পচ্চযপচ্চনীযৰণ্ণনা

Paccayapaccanīyavaṇṇanā

৮৬-৮৭. রূপসমুট্ঠাপকৰসেনেৰ ৰেদিতব্বন্তি ইদং অট্ঠকথাৰচনং অনন্তরং ‘‘চিত্তসমুট্ঠানঞ্চ রূপ’’ন্তি পাল়িযং আগতত্তা ৰুত্তং, পঞ্চৰিঞ্ঞাণানং পন অহেতুকপটিসন্ধিচিত্তানঞ্চ ৰসেন যোজনা সম্ভৰতীতি কত্ৰা ৰুত্তং ‘‘সব্বসঙ্গাহিকৰসেন পনেতং ন ন সক্কা যোজেতু’’ন্তি।

86-87. Rūpasamuṭṭhāpakavasenevaveditabbanti idaṃ aṭṭhakathāvacanaṃ anantaraṃ ‘‘cittasamuṭṭhānañca rūpa’’nti pāḷiyaṃ āgatattā vuttaṃ, pañcaviññāṇānaṃ pana ahetukapaṭisandhicittānañca vasena yojanā sambhavatīti katvā vuttaṃ ‘‘sabbasaṅgāhikavasena panetaṃ na na sakkā yojetu’’nti.

৯৩. সহজাতপুরেজাতপচ্চযাতি ইদং পচ্চযেন পচ্চযধম্মোপলক্খণন্তি দস্সেতুং ‘‘সহজাতা চ হেতুআদযো…পে॰… অত্থো দট্ঠব্বো’’তি ৰত্ৰা ‘‘ন হী’’তিআদিনা তমেৰত্থং সমত্থেতি।

93. Sahajātapurejātapaccayāti idaṃ paccayena paccayadhammopalakkhaṇanti dassetuṃ ‘‘sahajātā ca hetuādayo…pe… attho daṭṭhabbo’’ti vatvā ‘‘na hī’’tiādinā tamevatthaṃ samattheti.

৯৪-৯৭. সো পচ্চযোতি সো পটিচ্চট্ঠফরণকো পচ্চযো।

94-97. So paccayoti so paṭiccaṭṭhapharaṇako paccayo.

৯৯-১০২. চিত্তসমুট্ঠানাদযোতি আদি-সদ্দেন বাহিররূপআহারসমুট্ঠানাদযো রূপকোট্ঠাসা সঙ্গয্হন্তি। তস্সাতি মগ্গপচ্চযং লভন্তস্স রূপস্স। এৰমেৰ পনাতি ইমিনা যথা নমগ্গপচ্চযে ৰুত্তং, এৰমেৰ নহেতুপচ্চযাদীসু যং হেতুপচ্চযং লভতি, তস্স পরিহীনত্তাতি ইমমত্থং উপসংহরতি। তেনাহ ‘‘একচ্চরূপস্স পচ্চযুপ্পন্নতা দট্ঠব্বা’’তি।

99-102. Cittasamuṭṭhānādayoti ādi-saddena bāhirarūpaāhārasamuṭṭhānādayo rūpakoṭṭhāsā saṅgayhanti. Tassāti maggapaccayaṃ labhantassa rūpassa. Evameva panāti iminā yathā namaggapaccaye vuttaṃ, evameva nahetupaccayādīsu yaṃ hetupaccayaṃ labhati, tassa parihīnattāti imamatthaṃ upasaṃharati. Tenāha ‘‘ekaccarūpassa paccayuppannatā daṭṭhabbā’’ti.

১০৭-১৩০. সব্বত্থাতি পন্নরসমূলকাদীসু সব্বেসু নযেসু। কামং সুদ্ধিকনযাদীসু ৰিসদিসৰিস্সজ্জনা, ইধাধিপ্পেতত্থং পন দস্সেতুং ‘‘একেসূ’’তিআদি ৰুত্তং। ইধাতি এতেসু নাহারমূলকাদিনযেসু। গণনাযেৰ ন সরূপদস্সনন্তি সুদ্ধিকনযে ৰিয গণনায এৰ ন সরূপদস্সনং অধিপ্পেতন্তি অত্থো।

107-130. Sabbatthāti pannarasamūlakādīsu sabbesu nayesu. Kāmaṃ suddhikanayādīsu visadisavissajjanā, idhādhippetatthaṃ pana dassetuṃ ‘‘ekesū’’tiādi vuttaṃ. Idhāti etesu nāhāramūlakādinayesu. Gaṇanāyeva na sarūpadassananti suddhikanaye viya gaṇanāya eva na sarūpadassanaṃ adhippetanti attho.

পচ্চযপচ্চনীযৰণ্ণনা নিট্ঠিতা।

Paccayapaccanīyavaṇṇanā niṭṭhitā.

পচ্চযানুলোমপচ্চনীযৰণ্ণনা

Paccayānulomapaccanīyavaṇṇanā

১৩১-১৮৯. তিণ্ণন্তি হেতু অধিপতি মগ্গোতি ইমেসং তিণ্ণং পচ্চযানং। সাধারণানন্তি যে তেসং তিণ্ণং সাধারণা পচ্চযা পচ্চনীকতো ন লব্ভন্তি, যস্মা তেসং সঙ্গণ্হনৰসেন ৰুত্তং, তস্মা। মগ্গপচ্চযেতি মগ্গপচ্চযে অনুলোমতো ঠিতে। ইতরেহীতি হেতুঅধিপতিপচ্চযেহি। সাধারণা সত্তেৰাতি মগ্গপচ্চযৰজ্জে সত্তেৰ। হেতুপচ্চযোপি পচ্চনীযতো ন লব্ভতীতি হেতুরহিতেসু অধিপতিনো অভাৰা। সো পনাতি হেতুপচ্চযো অসাধারণোতি কত্ৰা ন ৰুত্তো সাধারণানং অলব্ভমানানং ৰুচ্চমানত্তা। ন হি হেতুপচ্চযো মগ্গপচ্চযস্স সাধারণো। যেহীতি যেহি পচ্চযেহি। তেতি অনন্তরপচ্চযাদযো। একন্তিকত্তাতি অৰিনাভাৰতো। অরূপট্ঠানিকাতি অরূপপচ্চযা অরূপধম্মানংযেৰ পচ্চযভূতা অনন্তরপচ্চযাদযো। তেনাতি ‘‘একন্তিকানং অরূপট্ঠানিকা’’তি ইধাধিপ্পেতত্তা। তেহীতি পুরেজাতাসেৰনপচ্চযেহি। তেসং ৰসেনাতি তেসং ঊনতরগণনানং এককাদীনং ৰসেন। তস্স তস্সাতি পচ্চনীযতো যোজিতস্স তস্স তস্স দুকাদিকস্স বহুগণনস্স। গণনাতি ঊনতরগণনা। অনুলোমতো ঠিতস্সপীতি পি-সদ্দেন অনুলোমতো ঠিতো ৰা হোতু পচ্চনীযতো যোজিতো ৰা, ঊনতরগণনায সমানন্তি দস্সেতি। নযিদং লক্খণং একন্তিকন্তি ইমিনা যথাৰুত্তলক্খণং যেভুয্যৰসেন ৰুত্তন্তি দস্সেতি।

131-189. Tiṇṇanti hetu adhipati maggoti imesaṃ tiṇṇaṃ paccayānaṃ. Sādhāraṇānanti ye tesaṃ tiṇṇaṃ sādhāraṇā paccayā paccanīkato na labbhanti, yasmā tesaṃ saṅgaṇhanavasena vuttaṃ, tasmā. Maggapaccayeti maggapaccaye anulomato ṭhite. Itarehīti hetuadhipatipaccayehi. Sādhāraṇā sattevāti maggapaccayavajje satteva. Hetupaccayopi paccanīyato na labbhatīti heturahitesu adhipatino abhāvā. So panāti hetupaccayo asādhāraṇoti katvā na vutto sādhāraṇānaṃ alabbhamānānaṃ vuccamānattā. Na hi hetupaccayo maggapaccayassa sādhāraṇo. Yehīti yehi paccayehi. Teti anantarapaccayādayo. Ekantikattāti avinābhāvato. Arūpaṭṭhānikāti arūpapaccayā arūpadhammānaṃyeva paccayabhūtā anantarapaccayādayo. Tenāti ‘‘ekantikānaṃ arūpaṭṭhānikā’’ti idhādhippetattā. Tehīti purejātāsevanapaccayehi. Tesaṃ vasenāti tesaṃ ūnataragaṇanānaṃ ekakādīnaṃ vasena. Tassa tassāti paccanīyato yojitassa tassa tassa dukādikassa bahugaṇanassa. Gaṇanāti ūnataragaṇanā. Anulomato ṭhitassapīti pi-saddena anulomato ṭhito vā hotu paccanīyato yojito vā, ūnataragaṇanāya samānanti dasseti. Nayidaṃ lakkhaṇaṃ ekantikanti iminā yathāvuttalakkhaṇaṃ yebhuyyavasena vuttanti dasseti.

পচ্চযানুলোমপচ্চনীযৰণ্ণনা নিট্ঠিতা।

Paccayānulomapaccanīyavaṇṇanā niṭṭhitā.

পচ্চযপচ্চনীযানুলোমৰণ্ণনা

Paccayapaccanīyānulomavaṇṇanā

১৯০. সব্বেসুপীতি পচ্ছাজাতং ঠপেত্ৰা সব্বেসুপি পচ্চযেসু। সো হি অনুলোমতো অলব্ভমানভাৰেন গহিতো ‘‘সব্বেসূ’’তি এত্থ সঙ্গহং ন লভতি। অরূপাৰচরৰিপাকস্স আরুপ্পে উপ্পন্নলোকুত্তরৰিপাকস্স চ পুরেজাতাসেৰনানং অলব্ভনতোতি ‘‘কিঞ্চি নিদস্সনৰসেন দস্সেন্তো’’তি আহ।

190. Sabbesupīti pacchājātaṃ ṭhapetvā sabbesupi paccayesu. So hi anulomato alabbhamānabhāvena gahito ‘‘sabbesū’’ti ettha saṅgahaṃ na labhati. Arūpāvacaravipākassa āruppe uppannalokuttaravipākassa ca purejātāsevanānaṃ alabbhanatoti ‘‘kiñci nidassanavasena dassento’’ti āha.

অৰসেসানং লাভমত্তন্তি অৰসেসানং একচ্চানং লাভং। তেনাহ ‘‘ন সব্বেসং অৰসেসানং লাভ’’ন্তি । পচ্ছাজাতে পসঙ্গো নত্থীতি পচ্ছাজাতো অনুলোমতো তিট্ঠতীতি অযং পসঙ্গো এৰ নত্থি। পুরেজা…পে॰… লব্ভতীতি ইমিনা ৰিপ্পযুত্তে পচ্চনীযতো ঠিতে পুরেজাতো লব্ভতীতি অযম্পি অত্থতো আপন্নো হোতীতি তং নিদ্ধারেত্ৰা তত্থ যং ৰত্তব্বং, তং দস্সেতুং ‘‘পুরেজাতো পন ৰিপ্পযুত্তে পচ্চনীযতো ঠিতে অনুলোমতো লব্ভতীতি ইদম্পী’’তিআদি ৰুত্তং। তত্থ ‘‘অৰসেসা সব্বেপীতি অত্থে গয্হমানে আপজ্জেয্যা’’তি ইদং তস্সা অত্থাপত্তিযা সব্ভাৰদস্সনমত্তং দট্ঠব্বং, অত্থো পন তাদিসো ন উপলব্ভতীতি অযমেত্থ অধিপ্পাযো। তেনাহ ‘‘যম্পি কেচী’’তিআদি।

Avasesānaṃ lābhamattanti avasesānaṃ ekaccānaṃ lābhaṃ. Tenāha ‘‘na sabbesaṃ avasesānaṃ lābha’’nti . Pacchājāte pasaṅgo natthīti pacchājāto anulomato tiṭṭhatīti ayaṃ pasaṅgo eva natthi. Purejā…pe… labbhatīti iminā vippayutte paccanīyato ṭhite purejāto labbhatīti ayampi atthato āpanno hotīti taṃ niddhāretvā tattha yaṃ vattabbaṃ, taṃ dassetuṃ ‘‘purejāto pana vippayutte paccanīyato ṭhite anulomato labbhatīti idampī’’tiādi vuttaṃ. Tattha ‘‘avasesā sabbepīti atthe gayhamāne āpajjeyyā’’ti idaṃ tassā atthāpattiyā sabbhāvadassanamattaṃ daṭṭhabbaṃ, attho pana tādiso na upalabbhatīti ayamettha adhippāyo. Tenāha ‘‘yampi kecī’’tiādi.

তত্থ কেচীতি পদকারে সন্ধাযাহ। তে হি ‘‘অরূপধাতুযা চৰিত্ৰা কামধাতুং উপপজ্জন্তস্স গতিনিমিত্তং আরম্মণপুরেজাতং হোতীতি ঞাপেতুং ‘নৰিপ্পযুত্তপচ্চযা পুরেজাতে’তি অযমত্থো নিদ্ধারিতো’’তি ৰদন্তি, তং ন যুজ্জতি আরুপ্পে রূপং আরব্ভ চিত্তুপ্পাদস্স অসম্ভৰতো। তথা হেকে অসঞ্ঞভৰানন্তরস্স ৰিয আরুপ্পানন্তরস্স কামাৰচরপটিসন্ধিৰিঞ্ঞাণস্স পুরিমানুপট্ঠিতারম্মণং ইচ্ছন্তি। তেনেৰাহ ‘‘তম্পি তেসং রুচিমত্তমেৰা’’তিআদি। যুজ্জমানকপচ্চযুপ্পন্নৰসেন ৰাতি যস্মিং যস্মিং পচ্চযে অনুলোমতো ঠিতে যং যং পচ্চযুপ্পন্নং ভৰিতুং যুজ্জতি, তস্স তস্স ৰসেনাতি অত্থো। ন ৰিচারিতং সুৰিঞ্ঞেয্যত্তাতি অধিপ্পাযো। নৰাতি আরম্মণঅনন্তরসমনন্তরূপনিস্সযপুরেজাতাসেৰনসম্পযুত্তনত্থিৰিগতপচ্চযা। তম্পি তেসং নৰন্নং পচ্চযানং অনুলোমতো অলব্ভমানতং।

Tattha kecīti padakāre sandhāyāha. Te hi ‘‘arūpadhātuyā cavitvā kāmadhātuṃ upapajjantassa gatinimittaṃ ārammaṇapurejātaṃ hotīti ñāpetuṃ ‘navippayuttapaccayā purejāte’ti ayamattho niddhārito’’ti vadanti, taṃ na yujjati āruppe rūpaṃ ārabbha cittuppādassa asambhavato. Tathā heke asaññabhavānantarassa viya āruppānantarassa kāmāvacarapaṭisandhiviññāṇassa purimānupaṭṭhitārammaṇaṃ icchanti. Tenevāha ‘‘tampi tesaṃ rucimattamevā’’tiādi. Yujjamānakapaccayuppannavasena vāti yasmiṃ yasmiṃ paccaye anulomato ṭhite yaṃ yaṃ paccayuppannaṃ bhavituṃ yujjati, tassa tassa vasenāti attho. Na vicāritaṃ suviññeyyattāti adhippāyo. Navāti ārammaṇaanantarasamanantarūpanissayapurejātāsevanasampayuttanatthivigatapaccayā. Tampi tesaṃ navannaṃ paccayānaṃ anulomato alabbhamānataṃ.

১৯১-১৯৫. ন অঞ্ঞমঞ্ঞেন ঘটিতস্স মূলস্সাতি অঞ্ঞমঞ্ঞপচ্চযেন পচ্চনীযতো ঠিতেন যোজিতস্স সত্তমস্স মূলস্স ৰিত্থারিতত্তা। সব্বং সদিসন্তি সব্বপাল়িগমনং সদিসং।

191-195. Na aññamaññena ghaṭitassa mūlassāti aññamaññapaccayena paccanīyato ṭhitena yojitassa sattamassa mūlassa vitthāritattā. Sabbaṃ sadisanti sabbapāḷigamanaṃ sadisaṃ.

ইমস্মিং…পে॰… ৰেদিতব্বোতি এত্থ ইমস্মিং এত্থাতি দ্ৰে ভুম্মনিদ্দেসা। তেসু পঠমস্স ৰিসযো পচ্চনীযানুলোমেতি অট্ঠকথাযমেৰ দস্সিতোতি অদস্সিতস্স ৰিসযং দস্সেতুং ‘‘এতেসূ’’তিআদি ৰুত্তং। পি-সদ্দেনাতি ‘‘ইমেসম্পী’’তি এত্থ পি-সদ্দেন। কিস্মিঞ্চি পচ্চযে। কম্মপচ্চযং লভন্তানিপি চক্খাদীনি ৰিপাকৰিঞ্ঞাণাদীনি চ ইন্দ্রিযং ন লভন্তীতি কত্ৰা ‘‘যেভুয্যেনা’’তি ৰুত্তং, কতিপযং ন লভতীতি ৰুত্তং হোতি। মগ্গপচ্চযন্তিআদীসুপি এসেৰ নযো। যথাৰুত্তানীতি পঞ্চৰোকারপৰত্তিঅসঞ্ঞভৰপরিযাপন্নানি কটত্তারূপানেৰ ৰদতি, ন চিত্তসমুট্ঠানরূপানীতি অধিপ্পাযো। যে রূপধম্মানং পচ্চযা হোন্তীতি যে হেতুঅধিপতিসহজাতাদিপচ্চযা রূপধম্মানং পচ্চযা হোন্তি, এতেযেৰ হেতুঅধিপতিআদিকে ছ পচ্চযে ন লভন্তি। এতেযেৰাতি ৰচনেন অঞ্ঞে কতিপযে লভন্তীতি সিদ্ধং হোতীতি তং দস্সেন্তো ‘‘পচ্ছাজাতা…পে॰… লভতী’’তি আহ। অযঞ্চ পচ্চযলাভো ন জনকৰসেন ৰেদিতব্বোতি দস্সেতুং ‘‘লব্ভমানা…পে॰… দস্সন’’ন্তি ৰুত্তং। ধম্মৰসেনাতি পচ্চযুপ্পন্নধম্মৰসেন। ইন্দ্রিযন্তি ইন্দ্রিযপচ্চযং। যদি এৰন্তি কটত্তারূপং যং যং ন লভতি, তং তং যদি ৰত্তব্বং, এৰং সন্তে রূপধম্মেসু ভূতরূপানিযেৰ অঞ্ঞমঞ্ঞপচ্চযং লভন্তীতি আহ ‘‘উপাদারূপানি…পে॰… ৰত্তব্ব’’ন্তি। তং পন উপাদারূপানং অঞ্ঞমঞ্ঞপচ্চযালাভৰচনং। অরূপিন্দ্রিযালাভন্তি অরূপীনং ইন্দ্রিযানং ৰসেন ইন্দ্রিযপচ্চযালাভং।

Imasmiṃ…pe… veditabboti ettha imasmiṃ etthāti dve bhummaniddesā. Tesu paṭhamassa visayo paccanīyānulometi aṭṭhakathāyameva dassitoti adassitassa visayaṃ dassetuṃ ‘‘etesū’’tiādi vuttaṃ. Pi-saddenāti ‘‘imesampī’’ti ettha pi-saddena. Kismiñci paccaye. Kammapaccayaṃ labhantānipi cakkhādīni vipākaviññāṇādīni ca indriyaṃ na labhantīti katvā ‘‘yebhuyyenā’’ti vuttaṃ, katipayaṃ na labhatīti vuttaṃ hoti. Maggapaccayantiādīsupi eseva nayo. Yathāvuttānīti pañcavokārapavattiasaññabhavapariyāpannāni kaṭattārūpāneva vadati, na cittasamuṭṭhānarūpānīti adhippāyo. Ye rūpadhammānaṃ paccayā hontīti ye hetuadhipatisahajātādipaccayā rūpadhammānaṃ paccayā honti, eteyeva hetuadhipatiādike cha paccaye na labhanti. Eteyevāti vacanena aññe katipaye labhantīti siddhaṃ hotīti taṃ dassento ‘‘pacchājātā…pe… labhatī’’ti āha. Ayañca paccayalābho na janakavasena veditabboti dassetuṃ ‘‘labbhamānā…pe… dassana’’nti vuttaṃ. Dhammavasenāti paccayuppannadhammavasena. Indriyanti indriyapaccayaṃ. Yadi evanti kaṭattārūpaṃ yaṃ yaṃ na labhati, taṃ taṃ yadi vattabbaṃ, evaṃ sante rūpadhammesu bhūtarūpāniyeva aññamaññapaccayaṃ labhantīti āha ‘‘upādārūpāni…pe… vattabba’’nti. Taṃ pana upādārūpānaṃ aññamaññapaccayālābhavacanaṃ. Arūpindriyālābhanti arūpīnaṃ indriyānaṃ vasena indriyapaccayālābhaṃ.

১৯৬-১৯৭. বহুগণনম্পি ঊনতরগণনেন যোজিতং ঊনতরগণমেৰ হোতীতি কত্ৰা ৰুত্তং ‘‘যদিপি তিকাদীসু ‘হেতুযা পঞ্চা’তি ইদং নত্থী’’তি। অনুত্তানং দুৰিঞ্ঞেয্যতায গম্ভীরং। যথা চ ভূতরূপানি নারম্মণপচ্চযা অঞ্ঞমঞ্ঞপচ্চযা উপ্পজ্জন্তি, এৰং পটিসন্ধিক্খণে ৰত্থুরূপন্তি আহ ‘‘ৰত্থুপি পন লভতী’’তি। যথা হেট্ঠা একমূলকং ‘‘দুমূলক’’ন্তি ৰুত্তং, এৰং ইধাপি দুমূলকং ‘‘তিমূলক’’ন্তি ৰদন্তি।

196-197. Bahugaṇanampi ūnataragaṇanena yojitaṃ ūnataragaṇameva hotīti katvā vuttaṃ ‘‘yadipi tikādīsu ‘hetuyā pañcā’ti idaṃ natthī’’ti. Anuttānaṃ duviññeyyatāya gambhīraṃ. Yathā ca bhūtarūpāni nārammaṇapaccayā aññamaññapaccayā uppajjanti, evaṃ paṭisandhikkhaṇe vatthurūpanti āha ‘‘vatthupi pana labhatī’’ti. Yathā heṭṭhā ekamūlakaṃ ‘‘dumūlaka’’nti vuttaṃ, evaṃ idhāpi dumūlakaṃ ‘‘timūlaka’’nti vadanti.

২০৩-২৩৩. চেতনামত্তসঙ্গাহকেতি চেতনামত্তংযেৰ পচ্চযুপ্পন্নং গহেত্ৰা ঠিতে পঞ্হে। তত্থ হি ‘‘নকম্মপচ্চযা হেতুপচ্চযা’’তি ৰত্তুং সক্কা। এৰংপকারেতি ইদং ‘‘তীণীতিআদীসূ’’তি এত্থ আদি-সদ্দস্স অত্থৰচনন্তি দস্সেন্তো ‘‘আদি-সদ্দো হি পকারত্থোৰ হোতী’’তি আহ। রূপম্পি লব্ভতি চেতনামত্তমেৰ অসঙ্গণ্হনতো।

203-233. Cetanāmattasaṅgāhaketi cetanāmattaṃyeva paccayuppannaṃ gahetvā ṭhite pañhe. Tattha hi ‘‘nakammapaccayā hetupaccayā’’ti vattuṃ sakkā. Evaṃpakāreti idaṃ ‘‘tīṇītiādīsū’’ti ettha ādi-saddassa atthavacananti dassento ‘‘ādi-saddo hi pakāratthova hotī’’ti āha. Rūpampi labbhati cetanāmattameva asaṅgaṇhanato.

পচ্চযপচ্চনীযানুলোমৰণ্ণনা নিট্ঠিতা।

Paccayapaccanīyānulomavaṇṇanā niṭṭhitā.

পটিচ্চৰারৰণ্ণনা নিট্ঠিতা।

Paṭiccavāravaṇṇanā niṭṭhitā.

Next: ২. সহজাতৰারৰণ্ণনা • 2. Sahajātavāravaṇṇanā

Related texts:

তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi / ১. কুসলত্তিকং • 1. Kusalattikaṃ

টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. পটিচ্চৰারৰণ্ণনা • 1. Paṭiccavāravaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact