| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
ৰিনযপিটকে
Vinayapiṭake
ৰিনযৰিনিচ্ছয-টীকা (দুতিযো ভাগো)
Vinayavinicchaya-ṭīkā (dutiyo bhāgo)
পাটিদেসনীযকথাৰণ্ণনা
Pāṭidesanīyakathāvaṇṇanā
১৮৩০-১. এৰং নাতিসঙ্খেপৰিত্থারনযেন দ্ৰেনৰুতি পাচিত্তিযানি দস্সেত্ৰা তদনন্তরং নিদ্দিট্ঠে পাটিদেসনীযে দস্সেতুমাহ ‘‘যো চন্তরঘর’’ন্তিআদি। তত্থ অন্তরঘরন্তি রথিকাদিমাহ। যথাহ ‘‘অন্তরঘরং নাম রথিকা ব্যূহং সিঙ্ঘাটকং ঘর’’ন্তি।
1830-1. Evaṃ nātisaṅkhepavitthāranayena dvenavuti pācittiyāni dassetvā tadanantaraṃ niddiṭṭhe pāṭidesanīye dassetumāha ‘‘yo cantaraghara’’ntiādi. Tattha antaragharanti rathikādimāha. Yathāha ‘‘antaragharaṃ nāma rathikā byūhaṃ siṅghāṭakaṃ ghara’’nti.
যো পন ভিক্খু অন্তরঘরং পৰিট্ঠায অঞ্ঞাতিকায ভিক্খুনিযা হত্থতো যং কিঞ্চি খাদনং, ভোজনম্পি ৰা সহত্থা পটিগ্গণ্হেয্য, তস্স ভিক্খুনো গহণে দুক্কটং, ভোগে অজ্ঝোহারে পাটিদেসনীযং সিযাতি যোজনা।
Yo pana bhikkhu antaragharaṃ paviṭṭhāya aññātikāya bhikkhuniyā hatthato yaṃ kiñci khādanaṃ, bhojanampi vā sahatthā paṭiggaṇheyya, tassa bhikkhuno gahaṇe dukkaṭaṃ, bhoge ajjhohāre pāṭidesanīyaṃ siyāti yojanā.
ইতো পট্ঠায চতস্সো গাথা উপ্পটিপাটিযা পোত্থকেসু লিখিতা, তাসং অযং পটিপাটি – ‘‘এত্থন্তরঘর’’ন্তি ততিযা, ‘‘তস্মা ভিক্খুনিযা’’তি চতুত্থী, ‘‘রথিকাদীসূ’’তি পঞ্চমী , ‘‘রথিকাযপি ৰা’’তি ছট্ঠী। পটিপাটি পনাযং মাতিকট্ঠকথক্কমেন ৰেদিতব্বা। ইমায পটিপাটিযা তাসং অত্থৰণ্ণনা হোতি –
Ito paṭṭhāya catasso gāthā uppaṭipāṭiyā potthakesu likhitā, tāsaṃ ayaṃ paṭipāṭi – ‘‘etthantaraghara’’nti tatiyā, ‘‘tasmā bhikkhuniyā’’ti catutthī, ‘‘rathikādīsū’’ti pañcamī , ‘‘rathikāyapi vā’’ti chaṭṭhī. Paṭipāṭi panāyaṃ mātikaṭṭhakathakkamena veditabbā. Imāya paṭipāṭiyā tāsaṃ atthavaṇṇanā hoti –
১৮৩২-৩. পুরিমগাথাদ্ৰযেন পদভাজনাগতসামঞ্ঞৰিনিচ্ছযং দস্সেত্ৰা ইদানি অট্ঠকথাগতং ৰিসেসং দস্সেতুমাহ ‘‘এত্থা’’তিআদি। তত্থ এত্থাতি ইমস্মিং পঠমপাটিদেসনীযসিক্খাপদে। তস্সাতি অঞ্ঞাতিকভিক্খুনিযা। ৰাক্যতোতি ‘‘অন্তরঘরং পৰিট্ঠাযা’’তি ৰচনতো। হি-সদ্দো হেতুম্হি। যস্মা ভিক্খুস্স ঠিতট্ঠানং নপ্পমাণন্তি অট্ঠকথায (পাচি॰ অট্ঠ॰ ৫৫৩) ৰণ্ণিতং, তস্মা আরামাদীসু ঠত্ৰা দেন্তিযা ভিক্খুনিযা হত্থতো ৰীথিআদীসু ঠত্ৰা যো পটিগ্গণ্হেয্য চে, এৰং পটিগ্গণ্হতো তস্স ভিক্খুনো ন দোসোতি যোজনা। পরিভোগস্স পটিগ্গহণমূলকত্তা ন দোসো। ‘‘পটিগ্গণ্হতো’’তি ইমিনা পরিভোগে পাটিদেসনীযাভাৰো চ দীপিতো হোতি।
1832-3. Purimagāthādvayena padabhājanāgatasāmaññavinicchayaṃ dassetvā idāni aṭṭhakathāgataṃ visesaṃ dassetumāha ‘‘etthā’’tiādi. Tattha etthāti imasmiṃ paṭhamapāṭidesanīyasikkhāpade. Tassāti aññātikabhikkhuniyā. Vākyatoti ‘‘antaragharaṃ paviṭṭhāyā’’ti vacanato. Hi-saddo hetumhi. Yasmā bhikkhussa ṭhitaṭṭhānaṃ nappamāṇanti aṭṭhakathāya (pāci. aṭṭha. 553) vaṇṇitaṃ, tasmā ārāmādīsu ṭhatvā dentiyā bhikkhuniyā hatthato vīthiādīsu ṭhatvā yo paṭiggaṇheyya ce, evaṃ paṭiggaṇhato tassa bhikkhuno na dosoti yojanā. Paribhogassa paṭiggahaṇamūlakattā na doso. ‘‘Paṭiggaṇhato’’ti iminā paribhoge pāṭidesanīyābhāvo ca dīpito hoti.
১৮৩৪. সচে ভিক্খুনী রথিকাদীসু ঠত্ৰা ভোজনং দেতি, ভিক্খু অন্তরারামে ঠত্ৰা পটিগ্গণ্হাতি চে, তস্স আপত্তীতি যোজনা। গাথাবন্ধৰসেন ‘‘ভিক্খুনি ভোজন’’ন্তি রস্সত্তং। আপত্তীতি চ পটিগ্গহণপরিভোগেসু দুক্কটপাটিদেসনীযাপত্তিযো সন্ধায ৰুত্তং।
1834. Sace bhikkhunī rathikādīsu ṭhatvā bhojanaṃ deti, bhikkhu antarārāme ṭhatvā paṭiggaṇhāti ce, tassa āpattīti yojanā. Gāthābandhavasena ‘‘bhikkhuni bhojana’’nti rassattaṃ. Āpattīti ca paṭiggahaṇaparibhogesu dukkaṭapāṭidesanīyāpattiyo sandhāya vuttaṃ.
১৮৩৫. রথিকাদীসু ঠত্ৰা ভিক্খুনী ভোজনং দেতি চে, তং রথিকাযপি ৰা…পে॰… অযং নযোতি যোজনা। তত্থ রথিকাতি রচ্ছা। ব্যূহন্তি অনিব্বিজ্ঝিত্ৰা ঠিতা গতপচ্চাগতরচ্ছা। সন্ধি নাম ঘরসন্ধি। সিঙ্ঘাটকন্তি চতুক্কোণং ৰা তিকোণং ৰা মগ্গসমোধানট্ঠানং। অযং নযোতি ‘‘আপত্তী’’তি অনন্তরগাথায ৰুত্তনযো।
1835. Rathikādīsu ṭhatvā bhikkhunī bhojanaṃ deti ce, taṃ rathikāyapi vā…pe… ayaṃ nayoti yojanā. Tattha rathikāti racchā. Byūhanti anibbijjhitvā ṭhitā gatapaccāgataracchā. Sandhi nāma gharasandhi. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Ayaṃ nayoti ‘‘āpattī’’ti anantaragāthāya vuttanayo.
১৮৩৭. আমিসেন অসম্ভিন্নরসং সন্ধায ইদং দুক্কটং ভাসিতং। আমিসেন সম্ভিন্নে একরসে যামকালিকাদিম্হি পটিগ্গহেত্ৰা অজ্ঝোহারে পাটিদেসনীযাপত্তি সিযাতি যোজনা।
1837. Āmisena asambhinnarasaṃ sandhāya idaṃ dukkaṭaṃ bhāsitaṃ. Āmisena sambhinne ekarase yāmakālikādimhi paṭiggahetvā ajjhohāre pāṭidesanīyāpatti siyāti yojanā.
১৮৩৮. একতোউপসম্পন্নহত্থতোতি ভিক্খুনীনং সন্তিকে উপসম্পন্নায হত্থতো। যথাহ ‘‘একতোউপসম্পন্নাযাতি ভিক্খুনীনং সন্তিকে উপসম্পন্নাযা’’তি (পাচি॰ অট্ঠ॰ ৫৫৩)। ভিক্খূনং সন্তিকে উপসম্পন্নায পন যথাৰত্থুকমেৰাতি।
1838.Ekatoupasampannahatthatoti bhikkhunīnaṃ santike upasampannāya hatthato. Yathāha ‘‘ekatoupasampannāyāti bhikkhunīnaṃ santike upasampannāyā’’ti (pāci. aṭṭha. 553). Bhikkhūnaṃ santike upasampannāya pana yathāvatthukamevāti.
১৮৩৯. অঞ্ঞাতিকায ঞাতিকসঞ্ঞিস্স, তথেৰ ৰিমতিস্স চ দুক্কটন্তি যোজনা।
1839. Aññātikāya ñātikasaññissa, tatheva vimatissa ca dukkaṭanti yojanā.
১৮৪০. অঞ্ঞাতিকায দাপেন্তিযা ভূমিযা নিক্খিপিত্ৰা দদমানায ৰা অন্তরারামাদীসু ঠত্ৰা দেন্তিযা পটিগ্গণ্হতো ভিক্খুস্স অনাপত্তীতি যোজনা। অন্তরারামাদীসূতি এত্থ আদি-সদ্দেন ভিক্খুনুপস্সযতিত্থিযসেয্যাপটিক্কমনাদিং সঙ্গণ্হাতি। পটিক্কমনং নাম ভোজনসালা।
1840. Aññātikāya dāpentiyā bhūmiyā nikkhipitvā dadamānāya vā antarārāmādīsu ṭhatvā dentiyā paṭiggaṇhato bhikkhussa anāpattīti yojanā. Antarārāmādīsūti ettha ādi-saddena bhikkhunupassayatitthiyaseyyāpaṭikkamanādiṃ saṅgaṇhāti. Paṭikkamanaṃ nāma bhojanasālā.
১৮৪১. গামতো বহি নীহরিত্ৰা দেতীতি যোজনা।
1841. Gāmato bahi nīharitvā detīti yojanā.
১৮৪২. হত্থতোতি এত্থ ‘‘গহণে’’তি সেসো। তথাতি অনাপত্তি। সমুট্ঠানং ইদং সিক্খাপদং এল়কলোমেন সমং মতন্তি যোজনা।
1842.Hatthatoti ettha ‘‘gahaṇe’’ti seso. Tathāti anāpatti. Samuṭṭhānaṃ idaṃ sikkhāpadaṃ eḷakalomena samaṃ matanti yojanā.
পঠমপাটিদেসনীযকথাৰণ্ণনা।
Paṭhamapāṭidesanīyakathāvaṇṇanā.
১৮৪৩-৪. অৰুত্তেতি ৰক্খমাননযেন অৰুত্তে। একেনপি চ ভিক্খুনাতি সম্বন্ধো। অপসক্কাতি অপগচ্ছ। আদি-অত্থৰাচিনা ইতি-সদ্দেন ‘‘অপসক্ক তাৰ, ভগিনি, যাৰ ভিক্খূ ভুঞ্জন্তী’’তি ৰাক্যসেসো সঙ্গহিতোতি দট্ঠব্বো। ইমিনা অপসাদনাকারো সন্দস্সিতো। ‘‘একেনপি চ ভিক্খুনা’’তি ইমিনা অৰকংসো দস্সিতো। উক্কংসো পন ‘‘তেহি ভিক্খূহি সা ভিক্খুনী অপসাদেতব্বা’’তি পাল়িতোপি দট্ঠব্বো। ‘‘আমিস’’ন্তি সামঞ্ঞৰচনেপি পঞ্চন্নং ভোজনানং অঞ্ঞতরস্সেৰ গহণং। যথাহ ‘‘পঞ্চন্নং ভোজনানং অঞ্ঞতরেনা’’তি। ভোগেতি চ একতোউপসম্পন্নন্তি চ ৰুত্তত্থমেৰ।
1843-4.Avutteti vakkhamānanayena avutte. Ekenapi ca bhikkhunāti sambandho. Apasakkāti apagaccha. Ādi-atthavācinā iti-saddena ‘‘apasakka tāva, bhagini, yāva bhikkhū bhuñjantī’’ti vākyaseso saṅgahitoti daṭṭhabbo. Iminā apasādanākāro sandassito. ‘‘Ekenapi ca bhikkhunā’’ti iminā avakaṃso dassito. Ukkaṃso pana ‘‘tehi bhikkhūhi sā bhikkhunī apasādetabbā’’ti pāḷitopi daṭṭhabbo. ‘‘Āmisa’’nti sāmaññavacanepi pañcannaṃ bhojanānaṃ aññatarasseva gahaṇaṃ. Yathāha ‘‘pañcannaṃ bhojanānaṃ aññatarenā’’ti. Bhogeti ca ekatoupasampannanti ca vuttatthameva.
১৮৪৫. তথেৰাতি দুক্কটং। তত্থাতি অনুপসম্পন্নায।
1845.Tathevāti dukkaṭaṃ. Tatthāti anupasampannāya.
১৮৪৬. অত্তনো ভত্তে দিন্নেপি ইমিনা সিক্খাপদেন অনাপত্তি, পুরিমসিক্খাপদেন পন আপত্তিসম্ভৰা ‘‘ন দেতী’’তি ৰুত্তং। যথাহ ‘‘অত্তনো ভত্তং দাপেতি, ন দেতীতি এত্থ সচেপি অত্তনো ভত্তং দেতি, ইমিনা সিক্খাপদেন অনাপত্তিযেৰ, পুরিমসিক্খাপদেন আপত্তী’’তি (পাচি॰ অট্ঠ॰ ৫৫৮)। তথাতি অনাপত্তি। উভযসিক্খাপদেহিপি অনাপত্তিং দস্সেতুমাহ ‘‘পদেতি চে’’তি। যথাহ ‘‘অঞ্ঞেসং ভত্তং দেতি, ন দাপেতীতি এত্থ পন সচেপি দাপেয্য, ইমিনা সিক্খাপদেন আপত্তি ভৰেয্য, দেন্তিযা পন নেৰ ইমিনা, ন পুরিমেন আপত্তী’’তি।
1846. Attano bhatte dinnepi iminā sikkhāpadena anāpatti, purimasikkhāpadena pana āpattisambhavā ‘‘na detī’’ti vuttaṃ. Yathāha ‘‘attano bhattaṃ dāpeti, na detīti ettha sacepi attano bhattaṃ deti, iminā sikkhāpadena anāpattiyeva, purimasikkhāpadena āpattī’’ti (pāci. aṭṭha. 558). Tathāti anāpatti. Ubhayasikkhāpadehipi anāpattiṃ dassetumāha ‘‘padeti ce’’ti. Yathāha ‘‘aññesaṃ bhattaṃ deti, na dāpetīti ettha pana sacepi dāpeyya, iminā sikkhāpadena āpatti bhaveyya, dentiyā pana neva iminā, na purimena āpattī’’ti.
১৮৪৭. ভিক্খুনী যং ন দিন্নং, তং দাপেতি, যত্থ ৰা ন দিন্নং, তত্থ দাপেতি, তম্পি সব্বেসং মিত্তামিত্তানং সমং দাপেতি, তত্থাপি অনাপত্তি।
1847. Bhikkhunī yaṃ na dinnaṃ, taṃ dāpeti, yattha vā na dinnaṃ, tattha dāpeti, tampi sabbesaṃ mittāmittānaṃ samaṃ dāpeti, tatthāpi anāpatti.
১৮৪৮. সিক্খমানা ৰা সামণেরিকা ৰা ‘‘ইধ সূপং দেথ, ওদনং দেথা’’তি ৰোসাসন্তী ৰিধানং করোন্তী ঠিতা, তং অনপসাদেন্তস্স অনাপত্তি। পঞ্চেৰ ভোজনানি ৰিনা অঞ্ঞং ৰোসাসন্তিং ভিক্খুনিং অনপসাদেন্তস্স অনাপত্তি। অনপসাদেন্তস্স উম্মত্তকাদিনোপি অনাপত্তীতি যোজনা।
1848. Sikkhamānā vā sāmaṇerikā vā ‘‘idha sūpaṃ detha, odanaṃ dethā’’ti vosāsantī vidhānaṃ karontī ṭhitā, taṃ anapasādentassa anāpatti. Pañceva bhojanāni vinā aññaṃ vosāsantiṃ bhikkhuniṃ anapasādentassa anāpatti. Anapasādentassa ummattakādinopi anāpattīti yojanā.
১৮৪৯. সমুট্ঠানন্তি এত্থ ‘‘ইমস্সা’’তি সেসো। ভোজনং কিরিযং, ৰোসাসন্তিযা অনিৰারণং অকিরিযন্তি এৰমিদং ক্রিযাক্রিযং।
1849.Samuṭṭhānanti ettha ‘‘imassā’’ti seso. Bhojanaṃ kiriyaṃ, vosāsantiyā anivāraṇaṃ akiriyanti evamidaṃ kriyākriyaṃ.
দুতিযপাটিদেসনীযকথাৰণ্ণনা।
Dutiyapāṭidesanīyakathāvaṇṇanā.
১৮৫০-১. সেক্খন্তি সম্মতেতি ‘‘সেক্খসম্মতং নাম কুলং যং কুলং সদ্ধায ৰড্ঢতি, ভোগেন হাযতি, এৰরূপস্স কুলস্স ঞত্তিদুতিযেন কম্মেন সেক্খসম্মুতি দিন্না হোতী’’তি (পাচি॰ ৫৬৭) ৰুত্তং ইদং কুলং সেক্খসম্মতং নাম। তেনাহ ‘‘লদ্ধসম্মুতিকে কুলে’’তি। লদ্ধা সম্মুতি যেনাতি ৰিগ্গহো। ঘরূপচারং ওক্কন্তে নিমন্তিতোপি অনিমন্তিতোৰ হোতীতি আহ ‘‘ঘরূপচারোক্কমনা পুব্বেৰা’’তি। যথাহ ‘‘অনিমন্তিতো নাম অজ্জতনায ৰা স্ৰাতনায ৰা অনিমন্তিতো, ঘরূপচারং ওক্কমন্তে নিমন্তেতি, এসো অনিমন্তিতো নামা’’তি (পাচি॰ ৫৬৭)।
1850-1.Sekkhanti sammateti ‘‘sekkhasammataṃ nāma kulaṃ yaṃ kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammuti dinnā hotī’’ti (pāci. 567) vuttaṃ idaṃ kulaṃ sekkhasammataṃ nāma. Tenāha ‘‘laddhasammutike kule’’ti. Laddhā sammuti yenāti viggaho. Gharūpacāraṃ okkante nimantitopi animantitova hotīti āha ‘‘gharūpacārokkamanā pubbevā’’ti. Yathāha ‘‘animantito nāma ajjatanāya vā svātanāya vā animantito, gharūpacāraṃ okkamante nimanteti, eso animantito nāmā’’ti (pāci. 567).
‘‘অগিলানো নাম যো সক্কোতি পিণ্ডায চরিতু’’ন্তি ৰুত্তত্তা ভিক্খায চরিতুং সমত্থো অগিলানো নাম। গহেত্ৰাতি সহত্থা পটিগ্গহেত্ৰা। ‘‘আমিস’’ন্তি ইমিনা সম্বন্ধো। যথাহ ‘‘খাদনীযং ৰা ভোজনীযং ৰা সহত্থা পটিগ্গহেত্ৰা’’তি (পাচি॰ ৫৬৭)। গহণেতি এত্থ ‘‘আহারত্থাযা’’তি সেসো।
‘‘Agilāno nāma yo sakkoti piṇḍāya caritu’’nti vuttattā bhikkhāya carituṃ samattho agilāno nāma. Gahetvāti sahatthā paṭiggahetvā. ‘‘Āmisa’’nti iminā sambandho. Yathāha ‘‘khādanīyaṃ vā bhojanīyaṃ vā sahatthā paṭiggahetvā’’ti (pāci. 567). Gahaṇeti ettha ‘‘āhāratthāyā’’ti seso.
১৮৫৩. তত্থাতি অসেক্খসম্মতে কুলে। তথেৰ পরিদীপিতন্তি দুক্কটং পরিদীপিতং।
1853.Tatthāti asekkhasammate kule. Tatheva paridīpitanti dukkaṭaṃ paridīpitaṃ.
১৮৫৪. নিমন্তিতস্স ৰাতি এত্থ ৰা-সদ্দেন নিমন্তিতস্স অৰসেসং গণ্হাতি। যথাহ ‘‘নিমন্তিতস্স ৰা গিলানস্স ৰা সেসকং ভুঞ্জতী’’তি। অঞ্ঞেসং ভিক্খা তত্থ দীযতীতি যোজনা। তত্থাতি তস্মিং সেক্খসম্মতে কুলে।
1854.Nimantitassa vāti ettha vā-saddena nimantitassa avasesaṃ gaṇhāti. Yathāha ‘‘nimantitassa vā gilānassa vā sesakaṃ bhuñjatī’’ti. Aññesaṃ bhikkhā tattha dīyatīti yojanā. Tatthāti tasmiṃ sekkhasammate kule.
১৮৫৫. যত্থ কত্থচীতি আসনসালাদীসু যত্থ কত্থচি। নিচ্চভত্তাদিকে ৰাপীতি এত্থ আদি-সদ্দেন সলাকভত্তপক্খিকউপোসথিকপাটিপদিকভত্তানং গহণং।
1855.Yatthakatthacīti āsanasālādīsu yattha katthaci. Niccabhattādike vāpīti ettha ādi-saddena salākabhattapakkhikauposathikapāṭipadikabhattānaṃ gahaṇaṃ.
১৮৫৬. দ্ৰারেতি এত্থ ‘‘ঠপেত্ৰা’’তি সেসো। সম্পত্তেতি এত্থ ‘‘পচ্ছা’’তি সেসো। যথাহ ‘‘সচেপি অনাগতে ভিক্খুম্হি পঠমংযেৰ নীহরিত্ৰা দ্ৰারে ঠপেত্ৰা পচ্ছা সম্পত্তস্স দেন্তি, ৰট্টতী’’তি (পাচি॰ অট্ঠ॰ ৫৬৯)।
1856.Dvāreti ettha ‘‘ṭhapetvā’’ti seso. Sampatteti ettha ‘‘pacchā’’ti seso. Yathāha ‘‘sacepi anāgate bhikkhumhi paṭhamaṃyeva nīharitvā dvāre ṭhapetvā pacchā sampattassa denti, vaṭṭatī’’ti (pāci. aṭṭha. 569).
১৮৫৭. মহাপচ্চরিযা(পআচি॰ অট্ঠ॰ ৫৬৯) গতৰিনিচ্ছযং দস্সেতুমাহ ‘‘ভিক্খু’’ন্তিআদি। সমুট্ঠানেল়কূপমন্তি সমুট্ঠানতো এল়কলোমসিক্খাপদসদিসন্তি অত্থো।
1857.Mahāpaccariyā(paāci. aṭṭha. 569) gatavinicchayaṃ dassetumāha ‘‘bhikkhu’’ntiādi. Samuṭṭhāneḷakūpamanti samuṭṭhānato eḷakalomasikkhāpadasadisanti attho.
ততিযপাটিদেসনীযকথাৰণ্ণনা।
Tatiyapāṭidesanīyakathāvaṇṇanā.
১৮৫৮-৯. ‘‘পঞ্চন্নং পটিসংৰিদিতং, এতং অপ্পটিসংৰিদিতং নামা’’তি ৰচনতো চ ইধাপি ‘‘সহধম্মিকঞাপিত’’ন্তি ৰক্খমানত্তা চ অগহট্ঠ-সদ্দেন পরিব্বাজকানং গহণং। ৰুত্তমেৰ নযং ৰোহারন্তরেন দস্সেতুমাহ ‘‘ইত্থিযা পুরিসেন ৰা’’তি। ‘‘যানি খো পন তানি আরঞ্ঞকানি সেনাসনানী’’তি (পাচি॰ ৫৭৩) ৰচনতো আরামন্তি আরঞ্ঞকারামমাহ। সচে এৰমারোচিতং পটিসংৰিদিতন্তি হি ৰুত্তং পদভাজনেতি (পাচি॰ ৫৭৩) যোজনা। পটিসংৰিদিতন্তি পগেৰ নিৰেদিতং।
1858-9. ‘‘Pañcannaṃ paṭisaṃviditaṃ, etaṃ appaṭisaṃviditaṃ nāmā’’ti vacanato ca idhāpi ‘‘sahadhammikañāpita’’nti vakkhamānattā ca agahaṭṭha-saddena paribbājakānaṃ gahaṇaṃ. Vuttameva nayaṃ vohārantarena dassetumāha ‘‘itthiyā purisena vā’’ti. ‘‘Yāni kho pana tāni āraññakāni senāsanānī’’ti (pāci. 573) vacanato ārāmanti āraññakārāmamāha. Sace evamārocitaṃ paṭisaṃviditanti hi vuttaṃ padabhājaneti (pāci. 573) yojanā. Paṭisaṃviditanti pageva niveditaṃ.
১৮৬০. পচ্ছা যথারোচিতং তমেৰ ৰা তস্স চ পরিৰারং কত্ৰা অঞ্ঞং বহুং ৰা আহরীযতু, তম্পি পটিসংৰেদিতং নামাতি যোজনা।
1860. Pacchā yathārocitaṃ tameva vā tassa ca parivāraṃ katvā aññaṃ bahuṃ vā āharīyatu, tampi paṭisaṃveditaṃ nāmāti yojanā.
১৮৬১. যাগুযা ৰিদিতং কত্ৰাতি এত্থ ‘‘তং ঠপেত্ৰা’’তি ইদং সামত্থিযা লব্ভতি। ইদম্পি ৰিদিতং কুরুন্দিযং ৰট্টতীতি ৰুত্তন্তি যোজনা।
1861.Yāguyā viditaṃ katvāti ettha ‘‘taṃ ṭhapetvā’’ti idaṃ sāmatthiyā labbhati. Idampi viditaṃ kurundiyaṃ vaṭṭatīti vuttanti yojanā.
১৮৬২. পনাতি অপি-সদ্দত্থো। অঞ্ঞানিপি কুলানীতি যোজনা। এত্থ ‘‘অসুকং নাম কুলং পটিসংৰেদিতং কত্ৰা খাদনীযাদীনি গহেত্ৰা গচ্ছতীতি সুত্ৰা’’তি (পাচি॰ অট্ঠ॰ ৫৭৩) অট্ঠকথাসেসো। তেনাতি কতপটিসংৰেদিতেন। তম্পি চ সব্বং ৰট্টতীতি যোজনা।
1862.Panāti api-saddattho. Aññānipi kulānīti yojanā. Ettha ‘‘asukaṃ nāma kulaṃ paṭisaṃveditaṃ katvā khādanīyādīni gahetvā gacchatīti sutvā’’ti (pāci. aṭṭha. 573) aṭṭhakathāseso. Tenāti katapaṭisaṃveditena. Tampi ca sabbaṃ vaṭṭatīti yojanā.
১৮৬৩. এৰং যং অনারোচিতন্তি ‘‘আরামং ৰা উপচারং ৰা পৰিসিত্ৰা’’তিআদিনা নযেন যং পঠমং অনিৰেদিতং। ‘‘এৰ’’ন্তি ইদং ‘‘যং আরামমনাভত’’ন্তি ইমিনাপি যোজেতব্বং। এৰন্তি ‘‘তস্স পরিৰারং কত্ৰা’’তিআদিনা পকারেন। ‘‘তং অসংৰিদিতং নামা’’তি ইদং ‘‘সহধম্মিকঞাপিত’’ন্তি ইমিনাপি যোজেতব্বং। যথাহ ‘‘পঞ্চন্নং পটিসংৰিদিতং, এতং অপ্পটিসংৰিদিতং নামা’’তি (পাচি॰ ৫৭৩)। অট্ঠকথাযঞ্চ ‘‘পঞ্চন্নং পটিসংৰিদিতন্তি পঞ্চসু সহধম্মিকেসু যং কিঞ্চি পেসেত্ৰা ‘খাদনীযং ৰা ভোজনীযং ৰা আহরিস্সামা’তি পটিসংৰিদিতং কতম্পি অপ্পটিসংৰিদিতমেৰাতি অত্থো’’তি (পাচি॰ অট্ঠ॰ ৫৭৩) ৰুত্তং।
1863.Evaṃ yaṃ anārocitanti ‘‘ārāmaṃ vā upacāraṃ vā pavisitvā’’tiādinā nayena yaṃ paṭhamaṃ aniveditaṃ. ‘‘Eva’’nti idaṃ ‘‘yaṃ ārāmamanābhata’’nti imināpi yojetabbaṃ. Evanti ‘‘tassa parivāraṃ katvā’’tiādinā pakārena. ‘‘Taṃ asaṃviditaṃ nāmā’’ti idaṃ ‘‘sahadhammikañāpita’’nti imināpi yojetabbaṃ. Yathāha ‘‘pañcannaṃ paṭisaṃviditaṃ, etaṃ appaṭisaṃviditaṃ nāmā’’ti (pāci. 573). Aṭṭhakathāyañca ‘‘pañcannaṃ paṭisaṃviditanti pañcasu sahadhammikesu yaṃ kiñci pesetvā ‘khādanīyaṃ vā bhojanīyaṃ vā āharissāmā’ti paṭisaṃviditaṃ katampi appaṭisaṃviditamevāti attho’’ti (pāci. aṭṭha. 573) vuttaṃ.
১৮৬৪. কারাপেত্ৰাতি এত্থ ‘‘পটিসংৰিদিত’’ন্তি সেসো।
1864.Kārāpetvāti ettha ‘‘paṭisaṃvidita’’nti seso.
১৮৬৫. ভিক্খুনা ৰা গন্ত্ৰা অন্তরামগ্গে গহেতব্বন্তি যোজনা। এৰমকত্ৰাতি ‘‘বহিআরামং পেসেত্ৰা’’তিআদিনা ৰুত্তৰিধানং অকত্ৰা। উপচারতোতি এত্থ ভুম্মত্থে তো-পচ্চযো ৰেদিতব্বো।
1865. Bhikkhunā vā gantvā antarāmagge gahetabbanti yojanā. Evamakatvāti ‘‘bahiārāmaṃ pesetvā’’tiādinā vuttavidhānaṃ akatvā. Upacāratoti ettha bhummatthe to-paccayo veditabbo.
১৮৬৮. ‘‘পটিসংৰিদিতে’’তিআদীনং পদানং ‘‘অনাপত্তে ৰা’’তি ইমিনা সম্বন্ধো। পটিসংৰিদিতেতি এত্থ ‘‘গিলানস্সা’’তি সেসো। পটিসংৰিদিতে অনাপত্তি, গিলানস্সাপি অনাপত্তি, অপ্পটিসংৰিদিতেপি তস্স পটিসংৰিদিতস্স অৰসেসকে ৰা গিলানস্স অৰসেসকে ৰা অনাপত্তি এৰাতি সম্বন্ধো । যথাহ অনাপত্তিৰারে ‘‘পটিসংৰিদিতস্স ৰা গিলানস্স ৰা সেসকং ভুঞ্জতী’’তি (পাচি॰ ৫৭৫)। বহারামে পটিগ্গহেত্ৰা অন্তোযেৰ ভুঞ্জতো অস্স অনাপত্তীতি যোজনা। গহেত্ৰা ৰাতি এত্থ ৰা-সদ্দো ‘‘তস্সা’’তিআদীসুপি যোজেতব্বো।
1868.‘‘Paṭisaṃvidite’’tiādīnaṃ padānaṃ ‘‘anāpatte vā’’ti iminā sambandho. Paṭisaṃviditeti ettha ‘‘gilānassā’’ti seso. Paṭisaṃvidite anāpatti, gilānassāpi anāpatti, appaṭisaṃviditepi tassa paṭisaṃviditassa avasesake vā gilānassa avasesake vā anāpatti evāti sambandho . Yathāha anāpattivāre ‘‘paṭisaṃviditassa vā gilānassa vā sesakaṃ bhuñjatī’’ti (pāci. 575). Bahārāme paṭiggahetvā antoyeva bhuñjato assa anāpattīti yojanā. Gahetvā vāti ettha vā-saddo ‘‘tassā’’tiādīsupi yojetabbo.
১৮৬৯. তত্থাতি তস্মিং আরঞ্ঞকারামে। খাদতো অনাপত্তি এৰাতি যোজনা, তত্থ ‘‘অঞ্ঞেন কপ্পিযং কত্ৰা দিন্নানী’’তি সেসো।
1869.Tatthāti tasmiṃ āraññakārāme. Khādato anāpatti evāti yojanā, tattha ‘‘aññena kappiyaṃ katvā dinnānī’’ti seso.
চতুত্থপাটিদেসনীযকথাৰণ্ণনা।
Catutthapāṭidesanīyakathāvaṇṇanā.
ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায
Iti vinayatthasārasandīpaniyā vinayavinicchayavaṇṇanāya
পাটিদেসনীযকথাৰণ্ণনা নিট্ঠিতা।
Pāṭidesanīyakathāvaṇṇanā niṭṭhitā.
