| Library / Tipiṭaka / තිපිටක • Tipiṭaka / විනයවිනිච්‌ඡය-ටීකා • Vinayavinicchaya-ṭīkā |
පාටිදෙසනීයකථාවණ්‌ණනා
Pāṭidesanīyakathāvaṇṇanā
2432. එවං පාචිත්‌තියවිනිච්‌ඡයං දස්‌සෙත්‌වා ඉදානි පාටිදෙසනීයං දස්‌සෙතුමාහ ‘‘අගිලානා’’තිආදි. යා පන භික්‌ඛුනී අගිලානා සයං අත්‌තනා විඤ්‌ඤත්‌තියා ලද්‌ධං සප්‌පිං සචෙ ‘‘භුඤ්‌ජිස්‌සාමී’’ති ගණ්‌හති, තස්‌සා එවං ගහණෙ දුක්‌කටං පරිදීපිතන්‌ති යොජනා. තත්‌ථ යස්‌සා විනා සප්‌පිනා ඵාසු හොති, සා අගිලානා නාම. සප්‌පින්‌ති පුබ්‌බෙ වුත්‌තවිනිච්‌ඡයං පාළිආගතං ගොසප්‌පිආදිකමෙව.
2432. Evaṃ pācittiyavinicchayaṃ dassetvā idāni pāṭidesanīyaṃ dassetumāha ‘‘agilānā’’tiādi. Yā pana bhikkhunī agilānā sayaṃ attanā viññattiyā laddhaṃ sappiṃ sace ‘‘bhuñjissāmī’’ti gaṇhati, tassā evaṃ gahaṇe dukkaṭaṃ paridīpitanti yojanā. Tattha yassā vinā sappinā phāsu hoti, sā agilānā nāma. Sappinti pubbe vuttavinicchayaṃ pāḷiāgataṃ gosappiādikameva.
2433. තිපාටිදෙසනීයන්‌ති අගිලානා අගිලානසඤ්‌ඤා, වෙමතිකා, ගිලානසඤ්‌ඤාති තීසු විකප්‌පෙසු තීණි පාටිදෙසනීයානි. ගිලානා ද්‌විකදුක්‌කටන්‌ති ගිලානාය ද්‌විකදුක්‌කටං. ගිලානා අගිලානසඤ්‌ඤා, වෙමතිකා වාති ද්‌වීසු විකප්‌පෙසු ද්‌වෙ දුක්‌කටානි.
2433.Tipāṭidesanīyanti agilānā agilānasaññā, vematikā, gilānasaññāti tīsu vikappesu tīṇi pāṭidesanīyāni. Gilānā dvikadukkaṭanti gilānāya dvikadukkaṭaṃ. Gilānā agilānasaññā, vematikā vāti dvīsu vikappesu dve dukkaṭāni.
2434-5. ගිලානා හුත්‌වා සප්‌පිං විඤ්‌ඤාපෙත්‌වා පච්‌ඡා වූපසන්‌තගෙලඤ්‌ඤා හුත්‌වා සෙවන්‌තියා පරිභුඤ්‌ජන්‌තියාපි ච ගිලානාය අවසෙසං පරිභුඤ්‌ජන්‌තියා වා ඤාතකාදිතො ඤාතකපවාරිතට්‌ඨානතො විඤ්‌ඤත්‌තං භුඤ්‌ජන්‌තියා වා අඤ්‌ඤස්‌සත්‌ථාය විඤ්‌ඤත්‌තං පරිභුඤ්‌ජන්‌තියා වා අත්‌තනො ධනෙන ගහිතං භුඤ්‌ජන්‌තියා වා උම්‌මත්‌තිකාය වා අනාපත්‌තීති යොජනා.
2434-5. Gilānā hutvā sappiṃ viññāpetvā pacchā vūpasantagelaññā hutvā sevantiyā paribhuñjantiyāpi ca gilānāya avasesaṃ paribhuñjantiyā vā ñātakādito ñātakapavāritaṭṭhānato viññattaṃ bhuñjantiyā vā aññassatthāya viññattaṃ paribhuñjantiyā vā attano dhanena gahitaṃ bhuñjantiyā vā ummattikāya vā anāpattīti yojanā.
පඨමං.
Paṭhamaṃ.
2436. සෙසෙසු දුතියාදීසූති ‘‘යා පන භික්‌ඛුනී අගිලානා තෙලං…පෙ.… මධුං…පෙ.… ඵාණිතං…පෙ.… මච්‌ඡං…පෙ.… මංසං…පෙ.… ඛීරං…පෙ.… දධිං විඤ්‌ඤාපෙත්‌වා භුඤ්‌ජෙය්‍ය, පටිදෙසෙතබ්‌බං තාය භික්‌ඛුනියා ගාරය්‌හං අය්‍යෙ ධම්‌මං ආපජ්‌ජිං අසප්‌පායං පාටිදෙසනීයං, තං පටිදෙසෙමී’’ති (පාචි. 1236) එවං දුතියාදීසු සත්‌තසු පාටිදෙසනීයෙසු. නත්‌ථි කාචි විසෙසතාති තෙලාදිපදානි විනා අඤ්‌ඤො කොචි විසෙසො නත්‌ථීති අත්‌ථො.
2436.Sesesu dutiyādīsūti ‘‘yā pana bhikkhunī agilānā telaṃ…pe… madhuṃ…pe… phāṇitaṃ…pe… macchaṃ…pe… maṃsaṃ…pe… khīraṃ…pe… dadhiṃ viññāpetvā bhuñjeyya, paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti (pāci. 1236) evaṃ dutiyādīsu sattasu pāṭidesanīyesu. Natthi kāci visesatāti telādipadāni vinā añño koci viseso natthīti attho.
2437. පාළියං අනාගතෙසු සබ්‌බෙසු සප්‌පිආදීසු අට්‌ඨසු අඤ්‌ඤතරං විඤ්‌ඤාපෙත්‌වා භුඤ්‌ජන්‌තියාපි දුක්‌කටන්‌ති යොජනා.
2437. Pāḷiyaṃ anāgatesu sabbesu sappiādīsu aṭṭhasu aññataraṃ viññāpetvā bhuñjantiyāpi dukkaṭanti yojanā.
ඉති විනයත්‌ථසාරසන්‌දීපනියා විනයවිනිච්‌ඡයවණ්‌ණනාය
Iti vinayatthasārasandīpaniyā vinayavinicchayavaṇṇanāya
පාටිදෙසනීයකථාවණ්‌ණනා නිට්‌ඨිතා.
Pāṭidesanīyakathāvaṇṇanā niṭṭhitā.
