| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১. কুসলত্তিকৰণ্ণনা
1. Kusalattikavaṇṇanā
১. পটিচ্চৰারৰণ্ণনা
1. Paṭiccavāravaṇṇanā
১. পচ্চযানুলোমং
1. Paccayānulomaṃ
(১.) ৰিভঙ্গৰারো
(1.) Vibhaṅgavāro
৫৩. ইদানি যা এতা পণ্ণত্তিৰারে কুসলত্তিকং নিস্সায হেতুপচ্চযাদিৰসেন একূনপঞ্ঞাসং আদিং কত্ৰা নযমত্তং দস্সেন্তেন অপরিমাণা পুচ্ছা দস্সিতা। তত্থ কুসলাকুসলাদীনং সহুপ্পত্তিযা অভাৰতো যা পুচ্ছা ‘‘কুসলং ধম্মং পটিচ্চ অকুসলো ধম্মো উপ্পজ্জতি হেতুপচ্চযা’’তি এৰং ৰিস্সজ্জনং ন লভন্তি। তা পহায যা ৰিস্সজ্জনং লভন্তি, তাযেৰ ৰিস্সজ্জেতুং অযং কুসলং ধম্মং পটিচ্চ কুসলো ধম্মো উপ্পজ্জতি হেতুপচ্চযাতিআদিনা নযেন পটিচ্চৰারস্স নিদ্দেসৰারো আরদ্ধো।
53. Idāni yā etā paṇṇattivāre kusalattikaṃ nissāya hetupaccayādivasena ekūnapaññāsaṃ ādiṃ katvā nayamattaṃ dassentena aparimāṇā pucchā dassitā. Tattha kusalākusalādīnaṃ sahuppattiyā abhāvato yā pucchā ‘‘kusalaṃ dhammaṃ paṭicca akusalo dhammo uppajjati hetupaccayā’’ti evaṃ vissajjanaṃ na labhanti. Tā pahāya yā vissajjanaṃ labhanti, tāyeva vissajjetuṃ ayaṃ kusalaṃ dhammaṃ paṭicca kusalo dhammo uppajjati hetupaccayātiādinā nayena paṭiccavārassa niddesavāro āraddho.
তত্থ সিযা – সচে ইমা হেতুপচ্চযাদিৰসেন একূনপঞ্ঞাসং পুচ্ছা সব্বসো ৰিস্সজ্জনং ন লভন্তি, অথ কস্মা দস্সিতা? ননু যা লভন্তি, তাযেৰ দস্সেতব্বাতি? আম, দস্সেতব্বা সিযুং। তথা দস্সিযমানা পন সব্বেসু তিকদুকপট্ঠানাদীসু একেকস্মিং তিকে, দুকে, দুকতিকে, তিকদুকে, তিকতিকে, দুকদুকে চ সঙ্খেপং অকত্ৰা দস্সেতব্বাযেৰ ভৰেয্যুং। কস্মা? যস্মা যা কুসলত্তিকে লভন্তি, ন তাযেৰ ৰেদনাত্তিকাদীসু। ধম্মানুলোমপচ্চনীযে চ তিকপট্ঠানে ৰিতক্কত্তিকপীতিত্তিকানং ৰিস্সজ্জনে সব্বাপেতা ৰিস্সজ্জনং লভন্তি, তস্মা উক্কট্ঠপরিচ্ছেদেন একেকস্মিং তিকে যত্তকাহি পুচ্ছাহি ভৰিতব্বং সব্বা কুসলত্তিকে দস্সিতা। এৰং দস্সিতাসু হি যা তত্থ ৰিস্সজ্জনং ন লভন্তি, তা পহায যা লভন্তি, তা ৰুচ্চমানা সক্কা সুখেন ৰিজানিতুন্তি সুখেন ৰিজাননত্থং সব্বাপি কুসলত্তিকে দস্সিতা। যা পনেত্থ ৰিস্সজ্জনং ন লভন্তি, তা পহায যা লভন্তি, তাযেৰ ৰিস্সজ্জিতাতি ৰেদিতব্বা।
Tattha siyā – sace imā hetupaccayādivasena ekūnapaññāsaṃ pucchā sabbaso vissajjanaṃ na labhanti, atha kasmā dassitā? Nanu yā labhanti, tāyeva dassetabbāti? Āma, dassetabbā siyuṃ. Tathā dassiyamānā pana sabbesu tikadukapaṭṭhānādīsu ekekasmiṃ tike, duke, dukatike, tikaduke, tikatike, dukaduke ca saṅkhepaṃ akatvā dassetabbāyeva bhaveyyuṃ. Kasmā? Yasmā yā kusalattike labhanti, na tāyeva vedanāttikādīsu. Dhammānulomapaccanīye ca tikapaṭṭhāne vitakkattikapītittikānaṃ vissajjane sabbāpetā vissajjanaṃ labhanti, tasmā ukkaṭṭhaparicchedena ekekasmiṃ tike yattakāhi pucchāhi bhavitabbaṃ sabbā kusalattike dassitā. Evaṃ dassitāsu hi yā tattha vissajjanaṃ na labhanti, tā pahāya yā labhanti, tā vuccamānā sakkā sukhena vijānitunti sukhena vijānanatthaṃ sabbāpi kusalattike dassitā. Yā panettha vissajjanaṃ na labhanti, tā pahāya yā labhanti, tāyeva vissajjitāti veditabbā.
তত্থ কুসলং ধম্মং পটিচ্চাতি চতুভূমককুসলধম্মেসু ৰেদনাক্খন্ধাদিভেদং একং ধম্মং পটিচ্চ পটিগন্ত্ৰা সহুপ্পত্তিসঙ্খাতেন সদিসভাৰেন পত্ৰা, তেন সদ্ধিং একতো উপ্পত্তিভাৰং উপগন্ত্ৰাতি অত্থো। কুসলো ধম্মোতি চতুভূমককুসলধম্মেসুযেৰ সঞ্ঞাক্খন্ধাদিভেদো একো ধম্মো। উপ্পজ্জতীতি উপ্পাদতো যাৰ নিরোধগমনা উদ্ধং পজ্জতি, নিব্বত্ততীতিপি অত্থো । অত্তানং লভতি, উপ্পাদাদযো তযোপি খণে পাপুণাতীতি ৰুত্তং হোতি। হেতুপচ্চযাতি কুসলহেতুনা হেতুপচ্চযভাৰং সাধেন্তেন।
Tattha kusalaṃ dhammaṃ paṭiccāti catubhūmakakusaladhammesu vedanākkhandhādibhedaṃ ekaṃ dhammaṃ paṭicca paṭigantvā sahuppattisaṅkhātena sadisabhāvena patvā, tena saddhiṃ ekato uppattibhāvaṃ upagantvāti attho. Kusalo dhammoti catubhūmakakusaladhammesuyeva saññākkhandhādibhedo eko dhammo. Uppajjatīti uppādato yāva nirodhagamanā uddhaṃ pajjati, nibbattatītipi attho . Attānaṃ labhati, uppādādayo tayopi khaṇe pāpuṇātīti vuttaṃ hoti. Hetupaccayāti kusalahetunā hetupaccayabhāvaṃ sādhentena.
এৰং ‘‘উপ্পজ্জেয্যা’’তি পুচ্ছায ‘‘উপ্পজ্জতী’’তি ৰিস্সজ্জনং ৰত্ৰা ইদানি যং ধম্মং পটিচ্চ যো ধম্মো উপ্পজ্জতি, তং ধম্মং খন্ধৰসেন দস্সেতুং কুসলং একং খন্ধন্তিআদিমাহ। তত্থ একন্তি ৰেদনাদীসু চতূসু যংকিঞ্চি একং। তযো খন্ধাতি যো যো পচ্চযভাৰেন গহিতো, তং তং ঠপেত্ৰা অৰসেসা তযো খন্ধা। তযো খন্ধেতি ৰেদনাদীসু যো একো খন্ধো উপ্পজ্জতীতি গহিতো, তং ঠপেত্ৰা সেসে তযো। দ্ৰে খন্ধেতি ৰেদনাসঞ্ঞাদুকাদীসু ছসু দুকেসু যেকেচি দ্ৰে খন্ধে পটিচ্চ। দ্ৰে খন্ধাতি যে যে পচ্চযভাৰেন গহিতা, তে তে ঠপেত্ৰা অৰসেসা দ্ৰে খন্ধা কুসলহেতুনা হেতুপচ্চযভাৰং সাধেন্তেন উপ্পজ্জন্তীতি অত্থো।
Evaṃ ‘‘uppajjeyyā’’ti pucchāya ‘‘uppajjatī’’ti vissajjanaṃ vatvā idāni yaṃ dhammaṃ paṭicca yo dhammo uppajjati, taṃ dhammaṃ khandhavasena dassetuṃ kusalaṃ ekaṃ khandhantiādimāha. Tattha ekanti vedanādīsu catūsu yaṃkiñci ekaṃ. Tayo khandhāti yo yo paccayabhāvena gahito, taṃ taṃ ṭhapetvā avasesā tayo khandhā. Tayo khandheti vedanādīsu yo eko khandho uppajjatīti gahito, taṃ ṭhapetvā sese tayo. Dve khandheti vedanāsaññādukādīsu chasu dukesu yekeci dve khandhe paṭicca. Dve khandhāti ye ye paccayabhāvena gahitā, te te ṭhapetvā avasesā dve khandhā kusalahetunā hetupaccayabhāvaṃ sādhentena uppajjantīti attho.
যস্মা পন একো খন্ধো একস্সেৰ দ্ৰিন্নংযেৰ ৰা, দ্ৰে ৰা পন একস্সেৰ পচ্চযো নাম নত্থি, তস্মা ‘‘একং খন্ধং পটিচ্চ একো খন্ধো, একং খন্ধং পটিচ্চ দ্ৰে খন্ধা, দ্ৰে খন্ধে পটিচ্চ একো খন্ধো’’তি ন ৰুত্তং। কুসলং ধম্মং পটিচ্চ অব্যাকতো ধম্মো উপ্পজ্জতীতিআদীসুপি ৰুত্তনযেনেৰ অত্থো ৰেদিতব্বো। চিত্তসমুট্ঠানং রূপন্তি ইদং পটিচ্চত্থস্স সহজাতত্থত্তা যং কুসলেন সহজাতঞ্চেৰ হেতুপচ্চযঞ্চ লভতি, তং দস্সেতুং ৰুত্তং। পরতোপি এৰরূপেসু ঠানেসু অযমেৰ নযো।
Yasmā pana eko khandho ekasseva dvinnaṃyeva vā, dve vā pana ekasseva paccayo nāma natthi, tasmā ‘‘ekaṃ khandhaṃ paṭicca eko khandho, ekaṃ khandhaṃ paṭicca dve khandhā, dve khandhe paṭicca eko khandho’’ti na vuttaṃ. Kusalaṃ dhammaṃ paṭicca abyākato dhammo uppajjatītiādīsupi vuttanayeneva attho veditabbo. Cittasamuṭṭhānaṃ rūpanti idaṃ paṭiccatthassa sahajātatthattā yaṃ kusalena sahajātañceva hetupaccayañca labhati, taṃ dassetuṃ vuttaṃ. Paratopi evarūpesu ṭhānesu ayameva nayo.
ৰিপাকাব্যাকতং কিরিযাব্যাকতন্তি এত্থ হেতুপচ্চযাভাৰতো অহেতুকং, রূপেন সদ্ধিং অনুপ্পত্তিতো আরুপ্পৰিপাকঞ্চ ন গহেতব্বং। পটিসন্ধিক্খণেতি কটত্তারূপসঙ্খাতস্স অব্যাকতস্স অব্যাকতং পটিচ্চ উপ্পত্তিদস্সনত্থং ৰুত্তং। ৰিপাকাব্যাকতন্তি তস্মিং খণে ৰিজ্জমানাব্যাকতৰসেন ৰুত্তং। খন্ধে পটিচ্চ ৰত্থু, ৰত্থুং পটিচ্চ খন্ধাতি ইদং কটত্তারূপগ্গহণেন ৰত্থুম্হি গহিতেপি ৰত্থুং পটিচ্চ খন্ধানং উপ্পত্তিদস্সনত্থং ৰুত্তং।
Vipākābyākataṃ kiriyābyākatanti ettha hetupaccayābhāvato ahetukaṃ, rūpena saddhiṃ anuppattito āruppavipākañca na gahetabbaṃ. Paṭisandhikkhaṇeti kaṭattārūpasaṅkhātassa abyākatassa abyākataṃ paṭicca uppattidassanatthaṃ vuttaṃ. Vipākābyākatanti tasmiṃ khaṇe vijjamānābyākatavasena vuttaṃ. Khandhe paṭicca vatthu, vatthuṃ paṭicca khandhāti idaṃ kaṭattārūpaggahaṇena vatthumhi gahitepi vatthuṃ paṭicca khandhānaṃ uppattidassanatthaṃ vuttaṃ.
একং মহাভূতন্তিআদি রূপাব্যাকতং পটিচ্চ রূপাব্যাকতস্স উপ্পত্তিদস্সনত্থং ৰুত্তং। একং খন্ধন্তিআদীসু ৰুত্তনযেনেৰ পনেত্থ অত্থযোজনা ৰেদিতব্বা। এৰং রূপাব্যাকতম্হি ভূতে পটিচ্চ ভূতানং উপ্পত্তিং ৰত্ৰা ইদানি ভূতে পটিচ্চ উপাদারূপানং উপ্পত্তিং দস্সেতুং মহাভূতে পটিচ্চ চিত্তসমুট্ঠানন্তিআদি ৰুত্তং। এৰং সন্তে উপাদারূপন্তি এত্তকমেৰ ৰত্তব্বং, ইতরদ্ৰযং কস্মা ৰুত্তন্তি? মহাভূতেপি পটিচ্চ উপ্পত্তিদস্সনত্থং। যঞ্হি হেট্ঠা ‘‘চিত্তসমুট্ঠানঞ্চ রূপং কটত্তা চ রূপ’’ন্তি দস্সিতং, তং ন কেৰলং খন্ধেযেৰ চ পটিচ্চ উপ্পজ্জতি, মহাভূতেপি পন পটিচ্চ উপ্পজ্জতীতি দস্সনত্থমিদং ৰুত্তন্তি ৰেদিতব্বং। তত্থ চিত্তসমুট্ঠানং পৰত্তেযেৰ, কটত্তারূপং পটিসন্ধিযম্পি। উপাদারূপন্তি তস্সেৰ উভযস্স ৰিসেসনং।
Ekaṃ mahābhūtantiādi rūpābyākataṃ paṭicca rūpābyākatassa uppattidassanatthaṃ vuttaṃ. Ekaṃ khandhantiādīsu vuttanayeneva panettha atthayojanā veditabbā. Evaṃ rūpābyākatamhi bhūte paṭicca bhūtānaṃ uppattiṃ vatvā idāni bhūte paṭicca upādārūpānaṃ uppattiṃ dassetuṃ mahābhūtepaṭicca cittasamuṭṭhānantiādi vuttaṃ. Evaṃ sante upādārūpanti ettakameva vattabbaṃ, itaradvayaṃ kasmā vuttanti? Mahābhūtepi paṭicca uppattidassanatthaṃ. Yañhi heṭṭhā ‘‘cittasamuṭṭhānañca rūpaṃ kaṭattā ca rūpa’’nti dassitaṃ, taṃ na kevalaṃ khandheyeva ca paṭicca uppajjati, mahābhūtepi pana paṭicca uppajjatīti dassanatthamidaṃ vuttanti veditabbaṃ. Tattha cittasamuṭṭhānaṃ pavatteyeva, kaṭattārūpaṃ paṭisandhiyampi. Upādārūpanti tasseva ubhayassa visesanaṃ.
কুসলে খন্ধে চ মহাভূতে চ পটিচ্চাতি এত্থ চিত্তসমুট্ঠানাৰ মহাভূতা গহিতা। চিত্তসমুট্ঠানং রূপন্তি এত্থ পন ভূতরূপম্পি উপাদারূপম্পি গহিতং। ‘‘একং মহাভূতং পটিচ্চ তযো মহাভূতা’’তিআদিনা নযেন হি ভূতরূপম্পি খন্ধে চ মহাভূতে চ পটিচ্চ উপ্পজ্জতি। মহাভূতে পটিচ্চ উপাদারূপন্তি ৰুত্তনযেন উপাদারূপম্পি। অকুসলঞ্চ অব্যাকতঞ্চাতি পঞ্হাৰিস্সজ্জনেসুপি এসেৰ নযো। এৰং হেতুপচ্চযে নৰ পুচ্ছা ৰিস্সজ্জিতা। এতাযেৰ হি এত্থ লব্ভন্তি, সেসা চত্তালীস মোঘপুচ্ছাতি ন ৰিস্সজ্জিতা। ইমিনা উপাযেন আরম্মণপচ্চযাদীসুপি পুচ্ছাৰিস্সজ্জনানং অত্থো ৰেদিতব্বো। তত্থ তত্থ পন ৰিচারেতব্বযুত্তকমেৰ ৰিচারযিস্সাম।
Kusale khandhe ca mahābhūte ca paṭiccāti ettha cittasamuṭṭhānāva mahābhūtā gahitā. Cittasamuṭṭhānaṃ rūpanti ettha pana bhūtarūpampi upādārūpampi gahitaṃ. ‘‘Ekaṃ mahābhūtaṃ paṭicca tayo mahābhūtā’’tiādinā nayena hi bhūtarūpampi khandhe ca mahābhūte ca paṭicca uppajjati. Mahābhūte paṭicca upādārūpanti vuttanayena upādārūpampi. Akusalañca abyākatañcāti pañhāvissajjanesupi eseva nayo. Evaṃ hetupaccaye nava pucchā vissajjitā. Etāyeva hi ettha labbhanti, sesā cattālīsa moghapucchāti na vissajjitā. Iminā upāyena ārammaṇapaccayādīsupi pucchāvissajjanānaṃ attho veditabbo. Tattha tattha pana vicāretabbayuttakameva vicārayissāma.
৫৪. আরম্মণপচ্চযে তাৰ রূপস্স আরম্মণপচ্চযৰসেন অনুপ্পত্তিতো তাসু নৰসু রূপমিস্সকা পহায তিস্সোৰ পুচ্ছা ৰিস্সজ্জিতা। তেনেৰ চ কারণেন ‘‘ৰত্থুং পটিচ্চ খন্ধা’’তি ৰত্ৰা ‘‘খন্ধে পটিচ্চ ৰত্থূ’’তি ন ৰুত্তং। ন হি তং আরম্মণপচ্চযেন উপ্পজ্জতি।
54. Ārammaṇapaccaye tāva rūpassa ārammaṇapaccayavasena anuppattito tāsu navasu rūpamissakā pahāya tissova pucchā vissajjitā. Teneva ca kāraṇena ‘‘vatthuṃ paṭicca khandhā’’ti vatvā ‘‘khandhe paṭicca vatthū’’ti na vuttaṃ. Na hi taṃ ārammaṇapaccayena uppajjati.
৫৫. অধিপতিপচ্চযে ৰিপাকাব্যাকতন্তি লোকুত্তরমেৰ সন্ধায ৰুত্তং। তেনেৰেত্থ ‘‘পটিসন্ধিক্খণে’’তি ন গহিতং। সেসং হেতুপচ্চযসদিসমেৰ।
55. Adhipatipaccaye vipākābyākatanti lokuttarameva sandhāya vuttaṃ. Tenevettha ‘‘paṭisandhikkhaṇe’’ti na gahitaṃ. Sesaṃ hetupaccayasadisameva.
৫৬. অনন্তরসমন্তরেসুপি রূপং ন লব্ভতীতি আরম্মণপচ্চযে ৰিয তিস্সোৰ পুচ্ছা।
56. Anantarasamantaresupi rūpaṃ na labbhatīti ārammaṇapaccaye viya tissova pucchā.
৫৭. সহজাতপচ্চযে পটিসন্ধিক্খণেতি পঞ্চৰোকারে পটিসন্ধিৰসেন ৰুত্তং। হেট্ঠা পন পচ্চযৰিভঙ্গে ‘‘ওক্কন্তিক্খণে’’তি আগতং তম্পি ইমিনা সদ্ধিং অত্থতো একং, ব্যঞ্জনমত্তমেৰ হেত্থ নানন্তি। অপিচ ‘‘তিণ্ণং সন্নিপাতা গব্ভস্স অৰক্কন্তি হোতী’’তি (ম॰ নি॰ ১.৪০৮) ৰচনতো ওক্কন্তীতি পঞ্চৰোকারপটিসন্ধিযাৰেতং নামং। পটিসন্ধীতি সব্বভৰসাধারণং। ইধ পন ‘‘কটত্তা চ রূপ’’ন্তিআদিৰচনতো পঞ্চৰোকারপটিসন্ধিযেৰ অধিপ্পেতা। সা হি রূপস্সপি অরূপস্সপি পচ্চযভাৰঞ্চেৰ পচ্চযুপ্পন্নভাৰঞ্চ সঙ্গণ্হাতি, তস্মা পরিপুণ্ণৰিস্সজ্জনা হোতীতি গহিতা। বাহিরং একং মহাভূতন্তি অনিন্দ্রিযবদ্ধেসু পথৰীপাসাণাদীসু মহাভূতং সন্ধায ৰুত্তং। পচ্চযৰিভঙ্গৰারস্মিঞ্হি চত্তারো মহাভূতাতি অজ্ঝত্তিকঞ্চ বাহিরঞ্চ একতো কত্ৰা গহিতং। সঙ্খেপদেসনা হি সা। অযং পন ৰিত্থারদেসনা, তস্মা সব্বং ৰিভজিত্ৰা দস্সেন্তো ‘‘বাহিরং একং মহাভূত’’ন্তিআদিমাহ। অসঞ্ঞসত্তানং একং মহাভূতং পটিচ্চাতি দ্ৰিসন্ততিসমুট্ঠানভূতৰসেন ৰুত্তং। মহাভূতে পটিচ্চ কটত্তারূপন্তি ইদং পন কম্মসমুট্ঠানৰসেনেৰ ৰুত্তং। উপাদারূপন্তি উতুসমুট্ঠানৰসেনেৰ।
57. Sahajātapaccaye paṭisandhikkhaṇeti pañcavokāre paṭisandhivasena vuttaṃ. Heṭṭhā pana paccayavibhaṅge ‘‘okkantikkhaṇe’’ti āgataṃ tampi iminā saddhiṃ atthato ekaṃ, byañjanamattameva hettha nānanti. Apica ‘‘tiṇṇaṃ sannipātā gabbhassa avakkanti hotī’’ti (ma. ni. 1.408) vacanato okkantīti pañcavokārapaṭisandhiyāvetaṃ nāmaṃ. Paṭisandhīti sabbabhavasādhāraṇaṃ. Idha pana ‘‘kaṭattā ca rūpa’’ntiādivacanato pañcavokārapaṭisandhiyeva adhippetā. Sā hi rūpassapi arūpassapi paccayabhāvañceva paccayuppannabhāvañca saṅgaṇhāti, tasmā paripuṇṇavissajjanā hotīti gahitā. Bāhiraṃ ekaṃ mahābhūtanti anindriyabaddhesu pathavīpāsāṇādīsu mahābhūtaṃ sandhāya vuttaṃ. Paccayavibhaṅgavārasmiñhi cattāro mahābhūtāti ajjhattikañca bāhirañca ekato katvā gahitaṃ. Saṅkhepadesanā hi sā. Ayaṃ pana vitthāradesanā, tasmā sabbaṃ vibhajitvā dassento ‘‘bāhiraṃ ekaṃ mahābhūta’’ntiādimāha. Asaññasattānaṃ ekaṃ mahābhūtaṃ paṭiccāti dvisantatisamuṭṭhānabhūtavasena vuttaṃ. Mahābhūte paṭicca kaṭattārūpanti idaṃ pana kammasamuṭṭhānavaseneva vuttaṃ. Upādārūpanti utusamuṭṭhānavaseneva.
৫৮. অঞ্ঞমঞ্ঞপচ্চযে খন্ধে পটিচ্চ ৰত্থু, ৰত্থুং পটিচ্চ খন্ধাতি চতুন্নম্পি খন্ধানং একতো ৰত্থুনা অঞ্ঞমঞ্ঞপচ্চযতং দস্সেতুং ৰুত্তং।
58. Aññamaññapaccaye khandhe paṭicca vatthu, vatthuṃ paṭicca khandhāti catunnampi khandhānaṃ ekato vatthunā aññamaññapaccayataṃ dassetuṃ vuttaṃ.
৫৯. নিস্সযপচ্চযে যস্মা পটিচ্চত্থো নাম সহজাতত্থো, তস্মা যা হেট্ঠা পচ্চযৰিভঙ্গৰারে চক্খাযতনাদীনং নিস্সযপচ্চযতা দস্সিতা, ন সা গহিতা। চক্খাযতনাদীনি হি পুরেজাতানি হুত্ৰা পচ্চযা হোন্তি, ইধ সহজাতমেৰ লব্ভতি। তেনেৰ ৰুত্তং – ‘‘নিস্সযপচ্চযো সহজাতপচ্চযসদিসো’’তি।
59. Nissayapaccaye yasmā paṭiccattho nāma sahajātattho, tasmā yā heṭṭhā paccayavibhaṅgavāre cakkhāyatanādīnaṃ nissayapaccayatā dassitā, na sā gahitā. Cakkhāyatanādīni hi purejātāni hutvā paccayā honti, idha sahajātameva labbhati. Teneva vuttaṃ – ‘‘nissayapaccayo sahajātapaccayasadiso’’ti.
৬০. উপনিস্সযপচ্চযে রূপস্স উপনিস্সযপচ্চযাভাৰা তীণেৰ ৰিস্সজ্জনানি লব্ভন্তি, তেন ৰুত্তং ‘‘আরম্মণপচ্চযসদিস’’ন্তি। তত্থ কিঞ্চাপি ন সব্বে কুসলাকুসলাব্যাকতা আরম্মণূপনিস্সযং লভন্তি, যে পন লভন্তি, তেসং ৰসেনেতং ৰুত্তন্তি ৰেদিতব্বং।
60. Upanissayapaccaye rūpassa upanissayapaccayābhāvā tīṇeva vissajjanāni labbhanti, tena vuttaṃ ‘‘ārammaṇapaccayasadisa’’nti. Tattha kiñcāpi na sabbe kusalākusalābyākatā ārammaṇūpanissayaṃ labhanti, ye pana labhanti, tesaṃ vasenetaṃ vuttanti veditabbaṃ.
৬১. পুরেজাতপচ্চযে ৰত্থুং পুরেজাতপচ্চযাতি ৰত্থুং পটিচ্চ ৰত্থুনা পুরেজাতপচ্চযতং সাধেন্তেন উপ্পজ্জন্তীতি অত্থো। ৰিপাকাব্যাকতং একং খন্ধন্তি এত্থ যং ৰিপাকাব্যাকতস্স ৰত্থু ওক্কন্তিক্খণে সহজাতপচ্চযো হোতি, তং পুরেজাতপচ্চযভাজনিযত্তা ইধ ন গহেতব্বং। যেপি কুসলাদযো আরুপ্পে পুরেজাতপচ্চযং ন লভন্তি, তেপি পুরেজাতপচ্চযভাজনিযতোযেৰ ইধ ন গহেতব্বা। আরম্মণং পন নিযমতো পুরেজাতপচ্চযভাৰং ন লভতি। রূপাযতনাদীনি হি চক্খুৰিঞ্ঞাণাদীনংযেৰ পুরেজাতপচ্চযতং সাধেন্তি, মনোৰিঞ্ঞাণধাতুযা অতীতানাগতানিপি আরম্মণং হোন্তিযেৰ। তস্মা ইধ ন গহিতং। খন্ধৰসেন হি অযং দেসনা, ন ৰিঞ্ঞাণধাতুৰসেন। ‘‘ৰিপাকাব্যাকতং একং খন্ধ’’ন্তি দেসনায চ সব্বাপি ৰিঞ্ঞাণধাতুযো গহিতা, ন চক্খুৰিঞ্ঞাণধাতুআদযো এৰাতি।
61. Purejātapaccaye vatthuṃ purejātapaccayāti vatthuṃ paṭicca vatthunā purejātapaccayataṃ sādhentena uppajjantīti attho. Vipākābyākataṃ ekaṃ khandhanti ettha yaṃ vipākābyākatassa vatthu okkantikkhaṇe sahajātapaccayo hoti, taṃ purejātapaccayabhājaniyattā idha na gahetabbaṃ. Yepi kusalādayo āruppe purejātapaccayaṃ na labhanti, tepi purejātapaccayabhājaniyatoyeva idha na gahetabbā. Ārammaṇaṃ pana niyamato purejātapaccayabhāvaṃ na labhati. Rūpāyatanādīni hi cakkhuviññāṇādīnaṃyeva purejātapaccayataṃ sādhenti, manoviññāṇadhātuyā atītānāgatānipi ārammaṇaṃ hontiyeva. Tasmā idha na gahitaṃ. Khandhavasena hi ayaṃ desanā, na viññāṇadhātuvasena. ‘‘Vipākābyākataṃ ekaṃ khandha’’nti desanāya ca sabbāpi viññāṇadhātuyo gahitā, na cakkhuviññāṇadhātuādayo evāti.
পচ্ছাজাতো কুসলাকুসলানং পচ্চযো ন হোতি, অব্যাকতস্সপি উপত্থম্ভকোৰ ন জনকো, তস্মা ‘‘উপ্পজ্জতি পচ্ছাজাতপচ্চযা’’তি এৰং ৰত্তব্বো একধম্মোপি নত্থীতি পচ্ছাজাতপচ্চযৰসেন ৰিস্সজ্জনং ন কতং।
Pacchājāto kusalākusalānaṃ paccayo na hoti, abyākatassapi upatthambhakova na janako, tasmā ‘‘uppajjati pacchājātapaccayā’’ti evaṃ vattabbo ekadhammopi natthīti pacchājātapaccayavasena vissajjanaṃ na kataṃ.
৬২. আসেৰনপচ্চযে কামং সব্বা কিরিযা আসেৰনপচ্চযং ন লভন্তি, লব্ভমানৰসেন পন ‘‘কিরিযাব্যাকত’’ন্তি ৰুত্তং। তস্মা জৰনকিরিযাৰেত্থ গহিতাতি ৰেদিতব্বা।
62. Āsevanapaccaye kāmaṃ sabbā kiriyā āsevanapaccayaṃ na labhanti, labbhamānavasena pana ‘‘kiriyābyākata’’nti vuttaṃ. Tasmā javanakiriyāvettha gahitāti veditabbā.
৬৩. কম্মপচ্চযে কুসলাকুসলেসু একক্খণিকো কম্মপচ্চযো ৰেদিতব্বো, তথা কিরিযাব্যাকতে। ৰিপাকাব্যাকতে পন নানাক্খণিকোপি, তথা পটিসন্ধিক্খণে মহাভূতানং। চিত্তসমুট্ঠানানং পন একক্খণিকো। কটত্তারূপানং নানাক্খণিকোৰ তথা অসঞ্ঞসত্তরূপানং। কটত্তারূপং পনেত্থ জীৰিতিন্দ্রিযং। সেসং ন একন্ততো কম্মসমুট্ঠানত্তা উপাদারূপন্তি ৰুত্তং। এৰং সন্তেপি ইধ কম্মসমুট্ঠানমেৰ অধিপ্পেতং।
63. Kammapaccaye kusalākusalesu ekakkhaṇiko kammapaccayo veditabbo, tathā kiriyābyākate. Vipākābyākate pana nānākkhaṇikopi, tathā paṭisandhikkhaṇe mahābhūtānaṃ. Cittasamuṭṭhānānaṃ pana ekakkhaṇiko. Kaṭattārūpānaṃ nānākkhaṇikova tathā asaññasattarūpānaṃ. Kaṭattārūpaṃ panettha jīvitindriyaṃ. Sesaṃ na ekantato kammasamuṭṭhānattā upādārūpanti vuttaṃ. Evaṃ santepi idha kammasamuṭṭhānameva adhippetaṃ.
৬৪. ৰিপাকপচ্চযে কুসলাকুসলং কিরিযঞ্চ ন লব্ভতীতি অব্যাকতৰসেনেৰ ৰিস্সজ্জনং কতং। চিত্তসমুট্ঠানন্তি ৰিপাকচিত্তসমুট্ঠানমেৰ। কটত্তারূপন্তি যথালাভৰসেন ইন্দ্রিযরূপঞ্চ ৰত্থুরূপঞ্চ। উপাদারূপন্তি তদৰসেসং তস্মিং সমযে ৰিজ্জমানকং উপাদারূপং।
64. Vipākapaccaye kusalākusalaṃ kiriyañca na labbhatīti abyākatavaseneva vissajjanaṃ kataṃ. Cittasamuṭṭhānanti vipākacittasamuṭṭhānameva. Kaṭattārūpanti yathālābhavasena indriyarūpañca vatthurūpañca. Upādārūpanti tadavasesaṃ tasmiṃ samaye vijjamānakaṃ upādārūpaṃ.
৬৫. আহারপচ্চযে সব্বেসম্পি কুসলাদীনং খন্ধানং চিত্তসমুট্ঠানরূপস্স চ অরূপাহারৰসেন উপ্পত্তি ৰেদিতব্বা, তথা পটিসন্ধিক্খণে মহাভূতানং। চিত্তসমুট্ঠানন্তি ভৰঙ্গাদিচিত্তসমুট্ঠানং। আহারসমুট্ঠানন্তি কবল়ীকারাহারসমুট্ঠানং । চিত্তসমুট্ঠানন্তি কুসলাকুসলচিত্তসমুট্ঠানমেৰ। পচ্চযৰিভঙ্গৰারে আহারপটিপাটিযা পঠমং কবল়ীকারো আহারো দস্সিতো, ইধ পন কুসলং ধম্মন্তি পুচ্ছাৰসেন পঠমং অরূপাহারা দস্সিতাতি ৰেদিতব্বা।
65. Āhārapaccaye sabbesampi kusalādīnaṃ khandhānaṃ cittasamuṭṭhānarūpassa ca arūpāhāravasena uppatti veditabbā, tathā paṭisandhikkhaṇe mahābhūtānaṃ. Cittasamuṭṭhānanti bhavaṅgādicittasamuṭṭhānaṃ. Āhārasamuṭṭhānanti kabaḷīkārāhārasamuṭṭhānaṃ . Cittasamuṭṭhānanti kusalākusalacittasamuṭṭhānameva. Paccayavibhaṅgavāre āhārapaṭipāṭiyā paṭhamaṃ kabaḷīkāro āhāro dassito, idha pana kusalaṃ dhammanti pucchāvasena paṭhamaṃ arūpāhārā dassitāti veditabbā.
৬৬. ইন্দ্রিযপচ্চযে পচ্চযৰিভঙ্গে ইন্দ্রিযপটিপাটিযা পঠমং চক্খুন্দ্রিযাদীনি দস্সিতানি, ইধ পন কুসলাদিপুচ্ছাৰসেন পঠমং অরূপিন্দ্রিযানং পচ্চযতা দস্সিতা। তত্থ কুসলাদীসু যথালাভৰসেন অরূপিন্দ্রিযা গহেতব্বা। অসঞ্ঞসত্তানং ভূতরূপেসুপি জীৰিতিন্দ্রিযন্তি।
66. Indriyapaccaye paccayavibhaṅge indriyapaṭipāṭiyā paṭhamaṃ cakkhundriyādīni dassitāni, idha pana kusalādipucchāvasena paṭhamaṃ arūpindriyānaṃ paccayatā dassitā. Tattha kusalādīsu yathālābhavasena arūpindriyā gahetabbā. Asaññasattānaṃ bhūtarūpesupi jīvitindriyanti.
৬৭. ঝানমগ্গপচ্চযেসু হেতুপচ্চযসদিসমেৰ ৰিস্সজ্জনং, তেনেৰেত্থ ‘‘হেতুপচ্চযসদিস’’ন্তি ৰুত্তং।
67. Jhānamaggapaccayesu hetupaccayasadisameva vissajjanaṃ, tenevettha ‘‘hetupaccayasadisa’’nti vuttaṃ.
৬৮. সম্পযুত্তপচ্চযে ৰিস্সজ্জনং আরম্মণপচ্চযগতিকং, তেনেৰেত্থ ‘‘আরম্মণপচ্চযসদিস’’ন্তি ৰুত্তং।
68. Sampayuttapaccaye vissajjanaṃ ārammaṇapaccayagatikaṃ, tenevettha ‘‘ārammaṇapaccayasadisa’’nti vuttaṃ.
৬৯. ৰিপ্পযুত্তপচ্চযে ৰত্থুং ৰিপ্পযুত্তপচ্চযাতি ৰত্থুং পটিচ্চ ৰিপ্পযুত্তপচ্চযা, ৰত্থুনা ৰিপ্পযুত্তপচ্চযতং সাধেন্তেন উপ্পজ্জন্তীতি অত্থো। খন্ধে ৰিপ্পযুত্তপচ্চযাতি খন্ধে পটিচ্চ ৰিপ্পযুত্তপচ্চযা, খন্ধেহি ৰিপ্পযুত্তপচ্চযতং সাধেন্তেহি উপ্পজ্জতীতি অত্থো। খন্ধা ৰত্থুং ৰিপ্পযুত্তপচ্চযাতি ৰত্থুং পটিচ্চ খন্ধা ৰিপ্পযুত্তপচ্চযা। ৰত্থুনা ৰিপ্পযুত্তপচ্চযতং সাধেন্তেন উপ্পজ্জন্তীতি অত্থো। চিত্তসমুট্ঠানরূপং খন্ধে ৰিপ্পযুত্তপচ্চযাতি খন্ধে পটিচ্চ ৰিপ্পযুত্তপচ্চযা চিত্তসমুট্ঠানং রূপং খন্ধেহি ৰিপ্পযুত্তপচ্চযতং সাধেন্তেহি উপ্পজ্জতীতি অত্থো। সেসৰিস্সজ্জনেসুপি ৰত্থুং ৰিপ্পযুত্তপচ্চযাতিআদীসুপি ৰুত্তনযেনেৰত্থো ৰেদিতব্বো। ৰিপাকাব্যাকতে চেত্থ ৰত্থুগ্গহণেন চক্খাদীনি সঙ্গহিতব্বানি। একং মহাভূতন্তিআদি রূপাব্যাকতস্স পচ্চযভাৰং দস্সেতুং ৰুত্তং। চিত্তসমুট্ঠানন্তি অব্যাকতচিত্তসমুট্ঠানম্পি কুসলাকুসলচিত্তসমুট্ঠানম্পি।
69. Vippayuttapaccaye vatthuṃ vippayuttapaccayāti vatthuṃ paṭicca vippayuttapaccayā, vatthunā vippayuttapaccayataṃ sādhentena uppajjantīti attho. Khandhe vippayuttapaccayāti khandhe paṭicca vippayuttapaccayā, khandhehi vippayuttapaccayataṃ sādhentehi uppajjatīti attho. Khandhā vatthuṃ vippayuttapaccayāti vatthuṃ paṭicca khandhā vippayuttapaccayā. Vatthunā vippayuttapaccayataṃ sādhentena uppajjantīti attho. Cittasamuṭṭhānarūpaṃ khandhe vippayuttapaccayāti khandhe paṭicca vippayuttapaccayā cittasamuṭṭhānaṃ rūpaṃ khandhehi vippayuttapaccayataṃ sādhentehi uppajjatīti attho. Sesavissajjanesupi vatthuṃ vippayuttapaccayātiādīsupi vuttanayenevattho veditabbo. Vipākābyākate cettha vatthuggahaṇena cakkhādīni saṅgahitabbāni. Ekaṃ mahābhūtantiādi rūpābyākatassa paccayabhāvaṃ dassetuṃ vuttaṃ. Cittasamuṭṭhānanti abyākatacittasamuṭṭhānampi kusalākusalacittasamuṭṭhānampi.
৭০. অত্থিপচ্চযে সব্বং সহজাতপচ্চযগতিকং। তেনেৰেত্থ ‘‘সহজাতপচ্চযসদিস’’ন্তি ৰুত্তং।
70. Atthipaccaye sabbaṃ sahajātapaccayagatikaṃ. Tenevettha ‘‘sahajātapaccayasadisa’’nti vuttaṃ.
৭১-৭২. নত্থিৰিগতা আরম্মণপচ্চযগতিকা, অৰিগতং সহজাতগতিকং। তেনেৰেত্থ ‘‘আরম্মণপচ্চযসদিসং, সহজাতপচ্চযসদিস’’ন্তি ৰুত্তং । ইমে তেৰীসতি পচ্চযাতি সঙ্খিপিত্ৰা দস্সিতানং ৰসেনেতং ৰুত্তং। ৰিত্থারেতব্বাতি যা পুচ্ছা ৰিস্সজ্জনং লভন্তি, তাসং ৰসেন ৰিত্থারেতব্বা। অযং হেতুপচ্চযং আদিং কত্ৰা একমূলকে পচ্চযানুলোমে পটিচ্চৰারস্স কুসলত্তিকৰিস্সজ্জনে অত্থৰণ্ণনা।
71-72. Natthivigatā ārammaṇapaccayagatikā, avigataṃ sahajātagatikaṃ. Tenevettha ‘‘ārammaṇapaccayasadisaṃ, sahajātapaccayasadisa’’nti vuttaṃ . Ime tevīsati paccayāti saṅkhipitvā dassitānaṃ vasenetaṃ vuttaṃ. Vitthāretabbāti yā pucchā vissajjanaṃ labhanti, tāsaṃ vasena vitthāretabbā. Ayaṃ hetupaccayaṃ ādiṃ katvā ekamūlake paccayānulome paṭiccavārassa kusalattikavissajjane atthavaṇṇanā.
(২.) সঙ্খ্যাৰারো
(2.) Saṅkhyāvāro
৭৩. ইদানি যে এত্থ হেতুপচ্চযাদীসু একেকস্মিং পচ্চযে ৰিস্সজ্জনৰারা লদ্ধা, তে গণনৰসেন দস্সেতুং হেতুযা নৰাতিআদি আরদ্ধং। তত্থ হেতুযা নৰাতি হেতুপচ্চযে নৰ পুচ্ছাৰিস্সজ্জনৰারা হোন্তি। সেয্যথিদং – কুসলেন কুসলং, কুসলেন অব্যাকতং, কুসলেন কুসলাব্যাকতং; অকুসলেন অকুসলং, অকুসলেন অব্যাকতং, অকুসলেন অকুসলাব্যাকতং, অব্যাকতেন অব্যাকতং, কুসলাব্যাকতেন অব্যাকতং, অকুসলাব্যাকতেন অব্যাকতন্তি।
73. Idāni ye ettha hetupaccayādīsu ekekasmiṃ paccaye vissajjanavārā laddhā, te gaṇanavasena dassetuṃ hetuyā navātiādi āraddhaṃ. Tattha hetuyā navāti hetupaccaye nava pucchāvissajjanavārā honti. Seyyathidaṃ – kusalena kusalaṃ, kusalena abyākataṃ, kusalena kusalābyākataṃ; akusalena akusalaṃ, akusalena abyākataṃ, akusalena akusalābyākataṃ, abyākatena abyākataṃ, kusalābyākatena abyākataṃ, akusalābyākatena abyākatanti.
আরম্মণে তীণীতি কুসলেন কুসলং, অকুসলেন অকুসলং, অব্যাকতেন অব্যাকতং। অধিপতিযা নৰাতি হেতুযা ৰুত্তসদিসাৰ। দ্ৰাদসসু হি পচ্চযেসু নৰ নৰাতি ৰুত্তং। সব্বেসুপি পুচ্ছাৰিস্সজ্জনানি হেতুপচ্চযসদিসানেৰ। ৰিভঙ্গে পন অত্থি ৰিসেসো। দসসু পচ্চযেসু তীণি তীণীতি ৰুত্তং। সব্বেসুপি পুচ্ছাৰিস্সজ্জনানি আরম্মণসদিসানেৰ। ৰিভঙ্গে পন অত্থি ৰিসেসো। অঞ্ঞমঞ্ঞপচ্চযস্মিঞ্হি অব্যাকতপদস্স ৰিস্সজ্জনে রূপম্পি লব্ভতি, তথা পুরেজাতপচ্চযে। আসেৰনপচ্চযে ৰিপাকানি চেৰ ৰীথিচিত্তানি চ ন লব্ভন্তি। ৰিপাকে একন্তি অব্যাকতমেৰ। এৰমেত্থ সঙ্খেপতো নৰ তীণি একন্তি, তিৰিধোৰ ৰারপরিচ্ছেদো। ৰিত্থারতো দ্ৰাদস নৰকা, দস তিকা, একং এককন্তি সব্বেসুপি তেৰীসতিযা পচ্চযেসু একূনচত্তালীসাধিকং ৰারসতং হোতি, একূনচত্তালীসাধিকঞ্চ পুচ্ছাসতং। একূনচত্তালীসাধিকং পুচ্ছাৰিস্সজ্জনসতন্তিপি তস্সেৰ নামং।
Ārammaṇetīṇīti kusalena kusalaṃ, akusalena akusalaṃ, abyākatena abyākataṃ. Adhipatiyā navāti hetuyā vuttasadisāva. Dvādasasu hi paccayesu nava navāti vuttaṃ. Sabbesupi pucchāvissajjanāni hetupaccayasadisāneva. Vibhaṅge pana atthi viseso. Dasasu paccayesu tīṇi tīṇīti vuttaṃ. Sabbesupi pucchāvissajjanāni ārammaṇasadisāneva. Vibhaṅge pana atthi viseso. Aññamaññapaccayasmiñhi abyākatapadassa vissajjane rūpampi labbhati, tathā purejātapaccaye. Āsevanapaccaye vipākāni ceva vīthicittāni ca na labbhanti. Vipāke ekanti abyākatameva. Evamettha saṅkhepato nava tīṇi ekanti, tividhova vāraparicchedo. Vitthārato dvādasa navakā, dasa tikā, ekaṃ ekakanti sabbesupi tevīsatiyā paccayesu ekūnacattālīsādhikaṃ vārasataṃ hoti, ekūnacattālīsādhikañca pucchāsataṃ. Ekūnacattālīsādhikaṃ pucchāvissajjanasatantipi tasseva nāmaṃ.
৭৪. এৰং হেতুপচ্চযাদিকে একমূলকে গণনং দস্সেত্ৰা ইতো পরেসু দুমূলকাদীসু ৰিত্থারদেসনং সঙ্খিপিত্ৰা একমূলকে দস্সিতায দেসনায লব্ভমানগণনঞ্ঞেৰ আদায ৰারপরিচ্ছেদং দস্সেতুং দুমূলকে তাৰ হেতুপচ্চযা আরম্মণে তীণীতিআদিমাহ। তত্রিদং লক্খণং – বহুগণনোপি পচ্চযো অবহুগণনেন সদ্ধিং যুত্তো তেন সমানগণনোৰ হোতি। তেন ৰুত্তং ‘‘হেতুপচ্চযা আরম্মণে তীণী’’তি। হেতুআরম্মণদুকে আরম্মণে ৰুত্তানি তীণেৰ ৰিস্সজ্জনানি লব্ভন্তীতি অত্থো। সমানগণনো পন সমানগণনেন সদ্ধিং যুত্তো অপরিহীনগণনোৰ হোতি। তেন ৰুত্তং ‘‘হেতুপচ্চযা অধিপতিযা নৰা’’তি। হেতাধিপতিদুকে নৰেৰ ৰিস্সজ্জনানি লব্ভন্তীতি অত্থো। ৰিপাকে একন্তি হেতুৰিপাকদুকে ৰিপাকে ৰুত্তং একমেৰ ৰিস্সজ্জনং লব্ভতীতি এৰং তাৰ দুমূলকে ৰারপরিচ্ছেদো ৰেদিতব্বো।
74. Evaṃ hetupaccayādike ekamūlake gaṇanaṃ dassetvā ito paresu dumūlakādīsu vitthāradesanaṃ saṅkhipitvā ekamūlake dassitāya desanāya labbhamānagaṇanaññeva ādāya vāraparicchedaṃ dassetuṃ dumūlake tāva hetupaccayā ārammaṇe tīṇītiādimāha. Tatridaṃ lakkhaṇaṃ – bahugaṇanopi paccayo abahugaṇanena saddhiṃ yutto tena samānagaṇanova hoti. Tena vuttaṃ ‘‘hetupaccayā ārammaṇe tīṇī’’ti. Hetuārammaṇaduke ārammaṇe vuttāni tīṇeva vissajjanāni labbhantīti attho. Samānagaṇano pana samānagaṇanena saddhiṃ yutto aparihīnagaṇanova hoti. Tena vuttaṃ ‘‘hetupaccayā adhipatiyā navā’’ti. Hetādhipatiduke naveva vissajjanāni labbhantīti attho. Vipāke ekanti hetuvipākaduke vipāke vuttaṃ ekameva vissajjanaṃ labbhatīti evaṃ tāva dumūlake vāraparicchedo veditabbo.
৭৫. তিমূলকাদীসুপি ইদমেৰ লক্খণং। তেনেৰাহ – হেতুপচ্চযা আরম্মণপচ্চযা অধিপতিযা তীণীতি। হেতারম্মণাধিপতি তিকে আরম্মণে ৰুত্তানি তীণেৰ ৰিস্সজ্জনানি লব্ভন্তীতি অত্থো। এৰং সব্বত্থ নযো নেতব্বো।
75. Timūlakādīsupi idameva lakkhaṇaṃ. Tenevāha – hetupaccayā ārammaṇapaccayā adhipatiyā tīṇīti. Hetārammaṇādhipati tike ārammaṇe vuttāni tīṇeva vissajjanāni labbhantīti attho. Evaṃ sabbattha nayo netabbo.
৭৬-৭৯. দ্ৰাদসমূলকে পন ৰিপাকপচ্চযো ন লব্ভতি, তস্মা আসেৰনপচ্চযা কম্মে তীণীতি ৰত্ৰা ৰিপাকং অপরামসিত্ৰা আহারে তীণীতি ৰুত্তং। তেরসমূলকাদীসুপি এসেৰ নযো। তে পন সঙ্খিপিত্ৰা তেৰীসতিমূলকোৰেত্থ দস্সিতো। সো দুৰিধো হোতি – সাসেৰনো ৰা সৰিপাকো ৰা। তত্থ পঠমং সাসেৰনো দস্সিতো, সো তীণেৰ ৰিস্সজ্জনানি লভতি। তেন ৰুত্তং ‘‘আসেৰনপচ্চযা অৰিগতে তীণী’’তি। সৰিপাকো পন আসেৰনং ন লভতি, তস্মা তং পহায ৰিপাকৰসেন গণনায দস্সনত্থং অনন্তরাযেৰ ‘‘হেতুপচ্চযা…পে॰… ৰিপাকপচ্চযা আহারে এক’’ন্তি একং নযং দস্সেত্ৰা পচ্ছা তেৰীসতিমূলকোৰ দস্সিতো। এতেসু পন দ্ৰীসু তেৰীসতিমূলকেসু কিঞ্চাপি একস্মিং ৰিপাকপচ্চযো নত্থি, একস্মিং আসেৰনপচ্চযো, পচ্ছাজাতপচ্চযো পন উভযত্থাপি। রুল়্হীসদ্দেন পনেতে তেৰীসতিমূলকাত্ৰেৰ ৰেদিতব্বা। তেসু সাসেৰনে আসেৰনস্স ৰসেন সব্বত্থ তীণেৰ ৰিস্সজ্জনানি, সৰিপাকে ৰিপাকপচ্চযস্স ৰসেন একমেৰাতি অযং হেতুপচ্চযং আদিং কত্ৰা একমূলকাদীসু গণনা।
76-79. Dvādasamūlake pana vipākapaccayo na labbhati, tasmā āsevanapaccayā kamme tīṇīti vatvā vipākaṃ aparāmasitvā āhāre tīṇīti vuttaṃ. Terasamūlakādīsupi eseva nayo. Te pana saṅkhipitvā tevīsatimūlakovettha dassito. So duvidho hoti – sāsevano vā savipāko vā. Tattha paṭhamaṃ sāsevano dassito, so tīṇeva vissajjanāni labhati. Tena vuttaṃ ‘‘āsevanapaccayā avigate tīṇī’’ti. Savipāko pana āsevanaṃ na labhati, tasmā taṃ pahāya vipākavasena gaṇanāya dassanatthaṃ anantarāyeva ‘‘hetupaccayā…pe… vipākapaccayā āhāre eka’’nti ekaṃ nayaṃ dassetvā pacchā tevīsatimūlakova dassito. Etesu pana dvīsu tevīsatimūlakesu kiñcāpi ekasmiṃ vipākapaccayo natthi, ekasmiṃ āsevanapaccayo, pacchājātapaccayo pana ubhayatthāpi. Ruḷhīsaddena panete tevīsatimūlakātveva veditabbā. Tesu sāsevane āsevanassa vasena sabbattha tīṇeva vissajjanāni, savipāke vipākapaccayassa vasena ekamevāti ayaṃ hetupaccayaṃ ādiṃ katvā ekamūlakādīsu gaṇanā.
যং পনেতং হেতুমূলকানন্তরং ‘‘আরম্মণে ঠিতেন সব্বত্থ তীণেৰ পঞ্হা’’তি ৰুত্তং, তং আরম্মণপচ্চযং আদিং কত্ৰা একমূলকেপি দুমূলকাদীসুপি সব্বত্থ আরম্মণপদে চেৰ আরম্মণেন সদ্ধিং সেসপচ্চযযোজনাসু চ যত্থ নৰহি ভৰিতব্বং, তত্থ তযোৰ পঞ্হা হোন্তীতি দস্সনত্থং ৰুত্তং। ৰিপাকপদে পন ৰিপাকপদেন সদ্ধিং সেসপচ্চযযোজনাসু চ একোৰ পঞ্হো হোতীতি। ইতি যং হেট্ঠা অৰোচুম্হ ‘‘বহুগণনোপি পচ্চযো অবহুগণনেন সদ্ধিং যুত্তো তেন সমানগণনো হোতী’’তি, তং সুৰুত্তমেৰ।
Yaṃ panetaṃ hetumūlakānantaraṃ ‘‘ārammaṇe ṭhitena sabbattha tīṇeva pañhā’’ti vuttaṃ, taṃ ārammaṇapaccayaṃ ādiṃ katvā ekamūlakepi dumūlakādīsupi sabbattha ārammaṇapade ceva ārammaṇena saddhiṃ sesapaccayayojanāsu ca yattha navahi bhavitabbaṃ, tattha tayova pañhā hontīti dassanatthaṃ vuttaṃ. Vipākapade pana vipākapadena saddhiṃ sesapaccayayojanāsu ca ekova pañho hotīti. Iti yaṃ heṭṭhā avocumha ‘‘bahugaṇanopi paccayo abahugaṇanena saddhiṃ yutto tena samānagaṇano hotī’’ti, taṃ suvuttameva.
৮০-৮৫. ইদানি যে আরম্মণাদীনং পচ্চযানং ৰসেন একমূলকাদযো দস্সেতব্বা, তেসু একমূলকো তাৰ হেতুএকমূলকেনেৰ সদিসোতি একস্মিম্পি পচ্চযে ন দস্সিতো। আরম্মণপচ্চযৰসেন পন দুমূলকে গণনং দস্সেতুং আরম্মণপচ্চযা হেতুযা তীণি, অধিপতিযা তীণি…পে॰… অৰিগতে তীণীতি ৰুত্তং। এত্থ চ ‘‘আরম্মণপচ্চযা অধিপতিযা তীণি…পে॰… অৰিগতে তীণী’’তি ৰত্তব্বে যে হেতুপচ্চযাদযো পচ্চযা বহুগণনা, তেসং ঊনতরগণনেহি চ সমানগণনেহি চ সদ্ধিং সংসন্দনে যা গণনা লব্ভতি, তং দস্সেতুং আরম্মণপচ্চযস্স পুরিমভাগে ঠিতম্পি হেতুপচ্চযং পচ্ছিমভাগেৰ ঠপেত্ৰা ‘‘আরম্মণপচ্চযা হেতুযা তীণী’’তি ৰুত্তং। তেনেতং আৰি করোতি – আরম্মণপচ্চযো যেন যেন বহুতরগণনেন ৰা সমানগণনেন ৰা পচ্চযেন সদ্ধিং দুকতিকাদিভেদং গচ্ছতি, সব্বত্থ তীণেৰ পঞ্হাৰিস্সজ্জনানি ৰেদিতব্বানি। ৰিপাকপচ্চযেন পন সদ্ধিং সংসন্দনে একমেৰ লব্ভতি, তং ৰিপাকপচ্চযাদিকায গণনায আৰি ভৰিস্সতীতি ইধ ন দস্সিতং। যা চেসা দুমূলকে গণনা দস্সিতা, তিমূলকাদীসুপি এসাৰ গণনাতি আরম্মণপচ্চযৰসেন তিমূলকাদযো ন ৰিত্থারিতা।
80-85. Idāni ye ārammaṇādīnaṃ paccayānaṃ vasena ekamūlakādayo dassetabbā, tesu ekamūlako tāva hetuekamūlakeneva sadisoti ekasmimpi paccaye na dassito. Ārammaṇapaccayavasena pana dumūlake gaṇanaṃ dassetuṃ ārammaṇapaccayā hetuyā tīṇi, adhipatiyā tīṇi…pe… avigate tīṇīti vuttaṃ. Ettha ca ‘‘ārammaṇapaccayā adhipatiyā tīṇi…pe… avigate tīṇī’’ti vattabbe ye hetupaccayādayo paccayā bahugaṇanā, tesaṃ ūnataragaṇanehi ca samānagaṇanehi ca saddhiṃ saṃsandane yā gaṇanā labbhati, taṃ dassetuṃ ārammaṇapaccayassa purimabhāge ṭhitampi hetupaccayaṃ pacchimabhāgeva ṭhapetvā ‘‘ārammaṇapaccayā hetuyā tīṇī’’ti vuttaṃ. Tenetaṃ āvi karoti – ārammaṇapaccayo yena yena bahutaragaṇanena vā samānagaṇanena vā paccayena saddhiṃ dukatikādibhedaṃ gacchati, sabbattha tīṇeva pañhāvissajjanāni veditabbāni. Vipākapaccayena pana saddhiṃ saṃsandane ekameva labbhati, taṃ vipākapaccayādikāya gaṇanāya āvi bhavissatīti idha na dassitaṃ. Yā cesā dumūlake gaṇanā dassitā, timūlakādīsupi esāva gaṇanāti ārammaṇapaccayavasena timūlakādayo na vitthāritā.
ইদানি অধিপতিপচ্চযাদিৰসেন দুমূলকাদীসু গণনং দস্সেতুং অধিপতিপচ্চযা হেতুযা নৰাতিআদি ৰুত্তং। তত্থাপি ৰুত্তনযেনেৰ পচ্চযসন্নিৰেসো ৰেদিতব্বো। যথা চ অধিপতিপচ্চযা হেতুযা নৰ, এৰং সেসেসুপি হেতুনা সমানগণনাসু নৰেৰ। ইতি যো যো পচ্চযো আদিম্হি তিট্ঠতি, তেন তেন সদ্ধিং সমানগণনানং সংসন্দনে আদিম্হি ঠিতস্স ৰসেন গণনা হোতি। তেন পন সদ্ধিং ঊনতরগণনানং সংসন্দনে ঊনতরগণনানংযেৰ ৰসেন গণনা হোতীতি ৰেদিতব্বো। যথা চ আরম্মণপচ্চযৰসেন এৰং অধিপতিপচ্চযৰসেনাপি ততো পরেসং অনন্তরাদীনং ৰসেনাপি তিমূলকাদযো ন ৰিত্থারিতা। তস্মা দুমূলকে দস্সিতগণনাৰসেনেৰ সব্বত্থ সাধেতব্বা। তেনেৰ ৰুত্তং ‘‘একেকং পচ্চযং মূলকং কাতুন সজ্ঝাযমগ্গেন গণেতব্বা’’তি।
Idāni adhipatipaccayādivasena dumūlakādīsu gaṇanaṃ dassetuṃ adhipatipaccayā hetuyā navātiādi vuttaṃ. Tatthāpi vuttanayeneva paccayasanniveso veditabbo. Yathā ca adhipatipaccayā hetuyā nava, evaṃ sesesupi hetunā samānagaṇanāsu naveva. Iti yo yo paccayo ādimhi tiṭṭhati, tena tena saddhiṃ samānagaṇanānaṃ saṃsandane ādimhi ṭhitassa vasena gaṇanā hoti. Tena pana saddhiṃ ūnataragaṇanānaṃ saṃsandane ūnataragaṇanānaṃyeva vasena gaṇanā hotīti veditabbo. Yathā ca ārammaṇapaccayavasena evaṃ adhipatipaccayavasenāpi tato paresaṃ anantarādīnaṃ vasenāpi timūlakādayo na vitthāritā. Tasmā dumūlake dassitagaṇanāvaseneva sabbattha sādhetabbā. Teneva vuttaṃ ‘‘ekekaṃ paccayaṃ mūlakaṃ kātuna sajjhāyamaggena gaṇetabbā’’ti.
পচ্চযানুলোমৰণ্ণনা।
Paccayānulomavaṇṇanā.
পটিচ্চৰারো
Paṭiccavāro
পচ্চযপচ্চনীযৰণ্ণনা
Paccayapaccanīyavaṇṇanā
৮৬-৮৭. পচ্চযপচ্চনীযং পন যস্মা কুসলপদে ন লব্ভতি কুসলধম্মস্স হেতুপচ্চযেন ৰিনা অনুপ্পত্তিতো, তস্মা অকুসলং ধম্মং পটিচ্চাতিআদি আরদ্ধং। তত্থ নহেতুপচ্চযাতি হেতুপচ্চযপটিক্খেপো হেতুপচ্চযং ৰিনা অঞ্ঞেন পচ্চযেন উপ্পজ্জতীতি অত্থো। ৰিচিকিচ্ছাসহগতো উদ্ধচ্চসহগতো মোহোতি অযঞ্হি সম্পযুত্তধম্মানঞ্চেৰ চিত্তসমুট্ঠানরূপস্স চ সযং হেতুপচ্চযো হোতি, অঞ্ঞস্স পন সম্পযুত্তহেতুনো অভাৰা ন হেতুপচ্চযা উপ্পজ্জতীতি ঠপেত্ৰা হেতুপচ্চযং সেসেহি অত্তনো অনুরূপপচ্চযেহি উপ্পজ্জতি। ইমিনা নযেন সব্বপচ্চযপটিক্খেপেসু অত্থো ৰেদিতব্বো। অহেতুকং ৰিপাকাব্যাকতন্তি ইদং রূপসমুট্ঠাপকৰসেনেৰ ৰেদিতব্বং। অঞ্ঞেসুপি এৰরূপেসু এসেৰ নযো।
86-87. Paccayapaccanīyaṃ pana yasmā kusalapade na labbhati kusaladhammassa hetupaccayena vinā anuppattito, tasmā akusalaṃ dhammaṃ paṭiccātiādi āraddhaṃ. Tattha nahetupaccayāti hetupaccayapaṭikkhepo hetupaccayaṃ vinā aññena paccayena uppajjatīti attho. Vicikicchāsahagato uddhaccasahagato mohoti ayañhi sampayuttadhammānañceva cittasamuṭṭhānarūpassa ca sayaṃ hetupaccayo hoti, aññassa pana sampayuttahetuno abhāvā na hetupaccayā uppajjatīti ṭhapetvā hetupaccayaṃ sesehi attano anurūpapaccayehi uppajjati. Iminā nayena sabbapaccayapaṭikkhepesu attho veditabbo. Ahetukaṃ vipākābyākatanti idaṃ rūpasamuṭṭhāpakavaseneva veditabbaṃ. Aññesupi evarūpesu eseva nayo.
৮৮. নঅধিপতিপচ্চযে কামং অধিপতিপি অত্তনা সদ্ধিং দুতিযস্স অধিপতিনো অভাৰা নঅধিপতিপচ্চযং লভতি, যথা পন ৰিচিকিচ্ছুদ্ধচ্চসহগতো মোহো অহেতুকো, ন তথা অধিপতযো এৰ নিরাধিপতি। ছন্দাদীসু পন অঞ্ঞতরং অধিপতিং অকত্ৰা কুসলাদীনং উপ্পত্তিকালে সব্বেপি কুসলাদযো নিরাধিপতিনো। তস্মা মোহং ৰিয ৰিসুং অধিপতিমত্তমেৰ অনুদ্ধরিত্ৰা সব্বসঙ্গাহিকৰসেন এসা ‘‘একং খন্ধং পটিচ্চ তযো খন্ধা’’তিআদিকা দেসনা কতাতি ৰেদিতব্বা।
88. Naadhipatipaccaye kāmaṃ adhipatipi attanā saddhiṃ dutiyassa adhipatino abhāvā naadhipatipaccayaṃ labhati, yathā pana vicikicchuddhaccasahagato moho ahetuko, na tathā adhipatayo eva nirādhipati. Chandādīsu pana aññataraṃ adhipatiṃ akatvā kusalādīnaṃ uppattikāle sabbepi kusalādayo nirādhipatino. Tasmā mohaṃ viya visuṃ adhipatimattameva anuddharitvā sabbasaṅgāhikavasena esā ‘‘ekaṃ khandhaṃ paṭicca tayo khandhā’’tiādikā desanā katāti veditabbā.
৮৯. নানন্তরনসমনন্তরেসু নারম্মণে ৰিয রূপমেৰ পচ্চযুপ্পন্নং। তেন ৰুত্তং ‘‘নারম্মণপচ্চযসদিস’’ন্তি। সহজাতপচ্চযো পরিহীনো। যথা চেস, তথা নিস্সযঅত্থিঅৰিগতপচ্চযাপি। কিং কারণা? এতেহি ৰিনা কস্সচি অনুপ্পত্তিতো। সহজাতনিস্সযঅত্থিঅৰিগতপচ্চযেপি হি পচ্চক্খায একোপি রূপারূপধম্মো নুপ্পজ্জতি, তস্মা তে পরিহীনা।
89. Nānantaranasamanantaresu nārammaṇe viya rūpameva paccayuppannaṃ. Tena vuttaṃ ‘‘nārammaṇapaccayasadisa’’nti. Sahajātapaccayo parihīno. Yathā cesa, tathā nissayaatthiavigatapaccayāpi. Kiṃ kāraṇā? Etehi vinā kassaci anuppattito. Sahajātanissayaatthiavigatapaccayepi hi paccakkhāya ekopi rūpārūpadhammo nuppajjati, tasmā te parihīnā.
৯০. নঅঞ্ঞমঞ্ঞপচ্চযৰিভঙ্গে পটিসন্ধিক্খণে ৰিপাকাব্যাকতে খন্ধে পটিচ্চ কটত্তারূপন্তি হদযৰত্থুৰজ্জং ৰেদিতব্বং।
90. Naaññamaññapaccayavibhaṅge paṭisandhikkhaṇe vipākābyākate khandhe paṭicca kaṭattārūpanti hadayavatthuvajjaṃ veditabbaṃ.
৯১. নউপনিস্সযপচ্চযৰিভঙ্গে রূপমেৰ পচ্চযুপ্পন্নং, তঞ্হি উপনিস্সযং ন লভতি। অরূপং পন কিঞ্চাপি আরম্মণূপনিস্সযপকতূপনিস্সযে ন লভেয্য, অনন্তরূপনিস্সযমুত্তকং পন নত্থি। তেন ৰুত্তং ‘‘নারম্মণপচ্চযসদিস’’ন্তি।
91. Naupanissayapaccayavibhaṅge rūpameva paccayuppannaṃ, tañhi upanissayaṃ na labhati. Arūpaṃ pana kiñcāpi ārammaṇūpanissayapakatūpanissaye na labheyya, anantarūpanissayamuttakaṃ pana natthi. Tena vuttaṃ ‘‘nārammaṇapaccayasadisa’’nti.
৯২. নপুরেজাতে চিত্তসমুট্ঠানরূপন্তি পঞ্চৰোকারৰসেন ৰুত্তং।
92. Napurejāte cittasamuṭṭhānarūpanti pañcavokāravasena vuttaṃ.
৯৩. নপচ্ছাজাতপচ্চযাতি এত্থ সহজাতপুরেজাতপচ্চযা সঙ্গহং গচ্ছন্তি। তস্মা সহজাতপচ্চযসদিসা এত্থ পাল়ি, সা নঅধিপতিপচ্চযে ৰিত্থারিতাতি ইধ সঙ্খিত্তা। নাসেৰনপচ্চযে কুসলাকুসলা পঠমজৰনৰসেন ৰেদিতব্বা, তথা কিরিযাব্যাকতং। পাল়ি পন ইধাপি নঅধিপতিপচ্চযে ৰিত্থারিতৰসেন ৰেদিতব্বা। তেনেৰাহ – ‘‘নপচ্ছাজাতপচ্চযম্পি নাসেৰনপচ্চযম্পি নাধিপতিপচ্চযসদিস’’ন্তি।
93. Napacchājātapaccayāti ettha sahajātapurejātapaccayā saṅgahaṃ gacchanti. Tasmā sahajātapaccayasadisā ettha pāḷi, sā naadhipatipaccaye vitthāritāti idha saṅkhittā. Nāsevanapaccaye kusalākusalā paṭhamajavanavasena veditabbā, tathā kiriyābyākataṃ. Pāḷi pana idhāpi naadhipatipaccaye vitthāritavasena veditabbā. Tenevāha – ‘‘napacchājātapaccayampi nāsevanapaccayampi nādhipatipaccayasadisa’’nti.
৯৪-৯৭. নকম্মপচ্চযে ৰিপাকচেতনা নানাক্খণিককম্মপচ্চযং লভতীতি ন গহিতা। নাহারপচ্চযে একচ্চং রূপমেৰ পচ্চযুপ্পন্নং, তথা নইন্দ্রিযপচ্চযে।
94-97. Nakammapaccaye vipākacetanā nānākkhaṇikakammapaccayaṃ labhatīti na gahitā. Nāhārapaccaye ekaccaṃ rūpameva paccayuppannaṃ, tathā naindriyapaccaye.
৯৮. নঝানপচ্চযে পঞ্চৰিঞ্ঞাণধম্মা চেৰ একচ্চঞ্চ রূপং পচ্চযুপ্পন্নং। পঞ্চৰিঞ্ঞাণস্মিঞ্হি ৰেদনা চ চিত্তেকগ্গতা চ দুব্বলত্তা উপনিজ্ঝানলক্খণং ন পাপুণন্তীতি ঝানপচ্চযে ন গহিতা।
98. Najhānapaccaye pañcaviññāṇadhammā ceva ekaccañca rūpaṃ paccayuppannaṃ. Pañcaviññāṇasmiñhi vedanā ca cittekaggatā ca dubbalattā upanijjhānalakkhaṇaṃ na pāpuṇantīti jhānapaccaye na gahitā.
৯৯-১০২. নমগ্গপচ্চযে অহেতুকৰিপাককিরিযঞ্চেৰ একচ্চঞ্চ রূপং পচ্চযুপ্পন্নং। নসম্পযুত্তনোনত্থিনোৰিগতেসু রূপমেৰ পচ্চযুপ্পন্নং। তেন ৰুত্তং ‘‘নারম্মণপচ্চযসদিস’’ন্তি।
99-102. Namaggapaccaye ahetukavipākakiriyañceva ekaccañca rūpaṃ paccayuppannaṃ. Nasampayuttanonatthinovigatesu rūpameva paccayuppannaṃ. Tena vuttaṃ ‘‘nārammaṇapaccayasadisa’’nti.
১০৩. নহেতুযা দ্ৰেতি একমূলকগণনায যথাপাল়িমেৰ নিয্যাতি।
103. Nahetuyā dveti ekamūlakagaṇanāya yathāpāḷimeva niyyāti.
১০৪. দুমূলকে নহেতুপচ্চযা নারম্মণে একন্তি এত্থ কিঞ্চাপি বহুগণনেন সদ্ধিং ঊনতরগণনস্স সংসন্দনে ঊনতরগণনৰসেন নহেতুযা ৰিয দ্ৰীহি ভৰিতব্বং। নারম্মণৰসেন পন অরূপধম্মানং পরিহীনত্তা অব্যাকতং পটিচ্চ রূপাব্যাকতস্স উপ্পত্তিং সন্ধায ‘‘এক’’ন্তি ৰুত্তং । সব্বেসু এককেসুপি এসেৰ নযো। দ্ৰেতি ৰুত্তট্ঠানে পন নহেতুযা লদ্ধৰসেন ৰারদ্ৰযং ৰেদিতব্বং।
104. Dumūlake nahetupaccayā nārammaṇe ekanti ettha kiñcāpi bahugaṇanena saddhiṃ ūnataragaṇanassa saṃsandane ūnataragaṇanavasena nahetuyā viya dvīhi bhavitabbaṃ. Nārammaṇavasena pana arūpadhammānaṃ parihīnattā abyākataṃ paṭicca rūpābyākatassa uppattiṃ sandhāya ‘‘eka’’nti vuttaṃ . Sabbesu ekakesupi eseva nayo. Dveti vuttaṭṭhāne pana nahetuyā laddhavasena vāradvayaṃ veditabbaṃ.
১০৫-১০৬. তিমূলকাদীসু পন সব্বেসু নারম্মণপচ্চযস্স অপরিহীনত্তা একমেৰ ৰিস্সজ্জনন্তি অযং পচ্চনীযে নহেতুপচ্চযং আদিং কত্ৰা একমূলকাদীসু গণনা।
105-106. Timūlakādīsu pana sabbesu nārammaṇapaccayassa aparihīnattā ekameva vissajjananti ayaṃ paccanīye nahetupaccayaṃ ādiṃ katvā ekamūlakādīsu gaṇanā.
১০৭-১৩০. নারম্মণপচ্চযাদযো পন একমূলকে তাৰ পুরিমেন সদিসত্তা ইধাপি ন দস্সিতাযেৰ। নারম্মণপচ্চযৰসেন দুমূলকে নারম্মণপচ্চযা, নহেতুযা একন্তি নহেতুদুমূলকে ৰুত্তমেৰ। নাধিপতিযা পঞ্চাতি নারম্মণপচ্চযে লদ্ধৰসেন ৰেদিতব্বাতি এৰং সব্বসংসন্দনেসু ঊনতরগণনস্সেৰ পচ্চযস্স ৰসেন গণনা ৰেদিতব্বা। যত্থ যত্থ চ নারম্মণপচ্চযো পৰিসতি, তত্থ তত্থ রূপমেৰ পচ্চযুপ্পন্নং। নানন্তরনসমনন্তরনঅঞ্ঞমঞ্ঞনউপনিস্সযনাহারনইন্দ্রিযনসম্পযুত্তনোনত্থিনোৰিগতপচ্চযানং পৰিট্ঠট্ঠানেপি এসেৰ নযো। নাহারনইন্দ্রিযনঝাননমগ্গপচ্চযা সব্বত্থ সদিসৰিস্সজ্জনা। নসহজাতাদিচতুক্কং ইধাপি পরিহীনমেৰাতি ইদমেত্থ লক্খণং। ইমিনা পন লক্খণেন সব্বেসু দুমূলকাদীসু ‘‘অযং পচ্চযো মূলং, অযমেত্থ দুমূলকো, অযং তিমূলকো, অযং সব্বমূলকো’’তি সল্লক্খেত্ৰা ঊনতরগণনস্স পচ্চযস্স ৰসেন গণনা ৰেদিতব্বাতি।
107-130. Nārammaṇapaccayādayo pana ekamūlake tāva purimena sadisattā idhāpi na dassitāyeva. Nārammaṇapaccayavasena dumūlake nārammaṇapaccayā, nahetuyā ekanti nahetudumūlake vuttameva. Nādhipatiyā pañcāti nārammaṇapaccaye laddhavasena veditabbāti evaṃ sabbasaṃsandanesu ūnataragaṇanasseva paccayassa vasena gaṇanā veditabbā. Yattha yattha ca nārammaṇapaccayo pavisati, tattha tattha rūpameva paccayuppannaṃ. Nānantaranasamanantaranaaññamaññanaupanissayanāhāranaindriyanasampayuttanonatthinovigatapaccayānaṃ paviṭṭhaṭṭhānepi eseva nayo. Nāhāranaindriyanajhānanamaggapaccayā sabbattha sadisavissajjanā. Nasahajātādicatukkaṃ idhāpi parihīnamevāti idamettha lakkhaṇaṃ. Iminā pana lakkhaṇena sabbesu dumūlakādīsu ‘‘ayaṃ paccayo mūlaṃ, ayamettha dumūlako, ayaṃ timūlako, ayaṃ sabbamūlako’’ti sallakkhetvā ūnataragaṇanassa paccayassa vasena gaṇanā veditabbāti.
পচ্চযপচ্চনীযৰণ্ণনা।
Paccayapaccanīyavaṇṇanā.
পচ্চযানুলোমপচ্চনীযৰণ্ণনা
Paccayānulomapaccanīyavaṇṇanā
১৩১-১৮৯. ইদানি অনুলোমপচ্চনীযে গণনং দস্সেতুং হেতুপচ্চযা নারম্মণে পঞ্চাতিআদি আরদ্ধং। তত্থ হেতাধিপতিমগ্গপচ্চযেসু অনুলোমতো ঠিতেসু সহজাতাদযো চত্তারো সব্বট্ঠানিকপচ্চযা, আহারিন্দ্রিযঝানমগ্গপচ্চযা চত্তারোতি ইমে অট্ঠ পচ্চনীযতো ন লব্ভন্তি। হেতুপচ্চযাদিৰসেন হি উপ্পজ্জমানো ধম্মো ইমে অট্ঠ পচ্চযে অলভন্তো নাম নত্থি। আরম্মণঅনন্তরসমনন্তরউপনিস্সযসম্পযুত্তনত্থিৰিগতপচ্চযেসু পন অনুলোমতো ঠিতেসু অরূপট্ঠানিকা পচ্চনীকতো ন লব্ভন্তি। ন হি আরম্মণপচ্চযাদীহি উপ্পজ্জমানা অনন্তরসমনন্তরপচ্চযাদযো ন লভন্তি। সহজাতঅঞ্ঞমঞ্ঞনিস্সযকম্মাহারিন্দ্রিযঅত্থিঅৰিগতপচ্চযেসু পন অনুলোমতো ঠিতেসু চত্তারো সব্বট্ঠানিকাযেৰ, পচ্চনীকতো ন লব্ভন্তি। এতেসঞ্হি পচ্চযানং ৰসেন উপ্পজ্জমানো সব্বট্ঠানিকে অলভন্তো নাম নত্থি। পচ্ছাজাতপচ্চযস্স অনুলোমতো ঠানং নাম নত্থি। এৰং সেসেসু অনুলোমতো ঠিতেসু যে চ লব্ভন্তি, যে চ ন লব্ভন্তি, তে সল্লক্খেত্ৰা সব্বেসুপি দুমূলকাদীসু নযেসু তেসং তেসং পচ্চযানং সংসন্দনে ঊনতরগণনানংযেৰ ৰসেন গণনা ৰেদিতব্বাতি।
131-189. Idāni anulomapaccanīye gaṇanaṃ dassetuṃ hetupaccayā nārammaṇe pañcātiādi āraddhaṃ. Tattha hetādhipatimaggapaccayesu anulomato ṭhitesu sahajātādayo cattāro sabbaṭṭhānikapaccayā, āhārindriyajhānamaggapaccayā cattāroti ime aṭṭha paccanīyato na labbhanti. Hetupaccayādivasena hi uppajjamāno dhammo ime aṭṭha paccaye alabhanto nāma natthi. Ārammaṇaanantarasamanantaraupanissayasampayuttanatthivigatapaccayesu pana anulomato ṭhitesu arūpaṭṭhānikā paccanīkato na labbhanti. Na hi ārammaṇapaccayādīhi uppajjamānā anantarasamanantarapaccayādayo na labhanti. Sahajātaaññamaññanissayakammāhārindriyaatthiavigatapaccayesu pana anulomato ṭhitesu cattāro sabbaṭṭhānikāyeva, paccanīkato na labbhanti. Etesañhi paccayānaṃ vasena uppajjamāno sabbaṭṭhānike alabhanto nāma natthi. Pacchājātapaccayassa anulomato ṭhānaṃ nāma natthi. Evaṃ sesesu anulomato ṭhitesu ye ca labbhanti, ye ca na labbhanti, te sallakkhetvā sabbesupi dumūlakādīsu nayesu tesaṃ tesaṃ paccayānaṃ saṃsandane ūnataragaṇanānaṃyeva vasena gaṇanā veditabbāti.
পচ্চযানুলোমপচ্চনীযৰণ্ণনা।
Paccayānulomapaccanīyavaṇṇanā.
পচ্চযপচ্চনীযানুলোমৰণ্ণনা
Paccayapaccanīyānulomavaṇṇanā
১৯০. ইদানি পচ্চনীযানুলোমে গণনং দস্সেতুং নহেতুপচ্চযা আরম্মণে দ্ৰেতিআদি আরদ্ধং। তত্থ হেতুম্হি পচ্চনীকতো ঠিতে ঠপেত্ৰা অধিপতিং অৰসেসা অনুলোমতো লব্ভন্তি। পচ্ছাজাতো পন অনুলোমতো সব্বত্থেৰ ন লব্ভতি, যে নৰ পচ্চযা ‘‘অরূপানঞ্ঞেৰা’’তি ৰুত্তা, তেসু পুরেজাতঞ্চ আসেৰনঞ্চ ঠপেত্ৰা অৰসেসেসু সত্তসু পচ্চনীকতো ঠিতেসু সেসা অরূপট্ঠানিকা অনুলোমতো ন লব্ভন্তি। যো হি আরম্মণাদীহি নুপ্পজ্জতি, ন সো অনন্তরাদযো লভতি। পটিসন্ধিৰিপাকো পন পুরেজাততো, সব্বৰিপাকো চ সদ্ধিং কিরিযমনোধাতুযা আসেৰনতো অনুপ্পজ্জমানোপি অনন্তরাদযো লভতি, তস্মা ‘‘পুরেজাতঞ্চ আসেৰনঞ্চ ঠপেত্ৰা’’তি ৰুত্তং।
190. Idāni paccanīyānulome gaṇanaṃ dassetuṃ nahetupaccayā ārammaṇe dvetiādi āraddhaṃ. Tattha hetumhi paccanīkato ṭhite ṭhapetvā adhipatiṃ avasesā anulomato labbhanti. Pacchājāto pana anulomato sabbattheva na labbhati, ye nava paccayā ‘‘arūpānaññevā’’ti vuttā, tesu purejātañca āsevanañca ṭhapetvā avasesesu sattasu paccanīkato ṭhitesu sesā arūpaṭṭhānikā anulomato na labbhanti. Yo hi ārammaṇādīhi nuppajjati, na so anantarādayo labhati. Paṭisandhivipāko pana purejātato, sabbavipāko ca saddhiṃ kiriyamanodhātuyā āsevanato anuppajjamānopi anantarādayo labhati, tasmā ‘‘purejātañca āsevanañca ṭhapetvā’’ti vuttaṃ.
পুরেজাতপচ্ছাজাতআসেৰনৰিপাকৰিপ্পযুত্তেসু পচ্চনীকতো ঠিতেসু একং ঠপেত্ৰা অৰসেসা অনুলোমতো লব্ভন্তি। কম্মপচ্চযে পচ্চনীকতো ঠিতে ঠপেত্ৰা ৰিপাকপচ্চযং অৰসেসা অনুলোমতো লব্ভন্তি। আহারিন্দ্রিযেসু পচ্চনীকতো ঠিতেসু ঠপেত্ৰা সব্বট্ঠানিকে চেৰ অঞ্ঞমঞ্ঞকম্মাহারিন্দ্রিযপচ্চযে চ অৰসেসা অনুলোমতো ন লব্ভন্তি, ইতরে যুজ্জমানকৰসেন লব্ভন্তি। ঝানপচ্চযে পচ্চনীকতো ঠিতে। হেতাধিপতিআসেৰনমগ্গপচ্চযা অনুলোমতো ন লব্ভন্তি। মগ্গপচ্চযে পচ্চনীকতো ঠিতে হেতাধিপতিপচ্চযা অনুলোমতো ন লব্ভন্তি। ৰিপ্পযুত্তপচ্চযে পচ্চনীকতো ঠিতে পুরেজাতপচ্চযং ঠপেত্ৰা অৰসেসা অনুলোমতো লব্ভন্তি। এৰং তেসু তেসু পচ্চযেসু পচ্চনীকতো ঠিতেসু যে যে অনুলোমতো ন লব্ভন্তি, তে তে ঞত্ৰা তেসং তেসং পচ্চযানং সংসন্দনে ঊনতরগণনানং ৰসেন গণনা ৰেদিতব্বা।
Purejātapacchājātaāsevanavipākavippayuttesu paccanīkato ṭhitesu ekaṃ ṭhapetvā avasesā anulomato labbhanti. Kammapaccaye paccanīkato ṭhite ṭhapetvā vipākapaccayaṃ avasesā anulomato labbhanti. Āhārindriyesu paccanīkato ṭhitesu ṭhapetvā sabbaṭṭhānike ceva aññamaññakammāhārindriyapaccaye ca avasesā anulomato na labbhanti, itare yujjamānakavasena labbhanti. Jhānapaccaye paccanīkato ṭhite. Hetādhipatiāsevanamaggapaccayā anulomato na labbhanti. Maggapaccaye paccanīkato ṭhite hetādhipatipaccayā anulomato na labbhanti. Vippayuttapaccaye paccanīkato ṭhite purejātapaccayaṃ ṭhapetvā avasesā anulomato labbhanti. Evaṃ tesu tesu paccayesu paccanīkato ṭhitesu ye ye anulomato na labbhanti, te te ñatvā tesaṃ tesaṃ paccayānaṃ saṃsandane ūnataragaṇanānaṃ vasena gaṇanā veditabbā.
১৯১-১৯৫. দুমূলকাদীসু চ নযেসু যং যং পচ্চযং আদিং কত্ৰা যে যে দুকাদযো দস্সিতা, তে তে লব্ভমানালব্ভমানপচ্চযৰসেন যথা যথা দস্সিতা, তথা তথা সাধুকং সল্লক্খেতব্বা। তত্থ যং নহেতুৰসেন দুমূলকাদযো নযে দস্সেন্তেন নহেতুপচ্চযা নারম্মণপচ্চযা…পে॰… নাসেৰনপচ্চযাতি ৰত্ৰা ‘‘যাৰ আসেৰনা সব্বং সদিস’’ন্তি ৰুত্তং। তস্স, ‘‘নঅঞ্ঞমঞ্ঞপচ্চযা সহজাতে এক’’ন্তিআদীহি সদিসতা ৰেদিতব্বা। যং পন ‘‘নকম্মে গণিতে পঞ্চ গণ্হাতী’’তি সীহল়ভাসায লিখিতং, তস্সত্থো – নহেতুপচ্চযং আদিং কত্ৰা নকম্মপচ্চযাতি এৰং নকম্মপচ্চযেন ঘটিতে সহজাতে একন্তি এৰং দস্সিতা পঞ্চেৰ পচ্চযা অনুলোমতো লব্ভন্তি, ন অঞ্ঞেতি। এৰং অঞ্ঞেসুপি এৰরূপেসু ঠানেসু ব্যঞ্জনং অনাদিযিত্ৰা অধিপ্পেতত্থোযেৰ গহেতব্বো। এৰরূপঞ্হি ব্যঞ্জনং অত্তনো সঞ্ঞানিবন্ধনত্থং পোরাণেহি সকসকভাসায লিখিতং।
191-195. Dumūlakādīsu ca nayesu yaṃ yaṃ paccayaṃ ādiṃ katvā ye ye dukādayo dassitā, te te labbhamānālabbhamānapaccayavasena yathā yathā dassitā, tathā tathā sādhukaṃ sallakkhetabbā. Tattha yaṃ nahetuvasena dumūlakādayo naye dassentena nahetupaccayā nārammaṇapaccayā…pe… nāsevanapaccayāti vatvā ‘‘yāva āsevanā sabbaṃ sadisa’’nti vuttaṃ. Tassa, ‘‘naaññamaññapaccayā sahajāte eka’’ntiādīhi sadisatā veditabbā. Yaṃ pana ‘‘nakamme gaṇite pañca gaṇhātī’’ti sīhaḷabhāsāya likhitaṃ, tassattho – nahetupaccayaṃ ādiṃ katvā nakammapaccayāti evaṃ nakammapaccayena ghaṭite sahajāte ekanti evaṃ dassitā pañceva paccayā anulomato labbhanti, na aññeti. Evaṃ aññesupi evarūpesu ṭhānesu byañjanaṃ anādiyitvā adhippetatthoyeva gahetabbo. Evarūpañhi byañjanaṃ attano saññānibandhanatthaṃ porāṇehi sakasakabhāsāya likhitaṃ.
অপিচ ইমস্মিং পচ্চনীযানুলোমে পচ্চযুপ্পন্নধম্মেসুপি অত্থি ধম্মো কম্মপচ্চযং লভতি, ন ইন্দ্রিযপচ্চযং। সো অসঞ্ঞেসু চেৰ পঞ্চৰোকারে পৰত্তে চ রূপজীৰিতিন্দ্রিযৰসেন ৰেদিতব্বো। অত্থি ধম্মো মগ্গপচ্চযং লভতি, নহেতুপচ্চযং। সো ৰিচিকিচ্ছুদ্ধচ্চসহজাতমোহৰসেন ৰেদিতব্বো। অত্থি ধম্মো ঝানপচ্চযং লভতি, নমগ্গপচ্চযং। সো মনোধাতুঅহেতুকমনোৰিঞ্ঞাণধাতুৰসেন ৰেদিতব্বো। যত্থ কটত্তারূপানি নানাক্খণিককম্মৰসেনেৰ কম্মপচ্চযং লভন্তি, তত্থ রূপধম্মা হেতাধিপতিৰিপাকিন্দ্রিযঝানমগ্গপচ্চযে ন লভন্তি, সব্বট্ঠানিকা পচ্চনীযা ন হোন্তি। অহেতুকে অধিপতিপচ্চযো নত্থীতি ইমেসম্পি পকিণ্ণকানং ৰসেনেত্থ গণনৰারো অসম্মোহতো ৰেদিতব্বো।
Apica imasmiṃ paccanīyānulome paccayuppannadhammesupi atthi dhammo kammapaccayaṃ labhati, na indriyapaccayaṃ. So asaññesu ceva pañcavokāre pavatte ca rūpajīvitindriyavasena veditabbo. Atthi dhammo maggapaccayaṃ labhati, nahetupaccayaṃ. So vicikicchuddhaccasahajātamohavasena veditabbo. Atthi dhammo jhānapaccayaṃ labhati, namaggapaccayaṃ. So manodhātuahetukamanoviññāṇadhātuvasena veditabbo. Yattha kaṭattārūpāni nānākkhaṇikakammavaseneva kammapaccayaṃ labhanti, tattha rūpadhammā hetādhipativipākindriyajhānamaggapaccaye na labhanti, sabbaṭṭhānikā paccanīyā na honti. Ahetuke adhipatipaccayo natthīti imesampi pakiṇṇakānaṃ vasenettha gaṇanavāro asammohato veditabbo.
তত্রাযং নযো – নহেতুপচ্চযা আরম্মণে দ্ৰেতি এত্থ তাৰ অহেতুকমোহো চেৰ অহেতুকৰিপাককিরিযা চ পচ্চযুপ্পন্নং, তস্মা অকুসলেনাকুসলং, অব্যাকতেন অব্যাকতং সন্ধাযেত্থ দ্ৰেতি ৰুত্তং। সেসেসুপি এসেৰ নযো। আসেৰনে পন ৰিপাকং ন লব্ভতি, তথা কিরিযমনোধাতু। তস্মা কিরিযাহেতুমনোৰিঞ্ঞাণধাতুৰসেনেত্থ অব্যাকতেন অব্যাকতং ৰেদিতব্বং। ৰিপাকে একন্তি অব্যাকতেন অব্যাকতমেৰ। মগ্গে একন্তি অকুসলেন অকুসলমেৰ।
Tatrāyaṃ nayo – nahetupaccayā ārammaṇe dveti ettha tāva ahetukamoho ceva ahetukavipākakiriyā ca paccayuppannaṃ, tasmā akusalenākusalaṃ, abyākatena abyākataṃ sandhāyettha dveti vuttaṃ. Sesesupi eseva nayo. Āsevane pana vipākaṃ na labbhati, tathā kiriyamanodhātu. Tasmā kiriyāhetumanoviññāṇadhātuvasenettha abyākatena abyākataṃ veditabbaṃ. Vipāke ekanti abyākatena abyākatameva. Magge ekanti akusalena akusalameva.
১৯৬-১৯৭. নারম্মণমূলকে হেতুযা পঞ্চাতি রূপমেৰ সন্ধায ৰুত্তং। তঞ্হি কুসলং অকুসলং অব্যাকতং কুসলাব্যাকতং অকুসলাব্যাকতঞ্চাতি পঞ্চ কোট্ঠাসে পটিচ্চ উপ্পজ্জতি। সব্বপঞ্চকেসু এসেৰ নযো। অঞ্ঞমঞ্ঞে একন্তি ভূতরূপানি চেৰ ৰত্থুঞ্চ সন্ধায ৰুত্তং। তানি হি নারম্মণপচ্চযা অঞ্ঞমঞ্ঞপচ্চযা উপ্পজ্জন্তি। তিমূলকেপি এসেৰ নযো।
196-197. Nārammaṇamūlake hetuyā pañcāti rūpameva sandhāya vuttaṃ. Tañhi kusalaṃ akusalaṃ abyākataṃ kusalābyākataṃ akusalābyākatañcāti pañca koṭṭhāse paṭicca uppajjati. Sabbapañcakesu eseva nayo. Aññamaññe ekanti bhūtarūpāni ceva vatthuñca sandhāya vuttaṃ. Tāni hi nārammaṇapaccayā aññamaññapaccayā uppajjanti. Timūlakepi eseva nayo.
১৯৮-২০২. নাধিপতিমূলকে হেতুযা নৰাতি অনুলোমে হেতুম্হি ৰুত্তানেৰ। তীণীতিআদীনিপি হেট্ঠা অনুলোমে ৰুত্তসদিসানেৰ। তিমূলকে দ্ৰেতি হেট্ঠা নহেতুপচ্চযা আরম্মণে ৰুত্তসদিসানেৰ।
198-202. Nādhipatimūlake hetuyā navāti anulome hetumhi vuttāneva. Tīṇītiādīnipi heṭṭhā anulome vuttasadisāneva. Timūlake dveti heṭṭhā nahetupaccayā ārammaṇe vuttasadisāneva.
২০৩-২৩৩. নপুরেজাতমূলকে হেতুযা সত্তাতি হেট্ঠা ‘‘আরুপ্পে কুসলং একং খন্ধং পটিচ্চা’’তিআদিনা নযেন পুরেজাতে দস্সিতানেৰ। সব্বসত্তকেসু এসেৰ নযো। নকম্মমূলকে হেতুযা তীণীতিআদীসু চেতনাৰ পচ্চযুপ্পন্না। তস্মা কুসলং অকুসলং অব্যাকতঞ্চ পটিচ্চ উপ্পত্তিং সন্ধায তীণীতি ৰুত্তং। ইমিনা নযেন ‘‘একং দ্ৰে তীণি পঞ্চ সত্ত নৰা’’তি আগতট্ঠানেসু গণনা ৰেদিতব্বা। ‘‘চত্তারি ছ অট্ঠা’’তি ইমা পন তিস্সো গণনা নত্থেৰাতি।
203-233. Napurejātamūlake hetuyā sattāti heṭṭhā ‘‘āruppe kusalaṃ ekaṃ khandhaṃ paṭiccā’’tiādinā nayena purejāte dassitāneva. Sabbasattakesu eseva nayo. Nakammamūlake hetuyā tīṇītiādīsu cetanāva paccayuppannā. Tasmā kusalaṃ akusalaṃ abyākatañca paṭicca uppattiṃ sandhāya tīṇīti vuttaṃ. Iminā nayena ‘‘ekaṃ dve tīṇi pañca satta navā’’ti āgataṭṭhānesu gaṇanā veditabbā. ‘‘Cattāri cha aṭṭhā’’ti imā pana tisso gaṇanā natthevāti.
পচ্চযপচ্চনীযানুলোমৰণ্ণনা।
Paccayapaccanīyānulomavaṇṇanā.
নিট্ঠিতা চ পটিচ্চৰারস্স অত্থৰণ্ণনা।
Niṭṭhitā ca paṭiccavārassa atthavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ১. কুসলত্তিকং • 1. Kusalattikaṃ
