| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
১. কুসলত্তিকং
1. Kusalattikaṃ
১. পটিচ্চৰারৰণ্ণনা
1. Paṭiccavāravaṇṇanā
১. পচ্চযানুলোমং
1. Paccayānulomaṃ
(১) ৰিভঙ্গৰারৰণ্ণনা
(1) Vibhaṅgavāravaṇṇanā
৫৩. তিকপদানং তিকন্তরপদেহি ৰিসদিসতা পাকটাযেৰাতি ৰুত্তং ‘‘তিকপদনানত্তমত্তেন ৰিনা’’তি। মূলাৰসানৰসেনাতি ‘‘একমূলেকাৰসানং নৰা’’তিআদিনা ৰুত্তমূলাৰসানৰসেন। ‘‘ন তাযেৰ ৰেদনাত্তিকাদীসূ’’তি এত্থ যা সদিসতা পটিক্খিত্তা, তং দস্সেতুং ‘‘সদিসতং সন্ধায ‘ন তাযেৰা’তি ৰুত্ত’’ন্তি আহ। যাতি যা পুচ্ছা। সব্বপুচ্ছাসমাহরণন্তি সব্বাসং একূনপঞ্ঞাসায পুচ্ছানং সমুচ্চযনং অনৰসেসেত্ৰা কথনং। ইধ ইমস্মিং পটিচ্চৰারুদ্দেসে কত্তব্বং। আদিতো হি অনৰসেসতো ৰুত্তে পচ্ছা যথারহং তদেকদেসৰচনং যুত্তং। ন হি তত্থ একূনপঞ্ঞাস পুচ্ছা ৰিস্সজ্জনং লভন্তীতি তত্থ তস্মিং ধম্মানুলোমপচ্চনীযে পীতিত্তিকে একূনপঞ্ঞাস পুচ্ছা ৰিস্সজ্জনং ন হি লভন্তি, অট্ঠৰীসে পন লভন্তীতি অত্থো।
53. Tikapadānaṃ tikantarapadehi visadisatā pākaṭāyevāti vuttaṃ ‘‘tikapadanānattamattena vinā’’ti. Mūlāvasānavasenāti ‘‘ekamūlekāvasānaṃ navā’’tiādinā vuttamūlāvasānavasena. ‘‘Na tāyeva vedanāttikādīsū’’ti ettha yā sadisatā paṭikkhittā, taṃ dassetuṃ ‘‘sadisataṃ sandhāya ‘na tāyevā’ti vutta’’nti āha. Yāti yā pucchā. Sabbapucchāsamāharaṇanti sabbāsaṃ ekūnapaññāsāya pucchānaṃ samuccayanaṃ anavasesetvā kathanaṃ. Idha imasmiṃ paṭiccavāruddese kattabbaṃ. Ādito hi anavasesato vutte pacchā yathārahaṃ tadekadesavacanaṃ yuttaṃ. Na hi tattha ekūnapaññāsa pucchā vissajjanaṃ labhantīti tattha tasmiṃ dhammānulomapaccanīye pītittike ekūnapaññāsa pucchā vissajjanaṃ na hi labhanti, aṭṭhavīse pana labhantīti attho.
তেন সহজাতপচ্চযভূতেনাতি তেন ৰেদনাদিভেদেন একেন ধম্মেন সহজাতপচ্চযো হোন্তেন, সহজাতপচ্চযতং ৰা পত্তেন পাপুণন্তেনাতি অত্থো। অনুঞ্ঞাতং ৰিয হোতীতি যদিপি অট্ঠকথাযং ‘‘যাৰ নিরোধগমনা’’তিআদিৰচনেহি খণত্তযসমঙ্গী উপ্পজ্জতীতি অনুঞ্ঞাতং ৰিয হোতি, উপ্পাদক্খণসমঙ্গীযেৰ পন উপ্পজ্জতীতি ৰুত্তো পটিচ্চৰারাদীনং ছন্নং ৰারানং উপ্পাদমেৰ গহেত্ৰা পৰত্তত্তা। তথা হি তেসু পচ্ছাজাতপচ্চযো অনুলোমতো ন তিট্ঠতি।
Tena sahajātapaccayabhūtenāti tena vedanādibhedena ekena dhammena sahajātapaccayo hontena, sahajātapaccayataṃ vā pattena pāpuṇantenāti attho. Anuññātaṃ viya hotīti yadipi aṭṭhakathāyaṃ ‘‘yāva nirodhagamanā’’tiādivacanehi khaṇattayasamaṅgī uppajjatīti anuññātaṃ viya hoti, uppādakkhaṇasamaṅgīyeva pana uppajjatīti vutto paṭiccavārādīnaṃ channaṃ vārānaṃ uppādameva gahetvā pavattattā. Tathā hi tesu pacchājātapaccayo anulomato na tiṭṭhati.
ইধ কুসলৰচনেন গহিতে খন্ধে সন্ধায ৰুত্তন্তি ইমস্মিং পটিচ্চৰারে ‘‘কুসলং ধম্মং পটিচ্চ কুসলো ধম্মো উপ্পজ্জতী’’তি কুসলসদ্দেন গহিতে খন্ধে সন্ধায ৰুত্তং চতূসুপি কুসলখন্ধেসু একতো উপ্পজ্জমানেসু সামঞ্ঞতো ৰুত্তেসু সহজাতাদিসাধারণপচ্চযৰসেন অৰিসেসতো সব্বে সব্বেসং পচ্চযাতি অযমেৰ ইমস্স পচ্চযো, ইমস্সেৰ অযং পচ্চযোতি চ নিযমেত্ৰা ৰত্তুং ন সক্কা। তেন ৰুত্তং অট্ঠকথাযং ‘‘একস্সেৰ দ্ৰিন্নংযেৰ ৰা’’তিআদি। ‘‘সুখায ৰেদনায সম্পযুত্তং ধম্মং পটিচ্চা’’তিআদীসু পন ৰিসেসনভাৰেন ৰেদনাদীনং ৰিসুং গহিতত্তা ‘‘একং খন্ধং পটিচ্চ দ্ৰে খন্ধা’’তিআদি ৰত্তুং সক্কা। তেন ৰুত্তং ‘‘ৰেদনাত্তিকাদীসু পনা’’তিআদি। তথাতি ইমিনা ‘‘একেকস্সপি দুকাদিভেদানঞ্চা’’তি ইমং অনুকড্ঢতি।
Idha kusalavacanena gahite khandhe sandhāya vuttanti imasmiṃ paṭiccavāre ‘‘kusalaṃ dhammaṃ paṭicca kusalo dhammo uppajjatī’’ti kusalasaddena gahite khandhe sandhāya vuttaṃ catūsupi kusalakhandhesu ekato uppajjamānesu sāmaññato vuttesu sahajātādisādhāraṇapaccayavasena avisesato sabbe sabbesaṃ paccayāti ayameva imassa paccayo, imasseva ayaṃ paccayoti ca niyametvā vattuṃ na sakkā. Tena vuttaṃ aṭṭhakathāyaṃ ‘‘ekasseva dvinnaṃyeva vā’’tiādi. ‘‘Sukhāya vedanāya sampayuttaṃ dhammaṃ paṭiccā’’tiādīsu pana visesanabhāvena vedanādīnaṃ visuṃ gahitattā ‘‘ekaṃ khandhaṃ paṭicca dve khandhā’’tiādi vattuṃ sakkā. Tena vuttaṃ ‘‘vedanāttikādīsu panā’’tiādi. Tathāti iminā ‘‘ekekassapi dukādibhedānañcā’’ti imaṃ anukaḍḍhati.
এতস্মিন্তি ‘‘ৰিপাকাব্যাকতং কিরিযাব্যাকত’’ন্তি এৰং ৰিপাককিরিযাব্যাকতগ্গহণে। ‘‘সব্বস্মিং ন গহেতব্ব’’ন্তি ৰুত্তং, কত্থ পন গহেতব্বন্তি আহ ‘‘চিত্তসমুট্ঠানঞ্চ রূপন্তি এত্থেৰা’’তি। এৰং পঠমে ৰাক্যে অতিব্যাপিতং পরিহরিত্ৰা দুতিযে অব্যাপিতং পরিহরিতুং ‘‘ন কেৰল’’ন্তিআদি ৰুত্তং। এত্থাতি ‘‘ৰিপাকাব্যাকতং কিরিযাব্যাকত’’ন্তি এত্থ ন গহেতব্বং তস্সপি আরুপ্পে উপ্পজ্জমানস্স রূপেন ৰিনা উপ্পত্তিতো। এত্থ চ যথা হেতুপচ্চযগ্গহণেনেৰ অহেতুকং নিৰত্তিতং, এৰং চিত্তসমুট্ঠানঞ্চ রূপন্তি রূপগ্গহণেনেৰ আরুপ্পে ৰিপাকোপি তত্থ উপ্পজ্জমানেন চিত্তুপ্পাদেন সদ্ধিং ন গহিতো। তং পনেতং অত্থসিদ্ধমেৰ অকত্ৰা সরূপতো পাকটতরং কত্ৰা দস্সেতুং অট্ঠকথাযং ‘‘ৰিপাকাব্যাকত’’ন্তিআদি ৰুত্তং। পটিসন্ধিপচ্ছিমচিত্তানি পনেত্থ সতিপি রূপস্স অনুপ্পাদনে ৰৰত্থানাভাৰতো ন গহিতানীতি দট্ঠব্বং।
Etasminti ‘‘vipākābyākataṃ kiriyābyākata’’nti evaṃ vipākakiriyābyākataggahaṇe. ‘‘Sabbasmiṃ na gahetabba’’nti vuttaṃ, kattha pana gahetabbanti āha ‘‘cittasamuṭṭhānañca rūpanti etthevā’’ti. Evaṃ paṭhame vākye atibyāpitaṃ pariharitvā dutiye abyāpitaṃ pariharituṃ ‘‘na kevala’’ntiādi vuttaṃ. Etthāti ‘‘vipākābyākataṃ kiriyābyākata’’nti ettha na gahetabbaṃ tassapi āruppe uppajjamānassa rūpena vinā uppattito. Ettha ca yathā hetupaccayaggahaṇeneva ahetukaṃ nivattitaṃ, evaṃ cittasamuṭṭhānañca rūpanti rūpaggahaṇeneva āruppe vipākopi tattha uppajjamānena cittuppādena saddhiṃ na gahito. Taṃ panetaṃ atthasiddhameva akatvā sarūpato pākaṭataraṃ katvā dassetuṃ aṭṭhakathāyaṃ ‘‘vipākābyākata’’ntiādi vuttaṃ. Paṭisandhipacchimacittāni panettha satipi rūpassa anuppādane vavatthānābhāvato na gahitānīti daṭṭhabbaṃ.
পচ্চযভূতস্সাতি খন্ধানং পচ্চযভূতস্স ৰত্থুস্স অগ্গহিততাপত্তিং নিৰারেতুং, কথং? পচ্চযুপ্পন্নভাৰেন, কত্থ? ‘‘কটত্তা চ রূপ’’ন্তি এতস্মিং সামঞ্ঞৰচনে ‘‘খন্ধে পটিচ্চ ৰত্থূ’’তি ৰুত্তং, এৰঞ্হিস্স পচ্চযুপ্পন্নতা দস্সিতা হোতীতি। অঞ্ঞমঞ্ঞাপেক্খং ৰচনদ্ৰযন্তি ‘‘খন্ধে পটিচ্চ ৰত্থু, ৰত্থুং পটিচ্চ খন্ধা’’তি পদদ্ৰযং সন্ধায ৰুত্তং। সামঞ্ঞেন গহিতন্তি ‘‘কটত্তা চ রূপ’’ন্তি ইমিনা সামঞ্ঞৰচনেন, কটত্তারূপসামঞ্ঞেন ৰা গহিতং।
Paccayabhūtassāti khandhānaṃ paccayabhūtassa vatthussa aggahitatāpattiṃ nivāretuṃ, kathaṃ? Paccayuppannabhāvena, kattha? ‘‘Kaṭattā ca rūpa’’nti etasmiṃ sāmaññavacane ‘‘khandhe paṭicca vatthū’’ti vuttaṃ, evañhissa paccayuppannatā dassitā hotīti. Aññamaññāpekkhaṃ vacanadvayanti ‘‘khandhe paṭicca vatthu, vatthuṃ paṭicca khandhā’’ti padadvayaṃ sandhāya vuttaṃ. Sāmaññena gahitanti ‘‘kaṭattā ca rūpa’’nti iminā sāmaññavacanena, kaṭattārūpasāmaññena vā gahitaṃ.
উপাদারূপগ্গহণেন ৰিনা ‘‘উপাদারূপ’’ন্তি অগ্গহেত্ৰা কেৰলং চিত্তসমুট্ঠানরূপং ‘‘কটত্তারূপং’’ইচ্চেৰ গহেত্ৰাতি অত্থো। এতস্মিং পন দস্সনেতি ‘‘মহাভূতেপি পটিচ্চ উপ্পত্তিদস্সনত্থ’’ন্তি ৰুত্তে এতস্মিং অত্থদস্সনে। খন্ধপচ্চযসহিতন্তি পটিসন্ধিযং কটত্তারূপং, পৰত্তিযং চিত্তসমুট্ঠানং রূপং ৰদতি। অসহিতন্তি পন পৰত্তিযং কটত্তারূপং আহারসমুট্ঠানং উতুসমুট্ঠানং অনিন্দ্রিযবদ্ধং অসঞ্ঞভৰসঙ্গহিতঞ্চ রূপং। পটিসন্ধিযম্পীতি পি-সদ্দেন পৰত্তিযম্পি কটত্তারূপং অঞ্ঞঞ্চ তত্থ উপ্পজ্জনকং উপাদারূপন্তি অত্থো দট্ঠব্বো। কথং পনেত্থ ভূতে পটিচ্চ উপ্পজ্জমানস্স রূপস্স হেতুপচ্চযা উপ্পজ্জতীতি? ‘‘খন্ধে পটিচ্চ হেতুপচ্চযা উপ্পজ্জমানং রূপং ভূতেপি পটিচ্চ উপ্পজ্জতী’’তি এৰং পদমেতং, ভূতানং ৰা হেতুপচ্চযতো নিব্বত্তত্তা এৰং ৰুত্তং। কারণকারণম্পি হি কারণন্ত্ৰেৰ ৰুচ্চতি যথা ‘‘চোরেহি গামো দড্ঢো’’তি।
Upādārūpaggahaṇena vinā ‘‘upādārūpa’’nti aggahetvā kevalaṃ cittasamuṭṭhānarūpaṃ ‘‘kaṭattārūpaṃ’’icceva gahetvāti attho. Etasmiṃ pana dassaneti ‘‘mahābhūtepi paṭicca uppattidassanattha’’nti vutte etasmiṃ atthadassane. Khandhapaccayasahitanti paṭisandhiyaṃ kaṭattārūpaṃ, pavattiyaṃ cittasamuṭṭhānaṃ rūpaṃ vadati. Asahitanti pana pavattiyaṃ kaṭattārūpaṃ āhārasamuṭṭhānaṃ utusamuṭṭhānaṃ anindriyabaddhaṃ asaññabhavasaṅgahitañca rūpaṃ. Paṭisandhiyampīti pi-saddena pavattiyampi kaṭattārūpaṃ aññañca tattha uppajjanakaṃ upādārūpanti attho daṭṭhabbo. Kathaṃ panettha bhūte paṭicca uppajjamānassa rūpassa hetupaccayā uppajjatīti? ‘‘Khandhe paṭicca hetupaccayā uppajjamānaṃ rūpaṃ bhūtepi paṭicca uppajjatī’’ti evaṃ padametaṃ, bhūtānaṃ vā hetupaccayato nibbattattā evaṃ vuttaṃ. Kāraṇakāraṇampi hi kāraṇantveva vuccati yathā ‘‘corehi gāmo daḍḍho’’ti.
ভূতে পটিচ্চ উপাদারূপন্তি পদুদ্ধারো কতো, ‘‘মহাভূতে পটিচ্চ উপাদারূপ’’ন্তি পন পাঠোতি অট্ঠকথাযঞ্চ তমেৰ ৰুত্তং। অযং হেত্থত্থো – ‘‘মহাভূতে পটিচ্চ উপাদারূপ’’ন্তি ইমস্মিং পাঠে ৰুত্তনযেন উপাদারূপম্পি কুসলে খন্ধে মহাভূতে চ পটিচ্চ উপ্পজ্জতীতি। কো পন সো নযোতি তং দস্সেতুং ‘‘মহাভূতে…পে॰… সন্ধাযাহা’’তি ৰুত্তং। তত্থ অত্থতো অযং নযো ৰুত্তোতি ‘‘মহাভূতে পটিচ্চ চিত্তসমুট্ঠানং রূপং কটত্তারূপং উপাদারূপ’’ন্তি ইমিনা অব্যাকতে খন্ধে মহাভূতে চ পটিচ্চ উপাদারূপানং উপ্পত্তিৰচনেন কুসলে খন্ধে মহাভূতে চ পটিচ্চ উপাদারূপানং উপ্পত্তি অত্থতো ৰুত্তো হোতীতি অত্থো।
Bhūte paṭicca upādārūpanti paduddhāro kato, ‘‘mahābhūte paṭicca upādārūpa’’nti pana pāṭhoti aṭṭhakathāyañca tameva vuttaṃ. Ayaṃ hetthattho – ‘‘mahābhūte paṭicca upādārūpa’’nti imasmiṃ pāṭhe vuttanayena upādārūpampi kusale khandhe mahābhūte ca paṭicca uppajjatīti. Ko pana so nayoti taṃ dassetuṃ ‘‘mahābhūte…pe… sandhāyāhā’’ti vuttaṃ. Tattha atthato ayaṃ nayo vuttoti ‘‘mahābhūte paṭicca cittasamuṭṭhānaṃ rūpaṃ kaṭattārūpaṃ upādārūpa’’nti iminā abyākate khandhe mahābhūte ca paṭicca upādārūpānaṃ uppattivacanena kusale khandhe mahābhūte ca paṭicca upādārūpānaṃ uppatti atthato vutto hotīti attho.
৫৪. রূপেন ৰিনা পচ্চযুপ্পন্নং ন লব্ভতীতি এতেন যা পুচ্ছা অরূপমিস্সকাৰসানা, তাপি ইধ ন গয্হন্তি, পগেৰ রূপাৰসানাতি দস্সেতি।
54. Rūpenavinā paccayuppannaṃ na labbhatīti etena yā pucchā arūpamissakāvasānā, tāpi idha na gayhanti, pageva rūpāvasānāti dasseti.
৫৭. তায সমানলক্খণাতি পঞ্চক্খন্ধপটিসন্ধিতায গব্ভসেয্যকপটিসন্ধিযা সমানলক্খণা। পরিপুণ্ণধম্মানন্তি পরিযত্তিৰিভাগানং পঞ্চক্খন্ধধম্মানং। এত্থাতি এতস্মিং সহজাতপচ্চযনিদ্দেসে।
57. Tāya samānalakkhaṇāti pañcakkhandhapaṭisandhitāya gabbhaseyyakapaṭisandhiyā samānalakkhaṇā. Paripuṇṇadhammānanti pariyattivibhāgānaṃ pañcakkhandhadhammānaṃ. Etthāti etasmiṃ sahajātapaccayaniddese.
চিত্তকম্মসমুট্ঠানরূপন্তি চিত্তসমুট্ঠানরূপং কম্মসমুট্ঠানরূপঞ্চ। পুন আহারসমুট্ঠানন্তি এত্থ পুনগহণং উতুসমুট্ঠানাপেক্খং। ন হি তং পুব্বে বাহিরগ্গহণেন অগ্গহিতং, আহারসমুট্ঠানং পন অগ্গহিতমেৰ, উতুসমুট্ঠানস্স কস্মা পুনগহণন্তি আহ ‘‘এতেহী’’তিআদি। তত্থাতি অসঞ্ঞসত্তেসু। তস্সাতি উতুসমুট্ঠানস্স। আদিম্হীতি বাহিরআহারসমুট্ঠানউতুসমুট্ঠানঅসঞ্ঞসত্তৰসেন আগতৰারেহি পঠমৰারে। অৰিসেসৰচনন্তি বাহিরাদিৰিসেসং অকত্ৰা ৰুত্তৰচনং, অরূপম্পি পচ্চযং লভন্তং অত্থং হেতাদিকে পচ্চযে লভন্তং সহ সঙ্গণ্হিত্ৰাতি যোজনা। তস্সাতি, তত্থাতি চ পদদ্ৰযেন যথাৰুত্তং পঠমৰারমেৰ পচ্চামসতি। তংসমানগতিকন্তি চিত্তসমুট্ঠানগতিকং। ইধাপীতি ইমস্মিং সহজাতপচ্চযনিদ্দেসেপি। কম্মপচ্চযৰিভঙ্গে ৰিযাতি নানাক্খণিককম্মপচ্চযনিদ্দেসে ৰিয। তথা হি ৰুত্তং অট্ঠকথাযং ‘‘তংসমুট্ঠানন্তি ইমিনা পটিসন্ধিক্খণে কটত্তারূপম্পি সঙ্গণ্হাতী’’তি। অযঞ্চ অত্থৰিসেসো এত্থ একংসেন ইচ্ছিতব্বোতি দস্সেন্তো ‘‘ন হি…পে॰… অত্থী’’তি আহ।
Cittakammasamuṭṭhānarūpanti cittasamuṭṭhānarūpaṃ kammasamuṭṭhānarūpañca. Puna āhārasamuṭṭhānanti ettha punagahaṇaṃ utusamuṭṭhānāpekkhaṃ. Na hi taṃ pubbe bāhiraggahaṇena aggahitaṃ, āhārasamuṭṭhānaṃ pana aggahitameva, utusamuṭṭhānassa kasmā punagahaṇanti āha ‘‘etehī’’tiādi. Tatthāti asaññasattesu. Tassāti utusamuṭṭhānassa. Ādimhīti bāhiraāhārasamuṭṭhānautusamuṭṭhānaasaññasattavasena āgatavārehi paṭhamavāre. Avisesavacananti bāhirādivisesaṃ akatvā vuttavacanaṃ, arūpampi paccayaṃ labhantaṃ atthaṃ hetādike paccaye labhantaṃ saha saṅgaṇhitvāti yojanā. Tassāti, tatthāti ca padadvayena yathāvuttaṃ paṭhamavārameva paccāmasati. Taṃsamānagatikanti cittasamuṭṭhānagatikaṃ. Idhāpīti imasmiṃ sahajātapaccayaniddesepi. Kammapaccayavibhaṅge viyāti nānākkhaṇikakammapaccayaniddese viya. Tathā hi vuttaṃ aṭṭhakathāyaṃ ‘‘taṃsamuṭṭhānanti iminā paṭisandhikkhaṇe kaṭattārūpampi saṅgaṇhātī’’ti. Ayañca atthaviseso ettha ekaṃsena icchitabboti dassento ‘‘na hi…pe… atthī’’ti āha.
অৰিসেসেত্ৰাতি ‘‘উতুসমুট্ঠান’’ন্তিআদিনা ৰিসেসং অকত্ৰা। উপাদারূপন্তি ৰিসেসেত্ৰাৰ কস্মা পন ৰুত্তানীতি যোজনা। হেতুপচ্চযাদীসূতি আদি-সদ্দেন সহজাতপচ্চযাদিং সঙ্গণ্হাতি। সহাতি চিত্তসমুট্ঠানরূপং কটত্তারূপন্তি এৰং একতো। ৰিসুন্তি চিত্তসমুট্ঠানং রূপং কটত্তারূপতো ৰিসেসেত্ৰা। তত্থ বাহিরগ্গহণাদীহি ৰিযাতি যথা ‘‘বাহিরং একং মহাভূত’’ন্তিআদীসু বাহিরআহারসমুট্ঠানউতুসমুট্ঠানগ্গহণেহি মহাভূতানি ৰিসেসিতানি, এৰং এত্থ ‘‘মহাভূতে পটিচ্চা’’তি এতস্মিং নিদ্দেসে মহাভূতানং কেনচি ৰিসেসনেন অৰিসেসিতত্তা চিত্তসমুট্ঠানরূপভাৰকটত্তারূপভাৰেহি ৰিসেসেত্ৰাৰ ৰুত্তানীতি যোজনা।
Avisesetvāti ‘‘utusamuṭṭhāna’’ntiādinā visesaṃ akatvā. Upādārūpanti visesetvāva kasmā pana vuttānīti yojanā. Hetupaccayādīsūti ādi-saddena sahajātapaccayādiṃ saṅgaṇhāti. Sahāti cittasamuṭṭhānarūpaṃ kaṭattārūpanti evaṃ ekato. Visunti cittasamuṭṭhānaṃ rūpaṃ kaṭattārūpato visesetvā. Tattha bāhiraggahaṇādīhi viyāti yathā ‘‘bāhiraṃ ekaṃ mahābhūta’’ntiādīsu bāhiraāhārasamuṭṭhānautusamuṭṭhānaggahaṇehi mahābhūtāni visesitāni, evaṃ ettha ‘‘mahābhūte paṭiccā’’ti etasmiṃ niddese mahābhūtānaṃ kenaci visesanena avisesitattā cittasamuṭṭhānarūpabhāvakaṭattārūpabhāvehi visesetvāva vuttānīti yojanā.
ইদানি অঞ্ঞেনপি কারণেন তেসং ৰিসেসিতব্বতং দস্সেতুং ‘‘অপিচা’’তিআদি ৰুত্তং। তত্থ ন কোচি পচ্চযোতি ইদং পট্ঠানে আগতনিযামেন রূপং উপনিস্সযপচ্চযং ন লভতীতি কত্ৰা ৰুত্তং। তেনাহ ‘‘হেতাদীসূ’’তি। তদৰিনাভাৰতো পন তস্স চিত্তকম্মানং কারণভাৰো ৰেদিতব্বো, যতো ইদ্ধিচিত্তনিব্বত্তানি কম্মপচ্চযানি চাতি ৰুত্তানি। ননু চিত্তং আহারউতুসমুট্ঠানানং পচ্চযো হোতীতি? সচ্চং হোতি, সো পন উপত্থম্ভকত্তেন, ন জনকত্তেনাতি দস্সেন্তো আহ ‘‘আহার…পে॰… জনক’’ন্তি । কিং পন তেসং জনকন্তি আহ ‘‘মহাভূতানেৰ…পে॰… জনকানী’’তি। চিত্তেন কম্মুনা চ ৰিনা অভাৰে যথাক্কমং চিত্তকম্মসমুট্ঠানউপাদারূপানন্তি অত্থো। চিত্তসমুট্ঠানরূপকটত্তারূপভূতানেৰাতি চিত্তকম্মসমুট্ঠানমহাভূতনিব্বত্তানেৰ মহাভূতানং তেসং আসন্নকারণত্তা। অঞ্ঞানীতি উতুআহারসমুট্ঠানানি উপাদারূপানি ৰদতি। ৰিসেসনং কতং ‘‘চিত্তসমুট্ঠানং রূপং কটত্তারূপং উপাদারূপ’’ন্তি। সমানজাতিকেন রূপেন উতুনা আহারেন চাতি অত্থো। পাকটৰিসেসনানেৰাতি ইদং যেহি মহাভূতেহি তানি নিব্বত্তানি, তেসং ‘‘আহারসমুট্ঠানং উতুসমুট্ঠান’’ন্তি ৰিসেসিতত্তা ৰুত্তং। ন ৰিসেসনং অরহন্তি ন ৰিসেসিতব্বানি কারণৰিসেসনেনেৰ ৰিসেসস্স সিদ্ধত্তা, ‘‘মহাভূতে পটিচ্চ উপাদারূপ’’ন্ত্ৰেৰ ৰত্তব্বন্তি অত্থো। এতানি পন চিত্তজকম্মজরূপানি।
Idāni aññenapi kāraṇena tesaṃ visesitabbataṃ dassetuṃ ‘‘apicā’’tiādi vuttaṃ. Tattha nakoci paccayoti idaṃ paṭṭhāne āgataniyāmena rūpaṃ upanissayapaccayaṃ na labhatīti katvā vuttaṃ. Tenāha ‘‘hetādīsū’’ti. Tadavinābhāvato pana tassa cittakammānaṃ kāraṇabhāvo veditabbo, yato iddhicittanibbattāni kammapaccayāni cāti vuttāni. Nanu cittaṃ āhārautusamuṭṭhānānaṃ paccayo hotīti? Saccaṃ hoti, so pana upatthambhakattena, na janakattenāti dassento āha ‘‘āhāra…pe… janaka’’nti . Kiṃ pana tesaṃ janakanti āha ‘‘mahābhūtāneva…pe… janakānī’’ti. Cittena kammunā ca vinā abhāve yathākkamaṃ cittakammasamuṭṭhānaupādārūpānanti attho. Cittasamuṭṭhānarūpakaṭattārūpabhūtānevāti cittakammasamuṭṭhānamahābhūtanibbattāneva mahābhūtānaṃ tesaṃ āsannakāraṇattā. Aññānīti utuāhārasamuṭṭhānāni upādārūpāni vadati. Visesanaṃ kataṃ ‘‘cittasamuṭṭhānaṃ rūpaṃ kaṭattārūpaṃ upādārūpa’’nti. Samānajātikena rūpena utunā āhārena cāti attho. Pākaṭavisesanānevāti idaṃ yehi mahābhūtehi tāni nibbattāni, tesaṃ ‘‘āhārasamuṭṭhānaṃ utusamuṭṭhāna’’nti visesitattā vuttaṃ. Na visesanaṃ arahanti na visesitabbāni kāraṇavisesaneneva visesassa siddhattā, ‘‘mahābhūte paṭicca upādārūpa’’ntveva vattabbanti attho. Etāni pana cittajakammajarūpāni.
সৰিসেসেনাতি যেন ৰিসেসেন ৰিসেসিতা, তং দস্সেন্তো চিত্তং সন্ধাযাহ ‘‘সহজাতাদিপচ্চযভাৰতো’’তি, ইতরং পন সন্ধায ‘‘মূলকারণভাৰতো’’তি, কম্মূপনিস্সযপচ্চযভাৰতোতি অত্থো। ইতরানীতি আহারউতুসমুট্ঠানানিপি উপাদারূপানি। মহাভূতৰিসেসনেনেৰ ৰিসেসিতানীতি ‘‘আহারসমুট্ঠানং একং মহাভূতং পটিচ্চ উতুসমুট্ঠানং একং মহাভূতং পটিচ্চা’’তি মহাভূতৰিসেসনেনেৰ জনকপচ্চযেন আহারেন উতুনা চ ৰিসেসিতানি। ইধাতি ‘‘চিত্তসমুট্ঠানং রূপং কটত্তারূপং উপাদারূপ’’ন্তি ইমস্মিং ৰচনে। এত্থ হি উপাদারূপানং চিত্তকম্মসমুট্ঠানতাৰচনেন তংনিস্সযানম্পি তব্ভাৰো পকাসিতোতি। অঞ্ঞতরৰিসেসনং উভযৰিসেসনং হোতি উভযেসং অৰিনিব্ভোগেন পৰত্তনতো।
Savisesenāti yena visesena visesitā, taṃ dassento cittaṃ sandhāyāha ‘‘sahajātādipaccayabhāvato’’ti, itaraṃ pana sandhāya ‘‘mūlakāraṇabhāvato’’ti, kammūpanissayapaccayabhāvatoti attho. Itarānīti āhārautusamuṭṭhānānipi upādārūpāni. Mahābhūtavisesaneneva visesitānīti ‘‘āhārasamuṭṭhānaṃ ekaṃ mahābhūtaṃ paṭicca utusamuṭṭhānaṃ ekaṃ mahābhūtaṃ paṭiccā’’ti mahābhūtavisesaneneva janakapaccayena āhārena utunā ca visesitāni. Idhāti ‘‘cittasamuṭṭhānaṃ rūpaṃ kaṭattārūpaṃ upādārūpa’’nti imasmiṃ vacane. Ettha hi upādārūpānaṃ cittakammasamuṭṭhānatāvacanena taṃnissayānampi tabbhāvo pakāsitoti. Aññataravisesanaṃ ubhayavisesanaṃ hoti ubhayesaṃ avinibbhogena pavattanato.
৫৮. পুব্বেতি হেতুপচ্চযাদীসু। ৰিসুং পচ্চযভাৰেনাতি ‘‘পটিসন্ধিক্খণে ৰিপাকাব্যাকতং একং খন্ধং পটিচ্চ তযো খন্ধা কটত্তা চ রূপ’’ন্তিআদিনা ৰত্থুস্স ৰিসুং পচ্চযভাৰেন। এত্থ চ ৰিসুংযেৰ পচ্চযভাৰেন দস্সিতানীতি ন সক্কা ৰত্তুং, ‘‘খন্ধে পটিচ্চ ৰত্থু, ৰত্থুং পটিচ্চ খন্ধা’’তি পচ্চযুপ্পন্নভাৰো ৰিয খন্ধানং একতোপি পচ্চযভাৰো দস্সিতো। তেনেৰ হি তস্মিং অত্থে অত্তনো অরুচিং ৰিভাৰেন্তো আহ ‘‘ইমিনা অধিপ্পাযেনাহা’’তি। যো পনত্থো অত্তনো রুচ্চতি, তং দস্সেতুং ‘‘খন্ধে পটিচ্চ ৰত্থূতি ইদং পনা’’তিআদি ৰুত্তং। খন্ধানং পচ্চযভূতানং পটিচ্চট্ঠফরণতাদস্সনং , ৰত্থুস্স পচ্চযভূতস্স পটিচ্চট্ঠফরণতাদস্সনং, ন খন্ধানন্তি সম্বন্ধো। ইধেৰাতি ইমস্মিং অঞ্ঞমঞ্ঞপচ্চযে এৰ। হেতুপচ্চযাদীসুপি অযমেৰ নযো, তত্থ হি পটিচ্চট্ঠফরণস্স সমানতা। দস্সিতায পটিচ্চট্ঠদ্ৰযফরণতায। খন্ধৰত্থূনঞ্চ দস্সিতাযেৰাতি খন্ধৰত্থূনঞ্চ একতো পটিচ্চট্ঠফরণতা দস্সিতাযেৰ।
58. Pubbeti hetupaccayādīsu. Visuṃ paccayabhāvenāti ‘‘paṭisandhikkhaṇe vipākābyākataṃ ekaṃ khandhaṃ paṭicca tayo khandhā kaṭattā ca rūpa’’ntiādinā vatthussa visuṃ paccayabhāvena. Ettha ca visuṃyeva paccayabhāvena dassitānīti na sakkā vattuṃ, ‘‘khandhe paṭicca vatthu, vatthuṃ paṭicca khandhā’’ti paccayuppannabhāvo viya khandhānaṃ ekatopi paccayabhāvo dassito. Teneva hi tasmiṃ atthe attano aruciṃ vibhāvento āha ‘‘iminā adhippāyenāhā’’ti. Yo panattho attano ruccati, taṃ dassetuṃ ‘‘khandhe paṭicca vatthūti idaṃ panā’’tiādi vuttaṃ. Khandhānaṃ paccayabhūtānaṃ paṭiccaṭṭhapharaṇatādassanaṃ , vatthussa paccayabhūtassa paṭiccaṭṭhapharaṇatādassanaṃ, na khandhānanti sambandho. Idhevāti imasmiṃ aññamaññapaccaye eva. Hetupaccayādīsupi ayameva nayo, tattha hi paṭiccaṭṭhapharaṇassa samānatā. Dassitāya paṭiccaṭṭhadvayapharaṇatāya. Khandhavatthūnañca dassitāyevāti khandhavatthūnañca ekato paṭiccaṭṭhapharaṇatā dassitāyeva.
এৰমাদীতি আদি-সদ্দেন ‘‘অকুসলং ধম্মং পটিচ্চা’’তি এৰমাদি সঙ্গয্হতি। ননু ভৰিতব্বন্তি যোজনা। হেতুপচ্চযাদীহি ৰিযাতি সদিসূদাহরণন্তি তং দস্সেন্তো ‘‘ন হী’’তিআদিমাহ। যং ‘‘একং, তযো, দ্ৰে চ খন্ধে পটিচ্চা’’তি ৰুত্তং পচ্চযজাতন্তি অত্থো। পচ্চযট্ঠো হি পটিচ্চট্ঠো। তেনাহ ‘‘তে হেতুপচ্চযভূতা এৰ ন হোন্তী’’তি। এতেন ন পটিচ্চট্ঠফরণকস্স একন্তিকো হেতুআদিপচ্চযভাৰোতি দস্সেতি। তেনাহ ‘‘এস নযো আরম্মণপচ্চযাদীসূ’’তি। ন হি আরম্মণপচ্চযভূতো ধম্মো পটিচ্চট্ঠং ফরতি। ৰুত্তঞ্চ ‘‘কুসলং ধম্মং পটিচ্চ কুসলো ধম্মো উপ্পজ্জতি আরম্মণপচ্চযা’’তি।
Evamādīti ādi-saddena ‘‘akusalaṃ dhammaṃ paṭiccā’’ti evamādi saṅgayhati. Nanu bhavitabbanti yojanā. Hetupaccayādīhi viyāti sadisūdāharaṇanti taṃ dassento ‘‘na hī’’tiādimāha. Yaṃ ‘‘ekaṃ, tayo, dve ca khandhe paṭiccā’’ti vuttaṃ paccayajātanti attho. Paccayaṭṭho hi paṭiccaṭṭho. Tenāha ‘‘te hetupaccayabhūtā eva na hontī’’ti. Etena na paṭiccaṭṭhapharaṇakassa ekantiko hetuādipaccayabhāvoti dasseti. Tenāha ‘‘esa nayo ārammaṇapaccayādīsū’’ti. Na hi ārammaṇapaccayabhūto dhammo paṭiccaṭṭhaṃ pharati. Vuttañca ‘‘kusalaṃ dhammaṃ paṭicca kusalo dhammo uppajjati ārammaṇapaccayā’’ti.
পচ্চযন্তরেনপি উপকারকতামত্তম্পি গহেত্ৰা পটিচ্চৰারে ৰারন্তরে চ হেতুআদিপচ্চযা দস্সিতাতি উপচযেন যথাৰুত্তং ৰিভাৰেন্তো ‘‘পচ্চযৰারে চা’’তিআদিমাহ। তংপচ্চযাতি ৰত্থুপচ্চযা, যথারহং পচ্চযভূতং ৰত্থুং লভিত্ৰাতি অত্থো। তেতি কুসলে খন্ধে পটিচ্চ। তেসন্তি মহাভূতানং খন্ধানং। পচ্চযভাৰাভাৰতোতি ইদং খন্ধানং হেতুসহজাতাদিপচ্চযভাৰস্স মহাভূতেসু দিট্ঠত্তা ৰুত্তং। যদি এৰং অঞ্ঞমঞ্ঞপচ্চযাপি তে তেসং ভৰেয্যুন্তি পরস্স আসঙ্কনিরাসঙ্কং করোন্তো ‘‘অঞ্ঞমঞ্ঞসদ্দো হী’’তিআদিমাহ। নিরপেক্খোতি অঞ্ঞনিরপেক্খো। ন হি হেতুধম্মো ধম্মন্তরাপেক্খো হুত্ৰা হেতুপচ্চযো হোতি, সদ্দসীসেনেত্থ অত্থো ৰুত্তো। অঞ্ঞতরাপেক্খোতি অত্তনা সহকারিকারণভূতং, ইতরং ৰা যং কিঞ্চি অঞ্ঞতরং অপেক্খতীতি অঞ্ঞতরাপেক্খো। যথাৰুত্তেতরেতরাপেক্খোতি অরূপক্খন্ধাদিভেদং পাল়িযং ৰুত্তপ্পকারং ইতরেতরং মিথু পচ্চযভূতং অপেক্খতীতি ইতরেতরাপেক্খো। পচ্চযপচ্চযুপ্পন্না চ খন্ধা মহাভূতা ইধ যথাৰুত্তা ভৰেয্যুন্তি কস্মা ৰুত্তং। ন হি খন্ধা মহাভূতা অঞ্ঞমঞ্ঞং অঞ্ঞমঞ্ঞপচ্চযভাৰেন ৰুত্তা, অথ খন্ধা চ মহাভূতা চাতি ৰিসুং ৰিসুং গয্হেয্যুং, এৰং সতি ‘‘মহাভূতা খন্ধানং ন কোচি পচ্চযো’’তি ন ৰত্তব্বং।
Paccayantarenapi upakārakatāmattampi gahetvā paṭiccavāre vārantare ca hetuādipaccayā dassitāti upacayena yathāvuttaṃ vibhāvento ‘‘paccayavāre cā’’tiādimāha. Taṃpaccayāti vatthupaccayā, yathārahaṃ paccayabhūtaṃ vatthuṃ labhitvāti attho. Teti kusale khandhe paṭicca. Tesanti mahābhūtānaṃ khandhānaṃ. Paccayabhāvābhāvatoti idaṃ khandhānaṃ hetusahajātādipaccayabhāvassa mahābhūtesu diṭṭhattā vuttaṃ. Yadi evaṃ aññamaññapaccayāpi te tesaṃ bhaveyyunti parassa āsaṅkanirāsaṅkaṃ karonto ‘‘aññamaññasaddo hī’’tiādimāha. Nirapekkhoti aññanirapekkho. Na hi hetudhammo dhammantarāpekkho hutvā hetupaccayo hoti, saddasīsenettha attho vutto. Aññatarāpekkhoti attanā sahakārikāraṇabhūtaṃ, itaraṃ vā yaṃ kiñci aññataraṃ apekkhatīti aññatarāpekkho. Yathāvuttetaretarāpekkhoti arūpakkhandhādibhedaṃ pāḷiyaṃ vuttappakāraṃ itaretaraṃ mithu paccayabhūtaṃ apekkhatīti itaretarāpekkho. Paccayapaccayuppannā ca khandhā mahābhūtā idha yathāvuttā bhaveyyunti kasmā vuttaṃ. Na hi khandhā mahābhūtā aññamaññaṃ aññamaññapaccayabhāvena vuttā, atha khandhā ca mahābhūtā cāti visuṃ visuṃ gayheyyuṃ, evaṃ sati ‘‘mahābhūtā khandhānaṃ na koci paccayo’’ti na vattabbaṃ.
যস্স সযং পচ্চযো, ততো তেন তন্নিস্সিতেন ৰাতি যস্স ধম্মস্স সযং অত্তনা পচ্চযো হোতি, ততো ধম্মতো সযং উপ্পজ্জমানং কথং তেন ধম্মেন তন্নিস্সিতেন ৰা অঞ্ঞমঞ্ঞপচ্চযেন এৰংভূতং তং ধম্মজাতং অঞ্ঞমঞ্ঞপচ্চযা উপ্পজ্জতীতি ৰত্তব্বতং অরহতীতি ৰুত্তমেৰত্থং উদাহরণেন ৰিভাৰেতি ‘‘যথা’’তিআদিনা। তত্থ ‘‘খন্ধে পটিচ্চ খন্ধা’’তি ইদং ‘‘তেন অঞ্ঞমঞ্ঞপচ্চযেন উপ্পজ্জমান’’ন্তি ইমস্স উদাহরণং, ‘‘ৰত্থুং পচ্চযা খন্ধা’’তি ইদং পন ‘‘তন্নিস্সিতেন অঞ্ঞমঞ্ঞপচ্চযেন উপ্পজ্জমান’’ন্তি এতস্স। তস্মাতি ৰুত্তমেৰ অত্থং কারণভাৰেন পচ্চামসতি। অত্তনো পচ্চযস্স পচ্চযত্তাভাৰতোতি অত্তনো পচ্চযভূতস্স অরূপক্খন্ধস্স পচ্চযভাৰাভাৰতো। ন হি মহাভূতা যতো খন্ধতো উপ্পন্না, তেসং পচ্চযা হোন্তি। তদপেক্খত্তাতি ইতরেতরপচ্চযভাৰাপেক্খত্তা। খন্ধে পটিচ্চ পচ্চযা চাতি পটিচ্চৰারে ৰুত্তনিযামেনেৰ খন্ধে পটিচ্চ, পচ্চযৰারে ৰুত্তনিযামেন খন্ধে পচ্চযা চ। নঅঞ্ঞমঞ্ঞপচ্চযা চ ৰুত্তাতি অঞ্ঞমঞ্ঞপচ্চযতো অঞ্ঞস্মা নিস্সযপচ্চযাদিতো মহাভূতানং উপ্পত্তি ৰুত্তা চাতি অত্থো। ৰত্থুং পচ্চযা উপ্পজ্জমানাতি ৰত্থুং পুরেজাতপচ্চযং কত্ৰা উপ্পজ্জমানা। তন্নিস্সিতেন চ অঞ্ঞমঞ্ঞপচ্চযেনাতি তং ৰত্থুং নিস্সিতেন খন্ধেন অঞ্ঞমঞ্ঞপচ্চযভূতেন উপ্পজ্জন্তি, তস্মা যথাৰুত্তেন কারণেন ৰত্থুং পচ্চযা…পে॰… ৰুত্তা, ইমিনা পরিযাযেন পন উজুকং পৰত্তিযং ৰত্থুস্স অঞ্ঞমঞ্ঞপচ্চযভাৰোতি অত্থো।
Yassasayaṃ paccayo, tato tena tannissitena vāti yassa dhammassa sayaṃ attanā paccayo hoti, tato dhammato sayaṃ uppajjamānaṃ kathaṃ tena dhammena tannissitena vā aññamaññapaccayena evaṃbhūtaṃ taṃ dhammajātaṃ aññamaññapaccayā uppajjatīti vattabbataṃ arahatīti vuttamevatthaṃ udāharaṇena vibhāveti ‘‘yathā’’tiādinā. Tattha ‘‘khandhe paṭicca khandhā’’ti idaṃ ‘‘tena aññamaññapaccayena uppajjamāna’’nti imassa udāharaṇaṃ, ‘‘vatthuṃ paccayā khandhā’’ti idaṃ pana ‘‘tannissitena aññamaññapaccayena uppajjamāna’’nti etassa. Tasmāti vuttameva atthaṃ kāraṇabhāvena paccāmasati. Attano paccayassa paccayattābhāvatoti attano paccayabhūtassa arūpakkhandhassa paccayabhāvābhāvato. Na hi mahābhūtā yato khandhato uppannā, tesaṃ paccayā honti. Tadapekkhattāti itaretarapaccayabhāvāpekkhattā. Khandhe paṭicca paccayā cāti paṭiccavāre vuttaniyāmeneva khandhe paṭicca, paccayavāre vuttaniyāmena khandhe paccayā ca. Naaññamaññapaccayā ca vuttāti aññamaññapaccayato aññasmā nissayapaccayādito mahābhūtānaṃ uppatti vuttā cāti attho. Vatthuṃ paccayā uppajjamānāti vatthuṃ purejātapaccayaṃ katvā uppajjamānā. Tannissitena ca aññamaññapaccayenāti taṃ vatthuṃ nissitena khandhena aññamaññapaccayabhūtena uppajjanti, tasmā yathāvuttena kāraṇena vatthuṃ paccayā…pe… vuttā, iminā pariyāyena pana ujukaṃ pavattiyaṃ vatthussa aññamaññapaccayabhāvoti attho.
৫৯. সা ন গহিতাতি যা ‘‘চক্খাযতনং নিস্সাযা’’তিআদিনা চক্খাযতনাদীনং নিস্সযপচ্চযতা ৰুত্তা, সা ইধ পটিচ্চৰারে ন ৰুত্তাতি অত্থো সহজাতত্থো পটিচ্চত্থোতি কত্ৰা। তেনাহ ‘‘চক্খাযতনাদীনি…পে॰… অধিপ্পাযো’’তি। যেসং পন অরূপক্খন্ধমহাভূতনামরূপচিত্তচেতসিকমহাভূতরূপিধম্মানং ৰসেন ছধা নিস্সযপচ্চযো ইচ্ছিতো, তেসং ৰসেন ইধ ৰিভত্তো এৰ। কথং রূপিৰসেন ৰিভত্তোতি চে? ‘‘ৰত্থুং পটিচ্চ খন্ধা’’তি হদযৰত্থুৰসেন সরূপতো দস্সিতো এৰ। ইতরেসম্পি ৰসেন ‘‘অব্যাকতং ধম্মং পটিচ্চ অব্যাকতো ধম্মো উপ্পজ্জতি নিস্সযপচ্চযা’’তি এত্থ দস্সিতো। যথা হি ‘‘কুসলং ধম্মং পটিচ্চ কুসলো ধম্মো উপ্পজ্জতি আরম্মণপচ্চযা’’তিআদীসু রূপাযতনাদীনং অসতিপি পটিচ্চট্ঠফরণে আরম্মণপচ্চযভাৰো দস্সিতো হোতি, এৰমিধাপি চক্খাযতনাদীনং নিস্সযপচ্চযভাৰো দস্সিতো হোতি। তেন ৰুত্তং ‘‘নিস্সয…পে॰… ন গহিতানী’’তি।
59. Sā na gahitāti yā ‘‘cakkhāyatanaṃ nissāyā’’tiādinā cakkhāyatanādīnaṃ nissayapaccayatā vuttā, sā idha paṭiccavāre na vuttāti attho sahajātattho paṭiccatthoti katvā. Tenāha ‘‘cakkhāyatanādīni…pe… adhippāyo’’ti. Yesaṃ pana arūpakkhandhamahābhūtanāmarūpacittacetasikamahābhūtarūpidhammānaṃ vasena chadhā nissayapaccayo icchito, tesaṃ vasena idha vibhatto eva. Kathaṃ rūpivasena vibhattoti ce? ‘‘Vatthuṃ paṭicca khandhā’’ti hadayavatthuvasena sarūpato dassito eva. Itaresampi vasena ‘‘abyākataṃ dhammaṃ paṭicca abyākato dhammo uppajjati nissayapaccayā’’ti ettha dassito. Yathā hi ‘‘kusalaṃ dhammaṃ paṭicca kusalo dhammo uppajjati ārammaṇapaccayā’’tiādīsu rūpāyatanādīnaṃ asatipi paṭiccaṭṭhapharaṇe ārammaṇapaccayabhāvo dassito hoti, evamidhāpi cakkhāyatanādīnaṃ nissayapaccayabhāvo dassito hoti. Tena vuttaṃ ‘‘nissaya…pe… na gahitānī’’ti.
৬০. দ্ৰীসু উপনিস্সযেসূতি অনন্তরপকতূপনিস্সযেসু। কুসলাপি পন মহগ্গতাতি পি-সদ্দেন অব্যাকতে মহগ্গতে আকড্ঢতি ‘‘কুসলাপি মহগ্গতা আরম্মণূপনিস্সযং ন লভন্তি, পগেৰ অব্যাকতা’’তি। কদাচি ন লভন্তি, যদা গরুং কত্ৰা ন পৰত্তন্তীতি অত্থো।
60. Dvīsuupanissayesūti anantarapakatūpanissayesu. Kusalāpi pana mahaggatāti pi-saddena abyākate mahaggate ākaḍḍhati ‘‘kusalāpi mahaggatā ārammaṇūpanissayaṃ na labhanti, pageva abyākatā’’ti. Kadāci na labhanti, yadā garuṃ katvā na pavattantīti attho.
৬১. অঞ্ঞত্থ হেতুপচ্চযাদীসু। পচ্চযং অনিদ্দিসিত্ৰাতি পচ্চযং ধম্মং সরূপতো অনিদ্দিসিত্ৰা। ন হি হেতুপচ্চযনিদ্দেসাদীসু অলোভাদিকুসলাদিসরূপৰিসেসতো হেতুআদিধম্মা দস্সিতা। কুসলাদীসূতি ইদং অলোভাদিৰিসেসনং। তেন যথা অলোভাদীসু অযমেৰ পচ্চযোতি নিযমো নত্থি, এৰং তব্বিসেসেসু কুসলাদীসূতি দস্সেতি। ইধ পন পুরেজাতপচ্চযে। ৰত্থুনৰত্থুধম্মেসূতি নিদ্ধারণে ভুম্মং। পুরেজাতপচ্চযা উপ্পজ্জমানানন্তি ইমিনা পটিসন্ধিক্খণে, আরুপ্পে উপ্পজ্জমানে চ খন্ধে নিৰত্তেতি। কস্মা পনেত্থ ৰত্থুপুরেজাতমেৰ গহিতং, ন আরম্মণপুরেজাতন্তি চোদনং মনসি কত্ৰা আহ ‘‘আরম্মণপুরেজাতম্পি হি ৰত্থুপুরেজাতে অৰিজ্জমানে ন লব্ভতী’’তি। তস্সাতি পটিসন্ধিৰিপাকস্স। ন উদ্ধটোতি ৰুত্তমেৰত্থং পাকটং কাতুং ‘‘নেৰৰিপাক…পে॰… তীণীতি ৰুত্ত’’ন্তি ৰুত্তং। অলাভতোতি যদি লব্ভেয্য, ‘‘চত্তারী’’তি ৰত্তব্বং সিযাতি দস্সেতি। তত্থাতি ৰিপাকত্তিকে। তীণীতি ‘‘ৰিপাকং ধম্মং পটিচ্চ ৰিপাকো ধম্মো উপ্পজ্জতি পুরেজাতপচ্চযা, ৰিপাকধম্মধম্মং, নেৰৰিপাকনৰিপাকধম্মধম্মং পটিচ্চা’’তি ইমানি তীণি।
61. Aññattha hetupaccayādīsu. Paccayaṃ aniddisitvāti paccayaṃ dhammaṃ sarūpato aniddisitvā. Na hi hetupaccayaniddesādīsu alobhādikusalādisarūpavisesato hetuādidhammā dassitā. Kusalādīsūti idaṃ alobhādivisesanaṃ. Tena yathā alobhādīsu ayameva paccayoti niyamo natthi, evaṃ tabbisesesu kusalādīsūti dasseti. Idha pana purejātapaccaye. Vatthunavatthudhammesūti niddhāraṇe bhummaṃ. Purejātapaccayā uppajjamānānanti iminā paṭisandhikkhaṇe, āruppe uppajjamāne ca khandhe nivatteti. Kasmā panettha vatthupurejātameva gahitaṃ, na ārammaṇapurejātanti codanaṃ manasi katvā āha ‘‘ārammaṇapurejātampi hi vatthupurejāte avijjamāne na labbhatī’’ti. Tassāti paṭisandhivipākassa. Na uddhaṭoti vuttamevatthaṃ pākaṭaṃ kātuṃ ‘‘nevavipāka…pe… tīṇīti vutta’’nti vuttaṃ. Alābhatoti yadi labbheyya, ‘‘cattārī’’ti vattabbaṃ siyāti dasseti. Tatthāti vipākattike. Tīṇīti ‘‘vipākaṃ dhammaṃ paṭicca vipāko dhammo uppajjati purejātapaccayā, vipākadhammadhammaṃ, nevavipākanavipākadhammadhammaṃ paṭiccā’’ti imāni tīṇi.
৬৩. তদুপাদারূপানন্তি তে মহাভূতে নিস্সায পৰত্তউপাদারূপানং। ৰদতীতি একক্খণিকনানাক্খণিককম্মপচ্চযং ৰদতি অৰিনিব্ভোগৰসেন পৰত্তমানানং তেসং পচ্চযেন ৰিসেসাভাৰতো। পৰত্তিযং কটত্তারূপানন্তি ৰিসেসনং পটিসন্ধিক্খণে কটত্তারূপানং একক্খণিকস্সপি কম্মপচ্চযস্স ইচ্ছিতত্তা। তেনেৰ হি অট্ঠকথাযং ‘‘তথা পটিসন্ধিক্খণে মহাভূতান’’ন্তি দুৰিধোপি কম্মপচ্চযো ৰুত্তো।
63. Tadupādārūpānanti te mahābhūte nissāya pavattaupādārūpānaṃ. Vadatīti ekakkhaṇikanānākkhaṇikakammapaccayaṃ vadati avinibbhogavasena pavattamānānaṃ tesaṃ paccayena visesābhāvato. Pavattiyaṃ kaṭattārūpānanti visesanaṃ paṭisandhikkhaṇe kaṭattārūpānaṃ ekakkhaṇikassapi kammapaccayassa icchitattā. Teneva hi aṭṭhakathāyaṃ ‘‘tathā paṭisandhikkhaṇe mahābhūtāna’’nti duvidhopi kammapaccayo vutto.
৬৪. যং যং পটিসন্ধিযং লব্ভতীতি চক্খুন্দ্রিযাদীসু যং যং ইন্দ্রিযরূপং পটিসন্ধিযং লব্ভতি, তস্স তস্স ৰসেন ইন্দ্রিযরূপঞ্চ ৰত্থুরূপঞ্চ ‘‘কটত্তারূপ’’ন্তি ৰুত্তং।
64. Yaṃ yaṃ paṭisandhiyaṃ labbhatīti cakkhundriyādīsu yaṃ yaṃ indriyarūpaṃ paṭisandhiyaṃ labbhati, tassa tassa vasena indriyarūpañca vatthurūpañca ‘‘kaṭattārūpa’’nti vuttaṃ.
৬৯. কেসঞ্চীতি পঞ্চৰোকারে পটিসন্ধিক্খন্ধাদীনং। তেসঞ্হি ৰত্থু নিযমতো ৰিপ্পযুত্তপচ্চযো হোতি। সমানৰিপ্পযুত্তপচ্চযাতি সদিসৰিপ্পযুত্তপচ্চযা। কুসলাকুসলা হি খন্ধা একচ্চে চ অব্যাকতা যস্স ৰিপ্পযুত্তপচ্চযা হোন্তি, ন সযং ততো ৰিপ্পযুত্তপচ্চযং লভন্তি চিত্তসমুট্ঠানানং ৰিপ্পযুত্তপচ্চযাভাৰতো ৰত্থুনাৰ ৰিপ্পযুত্তপচ্চযেন উপ্পজ্জনতো। একচ্চে পন অব্যাকতা যস্স ৰিপ্পযুত্তপচ্চযা হোন্তি, সযম্পি ততো ৰিপ্পযুত্তপচ্চযং লভন্তি যথা পটিসন্ধিক্খণে ৰত্থুক্খন্ধা। তেন ৰুত্তং ‘‘কেসঞ্চি খন্ধা…পে॰… নানাৰিপ্পযুত্তপচ্চযাপী’’তি। পচ্চযং পচ্চযং করোতীতি পচ্চযধম্মং ৰত্থুং খন্ধে চ অত্তনো পচ্চযভূতং করোতি, যথাৰুত্তং পচ্চযধম্মং পচ্চযং কত্ৰা পৰত্ততীতি অত্থো। তংকিরিযাকরণতোতি ৰিপ্পযুত্তপচ্চযকিচ্চকরণতো। পটিচ্চ উপ্পত্তি নত্থীতি পটিচ্চট্ঠফরণং নত্থি সহজাতট্ঠো পটিচ্চট্ঠোতি কত্ৰা। ‘‘পটিচ্চ উপ্পজ্জন্তী’’তি এত্তকমেৰাহ, কিং পটিচ্চ? খন্ধেতি পাকটোযমত্থোতি। তেনাহ ‘‘কিং পন পটিচ্চা’’তিআদি। পচ্চাসত্তিঞাযেন অনন্তরস্স ৰিধি পটিসেধো ৰা হোতীতি গণ্হেয্যাতি তং নিৰারেতুং ৰুত্তন্তি দস্সেন্তো ‘‘অনন্তরত্তা…পে॰… ৰুত্তং হোতী’’তি আহ।
69. Kesañcīti pañcavokāre paṭisandhikkhandhādīnaṃ. Tesañhi vatthu niyamato vippayuttapaccayo hoti. Samānavippayuttapaccayāti sadisavippayuttapaccayā. Kusalākusalā hi khandhā ekacce ca abyākatā yassa vippayuttapaccayā honti, na sayaṃ tato vippayuttapaccayaṃ labhanti cittasamuṭṭhānānaṃ vippayuttapaccayābhāvato vatthunāva vippayuttapaccayena uppajjanato. Ekacce pana abyākatā yassa vippayuttapaccayā honti, sayampi tato vippayuttapaccayaṃ labhanti yathā paṭisandhikkhaṇe vatthukkhandhā. Tena vuttaṃ ‘‘kesañci khandhā…pe… nānāvippayuttapaccayāpī’’ti. Paccayaṃ paccayaṃ karotīti paccayadhammaṃ vatthuṃ khandhe ca attano paccayabhūtaṃ karoti, yathāvuttaṃ paccayadhammaṃ paccayaṃ katvā pavattatīti attho. Taṃkiriyākaraṇatoti vippayuttapaccayakiccakaraṇato. Paṭicca uppatti natthīti paṭiccaṭṭhapharaṇaṃ natthi sahajātaṭṭho paṭiccaṭṭhoti katvā. ‘‘Paṭicca uppajjantī’’ti ettakamevāha, kiṃ paṭicca? Khandheti pākaṭoyamatthoti. Tenāha ‘‘kiṃ pana paṭiccā’’tiādi. Paccāsattiñāyena anantarassa vidhi paṭisedho vā hotīti gaṇheyyāti taṃ nivāretuṃ vuttanti dassento ‘‘anantarattā…pe… vuttaṃ hotī’’ti āha.
৭১-৭২. সঙ্খিপিত্ৰা দস্সিতানং ৰসেনেতং ৰুত্তন্তি সঙ্খিপিত্ৰা দস্সিতানং পচ্চযানং ৰসেন এতং ‘‘ইমে তেৰীসতি পচ্চযা’’তিআদিৰচনং ৰাচনামগ্গং দস্সেন্তেহিপি পাল়িযং ৰুত্তন্তি অট্ঠকথাযং ৰুত্তং। একেনপীতি কুসলাদীসু চ পদেসু একেনপি পদেন, তস্মিং তস্মিং ৰা পচ্চযনিদ্দেসে ৰাক্যসঙ্খাতেন একেনপি পদেন। তযো পচ্চযাতি হেতুআরম্মণাধিপতিপচ্চযা। তে চত্তারো পচ্ছাজাতঞ্চ ৰজ্জেত্ৰাতি এত্থ যথাৰুত্তে চত্তারো পচ্চযে ৰিত্থারিতত্তা ‘‘ৰজ্জেত্ৰা’’তি ৰুত্তং, পচ্ছাজাতং পন সব্বেন সব্বং অগ্গহিতত্তা। এত্তকা হি একূনৰীসতি পচ্চযা যথাৰুত্তে পচ্চযে ৰজ্জেত্ৰা অৰসিট্ঠা। যে পনাতি পদকারকে ৰদতি। সঙ্খিপিত্ৰাতি পদস্স ‘‘পাল়িযং ৰিত্থারিতং অৰিত্থারিতঞ্চ সব্বং সঙ্গহেত্ৰা ৰুত্ত’’ন্তি অত্থং ৰদন্তি। ‘‘তেৰীসতি পচ্চযা’’তি পাঠেন ভৰিতব্বং ‘‘সব্বং সঙ্গহেত্ৰা’’তি ৰুত্তত্তা। পচ্ছাজাতপচ্চযোযেৰ হি ৰজ্জেতব্বোতি। এৰং ৰাদন্তরে ৰত্তব্বং ৰত্ৰা ইদানি পাল়িযা অৰিপরীতং অত্থং দস্সেতুং ‘‘আদিম্হি পনা’’তিআদি ৰুত্তং।
71-72. Saṅkhipitvā dassitānaṃ vasenetaṃ vuttanti saṅkhipitvā dassitānaṃ paccayānaṃ vasena etaṃ ‘‘ime tevīsati paccayā’’tiādivacanaṃ vācanāmaggaṃ dassentehipi pāḷiyaṃ vuttanti aṭṭhakathāyaṃ vuttaṃ. Ekenapīti kusalādīsu ca padesu ekenapi padena, tasmiṃ tasmiṃ vā paccayaniddese vākyasaṅkhātena ekenapi padena. Tayo paccayāti hetuārammaṇādhipatipaccayā. Te cattāro pacchājātañca vajjetvāti ettha yathāvutte cattāro paccaye vitthāritattā ‘‘vajjetvā’’ti vuttaṃ, pacchājātaṃ pana sabbena sabbaṃ aggahitattā. Ettakā hi ekūnavīsati paccayā yathāvutte paccaye vajjetvā avasiṭṭhā. Ye panāti padakārake vadati. Saṅkhipitvāti padassa ‘‘pāḷiyaṃ vitthāritaṃ avitthāritañca sabbaṃ saṅgahetvā vutta’’nti atthaṃ vadanti. ‘‘Tevīsati paccayā’’ti pāṭhena bhavitabbaṃ ‘‘sabbaṃ saṅgahetvā’’ti vuttattā. Pacchājātapaccayoyeva hi vajjetabboti. Evaṃ vādantare vattabbaṃ vatvā idāni pāḷiyā aviparītaṃ atthaṃ dassetuṃ ‘‘ādimhi panā’’tiādi vuttaṃ.
ৰিভঙ্গৰারৰণ্ণনা নিট্ঠিতা।
Vibhaṅgavāravaṇṇanā niṭṭhitā.
(২) সঙ্খ্যাৰারৰণ্ণনা
(2) Saṅkhyāvāravaṇṇanā
৭৩. যথা অঞ্ঞমঞ্ঞপচ্চযে ৰিসেসো ৰিভঙ্গে অত্থীতি ইদং হেতুপচ্চযাদিৰিভঙ্গতো ৰিসেসভাৰসামঞ্ঞেন ৰুত্তং। ন হি যাদিসো অঞ্ঞমঞ্ঞপচ্চযৰিভঙ্গে ৰিসেসো, তাদিসো পুরেজাতপচ্চযৰিভঙ্গে। তথা হি অঞ্ঞমঞ্ঞপচ্চযে পটিসন্ধি লব্ভতি, ন পুরেজাতপচ্চযে। ‘‘ৰিপাকাব্যাকতং একং খন্ধং পটিচ্চা’’তিআদিকে ৰিভঙ্গেতি ইমিনা যস্মিং পচ্চযে ৰিপাকাব্যাকতং উদ্ধটং, তং নিদস্সনৰসেন দস্সেতি। ইদং ৰুত্তং হোতি – যথা হেতুপচ্চযাদীসু ‘‘ৰিপাকাব্যাকতং একং খন্ধং পটিচ্চা’’তিআদিনা ৰিভঙ্গে ৰিপাকাব্যাকতং উদ্ধটং অত্থি, এৰং ৰিপাকাব্যাকতাভাৰং আসেৰনপচ্চযে ৰিসেসং দস্সেতীতি।
73. Yathāaññamaññapaccaye viseso vibhaṅge atthīti idaṃ hetupaccayādivibhaṅgato visesabhāvasāmaññena vuttaṃ. Na hi yādiso aññamaññapaccayavibhaṅge viseso, tādiso purejātapaccayavibhaṅge. Tathā hi aññamaññapaccaye paṭisandhi labbhati, na purejātapaccaye. ‘‘Vipākābyākataṃ ekaṃ khandhaṃ paṭiccā’’tiādike vibhaṅgeti iminā yasmiṃ paccaye vipākābyākataṃ uddhaṭaṃ, taṃ nidassanavasena dasseti. Idaṃ vuttaṃ hoti – yathā hetupaccayādīsu ‘‘vipākābyākataṃ ekaṃ khandhaṃ paṭiccā’’tiādinā vibhaṅge vipākābyākataṃ uddhaṭaṃ atthi, evaṃ vipākābyākatābhāvaṃ āsevanapaccaye visesaṃ dassetīti.
৭৪. এতস্মিং অনুলোমেতি ইমস্মিং পটিচ্চৰারে পচ্চযানুলোমে। সুদ্ধিকনযেতি পঠমে নযে। দস্সিতগণনতোতি ‘‘নৰ, তীণি, এক’’ন্তি এৰং সঙ্খেপতো দস্সিতগণনতো। ততো পরেসু নযেসূতি ততো পঠমনযতো পরেসু দুতিযাদিনযেসু। অঞ্ঞিস্সাতি নৰাদিভেদতো অঞ্ঞিস্সা গণনায। অবহুগণনেন যুত্তস্স বহুগণনস্স পচ্চযস্স, তেন অবহুগণনেন। সমানগণনতা চাতি চ-সদ্দো ব্যতিরেকো। তেন পচ্চনীযতো অনুলোমে যো ৰিসেসো ৰুচ্চতি, তং জোতেতি। তেনাহ ‘‘অনুলোমেযেৰ দট্ঠব্বা’’তি। অনুলোমেযেৰাতি অৰধারণেন নিৰত্তিতং দস্সেতুং ‘‘পচ্চনীযে…পে॰… ৰক্খতী’’তি ৰুত্তং।
74. Etasmiṃ anulometi imasmiṃ paṭiccavāre paccayānulome. Suddhikanayeti paṭhame naye. Dassitagaṇanatoti ‘‘nava, tīṇi, eka’’nti evaṃ saṅkhepato dassitagaṇanato. Tato paresu nayesūti tato paṭhamanayato paresu dutiyādinayesu. Aññissāti navādibhedato aññissā gaṇanāya. Abahugaṇanena yuttassa bahugaṇanassa paccayassa, tena abahugaṇanena. Samānagaṇanatā cāti ca-saddo byatireko. Tena paccanīyato anulome yo viseso vuccati, taṃ joteti. Tenāha ‘‘anulomeyeva daṭṭhabbā’’ti. Anulomeyevāti avadhāraṇena nivattitaṃ dassetuṃ ‘‘paccanīye…pe… vakkhatī’’ti vuttaṃ.
৭৬-৭৯. তে পন তেরসমূলকাদিকে নযে সাসেৰনসৰিপাকেসু দ্ৰীসু দ্ৰাৰীসতিমূলকেসু সাসেৰনমেৰ গহেত্ৰা ইতরং পজহন্তো আহ ‘‘পচ্ছাজাতৰিপাকানং পরিহীনত্তা’’তি। ৰিরোধাভাৰে সতীতি ইদং ‘‘সিযা কুসলং ধম্মং পটিচ্চ অকুসলো ধম্মো উপ্পজ্জেয্যা’’তিআদীসু ৰিয পরিকপ্পৰচনং সন্ধায ৰুত্তং। তেনাহ ‘‘পুচ্ছায দস্সিতনযেনা’’তি। তস্স চ তেৰীসতিমূলকস্স। নামন্তি তেৰীসতিমূলকন্তি নামং। দ্ৰাৰীসতি…পে॰… ৰুত্তন্তি এতেন দ্ৰাৰীসতিমূলকোৰ পরমত্থতো লব্ভতি, ন তেৰীসতিমূলকোতি দস্সেতি।
76-79. Te pana terasamūlakādike naye sāsevanasavipākesu dvīsu dvāvīsatimūlakesu sāsevanameva gahetvā itaraṃ pajahanto āha ‘‘pacchājātavipākānaṃ parihīnattā’’ti. Virodhābhāve satīti idaṃ ‘‘siyā kusalaṃ dhammaṃ paṭicca akusalo dhammo uppajjeyyā’’tiādīsu viya parikappavacanaṃ sandhāya vuttaṃ. Tenāha ‘‘pucchāya dassitanayenā’’ti. Tassa ca tevīsatimūlakassa. Nāmanti tevīsatimūlakanti nāmaṃ. Dvāvīsati…pe… vuttanti etena dvāvīsatimūlakova paramatthato labbhati, na tevīsatimūlakoti dasseti.
অঞ্ঞপদানীতি হেতুঅধিপতিপদাদীনি। সুদ্ধিকনযোতি পঠমনযো, যং অট্ঠকথাযং ‘‘একমূল’’ন্তি ৰুত্তং। আরম্মণমূলকাদীসু ন লব্ভতীতি দুমূলকাদীসু তং ন যোজীযতি। হেট্ঠিমং হেট্ঠিমং সোধেত্ৰা এৰ হি অভিধম্মপাল়ি পৰত্তা, তস্মা ‘‘আরম্মণে…পে॰… পঞ্হা’’তি ৰুত্তন্তি সম্বন্ধো। তত্থাতি ‘‘তীণিযেৰ পঞ্হা’’তি পাঠে। ‘‘ৰত্তু অধিপ্পাযানুৰিধাযী সদ্দপ্পযোগো’’তি কত্ৰা অধিপ্পাযং ৰিভাৰেন্তো আহ ‘‘ততো উদ্ধং গণনং নিৰারেতি, ন অধো পটিক্খিপতী’’তি। গণনায উপনিক্খিত্তপঞ্ঞত্তিভাৰতো হেট্ঠাগণনং অমুঞ্চিত্ৰাৰ উপরিগণনা সম্ভৰতীতি আহ ‘‘তীসু একস্স অন্তোগধতায চ ‘তীণিযেৰা’তি ৰুত্ত’’ন্তি। অত্তনো ৰচনন্তি ‘‘তত্রিদং লক্খণ’’ন্তিআদিনা ৰুত্তং অত্তনো ৰচনং।
Aññapadānīti hetuadhipatipadādīni. Suddhikanayoti paṭhamanayo, yaṃ aṭṭhakathāyaṃ ‘‘ekamūla’’nti vuttaṃ. Ārammaṇamūlakādīsu na labbhatīti dumūlakādīsu taṃ na yojīyati. Heṭṭhimaṃ heṭṭhimaṃ sodhetvā eva hi abhidhammapāḷi pavattā, tasmā ‘‘ārammaṇe…pe… pañhā’’ti vuttanti sambandho. Tatthāti ‘‘tīṇiyeva pañhā’’ti pāṭhe. ‘‘Vattu adhippāyānuvidhāyī saddappayogo’’ti katvā adhippāyaṃ vibhāvento āha ‘‘tato uddhaṃ gaṇanaṃ nivāreti, na adho paṭikkhipatī’’ti. Gaṇanāya upanikkhittapaññattibhāvato heṭṭhāgaṇanaṃ amuñcitvāva uparigaṇanā sambhavatīti āha ‘‘tīsu ekassa antogadhatāya ca ‘tīṇiyevā’ti vutta’’nti. Attano vacananti ‘‘tatridaṃ lakkhaṇa’’ntiādinā vuttaṃ attano vacanaṃ.
৮০-৮৫. অৰিগতা…পে॰… ৰুত্তেপি ৰিপল্লাসযোজনং অকত্ৰাতি অধিপ্পাযো। সা দস্সিতা হোতীতি সা ৰিপল্লাসযোজনং অকত্ৰা দস্সিযমানা যদিপি দস্সিতা হোতি, ন এৰং আৰিকরণৰসেন দস্সিতা হোতি তাদিসস্স লিঙ্গনস্স অভাৰতো যথা ৰিপল্লাসযোজনাযন্তি অধিপ্পাযো। তেনাহ ‘‘ৰিপল্লাস…পে॰… হোতী’’তি। এৰমেৰ অধিপ্পাযো যোজেতব্বোতি ‘‘যে…পে॰… তং দস্সেতু’’ন্তি এত্থ ‘‘যদিপি অৰিগতানন্তর’’ন্তিআদিনা যথা অধিপ্পাযো যোজিতো, এৰমেৰ ‘‘তেনেতং আৰিকরোতী’’তি এত্থাপি অধিপ্পাযো যোজেতব্বো। কিং ৰুত্তং হোতি? যথা তত্থ ‘‘ঊনতরগণনেহি সমানগণনেহি চ সদ্ধিং সংসন্দনে ঊনতরা সমানা চ গণনা হোতী’’তি অযমত্থো ঞাপনৰসেন দস্সিতো, এৰমিধাপীতি। তেন ৰুত্তং অট্ঠকথাযং ‘‘আরম্মণপচ্চযো যেন যেন বহুতরগণনেন ৰা সমানগণনেন ৰা পচ্চযেন সদ্ধিং তিকদুকাদিভেদং গচ্ছতি, সব্বত্থ তীণেৰ পঞ্হৰিস্সজ্জনানি ৰেদিতব্বানী’’তি। ন কেৰলমত্থৰিসেসাৰিকরণত্থমেৰেত্থ তথা যোজনা কতা, অথ খো দেসনাক্কমোযেৰ সোতি দস্সেতুং ‘‘পচ্চনীযাদীসুপি পনা’’তিআদিমাহ। তত্থ মূলপদন্তি আরম্মণপচ্চযাদিকং তস্মিং তস্মিং নযে মূলভূতং পদং। তত্থাতি পচ্চনীযাদীসু। এতং লক্খণন্তি ‘‘তত্রিদং লক্খণ’’ন্তিআদিনা ৰুত্তলক্খণং। তস্মাতি যস্মা পুব্বেনাপরং পাল়ি এৰমেৰ পৰত্তা, তস্মা এৰ। তেন মূলপদং আদিম্হিযেৰ ঠপেত্ৰা দেসনা ঞাযাগতাতি দস্সেতি। যদি এৰং লিঙ্গনেন অত্থৰিসেসাৰিকরণং কথন্তি আহ ‘‘ন চ ৰিঞ্ঞাতে অত্থে ৰচনেন লিঙ্গেন চ পযোজনং অত্থী’’তি।
80-85. Avigatā…pe… vuttepi vipallāsayojanaṃ akatvāti adhippāyo. Sā dassitā hotīti sā vipallāsayojanaṃ akatvā dassiyamānā yadipi dassitā hoti, na evaṃ āvikaraṇavasena dassitā hoti tādisassa liṅganassa abhāvato yathā vipallāsayojanāyanti adhippāyo. Tenāha ‘‘vipallāsa…pe… hotī’’ti. Evameva adhippāyo yojetabboti ‘‘ye…pe… taṃ dassetu’’nti ettha ‘‘yadipi avigatānantara’’ntiādinā yathā adhippāyo yojito, evameva ‘‘tenetaṃ āvikarotī’’ti etthāpi adhippāyo yojetabbo. Kiṃ vuttaṃ hoti? Yathā tattha ‘‘ūnataragaṇanehi samānagaṇanehi ca saddhiṃ saṃsandane ūnatarā samānā ca gaṇanā hotī’’ti ayamattho ñāpanavasena dassito, evamidhāpīti. Tena vuttaṃ aṭṭhakathāyaṃ ‘‘ārammaṇapaccayo yena yena bahutaragaṇanena vā samānagaṇanena vā paccayena saddhiṃ tikadukādibhedaṃ gacchati, sabbattha tīṇeva pañhavissajjanāni veditabbānī’’ti. Na kevalamatthavisesāvikaraṇatthamevettha tathā yojanā katā, atha kho desanākkamoyeva soti dassetuṃ ‘‘paccanīyādīsupi panā’’tiādimāha. Tattha mūlapadanti ārammaṇapaccayādikaṃ tasmiṃ tasmiṃ naye mūlabhūtaṃ padaṃ. Tatthāti paccanīyādīsu. Etaṃ lakkhaṇanti ‘‘tatridaṃ lakkhaṇa’’ntiādinā vuttalakkhaṇaṃ. Tasmāti yasmā pubbenāparaṃ pāḷi evameva pavattā, tasmā eva. Tena mūlapadaṃ ādimhiyeva ṭhapetvā desanā ñāyāgatāti dasseti. Yadi evaṃ liṅganena atthavisesāvikaraṇaṃ kathanti āha ‘‘na ca viññāte atthe vacanena liṅgena ca payojanaṃ atthī’’ti.
পচ্চযানুলোমৰণ্ণনা নিট্ঠিতা।
Paccayānulomavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ১. কুসলত্তিকং • 1. Kusalattikaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. পটিচ্চৰারৰণ্ণনা • 1. Paṭiccavāravaṇṇanā
