| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
сам̣яуд̇д̇анигааяз
Saṃyuttanikāye
нид̣̇аанаваг̇г̇а-адтагат̇аа
Nidānavagga-aṭṭhakathā
1. нид̣̇аанасам̣яуд̇д̇ам̣
1. Nidānasaṃyuttaṃ
1. б̣уд̣̇д̇хаваг̇г̇о
1. Buddhavaggo
1. бадижжасамуббаад̣̇асуд̇д̇аван̣н̣анаа
1. Paṭiccasamuppādasuttavaṇṇanā
1. звам̣ мз суд̇анд̇и – нид̣̇аанаваг̇г̇з батамам̣ бадижжасамуббаад̣̇асуд̇д̇ам̣. д̇ад̇рааяам̣ анубуб̣б̣абад̣̇аван̣н̣анаа – д̇ад̇ра ко бхаг̇аваа бхигкуу ааманд̇зсийд̇и, зд̇т̇а д̇ад̇раад̇и д̣̇зсагаалабарид̣̇ийбанам̣. д̇ан̃хи ‘‘яам̣ самаяам̣ вихарад̇и, д̇ад̇ра самаяз, яасмин̃жа ж̇зд̇аванз вихарад̇и, д̇ад̇ра ж̇зд̇аванз’’д̇и д̣̇ийбзд̇и. бхаасид̇аб̣б̣аяуд̇д̇з ваа д̣̇зсагаалз д̣̇ийбзд̇и. на хи бхаг̇аваа аяуд̇д̇з д̣̇зсз гаалз жа д̇хаммам̣ бхаасад̇и. ‘‘агаало ко д̇аава б̣аахияаа’’д̇иаад̣̇и (уд̣̇аа. 10) жзд̇т̇а саад̇хагам̣. код̇и бад̣̇абууран̣амад̇д̇з, авад̇хааран̣з аад̣̇игаалад̇т̇з ваа нибаад̇о. бхаг̇аваад̇и логаг̇аруд̣̇ийбанам̣. бхигкууд̇и гат̇аасаванаяуд̇д̇абуг̇г̇алаважанам̣. абижзд̇т̇а ‘‘бхигкагод̇и бхигку, бхигкаажарияам̣ аж̇жхуубаг̇ад̇од̇и бхигкуу’’д̇иаад̣̇инаа (баараа. 45; вибха. 510) наязна важанад̇т̇о взд̣̇ид̇аб̣б̣о. ааманд̇зсийд̇и аалаби, абхааси, самб̣од̇хзси, аяамзд̇т̇а ад̇т̇о. ан̃н̃ад̇ра бана н̃аабанзби ход̇и. яат̇ааха – ‘‘ааманд̇аяаами во, бхигкавз, бадивзд̣̇аяаами во, бхигкавз’’д̇и. баггосанзби. яат̇ааха – ‘‘зхи д̇вам̣, бхигку, мама важанзна саарибуд̇д̇ам̣ ааманд̇зхий’’д̇и (а. ни. 9.11). бхигкавод̇и ааманд̇анаагаарад̣̇ийбанам̣. д̇ан̃жа бхигканасийлад̇аад̣̇иг̇ун̣аяог̇асид̣̇д̇хад̇д̇аа вуд̇д̇ам̣. бхигканасийлад̇ааг̇ун̣аяуд̇д̇оби хи бхигку, бхигканад̇хаммад̇ааг̇ун̣аяуд̇д̇оби бхигканз саад̇хугаарид̇ааг̇ун̣аяуд̇д̇обийд̇и сад̣̇д̣̇авид̣̇уу ман̃н̃анд̇и. д̇зна жа д̇зсам̣ бхигканасийлад̇аад̣̇иг̇ун̣аяог̇асид̣̇д̇хзна важанзна хийнаад̇хигаж̇анасзвид̇авуд̇д̇им̣ багаасзнд̇о уд̣̇д̇хад̇ад̣̇ийнабхааваниг̇г̇ахам̣ гарод̇и. ‘‘бхигкаво’’д̇и иминаа жа гарун̣аавибпаарасоммахад̣̇аяанаяананибаад̇абуб̣б̣ан̇г̇амзна важанзна д̇з ад̇д̇ано абхимукз гаронд̇о д̇знзва гат̇зд̇угамяад̇аад̣̇ийбагзна нзсам̣ важанзна сод̇угамяад̇ам̣ ж̇анзд̇и, д̇знзва жа самб̣од̇ханад̇т̇зна саад̇хугам̣ манасигаарзби нияож̇зд̇и. саад̇хугам̣ манасигаарааяад̇д̇аа хи саасанасамбад̇д̇и.
1.Evaṃme sutanti – nidānavagge paṭhamaṃ paṭiccasamuppādasuttaṃ. Tatrāyaṃ anupubbapadavaṇṇanā – tatra kho bhagavā bhikkhū āmantesīti, ettha tatrāti desakālaparidīpanaṃ. Tañhi ‘‘yaṃ samayaṃ viharati, tatra samaye, yasmiñca jetavane viharati, tatra jetavane’’ti dīpeti. Bhāsitabbayutte vā desakāle dīpeti. Na hi bhagavā ayutte dese kāle ca dhammaṃ bhāsati. ‘‘Akālo kho tāva bāhiyā’’tiādi (udā. 10) cettha sādhakaṃ. Khoti padapūraṇamatte, avadhāraṇe ādikālatthe vā nipāto. Bhagavāti lokagarudīpanaṃ. Bhikkhūti kathāsavanayuttapuggalavacanaṃ. Apicettha ‘‘bhikkhakoti bhikkhu, bhikkhācariyaṃ ajjhūpagatoti bhikkhū’’tiādinā (pārā. 45; vibha. 510) nayena vacanattho veditabbo. Āmantesīti ālapi, abhāsi, sambodhesi, ayamettha attho. Aññatra pana ñāpanepi hoti. Yathāha – ‘‘āmantayāmi vo, bhikkhave, paṭivedayāmi vo, bhikkhave’’ti. Pakkosanepi. Yathāha – ‘‘ehi tvaṃ, bhikkhu, mama vacanena sāriputtaṃ āmantehī’’ti (a. ni. 9.11). Bhikkhavoti āmantanākāradīpanaṃ. Tañca bhikkhanasīlatādiguṇayogasiddhattā vuttaṃ. Bhikkhanasīlatāguṇayuttopi hi bhikkhu, bhikkhanadhammatāguṇayuttopi bhikkhane sādhukāritāguṇayuttopīti saddavidū maññanti. Tena ca tesaṃ bhikkhanasīlatādiguṇayogasiddhena vacanena hīnādhikajanasevitavuttiṃ pakāsento uddhatadīnabhāvaniggahaṃ karoti. ‘‘Bhikkhavo’’ti iminā ca karuṇāvipphārasommahadayanayananipātapubbaṅgamena vacanena te attano abhimukhe karonto teneva kathetukamyatādīpakena nesaṃ vacanena sotukamyataṃ janeti, teneva ca sambodhanatthena sādhukaṃ manasikārepi niyojeti. Sādhukaṃ manasikārāyattā hi sāsanasampatti.
абарзсуби д̣̇звамануссзсу виж̇ж̇амаанзсу гасмаа бхигкууязва ааманд̇зсийд̇и жз? ж̇здтасздтаасаннасад̣̇аасаннихид̇абхаавад̇о. саб̣б̣абарисасаад̇хааран̣аа хи бхаг̇авад̇о д̇хаммад̣̇зсанаа, барисааяа ж̇здтаа бхигкуу батамам̣ уббаннад̇д̇аа, сздтаа анаг̇аарияабхаавам̣ аад̣̇им̣ гад̇ваа сад̇т̇ужарияаанувид̇хааяагад̇д̇аа сагаласаасанабадиг̇г̇аахагад̇д̇аа жа, аасаннаа д̇ад̇т̇а нисиннзсу сад̇т̇усанд̇игад̇д̇аа, сад̣̇аасаннихид̇аа сад̇т̇усанд̇игааважарад̇д̇аад̇и. абижа д̇з д̇хаммад̣̇зсанааяа бхааж̇анам̣ яат̇аанусидтам̣ бадибад̇д̇исаб̣бхаавад̇о. висзсад̇о жа згажжз бхигкууязва санд̇хааяа аяам̣ д̣̇зсанаабийд̇и звам̣ ааманд̇зси.
Aparesupi devamanussesu vijjamānesu kasmā bhikkhūyeva āmantesīti ce? Jeṭṭhaseṭṭhāsannasadāsannihitabhāvato. Sabbaparisasādhāraṇā hi bhagavato dhammadesanā, parisāya jeṭṭhā bhikkhū paṭhamaṃ uppannattā, seṭṭhā anagāriyabhāvaṃ ādiṃ katvā satthucariyānuvidhāyakattā sakalasāsanapaṭiggāhakattā ca, āsannā tattha nisinnesu satthusantikattā, sadāsannihitā satthusantikāvacarattāti. Apica te dhammadesanāya bhājanaṃ yathānusiṭṭhaṃ paṭipattisabbhāvato. Visesato ca ekacce bhikkhūyeva sandhāya ayaṃ desanāpīti evaṃ āmantesi.
гимад̇т̇ам̣ бана бхаг̇аваа д̇хаммам̣ д̣̇зсзнд̇о батамам̣ бхигкуу ааманд̇зси, на д̇хаммамзва д̣̇зсзсийд̇и? сад̇иж̇ананад̇т̇ам̣. бхигкуу ан̃н̃ам̣ жинд̇знд̇ааби вигкид̇д̇ажид̇д̇ааби д̇хаммам̣ бажжавзгканд̇ааби гаммадтаанам̣ манасигаронд̇ааби нисиннаа хонд̇и. д̇з анааманд̇зд̇ваа д̇хаммз д̣̇зсияамаанз ‘‘аяам̣ д̣̇зсанаа гим̣нид̣̇аанаа гим̣бажжаяаа гад̇амааяа адтуббад̇д̇ияаа д̣̇зсид̇аа’’д̇и саллагкзд̇ум̣ асаггонд̇аа д̣̇уг̇г̇ахид̇ам̣ ваа г̇ан̣хзяяум̣, на ваа г̇ан̣хзяяум̣, д̇зна нзсам̣ сад̇иж̇ананад̇т̇ам̣ бхаг̇аваа батамам̣ ааманд̇зд̇ваа бажчаа д̇хаммам̣ д̣̇зсзд̇и.
Kimatthaṃ pana bhagavā dhammaṃ desento paṭhamaṃ bhikkhū āmantesi, na dhammameva desesīti? Satijananatthaṃ. Bhikkhū aññaṃ cintentāpi vikkhittacittāpi dhammaṃ paccavekkhantāpi kammaṭṭhānaṃ manasikarontāpi nisinnā honti. Te anāmantetvā dhamme desiyamāne ‘‘ayaṃ desanā kiṃnidānā kiṃpaccayā katamāya aṭṭhuppattiyā desitā’’ti sallakkhetuṃ asakkontā duggahitaṃ vā gaṇheyyuṃ, na vā gaṇheyyuṃ, tena nesaṃ satijananatthaṃ bhagavā paṭhamaṃ āmantetvā pacchā dhammaṃ deseti.
бхад̣̇анд̇зд̇и г̇аарававажанамзд̇ам̣, сад̇т̇уно бадиважанад̣̇аанам̣ ваа. абижзд̇т̇а ‘‘бхигкаво’’д̇и вад̣̇амаано бхаг̇аваа бхигкуу аалабад̇и. ‘‘бхад̣̇анд̇з’’д̇и вад̣̇амаанаа д̇з бхаг̇аванд̇ам̣ бажжаалабанд̇и. д̇ат̇аа хи ‘‘бхигкаво’’д̇и бхаг̇аваа аабхаасад̇и, ‘‘бхад̣̇анд̇з’’д̇и бажжаабхаасанд̇и. ‘‘бхигкаво’’д̇и бадиважанам̣ д̣̇аабзд̇и, ‘‘бхад̣̇анд̇з’’д̇и бадиважанам̣ д̣̇знд̇и. д̇з бхигкууд̇и яз бхаг̇аваа ааманд̇зси, д̇з. бхаг̇авад̇о бажжассосунд̇и бхаг̇авад̇о ааманд̇анам̣ бад̇иассосум̣, абхимукаа худ̇ваа сун̣им̣су самбадижчим̣су бадиг̇г̇ахзсунд̇и ад̇т̇о. бхаг̇аваа зд̇ад̣̇авожаад̇и, бхаг̇аваа зд̇ам̣ ид̣̇аани вад̇д̇аб̣б̣ам̣ сагаласуд̇д̇ам̣ авожа. зд̇д̇аавад̇аа яам̣ ааяасмад̇аа аананд̣̇зна ад̇т̇аб̣яан̃ж̇анасамбаннасса б̣уд̣̇д̇хаанам̣ д̣̇зсанаан̃аан̣аг̇амбхийрабхаавасам̣суужагасса имасса суд̇д̇асса сукааваг̇аахан̣ад̇т̇ам̣ гаалад̣̇зсад̣̇зсагабарисаабад̣̇зсаббадиман̣д̣ид̇ам̣ нид̣̇аанам̣ бхаасид̇ам̣, д̇асса ад̇т̇аван̣н̣анаа самад̇д̇аа.
Bhadanteti gāravavacanametaṃ, satthuno paṭivacanadānaṃ vā. Apicettha ‘‘bhikkhavo’’ti vadamāno bhagavā bhikkhū ālapati. ‘‘Bhadante’’ti vadamānā te bhagavantaṃ paccālapanti. Tathā hi ‘‘bhikkhavo’’ti bhagavā ābhāsati, ‘‘bhadante’’ti paccābhāsanti. ‘‘Bhikkhavo’’ti paṭivacanaṃ dāpeti, ‘‘bhadante’’ti paṭivacanaṃ denti. Te bhikkhūti ye bhagavā āmantesi, te. Bhagavato paccassosunti bhagavato āmantanaṃ patiassosuṃ, abhimukhā hutvā suṇiṃsu sampaṭicchiṃsu paṭiggahesunti attho. Bhagavā etadavocāti, bhagavā etaṃ idāni vattabbaṃ sakalasuttaṃ avoca. Ettāvatā yaṃ āyasmatā ānandena atthabyañjanasampannassa buddhānaṃ desanāñāṇagambhīrabhāvasaṃsūcakassa imassa suttassa sukhāvagāhaṇatthaṃ kāladesadesakaparisāpadesappaṭimaṇḍitaṃ nidānaṃ bhāsitaṃ, tassa atthavaṇṇanā samattā.
ид̣̇аани бадижжасамуббаад̣̇ам̣ вод̇иаад̣̇инаа наязна бхаг̇авад̇аа нигкид̇д̇асса суд̇д̇асса сам̣ван̣н̣анааяа огаасо ануббад̇д̇о. саа банзсаа суд̇д̇аван̣н̣анаа яасмаа суд̇д̇анигкзбам̣ вижаарзд̇ваа вужжамаанаа баагадаа ход̇и, д̇асмаа суд̇д̇анигкзбам̣ д̇аава вижаарзссаама. жад̇д̇ааро хи суд̇д̇анигкзбаа – ад̇д̇аж̇жхаасаяо, бараж̇жхаасаяо, бужчаавасиго, адтуббад̇д̇игод̇и. д̇ад̇т̇а яаани суд̇д̇аани бхаг̇аваа барзхи анаж̇жхидто гзвалам̣ ад̇д̇ано аж̇жхаасаязнзва гат̇зд̇и, сзяяат̇ид̣̇ам̣ – д̣̇асаб̣аласуд̇д̇анд̇ахаараго жанд̣̇обама-вийн̣обама-саммаббад̇хаана-ид̣̇д̇хибаад̣̇а-инд̣̇рияаб̣ала-б̣ож̇жхан̇г̇амаг̇г̇ан̇г̇а-суд̇д̇анд̇ахаарагод̇и звамаад̣̇ийни, д̇зсам̣ ад̇д̇аж̇жхаасаяо нигкзбо.
Idāni paṭiccasamuppādaṃ votiādinā nayena bhagavatā nikkhittassa suttassa saṃvaṇṇanāya okāso anuppatto. Sā panesā suttavaṇṇanā yasmā suttanikkhepaṃ vicāretvā vuccamānā pākaṭā hoti, tasmā suttanikkhepaṃ tāva vicāressāma. Cattāro hi suttanikkhepā – attajjhāsayo, parajjhāsayo, pucchāvasiko, aṭṭhuppattikoti. Tattha yāni suttāni bhagavā parehi anajjhiṭṭho kevalaṃ attano ajjhāsayeneva katheti, seyyathidaṃ – dasabalasuttantahārako candopama-vīṇopama-sammappadhāna-iddhipāda-indriyabala-bojjhaṅgamaggaṅga-suttantahārakoti evamādīni, tesaṃ attajjhāsayo nikkhepo.
яаани бана ‘‘барибаггаа ко раахуласса вимуд̇д̇ибарибаажанийяаа д̇хаммаа. яам̣нуунаахам̣ раахулам̣ уд̇д̇арим̣ аасаваанам̣ каяз винзяяа’’нд̇и (сам̣. ни. 4.121; ма. ни. 3.416) звам̣ барзсам̣ аж̇жхаасаяам̣ канд̇им̣ ниж̇жхаанагкамам̣ манам̣ абхинийхаарам̣ б̣уж̇жханабхааван̃жа абзгкид̇ваа бараж̇жхаасаяавасзна гат̇ид̇аани, сзяяат̇ид̣̇ам̣ – жуул̣араахуловаад̣̇асуд̇д̇ам̣, махаараахуловаад̣̇асуд̇д̇ам̣, д̇хаммажаггаббавад̇д̇анам̣, анад̇д̇алагкан̣асуд̇д̇ам̣, аасийвисобамасуд̇д̇ам̣, д̇хаад̇увибхан̇г̇асуд̇д̇анд̇и, звамаад̣̇ийни, д̇зсам̣ бараж̇жхаасаяо нигкзбо.
Yāni pana ‘‘paripakkā kho rāhulassa vimuttiparipācanīyā dhammā. Yaṃnūnāhaṃ rāhulaṃ uttariṃ āsavānaṃ khaye vineyya’’nti (saṃ. ni. 4.121; ma. ni. 3.416) evaṃ paresaṃ ajjhāsayaṃ khantiṃ nijjhānakkhamaṃ manaṃ abhinīhāraṃ bujjhanabhāvañca apekkhitvā parajjhāsayavasena kathitāni, seyyathidaṃ – cūḷarāhulovādasuttaṃ, mahārāhulovādasuttaṃ, dhammacakkappavattanaṃ, anattalakkhaṇasuttaṃ, āsīvisopamasuttaṃ, dhātuvibhaṅgasuttanti, evamādīni, tesaṃ parajjhāsayo nikkhepo.
бхаг̇аванд̇ам̣ бана убасан̇гамид̇ваа жад̇ассо барисаа жад̇д̇ааро ван̣н̣аа нааг̇аа субан̣н̣аа г̇анд̇хаб̣б̣аа асураа яагкаа махаарааж̇аано д̇аавад̇им̣саад̣̇аяо д̣̇зваа махааб̣рахмаад̇и звамаад̣̇аяо ‘‘б̣ож̇жхан̇г̇аа б̣ож̇жхан̇г̇аад̇и, бханд̇з, вужжанд̇и – (сам̣. ни. 5.202) нийваран̣аа нийваран̣аад̇и, бханд̇з, вужжанд̇и – имз ну ко, бханд̇з, бан̃жубаад̣̇аанагканд̇хаа, гим̣сууд̇ха вид̇д̇ам̣ бурисасса сздта’’нд̇иаад̣̇инаа (сам̣. ни. 1.246; су. ни. 183) наязна бан̃хам̣ бужчанд̇и. звам̣ будтзна бхаг̇авад̇аа яаани гат̇ид̇аани б̣ож̇жхан̇г̇асам̣яуд̇д̇аад̣̇ийни, яаани ваа банан̃н̃ааниби д̣̇звад̇аасам̣яуд̇д̇а, маарасам̣яуд̇д̇а, б̣рахмасам̣яуд̇д̇а, саггабан̃ха, жуул̣авзд̣̇алла, махаавзд̣̇алла, сааман̃н̃апалааал̣авага, суужилома, караломасуд̇д̇аад̣̇ийни, д̇зсам̣ бужчаавасиго нигкзбо.
Bhagavantaṃ pana upasaṅkamitvā catasso parisā cattāro vaṇṇā nāgā supaṇṇā gandhabbā asurā yakkhā mahārājāno tāvatiṃsādayo devā mahābrahmāti evamādayo ‘‘bojjhaṅgā bojjhaṅgāti, bhante, vuccanti – (saṃ. ni. 5.202) nīvaraṇā nīvaraṇāti, bhante, vuccanti – ime nu kho, bhante, pañcupādānakkhandhā, kiṃsūdha vittaṃ purisassa seṭṭha’’ntiādinā (saṃ. ni. 1.246; su. ni. 183) nayena pañhaṃ pucchanti. Evaṃ puṭṭhena bhagavatā yāni kathitāni bojjhaṅgasaṃyuttādīni, yāni vā panaññānipi devatāsaṃyutta, mārasaṃyutta, brahmasaṃyutta, sakkapañha, cūḷavedalla, mahāvedalla, sāmaññaphalaāḷavaka, sūciloma, kharalomasuttādīni, tesaṃ pucchāvasiko nikkhepo.
яаани бана д̇аани уббаннам̣ гааран̣ам̣ бадижжа гат̇ид̇аани, сзяяат̇ид̣̇ам̣ – д̇хаммад̣̇ааяаад̣̇ам̣. жуул̣асийханаад̣̇асуд̇д̇ам̣ буд̇д̇амам̣суубамам̣ д̣̇ааругканд̇хуубамам̣ аг̇г̇игканд̇хуубамам̣ пзн̣абин̣д̣уубамам̣ баарижчад̇д̇агуубаманд̇и звамаад̣̇ийни, д̇зсам̣ адтуббад̇д̇иго нигкзбо.
Yāni pana tāni uppannaṃ kāraṇaṃ paṭicca kathitāni, seyyathidaṃ – dhammadāyādaṃ. Cūḷasīhanādasuttaṃ puttamaṃsūpamaṃ dārukkhandhūpamaṃ aggikkhandhūpamaṃ pheṇapiṇḍūpamaṃ pāricchattakūpamanti evamādīni, tesaṃ aṭṭhuppattiko nikkhepo.
звамзд̇зсу жад̇уусу нигкзбзсу имасса бадижжасамуббаад̣̇асуд̇д̇асса бараж̇жхаасаяо нигкзбо. барабуг̇г̇алаж̇жхаасаяавасзна хид̣̇ам̣ бхаг̇авад̇аа нигкид̇д̇ам̣. гад̇амзсам̣ буг̇г̇алаанам̣ аж̇жхаасаяавасзнаад̇и? уг̇гхадид̇ан̃н̃уунам̣. жад̇д̇ааро хи буг̇г̇алаа уг̇гхадид̇ан̃н̃уу вибан̃жид̇ан̃н̃уу нзяяо бад̣̇абарамод̇и. д̇ад̇т̇а яасса буг̇г̇аласса саха уд̣̇аахадавзлааяа д̇хаммаабхисамаяо ход̇и, аяам̣ вужжад̇и буг̇г̇ало уг̇гхадид̇ан̃н̃уу. яасса буг̇г̇аласса сам̣кид̇д̇зна бхаасид̇асса вид̇т̇аарзна ад̇т̇з вибхаж̇ияамаанз д̇хаммаабхисамаяо ход̇и, аяам̣ вужжад̇и буг̇г̇ало вибан̃жид̇ан̃н̃уу. яасса буг̇г̇аласса уд̣̇д̣̇зсад̇о барибужчад̇о яонисо манасигарод̇о, галяаан̣амид̇д̇з сзвад̇о, бхаж̇ад̇о, баяирубаасад̇о, анубуб̣б̣зна д̇хаммаабхисамаяо ход̇и, аяам̣ вужжад̇и буг̇г̇ало нзяяо. яасса буг̇г̇аласса б̣ахумби сун̣ад̇о, б̣ахумби д̇хаараяад̇о, б̣ахумби ваажаяад̇о на д̇ааяа ж̇аад̇ияаа д̇хаммаабхисамаяо ход̇и, аяам̣ вужжад̇и буг̇г̇ало бад̣̇абарамо. ид̇и имзсу жад̇уусу буг̇г̇алзсу уг̇гхадид̇ан̃н̃уубуг̇г̇алаанам̣ аж̇жхаасаяавасзна ид̣̇ам̣ суд̇д̇ам̣ нигкид̇д̇ам̣.
Evametesu catūsu nikkhepesu imassa paṭiccasamuppādasuttassa parajjhāsayo nikkhepo. Parapuggalajjhāsayavasena hidaṃ bhagavatā nikkhittaṃ. Katamesaṃ puggalānaṃ ajjhāsayavasenāti? Ugghaṭitaññūnaṃ. Cattāro hi puggalā ugghaṭitaññū vipañcitaññū neyyo padaparamoti. Tattha yassa puggalassa saha udāhaṭavelāya dhammābhisamayo hoti, ayaṃ vuccati puggalo ugghaṭitaññū. Yassa puggalassa saṃkhittena bhāsitassa vitthārena atthe vibhajiyamāne dhammābhisamayo hoti, ayaṃ vuccati puggalo vipañcitaññū. Yassa puggalassa uddesato paripucchato yoniso manasikaroto, kalyāṇamitte sevato, bhajato, payirupāsato, anupubbena dhammābhisamayo hoti, ayaṃ vuccati puggalo neyyo. Yassa puggalassa bahumpi suṇato, bahumpi dhārayato, bahumpi vācayato na tāya jātiyā dhammābhisamayo hoti, ayaṃ vuccati puggalo padaparamo. Iti imesu catūsu puggalesu ugghaṭitaññūpuggalānaṃ ajjhāsayavasena idaṃ suttaṃ nikkhittaṃ.
д̇ад̣̇аа гира бан̃жасад̇аа ж̇анабад̣̇аваасигаа бхигкуу саб̣б̣зва згажараа д̣̇вижараа д̇ижараа жад̇ужараа бан̃жажараа сабхааг̇авуд̇д̇ино д̇худ̇ан̇г̇ад̇хараа аарад̣̇д̇хавийрияаа яуд̇д̇аяог̇аа вибассагаа сан̣хам̣ сукумам̣ сун̃н̃ад̇ам̣ бажжаяаагаарад̣̇зсанам̣ бад̇т̇аяамаанаа сааяанхасамаяз бхаг̇аванд̇ам̣ убасан̇гамид̇ваа, ванд̣̇ид̇ваа, рад̇д̇агамб̣аласаан̣ияаа баригкибамаанаа вияа д̣̇зсанам̣ бажжаасийсамаанаа бариваарзд̇ваа нисийд̣̇им̣су. д̇зсам̣ аж̇жхаасаяавасзна бхаг̇аваа ид̣̇ам̣ суд̇д̇ам̣ аарабхи. яат̇аа хи чзго жид̇д̇агааро абаригаммагад̇абхид̇д̇им̣ лабхид̇ваа, на аад̣̇ид̇ова руубам̣ самудтаабзси, махаамад̇д̇игалзбаад̣̇ийхи бана бхид̇д̇ибаригаммам̣ д̇аава гад̇ваа , гад̇абаригаммааяа бхид̇д̇ияаа руубам̣ самудтаабзд̇и, гад̇абаригаммам̣ бана бхид̇д̇им̣ лабхид̇ваа, бхид̇д̇ибаригаммаб̣яаабаарам̣ агад̇ваа, ран̇г̇аж̇аад̇аани яож̇зд̇ваа, ваддигам̣ ваа д̇уулигам̣ ваа аад̣̇ааяа руубамзва самудтаабзд̇и, звамзва бхаг̇аваа агад̇аабхинивзсам̣ аад̣̇игаммигагулабуд̇д̇ам̣ лабхид̇ваа наасса аад̣̇ид̇ова арахад̇д̇абад̣̇адтаанам̣ сан̣хам̣ сукумам̣ сун̃н̃ад̇ам̣ вибассанаалагкан̣ам̣ аажигкад̇и, сийласамаад̇хигаммассагад̇аад̣̇идтисамбад̣̇ааяа бана яож̇знд̇о буб̣б̣абхааг̇абадибад̣̇ам̣ д̇аава аажигкад̇и. яам̣ санд̇хааяа вуд̇д̇ам̣ –
Tadā kira pañcasatā janapadavāsikā bhikkhū sabbeva ekacarā dvicarā ticarā catucarā pañcacarā sabhāgavuttino dhutaṅgadharā āraddhavīriyā yuttayogā vipassakā saṇhaṃ sukhumaṃ suññataṃ paccayākāradesanaṃ patthayamānā sāyanhasamaye bhagavantaṃ upasaṅkamitvā, vanditvā, rattakambalasāṇiyā parikkhipamānā viya desanaṃ paccāsīsamānā parivāretvā nisīdiṃsu. Tesaṃ ajjhāsayavasena bhagavā idaṃ suttaṃ ārabhi. Yathā hi cheko cittakāro aparikammakatabhittiṃ labhitvā, na āditova rūpaṃ samuṭṭhāpesi, mahāmattikalepādīhi pana bhittiparikammaṃ tāva katvā , kataparikammāya bhittiyā rūpaṃ samuṭṭhāpeti, kataparikammaṃ pana bhittiṃ labhitvā, bhittiparikammabyāpāraṃ akatvā, raṅgajātāni yojetvā, vaṭṭikaṃ vā tūlikaṃ vā ādāya rūpameva samuṭṭhāpeti, evameva bhagavā akatābhinivesaṃ ādikammikakulaputtaṃ labhitvā nāssa āditova arahattapadaṭṭhānaṃ saṇhaṃ sukhumaṃ suññataṃ vipassanālakkhaṇaṃ ācikkhati, sīlasamādhikammassakatādiṭṭhisampadāya pana yojento pubbabhāgapaṭipadaṃ tāva ācikkhati. Yaṃ sandhāya vuttaṃ –
‘‘д̇асмаад̇иха д̇вам̣, бхигку, аад̣̇имзва висод̇хзхи гусалзсу д̇хаммзсу. го жаад̣̇и гусалаанам̣ д̇хаммаанам̣? сийлан̃жа сувисуд̣̇д̇хам̣ д̣̇идти жа уж̇угаа. яад̇о ко д̇з, бхигку, сийлан̃жа сувисуд̣̇д̇хам̣ бхависсад̇и д̣̇идти жа уж̇угаа. д̇ад̇о д̇вам̣, бхигку, сийлам̣ ниссааяа сийлз бад̇идтааяа жад̇д̇ааро сад̇ибадтаанз д̇ивид̇хзна бхаавзяяааси. гад̇амз жад̇д̇ааро? ид̇ха д̇вам̣, бхигку, аж̇жхад̇д̇ам̣ ваа гааяз гааяаанубассий вихараахи аад̇аабий самбаж̇аано сад̇имаа винзяяа логз абхиж̇жхаад̣̇оманассам̣. б̣ахид̣̇д̇хаа ваа гааяз…бз… аж̇жхад̇д̇аб̣ахид̣̇д̇хаа ваа гааяз…бз… д̇хаммзсу д̇хаммаанубассий вихараахи аад̇аабий самбаж̇аано сад̇имаа винзяяа логз абхиж̇жхаад̣̇оманассам̣. яад̇о ко д̇вам̣, бхигку, сийлам̣ ниссааяа сийлз бад̇идтааяа имз жад̇д̇ааро сад̇ибадтаанз звам̣ д̇ивид̇хзна бхаавзссаси, д̇ад̇о д̇уяхам̣, бхигку, яаа рад̇д̇и ваа д̣̇ивасо ваа ааг̇амиссад̇и, вуд̣̇д̇хиязва баадиган̇каа гусалзсу д̇хаммзсу, но барихааний’’д̇и (сам̣. ни. 5.369).
‘‘Tasmātiha tvaṃ, bhikkhu, ādimeva visodhehi kusalesu dhammesu. Ko cādi kusalānaṃ dhammānaṃ? Sīlañca suvisuddhaṃ diṭṭhi ca ujukā. Yato kho te, bhikkhu, sīlañca suvisuddhaṃ bhavissati diṭṭhi ca ujukā. Tato tvaṃ, bhikkhu, sīlaṃ nissāya sīle patiṭṭhāya cattāro satipaṭṭhāne tividhena bhāveyyāsi. Katame cattāro? Idha tvaṃ, bhikkhu, ajjhattaṃ vā kāye kāyānupassī viharāhi ātāpī sampajāno satimā vineyya loke abhijjhādomanassaṃ. Bahiddhā vā kāye…pe… ajjhattabahiddhā vā kāye…pe… dhammesu dhammānupassī viharāhi ātāpī sampajāno satimā vineyya loke abhijjhādomanassaṃ. Yato kho tvaṃ, bhikkhu, sīlaṃ nissāya sīle patiṭṭhāya ime cattāro satipaṭṭhāne evaṃ tividhena bhāvessasi, tato tuyhaṃ, bhikkhu, yā ratti vā divaso vā āgamissati, vuddhiyeva pāṭikaṅkhā kusalesu dhammesu, no parihānī’’ti (saṃ. ni. 5.369).
звам̣ аад̣̇игаммигагулабуд̇д̇асса сийлагат̇ааяа баригаммам̣ гат̇зд̇ваа, арахад̇д̇абад̣̇адтаанам̣ сан̣хам̣ сукумам̣ сун̃н̃ад̇ам̣ вибассанаалагкан̣ам̣ аажигкад̇и.
Evaṃ ādikammikakulaputtassa sīlakathāya parikammaṃ kathetvā, arahattapadaṭṭhānaṃ saṇhaṃ sukhumaṃ suññataṃ vipassanālakkhaṇaṃ ācikkhati.
барисуд̣̇д̇хасийлам̣ бана аарад̣̇д̇хавийрияам̣ яуд̇д̇аяог̇ам̣ вибассагам̣ лабхид̇ваа, наасса буб̣б̣абхааг̇абадибад̣̇ам̣ аажигкад̇и, уж̇угамзва бана арахад̇д̇абад̣̇адтаанам̣ сан̣хам̣ сукумам̣ сун̃н̃ад̇ам̣ вибассанаалагкан̣ам̣ аажигкад̇и. имз бан̃жасад̇аа бхигкуу буб̣б̣абхааг̇абадибад̣̇ам̣ барисод̇хзд̇ваа тид̇аа суд̇ханд̇асуван̣н̣асад̣̇исаа субаримаж̇ж̇ид̇аман̣игканд̇хасаннибхаа, зго логуд̇д̇арамаг̇г̇ова нзсам̣ анааг̇ад̇о. ид̇и д̇ассааг̇аманад̇т̇ааяа сад̇т̇аа д̇зсам̣ аж̇жхаасаяам̣ абзгкамаано ид̣̇ам̣ суд̇д̇ам̣ аарабхи.
Parisuddhasīlaṃ pana āraddhavīriyaṃ yuttayogaṃ vipassakaṃ labhitvā, nāssa pubbabhāgapaṭipadaṃ ācikkhati, ujukameva pana arahattapadaṭṭhānaṃ saṇhaṃ sukhumaṃ suññataṃ vipassanālakkhaṇaṃ ācikkhati. Ime pañcasatā bhikkhū pubbabhāgapaṭipadaṃ parisodhetvā ṭhitā sudhantasuvaṇṇasadisā suparimajjitamaṇikkhandhasannibhā, eko lokuttaramaggova nesaṃ anāgato. Iti tassāgamanatthāya satthā tesaṃ ajjhāsayaṃ apekkhamāno idaṃ suttaṃ ārabhi.
д̇ад̇т̇а бадижжасамуббаад̣̇анд̇и бажжаяаагаарам̣. бажжаяаагааро хи ан̃н̃аман̃н̃ам̣ бадижжа сахид̇з д̇хаммз уббаад̣̇зд̇и. д̇асмаа бадижжасамуббаад̣̇од̇и вужжад̇и. аяамзд̇т̇а сан̇кзбо, вид̇т̇ааро бана висуд̣̇д̇химаг̇г̇ад̇о г̇ахзд̇аб̣б̣о.
Tattha paṭiccasamuppādanti paccayākāraṃ. Paccayākāro hi aññamaññaṃ paṭicca sahite dhamme uppādeti. Tasmā paṭiccasamuppādoti vuccati. Ayamettha saṅkhepo, vitthāro pana visuddhimaggato gahetabbo.
вод̇и аяам̣ во-сад̣̇д̣̇о бажжад̇д̇а-убаяог̇агаран̣а-самбад̣̇аана-саамиважана-бад̣̇абууран̣зсу д̣̇иссад̇и. ‘‘гажжи бана во ануруд̣̇д̇хаа самаг̇г̇аа саммод̣̇амаанаа’’д̇иаад̣̇ийсу (ма. ни. 1.326; махаава. 466) хи бажжад̇д̇з д̣̇иссад̇и. ‘‘г̇ажчат̇а, бхигкавз, бан̣аамзми во’’д̇иаад̣̇ийсу (ма. ни. 2.157) убаяог̇з. ‘‘на во мама санд̇игз вад̇т̇аб̣б̣а’’нд̇иаад̣̇ийсу (ма. ни. 2.157) гаран̣з. ‘‘ванабад̇т̇абарияааяам̣ во, бхигкавз, д̣̇зсзссаамий’’д̇иаад̣̇ийсу (ма. ни. 1.190) самбад̣̇аанз. ‘‘саб̣б̣зсам̣ во, саарибуд̇д̇а, субхаасид̇а’’нд̇иаад̣̇ийсу (ма. ни. 1.345) саамиважанз. ‘‘яз хи во арияаа барисуд̣̇д̇хагааяагамманд̇аа’’д̇иаад̣̇ийсу (ма. ни. 1.35) бад̣̇абууран̣амад̇д̇з. ид̇ха банааяам̣ самбад̣̇аанз д̣̇адтаб̣б̣о. бхигкавзд̇и бад̇иссавзна абхимукийбхууд̇аанам̣ буна аалабанам̣. д̣̇зсзссаамийд̇и д̣̇зсанаабадиж̇аананам̣. д̇ам̣ сун̣аат̇аад̇и д̇ам̣ бадижжасамуббаад̣̇ам̣ д̇ам̣ д̣̇зсанам̣ маяаа вужжамаанам̣ сун̣аат̇а.
Voti ayaṃ vo-saddo paccatta-upayogakaraṇa-sampadāna-sāmivacana-padapūraṇesu dissati. ‘‘Kacci pana vo anuruddhā samaggā sammodamānā’’tiādīsu (ma. ni. 1.326; mahāva. 466) hi paccatte dissati. ‘‘Gacchatha, bhikkhave, paṇāmemi vo’’tiādīsu (ma. ni. 2.157) upayoge. ‘‘Na vo mama santike vatthabba’’ntiādīsu (ma. ni. 2.157) karaṇe. ‘‘Vanapatthapariyāyaṃ vo, bhikkhave, desessāmī’’tiādīsu (ma. ni. 1.190) sampadāne. ‘‘Sabbesaṃ vo, sāriputta, subhāsita’’ntiādīsu (ma. ni. 1.345) sāmivacane. ‘‘Ye hi vo ariyā parisuddhakāyakammantā’’tiādīsu (ma. ni. 1.35) padapūraṇamatte. Idha panāyaṃ sampadāne daṭṭhabbo. Bhikkhaveti patissavena abhimukhībhūtānaṃ puna ālapanaṃ. Desessāmīti desanāpaṭijānanaṃ. Taṃ suṇāthāti taṃ paṭiccasamuppādaṃ taṃ desanaṃ mayā vuccamānaṃ suṇātha.
саад̇хугам̣ манаси гарот̇аад̇и зд̇т̇а бана саад̇хугам̣ саад̇хууд̇и згад̇т̇амзд̇ам̣. аяан̃жа саад̇хусад̣̇д̣̇о ааяаажана-самбадижчана-самбахам̣сана-сунд̣̇ара-д̣̇ал̣хийгаммаад̣̇ийсу д̣̇иссад̇и. ‘‘саад̇ху мз, бханд̇з, бхаг̇аваа сам̣кид̇д̇зна д̇хаммам̣ д̣̇зсзд̇уу’’д̇иаад̣̇ийсу (а. ни. 4.257; сам̣. ни. 4.65; 5.381) хи ааяаажанз д̣̇иссад̇и. ‘‘саад̇ху, бханд̇зд̇и ко со бхигку бхаг̇авад̇о бхаасид̇ам̣ абхинанд̣̇ид̇ваа анумод̣̇ид̇ваа’’д̇иаад̣̇ийсу (ма. ни. 3.86) самбадижчанз. ‘‘саад̇ху саад̇ху, саарибуд̇д̇аа’’д̇иаад̣̇ийсу (д̣̇ий. ни. 3.349) самбахам̣санз.
Sādhukaṃ manasi karothāti ettha pana sādhukaṃ sādhūti ekatthametaṃ. Ayañca sādhusaddo āyācana-sampaṭicchana-sampahaṃsana-sundara-daḷhīkammādīsu dissati. ‘‘Sādhu me, bhante, bhagavā saṃkhittena dhammaṃ desetū’’tiādīsu (a. ni. 4.257; saṃ. ni. 4.65; 5.381) hi āyācane dissati. ‘‘Sādhu, bhanteti kho so bhikkhu bhagavato bhāsitaṃ abhinanditvā anumoditvā’’tiādīsu (ma. ni. 3.86) sampaṭicchane. ‘‘Sādhu sādhu, sāriputtā’’tiādīsu (dī. ni. 3.349) sampahaṃsane.
‘‘саад̇ху д̇хаммаружий рааж̇аа, саад̇ху бан̃н̃аан̣аваа наро;
‘‘Sādhu dhammarucī rājā, sādhu paññāṇavā naro;
саад̇ху мид̇д̇аанамад̣̇д̣̇уб̣бхо, баабасса агаран̣ам̣ сука’’нд̇и. –
Sādhu mittānamaddubbho, pāpassa akaraṇaṃ sukha’’nti. –
аад̣̇ийсу (ж̇аа. 2.18.101) сунд̣̇арз. ‘‘д̇зна хи, б̣раахман̣а, саад̇хугам̣ сун̣аахий’’д̇иаад̣̇ийсу (а. ни. 5.192) саад̇хугасад̣̇д̣̇оязва д̣̇ал̣хийгаммз аан̣ад̇д̇ияанд̇иби вужжад̇и. ид̇ха банааяам̣ зд̇т̇зва д̣̇ал̣хийгаммз аан̣ад̇д̇ияаа жа ад̇т̇о взд̣̇ид̇аб̣б̣о, сунд̣̇арад̇т̇зби ваддад̇и. д̣̇ал̣хийгаран̣ад̇т̇зна хи ‘‘д̣̇ал̣хам̣ имам̣ д̇хаммам̣ сун̣аат̇а, суг̇г̇ахид̇ам̣ г̇ан̣ханд̇аа’’, аан̣ад̇д̇иад̇т̇зна ‘‘мама аан̣ад̇д̇ияаа сун̣аат̇а’’ сунд̣̇арад̇т̇зна ‘‘сунд̣̇арамимам̣ бхад̣̇д̣̇агам̣ д̇хаммам̣ сун̣аат̇аа’’д̇и зд̇ам̣ д̣̇ийбид̇ам̣ ход̇и. манаси гарот̇аад̇и ааваж̇ж̇зт̇а. саманнаахарат̇аад̇и ад̇т̇о. авигкид̇д̇ажид̇д̇аа худ̇ваа нисаамзт̇а, жид̇д̇з гарот̇аад̇и ад̇хиббааяо.
Ādīsu (jā. 2.18.101) sundare. ‘‘Tena hi, brāhmaṇa, sādhukaṃ suṇāhī’’tiādīsu (a. ni. 5.192) sādhukasaddoyeva daḷhīkamme āṇattiyantipi vuccati. Idha panāyaṃ ettheva daḷhīkamme āṇattiyā ca attho veditabbo, sundaratthepi vaṭṭati. Daḷhīkaraṇatthena hi ‘‘daḷhaṃ imaṃ dhammaṃ suṇātha, suggahitaṃ gaṇhantā’’, āṇattiatthena ‘‘mama āṇattiyā suṇātha’’ sundaratthena ‘‘sundaramimaṃ bhaddakaṃ dhammaṃ suṇāthā’’ti etaṃ dīpitaṃ hoti. Manasi karothāti āvajjetha. Samannāharathāti attho. Avikkhittacittā hutvā nisāmetha, citte karothāti adhippāyo.
ид̣̇аанзд̇т̇а д̇ам̣ сун̣аат̇аад̇и сод̇инд̣̇рияавигкзбанивааран̣амзд̇ам̣. саад̇хугам̣ манаси гарот̇аад̇и манасигаарз д̣̇ал̣хийгамманияож̇анзна манинд̣̇рияавигкзбанивааран̣ам̣. буриман̃жзд̇т̇а б̣яан̃ж̇анавибаллаасаг̇ааханивааран̣ам̣, бажчимам̣ ад̇т̇авибаллаасаг̇ааханивааран̣ам̣. буримзна жа д̇хаммассаванз нияож̇зд̇и, бажчимзна суд̇аанам̣ д̇хаммаанам̣ д̇хааран̣уубабаригкаасу. буримзна жа ‘‘саб̣яан̃ж̇ано аяам̣ д̇хаммо, д̇асмаа саванийяо’’д̇и д̣̇ийбзд̇и, бажчимзна ‘‘саад̇т̇о, д̇асмаа манаси гаад̇аб̣б̣о’’д̇и. саад̇хугабад̣̇ам̣ ваа убхаяабад̣̇зхи яож̇зд̇ваа, ‘‘яасмаа аяам̣ д̇хаммо д̇хаммаг̇амбхийро жа д̣̇зсанааг̇амбхийро жа, д̇асмаа сун̣аат̇а саад̇хугам̣. яасмаа ад̇т̇аг̇амбхийро жа бадивзд̇хаг̇амбхийро жа, д̇асмаа саад̇хугам̣ манаси гарот̇аа’’д̇и звам̣ яож̇анаа взд̣̇ид̇аб̣б̣аа. бхаасиссаамийд̇и д̣̇зсзссаами. ‘‘д̇ам̣ сун̣аат̇аа’’д̇и зд̇т̇а бадин̃н̃аад̇ам̣ д̣̇зсанам̣ сам̣кид̇д̇ад̇ова на д̣̇зсзссаами, абижа ко вид̇т̇аарад̇оби нам̣ бхаасиссаамийд̇и вуд̇д̇ам̣ ход̇и. сан̇кзбавид̇т̇аараваажагаани хи зд̇аани бад̣̇аани. яат̇ааха ван̇г̇ийсад̇т̇зро –
Idānettha taṃ suṇāthāti sotindriyavikkhepanivāraṇametaṃ. Sādhukaṃ manasi karothāti manasikāre daḷhīkammaniyojanena manindriyavikkhepanivāraṇaṃ. Purimañcettha byañjanavipallāsagāhanivāraṇaṃ, pacchimaṃ atthavipallāsagāhanivāraṇaṃ. Purimena ca dhammassavane niyojeti, pacchimena sutānaṃ dhammānaṃ dhāraṇūpaparikkhāsu. Purimena ca ‘‘sabyañjano ayaṃ dhammo, tasmā savanīyo’’ti dīpeti, pacchimena ‘‘sāttho, tasmā manasi kātabbo’’ti. Sādhukapadaṃ vā ubhayapadehi yojetvā, ‘‘yasmā ayaṃ dhammo dhammagambhīro ca desanāgambhīro ca, tasmā suṇātha sādhukaṃ. Yasmā atthagambhīro ca paṭivedhagambhīro ca, tasmā sādhukaṃ manasi karothā’’ti evaṃ yojanā veditabbā. Bhāsissāmīti desessāmi. ‘‘Taṃ suṇāthā’’ti ettha paṭiññātaṃ desanaṃ saṃkhittatova na desessāmi, apica kho vitthāratopi naṃ bhāsissāmīti vuttaṃ hoti. Saṅkhepavitthāravācakāni hi etāni padāni. Yathāha vaṅgīsatthero –
‘‘сам̣кид̇д̇знаби д̣̇зсзд̇и, вид̇т̇аарзнаби бхаасад̇и;
‘‘Saṃkhittenapi deseti, vitthārenapi bhāsati;
саал̣игааяива ниг̇гхосо, бадибхаанам̣ уд̣̇ийраяий’’д̇и. (сам̣. ни. 1.214; т̇зраг̇аа. 1241);
Sāḷikāyiva nigghoso, paṭibhānaṃ udīrayī’’ti. (saṃ. ni. 1.214; theragā. 1241);
звам̣ вуд̇д̇з уссаахаж̇аад̇аа худ̇ваа звам̣, бханд̇зд̇и ко д̇з бхигкуу бхаг̇авад̇о бажжассосум̣ сад̇т̇у важанам̣ самбадижчим̣су, бадиг̇г̇ахзсунд̇и вуд̇д̇ам̣ ход̇и.
Evaṃ vutte ussāhajātā hutvā evaṃ, bhanteti kho te bhikkhū bhagavato paccassosuṃ satthu vacanaṃ sampaṭicchiṃsu, paṭiggahesunti vuttaṃ hoti.
ат̇а нзсам̣ бхаг̇аваа зд̇ад̣̇авожа – зд̇ам̣ ид̣̇аани вад̇д̇аб̣б̣ам̣ ‘‘гад̇амо жа, бхигкавз, бадижжасамуббаад̣̇о’’д̇иаад̣̇им̣ сагалам̣ суд̇д̇ам̣ авожа. д̇ад̇т̇а гад̇амо жа, бхигкавз, бадижжасамуббаад̣̇од̇и гат̇зд̇угамяад̇аабужчаа. бан̃жавид̇хаа хи бужчаа ад̣̇идтаж̇од̇анаабужчаа д̣̇идтасам̣санд̣̇анаабужчаа вимад̇ижчзд̣̇анаабужчаа анумад̇ибужчаа гат̇зд̇угамяад̇аабужчаад̇и, д̇аасам̣ ид̣̇ам̣ наанад̇д̇ам̣ –
Atha nesaṃ bhagavā etadavoca – etaṃ idāni vattabbaṃ ‘‘katamo ca, bhikkhave, paṭiccasamuppādo’’tiādiṃ sakalaṃ suttaṃ avoca. Tattha katamo ca, bhikkhave, paṭiccasamuppādoti kathetukamyatāpucchā. Pañcavidhā hi pucchā adiṭṭhajotanāpucchā diṭṭhasaṃsandanāpucchā vimaticchedanāpucchā anumatipucchā kathetukamyatāpucchāti, tāsaṃ idaṃ nānattaṃ –
гад̇амаа ад̣̇идтаж̇од̇анаа бужчаа (махаани. 150; жуул̣ани. бун̣н̣агамаан̣авабужчаанид̣̇д̣̇зса 12)? багад̇ияаа лагкан̣ам̣ ан̃н̃аад̇ам̣ ход̇и ад̣̇идтам̣ ад̇улид̇ам̣ ад̇ийрид̇ам̣ авибхууд̇ам̣ авибхаавид̇ам̣. д̇асса н̃аан̣ааяа д̣̇ассанааяа д̇уланааяа д̇ийран̣ааяа вибхууд̇ааяа вибхааванад̇т̇ааяа бан̃хам̣ бужчад̇и. аяам̣ ад̣̇идтаж̇од̇анаабужчаа.
Katamā adiṭṭhajotanā pucchā (mahāni. 150; cūḷani. puṇṇakamāṇavapucchāniddesa 12)? Pakatiyā lakkhaṇaṃ aññātaṃ hoti adiṭṭhaṃ atulitaṃ atīritaṃ avibhūtaṃ avibhāvitaṃ. Tassa ñāṇāya dassanāya tulanāya tīraṇāya vibhūtāya vibhāvanatthāya pañhaṃ pucchati. Ayaṃ adiṭṭhajotanāpucchā.
гад̇амаа д̣̇идтасам̣санд̣̇анаабужчаа? багад̇ияаа лагкан̣ам̣ н̃аад̇ам̣ ход̇и д̣̇идтам̣ д̇улид̇ам̣ д̇ийрид̇ам̣ вибхууд̇ам̣ вибхаавид̇ам̣. со ан̃н̃зхи бан̣д̣ид̇зхи сад̣̇д̇хим̣ сам̣санд̣̇анад̇т̇ааяа бан̃хам̣ бужчад̇и. аяам̣ д̣̇идтасам̣санд̣̇анаабужчаа.
Katamā diṭṭhasaṃsandanāpucchā? Pakatiyā lakkhaṇaṃ ñātaṃ hoti diṭṭhaṃ tulitaṃ tīritaṃ vibhūtaṃ vibhāvitaṃ. So aññehi paṇḍitehi saddhiṃ saṃsandanatthāya pañhaṃ pucchati. Ayaṃ diṭṭhasaṃsandanāpucchā.
гад̇амаа вимад̇ижчзд̣̇анаабужчаа? багад̇ияаа сам̣саяабагканд̣̇о ход̇и вимад̇ибагканд̣̇о д̣̇взл̣хагаж̇аад̇о – ‘‘звам̣ ну ко, на ну ко, гат̇ам̣ ну ко’’д̇и, со вимад̇ижчзд̣̇анад̇т̇ааяа бан̃хам̣ бужчад̇и, аяам̣ вимад̇ижчзд̣̇анаабужчаа.
Katamā vimaticchedanāpucchā? Pakatiyā saṃsayapakkhando hoti vimatipakkhando dveḷhakajāto – ‘‘evaṃ nu kho, na nu kho, kathaṃ nu kho’’ti, so vimaticchedanatthāya pañhaṃ pucchati, ayaṃ vimaticchedanāpucchā.
гад̇амаа анумад̇ибужчаа? бхаг̇аваа бхигкуунам̣ анумад̇ияаа бан̃хам̣ бужчад̇и – ‘‘д̇ам̣ гим̣ ман̃н̃ат̇а, бхигкавз, руубам̣ нижжам̣ ваа анижжам̣ ваа’’д̇и, анижжам̣, бханд̇з. яам̣ банаанижжам̣ д̣̇угкам̣ ваа д̇ам̣ сукам̣ ваад̇и, д̣̇угкам̣, бханд̇з. яам̣ банаанижжам̣ д̣̇угкам̣ вибарин̣аамад̇хаммам̣, галлам̣ ну д̇ам̣ саманубассид̇ум̣ – ‘‘зд̇ам̣ мама зсохамасми зсо мз ад̇д̇аа’’д̇и, но хзд̇ам̣ бханд̇зд̇и (сам̣. ни. 3.79). аяам̣ анумад̇ибужчаа.
Katamā anumatipucchā? Bhagavā bhikkhūnaṃ anumatiyā pañhaṃ pucchati – ‘‘taṃ kiṃ maññatha, bhikkhave, rūpaṃ niccaṃ vā aniccaṃ vā’’ti, aniccaṃ, bhante. Yaṃ panāniccaṃ dukkhaṃ vā taṃ sukhaṃ vāti, dukkhaṃ, bhante. Yaṃ panāniccaṃ dukkhaṃ vipariṇāmadhammaṃ, kallaṃ nu taṃ samanupassituṃ – ‘‘etaṃ mama esohamasmi eso me attā’’ti, no hetaṃ bhanteti (saṃ. ni. 3.79). Ayaṃ anumatipucchā.
гад̇амаа гат̇зд̇угамяад̇аабужчаа? бхаг̇аваа бхигкуунам̣ гат̇зд̇угамяад̇ааяа бан̃хам̣ бужчад̇и – ‘‘жад̇д̇ааромз, бхигкавз, сад̇ибадтаанаа. гад̇амз жад̇д̇ааро’’д̇и? аяам̣ гат̇зд̇угамяад̇аабужчаад̇и.
Katamā kathetukamyatāpucchā? Bhagavā bhikkhūnaṃ kathetukamyatāya pañhaṃ pucchati – ‘‘cattārome, bhikkhave, satipaṭṭhānā. Katame cattāro’’ti? Ayaṃ kathetukamyatāpucchāti.
д̇ад̇т̇а б̣уд̣̇д̇хаанам̣ буримаа д̇иссо бужчаа над̇т̇и. гасмаа? б̣уд̣̇д̇хаанан̃хи д̇ийсу ад̣̇д̇хаасу гин̃жи сан̇кад̇ам̣ ад̣̇д̇хаавимуд̇д̇ам̣ ваа асан̇кад̇ам̣ ад̣̇идтам̣ аж̇од̇ид̇ам̣ ад̇улид̇ам̣ ад̇ийрид̇ам̣ авибхууд̇ам̣ авибхаавид̇ам̣ наама над̇т̇и. д̇зна нзсам̣ ад̣̇идтаж̇од̇анаабужчаа над̇т̇и. яам̣ бана бхаг̇авад̇аа ад̇д̇ано н̃аан̣зна бадивид̣̇д̇хам̣, д̇асса ан̃н̃зна саман̣зна ваа б̣раахман̣зна ваа д̣̇звзна ваа маарзна ваа б̣рахмунаа ваа сад̣̇д̇хим̣ сам̣санд̣̇анагижжам̣ над̇т̇и. д̇знасса д̣̇идтасам̣санд̣̇анаабужчаа над̇т̇и. яасмаа банзса агат̇ам̣гат̇ий д̇ин̣н̣авижигижчо саб̣б̣ад̇хаммзсу вихад̇асам̣саяо. д̇знасса вимад̇ижчзд̣̇анаабужчаа над̇т̇и. ид̇араа бана д̣̇вз бужчаа бхаг̇авад̇о ад̇т̇и. д̇аасу аяам̣ гат̇зд̇угамяад̇аа бужчаад̇и взд̣̇ид̇аб̣б̣аа.
Tattha buddhānaṃ purimā tisso pucchā natthi. Kasmā? Buddhānañhi tīsu addhāsu kiñci saṅkhataṃ addhāvimuttaṃ vā asaṅkhataṃ adiṭṭhaṃ ajotitaṃ atulitaṃ atīritaṃ avibhūtaṃ avibhāvitaṃ nāma natthi. Tena nesaṃ adiṭṭhajotanāpucchā natthi. Yaṃ pana bhagavatā attano ñāṇena paṭividdhaṃ, tassa aññena samaṇena vā brāhmaṇena vā devena vā mārena vā brahmunā vā saddhiṃ saṃsandanakiccaṃ natthi. Tenassa diṭṭhasaṃsandanāpucchā natthi. Yasmā panesa akathaṃkathī tiṇṇavicikiccho sabbadhammesu vihatasaṃsayo. Tenassa vimaticchedanāpucchā natthi. Itarā pana dve pucchā bhagavato atthi. Tāsu ayaṃ kathetukamyatā pucchāti veditabbā.
ид̣̇аани д̇аава бужчааяа будтам̣ бажжаяаагаарам̣ вибхаж̇анд̇о авиж̇ж̇аабажжаяаа, бхигкавз, сан̇каараад̇иаад̣̇имааха. зд̇т̇а жа яат̇аа наама ‘‘бид̇арам̣ гат̇зссаамий’’д̇и аарад̣̇д̇хо ‘‘д̇иссасса бид̇аа сон̣асса бид̇аа’’д̇и батамад̇арам̣ буд̇д̇амби гат̇зд̇и, звамзва бхаг̇аваа бажжаяам̣ гат̇зд̇ум̣ аарад̣̇д̇хо ‘‘авиж̇ж̇аабажжаяаа сан̇каараа’’д̇иаад̣̇инаа наязна сан̇каараад̣̇ийнам̣ бажжаяз авиж̇ж̇аад̣̇ид̇хаммз гат̇знд̇о бажжаяуббаннамби гат̇зси. аахаараваг̇г̇асса бана барияосаанз ‘‘бадижжасамуббаад̣̇ан̃жа во, бхигкавз, д̣̇зсзссаами бадижжасамуббаннз жа д̇хаммз’’д̇и (сам̣. ни. 2.20) убхаяам̣ аарабхид̇ваа убхаяамби гат̇зси. ид̣̇аани авиж̇ж̇аабажжаяаа сан̇каараад̇иаад̣̇ийсу бана авиж̇ж̇аа жа саа бажжаяо жаад̇и авиж̇ж̇аабажжаяо. д̇асмаа авиж̇ж̇аабажжаяаа сан̇каараа самбхаванд̇ийд̇и иминаа наязна ад̇т̇о взд̣̇ид̇аб̣б̣о. аяамзд̇т̇а сан̇кзбо, вид̇т̇аарзна бана саб̣б̣аагаарасамбаннаа ануломабадижжасамуббаад̣̇агат̇аа висуд̣̇д̇химаг̇г̇з гат̇ид̇аа, д̇асмаа саа д̇ад̇т̇а гат̇ид̇авасзнзва г̇ахзд̇аб̣б̣аа.
Idāni tāva pucchāya puṭṭhaṃ paccayākāraṃ vibhajanto avijjāpaccayā, bhikkhave, saṅkhārātiādimāha. Ettha ca yathā nāma ‘‘pitaraṃ kathessāmī’’ti āraddho ‘‘tissassa pitā soṇassa pitā’’ti paṭhamataraṃ puttampi katheti, evameva bhagavā paccayaṃ kathetuṃ āraddho ‘‘avijjāpaccayā saṅkhārā’’tiādinā nayena saṅkhārādīnaṃ paccaye avijjādidhamme kathento paccayuppannampi kathesi. Āhāravaggassa pana pariyosāne ‘‘paṭiccasamuppādañca vo, bhikkhave, desessāmi paṭiccasamuppanne ca dhamme’’ti (saṃ. ni. 2.20) ubhayaṃ ārabhitvā ubhayampi kathesi. Idāni avijjāpaccayā saṅkhārātiādīsu pana avijjā ca sā paccayo cāti avijjāpaccayo. Tasmā avijjāpaccayā saṅkhārā sambhavantīti iminā nayena attho veditabbo. Ayamettha saṅkhepo, vitthārena pana sabbākārasampannā anulomapaṭiccasamuppādakathā visuddhimagge kathitā, tasmā sā tattha kathitavaseneva gahetabbā.
бадиломагат̇ааяам̣ бана авиж̇ж̇ааяа д̇взваад̇и авиж̇ж̇ааяа д̇у зва. асзсавирааг̇анирод̇хаад̇и вирааг̇асан̇каад̇зна маг̇г̇зна асзсанирод̇хаа. сан̇кааранирод̇ход̇и сан̇каараанам̣ ануббаад̣̇анирод̇хо ход̇и. звам̣нирод̇хаанам̣ бана сан̇каараанам̣ нирод̇хаа вин̃н̃аан̣аад̣̇ийнан̃жа нирод̇хаа наамаруубаад̣̇ийни нируд̣̇д̇хааниязва хонд̇ийд̇и д̣̇ассзд̇ум̣ сан̇кааранирод̇хаа вин̃н̃аан̣анирод̇ход̇иаад̣̇ийни вад̇ваа, звамзд̇асса гзваласса д̣̇угкагканд̇хасса нирод̇хо ход̇ийд̇и ааха. д̇ад̇т̇а гзвалассаад̇и сагаласса, суд̣̇д̇хасса ваа, сад̇д̇авирахид̇ассаад̇и ад̇т̇о. д̣̇угкагканд̇хассаад̇и д̣̇угкараасисса. нирод̇хо ход̇ийд̇и ануббаад̣̇о ход̇и. ид̇и бхаг̇аваа ануломад̇о д̣̇ваад̣̇асахи бад̣̇зхи ваддагат̇ам̣ гат̇зд̇ваа д̇амзва ваддам̣ виниваддзд̇ваа бадиломад̇о д̣̇ваад̣̇асахи бад̣̇зхи виваддам̣ гат̇знд̇о арахад̇д̇зна д̣̇зсанааяа гуудам̣ г̇ан̣хи. д̣̇зсанаабарияосаанз д̇з бан̃жасад̇аа аарад̣̇д̇хавибассагаа уг̇гхадид̇ан̃н̃уубуг̇г̇алаа суурияарасмисампудтаани барибаагаг̇ад̇аани бад̣̇умаани вияа сажжаани б̣уж̇жхид̇ваа арахад̇д̇апалз бад̇идтахим̣су.
Paṭilomakathāyaṃ pana avijjāya tvevāti avijjāya tu eva. Asesavirāganirodhāti virāgasaṅkhātena maggena asesanirodhā. Saṅkhāranirodhoti saṅkhārānaṃ anuppādanirodho hoti. Evaṃnirodhānaṃ pana saṅkhārānaṃ nirodhā viññāṇādīnañca nirodhā nāmarūpādīni niruddhāniyeva hontīti dassetuṃ saṅkhāranirodhā viññāṇanirodhotiādīni vatvā, evametassa kevalassa dukkhakkhandhassa nirodho hotīti āha. Tattha kevalassāti sakalassa, suddhassa vā, sattavirahitassāti attho. Dukkhakkhandhassāti dukkharāsissa. Nirodho hotīti anuppādo hoti. Iti bhagavā anulomato dvādasahi padehi vaṭṭakathaṃ kathetvā tameva vaṭṭaṃ vinivaṭṭetvā paṭilomato dvādasahi padehi vivaṭṭaṃ kathento arahattena desanāya kūṭaṃ gaṇhi. Desanāpariyosāne te pañcasatā āraddhavipassakā ugghaṭitaññūpuggalā sūriyarasmisamphuṭṭhāni paripākagatāni padumāni viya saccāni bujjhitvā arahattaphale patiṭṭhahiṃsu.
ид̣̇амавожа бхаг̇аваад̇и ид̣̇ам̣ ваддавиваддавасзна сагаласуд̇д̇ам̣ бхаг̇аваа авожа. ад̇д̇аманаа д̇з бхигкууд̇и д̇удтажид̇д̇аа д̇з бан̃жасад̇аа кийн̣аасаваа бхигкуу. бхаг̇авад̇о бхаасид̇ам̣ абхинанд̣̇унд̇и гаравийгаруд̇аман̃ж̇унаа ган̣н̣асукзна бан̣д̣ид̇аж̇анахад̣̇аяаанам̣ амад̇аабхисзгасад̣̇исзна б̣рахмассарзна бхаасад̇о бхаг̇авад̇о важанам̣ абхинанд̣̇им̣су, анумод̣̇им̣су жзва самбадижчим̣су жаад̇и ад̇т̇о. д̇знзд̇ам̣ вужжад̇и –
Idamavoca bhagavāti idaṃ vaṭṭavivaṭṭavasena sakalasuttaṃ bhagavā avoca. Attamanā te bhikkhūti tuṭṭhacittā te pañcasatā khīṇāsavā bhikkhū. Bhagavato bhāsitaṃ abhinandunti karavīkarutamañjunā kaṇṇasukhena paṇḍitajanahadayānaṃ amatābhisekasadisena brahmassarena bhāsato bhagavato vacanaṃ abhinandiṃsu, anumodiṃsu ceva sampaṭicchiṃsu cāti attho. Tenetaṃ vuccati –
‘‘субхаасид̇ам̣ сулабид̇ам̣, саад̇ху саад̇хууд̇и д̇аад̣̇ино;
‘‘Subhāsitaṃ sulapitaṃ, sādhu sādhūti tādino;
анумод̣̇амаанаа сирасаа, самбадижчим̣су бхигкаво’’д̇и.
Anumodamānā sirasā, sampaṭicchiṃsu bhikkhavo’’ti.
батамабадижжасамуббаад̣̇асуд̇д̇аван̣н̣анаа нидтид̇аа.
Paṭhamapaṭiccasamuppādasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 1. бадижжасамуббаад̣̇асуд̇д̇ам̣ • 1. Paṭiccasamuppādasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 1. бадижжасамуббаад̣̇асуд̇д̇аван̣н̣анаа • 1. Paṭiccasamuppādasuttavaṇṇanā
