| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
পটিচ্ছন্নপরিৰাসকথাৰণ্ণনা
Paṭicchannaparivāsakathāvaṇṇanā
১০২. সুদ্ধস্সাতি সভাগসঙ্ঘাদিসেসং অনাপন্নস্স, ততো ৰুট্ঠিতস্স ৰা। অঞ্ঞস্মিন্তি সুদ্ধন্তপরিৰাসৰসেন আপত্তিৰুট্ঠানতো অঞ্ঞস্মিং আপত্তিৰুট্ঠানে। পাল়িযং ‘‘পটিকস্সিতো সঙ্ঘেন উদাযি ভিক্খু অন্তরা একিস্সা আপত্তিযা…পে॰… মূলাযপটিকস্সনা’’তি ইদং করণৰসেন ৰিপরিণামেত্ৰা মূলাযপটিকস্সনায পটিকস্সিতোতি যোজেতব্বং। অথ ৰা ‘‘মূলায পটিকস্সনা খমতি সঙ্ঘস্সা’’তি উত্তরপদেন সহ পচ্চত্তৰসেনেৰ যোজেতুম্পি ৰট্টতি।
102.Suddhassāti sabhāgasaṅghādisesaṃ anāpannassa, tato vuṭṭhitassa vā. Aññasminti suddhantaparivāsavasena āpattivuṭṭhānato aññasmiṃ āpattivuṭṭhāne. Pāḷiyaṃ ‘‘paṭikassito saṅghena udāyi bhikkhu antarā ekissā āpattiyā…pe… mūlāyapaṭikassanā’’ti idaṃ karaṇavasena vipariṇāmetvā mūlāyapaṭikassanāya paṭikassitoti yojetabbaṃ. Atha vā ‘‘mūlāya paṭikassanā khamati saṅghassā’’ti uttarapadena saha paccattavaseneva yojetumpi vaṭṭati.
‘‘উদাযিং ভিক্খুং অন্তরা একিস্সা আপত্তিযা…পে॰… মূলায পটিকস্সিত্ৰা’’তি এত্থ অন্তরা একিস্সা আপত্তিযা হেতুভূতায উদাযিং ভিক্খুং মূলায পটিকস্সিত্ৰা মূলদিৰসে আকড্ঢিত্ৰা তস্সা অন্তরাপত্তিযা সমোধানপরিৰাসং দেতূতি যোজনা। আৰিকারাপেত্ৰা ৰিস্সজ্জেতব্বোতি তস্স অতেকিচ্ছভাৰং তেনেৰ সঙ্ঘস্স পাকটং কারেত্ৰা লজ্জিগণতো ৰিযোজনৰসেন ৰিস্সজ্জেতব্বো।
‘‘Udāyiṃ bhikkhuṃ antarā ekissā āpattiyā…pe… mūlāya paṭikassitvā’’ti ettha antarā ekissā āpattiyā hetubhūtāya udāyiṃ bhikkhuṃ mūlāya paṭikassitvā mūladivase ākaḍḍhitvā tassā antarāpattiyā samodhānaparivāsaṃ detūti yojanā. Āvikārāpetvā vissajjetabboti tassa atekicchabhāvaṃ teneva saṅghassa pākaṭaṃ kāretvā lajjigaṇato viyojanavasena vissajjetabbo.
সতং আপত্তিযোতি কাযসংসগ্গাদিৰসেন একদিৰসে আপন্না সতং আপত্তিযো। দসসতন্তি সহস্সা আপত্তিযো। রত্তিসতং ছাদযিত্ৰানাতি যোজেতব্বো। সব্বপরিৰাসকম্মৰাচাৰসানেতি হেট্ঠা দস্সিতানং দ্ৰিন্নং সুদ্ধন্তপরিৰাসানং, তিণ্ণং সমোধানপরিৰাসানঞ্চাতি ইমেসং সব্বেসং পরিৰাসানং কম্মৰাচাপরিযোসানে। পুরিমনযেনেৰাতি পটিচ্ছন্নপরিৰাসে ৰুত্তনযেন।
Sataṃ āpattiyoti kāyasaṃsaggādivasena ekadivase āpannā sataṃ āpattiyo. Dasasatanti sahassā āpattiyo. Rattisataṃ chādayitvānāti yojetabbo. Sabbaparivāsakammavācāvasāneti heṭṭhā dassitānaṃ dvinnaṃ suddhantaparivāsānaṃ, tiṇṇaṃ samodhānaparivāsānañcāti imesaṃ sabbesaṃ parivāsānaṃ kammavācāpariyosāne. Purimanayenevāti paṭicchannaparivāse vuttanayena.
ৰিহারূপচারতোপীতি বহিগামে ভিক্খূনং ৰিহারূপচারতোপি। ‘‘দ্ৰে লেড্ডুপাতা অতিক্কমিতব্বা’’তি ইদং ভিক্খূনং সৰনূপচারাতিক্কমনং ৰুত্তং। গামস্সাতি ন ৰুত্তন্তি গামস্স উপচারং মুঞ্চিতুং ৰট্টতীতি ন ৰুত্তং। তেন গামূপচারে ঠিতাপি তত্থ দস্সনসৰনূপচারে অতিক্কমিত্ৰা ঠিতা ভিক্খূ চ ভিক্খুনিযো চ তস্সা রত্তিচ্ছেদং ন করোন্তীতি দীপেতি।
Vihārūpacāratopīti bahigāme bhikkhūnaṃ vihārūpacāratopi. ‘‘Dve leḍḍupātā atikkamitabbā’’ti idaṃ bhikkhūnaṃ savanūpacārātikkamanaṃ vuttaṃ. Gāmassāti na vuttanti gāmassa upacāraṃ muñcituṃ vaṭṭatīti na vuttaṃ. Tena gāmūpacāre ṭhitāpi tattha dassanasavanūpacāre atikkamitvā ṭhitā bhikkhū ca bhikkhuniyo ca tassā ratticchedaṃ na karontīti dīpeti.
অনিক্খিত্তৰত্তভিক্খূনং ৰুত্তনযেনেৰাতি উপচারসীমায পৰিট্ঠানং ৰসেন রত্তিচ্ছেদং সন্ধায ৰুত্তং। তস্মিং গামেতি ভিক্খুনীনং নিৰাসনগামে। অত্তানং দস্সেত্ৰাতি যথা আরোচেতুং সক্কা, তথা দস্সেত্ৰা। ‘‘সম্মন্নিত্ৰা দাতব্বা’’তি ইমিনা সম্মতায সহৰাসেপি রত্তিচ্ছেদো ন হোতীতি দস্সেতি।
Anikkhittavattabhikkhūnaṃ vuttanayenevāti upacārasīmāya paviṭṭhānaṃ vasena ratticchedaṃ sandhāya vuttaṃ. Tasmiṃ gāmeti bhikkhunīnaṃ nivāsanagāme. Attānaṃ dassetvāti yathā ārocetuṃ sakkā, tathā dassetvā. ‘‘Sammannitvā dātabbā’’ti iminā sammatāya sahavāsepi ratticchedo na hotīti dasseti.
মূলাযপটিকস্সিতস্সাতি মূলাযপটিকস্সিতস্স পুন পরিৰুত্থপরিৰাসস্সাতি অত্থো। তিস্সন্নন্তি মূলাপত্তিযা সহ দ্ৰিন্নং অন্তরাপত্তীনঞ্চ।
Mūlāyapaṭikassitassāti mūlāyapaṭikassitassa puna parivutthaparivāsassāti attho. Tissannanti mūlāpattiyā saha dvinnaṃ antarāpattīnañca.
১০৮. সচে পটিচ্ছন্নাতি নিক্খিত্তৰত্তেনাপন্নাপত্তিং সন্ধায ৰুত্তং। পাল়িযং পঞ্চাহপ্পটিচ্ছন্নৰারে অন্তরাপত্তিকথাযং ‘‘এৰঞ্চ পন, ভিক্খৰে, ছারত্তং মানত্তং দাতব্ব’’ন্তি ইদং মূলাযপটিকস্সনাকম্মৰাচানন্তরমেৰ দাতুং ৰুত্তং ন হোতি। মূলাযপটিকস্সিতস্স পন পঞ্চদিৰসানি পরিৰসিত্ৰা যাচিতস্স মানত্তচরণকালে আপন্নায ততিযায অন্তরাপত্তিযা অপ্পটিচ্ছন্নায মানত্তদানং সন্ধায ৰুত্তং। এৰঞ্চ দিন্নমানত্তস্স একেন ছারত্তেন পুব্বে দিন্নমানত্তাহি তীহি আপত্তীহি সহ চতস্সন্নম্পি আপত্তীনং মানত্তং চিণ্ণমেৰ হোতি। ইমিনা পন নযেন অব্ভানারহকালে আপন্নায অন্তরাপত্তিযা, পক্খপ্পটিচ্ছন্নৰারে অন্তরাপত্তীসু চ পটিপজ্জনং ৰেদিতব্বং। ‘‘একাহপ্পটিচ্ছন্নাদিৰসেন পঞ্চা’’তি ইদং একাহপ্পটিচ্ছন্নাদীনং চতুন্নং পচ্চেকপরিৰাসদানমানত্তদানঅব্ভানানি একেকং কত্ৰা ৰুত্তং। ‘‘অন্তরাপত্তিৰসেন চতস্সো’’তি ইদম্পি মানত্তদানঅব্ভানানি তস্মিং তস্মিং মূলাযপটিকস্সনে একত্তং আরোপেত্ৰা ৰুত্তং।
108.Sacepaṭicchannāti nikkhittavattenāpannāpattiṃ sandhāya vuttaṃ. Pāḷiyaṃ pañcāhappaṭicchannavāre antarāpattikathāyaṃ ‘‘evañca pana, bhikkhave, chārattaṃ mānattaṃ dātabba’’nti idaṃ mūlāyapaṭikassanākammavācānantarameva dātuṃ vuttaṃ na hoti. Mūlāyapaṭikassitassa pana pañcadivasāni parivasitvā yācitassa mānattacaraṇakāle āpannāya tatiyāya antarāpattiyā appaṭicchannāya mānattadānaṃ sandhāya vuttaṃ. Evañca dinnamānattassa ekena chārattena pubbe dinnamānattāhi tīhi āpattīhi saha catassannampi āpattīnaṃ mānattaṃ ciṇṇameva hoti. Iminā pana nayena abbhānārahakāle āpannāya antarāpattiyā, pakkhappaṭicchannavāre antarāpattīsu ca paṭipajjanaṃ veditabbaṃ. ‘‘Ekāhappaṭicchannādivasena pañcā’’ti idaṃ ekāhappaṭicchannādīnaṃ catunnaṃ paccekaparivāsadānamānattadānaabbhānāni ekekaṃ katvā vuttaṃ. ‘‘Antarāpattivasena catasso’’ti idampi mānattadānaabbhānāni tasmiṃ tasmiṃ mūlāyapaṭikassane ekattaṃ āropetvā vuttaṃ.
পটিচ্ছন্নপরিৰাসকথাৰণ্ণনা নিট্ঠিতা।
Paṭicchannaparivāsakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
একাহপ্পটিচ্ছন্নপরিৰাসং • Ekāhappaṭicchannaparivāsaṃ
পঞ্চাহপ্পটিচ্ছন্নপরিৰাসো • Pañcāhappaṭicchannaparivāso
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / পটিচ্ছন্নপরিৰাসকথা • Paṭicchannaparivāsakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
পরিৰাসকথাৰণ্ণনা • Parivāsakathāvaṇṇanā
পটিচ্ছন্নপরিৰাসকথাৰণ্ণনা • Paṭicchannaparivāsakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
পরিৰাসকথাৰণ্ণনা • Parivāsakathāvaṇṇanā
পটিচ্ছন্নপরিৰাসাদিকথাৰণ্ণনা • Paṭicchannaparivāsādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / পটিচ্ছন্নপরিৰাসকথা • Paṭicchannaparivāsakathā
