| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
வினயபிடகே
Vinayapiṭake
வினயவினிச்ச²ய-டீகா (து³தியோ பா⁴கோ³)
Vinayavinicchaya-ṭīkā (dutiyo bhāgo)
பாடிதே³ஸனீயகதா²வண்ணனா
Pāṭidesanīyakathāvaṇṇanā
1830-1. ஏவங் நாதிஸங்கே²பவித்தா²ரனயேன த்³வேனவுதி பாசித்தியானி த³ஸ்ஸெத்வா தத³னந்தரங் நித்³தி³ட்டே² பாடிதே³ஸனீயே த³ஸ்ஸேதுமாஹ ‘‘யோ சந்தரக⁴ர’’ந்திஆதி³. தத்த² அந்தரக⁴ரந்தி ரதி²காதி³மாஹ. யதா²ஹ ‘‘அந்தரக⁴ரங் நாம ரதி²கா ப்³யூஹங் ஸிங்கா⁴டகங் க⁴ர’’ந்தி.
1830-1. Evaṃ nātisaṅkhepavitthāranayena dvenavuti pācittiyāni dassetvā tadanantaraṃ niddiṭṭhe pāṭidesanīye dassetumāha ‘‘yo cantaraghara’’ntiādi. Tattha antaragharanti rathikādimāha. Yathāha ‘‘antaragharaṃ nāma rathikā byūhaṃ siṅghāṭakaṃ ghara’’nti.
யோ பன பி⁴க்கு² அந்தரக⁴ரங் பவிட்டா²ய அஞ்ஞாதிகாய பி⁴க்கு²னியா ஹத்த²தோ யங் கிஞ்சி கா²த³னங், போ⁴ஜனம்பி வா ஸஹத்தா² படிக்³க³ண்ஹெய்ய, தஸ்ஸ பி⁴க்கு²னோ க³ஹணே து³க்கடங், போ⁴கே³ அஜ்ஜோ²ஹாரே பாடிதே³ஸனீயங் ஸியாதி யோஜனா.
Yo pana bhikkhu antaragharaṃ paviṭṭhāya aññātikāya bhikkhuniyā hatthato yaṃ kiñci khādanaṃ, bhojanampi vā sahatthā paṭiggaṇheyya, tassa bhikkhuno gahaṇe dukkaṭaṃ, bhoge ajjhohāre pāṭidesanīyaṃ siyāti yojanā.
இதோ பட்டா²ய சதஸ்ஸோ கா³தா² உப்படிபாடியா பொத்த²கேஸு லிகி²தா, தாஸங் அயங் படிபாடி – ‘‘எத்த²ந்தரக⁴ர’’ந்தி ததியா, ‘‘தஸ்மா பி⁴க்கு²னியா’’தி சதுத்தீ², ‘‘ரதி²காதீ³ஸூ’’தி பஞ்சமீ , ‘‘ரதி²காயபி வா’’தி ச²ட்டீ². படிபாடி பனாயங் மாதிகட்ட²கத²க்கமேன வேதி³தப்³பா³. இமாய படிபாடியா தாஸங் அத்த²வண்ணனா ஹோதி –
Ito paṭṭhāya catasso gāthā uppaṭipāṭiyā potthakesu likhitā, tāsaṃ ayaṃ paṭipāṭi – ‘‘etthantaraghara’’nti tatiyā, ‘‘tasmā bhikkhuniyā’’ti catutthī, ‘‘rathikādīsū’’ti pañcamī , ‘‘rathikāyapi vā’’ti chaṭṭhī. Paṭipāṭi panāyaṃ mātikaṭṭhakathakkamena veditabbā. Imāya paṭipāṭiyā tāsaṃ atthavaṇṇanā hoti –
1832-3. புரிமகா³தா²த்³வயேன பத³பா⁴ஜனாக³தஸாமஞ்ஞவினிச்ச²யங் த³ஸ்ஸெத்வா இதா³னி அட்ட²கதா²க³தங் விஸேஸங் த³ஸ்ஸேதுமாஹ ‘‘எத்தா²’’திஆதி³. தத்த² எத்தா²தி இமஸ்மிங் பட²மபாடிதே³ஸனீயஸிக்கா²பதே³. தஸ்ஸாதி அஞ்ஞாதிகபி⁴க்கு²னியா. வாக்யதோதி ‘‘அந்தரக⁴ரங் பவிட்டா²யா’’தி வசனதோ. ஹி-ஸத்³தோ³ ஹேதும்ஹி. யஸ்மா பி⁴க்கு²ஸ்ஸ டி²தட்டா²னங் நப்பமாணந்தி அட்ட²கதா²ய (பாசி॰ அட்ட²॰ 553) வண்ணிதங், தஸ்மா ஆராமாதீ³ஸு ட²த்வா தெ³ந்தியா பி⁴க்கு²னியா ஹத்த²தோ வீதி²ஆதீ³ஸு ட²த்வா யோ படிக்³க³ண்ஹெய்ய சே, ஏவங் படிக்³க³ண்ஹதோ தஸ்ஸ பி⁴க்கு²னோ ந தோ³ஸோதி யோஜனா. பரிபோ⁴க³ஸ்ஸ படிக்³க³ஹணமூலகத்தா ந தோ³ஸோ. ‘‘படிக்³க³ண்ஹதோ’’தி இமினா பரிபோ⁴கே³ பாடிதே³ஸனீயாபா⁴வோ ச தீ³பிதோ ஹோதி.
1832-3. Purimagāthādvayena padabhājanāgatasāmaññavinicchayaṃ dassetvā idāni aṭṭhakathāgataṃ visesaṃ dassetumāha ‘‘etthā’’tiādi. Tattha etthāti imasmiṃ paṭhamapāṭidesanīyasikkhāpade. Tassāti aññātikabhikkhuniyā. Vākyatoti ‘‘antaragharaṃ paviṭṭhāyā’’ti vacanato. Hi-saddo hetumhi. Yasmā bhikkhussa ṭhitaṭṭhānaṃ nappamāṇanti aṭṭhakathāya (pāci. aṭṭha. 553) vaṇṇitaṃ, tasmā ārāmādīsu ṭhatvā dentiyā bhikkhuniyā hatthato vīthiādīsu ṭhatvā yo paṭiggaṇheyya ce, evaṃ paṭiggaṇhato tassa bhikkhuno na dosoti yojanā. Paribhogassa paṭiggahaṇamūlakattā na doso. ‘‘Paṭiggaṇhato’’ti iminā paribhoge pāṭidesanīyābhāvo ca dīpito hoti.
1834. ஸசே பி⁴க்கு²னீ ரதி²காதீ³ஸு ட²த்வா போ⁴ஜனங் தே³தி, பி⁴க்கு² அந்தராராமே ட²த்வா படிக்³க³ண்ஹாதி சே, தஸ்ஸ ஆபத்தீதி யோஜனா. கா³தா²ப³ந்த⁴வஸேன ‘‘பி⁴க்கு²னி போ⁴ஜன’’ந்தி ரஸ்ஸத்தங். ஆபத்தீதி ச படிக்³க³ஹணபரிபோ⁴கே³ஸு து³க்கடபாடிதே³ஸனீயாபத்தியோ ஸந்தா⁴ய வுத்தங்.
1834. Sace bhikkhunī rathikādīsu ṭhatvā bhojanaṃ deti, bhikkhu antarārāme ṭhatvā paṭiggaṇhāti ce, tassa āpattīti yojanā. Gāthābandhavasena ‘‘bhikkhuni bhojana’’nti rassattaṃ. Āpattīti ca paṭiggahaṇaparibhogesu dukkaṭapāṭidesanīyāpattiyo sandhāya vuttaṃ.
1835. ரதி²காதீ³ஸு ட²த்வா பி⁴க்கு²னீ போ⁴ஜனங் தே³தி சே, தங் ரதி²காயபி வா…பே॰… அயங் நயோதி யோஜனா. தத்த² ரதி²காதி ரச்சா². ப்³யூஹந்தி அனிப்³பி³ஜ்ஜி²த்வா டி²தா க³தபச்சாக³தரச்சா². ஸந்தி⁴ நாம க⁴ரஸந்தி⁴. ஸிங்கா⁴டகந்தி சதுக்கோணங் வா திகோணங் வா மக்³க³ஸமோதா⁴னட்டா²னங். அயங் நயோதி ‘‘ஆபத்தீ’’தி அனந்தரகா³தா²ய வுத்தனயோ.
1835. Rathikādīsu ṭhatvā bhikkhunī bhojanaṃ deti ce, taṃ rathikāyapi vā…pe… ayaṃ nayoti yojanā. Tattha rathikāti racchā. Byūhanti anibbijjhitvā ṭhitā gatapaccāgataracchā. Sandhi nāma gharasandhi. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Ayaṃ nayoti ‘‘āpattī’’ti anantaragāthāya vuttanayo.
1837. ஆமிஸேன அஸம்பி⁴ன்னரஸங் ஸந்தா⁴ய இத³ங் து³க்கடங் பா⁴ஸிதங். ஆமிஸேன ஸம்பி⁴ன்னே ஏகரஸே யாமகாலிகாதி³ம்ஹி படிக்³க³ஹெத்வா அஜ்ஜோ²ஹாரே பாடிதே³ஸனீயாபத்தி ஸியாதி யோஜனா.
1837. Āmisena asambhinnarasaṃ sandhāya idaṃ dukkaṭaṃ bhāsitaṃ. Āmisena sambhinne ekarase yāmakālikādimhi paṭiggahetvā ajjhohāre pāṭidesanīyāpatti siyāti yojanā.
1838. ஏகதோஉபஸம்பன்னஹத்த²தோதி பி⁴க்கு²னீனங் ஸந்திகே உபஸம்பன்னாய ஹத்த²தோ. யதா²ஹ ‘‘ஏகதோஉபஸம்பன்னாயாதி பி⁴க்கு²னீனங் ஸந்திகே உபஸம்பன்னாயா’’தி (பாசி॰ அட்ட²॰ 553). பி⁴க்கூ²னங் ஸந்திகே உபஸம்பன்னாய பன யதா²வத்து²கமேவாதி.
1838.Ekatoupasampannahatthatoti bhikkhunīnaṃ santike upasampannāya hatthato. Yathāha ‘‘ekatoupasampannāyāti bhikkhunīnaṃ santike upasampannāyā’’ti (pāci. aṭṭha. 553). Bhikkhūnaṃ santike upasampannāya pana yathāvatthukamevāti.
1839. அஞ்ஞாதிகாய ஞாதிகஸஞ்ஞிஸ்ஸ, ததே²வ விமதிஸ்ஸ ச து³க்கடந்தி யோஜனா.
1839. Aññātikāya ñātikasaññissa, tatheva vimatissa ca dukkaṭanti yojanā.
1840. அஞ்ஞாதிகாய தா³பெந்தியா பூ⁴மியா நிக்கி²பித்வா த³த³மானாய வா அந்தராராமாதீ³ஸு ட²த்வா தெ³ந்தியா படிக்³க³ண்ஹதோ பி⁴க்கு²ஸ்ஸ அனாபத்தீதி யோஜனா. அந்தராராமாதீ³ஸூதி எத்த² ஆதி³-ஸத்³தே³ன பி⁴க்கு²னுபஸ்ஸயதித்தி²யஸெய்யாபடிக்கமனாதி³ங் ஸங்க³ண்ஹாதி. படிக்கமனங் நாம போ⁴ஜனஸாலா.
1840. Aññātikāya dāpentiyā bhūmiyā nikkhipitvā dadamānāya vā antarārāmādīsu ṭhatvā dentiyā paṭiggaṇhato bhikkhussa anāpattīti yojanā. Antarārāmādīsūti ettha ādi-saddena bhikkhunupassayatitthiyaseyyāpaṭikkamanādiṃ saṅgaṇhāti. Paṭikkamanaṃ nāma bhojanasālā.
1841. கா³மதோ ப³ஹி நீஹரித்வா தே³தீதி யோஜனா.
1841. Gāmato bahi nīharitvā detīti yojanā.
1842. ஹத்த²தோதி எத்த² ‘‘க³ஹணே’’தி ஸேஸோ. ததா²தி அனாபத்தி. ஸமுட்டா²னங் இத³ங் ஸிக்கா²பத³ங் ஏளகலோமேன ஸமங் மதந்தி யோஜனா.
1842.Hatthatoti ettha ‘‘gahaṇe’’ti seso. Tathāti anāpatti. Samuṭṭhānaṃ idaṃ sikkhāpadaṃ eḷakalomena samaṃ matanti yojanā.
பட²மபாடிதே³ஸனீயகதா²வண்ணனா.
Paṭhamapāṭidesanīyakathāvaṇṇanā.
1843-4. அவுத்தேதி வக்க²மானநயேன அவுத்தே. ஏகேனபி ச பி⁴க்கு²னாதி ஸம்ப³ந்தோ⁴. அபஸக்காதி அபக³ச்ச². ஆதி³-அத்த²வாசினா இதி-ஸத்³தே³ன ‘‘அபஸக்க தாவ, ப⁴கி³னி, யாவ பி⁴க்கூ² பு⁴ஞ்ஜந்தீ’’தி வாக்யஸேஸோ ஸங்க³ஹிதோதி த³ட்ட²ப்³போ³. இமினா அபஸாத³னாகாரோ ஸந்த³ஸ்ஸிதோ. ‘‘ஏகேனபி ச பி⁴க்கு²னா’’தி இமினா அவகங்ஸோ த³ஸ்ஸிதோ. உக்கங்ஸோ பன ‘‘தேஹி பி⁴க்கூ²ஹி ஸா பி⁴க்கு²னீ அபஸாதே³தப்³பா³’’தி பாளிதோபி த³ட்ட²ப்³போ³. ‘‘ஆமிஸ’’ந்தி ஸாமஞ்ஞவசனேபி பஞ்சன்னங் போ⁴ஜனானங் அஞ்ஞதரஸ்ஸேவ க³ஹணங். யதா²ஹ ‘‘பஞ்சன்னங் போ⁴ஜனானங் அஞ்ஞதரேனா’’தி. போ⁴கே³தி ச ஏகதோஉபஸம்பன்னந்தி ச வுத்தத்த²மேவ.
1843-4.Avutteti vakkhamānanayena avutte. Ekenapi ca bhikkhunāti sambandho. Apasakkāti apagaccha. Ādi-atthavācinā iti-saddena ‘‘apasakka tāva, bhagini, yāva bhikkhū bhuñjantī’’ti vākyaseso saṅgahitoti daṭṭhabbo. Iminā apasādanākāro sandassito. ‘‘Ekenapi ca bhikkhunā’’ti iminā avakaṃso dassito. Ukkaṃso pana ‘‘tehi bhikkhūhi sā bhikkhunī apasādetabbā’’ti pāḷitopi daṭṭhabbo. ‘‘Āmisa’’nti sāmaññavacanepi pañcannaṃ bhojanānaṃ aññatarasseva gahaṇaṃ. Yathāha ‘‘pañcannaṃ bhojanānaṃ aññatarenā’’ti. Bhogeti ca ekatoupasampannanti ca vuttatthameva.
1845. ததே²வாதி து³க்கடங். தத்தா²தி அனுபஸம்பன்னாய.
1845.Tathevāti dukkaṭaṃ. Tatthāti anupasampannāya.
1846. அத்தனோ ப⁴த்தே தி³ன்னேபி இமினா ஸிக்கா²பதே³ன அனாபத்தி, புரிமஸிக்கா²பதே³ன பன ஆபத்திஸம்ப⁴வா ‘‘ந தே³தீ’’தி வுத்தங். யதா²ஹ ‘‘அத்தனோ ப⁴த்தங் தா³பேதி, ந தே³தீதி எத்த² ஸசேபி அத்தனோ ப⁴த்தங் தே³தி, இமினா ஸிக்கா²பதே³ன அனாபத்தியேவ, புரிமஸிக்கா²பதே³ன ஆபத்தீ’’தி (பாசி॰ அட்ட²॰ 558). ததா²தி அனாபத்தி. உப⁴யஸிக்கா²பதே³ஹிபி அனாபத்திங் த³ஸ்ஸேதுமாஹ ‘‘பதே³தி சே’’தி. யதா²ஹ ‘‘அஞ்ஞேஸங் ப⁴த்தங் தே³தி, ந தா³பேதீதி எத்த² பன ஸசேபி தா³பெய்ய, இமினா ஸிக்கா²பதே³ன ஆபத்தி ப⁴வெய்ய, தெ³ந்தியா பன நேவ இமினா, ந புரிமேன ஆபத்தீ’’தி.
1846. Attano bhatte dinnepi iminā sikkhāpadena anāpatti, purimasikkhāpadena pana āpattisambhavā ‘‘na detī’’ti vuttaṃ. Yathāha ‘‘attano bhattaṃ dāpeti, na detīti ettha sacepi attano bhattaṃ deti, iminā sikkhāpadena anāpattiyeva, purimasikkhāpadena āpattī’’ti (pāci. aṭṭha. 558). Tathāti anāpatti. Ubhayasikkhāpadehipi anāpattiṃ dassetumāha ‘‘padeti ce’’ti. Yathāha ‘‘aññesaṃ bhattaṃ deti, na dāpetīti ettha pana sacepi dāpeyya, iminā sikkhāpadena āpatti bhaveyya, dentiyā pana neva iminā, na purimena āpattī’’ti.
1847. பி⁴க்கு²னீ யங் ந தி³ன்னங், தங் தா³பேதி, யத்த² வா ந தி³ன்னங், தத்த² தா³பேதி, தம்பி ஸப்³பே³ஸங் மித்தாமித்தானங் ஸமங் தா³பேதி, தத்தா²பி அனாபத்தி.
1847. Bhikkhunī yaṃ na dinnaṃ, taṃ dāpeti, yattha vā na dinnaṃ, tattha dāpeti, tampi sabbesaṃ mittāmittānaṃ samaṃ dāpeti, tatthāpi anāpatti.
1848. ஸிக்க²மானா வா ஸாமணேரிகா வா ‘‘இத⁴ ஸூபங் தே³த², ஓத³னங் தே³தா²’’தி வோஸாஸந்தீ விதா⁴னங் கரொந்தீ டி²தா, தங் அனபஸாதெ³ந்தஸ்ஸ அனாபத்தி. பஞ்சேவ போ⁴ஜனானி வினா அஞ்ஞங் வோஸாஸந்திங் பி⁴க்கு²னிங் அனபஸாதெ³ந்தஸ்ஸ அனாபத்தி. அனபஸாதெ³ந்தஸ்ஸ உம்மத்தகாதி³னோபி அனாபத்தீதி யோஜனா.
1848. Sikkhamānā vā sāmaṇerikā vā ‘‘idha sūpaṃ detha, odanaṃ dethā’’ti vosāsantī vidhānaṃ karontī ṭhitā, taṃ anapasādentassa anāpatti. Pañceva bhojanāni vinā aññaṃ vosāsantiṃ bhikkhuniṃ anapasādentassa anāpatti. Anapasādentassa ummattakādinopi anāpattīti yojanā.
1849. ஸமுட்டா²னந்தி எத்த² ‘‘இமஸ்ஸா’’தி ஸேஸோ. போ⁴ஜனங் கிரியங், வோஸாஸந்தியா அனிவாரணங் அகிரியந்தி ஏவமித³ங் க்ரியாக்ரியங்.
1849.Samuṭṭhānanti ettha ‘‘imassā’’ti seso. Bhojanaṃ kiriyaṃ, vosāsantiyā anivāraṇaṃ akiriyanti evamidaṃ kriyākriyaṃ.
து³தியபாடிதே³ஸனீயகதா²வண்ணனா.
Dutiyapāṭidesanīyakathāvaṇṇanā.
1850-1. ஸெக்க²ந்தி ஸம்மதேதி ‘‘ஸெக்க²ஸம்மதங் நாம குலங் யங் குலங் ஸத்³தா⁴ய வட்³ட⁴தி, போ⁴கே³ன ஹாயதி, ஏவரூபஸ்ஸ குலஸ்ஸ ஞத்திது³தியேன கம்மேன ஸெக்க²ஸம்முதி தி³ன்னா ஹோதீ’’தி (பாசி॰ 567) வுத்தங் இத³ங் குலங் ஸெக்க²ஸம்மதங் நாம. தேனாஹ ‘‘லத்³த⁴ஸம்முதிகே குலே’’தி. லத்³தா⁴ ஸம்முதி யேனாதி விக்³க³ஹோ. க⁴ரூபசாரங் ஓக்கந்தே நிமந்திதோபி அனிமந்திதோவ ஹோதீதி ஆஹ ‘‘க⁴ரூபசாரோக்கமனா புப்³பே³வா’’தி. யதா²ஹ ‘‘அனிமந்திதோ நாம அஜ்ஜதனாய வா ஸ்வாதனாய வா அனிமந்திதோ, க⁴ரூபசாரங் ஓக்கமந்தே நிமந்தேதி, ஏஸோ அனிமந்திதோ நாமா’’தி (பாசி॰ 567).
1850-1.Sekkhanti sammateti ‘‘sekkhasammataṃ nāma kulaṃ yaṃ kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammuti dinnā hotī’’ti (pāci. 567) vuttaṃ idaṃ kulaṃ sekkhasammataṃ nāma. Tenāha ‘‘laddhasammutike kule’’ti. Laddhā sammuti yenāti viggaho. Gharūpacāraṃ okkante nimantitopi animantitova hotīti āha ‘‘gharūpacārokkamanā pubbevā’’ti. Yathāha ‘‘animantito nāma ajjatanāya vā svātanāya vā animantito, gharūpacāraṃ okkamante nimanteti, eso animantito nāmā’’ti (pāci. 567).
‘‘அகி³லானோ நாம யோ ஸக்கோதி பிண்டா³ய சரிது’’ந்தி வுத்தத்தா பி⁴க்கா²ய சரிதுங் ஸமத்தோ² அகி³லானோ நாம. க³ஹெத்வாதி ஸஹத்தா² படிக்³க³ஹெத்வா. ‘‘ஆமிஸ’’ந்தி இமினா ஸம்ப³ந்தோ⁴. யதா²ஹ ‘‘கா²த³னீயங் வா போ⁴ஜனீயங் வா ஸஹத்தா² படிக்³க³ஹெத்வா’’தி (பாசி॰ 567). க³ஹணேதி எத்த² ‘‘ஆஹாரத்தா²யா’’தி ஸேஸோ.
‘‘Agilāno nāma yo sakkoti piṇḍāya caritu’’nti vuttattā bhikkhāya carituṃ samattho agilāno nāma. Gahetvāti sahatthā paṭiggahetvā. ‘‘Āmisa’’nti iminā sambandho. Yathāha ‘‘khādanīyaṃ vā bhojanīyaṃ vā sahatthā paṭiggahetvā’’ti (pāci. 567). Gahaṇeti ettha ‘‘āhāratthāyā’’ti seso.
1853. தத்தா²தி அஸெக்க²ஸம்மதே குலே. ததே²வ பரிதீ³பிதந்தி து³க்கடங் பரிதீ³பிதங்.
1853.Tatthāti asekkhasammate kule. Tatheva paridīpitanti dukkaṭaṃ paridīpitaṃ.
1854. நிமந்திதஸ்ஸ வாதி எத்த² வா-ஸத்³தே³ன நிமந்திதஸ்ஸ அவஸேஸங் க³ண்ஹாதி. யதா²ஹ ‘‘நிமந்திதஸ்ஸ வா கி³லானஸ்ஸ வா ஸேஸகங் பு⁴ஞ்ஜதீ’’தி. அஞ்ஞேஸங் பி⁴க்கா² தத்த² தீ³யதீதி யோஜனா. தத்தா²தி தஸ்மிங் ஸெக்க²ஸம்மதே குலே.
1854.Nimantitassa vāti ettha vā-saddena nimantitassa avasesaṃ gaṇhāti. Yathāha ‘‘nimantitassa vā gilānassa vā sesakaṃ bhuñjatī’’ti. Aññesaṃ bhikkhā tattha dīyatīti yojanā. Tatthāti tasmiṃ sekkhasammate kule.
1855. யத்த² கத்த²சீதி ஆஸனஸாலாதீ³ஸு யத்த² கத்த²சி. நிச்சப⁴த்தாதி³கே வாபீதி எத்த² ஆதி³-ஸத்³தே³ன ஸலாகப⁴த்தபக்கி²கஉபோஸதி²கபாடிபதி³கப⁴த்தானங் க³ஹணங்.
1855.Yatthakatthacīti āsanasālādīsu yattha katthaci. Niccabhattādike vāpīti ettha ādi-saddena salākabhattapakkhikauposathikapāṭipadikabhattānaṃ gahaṇaṃ.
1856. த்³வாரேதி எத்த² ‘‘ட²பெத்வா’’தி ஸேஸோ. ஸம்பத்தேதி எத்த² ‘‘பச்சா²’’தி ஸேஸோ. யதா²ஹ ‘‘ஸசேபி அனாக³தே பி⁴க்கு²ம்ஹி பட²மங்யேவ நீஹரித்வா த்³வாரே ட²பெத்வா பச்சா² ஸம்பத்தஸ்ஸ தெ³ந்தி, வட்டதீ’’தி (பாசி॰ அட்ட²॰ 569).
1856.Dvāreti ettha ‘‘ṭhapetvā’’ti seso. Sampatteti ettha ‘‘pacchā’’ti seso. Yathāha ‘‘sacepi anāgate bhikkhumhi paṭhamaṃyeva nīharitvā dvāre ṭhapetvā pacchā sampattassa denti, vaṭṭatī’’ti (pāci. aṭṭha. 569).
1857. மஹாபச்சரியா(பஆசி॰ அட்ட²॰ 569) க³தவினிச்ச²யங் த³ஸ்ஸேதுமாஹ ‘‘பி⁴க்கு²’’ந்திஆதி³. ஸமுட்டா²னேளகூபமந்தி ஸமுட்டா²னதோ ஏளகலோமஸிக்கா²பத³ஸதி³ஸந்தி அத்தோ².
1857.Mahāpaccariyā(paāci. aṭṭha. 569) gatavinicchayaṃ dassetumāha ‘‘bhikkhu’’ntiādi. Samuṭṭhāneḷakūpamanti samuṭṭhānato eḷakalomasikkhāpadasadisanti attho.
ததியபாடிதே³ஸனீயகதா²வண்ணனா.
Tatiyapāṭidesanīyakathāvaṇṇanā.
1858-9. ‘‘பஞ்சன்னங் படிஸங்விதி³தங், ஏதங் அப்படிஸங்விதி³தங் நாமா’’தி வசனதோ ச இதா⁴பி ‘‘ஸஹத⁴ம்மிகஞாபித’’ந்தி வக்க²மானத்தா ச அக³ஹட்ட²-ஸத்³தே³ன பரிப்³பா³ஜகானங் க³ஹணங். வுத்தமேவ நயங் வோஹாரந்தரேன த³ஸ்ஸேதுமாஹ ‘‘இத்தி²யா புரிஸேன வா’’தி. ‘‘யானி கோ² பன தானி ஆரஞ்ஞகானி ஸேனாஸனானீ’’தி (பாசி॰ 573) வசனதோ ஆராமந்தி ஆரஞ்ஞகாராமமாஹ. ஸசே ஏவமாரோசிதங் படிஸங்விதி³தந்தி ஹி வுத்தங் பத³பா⁴ஜனேதி (பாசி॰ 573) யோஜனா. படிஸங்விதி³தந்தி பகே³வ நிவேதி³தங்.
1858-9. ‘‘Pañcannaṃ paṭisaṃviditaṃ, etaṃ appaṭisaṃviditaṃ nāmā’’ti vacanato ca idhāpi ‘‘sahadhammikañāpita’’nti vakkhamānattā ca agahaṭṭha-saddena paribbājakānaṃ gahaṇaṃ. Vuttameva nayaṃ vohārantarena dassetumāha ‘‘itthiyā purisena vā’’ti. ‘‘Yāni kho pana tāni āraññakāni senāsanānī’’ti (pāci. 573) vacanato ārāmanti āraññakārāmamāha. Sace evamārocitaṃ paṭisaṃviditanti hi vuttaṃ padabhājaneti (pāci. 573) yojanā. Paṭisaṃviditanti pageva niveditaṃ.
1860. பச்சா² யதா²ரோசிதங் தமேவ வா தஸ்ஸ ச பரிவாரங் கத்வா அஞ்ஞங் ப³ஹுங் வா ஆஹரீயது, தம்பி படிஸங்வேதி³தங் நாமாதி யோஜனா.
1860. Pacchā yathārocitaṃ tameva vā tassa ca parivāraṃ katvā aññaṃ bahuṃ vā āharīyatu, tampi paṭisaṃveditaṃ nāmāti yojanā.
1861. யாகு³யா விதி³தங் கத்வாதி எத்த² ‘‘தங் ட²பெத்வா’’தி இத³ங் ஸாமத்தி²யா லப்³ப⁴தி. இத³ம்பி விதி³தங் குருந்தி³யங் வட்டதீதி வுத்தந்தி யோஜனா.
1861.Yāguyā viditaṃ katvāti ettha ‘‘taṃ ṭhapetvā’’ti idaṃ sāmatthiyā labbhati. Idampi viditaṃ kurundiyaṃ vaṭṭatīti vuttanti yojanā.
1862. பனாதி அபி-ஸத்³த³த்தோ². அஞ்ஞானிபி குலானீதி யோஜனா. எத்த² ‘‘அஸுகங் நாம குலங் படிஸங்வேதி³தங் கத்வா கா²த³னீயாதீ³னி க³ஹெத்வா க³ச்ச²தீதி ஸுத்வா’’தி (பாசி॰ அட்ட²॰ 573) அட்ட²கதா²ஸேஸோ. தேனாதி கதபடிஸங்வேதி³தேன. தம்பி ச ஸப்³ப³ங் வட்டதீதி யோஜனா.
1862.Panāti api-saddattho. Aññānipi kulānīti yojanā. Ettha ‘‘asukaṃ nāma kulaṃ paṭisaṃveditaṃ katvā khādanīyādīni gahetvā gacchatīti sutvā’’ti (pāci. aṭṭha. 573) aṭṭhakathāseso. Tenāti katapaṭisaṃveditena. Tampi ca sabbaṃ vaṭṭatīti yojanā.
1863. ஏவங் யங் அனாரோசிதந்தி ‘‘ஆராமங் வா உபசாரங் வா பவிஸித்வா’’திஆதி³னா நயேன யங் பட²மங் அனிவேதி³தங். ‘‘ஏவ’’ந்தி இத³ங் ‘‘யங் ஆராமமனாப⁴த’’ந்தி இமினாபி யோஜேதப்³ப³ங். ஏவந்தி ‘‘தஸ்ஸ பரிவாரங் கத்வா’’திஆதி³னா பகாரேன. ‘‘தங் அஸங்விதி³தங் நாமா’’தி இத³ங் ‘‘ஸஹத⁴ம்மிகஞாபித’’ந்தி இமினாபி யோஜேதப்³ப³ங். யதா²ஹ ‘‘பஞ்சன்னங் படிஸங்விதி³தங், ஏதங் அப்படிஸங்விதி³தங் நாமா’’தி (பாசி॰ 573). அட்ட²கதா²யஞ்ச ‘‘பஞ்சன்னங் படிஸங்விதி³தந்தி பஞ்சஸு ஸஹத⁴ம்மிகேஸு யங் கிஞ்சி பேஸெத்வா ‘கா²த³னீயங் வா போ⁴ஜனீயங் வா ஆஹரிஸ்ஸாமா’தி படிஸங்விதி³தங் கதம்பி அப்படிஸங்விதி³தமேவாதி அத்தோ²’’தி (பாசி॰ அட்ட²॰ 573) வுத்தங்.
1863.Evaṃ yaṃ anārocitanti ‘‘ārāmaṃ vā upacāraṃ vā pavisitvā’’tiādinā nayena yaṃ paṭhamaṃ aniveditaṃ. ‘‘Eva’’nti idaṃ ‘‘yaṃ ārāmamanābhata’’nti imināpi yojetabbaṃ. Evanti ‘‘tassa parivāraṃ katvā’’tiādinā pakārena. ‘‘Taṃ asaṃviditaṃ nāmā’’ti idaṃ ‘‘sahadhammikañāpita’’nti imināpi yojetabbaṃ. Yathāha ‘‘pañcannaṃ paṭisaṃviditaṃ, etaṃ appaṭisaṃviditaṃ nāmā’’ti (pāci. 573). Aṭṭhakathāyañca ‘‘pañcannaṃ paṭisaṃviditanti pañcasu sahadhammikesu yaṃ kiñci pesetvā ‘khādanīyaṃ vā bhojanīyaṃ vā āharissāmā’ti paṭisaṃviditaṃ katampi appaṭisaṃviditamevāti attho’’ti (pāci. aṭṭha. 573) vuttaṃ.
1864. காராபெத்வாதி எத்த² ‘‘படிஸங்விதி³த’’ந்தி ஸேஸோ.
1864.Kārāpetvāti ettha ‘‘paṭisaṃvidita’’nti seso.
1865. பி⁴க்கு²னா வா க³ந்த்வா அந்தராமக்³கே³ க³ஹேதப்³ப³ந்தி யோஜனா. ஏவமகத்வாதி ‘‘ப³ஹிஆராமங் பேஸெத்வா’’திஆதி³னா வுத்தவிதா⁴னங் அகத்வா. உபசாரதோதி எத்த² பு⁴ம்மத்தே² தோ-பச்சயோ வேதி³தப்³போ³.
1865. Bhikkhunā vā gantvā antarāmagge gahetabbanti yojanā. Evamakatvāti ‘‘bahiārāmaṃ pesetvā’’tiādinā vuttavidhānaṃ akatvā. Upacāratoti ettha bhummatthe to-paccayo veditabbo.
1868. ‘‘படிஸங்விதி³தே’’திஆதீ³னங் பதா³னங் ‘‘அனாபத்தே வா’’தி இமினா ஸம்ப³ந்தோ⁴. படிஸங்விதி³தேதி எத்த² ‘‘கி³லானஸ்ஸா’’தி ஸேஸோ. படிஸங்விதி³தே அனாபத்தி, கி³லானஸ்ஸாபி அனாபத்தி, அப்படிஸங்விதி³தேபி தஸ்ஸ படிஸங்விதி³தஸ்ஸ அவஸேஸகே வா கி³லானஸ்ஸ அவஸேஸகே வா அனாபத்தி ஏவாதி ஸம்ப³ந்தோ⁴ . யதா²ஹ அனாபத்திவாரே ‘‘படிஸங்விதி³தஸ்ஸ வா கி³லானஸ்ஸ வா ஸேஸகங் பு⁴ஞ்ஜதீ’’தி (பாசி॰ 575). ப³ஹாராமே படிக்³க³ஹெத்வா அந்தோயேவ பு⁴ஞ்ஜதோ அஸ்ஸ அனாபத்தீதி யோஜனா. க³ஹெத்வா வாதி எத்த² வா-ஸத்³தோ³ ‘‘தஸ்ஸா’’திஆதீ³ஸுபி யோஜேதப்³போ³.
1868.‘‘Paṭisaṃvidite’’tiādīnaṃ padānaṃ ‘‘anāpatte vā’’ti iminā sambandho. Paṭisaṃviditeti ettha ‘‘gilānassā’’ti seso. Paṭisaṃvidite anāpatti, gilānassāpi anāpatti, appaṭisaṃviditepi tassa paṭisaṃviditassa avasesake vā gilānassa avasesake vā anāpatti evāti sambandho . Yathāha anāpattivāre ‘‘paṭisaṃviditassa vā gilānassa vā sesakaṃ bhuñjatī’’ti (pāci. 575). Bahārāme paṭiggahetvā antoyeva bhuñjato assa anāpattīti yojanā. Gahetvā vāti ettha vā-saddo ‘‘tassā’’tiādīsupi yojetabbo.
1869. தத்தா²தி தஸ்மிங் ஆரஞ்ஞகாராமே. கா²த³தோ அனாபத்தி ஏவாதி யோஜனா, தத்த² ‘‘அஞ்ஞேன கப்பியங் கத்வா தி³ன்னானீ’’தி ஸேஸோ.
1869.Tatthāti tasmiṃ āraññakārāme. Khādato anāpatti evāti yojanā, tattha ‘‘aññena kappiyaṃ katvā dinnānī’’ti seso.
சதுத்த²பாடிதே³ஸனீயகதா²வண்ணனா.
Catutthapāṭidesanīyakathāvaṇṇanā.
இதி வினயத்த²ஸாரஸந்தீ³பனியா வினயவினிச்ச²யவண்ணனாய
Iti vinayatthasārasandīpaniyā vinayavinicchayavaṇṇanāya
பாடிதே³ஸனீயகதா²வண்ணனா நிட்டி²தா.
Pāṭidesanīyakathāvaṇṇanā niṭṭhitā.
