| Library / Tipiṭaka / တိပိဋက • Tipiṭaka / စူဠဝဂ္ဂ-အဋ္ဌကထာ • Cūḷavagga-aṭṭhakathā |
ပဋိစ္ဆန္နပရိဝာသကထာ
Paṭicchannaparivāsakathā
၁၀၂. ဣဒာနိ ယာ တာဝ အယံ ပဋိစ္ဆန္နာယ ဧကိသ္သာ အာပတ္တိယာ ဝသေန ပာဠိ ဝုတ္တာ, သာ ဥတ္တာနတ္ထာဝ။
102. Idāni yā tāva ayaṃ paṭicchannāya ekissā āpattiyā vasena pāḷi vuttā, sā uttānatthāva.
၁၀၈. တတော ပရံ ဒ္ဝီဟတီဟစတူဟပဉ္စာဟပဋိစ္ဆန္နာနံ ဝသေန ပာဠိံ ဝတ္ဝာ ပဉ္စာဟပဋိစ္ဆန္နာယ ပရိဝာသတော ပဋ္ဌာယ အန္တရာပတ္တိ ဒသ္သိတာ။ ယသ္မာ ပန တံ အာပတ္တိံ အာပန္နော မူလာယပဋိကသ္သနာရဟော နာမ ဟောတိ, တသ္မာသ္သ တတ္ထ မူလာယပဋိကသ္သနံ အနုညာတံ။ သစေ ပန နိက္ခိတ္တဝတ္တော အာပဇ္ဇတိ, မူလာယပဋိကသ္သနာရဟော န ဟောတိ။ ကသ္မာ? ယသ္မာ န သော ပရိဝသန္တော အာပန္နော, ပကတတ္တဋ္ဌာနေ ဌိတော အာပန္နော, တသ္မာ တသ္သာ အာပတ္တိယာ ဝိသုံ မာနတ္တံ စရိတဗ္ဗံ။ သစေ ပဋိစ္ဆန္နာ ဟောတိ ပရိဝာသောပိ ဝသိတဗ္ဗော။ ယဉ္စေတံ မူလာယပဋိကသ္သနံ ဝုတ္တံ, တသ္မိမ္ပိ ကတေ ပရိဝုတ္ထဒိဝသာ မက္ခိတာ ဟောန္တိ။ ဣတိ ပရိဝာသေ အန္တရာပတ္တိံ ဒသ္သေတ္ဝာ ပုန မာနတ္တာရဟသ္သ အန္တရာပတ္တိံ ဒသ္သေတ္ဝာ မူလာယပဋိကသ္သနံ ဝုတ္တံ, တသ္မိမ္ပိ ကတေ ပရိဝုတ္ထဒိဝသာ မက္ခိတာဝ ဟောန္တိ။ တတော ပရိဝုတ္ထပရိဝာသသ္သ တာသံ တိသ္သန္နမ္ပိ အာပတ္တီနံ သမောဓာနမာနတ္တံ ဒသ္သိတံ။ တတော မာနတ္တစာရိကသ္သ အန္တရာပတ္တိံ ဒသ္သေတ္ဝာ မူလာယပဋိကသ္သနံ ဝုတ္တံ။ တသ္မိံ ပန ပဋိကသ္သနေ ကတေ မာနတ္တစိဏ္ဏဒိဝသာပိ ပရိဝုတ္ထဒိဝသာပိ မက္ခိတာဝ ဟောန္တိ။ တတော အဗ္ဘာနာရဟသ္သ အန္တရာပတ္တိံ ဒသ္သေတ္ဝာ မူလာယပဋိကသ္သနံ ဝုတ္တံ။ တသ္မိမ္ပိ ကတေ သဗ္ဗေ တေ မက္ခိတာဝ ဟောန္တိ။ တတော ပရံ သဗ္ဗာ အန္တရာပတ္တိယော ယောဇေတ္ဝာ အဗ္ဘာနကမ္မံ ဒသ္သိတံ။ ဧဝံ ပဋိစ္ဆန္နဝာရေ ဧကာဟပဋိစ္ဆန္နာဒိဝသေန ပဉ္စ, အန္တရာပတ္တိဝသေန စတသ္သောတိ နဝ ကမ္မဝာစာ ဒသ္သိတာ ဟောန္တိ။
108. Tato paraṃ dvīhatīhacatūhapañcāhapaṭicchannānaṃ vasena pāḷiṃ vatvā pañcāhapaṭicchannāya parivāsato paṭṭhāya antarāpatti dassitā. Yasmā pana taṃ āpattiṃ āpanno mūlāyapaṭikassanāraho nāma hoti, tasmāssa tattha mūlāyapaṭikassanaṃ anuññātaṃ. Sace pana nikkhittavatto āpajjati, mūlāyapaṭikassanāraho na hoti. Kasmā? Yasmā na so parivasanto āpanno, pakatattaṭṭhāne ṭhito āpanno, tasmā tassā āpattiyā visuṃ mānattaṃ caritabbaṃ. Sace paṭicchannā hoti parivāsopi vasitabbo. Yañcetaṃ mūlāyapaṭikassanaṃ vuttaṃ, tasmimpi kate parivutthadivasā makkhitā honti. Iti parivāse antarāpattiṃ dassetvā puna mānattārahassa antarāpattiṃ dassetvā mūlāyapaṭikassanaṃ vuttaṃ, tasmimpi kate parivutthadivasā makkhitāva honti. Tato parivutthaparivāsassa tāsaṃ tissannampi āpattīnaṃ samodhānamānattaṃ dassitaṃ. Tato mānattacārikassa antarāpattiṃ dassetvā mūlāyapaṭikassanaṃ vuttaṃ. Tasmiṃ pana paṭikassane kate mānattaciṇṇadivasāpi parivutthadivasāpi makkhitāva honti. Tato abbhānārahassa antarāpattiṃ dassetvā mūlāyapaṭikassanaṃ vuttaṃ. Tasmimpi kate sabbe te makkhitāva honti. Tato paraṃ sabbā antarāpattiyo yojetvā abbhānakammaṃ dassitaṃ. Evaṃ paṭicchannavāre ekāhapaṭicchannādivasena pañca, antarāpattivasena catassoti nava kammavācā dassitā honti.
ပဋိစ္ဆန္နပရိဝာသကထာ နိဋ္ဌိတာ။
Paṭicchannaparivāsakathā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi
ဧကာဟပ္ပဋိစ္ဆန္နပရိဝာသံ • Ekāhappaṭicchannaparivāsaṃ
ပဉ္စာဟပ္ပဋိစ္ဆန္နပရိဝာသော • Pañcāhappaṭicchannaparivāso
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā
ပရိဝာသကထာဝဏ္ဏနာ • Parivāsakathāvaṇṇanā
ပဋိစ္ဆန္နပရိဝာသကထာဝဏ္ဏနာ • Paṭicchannaparivāsakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā
ပရိဝာသကထာဝဏ္ဏနာ • Parivāsakathāvaṇṇanā
ပဋိစ္ဆန္နပရိဝာသာဒိကထာဝဏ္ဏနာ • Paṭicchannaparivāsādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပဋိစ္ဆန္နပရိဝာသကထာဝဏ္ဏနာ • Paṭicchannaparivāsakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ပဋိစ္ဆန္နပရိဝာသကထာ • Paṭicchannaparivāsakathā
