| Library / Tipiṭaka / ติปิฎก • Tipiṭaka / วินยวินิจฺฉย-ฎีกา • Vinayavinicchaya-ṭīkā |
ปาฎิเทสนียกถาวณฺณนา
Pāṭidesanīyakathāvaṇṇanā
๒๔๓๒. เอวํ ปาจิตฺติยวินิจฺฉยํ ทเสฺสตฺวา อิทานิ ปาฎิเทสนียํ ทเสฺสตุมาห ‘‘อคิลานา’’ติอาทิฯ ยา ปน ภิกฺขุนี อคิลานา สยํ อตฺตนา วิญฺญตฺติยา ลทฺธํ สปฺปิํ สเจ ‘‘ภุญฺชิสฺสามี’’ติ คณฺหติ, ตสฺสา เอวํ คหเณ ทุกฺกฎํ ปริทีปิตนฺติ โยชนาฯ ตตฺถ ยสฺสา วินา สปฺปินา ผาสุ โหติ, สา อคิลานา นามฯ สปฺปินฺติ ปุเพฺพ วุตฺตวินิจฺฉยํ ปาฬิอาคตํ โคสปฺปิอาทิกเมวฯ
2432. Evaṃ pācittiyavinicchayaṃ dassetvā idāni pāṭidesanīyaṃ dassetumāha ‘‘agilānā’’tiādi. Yā pana bhikkhunī agilānā sayaṃ attanā viññattiyā laddhaṃ sappiṃ sace ‘‘bhuñjissāmī’’ti gaṇhati, tassā evaṃ gahaṇe dukkaṭaṃ paridīpitanti yojanā. Tattha yassā vinā sappinā phāsu hoti, sā agilānā nāma. Sappinti pubbe vuttavinicchayaṃ pāḷiāgataṃ gosappiādikameva.
๒๔๓๓. ติปาฎิเทสนียนฺติ อคิลานา อคิลานสญฺญา, เวมติกา, คิลานสญฺญาติ ตีสุ วิกเปฺปสุ ตีณิ ปาฎิเทสนียานิฯ คิลานา ทฺวิกทุกฺกฎนฺติ คิลานาย ทฺวิกทุกฺกฎํฯ คิลานา อคิลานสญฺญา, เวมติกา วาติ ทฺวีสุ วิกเปฺปสุ เทฺว ทุกฺกฎานิฯ
2433.Tipāṭidesanīyanti agilānā agilānasaññā, vematikā, gilānasaññāti tīsu vikappesu tīṇi pāṭidesanīyāni. Gilānā dvikadukkaṭanti gilānāya dvikadukkaṭaṃ. Gilānā agilānasaññā, vematikā vāti dvīsu vikappesu dve dukkaṭāni.
๒๔๓๔-๕. คิลานา หุตฺวา สปฺปิํ วิญฺญาเปตฺวา ปจฺฉา วูปสนฺตเคลญฺญา หุตฺวา เสวนฺติยา ปริภุญฺชนฺติยาปิ จ คิลานาย อวเสสํ ปริภุญฺชนฺติยา วา ญาตกาทิโต ญาตกปวาริตฎฺฐานโต วิญฺญตฺตํ ภุญฺชนฺติยา วา อญฺญสฺสตฺถาย วิญฺญตฺตํ ปริภุญฺชนฺติยา วา อตฺตโน ธเนน คหิตํ ภุญฺชนฺติยา วา อุมฺมตฺติกาย วา อนาปตฺตีติ โยชนาฯ
2434-5. Gilānā hutvā sappiṃ viññāpetvā pacchā vūpasantagelaññā hutvā sevantiyā paribhuñjantiyāpi ca gilānāya avasesaṃ paribhuñjantiyā vā ñātakādito ñātakapavāritaṭṭhānato viññattaṃ bhuñjantiyā vā aññassatthāya viññattaṃ paribhuñjantiyā vā attano dhanena gahitaṃ bhuñjantiyā vā ummattikāya vā anāpattīti yojanā.
ปฐมํฯ
Paṭhamaṃ.
๒๔๓๖. เสเสสุ ทุติยาทีสูติ ‘‘ยา ปน ภิกฺขุนี อคิลานา เตลํ…เป.… มธุํ…เป.… ผาณิตํ…เป.… มจฺฉํ…เป.… มํสํ…เป.… ขีรํ…เป.… ทธิํ วิญฺญาเปตฺวา ภุเญฺชยฺย, ปฎิเทเสตพฺพํ ตาย ภิกฺขุนิยา คารยฺหํ อเยฺย ธมฺมํ อาปชฺชิํ อสปฺปายํ ปาฎิเทสนียํ, ตํ ปฎิเทเสมี’’ติ (ปาจิ. ๑๒๓๖) เอวํ ทุติยาทีสุ สตฺตสุ ปาฎิเทสนีเยสุฯ นตฺถิ กาจิ วิเสสตาติ เตลาทิปทานิ วินา อโญฺญ โกจิ วิเสโส นตฺถีติ อโตฺถฯ
2436.Sesesu dutiyādīsūti ‘‘yā pana bhikkhunī agilānā telaṃ…pe… madhuṃ…pe… phāṇitaṃ…pe… macchaṃ…pe… maṃsaṃ…pe… khīraṃ…pe… dadhiṃ viññāpetvā bhuñjeyya, paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti (pāci. 1236) evaṃ dutiyādīsu sattasu pāṭidesanīyesu. Natthi kāci visesatāti telādipadāni vinā añño koci viseso natthīti attho.
๒๔๓๗. ปาฬิยํ อนาคเตสุ สเพฺพสุ สปฺปิอาทีสุ อฎฺฐสุ อญฺญตรํ วิญฺญาเปตฺวา ภุญฺชนฺติยาปิ ทุกฺกฎนฺติ โยชนาฯ
2437. Pāḷiyaṃ anāgatesu sabbesu sappiādīsu aṭṭhasu aññataraṃ viññāpetvā bhuñjantiyāpi dukkaṭanti yojanā.
อิติ วินยตฺถสารสนฺทีปนิยา วินยวินิจฺฉยวณฺณนาย
Iti vinayatthasārasandīpaniyā vinayavinicchayavaṇṇanāya
ปาฎิเทสนียกถาวณฺณนา นิฎฺฐิตาฯ
Pāṭidesanīyakathāvaṇṇanā niṭṭhitā.
