| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. පටිච්‌ඡන්‌නසුත්‌තං
9. Paṭicchannasuttaṃ
132. ‘‘තීණිමානි, භික්‌ඛවෙ, පටිච්‌ඡන්‌නානි ආවහන්‌ති 1, නො විවටානි. කතමානි තීණි? මාතුගාමො, භික්‌ඛවෙ, පටිච්‌ඡන්‌නො ආවහති, නො විවටො; බ්‍රාහ්‌මණානං, භික්‌ඛවෙ, මන්‌තා පටිච්‌ඡන්‌නා ආවහන්‌ති, නො විවටා ; මිච්‌ඡාදිට්‌ඨි, භික්‌ඛවෙ, පටිච්‌ඡන්‌නා ආවහති, නො විවටා. ඉමානි ඛො, භික්‌ඛවෙ, තීණි පටිච්‌ඡන්‌නානි ආවහන්‌ති, නො විවටානි.
132. ‘‘Tīṇimāni, bhikkhave, paṭicchannāni āvahanti 2, no vivaṭāni. Katamāni tīṇi? Mātugāmo, bhikkhave, paṭicchanno āvahati, no vivaṭo; brāhmaṇānaṃ, bhikkhave, mantā paṭicchannā āvahanti, no vivaṭā ; micchādiṭṭhi, bhikkhave, paṭicchannā āvahati, no vivaṭā. Imāni kho, bhikkhave, tīṇi paṭicchannāni āvahanti, no vivaṭāni.
‘‘තීණිමානි , භික්‌ඛවෙ, විවටානි විරොචන්‌ති, නො පටිච්‌ඡන්‌නානි. කතමානි තීණි? චන්‌දමණ්‌ඩලං, භික්‌ඛවෙ, විවටං විරොචති, නො පටිච්‌ඡන්‌නං; සූරියමණ්‌ඩලං, භික්‌ඛවෙ, විවටං විරොචති, නො පටිච්‌ඡන්‌නං; තථාගතප්‌පවෙදිතො ධම්‌මවිනයො, භික්‌ඛවෙ, විවටො විරොචති, නො පටිච්‌ඡන්‌නො. ඉමානි ඛො, භික්‌ඛවෙ, තීණි විවටානි විරොචන්‌ති, නො පටිච්‌ඡන්‌නානී’’ති. නවමං.
‘‘Tīṇimāni , bhikkhave, vivaṭāni virocanti, no paṭicchannāni. Katamāni tīṇi? Candamaṇḍalaṃ, bhikkhave, vivaṭaṃ virocati, no paṭicchannaṃ; sūriyamaṇḍalaṃ, bhikkhave, vivaṭaṃ virocati, no paṭicchannaṃ; tathāgatappavedito dhammavinayo, bhikkhave, vivaṭo virocati, no paṭicchanno. Imāni kho, bhikkhave, tīṇi vivaṭāni virocanti, no paṭicchannānī’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. පටිච්‌ඡන්‌නසුත්‌තවණ්‌ණනා • 9. Paṭicchannasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9. පටිච්‌ඡන්‌නසුත්‌තවණ්‌ණනා • 9. Paṭicchannasuttavaṇṇanā
