| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. படிச்சஸமுப்பாத³கதா²வண்ணனா
2. Paṭiccasamuppādakathāvaṇṇanā
448. இதா³னி படிச்சஸமுப்பாத³கதா² நாம ஹோதி. தத்த² யேஸங் நிதா³னவக்³கே³ ‘‘உப்பாதா³ வா ததா²க³தானங் அனுப்பாதா³ வா ததா²க³தானங் டி²தாவ ஸா தா⁴து த⁴ம்மட்டி²ததா’’திஆதி³வசனதோ (ஸங்॰ நி॰ 2.20) ‘‘படிச்சஸமுப்பாதோ³ அஸங்க²தோ’’தி லத்³தி⁴, ஸெய்யதா²பி புப்³ப³ஸேலியானஞ்ச மஹிஸாஸகானஞ்ச; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ.
448. Idāni paṭiccasamuppādakathā nāma hoti. Tattha yesaṃ nidānavagge ‘‘uppādā vā tathāgatānaṃ anuppādā vā tathāgatānaṃ ṭhitāva sā dhātu dhammaṭṭhitatā’’tiādivacanato (saṃ. ni. 2.20) ‘‘paṭiccasamuppādo asaṅkhato’’ti laddhi, seyyathāpi pubbaseliyānañca mahisāsakānañca; te sandhāya pucchā sakavādissa, paṭiññā itarassa.
449. அவிஜ்ஜா அஸங்க²தாதி ஆத³யோ பஞ்ஹா அவிஜ்ஜாதீ³னங்யேவ படிச்சஸமுப்பாத³பா⁴வத³ஸ்ஸனத்த²ங் வுத்தா. யேன பனத்தே²ன தத்த² ஏகேகங் அங்க³ங் ‘‘படிச்சஸமுப்பாதோ³’’தி வுச்சதி, ஸோ படிச்சஸமுப்பாத³விப⁴ங்கே³ வுத்தோயேவ.
449. Avijjāasaṅkhatāti ādayo pañhā avijjādīnaṃyeva paṭiccasamuppādabhāvadassanatthaṃ vuttā. Yena panatthena tattha ekekaṃ aṅgaṃ ‘‘paṭiccasamuppādo’’ti vuccati, so paṭiccasamuppādavibhaṅge vuttoyeva.
451. அவிஜ்ஜாபச்சயா ஸங்கா²ராதி யா தத்த² த⁴ம்மட்டி²ததாதிஆதி³ யேன ஸுத்தேன லத்³தி⁴ பதிட்டா²பிதா, தஸ்ஸேவ அத்த²த³ஸ்ஸனேன லத்³தி⁴பி⁴ந்த³னத்த²ங் வுத்தங். அயஞ்ஹெத்த² அத்தோ² – யா அயங் ஹெட்டா² ‘‘டி²தாவ ஸா தா⁴து த⁴ம்மட்டி²ததா த⁴ம்மனியாமதா’’தி வுத்தா ந ஸா அஞ்ஞத்ர அவிஜ்ஜாதீ³ஹி விஸுங் ஏகா அத்தி². அவிஜ்ஜாதீ³னங் பன பச்சயானங்யேவேதங் நாமங். உப்பன்னேபி ஹி ததா²க³தே அனுப்பன்னேபி அவிஜ்ஜாதோ ஸங்கா²ரா ஸம்ப⁴வந்தி, ஸங்கா²ராதீ³ஹி ச விஞ்ஞாணாதீ³னி, தஸ்மா ‘‘அவிஜ்ஜாபச்சயா ஸங்கா²ரா’’தி யா ஏதஸ்மிங் பதே³ ஸங்கா²ரத⁴ம்மானங் காரணட்டே²ன டி²ததாதி த⁴ம்மட்டி²ததா. தேஸங்யேவ ச த⁴ம்மானங் காரணட்டே²னேவ நியாமதாதி த⁴ம்மனியாமதாதி அவிஜ்ஜா வுச்சதி. ஸா ச அஸங்க²தா, நிப்³பா³னஞ்ச அஸங்க²தந்தி புச்ச²தி. பரவாதீ³ லத்³தி⁴வஸேன படிஜானித்வா புன த்³வே அஸங்க²தானீதி புட்டோ² ஸுத்தாபா⁴வேன படிக்கி²பித்வா லத்³தி⁴வஸேனேவ படிஜானாதி. ஸேஸபதே³ஸுபி ஏஸேவ நயோ. ஹெட்டா² வுத்தஸதி³ஸங் பன தத்த² வுத்தனயேனேவ வேதி³தப்³ப³ந்தி.
451. Avijjāpaccayā saṅkhārāti yā tattha dhammaṭṭhitatātiādi yena suttena laddhi patiṭṭhāpitā, tasseva atthadassanena laddhibhindanatthaṃ vuttaṃ. Ayañhettha attho – yā ayaṃ heṭṭhā ‘‘ṭhitāva sā dhātu dhammaṭṭhitatā dhammaniyāmatā’’ti vuttā na sā aññatra avijjādīhi visuṃ ekā atthi. Avijjādīnaṃ pana paccayānaṃyevetaṃ nāmaṃ. Uppannepi hi tathāgate anuppannepi avijjāto saṅkhārā sambhavanti, saṅkhārādīhi ca viññāṇādīni, tasmā ‘‘avijjāpaccayā saṅkhārā’’ti yā etasmiṃ pade saṅkhāradhammānaṃ kāraṇaṭṭhena ṭhitatāti dhammaṭṭhitatā. Tesaṃyeva ca dhammānaṃ kāraṇaṭṭheneva niyāmatāti dhammaniyāmatāti avijjā vuccati. Sā ca asaṅkhatā, nibbānañca asaṅkhatanti pucchati. Paravādī laddhivasena paṭijānitvā puna dve asaṅkhatānīti puṭṭho suttābhāvena paṭikkhipitvā laddhivaseneva paṭijānāti. Sesapadesupi eseva nayo. Heṭṭhā vuttasadisaṃ pana tattha vuttanayeneva veditabbanti.
படிச்சஸமுப்பாத³கதா²வண்ணனா.
Paṭiccasamuppādakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (54) 2. படிச்சஸமுப்பாத³கதா² • (54) 2. Paṭiccasamuppādakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. படிச்சஸமுப்பாத³கதா²வண்ணனா • 2. Paṭiccasamuppādakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. படிச்சஸமுப்பாத³கதா²வண்ணனா • 2. Paṭiccasamuppādakathāvaṇṇanā
