| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
6. පාටිදෙසනීයකණ්‌ඩං
6. Pāṭidesanīyakaṇḍaṃ
146. යං තෙන භගවතා ජානතා පස්‌සතා අරහතා සම්‌මාසම්‌බුද්‌ධෙන අඤ්‌ඤාතිකාය භික්‌ඛුනියා අන්‌තරඝරං පවිට්‌ඨාය හත්‌ථතො ඛාදනීයං වා භොජනීයං වා සහත්‌ථා පටිග්‌ගහෙත්‌වා භුඤ්‌ජන්‌තස්‌ස පාටිදෙසනීයං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? අඤ්‌ඤතරං භික්‌ඛුං ආරබ්‌භ. කිස්‌මිං වත්‌ථුස්‌මින්‌ති? අඤ්‌ඤතරො භික්‌ඛු අඤ්‌ඤාතිකාය භික්‌ඛුනියා අන්‌තරඝරං පවිට්‌ඨාය හත්‌ථතො ආමිසං පටිග්‌ගහෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති – සියා කායතො සමුට්‌ඨාති, න වාචතො න චිත්‌තතො; සියා කායතො ච චිත්‌තතො ච සමුට්‌ඨාති, න වාචතො…පෙ.….
146. Yaṃ tena bhagavatā jānatā passatā arahatā sammāsambuddhena aññātikāya bhikkhuniyā antaragharaṃ paviṭṭhāya hatthato khādanīyaṃ vā bhojanīyaṃ vā sahatthā paṭiggahetvā bhuñjantassa pāṭidesanīyaṃ kattha paññattanti? Sāvatthiyaṃ paññattaṃ. Kaṃ ārabbhāti? Aññataraṃ bhikkhuṃ ārabbha. Kismiṃ vatthusminti? Aññataro bhikkhu aññātikāya bhikkhuniyā antaragharaṃ paviṭṭhāya hatthato āmisaṃ paṭiggahesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
147. භික්‌ඛුනියා වොසාසන්‌තියා න නිවාරෙත්‌වා භුඤ්‌ජන්‌තස්‌ස පාටිදෙසනීයං කත්‌ථ පඤ්‌ඤත්‌තන්‌ති? රාජගහෙ පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ භික්‌ඛුනියො වොසාසන්‌තියො න නිවාරෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති – සියා කායතො ච වාචතො ච සමුට්‌ඨාති, න චිත්‌තතො; සියා කායතො ච වාචතො ච චිත්‌තතො ච සමුට්‌ඨාති…පෙ.….
147. Bhikkhuniyā vosāsantiyā na nivāretvā bhuñjantassa pāṭidesanīyaṃ kattha paññattanti? Rājagahe paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū bhikkhuniyo vosāsantiyo na nivāresuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato ca vācato ca samuṭṭhāti, na cittato; siyā kāyato ca vācato ca cittato ca samuṭṭhāti…pe….
148. සෙක්‌ඛසම්‌මතෙසු කුලෙසු ඛාදනීයං වා භොජනීයං වා සහත්‌ථා පටිග්‌ගහෙත්‌වා භුඤ්‌ජන්‌තස්‌ස පාටිදෙසනීයං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛූ න මත්‌තං ජානිත්‌වා පටිග්‌ගහෙසුං, තස්‌මිං වත්‌ථුස්‌මිං. එකා පඤ්‌ඤත්‌ති, ද්‌වෙ අනුපඤ්‌ඤත්‌තියො. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති – සියා කායතො සමුට්‌ඨාති, න වාචතො න චිත්‌තතො; සියා කායතො ච චිත්‌තතො ච සමුට්‌ඨාති, න වාචතො…පෙ.….
148. Sekkhasammatesu kulesu khādanīyaṃ vā bhojanīyaṃ vā sahatthā paṭiggahetvā bhuñjantassa pāṭidesanīyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū na mattaṃ jānitvā paṭiggahesuṃ, tasmiṃ vatthusmiṃ. Ekā paññatti, dve anupaññattiyo. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
149. ආරඤ්‌ඤකෙසු සෙනාසනෙසු පුබ්‌බෙ අප්‌පටිසංවිදිතං ඛාදනීයං වා භොජනීයං වා අජ්‌ඣාරාමෙ සහත්‌ථා පටිග්‌ගහෙත්‌වා භුඤ්‌ජන්‌තස්‌ස පාටිදෙසනීයං කත්‌ථ පඤ්‌ඤත්‌තන්‌ති? සක්‌කෙසු පඤ්‌ඤත්‌තං. කං ආරබ්‌භාති? සම්‌බහුලෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති. සම්‌බහුලා භික්‌ඛූ ආරාමෙ චොරෙ පටිවසන්‌තෙ නාරොචෙසුං, තස්‌මිං වත්‌ථුස්‌මිං. එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති – සියා කායතො ච වාචතො ච සමුට්‌ඨාති, න චිත්‌තතො; සියා කායතො ච වාචතො ච චිත්‌තතො ච සමුට්‌ඨාති…පෙ.….
149. Āraññakesu senāsanesu pubbe appaṭisaṃviditaṃ khādanīyaṃ vā bhojanīyaṃ vā ajjhārāme sahatthā paṭiggahetvā bhuñjantassa pāṭidesanīyaṃ kattha paññattanti? Sakkesu paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti. Sambahulā bhikkhū ārāme core paṭivasante nārocesuṃ, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato ca vācato ca samuṭṭhāti, na cittato; siyā kāyato ca vācato ca cittato ca samuṭṭhāti…pe….
චත්‌තාරො පාටිදෙසනීයා නිට්‌ඨිතා.
Cattāro pāṭidesanīyā niṭṭhitā.
තස්‌සුද්‌දානං –
Tassuddānaṃ –
අඤ්‌ඤාතිකාය වොසාසං, සෙක්‌ඛආරඤ්‌ඤකෙන ච;
Aññātikāya vosāsaṃ, sekkhaāraññakena ca;
පාටිදෙසනීයා චත්‌තාරො, සම්‌බුද්‌ධෙන පකාසිතාති.
Pāṭidesanīyā cattāro, sambuddhena pakāsitāti.
