཝཾ ཝཏྟབྦེ…པེ॰…།
449. Paṭiccasamuppādo asaṅkhatoti? Āmantā. Avijjā asaṅkhatāti? Na hevaṃ vattabbe…pe… avijjā saṅkhatāti? Āmantā. Paṭiccasamuppādo saṅkhatoti ? Na hevaṃ vattabbe…pe… paṭiccasamuppādo asaṅkhatoti? Āmantā. Avijjāpaccayā saṅkhārā asaṅkhatāti? Na hevaṃ vattabbe…pe… avijjāpaccayā saṅkhārā saṅkhatāti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Saṅkhārapaccayā viññāṇaṃ asaṅkhatanti? Na hevaṃ vattabbe…pe… saṅkhārapaccayā viññāṇaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Viññāṇapaccayā nāmarūpaṃ asaṅkhatanti? Na hevaṃ vattabbe…pe… viññāṇapaccayā nāmarūpaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe… paṭiccasamuppādo asaṅkhatoti? Āmantā. Jātipaccayā jarāmaraṇaṃ asaṅkhatanti? Na hevaṃ vattabbe…pe… jātipaccayā jarāmaraṇaṃ saṅkhatanti? Āmantā. Paṭiccasamuppādo saṅkhatoti? Na hevaṃ vattabbe…pe….
༤༥༠. ན ཝཏྟབྦཾ – ‘‘པཊིཙྩསམུཔྤཱདོ ཨསངྑཏོ’’ཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཛཱཏིཔཙྩཡཱ, བྷིཀྑཝེ, ཛརཱམརཎཾ། ཨུཔྤཱདཱ ཝཱ ཏཐཱགཏཱནཾ ཨནུཔྤཱདཱ ཝཱ ཏཐཱགཏཱནཾ ཋིཏཱཝ སཱ དྷཱཏུ དྷམྨཊྛིཏཏཱ དྷམྨནིཡཱམཏཱ ཨིདཔྤཙྩཡཏཱ། ཏཾ ཏཐཱགཏོ ཨབྷིསམྦུཛ྄ཛྷཏི ཨབྷིསམེཏི། ཨབྷིསམྦུཛ྄ཛྷིཏྭཱ ཨབྷིསམེཏྭཱ ཨཱཙིཀྑཏི དེསེཏི པཉྙཱཔེཏི པཊྛཔེཏི ཝིཝརཏི ཝིབྷཛཏི ཨུཏྟཱནིཾ ཀརོཏི། ‘པསྶཐཱ’ཏི ཙཱཧ – ཛཱཏིཔཙྩཡཱ, བྷིཀྑཝེ, ཛརཱམརཎཾ ། བྷཝཔཙྩཡཱ, བྷིཀྑཝེ, ཛཱཏི…པེ॰… ཨཝིཛྫཱཔཙྩཡཱ, བྷིཀྑཝེ, སངྑཱརཱ། ཨུཔྤཱདཱ ཝཱ ཏཐཱགཏཱནཾ ཨནུཔྤཱདཱ ཝཱ ཏཐཱགཏཱནཾ ཋིཏཱཝ སཱ དྷཱཏུ…པེ॰… ‘པསྶཐཱ’ཏི ཙཱཧ – ཨཝིཛྫཱཔཙྩཡཱ, བྷིཀྑཝེ, སངྑཱརཱ། ཨིཏི ཁོ, བྷིཀྑཝེ, ཡཱ ཏཏྲ ཏཐཏཱ ཨཝིཏཐཏཱ ཨནཉྙཐཏཱ ཨིདཔྤཙྩཡཏཱ – ཨཡཾ ཝུཙྩཏི, བྷིཀྑཝེ, པཊིཙྩསམུཔྤཱདོ’’ཏི 1། ཨཏྠེཝ སུཏྟནྟོཏི? ཨཱམནྟཱ། ཏེན ཧི པཊིཙྩསམུཔྤཱདོ ཨསངྑཏོཏི།
450. Na vattabbaṃ – ‘‘paṭiccasamuppādo asaṅkhato’’ti? Āmantā. Nanu vuttaṃ bhagavatā – ‘‘jātipaccayā, bhikkhave, jarāmaraṇaṃ. Uppādā vā tathāgatānaṃ anuppādā vā tathāgatānaṃ ṭhitāva sā dhātu dhammaṭṭhitatā dhammaniyāmatā idappaccayatā. Taṃ tathāgato abhisambujjhati abhisameti. Abhisambujjhitvā abhisametvā ācikkhati deseti paññāpeti paṭṭhapeti vivarati vibhajati uttāniṃ karoti. ‘Passathā’ti cāha – jātipaccayā, bhikkhave, jarāmaraṇaṃ . Bhavapaccayā, bhikkhave, jāti…pe… avijjāpaccayā, bhikkhave, saṅkhārā. Uppādā vā tathāgatānaṃ anuppādā vā tathāgatānaṃ ṭhitāva sā dhātu…pe… ‘passathā’ti cāha – avijjāpaccayā, bhikkhave, saṅkhārā. Iti kho, bhikkhave, yā tatra tathatā avitathatā anaññathatā idappaccayatā – ayaṃ vuccati, bhikkhave, paṭiccasamuppādo’’ti 2. Attheva suttantoti? Āmantā. Tena hi paṭiccasamuppādo asaṅkhatoti.
༤༥༡. ཨཝིཛྫཱཔཙྩཡཱ སངྑཱརཱཏི ཡཱ ཏཏྠ དྷམྨཊྛིཏཏཱ དྷམྨནིཡཱམཏཱ ཨསངྑཏཱ, ནིབྦཱནཾ ཨསངྑཏནྟི? ཨཱམནྟཱ། དྭེ ཨསངྑཏཱནཱིཏི? ན ཧེཝཾ ཝཏྟབྦེ…པེ॰… དྭེ ཨསངྑཏཱནཱིཏི? ཨཱམནྟཱ། དྭེ ཏཱཎཱནི…པེ॰… ཨནྟརིཀཱ ཝཱཏི? ན ཧེཝཾ ཝཏྟབྦེ…པེ॰…།
451. Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
ཨཝིཛྫཱཔཙྩཡཱ སངྑཱརཱཏི ཡཱ ཏཏྠ དྷམྨཊྛིཏཏཱ དྷམྨནིཡཱམཏཱ ཨསངྑཏཱ, སངྑཱརཔཙྩཡཱ ཝིཉྙཱཎནྟི ཡཱ ཏཏྠ དྷམྨཊྛིཏཏཱ དྷམྨནིཡཱམཏཱ ཨསངྑཏཱ, ནིབྦཱནཾ ཨསངྑཏནྟི? ཨཱམནྟཱ། ཏཱིཎི ཨསངྑཏཱནཱིཏི? ན ཧེཝཾ ཝཏྟབྦེ…པེ॰…། ཏཱིཎི ཨསངྑཏཱནཱིཏི? ཨཱམནྟཱ། ཏཱིཎི ཏཱཎཱནི…པེ॰… ཨནྟརིཀཱ ཝཱཏི? ན ཧེཝཾ ཝཏྟབྦེ…པེ॰…།
Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, saṅkhārapaccayā viññāṇanti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Tīṇi asaṅkhatānīti? Na hevaṃ vattabbe…pe…. Tīṇi asaṅkhatānīti? Āmantā. Tīṇi tāṇāni…pe… antarikā vāti? Na hevaṃ vattabbe…pe….
ཨཝིཛྫཱཔཙྩཡཱ སངྑཱརཱཏི ཡཱ ཏཏྠ དྷམྨཊྛིཏཏཱ དྷམྨནིཡཱམཏཱ ཨསངྑཏཱ, སངྑཱརཔཙྩཡཱ ཝིཉྙཱཎནྟི ཡཱ ཏཏྠ དྷམྨཊྛིཏཏཱ དྷམྨནིཡཱམཏཱ ཨསངྑཏཱ…པེ॰… ཛཱཏིཔཙྩཡཱ ཛརཱམརཎནྟི ཡཱ ཏཏྠ དྷམྨཊྛིཏཏཱ དྷམྨནིཡཱམཏཱ ཨསངྑཏཱ, ནིབྦཱནཾ ཨསངྑཏནྟི? ཨཱམནྟཱ། དྭཱདས ཨསངྑཏཱནཱིཏི? ན ཧེཝཾ ཝཏྟབྦེ…པེ॰… དྭཱདས ཨསངྑཏཱནཱིཏི? ཨཱམནྟཱ། དྭཱདས ཏཱཎཱནི དྭཱདས ལེཎཱནི…པེ॰… ཨནྟརིཀཱ ཝཱཏི? ན ཧེཝཾ ཝཏྟབྦེ…པེ॰…།
Avijjāpaccayā saṅkhārāti yā tattha dhammaṭṭhitatā dhammaniyāmatā asaṅkhatā, saṅkhārapaccayā viññāṇanti yā tattha dhammaṭṭhitatā dhammaniyāmatā asaṅkhatā…pe… jātipaccayā jarāmaraṇanti yā tattha dhammaṭṭhitatā dhammaniyāmatā asaṅkhatā, nibbānaṃ asaṅkhatanti? Āmantā. Dvādasa asaṅkhatānīti? Na hevaṃ vattabbe…pe… dvādasa asaṅkhatānīti? Āmantā. Dvādasa tāṇāni dvādasa leṇāni…pe… antarikā vāti? Na hevaṃ vattabbe…pe….
པཊིཙྩསམུཔྤཱདཀཐཱ ནིཊྛིཏཱ།
Paṭiccasamuppādakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༢. པཊིཙྩསམུཔྤཱདཀཐཱཝཎྞནཱ • 2. Paṭiccasamuppādakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༢. པཊིཙྩསམུཔྤཱདཀཐཱཝཎྞནཱ • 2. Paṭiccasamuppādakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༢. པཊིཙྩསམུཔྤཱདཀཐཱཝཎྞནཱ • 2. Paṭiccasamuppādakathāvaṇṇanā
