| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
পাটিদেসনীযকথাৰণ্ণনা
Pāṭidesanīyakathāvaṇṇanā
২৪৩২. এৰং পাচিত্তিযৰিনিচ্ছযং দস্সেত্ৰা ইদানি পাটিদেসনীযং দস্সেতুমাহ ‘‘অগিলানা’’তিআদি। যা পন ভিক্খুনী অগিলানা সযং অত্তনা ৰিঞ্ঞত্তিযা লদ্ধং সপ্পিং সচে ‘‘ভুঞ্জিস্সামী’’তি গণ্হতি, তস্সা এৰং গহণে দুক্কটং পরিদীপিতন্তি যোজনা। তত্থ যস্সা ৰিনা সপ্পিনা ফাসু হোতি, সা অগিলানা নাম। সপ্পিন্তি পুব্বে ৰুত্তৰিনিচ্ছযং পাল়িআগতং গোসপ্পিআদিকমেৰ।
2432. Evaṃ pācittiyavinicchayaṃ dassetvā idāni pāṭidesanīyaṃ dassetumāha ‘‘agilānā’’tiādi. Yā pana bhikkhunī agilānā sayaṃ attanā viññattiyā laddhaṃ sappiṃ sace ‘‘bhuñjissāmī’’ti gaṇhati, tassā evaṃ gahaṇe dukkaṭaṃ paridīpitanti yojanā. Tattha yassā vinā sappinā phāsu hoti, sā agilānā nāma. Sappinti pubbe vuttavinicchayaṃ pāḷiāgataṃ gosappiādikameva.
২৪৩৩. তিপাটিদেসনীযন্তি অগিলানা অগিলানসঞ্ঞা, ৰেমতিকা, গিলানসঞ্ঞাতি তীসু ৰিকপ্পেসু তীণি পাটিদেসনীযানি। গিলানা দ্ৰিকদুক্কটন্তি গিলানায দ্ৰিকদুক্কটং। গিলানা অগিলানসঞ্ঞা, ৰেমতিকা ৰাতি দ্ৰীসু ৰিকপ্পেসু দ্ৰে দুক্কটানি।
2433.Tipāṭidesanīyanti agilānā agilānasaññā, vematikā, gilānasaññāti tīsu vikappesu tīṇi pāṭidesanīyāni. Gilānā dvikadukkaṭanti gilānāya dvikadukkaṭaṃ. Gilānā agilānasaññā, vematikā vāti dvīsu vikappesu dve dukkaṭāni.
২৪৩৪-৫. গিলানা হুত্ৰা সপ্পিং ৰিঞ্ঞাপেত্ৰা পচ্ছা ৰূপসন্তগেলঞ্ঞা হুত্ৰা সেৰন্তিযা পরিভুঞ্জন্তিযাপি চ গিলানায অৰসেসং পরিভুঞ্জন্তিযা ৰা ঞাতকাদিতো ঞাতকপৰারিতট্ঠানতো ৰিঞ্ঞত্তং ভুঞ্জন্তিযা ৰা অঞ্ঞস্সত্থায ৰিঞ্ঞত্তং পরিভুঞ্জন্তিযা ৰা অত্তনো ধনেন গহিতং ভুঞ্জন্তিযা ৰা উম্মত্তিকায ৰা অনাপত্তীতি যোজনা।
2434-5. Gilānā hutvā sappiṃ viññāpetvā pacchā vūpasantagelaññā hutvā sevantiyā paribhuñjantiyāpi ca gilānāya avasesaṃ paribhuñjantiyā vā ñātakādito ñātakapavāritaṭṭhānato viññattaṃ bhuñjantiyā vā aññassatthāya viññattaṃ paribhuñjantiyā vā attano dhanena gahitaṃ bhuñjantiyā vā ummattikāya vā anāpattīti yojanā.
পঠমং।
Paṭhamaṃ.
২৪৩৬. সেসেসু দুতিযাদীসূতি ‘‘যা পন ভিক্খুনী অগিলানা তেলং…পে॰… মধুং…পে॰… ফাণিতং…পে॰… মচ্ছং…পে॰… মংসং…পে॰… খীরং…পে॰… দধিং ৰিঞ্ঞাপেত্ৰা ভুঞ্জেয্য, পটিদেসেতব্বং তায ভিক্খুনিযা গারয্হং অয্যে ধম্মং আপজ্জিং অসপ্পাযং পাটিদেসনীযং, তং পটিদেসেমী’’তি (পাচি॰ ১২৩৬) এৰং দুতিযাদীসু সত্তসু পাটিদেসনীযেসু। নত্থি কাচি ৰিসেসতাতি তেলাদিপদানি ৰিনা অঞ্ঞো কোচি ৰিসেসো নত্থীতি অত্থো।
2436.Sesesu dutiyādīsūti ‘‘yā pana bhikkhunī agilānā telaṃ…pe… madhuṃ…pe… phāṇitaṃ…pe… macchaṃ…pe… maṃsaṃ…pe… khīraṃ…pe… dadhiṃ viññāpetvā bhuñjeyya, paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti (pāci. 1236) evaṃ dutiyādīsu sattasu pāṭidesanīyesu. Natthi kāci visesatāti telādipadāni vinā añño koci viseso natthīti attho.
২৪৩৭. পাল়িযং অনাগতেসু সব্বেসু সপ্পিআদীসু অট্ঠসু অঞ্ঞতরং ৰিঞ্ঞাপেত্ৰা ভুঞ্জন্তিযাপি দুক্কটন্তি যোজনা।
2437. Pāḷiyaṃ anāgatesu sabbesu sappiādīsu aṭṭhasu aññataraṃ viññāpetvā bhuñjantiyāpi dukkaṭanti yojanā.
ইতি ৰিনযত্থসারসন্দীপনিযা ৰিনযৰিনিচ্ছযৰণ্ণনায
Iti vinayatthasārasandīpaniyā vinayavinicchayavaṇṇanāya
পাটিদেসনীযকথাৰণ্ণনা নিট্ঠিতা।
Pāṭidesanīyakathāvaṇṇanā niṭṭhitā.
