| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
ஸங்யுத்தனிகாயே
Saṃyuttanikāye
நிதா³னவக்³க³-அட்ட²கதா²
Nidānavagga-aṭṭhakathā
1. நிதா³னஸங்யுத்தங்
1. Nidānasaṃyuttaṃ
1. பு³த்³த⁴வக்³கோ³
1. Buddhavaggo
1. படிச்சஸமுப்பாத³ஸுத்தவண்ணனா
1. Paṭiccasamuppādasuttavaṇṇanā
1. ஏவங் மே ஸுதந்தி – நிதா³னவக்³கே³ பட²மங் படிச்சஸமுப்பாத³ஸுத்தங். தத்ராயங் அனுபுப்³ப³பத³வண்ணனா – தத்ர கோ² ப⁴க³வா பி⁴க்கூ² ஆமந்தேஸீதி, எத்த² தத்ராதி தே³ஸகாலபரிதீ³பனங். தஞ்ஹி ‘‘யங் ஸமயங் விஹரதி, தத்ர ஸமயே, யஸ்மிஞ்ச ஜேதவனே விஹரதி, தத்ர ஜேதவனே’’தி தீ³பேதி. பா⁴ஸிதப்³ப³யுத்தே வா தே³ஸகாலே தீ³பேதி. ந ஹி ப⁴க³வா அயுத்தே தே³ஸே காலே ச த⁴ம்மங் பா⁴ஸதி. ‘‘அகாலோ கோ² தாவ பா³ஹியா’’திஆதி³ (உதா³॰ 10) செத்த² ஸாத⁴கங். கோ²தி பத³பூரணமத்தே, அவதா⁴ரணே ஆதி³காலத்தே² வா நிபாதோ. ப⁴க³வாதி லோகக³ருதீ³பனங். பி⁴க்கூ²தி கதா²ஸவனயுத்தபுக்³க³லவசனங். அபிசெத்த² ‘‘பி⁴க்க²கோதி பி⁴க்கு², பி⁴க்கா²சரியங் அஜ்ஜூ²பக³தோதி பி⁴க்கூ²’’திஆதி³னா (பாரா॰ 45; விப⁴॰ 510) நயேன வசனத்தோ² வேதி³தப்³போ³. ஆமந்தேஸீதி ஆலபி, அபா⁴ஸி, ஸம்போ³தே⁴ஸி, அயமெத்த² அத்தோ². அஞ்ஞத்ர பன ஞாபனேபி ஹோதி. யதா²ஹ – ‘‘ஆமந்தயாமி வோ, பி⁴க்க²வே, படிவேத³யாமி வோ, பி⁴க்க²வே’’தி. பக்கோஸனேபி. யதா²ஹ – ‘‘ஏஹி த்வங், பி⁴க்கு², மம வசனேன ஸாரிபுத்தங் ஆமந்தேஹீ’’தி (அ॰ நி॰ 9.11). பி⁴க்க²வோதி ஆமந்தனாகாரதீ³பனங். தஞ்ச பி⁴க்க²னஸீலதாதி³கு³ணயோக³ஸித்³த⁴த்தா வுத்தங். பி⁴க்க²னஸீலதாகு³ணயுத்தோபி ஹி பி⁴க்கு², பி⁴க்க²னத⁴ம்மதாகு³ணயுத்தோபி பி⁴க்க²னே ஸாது⁴காரிதாகு³ணயுத்தோபீதி ஸத்³த³விதூ³ மஞ்ஞந்தி. தேன ச தேஸங் பி⁴க்க²னஸீலதாதி³கு³ணயோக³ஸித்³தே⁴ன வசனேன ஹீனாதி⁴கஜனஸேவிதவுத்திங் பகாஸெந்தோ உத்³த⁴ததீ³னபா⁴வனிக்³க³ஹங் கரோதி. ‘‘பி⁴க்க²வோ’’தி இமினா ச கருணாவிப்பா²ரஸொம்மஹத³யனயனநிபாதபுப்³ப³ங்க³மேன வசனேன தே அத்தனோ அபி⁴முகே² கரொந்தோ தேனேவ கதே²துகம்யதாதீ³பகேன நேஸங் வசனேன ஸோதுகம்யதங் ஜனேதி, தேனேவ ச ஸம்போ³த⁴னத்தே²ன ஸாது⁴கங் மனஸிகாரேபி நியோஜேதி. ஸாது⁴கங் மனஸிகாராயத்தா ஹி ஸாஸனஸம்பத்தி.
1.Evaṃme sutanti – nidānavagge paṭhamaṃ paṭiccasamuppādasuttaṃ. Tatrāyaṃ anupubbapadavaṇṇanā – tatra kho bhagavā bhikkhū āmantesīti, ettha tatrāti desakālaparidīpanaṃ. Tañhi ‘‘yaṃ samayaṃ viharati, tatra samaye, yasmiñca jetavane viharati, tatra jetavane’’ti dīpeti. Bhāsitabbayutte vā desakāle dīpeti. Na hi bhagavā ayutte dese kāle ca dhammaṃ bhāsati. ‘‘Akālo kho tāva bāhiyā’’tiādi (udā. 10) cettha sādhakaṃ. Khoti padapūraṇamatte, avadhāraṇe ādikālatthe vā nipāto. Bhagavāti lokagarudīpanaṃ. Bhikkhūti kathāsavanayuttapuggalavacanaṃ. Apicettha ‘‘bhikkhakoti bhikkhu, bhikkhācariyaṃ ajjhūpagatoti bhikkhū’’tiādinā (pārā. 45; vibha. 510) nayena vacanattho veditabbo. Āmantesīti ālapi, abhāsi, sambodhesi, ayamettha attho. Aññatra pana ñāpanepi hoti. Yathāha – ‘‘āmantayāmi vo, bhikkhave, paṭivedayāmi vo, bhikkhave’’ti. Pakkosanepi. Yathāha – ‘‘ehi tvaṃ, bhikkhu, mama vacanena sāriputtaṃ āmantehī’’ti (a. ni. 9.11). Bhikkhavoti āmantanākāradīpanaṃ. Tañca bhikkhanasīlatādiguṇayogasiddhattā vuttaṃ. Bhikkhanasīlatāguṇayuttopi hi bhikkhu, bhikkhanadhammatāguṇayuttopi bhikkhane sādhukāritāguṇayuttopīti saddavidū maññanti. Tena ca tesaṃ bhikkhanasīlatādiguṇayogasiddhena vacanena hīnādhikajanasevitavuttiṃ pakāsento uddhatadīnabhāvaniggahaṃ karoti. ‘‘Bhikkhavo’’ti iminā ca karuṇāvipphārasommahadayanayananipātapubbaṅgamena vacanena te attano abhimukhe karonto teneva kathetukamyatādīpakena nesaṃ vacanena sotukamyataṃ janeti, teneva ca sambodhanatthena sādhukaṃ manasikārepi niyojeti. Sādhukaṃ manasikārāyattā hi sāsanasampatti.
அபரேஸுபி தே³வமனுஸ்ஸேஸு விஜ்ஜமானேஸு கஸ்மா பி⁴க்கூ²யேவ ஆமந்தேஸீதி சே? ஜெட்ட²ஸெட்டா²ஸன்னஸதா³ஸன்னிஹிதபா⁴வதோ. ஸப்³ப³பரிஸஸாதா⁴ரணா ஹி ப⁴க³வதோ த⁴ம்மதே³ஸனா, பரிஸாய ஜெட்டா² பி⁴க்கூ² பட²மங் உப்பன்னத்தா, ஸெட்டா² அனகா³ரியபா⁴வங் ஆதி³ங் கத்வா ஸத்து²சரியானுவிதா⁴யகத்தா ஸகலஸாஸனபடிக்³கா³ஹகத்தா ச, ஆஸன்னா தத்த² நிஸின்னேஸு ஸத்து²ஸந்திகத்தா, ஸதா³ஸன்னிஹிதா ஸத்து²ஸந்திகாவசரத்தாதி. அபிச தே த⁴ம்மதே³ஸனாய பா⁴ஜனங் யதா²னுஸிட்ட²ங் படிபத்திஸப்³பா⁴வதோ. விஸேஸதோ ச ஏகச்சே பி⁴க்கூ²யேவ ஸந்தா⁴ய அயங் தே³ஸனாபீதி ஏவங் ஆமந்தேஸி.
Aparesupi devamanussesu vijjamānesu kasmā bhikkhūyeva āmantesīti ce? Jeṭṭhaseṭṭhāsannasadāsannihitabhāvato. Sabbaparisasādhāraṇā hi bhagavato dhammadesanā, parisāya jeṭṭhā bhikkhū paṭhamaṃ uppannattā, seṭṭhā anagāriyabhāvaṃ ādiṃ katvā satthucariyānuvidhāyakattā sakalasāsanapaṭiggāhakattā ca, āsannā tattha nisinnesu satthusantikattā, sadāsannihitā satthusantikāvacarattāti. Apica te dhammadesanāya bhājanaṃ yathānusiṭṭhaṃ paṭipattisabbhāvato. Visesato ca ekacce bhikkhūyeva sandhāya ayaṃ desanāpīti evaṃ āmantesi.
கிமத்த²ங் பன ப⁴க³வா த⁴ம்மங் தே³ஸெந்தோ பட²மங் பி⁴க்கூ² ஆமந்தேஸி, ந த⁴ம்மமேவ தே³ஸேஸீதி? ஸதிஜனநத்த²ங். பி⁴க்கூ² அஞ்ஞங் சிந்தெந்தாபி விக்கி²த்தசித்தாபி த⁴ம்மங் பச்சவெக்க²ந்தாபி கம்மட்டா²னங் மனஸிகரொந்தாபி நிஸின்னா ஹொந்தி. தே அனாமந்தெத்வா த⁴ம்மே தே³ஸியமானே ‘‘அயங் தே³ஸனா கிங்னிதா³னா கிங்பச்சயா கதமாய அட்டு²ப்பத்தியா தே³ஸிதா’’தி ஸல்லக்கே²துங் அஸக்கொந்தா து³க்³க³ஹிதங் வா க³ண்ஹெய்யுங், ந வா க³ண்ஹெய்யுங், தேன நேஸங் ஸதிஜனநத்த²ங் ப⁴க³வா பட²மங் ஆமந்தெத்வா பச்சா² த⁴ம்மங் தே³ஸேதி.
Kimatthaṃ pana bhagavā dhammaṃ desento paṭhamaṃ bhikkhū āmantesi, na dhammameva desesīti? Satijananatthaṃ. Bhikkhū aññaṃ cintentāpi vikkhittacittāpi dhammaṃ paccavekkhantāpi kammaṭṭhānaṃ manasikarontāpi nisinnā honti. Te anāmantetvā dhamme desiyamāne ‘‘ayaṃ desanā kiṃnidānā kiṃpaccayā katamāya aṭṭhuppattiyā desitā’’ti sallakkhetuṃ asakkontā duggahitaṃ vā gaṇheyyuṃ, na vā gaṇheyyuṃ, tena nesaṃ satijananatthaṃ bhagavā paṭhamaṃ āmantetvā pacchā dhammaṃ deseti.
ப⁴த³ந்தேதி கா³ரவவசனமேதங், ஸத்து²னோ படிவசனதா³னங் வா. அபிசெத்த² ‘‘பி⁴க்க²வோ’’தி வத³மானோ ப⁴க³வா பி⁴க்கூ² ஆலபதி. ‘‘ப⁴த³ந்தே’’தி வத³மானா தே ப⁴க³வந்தங் பச்சாலபந்தி. ததா² ஹி ‘‘பி⁴க்க²வோ’’தி ப⁴க³வா ஆபா⁴ஸதி, ‘‘ப⁴த³ந்தே’’தி பச்சாபா⁴ஸந்தி. ‘‘பி⁴க்க²வோ’’தி படிவசனங் தா³பேதி, ‘‘ப⁴த³ந்தே’’தி படிவசனங் தெ³ந்தி. தே பி⁴க்கூ²தி யே ப⁴க³வா ஆமந்தேஸி, தே. ப⁴க³வதோ பச்சஸ்ஸோஸுந்தி ப⁴க³வதோ ஆமந்தனங் பதிஅஸ்ஸோஸுங், அபி⁴முகா² ஹுத்வா ஸுணிங்ஸு ஸம்படிச்சி²ங்ஸு படிக்³க³ஹேஸுந்தி அத்தோ². ப⁴க³வா ஏதத³வோசாதி, ப⁴க³வா ஏதங் இதா³னி வத்தப்³ப³ங் ஸகலஸுத்தங் அவோச. எத்தாவதா யங் ஆயஸ்மதா ஆனந்தே³ன அத்த²ப்³யஞ்ஜனஸம்பன்னஸ்ஸ பு³த்³தா⁴னங் தே³ஸனாஞாணக³ம்பீ⁴ரபா⁴வஸங்ஸூசகஸ்ஸ இமஸ்ஸ ஸுத்தஸ்ஸ ஸுகா²வகா³ஹணத்த²ங் காலதே³ஸதே³ஸகபரிஸாபதே³ஸப்படிமண்டி³தங் நிதா³னங் பா⁴ஸிதங், தஸ்ஸ அத்த²வண்ணனா ஸமத்தா.
Bhadanteti gāravavacanametaṃ, satthuno paṭivacanadānaṃ vā. Apicettha ‘‘bhikkhavo’’ti vadamāno bhagavā bhikkhū ālapati. ‘‘Bhadante’’ti vadamānā te bhagavantaṃ paccālapanti. Tathā hi ‘‘bhikkhavo’’ti bhagavā ābhāsati, ‘‘bhadante’’ti paccābhāsanti. ‘‘Bhikkhavo’’ti paṭivacanaṃ dāpeti, ‘‘bhadante’’ti paṭivacanaṃ denti. Te bhikkhūti ye bhagavā āmantesi, te. Bhagavato paccassosunti bhagavato āmantanaṃ patiassosuṃ, abhimukhā hutvā suṇiṃsu sampaṭicchiṃsu paṭiggahesunti attho. Bhagavā etadavocāti, bhagavā etaṃ idāni vattabbaṃ sakalasuttaṃ avoca. Ettāvatā yaṃ āyasmatā ānandena atthabyañjanasampannassa buddhānaṃ desanāñāṇagambhīrabhāvasaṃsūcakassa imassa suttassa sukhāvagāhaṇatthaṃ kāladesadesakaparisāpadesappaṭimaṇḍitaṃ nidānaṃ bhāsitaṃ, tassa atthavaṇṇanā samattā.
இதா³னி படிச்சஸமுப்பாத³ங் வோதிஆதி³னா நயேன ப⁴க³வதா நிக்கி²த்தஸ்ஸ ஸுத்தஸ்ஸ ஸங்வண்ணனாய ஓகாஸோ அனுப்பத்தோ. ஸா பனேஸா ஸுத்தவண்ணனா யஸ்மா ஸுத்தனிக்கே²பங் விசாரெத்வா வுச்சமானா பாகடா ஹோதி, தஸ்மா ஸுத்தனிக்கே²பங் தாவ விசாரெஸ்ஸாம. சத்தாரோ ஹி ஸுத்தனிக்கே²பா – அத்தஜ்ஜா²ஸயோ, பரஜ்ஜா²ஸயோ, புச்சா²வஸிகோ, அட்டு²ப்பத்திகோதி. தத்த² யானி ஸுத்தானி ப⁴க³வா பரேஹி அனஜ்ஜி²ட்டோ² கேவலங் அத்தனோ அஜ்ஜா²ஸயேனேவ கதே²தி, ஸெய்யதி²த³ங் – த³ஸப³லஸுத்தந்தஹாரகோ சந்தோ³பம-வீணோபம-ஸம்மப்பதா⁴ன-இத்³தி⁴பாத³-இந்த்³ரியப³ல-பொ³ஜ்ஜ²ங்க³மக்³க³ங்க³-ஸுத்தந்தஹாரகோதி ஏவமாதீ³னி, தேஸங் அத்தஜ்ஜா²ஸயோ நிக்கே²போ.
Idāni paṭiccasamuppādaṃ votiādinā nayena bhagavatā nikkhittassa suttassa saṃvaṇṇanāya okāso anuppatto. Sā panesā suttavaṇṇanā yasmā suttanikkhepaṃ vicāretvā vuccamānā pākaṭā hoti, tasmā suttanikkhepaṃ tāva vicāressāma. Cattāro hi suttanikkhepā – attajjhāsayo, parajjhāsayo, pucchāvasiko, aṭṭhuppattikoti. Tattha yāni suttāni bhagavā parehi anajjhiṭṭho kevalaṃ attano ajjhāsayeneva katheti, seyyathidaṃ – dasabalasuttantahārako candopama-vīṇopama-sammappadhāna-iddhipāda-indriyabala-bojjhaṅgamaggaṅga-suttantahārakoti evamādīni, tesaṃ attajjhāsayo nikkhepo.
யானி பன ‘‘பரிபக்கா கோ² ராஹுலஸ்ஸ விமுத்திபரிபாசனீயா த⁴ம்மா. யங்னூனாஹங் ராஹுலங் உத்தரிங் ஆஸவானங் க²யே வினெய்ய’’ந்தி (ஸங்॰ நி॰ 4.121; ம॰ நி॰ 3.416) ஏவங் பரேஸங் அஜ்ஜா²ஸயங் க²ந்திங் நிஜ்ஜா²னக்க²மங் மனங் அபி⁴னீஹாரங் பு³ஜ்ஜ²னபா⁴வஞ்ச அபெக்கி²த்வா பரஜ்ஜா²ஸயவஸேன கதி²தானி, ஸெய்யதி²த³ங் – சூளராஹுலோவாத³ஸுத்தங், மஹாராஹுலோவாத³ஸுத்தங், த⁴ம்மசக்கப்பவத்தனங், அனத்தலக்க²ணஸுத்தங், ஆஸீவிஸோபமஸுத்தங், தா⁴துவிப⁴ங்க³ஸுத்தந்தி, ஏவமாதீ³னி, தேஸங் பரஜ்ஜா²ஸயோ நிக்கே²போ.
Yāni pana ‘‘paripakkā kho rāhulassa vimuttiparipācanīyā dhammā. Yaṃnūnāhaṃ rāhulaṃ uttariṃ āsavānaṃ khaye vineyya’’nti (saṃ. ni. 4.121; ma. ni. 3.416) evaṃ paresaṃ ajjhāsayaṃ khantiṃ nijjhānakkhamaṃ manaṃ abhinīhāraṃ bujjhanabhāvañca apekkhitvā parajjhāsayavasena kathitāni, seyyathidaṃ – cūḷarāhulovādasuttaṃ, mahārāhulovādasuttaṃ, dhammacakkappavattanaṃ, anattalakkhaṇasuttaṃ, āsīvisopamasuttaṃ, dhātuvibhaṅgasuttanti, evamādīni, tesaṃ parajjhāsayo nikkhepo.
ப⁴க³வந்தங் பன உபஸங்கமித்வா சதஸ்ஸோ பரிஸா சத்தாரோ வண்ணா நாகா³ ஸுபண்ணா க³ந்த⁴ப்³பா³ அஸுரா யக்கா² மஹாராஜானோ தாவதிங்ஸாத³யோ தே³வா மஹாப்³ரஹ்மாதி ஏவமாத³யோ ‘‘பொ³ஜ்ஜ²ங்கா³ பொ³ஜ்ஜ²ங்கா³தி, ப⁴ந்தே, வுச்சந்தி – (ஸங்॰ நி॰ 5.202) நீவரணா நீவரணாதி, ப⁴ந்தே, வுச்சந்தி – இமே நு கோ², ப⁴ந்தே, பஞ்சுபாதா³னக்க²ந்தா⁴, கிங்ஸூத⁴ வித்தங் புரிஸஸ்ஸ ஸெட்ட²’’ந்திஆதி³னா (ஸங்॰ நி॰ 1.246; ஸு॰ நி॰ 183) நயேன பஞ்ஹங் புச்ச²ந்தி. ஏவங் புட்டே²ன ப⁴க³வதா யானி கதி²தானி பொ³ஜ்ஜ²ங்க³ஸங்யுத்தாதீ³னி, யானி வா பனஞ்ஞானிபி தே³வதாஸங்யுத்த, மாரஸங்யுத்த, ப்³ரஹ்மஸங்யுத்த, ஸக்கபஞ்ஹ, சூளவேத³ல்ல, மஹாவேத³ல்ல, ஸாமஞ்ஞப²லஆளவக, ஸூசிலோம, க²ரலோமஸுத்தாதீ³னி, தேஸங் புச்சா²வஸிகோ நிக்கே²போ.
Bhagavantaṃ pana upasaṅkamitvā catasso parisā cattāro vaṇṇā nāgā supaṇṇā gandhabbā asurā yakkhā mahārājāno tāvatiṃsādayo devā mahābrahmāti evamādayo ‘‘bojjhaṅgā bojjhaṅgāti, bhante, vuccanti – (saṃ. ni. 5.202) nīvaraṇā nīvaraṇāti, bhante, vuccanti – ime nu kho, bhante, pañcupādānakkhandhā, kiṃsūdha vittaṃ purisassa seṭṭha’’ntiādinā (saṃ. ni. 1.246; su. ni. 183) nayena pañhaṃ pucchanti. Evaṃ puṭṭhena bhagavatā yāni kathitāni bojjhaṅgasaṃyuttādīni, yāni vā panaññānipi devatāsaṃyutta, mārasaṃyutta, brahmasaṃyutta, sakkapañha, cūḷavedalla, mahāvedalla, sāmaññaphalaāḷavaka, sūciloma, kharalomasuttādīni, tesaṃ pucchāvasiko nikkhepo.
யானி பன தானி உப்பன்னங் காரணங் படிச்ச கதி²தானி, ஸெய்யதி²த³ங் – த⁴ம்மதா³யாத³ங். சூளஸீஹனாத³ஸுத்தங் புத்தமங்ஸூபமங் தா³ருக்க²ந்தூ⁴பமங் அக்³கி³க்க²ந்தூ⁴பமங் பே²ணபிண்டூ³பமங் பாரிச்ச²த்தகூபமந்தி ஏவமாதீ³னி, தேஸங் அட்டு²ப்பத்திகோ நிக்கே²போ.
Yāni pana tāni uppannaṃ kāraṇaṃ paṭicca kathitāni, seyyathidaṃ – dhammadāyādaṃ. Cūḷasīhanādasuttaṃ puttamaṃsūpamaṃ dārukkhandhūpamaṃ aggikkhandhūpamaṃ pheṇapiṇḍūpamaṃ pāricchattakūpamanti evamādīni, tesaṃ aṭṭhuppattiko nikkhepo.
ஏவமேதேஸு சதூஸு நிக்கே²பேஸு இமஸ்ஸ படிச்சஸமுப்பாத³ஸுத்தஸ்ஸ பரஜ்ஜா²ஸயோ நிக்கே²போ. பரபுக்³க³லஜ்ஜா²ஸயவஸேன ஹித³ங் ப⁴க³வதா நிக்கி²த்தங். கதமேஸங் புக்³க³லானங் அஜ்ஜா²ஸயவஸேனாதி? உக்³க⁴டிதஞ்ஞூனங். சத்தாரோ ஹி புக்³க³லா உக்³க⁴டிதஞ்ஞூ விபஞ்சிதஞ்ஞூ நெய்யோ பத³பரமோதி. தத்த² யஸ்ஸ புக்³க³லஸ்ஸ ஸஹ உதா³ஹடவேலாய த⁴ம்மாபி⁴ஸமயோ ஹோதி, அயங் வுச்சதி புக்³க³லோ உக்³க⁴டிதஞ்ஞூ. யஸ்ஸ புக்³க³லஸ்ஸ ஸங்கி²த்தேன பா⁴ஸிதஸ்ஸ வித்தா²ரேன அத்தே² விப⁴ஜியமானே த⁴ம்மாபி⁴ஸமயோ ஹோதி, அயங் வுச்சதி புக்³க³லோ விபஞ்சிதஞ்ஞூ. யஸ்ஸ புக்³க³லஸ்ஸ உத்³தே³ஸதோ பரிபுச்ச²தோ யோனிஸோ மனஸிகரோதோ, கல்யாணமித்தே ஸேவதோ, ப⁴ஜதோ, பயிருபாஸதோ, அனுபுப்³பே³ன த⁴ம்மாபி⁴ஸமயோ ஹோதி, அயங் வுச்சதி புக்³க³லோ நெய்யோ. யஸ்ஸ புக்³க³லஸ்ஸ ப³ஹும்பி ஸுணதோ, ப³ஹும்பி தா⁴ரயதோ, ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி, அயங் வுச்சதி புக்³க³லோ பத³பரமோ. இதி இமேஸு சதூஸு புக்³க³லேஸு உக்³க⁴டிதஞ்ஞூபுக்³க³லானங் அஜ்ஜா²ஸயவஸேன இத³ங் ஸுத்தங் நிக்கி²த்தங்.
Evametesu catūsu nikkhepesu imassa paṭiccasamuppādasuttassa parajjhāsayo nikkhepo. Parapuggalajjhāsayavasena hidaṃ bhagavatā nikkhittaṃ. Katamesaṃ puggalānaṃ ajjhāsayavasenāti? Ugghaṭitaññūnaṃ. Cattāro hi puggalā ugghaṭitaññū vipañcitaññū neyyo padaparamoti. Tattha yassa puggalassa saha udāhaṭavelāya dhammābhisamayo hoti, ayaṃ vuccati puggalo ugghaṭitaññū. Yassa puggalassa saṃkhittena bhāsitassa vitthārena atthe vibhajiyamāne dhammābhisamayo hoti, ayaṃ vuccati puggalo vipañcitaññū. Yassa puggalassa uddesato paripucchato yoniso manasikaroto, kalyāṇamitte sevato, bhajato, payirupāsato, anupubbena dhammābhisamayo hoti, ayaṃ vuccati puggalo neyyo. Yassa puggalassa bahumpi suṇato, bahumpi dhārayato, bahumpi vācayato na tāya jātiyā dhammābhisamayo hoti, ayaṃ vuccati puggalo padaparamo. Iti imesu catūsu puggalesu ugghaṭitaññūpuggalānaṃ ajjhāsayavasena idaṃ suttaṃ nikkhittaṃ.
ததா³ கிர பஞ்சஸதா ஜனபத³வாஸிகா பி⁴க்கூ² ஸப்³பே³வ ஏகசரா த்³விசரா திசரா சதுசரா பஞ்சசரா ஸபா⁴க³வுத்தினோ து⁴தங்க³த⁴ரா ஆரத்³த⁴வீரியா யுத்தயோகா³ விபஸ்ஸகா ஸண்ஹங் ஸுகு²மங் ஸுஞ்ஞதங் பச்சயாகாரதே³ஸனங் பத்த²யமானா ஸாயன்ஹஸமயே ப⁴க³வந்தங் உபஸங்கமித்வா, வந்தி³த்வா, ரத்தகம்ப³லஸாணியா பரிக்கி²பமானா விய தே³ஸனங் பச்சாஸீஸமானா பரிவாரெத்வா நிஸீதி³ங்ஸு. தேஸங் அஜ்ஜா²ஸயவஸேன ப⁴க³வா இத³ங் ஸுத்தங் ஆரபி⁴. யதா² ஹி சே²கோ சித்தகாரோ அபரிகம்மகதபி⁴த்திங் லபி⁴த்வா, ந ஆதி³தோவ ரூபங் ஸமுட்டா²பேஸி, மஹாமத்திகலேபாதீ³ஹி பன பி⁴த்திபரிகம்மங் தாவ கத்வா , கதபரிகம்மாய பி⁴த்தியா ரூபங் ஸமுட்டா²பேதி, கதபரிகம்மங் பன பி⁴த்திங் லபி⁴த்வா, பி⁴த்திபரிகம்மப்³யாபாரங் அகத்வா, ரங்க³ஜாதானி யோஜெத்வா, வட்டிகங் வா தூலிகங் வா ஆதா³ய ரூபமேவ ஸமுட்டா²பேதி, ஏவமேவ ப⁴க³வா அகதாபி⁴னிவேஸங் ஆதி³கம்மிககுலபுத்தங் லபி⁴த்வா நாஸ்ஸ ஆதி³தோவ அரஹத்தபத³ட்டா²னங் ஸண்ஹங் ஸுகு²மங் ஸுஞ்ஞதங் விபஸ்ஸனாலக்க²ணங் ஆசிக்க²தி, ஸீலஸமாதி⁴கம்மஸ்ஸகதாதி³ட்டி²ஸம்பதா³ய பன யோஜெந்தோ புப்³ப³பா⁴க³படிபத³ங் தாவ ஆசிக்க²தி. யங் ஸந்தா⁴ய வுத்தங் –
Tadā kira pañcasatā janapadavāsikā bhikkhū sabbeva ekacarā dvicarā ticarā catucarā pañcacarā sabhāgavuttino dhutaṅgadharā āraddhavīriyā yuttayogā vipassakā saṇhaṃ sukhumaṃ suññataṃ paccayākāradesanaṃ patthayamānā sāyanhasamaye bhagavantaṃ upasaṅkamitvā, vanditvā, rattakambalasāṇiyā parikkhipamānā viya desanaṃ paccāsīsamānā parivāretvā nisīdiṃsu. Tesaṃ ajjhāsayavasena bhagavā idaṃ suttaṃ ārabhi. Yathā hi cheko cittakāro aparikammakatabhittiṃ labhitvā, na āditova rūpaṃ samuṭṭhāpesi, mahāmattikalepādīhi pana bhittiparikammaṃ tāva katvā , kataparikammāya bhittiyā rūpaṃ samuṭṭhāpeti, kataparikammaṃ pana bhittiṃ labhitvā, bhittiparikammabyāpāraṃ akatvā, raṅgajātāni yojetvā, vaṭṭikaṃ vā tūlikaṃ vā ādāya rūpameva samuṭṭhāpeti, evameva bhagavā akatābhinivesaṃ ādikammikakulaputtaṃ labhitvā nāssa āditova arahattapadaṭṭhānaṃ saṇhaṃ sukhumaṃ suññataṃ vipassanālakkhaṇaṃ ācikkhati, sīlasamādhikammassakatādiṭṭhisampadāya pana yojento pubbabhāgapaṭipadaṃ tāva ācikkhati. Yaṃ sandhāya vuttaṃ –
‘‘தஸ்மாதிஹ த்வங், பி⁴க்கு², ஆதி³மேவ விஸோதே⁴ஹி குஸலேஸு த⁴ம்மேஸு. கோ சாதி³ குஸலானங் த⁴ம்மானங்? ஸீலஞ்ச ஸுவிஸுத்³த⁴ங் தி³ட்டி² ச உஜுகா. யதோ கோ² தே, பி⁴க்கு², ஸீலஞ்ச ஸுவிஸுத்³த⁴ங் ப⁴விஸ்ஸதி தி³ட்டி² ச உஜுகா. ததோ த்வங், பி⁴க்கு², ஸீலங் நிஸ்ஸாய ஸீலே பதிட்டா²ய சத்தாரோ ஸதிபட்டா²னே திவிதே⁴ன பா⁴வெய்யாஸி. கதமே சத்தாரோ? இத⁴ த்வங், பி⁴க்கு², அஜ்ஜ²த்தங் வா காயே காயானுபஸ்ஸீ விஹராஹி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். ப³ஹித்³தா⁴ வா காயே…பே॰… அஜ்ஜ²த்தப³ஹித்³தா⁴ வா காயே…பே॰… த⁴ம்மேஸு த⁴ம்மானுபஸ்ஸீ விஹராஹி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். யதோ கோ² த்வங், பி⁴க்கு², ஸீலங் நிஸ்ஸாய ஸீலே பதிட்டா²ய இமே சத்தாரோ ஸதிபட்டா²னே ஏவங் திவிதே⁴ன பா⁴வெஸ்ஸஸி, ததோ துய்ஹங், பி⁴க்கு², யா ரத்தி வா தி³வஸோ வா ஆக³மிஸ்ஸதி, வுத்³தி⁴யேவ பாடிகங்கா² குஸலேஸு த⁴ம்மேஸு, நோ பரிஹானீ’’தி (ஸங்॰ நி॰ 5.369).
‘‘Tasmātiha tvaṃ, bhikkhu, ādimeva visodhehi kusalesu dhammesu. Ko cādi kusalānaṃ dhammānaṃ? Sīlañca suvisuddhaṃ diṭṭhi ca ujukā. Yato kho te, bhikkhu, sīlañca suvisuddhaṃ bhavissati diṭṭhi ca ujukā. Tato tvaṃ, bhikkhu, sīlaṃ nissāya sīle patiṭṭhāya cattāro satipaṭṭhāne tividhena bhāveyyāsi. Katame cattāro? Idha tvaṃ, bhikkhu, ajjhattaṃ vā kāye kāyānupassī viharāhi ātāpī sampajāno satimā vineyya loke abhijjhādomanassaṃ. Bahiddhā vā kāye…pe… ajjhattabahiddhā vā kāye…pe… dhammesu dhammānupassī viharāhi ātāpī sampajāno satimā vineyya loke abhijjhādomanassaṃ. Yato kho tvaṃ, bhikkhu, sīlaṃ nissāya sīle patiṭṭhāya ime cattāro satipaṭṭhāne evaṃ tividhena bhāvessasi, tato tuyhaṃ, bhikkhu, yā ratti vā divaso vā āgamissati, vuddhiyeva pāṭikaṅkhā kusalesu dhammesu, no parihānī’’ti (saṃ. ni. 5.369).
ஏவங் ஆதி³கம்மிககுலபுத்தஸ்ஸ ஸீலகதா²ய பரிகம்மங் கதெ²த்வா, அரஹத்தபத³ட்டா²னங் ஸண்ஹங் ஸுகு²மங் ஸுஞ்ஞதங் விபஸ்ஸனாலக்க²ணங் ஆசிக்க²தி.
Evaṃ ādikammikakulaputtassa sīlakathāya parikammaṃ kathetvā, arahattapadaṭṭhānaṃ saṇhaṃ sukhumaṃ suññataṃ vipassanālakkhaṇaṃ ācikkhati.
பரிஸுத்³த⁴ஸீலங் பன ஆரத்³த⁴வீரியங் யுத்தயோக³ங் விபஸ்ஸகங் லபி⁴த்வா, நாஸ்ஸ புப்³ப³பா⁴க³படிபத³ங் ஆசிக்க²தி, உஜுகமேவ பன அரஹத்தபத³ட்டா²னங் ஸண்ஹங் ஸுகு²மங் ஸுஞ்ஞதங் விபஸ்ஸனாலக்க²ணங் ஆசிக்க²தி. இமே பஞ்சஸதா பி⁴க்கூ² புப்³ப³பா⁴க³படிபத³ங் பரிஸோதெ⁴த்வா டி²தா ஸுத⁴ந்தஸுவண்ணஸதி³ஸா ஸுபரிமஜ்ஜிதமணிக்க²ந்த⁴ஸன்னிபா⁴, ஏகோ லோகுத்தரமக்³கோ³வ நேஸங் அனாக³தோ. இதி தஸ்ஸாக³மனத்தா²ய ஸத்தா² தேஸங் அஜ்ஜா²ஸயங் அபெக்க²மானோ இத³ங் ஸுத்தங் ஆரபி⁴.
Parisuddhasīlaṃ pana āraddhavīriyaṃ yuttayogaṃ vipassakaṃ labhitvā, nāssa pubbabhāgapaṭipadaṃ ācikkhati, ujukameva pana arahattapadaṭṭhānaṃ saṇhaṃ sukhumaṃ suññataṃ vipassanālakkhaṇaṃ ācikkhati. Ime pañcasatā bhikkhū pubbabhāgapaṭipadaṃ parisodhetvā ṭhitā sudhantasuvaṇṇasadisā suparimajjitamaṇikkhandhasannibhā, eko lokuttaramaggova nesaṃ anāgato. Iti tassāgamanatthāya satthā tesaṃ ajjhāsayaṃ apekkhamāno idaṃ suttaṃ ārabhi.
தத்த² படிச்சஸமுப்பாத³ந்தி பச்சயாகாரங். பச்சயாகாரோ ஹி அஞ்ஞமஞ்ஞங் படிச்ச ஸஹிதே த⁴ம்மே உப்பாதே³தி. தஸ்மா படிச்சஸமுப்பாதோ³தி வுச்சதி. அயமெத்த² ஸங்கே²போ, வித்தா²ரோ பன விஸுத்³தி⁴மக்³க³தோ க³ஹேதப்³போ³.
Tattha paṭiccasamuppādanti paccayākāraṃ. Paccayākāro hi aññamaññaṃ paṭicca sahite dhamme uppādeti. Tasmā paṭiccasamuppādoti vuccati. Ayamettha saṅkhepo, vitthāro pana visuddhimaggato gahetabbo.
வோதி அயங் வோ-ஸத்³தோ³ பச்சத்த-உபயோக³கரண-ஸம்பதா³ன-ஸாமிவசன-பத³பூரணேஸு தி³ஸ்ஸதி. ‘‘கச்சி பன வோ அனுருத்³தா⁴ ஸமக்³கா³ ஸம்மோத³மானா’’திஆதீ³ஸு (ம॰ நி॰ 1.326; மஹாவ॰ 466) ஹி பச்சத்தே தி³ஸ்ஸதி. ‘‘க³ச்ச²த², பி⁴க்க²வே, பணாமேமி வோ’’திஆதீ³ஸு (ம॰ நி॰ 2.157) உபயோகே³. ‘‘ந வோ மம ஸந்திகே வத்த²ப்³ப³’’ந்திஆதீ³ஸு (ம॰ நி॰ 2.157) கரணே. ‘‘வனபத்த²பரியாயங் வோ, பி⁴க்க²வே, தே³ஸெஸ்ஸாமீ’’திஆதீ³ஸு (ம॰ நி॰ 1.190) ஸம்பதா³னே. ‘‘ஸப்³பே³ஸங் வோ, ஸாரிபுத்த, ஸுபா⁴ஸித’’ந்திஆதீ³ஸு (ம॰ நி॰ 1.345) ஸாமிவசனே. ‘‘யே ஹி வோ அரியா பரிஸுத்³த⁴காயகம்மந்தா’’திஆதீ³ஸு (ம॰ நி॰ 1.35) பத³பூரணமத்தே. இத⁴ பனாயங் ஸம்பதா³னே த³ட்ட²ப்³போ³. பி⁴க்க²வேதி பதிஸ்ஸவேன அபி⁴முகீ²பூ⁴தானங் புன ஆலபனங். தே³ஸெஸ்ஸாமீதி தே³ஸனாபடிஜானநங். தங் ஸுணாதா²தி தங் படிச்சஸமுப்பாத³ங் தங் தே³ஸனங் மயா வுச்சமானங் ஸுணாத².
Voti ayaṃ vo-saddo paccatta-upayogakaraṇa-sampadāna-sāmivacana-padapūraṇesu dissati. ‘‘Kacci pana vo anuruddhā samaggā sammodamānā’’tiādīsu (ma. ni. 1.326; mahāva. 466) hi paccatte dissati. ‘‘Gacchatha, bhikkhave, paṇāmemi vo’’tiādīsu (ma. ni. 2.157) upayoge. ‘‘Na vo mama santike vatthabba’’ntiādīsu (ma. ni. 2.157) karaṇe. ‘‘Vanapatthapariyāyaṃ vo, bhikkhave, desessāmī’’tiādīsu (ma. ni. 1.190) sampadāne. ‘‘Sabbesaṃ vo, sāriputta, subhāsita’’ntiādīsu (ma. ni. 1.345) sāmivacane. ‘‘Ye hi vo ariyā parisuddhakāyakammantā’’tiādīsu (ma. ni. 1.35) padapūraṇamatte. Idha panāyaṃ sampadāne daṭṭhabbo. Bhikkhaveti patissavena abhimukhībhūtānaṃ puna ālapanaṃ. Desessāmīti desanāpaṭijānanaṃ. Taṃ suṇāthāti taṃ paṭiccasamuppādaṃ taṃ desanaṃ mayā vuccamānaṃ suṇātha.
ஸாது⁴கங் மனஸி கரோதா²தி எத்த² பன ஸாது⁴கங் ஸாதூ⁴தி ஏகத்த²மேதங். அயஞ்ச ஸாது⁴ஸத்³தோ³ ஆயாசன-ஸம்படிச்ச²ன-ஸம்பஹங்ஸன-ஸுந்த³ர-த³ள்ஹீகம்மாதீ³ஸு தி³ஸ்ஸதி. ‘‘ஸாது⁴ மே, ப⁴ந்தே, ப⁴க³வா ஸங்கி²த்தேன த⁴ம்மங் தே³ஸேதூ’’திஆதீ³ஸு (அ॰ நி॰ 4.257; ஸங்॰ நி॰ 4.65; 5.381) ஹி ஆயாசனே தி³ஸ்ஸதி. ‘‘ஸாது⁴, ப⁴ந்தேதி கோ² ஸோ பி⁴க்கு² ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா’’திஆதீ³ஸு (ம॰ நி॰ 3.86) ஸம்படிச்ச²னே. ‘‘ஸாது⁴ ஸாது⁴, ஸாரிபுத்தா’’திஆதீ³ஸு (தீ³॰ நி॰ 3.349) ஸம்பஹங்ஸனே.
Sādhukaṃ manasi karothāti ettha pana sādhukaṃ sādhūti ekatthametaṃ. Ayañca sādhusaddo āyācana-sampaṭicchana-sampahaṃsana-sundara-daḷhīkammādīsu dissati. ‘‘Sādhu me, bhante, bhagavā saṃkhittena dhammaṃ desetū’’tiādīsu (a. ni. 4.257; saṃ. ni. 4.65; 5.381) hi āyācane dissati. ‘‘Sādhu, bhanteti kho so bhikkhu bhagavato bhāsitaṃ abhinanditvā anumoditvā’’tiādīsu (ma. ni. 3.86) sampaṭicchane. ‘‘Sādhu sādhu, sāriputtā’’tiādīsu (dī. ni. 3.349) sampahaṃsane.
‘‘ஸாது⁴ த⁴ம்மருசீ ராஜா, ஸாது⁴ பஞ்ஞாணவா நரோ;
‘‘Sādhu dhammarucī rājā, sādhu paññāṇavā naro;
ஸாது⁴ மித்தானமத்³து³ப்³போ⁴, பாபஸ்ஸ அகரணங் ஸுக²’’ந்தி. –
Sādhu mittānamaddubbho, pāpassa akaraṇaṃ sukha’’nti. –
ஆதீ³ஸு (ஜா॰ 2.18.101) ஸுந்த³ரே. ‘‘தேன ஹி, ப்³ராஹ்மண, ஸாது⁴கங் ஸுணாஹீ’’திஆதீ³ஸு (அ॰ நி॰ 5.192) ஸாது⁴கஸத்³தோ³யேவ த³ள்ஹீகம்மே ஆணத்தியந்திபி வுச்சதி. இத⁴ பனாயங் எத்தே²வ த³ள்ஹீகம்மே ஆணத்தியா ச அத்தோ² வேதி³தப்³போ³, ஸுந்த³ரத்தே²பி வட்டதி. த³ள்ஹீகரணத்தே²ன ஹி ‘‘த³ள்ஹங் இமங் த⁴ம்மங் ஸுணாத², ஸுக்³க³ஹிதங் க³ண்ஹந்தா’’, ஆணத்திஅத்தே²ன ‘‘மம ஆணத்தியா ஸுணாத²’’ ஸுந்த³ரத்தே²ன ‘‘ஸுந்த³ரமிமங் ப⁴த்³த³கங் த⁴ம்மங் ஸுணாதா²’’தி ஏதங் தீ³பிதங் ஹோதி. மனஸி கரோதா²தி ஆவஜ்ஜேத². ஸமன்னாஹரதா²தி அத்தோ². அவிக்கி²த்தசித்தா ஹுத்வா நிஸாமேத², சித்தே கரோதா²தி அதி⁴ப்பாயோ.
Ādīsu (jā. 2.18.101) sundare. ‘‘Tena hi, brāhmaṇa, sādhukaṃ suṇāhī’’tiādīsu (a. ni. 5.192) sādhukasaddoyeva daḷhīkamme āṇattiyantipi vuccati. Idha panāyaṃ ettheva daḷhīkamme āṇattiyā ca attho veditabbo, sundaratthepi vaṭṭati. Daḷhīkaraṇatthena hi ‘‘daḷhaṃ imaṃ dhammaṃ suṇātha, suggahitaṃ gaṇhantā’’, āṇattiatthena ‘‘mama āṇattiyā suṇātha’’ sundaratthena ‘‘sundaramimaṃ bhaddakaṃ dhammaṃ suṇāthā’’ti etaṃ dīpitaṃ hoti. Manasi karothāti āvajjetha. Samannāharathāti attho. Avikkhittacittā hutvā nisāmetha, citte karothāti adhippāyo.
இதா³னெத்த² தங் ஸுணாதா²தி ஸோதிந்த்³ரியவிக்கே²பனிவாரணமேதங். ஸாது⁴கங் மனஸி கரோதா²தி மனஸிகாரே த³ள்ஹீகம்மனியோஜனேன மனிந்த்³ரியவிக்கே²பனிவாரணங். புரிமஞ்செத்த² ப்³யஞ்ஜனவிபல்லாஸகா³ஹனிவாரணங், பச்சி²மங் அத்த²விபல்லாஸகா³ஹனிவாரணங். புரிமேன ச த⁴ம்மஸ்ஸவனே நியோஜேதி, பச்சி²மேன ஸுதானங் த⁴ம்மானங் தா⁴ரணூபபரிக்கா²ஸு. புரிமேன ச ‘‘ஸப்³யஞ்ஜனோ அயங் த⁴ம்மோ, தஸ்மா ஸவனீயோ’’தி தீ³பேதி, பச்சி²மேன ‘‘ஸாத்தோ², தஸ்மா மனஸி காதப்³போ³’’தி. ஸாது⁴கபத³ங் வா உப⁴யபதே³ஹி யோஜெத்வா, ‘‘யஸ்மா அயங் த⁴ம்மோ த⁴ம்மக³ம்பீ⁴ரோ ச தே³ஸனாக³ம்பீ⁴ரோ ச, தஸ்மா ஸுணாத² ஸாது⁴கங். யஸ்மா அத்த²க³ம்பீ⁴ரோ ச படிவேத⁴க³ம்பீ⁴ரோ ச, தஸ்மா ஸாது⁴கங் மனஸி கரோதா²’’தி ஏவங் யோஜனா வேதி³தப்³பா³. பா⁴ஸிஸ்ஸாமீதி தே³ஸெஸ்ஸாமி. ‘‘தங் ஸுணாதா²’’தி எத்த² படிஞ்ஞாதங் தே³ஸனங் ஸங்கி²த்ததோவ ந தே³ஸெஸ்ஸாமி, அபிச கோ² வித்தா²ரதோபி நங் பா⁴ஸிஸ்ஸாமீதி வுத்தங் ஹோதி. ஸங்கே²பவித்தா²ரவாசகானி ஹி ஏதானி பதா³னி. யதா²ஹ வங்கீ³ஸத்தே²ரோ –
Idānettha taṃ suṇāthāti sotindriyavikkhepanivāraṇametaṃ. Sādhukaṃ manasi karothāti manasikāre daḷhīkammaniyojanena manindriyavikkhepanivāraṇaṃ. Purimañcettha byañjanavipallāsagāhanivāraṇaṃ, pacchimaṃ atthavipallāsagāhanivāraṇaṃ. Purimena ca dhammassavane niyojeti, pacchimena sutānaṃ dhammānaṃ dhāraṇūpaparikkhāsu. Purimena ca ‘‘sabyañjano ayaṃ dhammo, tasmā savanīyo’’ti dīpeti, pacchimena ‘‘sāttho, tasmā manasi kātabbo’’ti. Sādhukapadaṃ vā ubhayapadehi yojetvā, ‘‘yasmā ayaṃ dhammo dhammagambhīro ca desanāgambhīro ca, tasmā suṇātha sādhukaṃ. Yasmā atthagambhīro ca paṭivedhagambhīro ca, tasmā sādhukaṃ manasi karothā’’ti evaṃ yojanā veditabbā. Bhāsissāmīti desessāmi. ‘‘Taṃ suṇāthā’’ti ettha paṭiññātaṃ desanaṃ saṃkhittatova na desessāmi, apica kho vitthāratopi naṃ bhāsissāmīti vuttaṃ hoti. Saṅkhepavitthāravācakāni hi etāni padāni. Yathāha vaṅgīsatthero –
‘‘ஸங்கி²த்தேனபி தே³ஸேதி, வித்தா²ரேனபி பா⁴ஸதி;
‘‘Saṃkhittenapi deseti, vitthārenapi bhāsati;
ஸாளிகாயிவ நிக்³கோ⁴ஸோ, படிபா⁴னங் உதீ³ரயீ’’தி. (ஸங்॰ நி॰ 1.214; தே²ரகா³॰ 1241);
Sāḷikāyiva nigghoso, paṭibhānaṃ udīrayī’’ti. (saṃ. ni. 1.214; theragā. 1241);
ஏவங் வுத்தே உஸ்ஸாஹஜாதா ஹுத்வா ஏவங், ப⁴ந்தேதி கோ² தே பி⁴க்கூ² ப⁴க³வதோ பச்சஸ்ஸோஸுங் ஸத்து² வசனங் ஸம்படிச்சி²ங்ஸு, படிக்³க³ஹேஸுந்தி வுத்தங் ஹோதி.
Evaṃ vutte ussāhajātā hutvā evaṃ, bhanteti kho te bhikkhū bhagavato paccassosuṃ satthu vacanaṃ sampaṭicchiṃsu, paṭiggahesunti vuttaṃ hoti.
அத² நேஸங் ப⁴க³வா ஏதத³வோச – ஏதங் இதா³னி வத்தப்³ப³ங் ‘‘கதமோ ச, பி⁴க்க²வே, படிச்சஸமுப்பாதோ³’’திஆதி³ங் ஸகலங் ஸுத்தங் அவோச. தத்த² கதமோ ச, பி⁴க்க²வே, படிச்சஸமுப்பாதோ³தி கதே²துகம்யதாபுச்சா². பஞ்சவிதா⁴ ஹி புச்சா² அதி³ட்ட²ஜோதனாபுச்சா² தி³ட்ட²ஸங்ஸந்த³னாபுச்சா² விமதிச்சே²த³னாபுச்சா² அனுமதிபுச்சா² கதே²துகம்யதாபுச்சா²தி, தாஸங் இத³ங் நானத்தங் –
Atha nesaṃ bhagavā etadavoca – etaṃ idāni vattabbaṃ ‘‘katamo ca, bhikkhave, paṭiccasamuppādo’’tiādiṃ sakalaṃ suttaṃ avoca. Tattha katamo ca, bhikkhave, paṭiccasamuppādoti kathetukamyatāpucchā. Pañcavidhā hi pucchā adiṭṭhajotanāpucchā diṭṭhasaṃsandanāpucchā vimaticchedanāpucchā anumatipucchā kathetukamyatāpucchāti, tāsaṃ idaṃ nānattaṃ –
கதமா அதி³ட்ட²ஜோதனா புச்சா² (மஹானி॰ 150; சூளனி॰ புண்ணகமாணவபுச்சா²னித்³தே³ஸ 12)? பகதியா லக்க²ணங் அஞ்ஞாதங் ஹோதி அதி³ட்ட²ங் அதுலிதங் அதீரிதங் அவிபூ⁴தங் அவிபா⁴விதங். தஸ்ஸ ஞாணாய த³ஸ்ஸனாய துலனாய தீரணாய விபூ⁴தாய விபா⁴வனத்தா²ய பஞ்ஹங் புச்ச²தி. அயங் அதி³ட்ட²ஜோதனாபுச்சா².
Katamā adiṭṭhajotanā pucchā (mahāni. 150; cūḷani. puṇṇakamāṇavapucchāniddesa 12)? Pakatiyā lakkhaṇaṃ aññātaṃ hoti adiṭṭhaṃ atulitaṃ atīritaṃ avibhūtaṃ avibhāvitaṃ. Tassa ñāṇāya dassanāya tulanāya tīraṇāya vibhūtāya vibhāvanatthāya pañhaṃ pucchati. Ayaṃ adiṭṭhajotanāpucchā.
கதமா தி³ட்ட²ஸங்ஸந்த³னாபுச்சா²? பகதியா லக்க²ணங் ஞாதங் ஹோதி தி³ட்ட²ங் துலிதங் தீரிதங் விபூ⁴தங் விபா⁴விதங். ஸோ அஞ்ஞேஹி பண்டி³தேஹி ஸத்³தி⁴ங் ஸங்ஸந்த³னத்தா²ய பஞ்ஹங் புச்ச²தி. அயங் தி³ட்ட²ஸங்ஸந்த³னாபுச்சா².
Katamā diṭṭhasaṃsandanāpucchā? Pakatiyā lakkhaṇaṃ ñātaṃ hoti diṭṭhaṃ tulitaṃ tīritaṃ vibhūtaṃ vibhāvitaṃ. So aññehi paṇḍitehi saddhiṃ saṃsandanatthāya pañhaṃ pucchati. Ayaṃ diṭṭhasaṃsandanāpucchā.
கதமா விமதிச்சே²த³னாபுச்சா²? பகதியா ஸங்ஸயபக்க²ந்தோ³ ஹோதி விமதிபக்க²ந்தோ³ த்³வெள்ஹகஜாதோ – ‘‘ஏவங் நு கோ², ந நு கோ², கத²ங் நு கோ²’’தி, ஸோ விமதிச்சே²த³னத்தா²ய பஞ்ஹங் புச்ச²தி, அயங் விமதிச்சே²த³னாபுச்சா².
Katamā vimaticchedanāpucchā? Pakatiyā saṃsayapakkhando hoti vimatipakkhando dveḷhakajāto – ‘‘evaṃ nu kho, na nu kho, kathaṃ nu kho’’ti, so vimaticchedanatthāya pañhaṃ pucchati, ayaṃ vimaticchedanāpucchā.
கதமா அனுமதிபுச்சா²? ப⁴க³வா பி⁴க்கூ²னங் அனுமதியா பஞ்ஹங் புச்ச²தி – ‘‘தங் கிங் மஞ்ஞத², பி⁴க்க²வே, ரூபங் நிச்சங் வா அனிச்சங் வா’’தி, அனிச்சங், ப⁴ந்தே. யங் பனானிச்சங் து³க்க²ங் வா தங் ஸுக²ங் வாதி, து³க்க²ங், ப⁴ந்தே. யங் பனானிச்சங் து³க்க²ங் விபரிணாமத⁴ம்மங், கல்லங் நு தங் ஸமனுபஸ்ஸிதுங் – ‘‘ஏதங் மம ஏஸோஹமஸ்மி ஏஸோ மே அத்தா’’தி, நோ ஹேதங் ப⁴ந்தேதி (ஸங்॰ நி॰ 3.79). அயங் அனுமதிபுச்சா².
Katamā anumatipucchā? Bhagavā bhikkhūnaṃ anumatiyā pañhaṃ pucchati – ‘‘taṃ kiṃ maññatha, bhikkhave, rūpaṃ niccaṃ vā aniccaṃ vā’’ti, aniccaṃ, bhante. Yaṃ panāniccaṃ dukkhaṃ vā taṃ sukhaṃ vāti, dukkhaṃ, bhante. Yaṃ panāniccaṃ dukkhaṃ vipariṇāmadhammaṃ, kallaṃ nu taṃ samanupassituṃ – ‘‘etaṃ mama esohamasmi eso me attā’’ti, no hetaṃ bhanteti (saṃ. ni. 3.79). Ayaṃ anumatipucchā.
கதமா கதே²துகம்யதாபுச்சா²? ப⁴க³வா பி⁴க்கூ²னங் கதே²துகம்யதாய பஞ்ஹங் புச்ச²தி – ‘‘சத்தாரோமே, பி⁴க்க²வே, ஸதிபட்டா²னா. கதமே சத்தாரோ’’தி? அயங் கதே²துகம்யதாபுச்சா²தி.
Katamā kathetukamyatāpucchā? Bhagavā bhikkhūnaṃ kathetukamyatāya pañhaṃ pucchati – ‘‘cattārome, bhikkhave, satipaṭṭhānā. Katame cattāro’’ti? Ayaṃ kathetukamyatāpucchāti.
தத்த² பு³த்³தா⁴னங் புரிமா திஸ்ஸோ புச்சா² நத்தி². கஸ்மா? பு³த்³தா⁴னஞ்ஹி தீஸு அத்³தா⁴ஸு கிஞ்சி ஸங்க²தங் அத்³தா⁴விமுத்தங் வா அஸங்க²தங் அதி³ட்ட²ங் அஜோதிதங் அதுலிதங் அதீரிதங் அவிபூ⁴தங் அவிபா⁴விதங் நாம நத்தி². தேன நேஸங் அதி³ட்ட²ஜோதனாபுச்சா² நத்தி². யங் பன ப⁴க³வதா அத்தனோ ஞாணேன படிவித்³த⁴ங், தஸ்ஸ அஞ்ஞேன ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா ஸத்³தி⁴ங் ஸங்ஸந்த³னகிச்சங் நத்தி². தேனஸ்ஸ தி³ட்ட²ஸங்ஸந்த³னாபுச்சா² நத்தி². யஸ்மா பனேஸ அகத²ங்கதீ² திண்ணவிசிகிச்சோ² ஸப்³ப³த⁴ம்மேஸு விஹதஸங்ஸயோ. தேனஸ்ஸ விமதிச்சே²த³னாபுச்சா² நத்தி². இதரா பன த்³வே புச்சா² ப⁴க³வதோ அத்தி². தாஸு அயங் கதே²துகம்யதா புச்சா²தி வேதி³தப்³பா³.
Tattha buddhānaṃ purimā tisso pucchā natthi. Kasmā? Buddhānañhi tīsu addhāsu kiñci saṅkhataṃ addhāvimuttaṃ vā asaṅkhataṃ adiṭṭhaṃ ajotitaṃ atulitaṃ atīritaṃ avibhūtaṃ avibhāvitaṃ nāma natthi. Tena nesaṃ adiṭṭhajotanāpucchā natthi. Yaṃ pana bhagavatā attano ñāṇena paṭividdhaṃ, tassa aññena samaṇena vā brāhmaṇena vā devena vā mārena vā brahmunā vā saddhiṃ saṃsandanakiccaṃ natthi. Tenassa diṭṭhasaṃsandanāpucchā natthi. Yasmā panesa akathaṃkathī tiṇṇavicikiccho sabbadhammesu vihatasaṃsayo. Tenassa vimaticchedanāpucchā natthi. Itarā pana dve pucchā bhagavato atthi. Tāsu ayaṃ kathetukamyatā pucchāti veditabbā.
இதா³னி தாவ புச்சா²ய புட்ட²ங் பச்சயாகாரங் விப⁴ஜந்தோ அவிஜ்ஜாபச்சயா, பி⁴க்க²வே, ஸங்கா²ராதிஆதி³மாஹ. எத்த² ச யதா² நாம ‘‘பிதரங் கதெ²ஸ்ஸாமீ’’தி ஆரத்³தோ⁴ ‘‘திஸ்ஸஸ்ஸ பிதா ஸோணஸ்ஸ பிதா’’தி பட²மதரங் புத்தம்பி கதே²தி, ஏவமேவ ப⁴க³வா பச்சயங் கதே²துங் ஆரத்³தோ⁴ ‘‘அவிஜ்ஜாபச்சயா ஸங்கா²ரா’’திஆதி³னா நயேன ஸங்கா²ராதீ³னங் பச்சயே அவிஜ்ஜாதி³த⁴ம்மே கதெ²ந்தோ பச்சயுப்பன்னம்பி கதே²ஸி. ஆஹாரவக்³க³ஸ்ஸ பன பரியோஸானே ‘‘படிச்சஸமுப்பாத³ஞ்ச வோ, பி⁴க்க²வே, தே³ஸெஸ்ஸாமி படிச்சஸமுப்பன்னே ச த⁴ம்மே’’தி (ஸங்॰ நி॰ 2.20) உப⁴யங் ஆரபி⁴த்வா உப⁴யம்பி கதே²ஸி. இதா³னி அவிஜ்ஜாபச்சயா ஸங்கா²ராதிஆதீ³ஸு பன அவிஜ்ஜா ச ஸா பச்சயோ சாதி அவிஜ்ஜாபச்சயோ. தஸ்மா அவிஜ்ஜாபச்சயா ஸங்கா²ரா ஸம்ப⁴வந்தீதி இமினா நயேன அத்தோ² வேதி³தப்³போ³. அயமெத்த² ஸங்கே²போ, வித்தா²ரேன பன ஸப்³பா³காரஸம்பன்னா அனுலோமபடிச்சஸமுப்பாத³கதா² விஸுத்³தி⁴மக்³கே³ கதி²தா, தஸ்மா ஸா தத்த² கதி²தவஸேனேவ க³ஹேதப்³பா³.
Idāni tāva pucchāya puṭṭhaṃ paccayākāraṃ vibhajanto avijjāpaccayā, bhikkhave, saṅkhārātiādimāha. Ettha ca yathā nāma ‘‘pitaraṃ kathessāmī’’ti āraddho ‘‘tissassa pitā soṇassa pitā’’ti paṭhamataraṃ puttampi katheti, evameva bhagavā paccayaṃ kathetuṃ āraddho ‘‘avijjāpaccayā saṅkhārā’’tiādinā nayena saṅkhārādīnaṃ paccaye avijjādidhamme kathento paccayuppannampi kathesi. Āhāravaggassa pana pariyosāne ‘‘paṭiccasamuppādañca vo, bhikkhave, desessāmi paṭiccasamuppanne ca dhamme’’ti (saṃ. ni. 2.20) ubhayaṃ ārabhitvā ubhayampi kathesi. Idāni avijjāpaccayā saṅkhārātiādīsu pana avijjā ca sā paccayo cāti avijjāpaccayo. Tasmā avijjāpaccayā saṅkhārā sambhavantīti iminā nayena attho veditabbo. Ayamettha saṅkhepo, vitthārena pana sabbākārasampannā anulomapaṭiccasamuppādakathā visuddhimagge kathitā, tasmā sā tattha kathitavaseneva gahetabbā.
படிலோமகதா²யங் பன அவிஜ்ஜாய த்வேவாதி அவிஜ்ஜாய து ஏவ. அஸேஸவிராக³னிரோதா⁴தி விராக³ஸங்கா²தேன மக்³கே³ன அஸேஸனிரோதா⁴. ஸங்கா²ரனிரோதோ⁴தி ஸங்கா²ரானங் அனுப்பாத³னிரோதோ⁴ ஹோதி. ஏவங்னிரோதா⁴னங் பன ஸங்கா²ரானங் நிரோதா⁴ விஞ்ஞாணாதீ³னஞ்ச நிரோதா⁴ நாமரூபாதீ³னி நிருத்³தா⁴னியேவ ஹொந்தீதி த³ஸ்ஸேதுங் ஸங்கா²ரனிரோதா⁴ விஞ்ஞாணனிரோதோ⁴திஆதீ³னி வத்வா, ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீதி ஆஹ. தத்த² கேவலஸ்ஸாதி ஸகலஸ்ஸ, ஸுத்³த⁴ஸ்ஸ வா, ஸத்தவிரஹிதஸ்ஸாதி அத்தோ². து³க்க²க்க²ந்த⁴ஸ்ஸாதி து³க்க²ராஸிஸ்ஸ. நிரோதோ⁴ ஹோதீதி அனுப்பாதோ³ ஹோதி. இதி ப⁴க³வா அனுலோமதோ த்³வாத³ஸஹி பதே³ஹி வட்டகத²ங் கதெ²த்வா தமேவ வட்டங் வினிவட்டெத்வா படிலோமதோ த்³வாத³ஸஹி பதே³ஹி விவட்டங் கதெ²ந்தோ அரஹத்தேன தே³ஸனாய கூடங் க³ண்ஹி. தே³ஸனாபரியோஸானே தே பஞ்சஸதா ஆரத்³த⁴விபஸ்ஸகா உக்³க⁴டிதஞ்ஞூபுக்³க³லா ஸூரியரஸ்மிஸம்பு²ட்டா²னி பரிபாகக³தானி பது³மானி விய ஸச்சானி பு³ஜ்ஜி²த்வா அரஹத்தப²லே பதிட்ட²ஹிங்ஸு.
Paṭilomakathāyaṃ pana avijjāya tvevāti avijjāya tu eva. Asesavirāganirodhāti virāgasaṅkhātena maggena asesanirodhā. Saṅkhāranirodhoti saṅkhārānaṃ anuppādanirodho hoti. Evaṃnirodhānaṃ pana saṅkhārānaṃ nirodhā viññāṇādīnañca nirodhā nāmarūpādīni niruddhāniyeva hontīti dassetuṃ saṅkhāranirodhā viññāṇanirodhotiādīni vatvā, evametassa kevalassa dukkhakkhandhassa nirodho hotīti āha. Tattha kevalassāti sakalassa, suddhassa vā, sattavirahitassāti attho. Dukkhakkhandhassāti dukkharāsissa. Nirodho hotīti anuppādo hoti. Iti bhagavā anulomato dvādasahi padehi vaṭṭakathaṃ kathetvā tameva vaṭṭaṃ vinivaṭṭetvā paṭilomato dvādasahi padehi vivaṭṭaṃ kathento arahattena desanāya kūṭaṃ gaṇhi. Desanāpariyosāne te pañcasatā āraddhavipassakā ugghaṭitaññūpuggalā sūriyarasmisamphuṭṭhāni paripākagatāni padumāni viya saccāni bujjhitvā arahattaphale patiṭṭhahiṃsu.
இத³மவோச ப⁴க³வாதி இத³ங் வட்டவிவட்டவஸேன ஸகலஸுத்தங் ப⁴க³வா அவோச. அத்தமனா தே பி⁴க்கூ²தி துட்ட²சித்தா தே பஞ்சஸதா கீ²ணாஸவா பி⁴க்கூ². ப⁴க³வதோ பா⁴ஸிதங் அபி⁴னந்து³ந்தி கரவீகருதமஞ்ஜுனா கண்ணஸுகே²ன பண்டி³தஜனஹத³யானங் அமதாபி⁴ஸேகஸதி³ஸேன ப்³ரஹ்மஸ்ஸரேன பா⁴ஸதோ ப⁴க³வதோ வசனங் அபி⁴னந்தி³ங்ஸு, அனுமோதி³ங்ஸு சேவ ஸம்படிச்சி²ங்ஸு சாதி அத்தோ². தேனேதங் வுச்சதி –
Idamavoca bhagavāti idaṃ vaṭṭavivaṭṭavasena sakalasuttaṃ bhagavā avoca. Attamanā te bhikkhūti tuṭṭhacittā te pañcasatā khīṇāsavā bhikkhū. Bhagavato bhāsitaṃ abhinandunti karavīkarutamañjunā kaṇṇasukhena paṇḍitajanahadayānaṃ amatābhisekasadisena brahmassarena bhāsato bhagavato vacanaṃ abhinandiṃsu, anumodiṃsu ceva sampaṭicchiṃsu cāti attho. Tenetaṃ vuccati –
‘‘ஸுபா⁴ஸிதங் ஸுலபிதங், ஸாது⁴ ஸாதூ⁴தி தாதி³னோ;
‘‘Subhāsitaṃ sulapitaṃ, sādhu sādhūti tādino;
அனுமோத³மானா ஸிரஸா, ஸம்படிச்சி²ங்ஸு பி⁴க்க²வோ’’தி.
Anumodamānā sirasā, sampaṭicchiṃsu bhikkhavo’’ti.
பட²மபடிச்சஸமுப்பாத³ஸுத்தவண்ணனா நிட்டி²தா.
Paṭhamapaṭiccasamuppādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. படிச்சஸமுப்பாத³ஸுத்தங் • 1. Paṭiccasamuppādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. படிச்சஸமுப்பாத³ஸுத்தவண்ணனா • 1. Paṭiccasamuppādasuttavaṇṇanā
