| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၆. ပာဋိဒေသနီယကဏ္ဍံ
6. Pāṭidesanīyakaṇḍaṃ
၁၄၆. ယံ တေန ဘဂဝတာ ဇာနတာ ပသ္သတာ အရဟတာ သမ္မာသမ္ဗုဒ္ဓေန အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခာဒနီယံ ဝာ ဘောဇနီယံ ဝာ သဟတ္ထာ ပဋိဂ္ဂဟေတ္ဝာ ဘုဉ္ဇန္တသ္သ ပာဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော အာမိသံ ပဋိဂ္ဂဟေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒ္ဝီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝာစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝာစတော။ပေ.။။
146. Yaṃ tena bhagavatā jānatā passatā arahatā sammāsambuddhena aññātikāya bhikkhuniyā antaragharaṃ paviṭṭhāya hatthato khādanīyaṃ vā bhojanīyaṃ vā sahatthā paṭiggahetvā bhuñjantassa pāṭidesanīyaṃ kattha paññattanti? Sāvatthiyaṃ paññattaṃ. Kaṃ ārabbhāti? Aññataraṃ bhikkhuṃ ārabbha. Kismiṃ vatthusminti? Aññataro bhikkhu aññātikāya bhikkhuniyā antaragharaṃ paviṭṭhāya hatthato āmisaṃ paṭiggahesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
၁၄၇. ဘိက္ခုနိယာ ဝောသာသန္တိယာ န နိဝာရေတ္ဝာ ဘုဉ္ဇန္တသ္သ ပာဋိဒေသနီယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုနိယော ဝောသာသန္တိယော န နိဝာရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒ္ဝီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝာစတော စ သမုဋ္ဌာတိ, န စိတ္တတော; သိယာ ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
147. Bhikkhuniyā vosāsantiyā na nivāretvā bhuñjantassa pāṭidesanīyaṃ kattha paññattanti? Rājagahe paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhuniyo vosāsantiyo na nivāresuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato ca vācato ca samuṭṭhāti, na cittato; siyā kāyato ca vācato ca cittato ca samuṭṭhāti…pe….
၁၄၈. သေက္ခသမ္မတေသု ကုလေသု ခာဒနီယံ ဝာ ဘောဇနီယံ ဝာ သဟတ္ထာ ပဋိဂ္ဂဟေတ္ဝာ ဘုဉ္ဇန္တသ္သ ပာဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ န မတ္တံ ဇာနိတ္ဝာ ပဋိဂ္ဂဟေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဒ္ဝေ အနုပညတ္တိယော။ ဆန္နံ အာပတ္တိသမုဋ္ဌာနာနံ ဒ္ဝီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝာစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝာစတော။ပေ.။။
148. Sekkhasammatesu kulesu khādanīyaṃ vā bhojanīyaṃ vā sahatthā paṭiggahetvā bhuñjantassa pāṭidesanīyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū na mattaṃ jānitvā paṭiggahesuṃ, tasmiṃ vatthusmiṃ. Ekā paññatti, dve anupaññattiyo. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
၁၄၉. အာရညကေသု သေနာသနေသု ပုဗ္ဗေ အပ္ပဋိသံဝိဒိတံ ခာဒနီယံ ဝာ ဘောဇနီယံ ဝာ အဇ္ဈာရာမေ သဟတ္ထာ ပဋိဂ္ဂဟေတ္ဝာ ဘုဉ္ဇန္တသ္သ ပာဋိဒေသနီယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ။ သမ္ဗဟုလာ ဘိက္ခူ အာရာမေ စောရေ ပဋိဝသန္တေ နာရောစေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒ္ဝီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝာစတော စ သမုဋ္ဌာတိ, န စိတ္တတော; သိယာ ကာယတော စ ဝာစတော စ စိတ္တတော စ သမုဋ္ဌာတိ။ပေ.။။
149. Āraññakesu senāsanesu pubbe appaṭisaṃviditaṃ khādanīyaṃ vā bhojanīyaṃ vā ajjhārāme sahatthā paṭiggahetvā bhuñjantassa pāṭidesanīyaṃ kattha paññattanti? Sakkesu paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti. Sambahulā bhikkhū ārāme core paṭivasante nārocesuṃ, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato ca vācato ca samuṭṭhāti, na cittato; siyā kāyato ca vācato ca cittato ca samuṭṭhāti…pe….
စတ္တာရော ပာဋိဒေသနီယာ နိဋ္ဌိတာ။
Cattāro pāṭidesanīyā niṭṭhitā.
တသ္သုဒ္ဒာနံ –
Tassuddānaṃ –
အညာတိကာယ ဝောသာသံ၊ သေက္ခအာရညကေန စ။
Aññātikāya vosāsaṃ, sekkhaāraññakena ca;
ပာဋိဒေသနီယာ စတ္တာရော၊ သမ္ဗုဒ္ဓေန ပကာသိတာတိ။
Pāṭidesanīyā cattāro, sambuddhena pakāsitāti.
