| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
1. гусалад̇д̇игам̣
1. Kusalattikaṃ
1. бадижжаваараван̣н̣анаа
1. Paṭiccavāravaṇṇanā
1. бажжаяаануломам̣
1. Paccayānulomaṃ
(1) вибхан̇г̇аваараван̣н̣анаа
(1) Vibhaṅgavāravaṇṇanā
53. д̇игабад̣̇аанам̣ д̇иганд̇арабад̣̇зхи висад̣̇исад̇аа баагадааязваад̇и вуд̇д̇ам̣ ‘‘д̇игабад̣̇анаанад̇д̇амад̇д̇зна винаа’’д̇и. муулаавасаанавасзнаад̇и ‘‘згамуулзгаавасаанам̣ наваа’’д̇иаад̣̇инаа вуд̇д̇амуулаавасаанавасзна. ‘‘на д̇ааязва взд̣̇анаад̇д̇игаад̣̇ийсуу’’д̇и зд̇т̇а яаа сад̣̇исад̇аа бадигкид̇д̇аа, д̇ам̣ д̣̇ассзд̇ум̣ ‘‘сад̣̇исад̇ам̣ санд̇хааяа ‘на д̇ааязваа’д̇и вуд̇д̇а’’нд̇и ааха. яаад̇и яаа бужчаа. саб̣б̣абужчаасамаахаран̣анд̇и саб̣б̣аасам̣ згуунабан̃н̃аасааяа бужчаанам̣ самужжаяанам̣ анавасзсзд̇ваа гат̇анам̣. ид̇ха имасмим̣ бадижжавааруд̣̇д̣̇зсз гад̇д̇аб̣б̣ам̣. аад̣̇ид̇о хи анавасзсад̇о вуд̇д̇з бажчаа яат̇аарахам̣ д̇ад̣̇згад̣̇зсаважанам̣ яуд̇д̇ам̣. на хи д̇ад̇т̇а згуунабан̃н̃ааса бужчаа виссаж̇ж̇анам̣ лабханд̇ийд̇и д̇ад̇т̇а д̇асмим̣ д̇хаммаануломабажжанийяз бийд̇ид̇д̇игз згуунабан̃н̃ааса бужчаа виссаж̇ж̇анам̣ на хи лабханд̇и, адтавийсз бана лабханд̇ийд̇и ад̇т̇о.
53. Tikapadānaṃ tikantarapadehi visadisatā pākaṭāyevāti vuttaṃ ‘‘tikapadanānattamattena vinā’’ti. Mūlāvasānavasenāti ‘‘ekamūlekāvasānaṃ navā’’tiādinā vuttamūlāvasānavasena. ‘‘Na tāyeva vedanāttikādīsū’’ti ettha yā sadisatā paṭikkhittā, taṃ dassetuṃ ‘‘sadisataṃ sandhāya ‘na tāyevā’ti vutta’’nti āha. Yāti yā pucchā. Sabbapucchāsamāharaṇanti sabbāsaṃ ekūnapaññāsāya pucchānaṃ samuccayanaṃ anavasesetvā kathanaṃ. Idha imasmiṃ paṭiccavāruddese kattabbaṃ. Ādito hi anavasesato vutte pacchā yathārahaṃ tadekadesavacanaṃ yuttaṃ. Na hi tattha ekūnapaññāsa pucchā vissajjanaṃ labhantīti tattha tasmiṃ dhammānulomapaccanīye pītittike ekūnapaññāsa pucchā vissajjanaṃ na hi labhanti, aṭṭhavīse pana labhantīti attho.
д̇зна сахаж̇аад̇абажжаяабхууд̇знаад̇и д̇зна взд̣̇анаад̣̇ибхзд̣̇зна згзна д̇хаммзна сахаж̇аад̇абажжаяо хонд̇зна, сахаж̇аад̇абажжаяад̇ам̣ ваа бад̇д̇зна баабун̣анд̇знаад̇и ад̇т̇о. анун̃н̃аад̇ам̣ вияа ход̇ийд̇и яад̣̇иби адтагат̇ааяам̣ ‘‘яаава нирод̇хаг̇аманаа’’д̇иаад̣̇иважанзхи кан̣ад̇д̇аяасаман̇г̇ий уббаж̇ж̇ад̇ийд̇и анун̃н̃аад̇ам̣ вияа ход̇и, уббаад̣̇агкан̣асаман̇г̇ийязва бана уббаж̇ж̇ад̇ийд̇и вуд̇д̇о бадижжаваараад̣̇ийнам̣ чаннам̣ ваараанам̣ уббаад̣̇амзва г̇ахзд̇ваа бавад̇д̇ад̇д̇аа. д̇ат̇аа хи д̇зсу бажчааж̇аад̇абажжаяо ануломад̇о на д̇идтад̇и.
Tena sahajātapaccayabhūtenāti tena vedanādibhedena ekena dhammena sahajātapaccayo hontena, sahajātapaccayataṃ vā pattena pāpuṇantenāti attho. Anuññātaṃ viya hotīti yadipi aṭṭhakathāyaṃ ‘‘yāva nirodhagamanā’’tiādivacanehi khaṇattayasamaṅgī uppajjatīti anuññātaṃ viya hoti, uppādakkhaṇasamaṅgīyeva pana uppajjatīti vutto paṭiccavārādīnaṃ channaṃ vārānaṃ uppādameva gahetvā pavattattā. Tathā hi tesu pacchājātapaccayo anulomato na tiṭṭhati.
ид̇ха гусалаважанзна г̇ахид̇з канд̇хз санд̇хааяа вуд̇д̇анд̇и имасмим̣ бадижжаваарз ‘‘гусалам̣ д̇хаммам̣ бадижжа гусало д̇хаммо уббаж̇ж̇ад̇ий’’д̇и гусаласад̣̇д̣̇зна г̇ахид̇з канд̇хз санд̇хааяа вуд̇д̇ам̣ жад̇уусуби гусалаканд̇хзсу згад̇о уббаж̇ж̇амаанзсу сааман̃н̃ад̇о вуд̇д̇зсу сахаж̇аад̇аад̣̇исаад̇хааран̣абажжаяавасзна ависзсад̇о саб̣б̣з саб̣б̣зсам̣ бажжаяаад̇и аяамзва имасса бажжаяо, имассзва аяам̣ бажжаяод̇и жа нияамзд̇ваа вад̇д̇ум̣ на саггаа. д̇зна вуд̇д̇ам̣ адтагат̇ааяам̣ ‘‘згассзва д̣̇виннам̣язва ваа’’д̇иаад̣̇и. ‘‘сукааяа взд̣̇анааяа самбаяуд̇д̇ам̣ д̇хаммам̣ бадижжаа’’д̇иаад̣̇ийсу бана висзсанабхаавзна взд̣̇анаад̣̇ийнам̣ висум̣ г̇ахид̇ад̇д̇аа ‘‘згам̣ канд̇хам̣ бадижжа д̣̇вз канд̇хаа’’д̇иаад̣̇и вад̇д̇ум̣ саггаа. д̇зна вуд̇д̇ам̣ ‘‘взд̣̇анаад̇д̇игаад̣̇ийсу банаа’’д̇иаад̣̇и. д̇ат̇аад̇и иминаа ‘‘згзгассаби д̣̇угаад̣̇ибхзд̣̇аанан̃жаа’’д̇и имам̣ анугад̣дхад̇и.
Idha kusalavacanena gahite khandhe sandhāya vuttanti imasmiṃ paṭiccavāre ‘‘kusalaṃ dhammaṃ paṭicca kusalo dhammo uppajjatī’’ti kusalasaddena gahite khandhe sandhāya vuttaṃ catūsupi kusalakhandhesu ekato uppajjamānesu sāmaññato vuttesu sahajātādisādhāraṇapaccayavasena avisesato sabbe sabbesaṃ paccayāti ayameva imassa paccayo, imasseva ayaṃ paccayoti ca niyametvā vattuṃ na sakkā. Tena vuttaṃ aṭṭhakathāyaṃ ‘‘ekasseva dvinnaṃyeva vā’’tiādi. ‘‘Sukhāya vedanāya sampayuttaṃ dhammaṃ paṭiccā’’tiādīsu pana visesanabhāvena vedanādīnaṃ visuṃ gahitattā ‘‘ekaṃ khandhaṃ paṭicca dve khandhā’’tiādi vattuṃ sakkā. Tena vuttaṃ ‘‘vedanāttikādīsu panā’’tiādi. Tathāti iminā ‘‘ekekassapi dukādibhedānañcā’’ti imaṃ anukaḍḍhati.
зд̇асминд̇и ‘‘вибаагааб̣яаагад̇ам̣ гирияааб̣яаагад̇а’’нд̇и звам̣ вибаагагирияааб̣яаагад̇аг̇г̇ахан̣з. ‘‘саб̣б̣асмим̣ на г̇ахзд̇аб̣б̣а’’нд̇и вуд̇д̇ам̣, гад̇т̇а бана г̇ахзд̇аб̣б̣анд̇и ааха ‘‘жид̇д̇асамудтаанан̃жа руубанд̇и зд̇т̇зваа’’д̇и. звам̣ батамз ваагяз ад̇иб̣яаабид̇ам̣ барихарид̇ваа д̣̇уд̇ияз аб̣яаабид̇ам̣ барихарид̇ум̣ ‘‘на гзвала’’нд̇иаад̣̇и вуд̇д̇ам̣. зд̇т̇аад̇и ‘‘вибаагааб̣яаагад̇ам̣ гирияааб̣яаагад̇а’’нд̇и зд̇т̇а на г̇ахзд̇аб̣б̣ам̣ д̇ассаби ааруббз уббаж̇ж̇амаанасса руубзна винаа уббад̇д̇ид̇о. зд̇т̇а жа яат̇аа хзд̇убажжаяаг̇г̇ахан̣знзва ахзд̇угам̣ нивад̇д̇ид̇ам̣, звам̣ жид̇д̇асамудтаанан̃жа руубанд̇и руубаг̇г̇ахан̣знзва ааруббз вибаагоби д̇ад̇т̇а уббаж̇ж̇амаанзна жид̇д̇уббаад̣̇зна сад̣̇д̇хим̣ на г̇ахид̇о. д̇ам̣ банзд̇ам̣ ад̇т̇асид̣̇д̇хамзва агад̇ваа саруубад̇о баагадад̇арам̣ гад̇ваа д̣̇ассзд̇ум̣ адтагат̇ааяам̣ ‘‘вибаагааб̣яаагад̇а’’нд̇иаад̣̇и вуд̇д̇ам̣. бадисанд̇хибажчимажид̇д̇аани банзд̇т̇а сад̇иби руубасса ануббаад̣̇анз вавад̇т̇аанаабхаавад̇о на г̇ахид̇аанийд̇и д̣̇адтаб̣б̣ам̣.
Etasminti ‘‘vipākābyākataṃ kiriyābyākata’’nti evaṃ vipākakiriyābyākataggahaṇe. ‘‘Sabbasmiṃ na gahetabba’’nti vuttaṃ, kattha pana gahetabbanti āha ‘‘cittasamuṭṭhānañca rūpanti etthevā’’ti. Evaṃ paṭhame vākye atibyāpitaṃ pariharitvā dutiye abyāpitaṃ pariharituṃ ‘‘na kevala’’ntiādi vuttaṃ. Etthāti ‘‘vipākābyākataṃ kiriyābyākata’’nti ettha na gahetabbaṃ tassapi āruppe uppajjamānassa rūpena vinā uppattito. Ettha ca yathā hetupaccayaggahaṇeneva ahetukaṃ nivattitaṃ, evaṃ cittasamuṭṭhānañca rūpanti rūpaggahaṇeneva āruppe vipākopi tattha uppajjamānena cittuppādena saddhiṃ na gahito. Taṃ panetaṃ atthasiddhameva akatvā sarūpato pākaṭataraṃ katvā dassetuṃ aṭṭhakathāyaṃ ‘‘vipākābyākata’’ntiādi vuttaṃ. Paṭisandhipacchimacittāni panettha satipi rūpassa anuppādane vavatthānābhāvato na gahitānīti daṭṭhabbaṃ.
бажжаяабхууд̇ассаад̇и канд̇хаанам̣ бажжаяабхууд̇асса вад̇т̇усса аг̇г̇ахид̇ад̇аабад̇д̇им̣ ниваарзд̇ум̣, гат̇ам̣? бажжаяуббаннабхаавзна, гад̇т̇а? ‘‘гадад̇д̇аа жа рууба’’нд̇и зд̇асмим̣ сааман̃н̃аважанз ‘‘канд̇хз бадижжа вад̇т̇уу’’д̇и вуд̇д̇ам̣, зван̃хисса бажжаяуббаннад̇аа д̣̇ассид̇аа ход̇ийд̇и. ан̃н̃аман̃н̃аабзгкам̣ важанад̣̇ваяанд̇и ‘‘канд̇хз бадижжа вад̇т̇у, вад̇т̇ум̣ бадижжа канд̇хаа’’д̇и бад̣̇ад̣̇ваяам̣ санд̇хааяа вуд̇д̇ам̣. сааман̃н̃зна г̇ахид̇анд̇и ‘‘гадад̇д̇аа жа рууба’’нд̇и иминаа сааман̃н̃аважанзна, гадад̇д̇ааруубасааман̃н̃зна ваа г̇ахид̇ам̣.
Paccayabhūtassāti khandhānaṃ paccayabhūtassa vatthussa aggahitatāpattiṃ nivāretuṃ, kathaṃ? Paccayuppannabhāvena, kattha? ‘‘Kaṭattā ca rūpa’’nti etasmiṃ sāmaññavacane ‘‘khandhe paṭicca vatthū’’ti vuttaṃ, evañhissa paccayuppannatā dassitā hotīti. Aññamaññāpekkhaṃ vacanadvayanti ‘‘khandhe paṭicca vatthu, vatthuṃ paṭicca khandhā’’ti padadvayaṃ sandhāya vuttaṃ. Sāmaññena gahitanti ‘‘kaṭattā ca rūpa’’nti iminā sāmaññavacanena, kaṭattārūpasāmaññena vā gahitaṃ.
убаад̣̇ааруубаг̇г̇ахан̣зна винаа ‘‘убаад̣̇аарууба’’нд̇и аг̇г̇ахзд̇ваа гзвалам̣ жид̇д̇асамудтаанаруубам̣ ‘‘гадад̇д̇ааруубам̣’’ижжзва г̇ахзд̇ваад̇и ад̇т̇о. зд̇асмим̣ бана д̣̇ассанзд̇и ‘‘махаабхууд̇зби бадижжа уббад̇д̇ид̣̇ассанад̇т̇а’’нд̇и вуд̇д̇з зд̇асмим̣ ад̇т̇ад̣̇ассанз. канд̇хабажжаяасахид̇анд̇и бадисанд̇хияам̣ гадад̇д̇ааруубам̣, бавад̇д̇ияам̣ жид̇д̇асамудтаанам̣ руубам̣ вад̣̇ад̇и. асахид̇анд̇и бана бавад̇д̇ияам̣ гадад̇д̇ааруубам̣ аахаарасамудтаанам̣ уд̇усамудтаанам̣ анинд̣̇рияаб̣ад̣̇д̇хам̣ асан̃н̃абхавасан̇г̇ахид̇ан̃жа руубам̣. бадисанд̇хияамбийд̇и би-сад̣̇д̣̇зна бавад̇д̇ияамби гадад̇д̇ааруубам̣ ан̃н̃ан̃жа д̇ад̇т̇а уббаж̇ж̇анагам̣ убаад̣̇ааруубанд̇и ад̇т̇о д̣̇адтаб̣б̣о. гат̇ам̣ банзд̇т̇а бхууд̇з бадижжа уббаж̇ж̇амаанасса руубасса хзд̇убажжаяаа уббаж̇ж̇ад̇ийд̇и? ‘‘канд̇хз бадижжа хзд̇убажжаяаа уббаж̇ж̇амаанам̣ руубам̣ бхууд̇зби бадижжа уббаж̇ж̇ад̇ий’’д̇и звам̣ бад̣̇амзд̇ам̣, бхууд̇аанам̣ ваа хзд̇убажжаяад̇о ниб̣б̣ад̇д̇ад̇д̇аа звам̣ вуд̇д̇ам̣. гааран̣агааран̣амби хи гааран̣анд̇взва вужжад̇и яат̇аа ‘‘жорзхи г̇аамо д̣̇ад̣дхо’’д̇и.
Upādārūpaggahaṇena vinā ‘‘upādārūpa’’nti aggahetvā kevalaṃ cittasamuṭṭhānarūpaṃ ‘‘kaṭattārūpaṃ’’icceva gahetvāti attho. Etasmiṃ pana dassaneti ‘‘mahābhūtepi paṭicca uppattidassanattha’’nti vutte etasmiṃ atthadassane. Khandhapaccayasahitanti paṭisandhiyaṃ kaṭattārūpaṃ, pavattiyaṃ cittasamuṭṭhānaṃ rūpaṃ vadati. Asahitanti pana pavattiyaṃ kaṭattārūpaṃ āhārasamuṭṭhānaṃ utusamuṭṭhānaṃ anindriyabaddhaṃ asaññabhavasaṅgahitañca rūpaṃ. Paṭisandhiyampīti pi-saddena pavattiyampi kaṭattārūpaṃ aññañca tattha uppajjanakaṃ upādārūpanti attho daṭṭhabbo. Kathaṃ panettha bhūte paṭicca uppajjamānassa rūpassa hetupaccayā uppajjatīti? ‘‘Khandhe paṭicca hetupaccayā uppajjamānaṃ rūpaṃ bhūtepi paṭicca uppajjatī’’ti evaṃ padametaṃ, bhūtānaṃ vā hetupaccayato nibbattattā evaṃ vuttaṃ. Kāraṇakāraṇampi hi kāraṇantveva vuccati yathā ‘‘corehi gāmo daḍḍho’’ti.
бхууд̇з бадижжа убаад̣̇ааруубанд̇и бад̣̇уд̣̇д̇хааро гад̇о, ‘‘махаабхууд̇з бадижжа убаад̣̇аарууба’’нд̇и бана баатод̇и адтагат̇ааяан̃жа д̇амзва вуд̇д̇ам̣. аяам̣ хзд̇т̇ад̇т̇о – ‘‘махаабхууд̇з бадижжа убаад̣̇аарууба’’нд̇и имасмим̣ баатз вуд̇д̇анаязна убаад̣̇ааруубамби гусалз канд̇хз махаабхууд̇з жа бадижжа уббаж̇ж̇ад̇ийд̇и. го бана со наяод̇и д̇ам̣ д̣̇ассзд̇ум̣ ‘‘махаабхууд̇з…бз… санд̇хааяаахаа’’д̇и вуд̇д̇ам̣. д̇ад̇т̇а ад̇т̇ад̇о аяам̣ наяо вуд̇д̇од̇и ‘‘махаабхууд̇з бадижжа жид̇д̇асамудтаанам̣ руубам̣ гадад̇д̇ааруубам̣ убаад̣̇аарууба’’нд̇и иминаа аб̣яаагад̇з канд̇хз махаабхууд̇з жа бадижжа убаад̣̇ааруубаанам̣ уббад̇д̇иважанзна гусалз канд̇хз махаабхууд̇з жа бадижжа убаад̣̇ааруубаанам̣ уббад̇д̇и ад̇т̇ад̇о вуд̇д̇о ход̇ийд̇и ад̇т̇о.
Bhūte paṭicca upādārūpanti paduddhāro kato, ‘‘mahābhūte paṭicca upādārūpa’’nti pana pāṭhoti aṭṭhakathāyañca tameva vuttaṃ. Ayaṃ hetthattho – ‘‘mahābhūte paṭicca upādārūpa’’nti imasmiṃ pāṭhe vuttanayena upādārūpampi kusale khandhe mahābhūte ca paṭicca uppajjatīti. Ko pana so nayoti taṃ dassetuṃ ‘‘mahābhūte…pe… sandhāyāhā’’ti vuttaṃ. Tattha atthato ayaṃ nayo vuttoti ‘‘mahābhūte paṭicca cittasamuṭṭhānaṃ rūpaṃ kaṭattārūpaṃ upādārūpa’’nti iminā abyākate khandhe mahābhūte ca paṭicca upādārūpānaṃ uppattivacanena kusale khandhe mahābhūte ca paṭicca upādārūpānaṃ uppatti atthato vutto hotīti attho.
54. руубзна винаа бажжаяуббаннам̣ на лаб̣бхад̇ийд̇и зд̇зна яаа бужчаа аруубамиссагаавасаанаа, д̇ааби ид̇ха на г̇аяханд̇и, баг̇зва руубаавасаанаад̇и д̣̇ассзд̇и.
54. Rūpenavinā paccayuppannaṃ na labbhatīti etena yā pucchā arūpamissakāvasānā, tāpi idha na gayhanti, pageva rūpāvasānāti dasseti.
57. д̇ааяа самааналагкан̣аад̇и бан̃жагканд̇хабадисанд̇хид̇ааяа г̇аб̣бхасзяяагабадисанд̇хияаа самааналагкан̣аа. барибун̣н̣ад̇хаммаананд̇и барияад̇д̇ивибхааг̇аанам̣ бан̃жагканд̇хад̇хаммаанам̣. зд̇т̇аад̇и зд̇асмим̣ сахаж̇аад̇абажжаяанид̣̇д̣̇зсз.
57. Tāya samānalakkhaṇāti pañcakkhandhapaṭisandhitāya gabbhaseyyakapaṭisandhiyā samānalakkhaṇā. Paripuṇṇadhammānanti pariyattivibhāgānaṃ pañcakkhandhadhammānaṃ. Etthāti etasmiṃ sahajātapaccayaniddese.
жид̇д̇агаммасамудтаанаруубанд̇и жид̇д̇асамудтаанаруубам̣ гаммасамудтаанаруубан̃жа. буна аахаарасамудтаананд̇и зд̇т̇а бунаг̇ахан̣ам̣ уд̇усамудтаанаабзгкам̣. на хи д̇ам̣ буб̣б̣з б̣аахираг̇г̇ахан̣зна аг̇г̇ахид̇ам̣, аахаарасамудтаанам̣ бана аг̇г̇ахид̇амзва, уд̇усамудтаанасса гасмаа бунаг̇ахан̣анд̇и ааха ‘‘зд̇зхий’’д̇иаад̣̇и. д̇ад̇т̇аад̇и асан̃н̃асад̇д̇зсу. д̇ассаад̇и уд̇усамудтаанасса. аад̣̇имхийд̇и б̣аахирааахаарасамудтаанауд̇усамудтаанаасан̃н̃асад̇д̇авасзна ааг̇ад̇аваарзхи батамаваарз. ависзсаважананд̇и б̣аахираад̣̇ивисзсам̣ агад̇ваа вуд̇д̇аважанам̣, аруубамби бажжаяам̣ лабханд̇ам̣ ад̇т̇ам̣ хзд̇аад̣̇игз бажжаяз лабханд̇ам̣ саха сан̇г̇ан̣хид̇ваад̇и яож̇анаа. д̇ассаад̇и, д̇ад̇т̇аад̇и жа бад̣̇ад̣̇ваязна яат̇аавуд̇д̇ам̣ батамаваарамзва бажжаамасад̇и. д̇ам̣самаанаг̇ад̇иганд̇и жид̇д̇асамудтаанаг̇ад̇игам̣. ид̇хаабийд̇и имасмим̣ сахаж̇аад̇абажжаяанид̣̇д̣̇зсзби. гаммабажжаяавибхан̇г̇з вияаад̇и наанаагкан̣игагаммабажжаяанид̣̇д̣̇зсз вияа. д̇ат̇аа хи вуд̇д̇ам̣ адтагат̇ааяам̣ ‘‘д̇ам̣самудтаананд̇и иминаа бадисанд̇хигкан̣з гадад̇д̇ааруубамби сан̇г̇ан̣хаад̇ий’’д̇и. аяан̃жа ад̇т̇ависзсо зд̇т̇а згам̣сзна ижчид̇аб̣б̣од̇и д̣̇ассзнд̇о ‘‘на хи…бз… ад̇т̇ий’’д̇и ааха.
Cittakammasamuṭṭhānarūpanti cittasamuṭṭhānarūpaṃ kammasamuṭṭhānarūpañca. Puna āhārasamuṭṭhānanti ettha punagahaṇaṃ utusamuṭṭhānāpekkhaṃ. Na hi taṃ pubbe bāhiraggahaṇena aggahitaṃ, āhārasamuṭṭhānaṃ pana aggahitameva, utusamuṭṭhānassa kasmā punagahaṇanti āha ‘‘etehī’’tiādi. Tatthāti asaññasattesu. Tassāti utusamuṭṭhānassa. Ādimhīti bāhiraāhārasamuṭṭhānautusamuṭṭhānaasaññasattavasena āgatavārehi paṭhamavāre. Avisesavacananti bāhirādivisesaṃ akatvā vuttavacanaṃ, arūpampi paccayaṃ labhantaṃ atthaṃ hetādike paccaye labhantaṃ saha saṅgaṇhitvāti yojanā. Tassāti, tatthāti ca padadvayena yathāvuttaṃ paṭhamavārameva paccāmasati. Taṃsamānagatikanti cittasamuṭṭhānagatikaṃ. Idhāpīti imasmiṃ sahajātapaccayaniddesepi. Kammapaccayavibhaṅge viyāti nānākkhaṇikakammapaccayaniddese viya. Tathā hi vuttaṃ aṭṭhakathāyaṃ ‘‘taṃsamuṭṭhānanti iminā paṭisandhikkhaṇe kaṭattārūpampi saṅgaṇhātī’’ti. Ayañca atthaviseso ettha ekaṃsena icchitabboti dassento ‘‘na hi…pe… atthī’’ti āha.
ависзсзд̇ваад̇и ‘‘уд̇усамудтаана’’нд̇иаад̣̇инаа висзсам̣ агад̇ваа. убаад̣̇ааруубанд̇и висзсзд̇ваава гасмаа бана вуд̇д̇аанийд̇и яож̇анаа. хзд̇убажжаяаад̣̇ийсууд̇и аад̣̇и-сад̣̇д̣̇зна сахаж̇аад̇абажжаяаад̣̇им̣ сан̇г̇ан̣хаад̇и. сахаад̇и жид̇д̇асамудтаанаруубам̣ гадад̇д̇ааруубанд̇и звам̣ згад̇о. висунд̇и жид̇д̇асамудтаанам̣ руубам̣ гадад̇д̇ааруубад̇о висзсзд̇ваа. д̇ад̇т̇а б̣аахираг̇г̇ахан̣аад̣̇ийхи вияаад̇и яат̇аа ‘‘б̣аахирам̣ згам̣ махаабхууд̇а’’нд̇иаад̣̇ийсу б̣аахирааахаарасамудтаанауд̇усамудтаанаг̇г̇ахан̣зхи махаабхууд̇аани висзсид̇аани, звам̣ зд̇т̇а ‘‘махаабхууд̇з бадижжаа’’д̇и зд̇асмим̣ нид̣̇д̣̇зсз махаабхууд̇аанам̣ гзнажи висзсанзна ависзсид̇ад̇д̇аа жид̇д̇асамудтаанаруубабхаавагадад̇д̇ааруубабхаавзхи висзсзд̇ваава вуд̇д̇аанийд̇и яож̇анаа.
Avisesetvāti ‘‘utusamuṭṭhāna’’ntiādinā visesaṃ akatvā. Upādārūpanti visesetvāva kasmā pana vuttānīti yojanā. Hetupaccayādīsūti ādi-saddena sahajātapaccayādiṃ saṅgaṇhāti. Sahāti cittasamuṭṭhānarūpaṃ kaṭattārūpanti evaṃ ekato. Visunti cittasamuṭṭhānaṃ rūpaṃ kaṭattārūpato visesetvā. Tattha bāhiraggahaṇādīhi viyāti yathā ‘‘bāhiraṃ ekaṃ mahābhūta’’ntiādīsu bāhiraāhārasamuṭṭhānautusamuṭṭhānaggahaṇehi mahābhūtāni visesitāni, evaṃ ettha ‘‘mahābhūte paṭiccā’’ti etasmiṃ niddese mahābhūtānaṃ kenaci visesanena avisesitattā cittasamuṭṭhānarūpabhāvakaṭattārūpabhāvehi visesetvāva vuttānīti yojanā.
ид̣̇аани ан̃н̃знаби гааран̣зна д̇зсам̣ висзсид̇аб̣б̣ад̇ам̣ д̣̇ассзд̇ум̣ ‘‘абижаа’’д̇иаад̣̇и вуд̇д̇ам̣. д̇ад̇т̇а на гожи бажжаяод̇и ид̣̇ам̣ бадтаанз ааг̇ад̇анияаамзна руубам̣ убаниссаяабажжаяам̣ на лабхад̇ийд̇и гад̇ваа вуд̇д̇ам̣. д̇знааха ‘‘хзд̇аад̣̇ийсуу’’д̇и. д̇ад̣̇авинаабхаавад̇о бана д̇асса жид̇д̇агаммаанам̣ гааран̣абхааво взд̣̇ид̇аб̣б̣о, яад̇о ид̣̇д̇хижид̇д̇аниб̣б̣ад̇д̇аани гаммабажжаяаани жаад̇и вуд̇д̇аани. нану жид̇д̇ам̣ аахаарауд̇усамудтаанаанам̣ бажжаяо ход̇ийд̇и? сажжам̣ ход̇и, со бана убад̇т̇амбхагад̇д̇зна, на ж̇анагад̇д̇знаад̇и д̣̇ассзнд̇о ааха ‘‘аахаара…бз… ж̇анага’’нд̇и . гим̣ бана д̇зсам̣ ж̇анаганд̇и ааха ‘‘махаабхууд̇аанзва…бз… ж̇анагааний’’д̇и. жид̇д̇зна гаммунаа жа винаа абхаавз яат̇ааггамам̣ жид̇д̇агаммасамудтаанаубаад̣̇ааруубаананд̇и ад̇т̇о. жид̇д̇асамудтаанаруубагадад̇д̇ааруубабхууд̇аанзваад̇и жид̇д̇агаммасамудтаанамахаабхууд̇аниб̣б̣ад̇д̇аанзва махаабхууд̇аанам̣ д̇зсам̣ аасаннагааран̣ад̇д̇аа. ан̃н̃аанийд̇и уд̇уаахаарасамудтаанаани убаад̣̇ааруубаани вад̣̇ад̇и. висзсанам̣ гад̇ам̣ ‘‘жид̇д̇асамудтаанам̣ руубам̣ гадад̇д̇ааруубам̣ убаад̣̇аарууба’’нд̇и. самаанаж̇аад̇игзна руубзна уд̇унаа аахаарзна жаад̇и ад̇т̇о. баагадависзсанаанзваад̇и ид̣̇ам̣ язхи махаабхууд̇зхи д̇аани ниб̣б̣ад̇д̇аани, д̇зсам̣ ‘‘аахаарасамудтаанам̣ уд̇усамудтаана’’нд̇и висзсид̇ад̇д̇аа вуд̇д̇ам̣. на висзсанам̣ араханд̇и на висзсид̇аб̣б̣аани гааран̣ависзсанзнзва висзсасса сид̣̇д̇хад̇д̇аа, ‘‘махаабхууд̇з бадижжа убаад̣̇аарууба’’нд̇взва вад̇д̇аб̣б̣анд̇и ад̇т̇о. зд̇аани бана жид̇д̇аж̇агаммаж̇аруубаани.
Idāni aññenapi kāraṇena tesaṃ visesitabbataṃ dassetuṃ ‘‘apicā’’tiādi vuttaṃ. Tattha nakoci paccayoti idaṃ paṭṭhāne āgataniyāmena rūpaṃ upanissayapaccayaṃ na labhatīti katvā vuttaṃ. Tenāha ‘‘hetādīsū’’ti. Tadavinābhāvato pana tassa cittakammānaṃ kāraṇabhāvo veditabbo, yato iddhicittanibbattāni kammapaccayāni cāti vuttāni. Nanu cittaṃ āhārautusamuṭṭhānānaṃ paccayo hotīti? Saccaṃ hoti, so pana upatthambhakattena, na janakattenāti dassento āha ‘‘āhāra…pe… janaka’’nti . Kiṃ pana tesaṃ janakanti āha ‘‘mahābhūtāneva…pe… janakānī’’ti. Cittena kammunā ca vinā abhāve yathākkamaṃ cittakammasamuṭṭhānaupādārūpānanti attho. Cittasamuṭṭhānarūpakaṭattārūpabhūtānevāti cittakammasamuṭṭhānamahābhūtanibbattāneva mahābhūtānaṃ tesaṃ āsannakāraṇattā. Aññānīti utuāhārasamuṭṭhānāni upādārūpāni vadati. Visesanaṃ kataṃ ‘‘cittasamuṭṭhānaṃ rūpaṃ kaṭattārūpaṃ upādārūpa’’nti. Samānajātikena rūpena utunā āhārena cāti attho. Pākaṭavisesanānevāti idaṃ yehi mahābhūtehi tāni nibbattāni, tesaṃ ‘‘āhārasamuṭṭhānaṃ utusamuṭṭhāna’’nti visesitattā vuttaṃ. Na visesanaṃ arahanti na visesitabbāni kāraṇavisesaneneva visesassa siddhattā, ‘‘mahābhūte paṭicca upādārūpa’’ntveva vattabbanti attho. Etāni pana cittajakammajarūpāni.
сависзсзнаад̇и язна висзсзна висзсид̇аа, д̇ам̣ д̣̇ассзнд̇о жид̇д̇ам̣ санд̇хааяааха ‘‘сахаж̇аад̇аад̣̇ибажжаяабхаавад̇о’’д̇и, ид̇арам̣ бана санд̇хааяа ‘‘муулагааран̣абхаавад̇о’’д̇и, гаммуубаниссаяабажжаяабхаавад̇од̇и ад̇т̇о. ид̇араанийд̇и аахаарауд̇усамудтаанааниби убаад̣̇ааруубаани. махаабхууд̇ависзсанзнзва висзсид̇аанийд̇и ‘‘аахаарасамудтаанам̣ згам̣ махаабхууд̇ам̣ бадижжа уд̇усамудтаанам̣ згам̣ махаабхууд̇ам̣ бадижжаа’’д̇и махаабхууд̇ависзсанзнзва ж̇анагабажжаязна аахаарзна уд̇унаа жа висзсид̇аани. ид̇хаад̇и ‘‘жид̇д̇асамудтаанам̣ руубам̣ гадад̇д̇ааруубам̣ убаад̣̇аарууба’’нд̇и имасмим̣ важанз. зд̇т̇а хи убаад̣̇ааруубаанам̣ жид̇д̇агаммасамудтаанад̇ааважанзна д̇ам̣ниссаяаанамби д̇аб̣бхааво багаасид̇од̇и. ан̃н̃ад̇арависзсанам̣ убхаяависзсанам̣ ход̇и убхаязсам̣ авиниб̣бхог̇зна бавад̇д̇анад̇о.
Savisesenāti yena visesena visesitā, taṃ dassento cittaṃ sandhāyāha ‘‘sahajātādipaccayabhāvato’’ti, itaraṃ pana sandhāya ‘‘mūlakāraṇabhāvato’’ti, kammūpanissayapaccayabhāvatoti attho. Itarānīti āhārautusamuṭṭhānānipi upādārūpāni. Mahābhūtavisesaneneva visesitānīti ‘‘āhārasamuṭṭhānaṃ ekaṃ mahābhūtaṃ paṭicca utusamuṭṭhānaṃ ekaṃ mahābhūtaṃ paṭiccā’’ti mahābhūtavisesaneneva janakapaccayena āhārena utunā ca visesitāni. Idhāti ‘‘cittasamuṭṭhānaṃ rūpaṃ kaṭattārūpaṃ upādārūpa’’nti imasmiṃ vacane. Ettha hi upādārūpānaṃ cittakammasamuṭṭhānatāvacanena taṃnissayānampi tabbhāvo pakāsitoti. Aññataravisesanaṃ ubhayavisesanaṃ hoti ubhayesaṃ avinibbhogena pavattanato.
58. буб̣б̣зд̇и хзд̇убажжаяаад̣̇ийсу. висум̣ бажжаяабхаавзнаад̇и ‘‘бадисанд̇хигкан̣з вибаагааб̣яаагад̇ам̣ згам̣ канд̇хам̣ бадижжа д̇аяо канд̇хаа гадад̇д̇аа жа рууба’’нд̇иаад̣̇инаа вад̇т̇усса висум̣ бажжаяабхаавзна. зд̇т̇а жа висум̣язва бажжаяабхаавзна д̣̇ассид̇аанийд̇и на саггаа вад̇д̇ум̣, ‘‘канд̇хз бадижжа вад̇т̇у, вад̇т̇ум̣ бадижжа канд̇хаа’’д̇и бажжаяуббаннабхааво вияа канд̇хаанам̣ згад̇оби бажжаяабхааво д̣̇ассид̇о. д̇знзва хи д̇асмим̣ ад̇т̇з ад̇д̇ано аружим̣ вибхаавзнд̇о ааха ‘‘иминаа ад̇хиббааязнаахаа’’д̇и. яо банад̇т̇о ад̇д̇ано ружжад̇и, д̇ам̣ д̣̇ассзд̇ум̣ ‘‘канд̇хз бадижжа вад̇т̇ууд̇и ид̣̇ам̣ банаа’’д̇иаад̣̇и вуд̇д̇ам̣. канд̇хаанам̣ бажжаяабхууд̇аанам̣ бадижжадтапаран̣ад̇аад̣̇ассанам̣ , вад̇т̇усса бажжаяабхууд̇асса бадижжадтапаран̣ад̇аад̣̇ассанам̣, на канд̇хаананд̇и самб̣анд̇хо. ид̇хзваад̇и имасмим̣ ан̃н̃аман̃н̃абажжаяз зва. хзд̇убажжаяаад̣̇ийсуби аяамзва наяо, д̇ад̇т̇а хи бадижжадтапаран̣асса самаанад̇аа. д̣̇ассид̇ааяа бадижжадтад̣̇ваяапаран̣ад̇ааяа. канд̇хавад̇т̇уунан̃жа д̣̇ассид̇ааязваад̇и канд̇хавад̇т̇уунан̃жа згад̇о бадижжадтапаран̣ад̇аа д̣̇ассид̇ааязва.
58. Pubbeti hetupaccayādīsu. Visuṃ paccayabhāvenāti ‘‘paṭisandhikkhaṇe vipākābyākataṃ ekaṃ khandhaṃ paṭicca tayo khandhā kaṭattā ca rūpa’’ntiādinā vatthussa visuṃ paccayabhāvena. Ettha ca visuṃyeva paccayabhāvena dassitānīti na sakkā vattuṃ, ‘‘khandhe paṭicca vatthu, vatthuṃ paṭicca khandhā’’ti paccayuppannabhāvo viya khandhānaṃ ekatopi paccayabhāvo dassito. Teneva hi tasmiṃ atthe attano aruciṃ vibhāvento āha ‘‘iminā adhippāyenāhā’’ti. Yo panattho attano ruccati, taṃ dassetuṃ ‘‘khandhe paṭicca vatthūti idaṃ panā’’tiādi vuttaṃ. Khandhānaṃ paccayabhūtānaṃ paṭiccaṭṭhapharaṇatādassanaṃ , vatthussa paccayabhūtassa paṭiccaṭṭhapharaṇatādassanaṃ, na khandhānanti sambandho. Idhevāti imasmiṃ aññamaññapaccaye eva. Hetupaccayādīsupi ayameva nayo, tattha hi paṭiccaṭṭhapharaṇassa samānatā. Dassitāya paṭiccaṭṭhadvayapharaṇatāya. Khandhavatthūnañca dassitāyevāti khandhavatthūnañca ekato paṭiccaṭṭhapharaṇatā dassitāyeva.
звамаад̣̇ийд̇и аад̣̇и-сад̣̇д̣̇зна ‘‘агусалам̣ д̇хаммам̣ бадижжаа’’д̇и звамаад̣̇и сан̇г̇аяхад̇и. нану бхавид̇аб̣б̣анд̇и яож̇анаа. хзд̇убажжаяаад̣̇ийхи вияаад̇и сад̣̇исууд̣̇аахаран̣анд̇и д̇ам̣ д̣̇ассзнд̇о ‘‘на хий’’д̇иаад̣̇имааха. яам̣ ‘‘згам̣, д̇аяо, д̣̇вз жа канд̇хз бадижжаа’’д̇и вуд̇д̇ам̣ бажжаяаж̇аад̇анд̇и ад̇т̇о. бажжаяадто хи бадижжадто. д̇знааха ‘‘д̇з хзд̇убажжаяабхууд̇аа зва на хонд̇ий’’д̇и. зд̇зна на бадижжадтапаран̣агасса зганд̇иго хзд̇уаад̣̇ибажжаяабхаавод̇и д̣̇ассзд̇и. д̇знааха ‘‘зса наяо аарамман̣абажжаяаад̣̇ийсуу’’д̇и. на хи аарамман̣абажжаяабхууд̇о д̇хаммо бадижжадтам̣ парад̇и. вуд̇д̇ан̃жа ‘‘гусалам̣ д̇хаммам̣ бадижжа гусало д̇хаммо уббаж̇ж̇ад̇и аарамман̣абажжаяаа’’д̇и.
Evamādīti ādi-saddena ‘‘akusalaṃ dhammaṃ paṭiccā’’ti evamādi saṅgayhati. Nanu bhavitabbanti yojanā. Hetupaccayādīhi viyāti sadisūdāharaṇanti taṃ dassento ‘‘na hī’’tiādimāha. Yaṃ ‘‘ekaṃ, tayo, dve ca khandhe paṭiccā’’ti vuttaṃ paccayajātanti attho. Paccayaṭṭho hi paṭiccaṭṭho. Tenāha ‘‘te hetupaccayabhūtā eva na hontī’’ti. Etena na paṭiccaṭṭhapharaṇakassa ekantiko hetuādipaccayabhāvoti dasseti. Tenāha ‘‘esa nayo ārammaṇapaccayādīsū’’ti. Na hi ārammaṇapaccayabhūto dhammo paṭiccaṭṭhaṃ pharati. Vuttañca ‘‘kusalaṃ dhammaṃ paṭicca kusalo dhammo uppajjati ārammaṇapaccayā’’ti.
бажжаяанд̇арзнаби убагаарагад̇аамад̇д̇амби г̇ахзд̇ваа бадижжаваарз вааранд̇арз жа хзд̇уаад̣̇ибажжаяаа д̣̇ассид̇аад̇и убажаязна яат̇аавуд̇д̇ам̣ вибхаавзнд̇о ‘‘бажжаяаваарз жаа’’д̇иаад̣̇имааха. д̇ам̣бажжаяаад̇и вад̇т̇убажжаяаа, яат̇аарахам̣ бажжаяабхууд̇ам̣ вад̇т̇ум̣ лабхид̇ваад̇и ад̇т̇о. д̇зд̇и гусалз канд̇хз бадижжа. д̇зсанд̇и махаабхууд̇аанам̣ канд̇хаанам̣. бажжаяабхааваабхаавад̇од̇и ид̣̇ам̣ канд̇хаанам̣ хзд̇усахаж̇аад̇аад̣̇ибажжаяабхаавасса махаабхууд̇зсу д̣̇идтад̇д̇аа вуд̇д̇ам̣. яад̣̇и звам̣ ан̃н̃аман̃н̃абажжаяааби д̇з д̇зсам̣ бхавзяяунд̇и барасса аасан̇ганираасан̇гам̣ гаронд̇о ‘‘ан̃н̃аман̃н̃асад̣̇д̣̇о хий’’д̇иаад̣̇имааха. нирабзгкод̇и ан̃н̃анирабзгко. на хи хзд̇уд̇хаммо д̇хамманд̇араабзгко худ̇ваа хзд̇убажжаяо ход̇и, сад̣̇д̣̇асийсзнзд̇т̇а ад̇т̇о вуд̇д̇о. ан̃н̃ад̇араабзгкод̇и ад̇д̇анаа сахагааригааран̣абхууд̇ам̣, ид̇арам̣ ваа яам̣ гин̃жи ан̃н̃ад̇арам̣ абзгкад̇ийд̇и ан̃н̃ад̇араабзгко. яат̇аавуд̇д̇зд̇арзд̇араабзгкод̇и аруубагканд̇хаад̣̇ибхзд̣̇ам̣ баал̣ияам̣ вуд̇д̇аббагаарам̣ ид̇арзд̇арам̣ мит̇у бажжаяабхууд̇ам̣ абзгкад̇ийд̇и ид̇арзд̇араабзгко. бажжаяабажжаяуббаннаа жа канд̇хаа махаабхууд̇аа ид̇ха яат̇аавуд̇д̇аа бхавзяяунд̇и гасмаа вуд̇д̇ам̣. на хи канд̇хаа махаабхууд̇аа ан̃н̃аман̃н̃ам̣ ан̃н̃аман̃н̃абажжаяабхаавзна вуд̇д̇аа, ат̇а канд̇хаа жа махаабхууд̇аа жаад̇и висум̣ висум̣ г̇аяхзяяум̣, звам̣ сад̇и ‘‘махаабхууд̇аа канд̇хаанам̣ на гожи бажжаяо’’д̇и на вад̇д̇аб̣б̣ам̣.
Paccayantarenapi upakārakatāmattampi gahetvā paṭiccavāre vārantare ca hetuādipaccayā dassitāti upacayena yathāvuttaṃ vibhāvento ‘‘paccayavāre cā’’tiādimāha. Taṃpaccayāti vatthupaccayā, yathārahaṃ paccayabhūtaṃ vatthuṃ labhitvāti attho. Teti kusale khandhe paṭicca. Tesanti mahābhūtānaṃ khandhānaṃ. Paccayabhāvābhāvatoti idaṃ khandhānaṃ hetusahajātādipaccayabhāvassa mahābhūtesu diṭṭhattā vuttaṃ. Yadi evaṃ aññamaññapaccayāpi te tesaṃ bhaveyyunti parassa āsaṅkanirāsaṅkaṃ karonto ‘‘aññamaññasaddo hī’’tiādimāha. Nirapekkhoti aññanirapekkho. Na hi hetudhammo dhammantarāpekkho hutvā hetupaccayo hoti, saddasīsenettha attho vutto. Aññatarāpekkhoti attanā sahakārikāraṇabhūtaṃ, itaraṃ vā yaṃ kiñci aññataraṃ apekkhatīti aññatarāpekkho. Yathāvuttetaretarāpekkhoti arūpakkhandhādibhedaṃ pāḷiyaṃ vuttappakāraṃ itaretaraṃ mithu paccayabhūtaṃ apekkhatīti itaretarāpekkho. Paccayapaccayuppannā ca khandhā mahābhūtā idha yathāvuttā bhaveyyunti kasmā vuttaṃ. Na hi khandhā mahābhūtā aññamaññaṃ aññamaññapaccayabhāvena vuttā, atha khandhā ca mahābhūtā cāti visuṃ visuṃ gayheyyuṃ, evaṃ sati ‘‘mahābhūtā khandhānaṃ na koci paccayo’’ti na vattabbaṃ.
яасса саяам̣ бажжаяо, д̇ад̇о д̇зна д̇анниссид̇зна ваад̇и яасса д̇хаммасса саяам̣ ад̇д̇анаа бажжаяо ход̇и, д̇ад̇о д̇хаммад̇о саяам̣ уббаж̇ж̇амаанам̣ гат̇ам̣ д̇зна д̇хаммзна д̇анниссид̇зна ваа ан̃н̃аман̃н̃абажжаязна звам̣бхууд̇ам̣ д̇ам̣ д̇хаммаж̇аад̇ам̣ ан̃н̃аман̃н̃абажжаяаа уббаж̇ж̇ад̇ийд̇и вад̇д̇аб̣б̣ад̇ам̣ арахад̇ийд̇и вуд̇д̇амзвад̇т̇ам̣ уд̣̇аахаран̣зна вибхаавзд̇и ‘‘яат̇аа’’д̇иаад̣̇инаа. д̇ад̇т̇а ‘‘канд̇хз бадижжа канд̇хаа’’д̇и ид̣̇ам̣ ‘‘д̇зна ан̃н̃аман̃н̃абажжаязна уббаж̇ж̇амаана’’нд̇и имасса уд̣̇аахаран̣ам̣, ‘‘вад̇т̇ум̣ бажжаяаа канд̇хаа’’д̇и ид̣̇ам̣ бана ‘‘д̇анниссид̇зна ан̃н̃аман̃н̃абажжаязна уббаж̇ж̇амаана’’нд̇и зд̇асса. д̇асмаад̇и вуд̇д̇амзва ад̇т̇ам̣ гааран̣абхаавзна бажжаамасад̇и. ад̇д̇ано бажжаяасса бажжаяад̇д̇аабхаавад̇од̇и ад̇д̇ано бажжаяабхууд̇асса аруубагканд̇хасса бажжаяабхааваабхаавад̇о. на хи махаабхууд̇аа яад̇о канд̇хад̇о уббаннаа, д̇зсам̣ бажжаяаа хонд̇и. д̇ад̣̇абзгкад̇д̇аад̇и ид̇арзд̇арабажжаяабхааваабзгкад̇д̇аа. канд̇хз бадижжа бажжаяаа жаад̇и бадижжаваарз вуд̇д̇анияаамзнзва канд̇хз бадижжа, бажжаяаваарз вуд̇д̇анияаамзна канд̇хз бажжаяаа жа. наан̃н̃аман̃н̃абажжаяаа жа вуд̇д̇аад̇и ан̃н̃аман̃н̃абажжаяад̇о ан̃н̃асмаа ниссаяабажжаяаад̣̇ид̇о махаабхууд̇аанам̣ уббад̇д̇и вуд̇д̇аа жаад̇и ад̇т̇о. вад̇т̇ум̣ бажжаяаа уббаж̇ж̇амаанаад̇и вад̇т̇ум̣ бурзж̇аад̇абажжаяам̣ гад̇ваа уббаж̇ж̇амаанаа. д̇анниссид̇зна жа ан̃н̃аман̃н̃абажжаязнаад̇и д̇ам̣ вад̇т̇ум̣ ниссид̇зна канд̇хзна ан̃н̃аман̃н̃абажжаяабхууд̇зна уббаж̇ж̇анд̇и, д̇асмаа яат̇аавуд̇д̇зна гааран̣зна вад̇т̇ум̣ бажжаяаа…бз… вуд̇д̇аа, иминаа барияааязна бана уж̇угам̣ бавад̇д̇ияам̣ вад̇т̇усса ан̃н̃аман̃н̃абажжаяабхаавод̇и ад̇т̇о.
Yassasayaṃ paccayo, tato tena tannissitena vāti yassa dhammassa sayaṃ attanā paccayo hoti, tato dhammato sayaṃ uppajjamānaṃ kathaṃ tena dhammena tannissitena vā aññamaññapaccayena evaṃbhūtaṃ taṃ dhammajātaṃ aññamaññapaccayā uppajjatīti vattabbataṃ arahatīti vuttamevatthaṃ udāharaṇena vibhāveti ‘‘yathā’’tiādinā. Tattha ‘‘khandhe paṭicca khandhā’’ti idaṃ ‘‘tena aññamaññapaccayena uppajjamāna’’nti imassa udāharaṇaṃ, ‘‘vatthuṃ paccayā khandhā’’ti idaṃ pana ‘‘tannissitena aññamaññapaccayena uppajjamāna’’nti etassa. Tasmāti vuttameva atthaṃ kāraṇabhāvena paccāmasati. Attano paccayassa paccayattābhāvatoti attano paccayabhūtassa arūpakkhandhassa paccayabhāvābhāvato. Na hi mahābhūtā yato khandhato uppannā, tesaṃ paccayā honti. Tadapekkhattāti itaretarapaccayabhāvāpekkhattā. Khandhe paṭicca paccayā cāti paṭiccavāre vuttaniyāmeneva khandhe paṭicca, paccayavāre vuttaniyāmena khandhe paccayā ca. Naaññamaññapaccayā ca vuttāti aññamaññapaccayato aññasmā nissayapaccayādito mahābhūtānaṃ uppatti vuttā cāti attho. Vatthuṃ paccayā uppajjamānāti vatthuṃ purejātapaccayaṃ katvā uppajjamānā. Tannissitena ca aññamaññapaccayenāti taṃ vatthuṃ nissitena khandhena aññamaññapaccayabhūtena uppajjanti, tasmā yathāvuttena kāraṇena vatthuṃ paccayā…pe… vuttā, iminā pariyāyena pana ujukaṃ pavattiyaṃ vatthussa aññamaññapaccayabhāvoti attho.
59. саа на г̇ахид̇аад̇и яаа ‘‘жагкааяад̇анам̣ ниссааяаа’’д̇иаад̣̇инаа жагкааяад̇анаад̣̇ийнам̣ ниссаяабажжаяад̇аа вуд̇д̇аа, саа ид̇ха бадижжаваарз на вуд̇д̇аад̇и ад̇т̇о сахаж̇аад̇ад̇т̇о бадижжад̇т̇од̇и гад̇ваа. д̇знааха ‘‘жагкааяад̇анаад̣̇ийни…бз… ад̇хиббааяо’’д̇и. язсам̣ бана аруубагканд̇хамахаабхууд̇анаамаруубажид̇д̇ажзд̇асигамахаабхууд̇аруубид̇хаммаанам̣ васзна чад̇хаа ниссаяабажжаяо ижчид̇о, д̇зсам̣ васзна ид̇ха вибхад̇д̇о зва. гат̇ам̣ руубивасзна вибхад̇д̇од̇и жз? ‘‘вад̇т̇ум̣ бадижжа канд̇хаа’’д̇и хад̣̇аяавад̇т̇увасзна саруубад̇о д̣̇ассид̇о зва. ид̇арзсамби васзна ‘‘аб̣яаагад̇ам̣ д̇хаммам̣ бадижжа аб̣яаагад̇о д̇хаммо уббаж̇ж̇ад̇и ниссаяабажжаяаа’’д̇и зд̇т̇а д̣̇ассид̇о. яат̇аа хи ‘‘гусалам̣ д̇хаммам̣ бадижжа гусало д̇хаммо уббаж̇ж̇ад̇и аарамман̣абажжаяаа’’д̇иаад̣̇ийсу руубааяад̇анаад̣̇ийнам̣ асад̇иби бадижжадтапаран̣з аарамман̣абажжаяабхааво д̣̇ассид̇о ход̇и, звамид̇хааби жагкааяад̇анаад̣̇ийнам̣ ниссаяабажжаяабхааво д̣̇ассид̇о ход̇и. д̇зна вуд̇д̇ам̣ ‘‘ниссаяа…бз… на г̇ахид̇ааний’’д̇и.
59. Sā na gahitāti yā ‘‘cakkhāyatanaṃ nissāyā’’tiādinā cakkhāyatanādīnaṃ nissayapaccayatā vuttā, sā idha paṭiccavāre na vuttāti attho sahajātattho paṭiccatthoti katvā. Tenāha ‘‘cakkhāyatanādīni…pe… adhippāyo’’ti. Yesaṃ pana arūpakkhandhamahābhūtanāmarūpacittacetasikamahābhūtarūpidhammānaṃ vasena chadhā nissayapaccayo icchito, tesaṃ vasena idha vibhatto eva. Kathaṃ rūpivasena vibhattoti ce? ‘‘Vatthuṃ paṭicca khandhā’’ti hadayavatthuvasena sarūpato dassito eva. Itaresampi vasena ‘‘abyākataṃ dhammaṃ paṭicca abyākato dhammo uppajjati nissayapaccayā’’ti ettha dassito. Yathā hi ‘‘kusalaṃ dhammaṃ paṭicca kusalo dhammo uppajjati ārammaṇapaccayā’’tiādīsu rūpāyatanādīnaṃ asatipi paṭiccaṭṭhapharaṇe ārammaṇapaccayabhāvo dassito hoti, evamidhāpi cakkhāyatanādīnaṃ nissayapaccayabhāvo dassito hoti. Tena vuttaṃ ‘‘nissaya…pe… na gahitānī’’ti.
60. д̣̇вийсу убаниссаязсууд̇и ананд̇арабагад̇уубаниссаязсу. гусалааби бана махаг̇г̇ад̇аад̇и би-сад̣̇д̣̇зна аб̣яаагад̇з махаг̇г̇ад̇з аагад̣дхад̇и ‘‘гусалааби махаг̇г̇ад̇аа аарамман̣уубаниссаяам̣ на лабханд̇и, баг̇зва аб̣яаагад̇аа’’д̇и. гад̣̇аажи на лабханд̇и, яад̣̇аа г̇арум̣ гад̇ваа на бавад̇д̇анд̇ийд̇и ад̇т̇о.
60. Dvīsuupanissayesūti anantarapakatūpanissayesu. Kusalāpi pana mahaggatāti pi-saddena abyākate mahaggate ākaḍḍhati ‘‘kusalāpi mahaggatā ārammaṇūpanissayaṃ na labhanti, pageva abyākatā’’ti. Kadāci na labhanti, yadā garuṃ katvā na pavattantīti attho.
61. ан̃н̃ад̇т̇а хзд̇убажжаяаад̣̇ийсу. бажжаяам̣ анид̣̇д̣̇исид̇ваад̇и бажжаяам̣ д̇хаммам̣ саруубад̇о анид̣̇д̣̇исид̇ваа. на хи хзд̇убажжаяанид̣̇д̣̇зсаад̣̇ийсу алобхаад̣̇игусалаад̣̇исаруубависзсад̇о хзд̇уаад̣̇ид̇хаммаа д̣̇ассид̇аа. гусалаад̣̇ийсууд̇и ид̣̇ам̣ алобхаад̣̇ивисзсанам̣. д̇зна яат̇аа алобхаад̣̇ийсу аяамзва бажжаяод̇и нияамо над̇т̇и, звам̣ д̇аб̣б̣исзсзсу гусалаад̣̇ийсууд̇и д̣̇ассзд̇и. ид̇ха бана бурзж̇аад̇абажжаяз. вад̇т̇унавад̇т̇уд̇хаммзсууд̇и нид̣̇д̇хааран̣з бхуммам̣. бурзж̇аад̇абажжаяаа уббаж̇ж̇амаанаананд̇и иминаа бадисанд̇хигкан̣з, ааруббз уббаж̇ж̇амаанз жа канд̇хз нивад̇д̇зд̇и. гасмаа банзд̇т̇а вад̇т̇убурзж̇аад̇амзва г̇ахид̇ам̣, на аарамман̣абурзж̇аад̇анд̇и жод̣̇анам̣ манаси гад̇ваа ааха ‘‘аарамман̣абурзж̇аад̇амби хи вад̇т̇убурзж̇аад̇з авиж̇ж̇амаанз на лаб̣бхад̇ий’’д̇и. д̇ассаад̇и бадисанд̇хивибаагасса. на уд̣̇д̇хадод̇и вуд̇д̇амзвад̇т̇ам̣ баагадам̣ гаад̇ум̣ ‘‘нзвавибаага…бз… д̇ийн̣ийд̇и вуд̇д̇а’’нд̇и вуд̇д̇ам̣. алаабхад̇од̇и яад̣̇и лаб̣бхзяяа, ‘‘жад̇д̇аарий’’д̇и вад̇д̇аб̣б̣ам̣ сияаад̇и д̣̇ассзд̇и. д̇ад̇т̇аад̇и вибаагад̇д̇игз. д̇ийн̣ийд̇и ‘‘вибаагам̣ д̇хаммам̣ бадижжа вибааго д̇хаммо уббаж̇ж̇ад̇и бурзж̇аад̇абажжаяаа, вибаагад̇хаммад̇хаммам̣, нзвавибааганавибаагад̇хаммад̇хаммам̣ бадижжаа’’д̇и имаани д̇ийн̣и.
61. Aññattha hetupaccayādīsu. Paccayaṃ aniddisitvāti paccayaṃ dhammaṃ sarūpato aniddisitvā. Na hi hetupaccayaniddesādīsu alobhādikusalādisarūpavisesato hetuādidhammā dassitā. Kusalādīsūti idaṃ alobhādivisesanaṃ. Tena yathā alobhādīsu ayameva paccayoti niyamo natthi, evaṃ tabbisesesu kusalādīsūti dasseti. Idha pana purejātapaccaye. Vatthunavatthudhammesūti niddhāraṇe bhummaṃ. Purejātapaccayā uppajjamānānanti iminā paṭisandhikkhaṇe, āruppe uppajjamāne ca khandhe nivatteti. Kasmā panettha vatthupurejātameva gahitaṃ, na ārammaṇapurejātanti codanaṃ manasi katvā āha ‘‘ārammaṇapurejātampi hi vatthupurejāte avijjamāne na labbhatī’’ti. Tassāti paṭisandhivipākassa. Na uddhaṭoti vuttamevatthaṃ pākaṭaṃ kātuṃ ‘‘nevavipāka…pe… tīṇīti vutta’’nti vuttaṃ. Alābhatoti yadi labbheyya, ‘‘cattārī’’ti vattabbaṃ siyāti dasseti. Tatthāti vipākattike. Tīṇīti ‘‘vipākaṃ dhammaṃ paṭicca vipāko dhammo uppajjati purejātapaccayā, vipākadhammadhammaṃ, nevavipākanavipākadhammadhammaṃ paṭiccā’’ti imāni tīṇi.
63. д̇ад̣̇убаад̣̇ааруубаананд̇и д̇з махаабхууд̇з ниссааяа бавад̇д̇аубаад̣̇ааруубаанам̣. вад̣̇ад̇ийд̇и згагкан̣иганаанаагкан̣игагаммабажжаяам̣ вад̣̇ад̇и авиниб̣бхог̇авасзна бавад̇д̇амаанаанам̣ д̇зсам̣ бажжаязна висзсаабхаавад̇о. бавад̇д̇ияам̣ гадад̇д̇ааруубаананд̇и висзсанам̣ бадисанд̇хигкан̣з гадад̇д̇ааруубаанам̣ згагкан̣игассаби гаммабажжаяасса ижчид̇ад̇д̇аа. д̇знзва хи адтагат̇ааяам̣ ‘‘д̇ат̇аа бадисанд̇хигкан̣з махаабхууд̇аана’’нд̇и д̣̇увид̇хоби гаммабажжаяо вуд̇д̇о.
63. Tadupādārūpānanti te mahābhūte nissāya pavattaupādārūpānaṃ. Vadatīti ekakkhaṇikanānākkhaṇikakammapaccayaṃ vadati avinibbhogavasena pavattamānānaṃ tesaṃ paccayena visesābhāvato. Pavattiyaṃ kaṭattārūpānanti visesanaṃ paṭisandhikkhaṇe kaṭattārūpānaṃ ekakkhaṇikassapi kammapaccayassa icchitattā. Teneva hi aṭṭhakathāyaṃ ‘‘tathā paṭisandhikkhaṇe mahābhūtāna’’nti duvidhopi kammapaccayo vutto.
64. яам̣ яам̣ бадисанд̇хияам̣ лаб̣бхад̇ийд̇и жагкунд̣̇рияаад̣̇ийсу яам̣ яам̣ инд̣̇рияаруубам̣ бадисанд̇хияам̣ лаб̣бхад̇и, д̇асса д̇асса васзна инд̣̇рияаруубан̃жа вад̇т̇уруубан̃жа ‘‘гадад̇д̇аарууба’’нд̇и вуд̇д̇ам̣.
64. Yaṃ yaṃ paṭisandhiyaṃ labbhatīti cakkhundriyādīsu yaṃ yaṃ indriyarūpaṃ paṭisandhiyaṃ labbhati, tassa tassa vasena indriyarūpañca vatthurūpañca ‘‘kaṭattārūpa’’nti vuttaṃ.
69. гзсан̃жийд̇и бан̃жавогаарз бадисанд̇хигканд̇хаад̣̇ийнам̣. д̇зсан̃хи вад̇т̇у нияамад̇о виббаяуд̇д̇абажжаяо ход̇и. самаанавиббаяуд̇д̇абажжаяаад̇и сад̣̇исавиббаяуд̇д̇абажжаяаа. гусалаагусалаа хи канд̇хаа згажжз жа аб̣яаагад̇аа яасса виббаяуд̇д̇абажжаяаа хонд̇и, на саяам̣ д̇ад̇о виббаяуд̇д̇абажжаяам̣ лабханд̇и жид̇д̇асамудтаанаанам̣ виббаяуд̇д̇абажжаяаабхаавад̇о вад̇т̇унаава виббаяуд̇д̇абажжаязна уббаж̇ж̇анад̇о. згажжз бана аб̣яаагад̇аа яасса виббаяуд̇д̇абажжаяаа хонд̇и, саяамби д̇ад̇о виббаяуд̇д̇абажжаяам̣ лабханд̇и яат̇аа бадисанд̇хигкан̣з вад̇т̇угканд̇хаа. д̇зна вуд̇д̇ам̣ ‘‘гзсан̃жи канд̇хаа…бз… наанаавиббаяуд̇д̇абажжаяаабий’’д̇и. бажжаяам̣ бажжаяам̣ гарод̇ийд̇и бажжаяад̇хаммам̣ вад̇т̇ум̣ канд̇хз жа ад̇д̇ано бажжаяабхууд̇ам̣ гарод̇и, яат̇аавуд̇д̇ам̣ бажжаяад̇хаммам̣ бажжаяам̣ гад̇ваа бавад̇д̇ад̇ийд̇и ад̇т̇о. д̇ам̣гирияаагаран̣ад̇од̇и виббаяуд̇д̇абажжаяагижжагаран̣ад̇о. бадижжа уббад̇д̇и над̇т̇ийд̇и бадижжадтапаран̣ам̣ над̇т̇и сахаж̇аад̇адто бадижжадтод̇и гад̇ваа. ‘‘бадижжа уббаж̇ж̇анд̇ий’’д̇и зд̇д̇агамзвааха, гим̣ бадижжа? канд̇хзд̇и баагадояамад̇т̇од̇и. д̇знааха ‘‘гим̣ бана бадижжаа’’д̇иаад̣̇и. бажжаасад̇д̇ин̃ааязна ананд̇арасса вид̇хи бадисзд̇хо ваа ход̇ийд̇и г̇ан̣хзяяаад̇и д̇ам̣ ниваарзд̇ум̣ вуд̇д̇анд̇и д̣̇ассзнд̇о ‘‘ананд̇арад̇д̇аа…бз… вуд̇д̇ам̣ ход̇ий’’д̇и ааха.
69. Kesañcīti pañcavokāre paṭisandhikkhandhādīnaṃ. Tesañhi vatthu niyamato vippayuttapaccayo hoti. Samānavippayuttapaccayāti sadisavippayuttapaccayā. Kusalākusalā hi khandhā ekacce ca abyākatā yassa vippayuttapaccayā honti, na sayaṃ tato vippayuttapaccayaṃ labhanti cittasamuṭṭhānānaṃ vippayuttapaccayābhāvato vatthunāva vippayuttapaccayena uppajjanato. Ekacce pana abyākatā yassa vippayuttapaccayā honti, sayampi tato vippayuttapaccayaṃ labhanti yathā paṭisandhikkhaṇe vatthukkhandhā. Tena vuttaṃ ‘‘kesañci khandhā…pe… nānāvippayuttapaccayāpī’’ti. Paccayaṃ paccayaṃ karotīti paccayadhammaṃ vatthuṃ khandhe ca attano paccayabhūtaṃ karoti, yathāvuttaṃ paccayadhammaṃ paccayaṃ katvā pavattatīti attho. Taṃkiriyākaraṇatoti vippayuttapaccayakiccakaraṇato. Paṭicca uppatti natthīti paṭiccaṭṭhapharaṇaṃ natthi sahajātaṭṭho paṭiccaṭṭhoti katvā. ‘‘Paṭicca uppajjantī’’ti ettakamevāha, kiṃ paṭicca? Khandheti pākaṭoyamatthoti. Tenāha ‘‘kiṃ pana paṭiccā’’tiādi. Paccāsattiñāyena anantarassa vidhi paṭisedho vā hotīti gaṇheyyāti taṃ nivāretuṃ vuttanti dassento ‘‘anantarattā…pe… vuttaṃ hotī’’ti āha.
71-72. сан̇кибид̇ваа д̣̇ассид̇аанам̣ васзнзд̇ам̣ вуд̇д̇анд̇и сан̇кибид̇ваа д̣̇ассид̇аанам̣ бажжаяаанам̣ васзна зд̇ам̣ ‘‘имз д̇звийсад̇и бажжаяаа’’д̇иаад̣̇иважанам̣ ваажанаамаг̇г̇ам̣ д̣̇ассзнд̇зхиби баал̣ияам̣ вуд̇д̇анд̇и адтагат̇ааяам̣ вуд̇д̇ам̣. згзнабийд̇и гусалаад̣̇ийсу жа бад̣̇зсу згзнаби бад̣̇зна, д̇асмим̣ д̇асмим̣ ваа бажжаяанид̣̇д̣̇зсз ваагяасан̇каад̇зна згзнаби бад̣̇зна. д̇аяо бажжаяаад̇и хзд̇уаарамман̣аад̇хибад̇ибажжаяаа. д̇з жад̇д̇ааро бажчааж̇аад̇ан̃жа важ̇ж̇зд̇ваад̇и зд̇т̇а яат̇аавуд̇д̇з жад̇д̇ааро бажжаяз вид̇т̇аарид̇ад̇д̇аа ‘‘важ̇ж̇зд̇ваа’’д̇и вуд̇д̇ам̣, бажчааж̇аад̇ам̣ бана саб̣б̣зна саб̣б̣ам̣ аг̇г̇ахид̇ад̇д̇аа. зд̇д̇агаа хи згуунавийсад̇и бажжаяаа яат̇аавуд̇д̇з бажжаяз важ̇ж̇зд̇ваа авасидтаа. яз банаад̇и бад̣̇агаарагз вад̣̇ад̇и. сан̇кибид̇ваад̇и бад̣̇асса ‘‘баал̣ияам̣ вид̇т̇аарид̇ам̣ авид̇т̇аарид̇ан̃жа саб̣б̣ам̣ сан̇г̇ахзд̇ваа вуд̇д̇а’’нд̇и ад̇т̇ам̣ вад̣̇анд̇и. ‘‘д̇звийсад̇и бажжаяаа’’д̇и баатзна бхавид̇аб̣б̣ам̣ ‘‘саб̣б̣ам̣ сан̇г̇ахзд̇ваа’’д̇и вуд̇д̇ад̇д̇аа. бажчааж̇аад̇абажжаяоязва хи важ̇ж̇зд̇аб̣б̣од̇и. звам̣ ваад̣̇анд̇арз вад̇д̇аб̣б̣ам̣ вад̇ваа ид̣̇аани баал̣ияаа авибарийд̇ам̣ ад̇т̇ам̣ д̣̇ассзд̇ум̣ ‘‘аад̣̇имхи банаа’’д̇иаад̣̇и вуд̇д̇ам̣.
71-72. Saṅkhipitvā dassitānaṃ vasenetaṃ vuttanti saṅkhipitvā dassitānaṃ paccayānaṃ vasena etaṃ ‘‘ime tevīsati paccayā’’tiādivacanaṃ vācanāmaggaṃ dassentehipi pāḷiyaṃ vuttanti aṭṭhakathāyaṃ vuttaṃ. Ekenapīti kusalādīsu ca padesu ekenapi padena, tasmiṃ tasmiṃ vā paccayaniddese vākyasaṅkhātena ekenapi padena. Tayo paccayāti hetuārammaṇādhipatipaccayā. Te cattāro pacchājātañca vajjetvāti ettha yathāvutte cattāro paccaye vitthāritattā ‘‘vajjetvā’’ti vuttaṃ, pacchājātaṃ pana sabbena sabbaṃ aggahitattā. Ettakā hi ekūnavīsati paccayā yathāvutte paccaye vajjetvā avasiṭṭhā. Ye panāti padakārake vadati. Saṅkhipitvāti padassa ‘‘pāḷiyaṃ vitthāritaṃ avitthāritañca sabbaṃ saṅgahetvā vutta’’nti atthaṃ vadanti. ‘‘Tevīsati paccayā’’ti pāṭhena bhavitabbaṃ ‘‘sabbaṃ saṅgahetvā’’ti vuttattā. Pacchājātapaccayoyeva hi vajjetabboti. Evaṃ vādantare vattabbaṃ vatvā idāni pāḷiyā aviparītaṃ atthaṃ dassetuṃ ‘‘ādimhi panā’’tiādi vuttaṃ.
вибхан̇г̇аваараван̣н̣анаа нидтид̇аа.
Vibhaṅgavāravaṇṇanā niṭṭhitā.
(2) сан̇кяааваараван̣н̣анаа
(2) Saṅkhyāvāravaṇṇanā
73. яат̇аа ан̃н̃аман̃н̃абажжаяз висзсо вибхан̇г̇з ад̇т̇ийд̇и ид̣̇ам̣ хзд̇убажжаяаад̣̇ивибхан̇г̇ад̇о висзсабхаавасааман̃н̃зна вуд̇д̇ам̣. на хи яаад̣̇исо ан̃н̃аман̃н̃абажжаяавибхан̇г̇з висзсо, д̇аад̣̇исо бурзж̇аад̇абажжаяавибхан̇г̇з. д̇ат̇аа хи ан̃н̃аман̃н̃абажжаяз бадисанд̇хи лаб̣бхад̇и, на бурзж̇аад̇абажжаяз. ‘‘вибаагааб̣яаагад̇ам̣ згам̣ канд̇хам̣ бадижжаа’’д̇иаад̣̇игз вибхан̇г̇зд̇и иминаа яасмим̣ бажжаяз вибаагааб̣яаагад̇ам̣ уд̣̇д̇хадам̣, д̇ам̣ нид̣̇ассанавасзна д̣̇ассзд̇и. ид̣̇ам̣ вуд̇д̇ам̣ ход̇и – яат̇аа хзд̇убажжаяаад̣̇ийсу ‘‘вибаагааб̣яаагад̇ам̣ згам̣ канд̇хам̣ бадижжаа’’д̇иаад̣̇инаа вибхан̇г̇з вибаагааб̣яаагад̇ам̣ уд̣̇д̇хадам̣ ад̇т̇и, звам̣ вибаагааб̣яаагад̇аабхаавам̣ аасзванабажжаяз висзсам̣ д̣̇ассзд̇ийд̇и.
73. Yathāaññamaññapaccaye viseso vibhaṅge atthīti idaṃ hetupaccayādivibhaṅgato visesabhāvasāmaññena vuttaṃ. Na hi yādiso aññamaññapaccayavibhaṅge viseso, tādiso purejātapaccayavibhaṅge. Tathā hi aññamaññapaccaye paṭisandhi labbhati, na purejātapaccaye. ‘‘Vipākābyākataṃ ekaṃ khandhaṃ paṭiccā’’tiādike vibhaṅgeti iminā yasmiṃ paccaye vipākābyākataṃ uddhaṭaṃ, taṃ nidassanavasena dasseti. Idaṃ vuttaṃ hoti – yathā hetupaccayādīsu ‘‘vipākābyākataṃ ekaṃ khandhaṃ paṭiccā’’tiādinā vibhaṅge vipākābyākataṃ uddhaṭaṃ atthi, evaṃ vipākābyākatābhāvaṃ āsevanapaccaye visesaṃ dassetīti.
74. зд̇асмим̣ ануломзд̇и имасмим̣ бадижжаваарз бажжаяаануломз. суд̣̇д̇хиганаязд̇и батамз наяз. д̣̇ассид̇аг̇ан̣анад̇од̇и ‘‘нава, д̇ийн̣и, зга’’нд̇и звам̣ сан̇кзбад̇о д̣̇ассид̇аг̇ан̣анад̇о. д̇ад̇о барзсу наязсууд̇и д̇ад̇о батаманаяад̇о барзсу д̣̇уд̇ияаад̣̇инаязсу. ан̃н̃иссаад̇и наваад̣̇ибхзд̣̇ад̇о ан̃н̃иссаа г̇ан̣анааяа. аб̣ахуг̇ан̣анзна яуд̇д̇асса б̣ахуг̇ан̣анасса бажжаяасса, д̇зна аб̣ахуг̇ан̣анзна. самаанаг̇ан̣анад̇аа жаад̇и жа-сад̣̇д̣̇о б̣яад̇ирзго. д̇зна бажжанийяад̇о ануломз яо висзсо вужжад̇и, д̇ам̣ ж̇од̇зд̇и. д̇знааха ‘‘ануломзязва д̣̇адтаб̣б̣аа’’д̇и. ануломзязваад̇и авад̇хааран̣зна нивад̇д̇ид̇ам̣ д̣̇ассзд̇ум̣ ‘‘бажжанийяз…бз… вагкад̇ий’’д̇и вуд̇д̇ам̣.
74. Etasmiṃ anulometi imasmiṃ paṭiccavāre paccayānulome. Suddhikanayeti paṭhame naye. Dassitagaṇanatoti ‘‘nava, tīṇi, eka’’nti evaṃ saṅkhepato dassitagaṇanato. Tato paresu nayesūti tato paṭhamanayato paresu dutiyādinayesu. Aññissāti navādibhedato aññissā gaṇanāya. Abahugaṇanena yuttassa bahugaṇanassa paccayassa, tena abahugaṇanena. Samānagaṇanatā cāti ca-saddo byatireko. Tena paccanīyato anulome yo viseso vuccati, taṃ joteti. Tenāha ‘‘anulomeyeva daṭṭhabbā’’ti. Anulomeyevāti avadhāraṇena nivattitaṃ dassetuṃ ‘‘paccanīye…pe… vakkhatī’’ti vuttaṃ.
76-79. д̇з бана д̇зрасамуулагаад̣̇игз наяз саасзванасавибаагзсу д̣̇вийсу д̣̇ваавийсад̇имуулагзсу саасзванамзва г̇ахзд̇ваа ид̇арам̣ баж̇аханд̇о ааха ‘‘бажчааж̇аад̇авибаагаанам̣ барихийнад̇д̇аа’’д̇и. вирод̇хаабхаавз сад̇ийд̇и ид̣̇ам̣ ‘‘сияаа гусалам̣ д̇хаммам̣ бадижжа агусало д̇хаммо уббаж̇ж̇зяяаа’’д̇иаад̣̇ийсу вияа баригаббаважанам̣ санд̇хааяа вуд̇д̇ам̣. д̇знааха ‘‘бужчааяа д̣̇ассид̇анаязнаа’’д̇и. д̇асса жа д̇звийсад̇имуулагасса. нааманд̇и д̇звийсад̇имуулаганд̇и наамам̣. д̣̇ваавийсад̇и…бз… вуд̇д̇анд̇и зд̇зна д̣̇ваавийсад̇имуулагова барамад̇т̇ад̇о лаб̣бхад̇и, на д̇звийсад̇имуулагод̇и д̣̇ассзд̇и.
76-79. Te pana terasamūlakādike naye sāsevanasavipākesu dvīsu dvāvīsatimūlakesu sāsevanameva gahetvā itaraṃ pajahanto āha ‘‘pacchājātavipākānaṃ parihīnattā’’ti. Virodhābhāve satīti idaṃ ‘‘siyā kusalaṃ dhammaṃ paṭicca akusalo dhammo uppajjeyyā’’tiādīsu viya parikappavacanaṃ sandhāya vuttaṃ. Tenāha ‘‘pucchāya dassitanayenā’’ti. Tassa ca tevīsatimūlakassa. Nāmanti tevīsatimūlakanti nāmaṃ. Dvāvīsati…pe… vuttanti etena dvāvīsatimūlakova paramatthato labbhati, na tevīsatimūlakoti dasseti.
ан̃н̃абад̣̇аанийд̇и хзд̇уад̇хибад̇ибад̣̇аад̣̇ийни. суд̣̇д̇хиганаяод̇и батаманаяо, яам̣ адтагат̇ааяам̣ ‘‘згамуула’’нд̇и вуд̇д̇ам̣. аарамман̣амуулагаад̣̇ийсу на лаб̣бхад̇ийд̇и д̣̇умуулагаад̣̇ийсу д̇ам̣ на яож̇ийяад̇и. хздтимам̣ хздтимам̣ сод̇хзд̇ваа зва хи абхид̇хаммабаал̣и бавад̇д̇аа, д̇асмаа ‘‘аарамман̣з…бз… бан̃хаа’’д̇и вуд̇д̇анд̇и самб̣анд̇хо. д̇ад̇т̇аад̇и ‘‘д̇ийн̣иязва бан̃хаа’’д̇и баатз. ‘‘вад̇д̇у ад̇хиббааяаанувид̇хааяий сад̣̇д̣̇аббаяог̇о’’д̇и гад̇ваа ад̇хиббааяам̣ вибхаавзнд̇о ааха ‘‘д̇ад̇о уд̣̇д̇хам̣ г̇ан̣анам̣ ниваарзд̇и, на ад̇хо бадигкибад̇ий’’д̇и. г̇ан̣анааяа убанигкид̇д̇абан̃н̃ад̇д̇ибхаавад̇о хздтааг̇ан̣анам̣ амун̃жид̇ваава убариг̇ан̣анаа самбхавад̇ийд̇и ааха ‘‘д̇ийсу згасса анд̇ог̇ад̇хад̇ааяа жа ‘д̇ийн̣иязваа’д̇и вуд̇д̇а’’нд̇и. ад̇д̇ано важананд̇и ‘‘д̇ад̇рид̣̇ам̣ лагкан̣а’’нд̇иаад̣̇инаа вуд̇д̇ам̣ ад̇д̇ано важанам̣.
Aññapadānīti hetuadhipatipadādīni. Suddhikanayoti paṭhamanayo, yaṃ aṭṭhakathāyaṃ ‘‘ekamūla’’nti vuttaṃ. Ārammaṇamūlakādīsu na labbhatīti dumūlakādīsu taṃ na yojīyati. Heṭṭhimaṃ heṭṭhimaṃ sodhetvā eva hi abhidhammapāḷi pavattā, tasmā ‘‘ārammaṇe…pe… pañhā’’ti vuttanti sambandho. Tatthāti ‘‘tīṇiyeva pañhā’’ti pāṭhe. ‘‘Vattu adhippāyānuvidhāyī saddappayogo’’ti katvā adhippāyaṃ vibhāvento āha ‘‘tato uddhaṃ gaṇanaṃ nivāreti, na adho paṭikkhipatī’’ti. Gaṇanāya upanikkhittapaññattibhāvato heṭṭhāgaṇanaṃ amuñcitvāva uparigaṇanā sambhavatīti āha ‘‘tīsu ekassa antogadhatāya ca ‘tīṇiyevā’ti vutta’’nti. Attano vacananti ‘‘tatridaṃ lakkhaṇa’’ntiādinā vuttaṃ attano vacanaṃ.
80-85. авиг̇ад̇аа…бз… вуд̇д̇зби вибаллаасаяож̇анам̣ агад̇ваад̇и ад̇хиббааяо. саа д̣̇ассид̇аа ход̇ийд̇и саа вибаллаасаяож̇анам̣ агад̇ваа д̣̇ассияамаанаа яад̣̇иби д̣̇ассид̇аа ход̇и, на звам̣ аавигаран̣авасзна д̣̇ассид̇аа ход̇и д̇аад̣̇исасса лин̇г̇анасса абхаавад̇о яат̇аа вибаллаасаяож̇анааяанд̇и ад̇хиббааяо. д̇знааха ‘‘вибаллааса…бз… ход̇ий’’д̇и. звамзва ад̇хиббааяо яож̇зд̇аб̣б̣од̇и ‘‘яз…бз… д̇ам̣ д̣̇ассзд̇у’’нд̇и зд̇т̇а ‘‘яад̣̇иби авиг̇ад̇аананд̇ара’’нд̇иаад̣̇инаа яат̇аа ад̇хиббааяо яож̇ид̇о, звамзва ‘‘д̇знзд̇ам̣ аавигарод̇ий’’д̇и зд̇т̇ааби ад̇хиббааяо яож̇зд̇аб̣б̣о. гим̣ вуд̇д̇ам̣ ход̇и? яат̇аа д̇ад̇т̇а ‘‘уунад̇араг̇ан̣анзхи самаанаг̇ан̣анзхи жа сад̣̇д̇хим̣ сам̣санд̣̇анз уунад̇араа самаанаа жа г̇ан̣анаа ход̇ий’’д̇и аяамад̇т̇о н̃аабанавасзна д̣̇ассид̇о, звамид̇хаабийд̇и. д̇зна вуд̇д̇ам̣ адтагат̇ааяам̣ ‘‘аарамман̣абажжаяо язна язна б̣ахуд̇араг̇ан̣анзна ваа самаанаг̇ан̣анзна ваа бажжаязна сад̣̇д̇хим̣ д̇игад̣̇угаад̣̇ибхзд̣̇ам̣ г̇ажчад̇и, саб̣б̣ад̇т̇а д̇ийн̣зва бан̃хависсаж̇ж̇анаани взд̣̇ид̇аб̣б̣ааний’’д̇и. на гзваламад̇т̇ависзсаавигаран̣ад̇т̇амзвзд̇т̇а д̇ат̇аа яож̇анаа гад̇аа, ат̇а ко д̣̇зсанааггамоязва сод̇и д̣̇ассзд̇ум̣ ‘‘бажжанийяаад̣̇ийсуби банаа’’д̇иаад̣̇имааха. д̇ад̇т̇а муулабад̣̇анд̇и аарамман̣абажжаяаад̣̇игам̣ д̇асмим̣ д̇асмим̣ наяз муулабхууд̇ам̣ бад̣̇ам̣. д̇ад̇т̇аад̇и бажжанийяаад̣̇ийсу. зд̇ам̣ лагкан̣анд̇и ‘‘д̇ад̇рид̣̇ам̣ лагкан̣а’’нд̇иаад̣̇инаа вуд̇д̇алагкан̣ам̣. д̇асмаад̇и яасмаа буб̣б̣знаабарам̣ баал̣и звамзва бавад̇д̇аа, д̇асмаа зва. д̇зна муулабад̣̇ам̣ аад̣̇имхиязва табзд̇ваа д̣̇зсанаа н̃ааяааг̇ад̇аад̇и д̣̇ассзд̇и. яад̣̇и звам̣ лин̇г̇анзна ад̇т̇ависзсаавигаран̣ам̣ гат̇анд̇и ааха ‘‘на жа вин̃н̃аад̇з ад̇т̇з важанзна лин̇г̇зна жа баяож̇анам̣ ад̇т̇ий’’д̇и.
80-85. Avigatā…pe… vuttepi vipallāsayojanaṃ akatvāti adhippāyo. Sā dassitā hotīti sā vipallāsayojanaṃ akatvā dassiyamānā yadipi dassitā hoti, na evaṃ āvikaraṇavasena dassitā hoti tādisassa liṅganassa abhāvato yathā vipallāsayojanāyanti adhippāyo. Tenāha ‘‘vipallāsa…pe… hotī’’ti. Evameva adhippāyo yojetabboti ‘‘ye…pe… taṃ dassetu’’nti ettha ‘‘yadipi avigatānantara’’ntiādinā yathā adhippāyo yojito, evameva ‘‘tenetaṃ āvikarotī’’ti etthāpi adhippāyo yojetabbo. Kiṃ vuttaṃ hoti? Yathā tattha ‘‘ūnataragaṇanehi samānagaṇanehi ca saddhiṃ saṃsandane ūnatarā samānā ca gaṇanā hotī’’ti ayamattho ñāpanavasena dassito, evamidhāpīti. Tena vuttaṃ aṭṭhakathāyaṃ ‘‘ārammaṇapaccayo yena yena bahutaragaṇanena vā samānagaṇanena vā paccayena saddhiṃ tikadukādibhedaṃ gacchati, sabbattha tīṇeva pañhavissajjanāni veditabbānī’’ti. Na kevalamatthavisesāvikaraṇatthamevettha tathā yojanā katā, atha kho desanākkamoyeva soti dassetuṃ ‘‘paccanīyādīsupi panā’’tiādimāha. Tattha mūlapadanti ārammaṇapaccayādikaṃ tasmiṃ tasmiṃ naye mūlabhūtaṃ padaṃ. Tatthāti paccanīyādīsu. Etaṃ lakkhaṇanti ‘‘tatridaṃ lakkhaṇa’’ntiādinā vuttalakkhaṇaṃ. Tasmāti yasmā pubbenāparaṃ pāḷi evameva pavattā, tasmā eva. Tena mūlapadaṃ ādimhiyeva ṭhapetvā desanā ñāyāgatāti dasseti. Yadi evaṃ liṅganena atthavisesāvikaraṇaṃ kathanti āha ‘‘na ca viññāte atthe vacanena liṅgena ca payojanaṃ atthī’’ti.
бажжаяаануломаван̣н̣анаа нидтид̇аа.
Paccayānulomavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / бадтаанабаал̣и • Paṭṭhānapāḷi / 1. гусалад̇д̇игам̣ • 1. Kusalattikaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 1. бадижжаваараван̣н̣анаа • 1. Paṭiccavāravaṇṇanā
