| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೫. ಪಾಟಿದೇಸನೀಯಸಿಕ್ಖಾಪದ-ಅತ್ಥಯೋಜನಾ
5. Pāṭidesanīyasikkhāpada-atthayojanā
ಖುದ್ದಕಾನಂ ಅನನ್ತರಾ ಪಾಟಿದೇಸನೀಯಾ ನಾಮ ಅಟ್ಠ ಯೇ ಧಮ್ಮಾ ಸಙ್ಖೇಪೇನೇವ ಸಙ್ಗಹಂ ಆರೂಳ್ಹಾ ಸಙ್ಗೀತಿಕಾರೇಹಿ, ತೇಸಂ ಅಟ್ಠನ್ನಂ ಪಾಟಿದೇಸನೀಯನಾಮಕಾನಂ ಧಮ್ಮಾನಂ ಸಙ್ಖೇಪೇನೇವ ಏಸಾ ವಣ್ಣನಾ ಪವತ್ತತೇತಿ ಯೋಜನಾ।
Khuddakānaṃ anantarā pāṭidesanīyā nāma aṭṭha ye dhammā saṅkhepeneva saṅgahaṃ ārūḷhā saṅgītikārehi, tesaṃ aṭṭhannaṃ pāṭidesanīyanāmakānaṃ dhammānaṃ saṅkhepeneva esā vaṇṇanā pavattateti yojanā.
೧೨೨೮. ಯಾನಿ ಸಬ್ಬಿತೇಲಾದೀನೀತಿ ಸಮ್ಬನ್ಧೋ। ಹೀತಿ ವಿತ್ಥಾರೋ। ಏತ್ಥಾತಿ ಅಟ್ಠಸು ಪಾಟಿದೇಸನೀಯೇಸು। ಪಾಳಿವಿನಿಮುತ್ತಕೇಸೂತಿ ಪಾಳಿತೋ ವಿನಿಮುತ್ತಕೇಸು। ಸಬ್ಬೇಸೂತಿ ಅಖಿಲೇಸು ಸಬ್ಬಿತೇಲಾದೀಸೂತಿ।
1228.Yāni sabbitelādīnīti sambandho. Hīti vitthāro. Etthāti aṭṭhasu pāṭidesanīyesu. Pāḷivinimuttakesūti pāḷito vinimuttakesu. Sabbesūti akhilesu sabbitelādīsūti.
ಭಿಕ್ಖುನಿವಿಭಙ್ಗೇ ಪಾಟಿದೇಸನೀಯವಣ್ಣನಾಯ ಯೋಜನಾ ಸಮತ್ತಾ।
Bhikkhunivibhaṅge pāṭidesanīyavaṇṇanāya yojanā samattā.
ಪನಾತಿ ಪಕ್ಖನ್ತರಜೋತಕೋ। ಯೇ ಧಮ್ಮಾ ಉದ್ದಿಟ್ಠಾತಿ ಸಮ್ಬನ್ಧೋ। ತೇಸನ್ತಿ ಪಾಟಿದೇಸನೀಯಾನಂ। ಪುನ ತೇಸನ್ತಿ ಸೇಖಿಯಅಧಿಕರಣಸಮಥಧಮ್ಮಾನಂ।
Panāti pakkhantarajotako. Ye dhammā uddiṭṭhāti sambandho. Tesanti pāṭidesanīyānaṃ. Puna tesanti sekhiyaadhikaraṇasamathadhammānaṃ.
ತನ್ತಿ ಅತ್ಥವಿನಿಚ್ಛಯಂ, ವಿದೂ ವದನ್ತೀತಿ ಸಮ್ಬನ್ಧೋ। ಯಕಾರೋ ಪದಸನ್ಧಿಕರೋ। ಅಯಂ ಪನೇತ್ಥ ಯೋಜನಾ – ತೇಸಂ ಪಾಟಿದೇಸನೀಯಾನಂ ಅನನ್ತರಾ ಯೇ ಚ ಸೇಖಿಯಾ ಪಞ್ಚಸತ್ತತಿ ಯೇ ಚ ಧಮ್ಮಾ, ಚಸದ್ದೋ ಲುತ್ತನಿದ್ದಿಟ್ಠೋ, ಅಧಿಕರಣವ್ಹಯಾ ಅಧಿಕರಣಸಮಥನಾಮಕಾ ಸತ್ತ ಯೇ ಚ ಧಮ್ಮಾ ಭಗವತಾ ಉದ್ದಿಟ್ಠಾ, ತೇಸಂ ಸೇಖಿಯಅಧಿಕರಣಸಮಥಧಮ್ಮಾನಂ ಯೋ ಅತ್ಥವಿನಿಚ್ಛಯೋ ವಿಭಙ್ಗೇ ಮಯಾ ವುತ್ತೋ, ತಾದಿಸಮೇವ ತಂ ಅತ್ಥವಿನಿಚ್ಛಯಂ ಭಿಕ್ಖುನೀನಂ ವಿಭಙ್ಗೇಪಿ ವಿದೂ ವದನ್ತಿ ಯಸ್ಮಾ, ತಸ್ಮಾ ತೇಸಂ ಧಮ್ಮಾನಂ ಸೇಖಿಯಅಧಿಕರಣಸಮಥಧಮ್ಮಾನಂ ಯಾ ಅತ್ಥವಣ್ಣನಾ ತತ್ಥ ಮಹಾವಿಭಙ್ಗೇ ವಿಸುಂ ಮಯಾ ನ ವುತ್ತಾ। ಇಮಾ ಅತ್ಥವಣ್ಣನಾ ಇಧಾಪಿ ಭಿಕ್ಖುನೀನಂ ವಿಭಙ್ಗೇಪಿ, ಪಿಸದ್ದೋ ಲುತ್ತನಿದ್ದಿಟ್ಠೋ, ಮಯಾ ನ ವುತ್ತಾಯೇವಾತಿ। ನಕಾರೋ ದ್ವೀಸು ಕಿರಿಯಾಸು ಯೋಜೇತಬ್ಬೋ।
Tanti atthavinicchayaṃ, vidū vadantīti sambandho. Yakāro padasandhikaro. Ayaṃ panettha yojanā – tesaṃ pāṭidesanīyānaṃ anantarā ye ca sekhiyā pañcasattati ye ca dhammā, casaddo luttaniddiṭṭho, adhikaraṇavhayā adhikaraṇasamathanāmakā satta ye ca dhammā bhagavatā uddiṭṭhā, tesaṃ sekhiyaadhikaraṇasamathadhammānaṃ yo atthavinicchayo vibhaṅge mayā vutto, tādisameva taṃ atthavinicchayaṃ bhikkhunīnaṃ vibhaṅgepi vidū vadanti yasmā, tasmā tesaṃ dhammānaṃ sekhiyaadhikaraṇasamathadhammānaṃ yā atthavaṇṇanā tattha mahāvibhaṅge visuṃ mayā na vuttā. Imā atthavaṇṇanā idhāpi bhikkhunīnaṃ vibhaṅgepi, pisaddo luttaniddiṭṭho, mayā na vuttāyevāti. Nakāro dvīsu kiriyāsu yojetabbo.
‘‘ಸಬ್ಬಾಸವಪಹಂ ಮಗ್ಗಂ, ಪುಞ್ಞಕಮ್ಮೇನ ಚಿಮಿನಾ।
‘‘Sabbāsavapahaṃ maggaṃ, puññakammena ciminā;
ಉಪ್ಪಾದೇತ್ವಾ ಸಸನ್ತಾನೇ, ಸತ್ತಾ ಪಸ್ಸನ್ತು ನಿಬ್ಬುತಿ’’ನ್ತಿ॥
Uppādetvā sasantāne, sattā passantu nibbuti’’nti.
ಅಯಂ ಗಾಥಾ ಏತರಹಿ ಪೋತ್ಥಕೇಸು ನತ್ಥಿ, ಟೀಕಾಸು ಪನ ಅತ್ಥಿ। ತಸ್ಮಾ ಏವಮೇತ್ಥ ಯೋಜನಾ ವೇದಿತಬ್ಬಾ – ಇಮಿನಾ ಪುಞ್ಞಕಮ್ಮೇನ ಚ ವಿಭಙ್ಗವಣ್ಣನಾಯ ಕತೇನ ಇಮಿನಾ ಪುಞ್ಞಕಮ್ಮೇನ ಚ ಅಞ್ಞೇನ ಪುಞ್ಞಕಮ್ಮೇನ ಚ। ಚಸದ್ದೋ ಹಿ ಅವುತ್ತಸಮ್ಪಿಣ್ಡನತ್ಥೋ। ಸತ್ತಾ ಸಬ್ಬೇ ಸತ್ತಾ ಸಬ್ಬಾಸವಪಹಂ ಸಬ್ಬೇಸಂ ಆಸವಾನಂ ವಿಘಾತಕಂ ಮಗ್ಗಂ ಅರಹತ್ತಮಗ್ಗಂ ಸಸನ್ತಾನೇ ಅತ್ತನೋ ನಿಯಕಜ್ಝತ್ತೇ ಉಪ್ಪಾದೇತ್ವಾ ಜನೇತ್ವಾ ನಿಬ್ಬುತಿಂ ಖನ್ಧಪರಿನಿಬ್ಬಾನಂ ಞಾಣಾಲೋಚನೇನ ಪಸ್ಸನ್ತೂತಿ।
Ayaṃ gāthā etarahi potthakesu natthi, ṭīkāsu pana atthi. Tasmā evamettha yojanā veditabbā – iminā puññakammena ca vibhaṅgavaṇṇanāya katena iminā puññakammena ca aññena puññakammena ca. Casaddo hi avuttasampiṇḍanattho. Sattā sabbe sattā sabbāsavapahaṃ sabbesaṃ āsavānaṃ vighātakaṃ maggaṃ arahattamaggaṃ sasantāne attano niyakajjhatte uppādetvā janetvā nibbutiṃ khandhaparinibbānaṃ ñāṇālocanena passantūti.
ಇತಿ ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ
Iti samantapāsādikāya vinayasaṃvaṇṇanāya
ಭಿಕ್ಖುನಿವಿಭಙ್ಗವಣ್ಣನಾಯ
Bhikkhunivibhaṅgavaṇṇanāya
ಯೋಜನಾ ಸಮತ್ತಾ।
Yojanā samattā.
ಜಾದಿಲಞ್ಛಿತನಾಮೇನ, ನೇಕಾನಂ ವಾಚಿತೋ ಮಯಾ।
Jādilañchitanāmena, nekānaṃ vācito mayā;
ಭಿಕ್ಖುನೀನಂ ವಿಭಙ್ಗಸ್ಸ, ಸಮತ್ತೋ ಯೋಜನಾನಯೋತಿ॥
Bhikkhunīnaṃ vibhaṅgassa, samatto yojanānayoti.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಭಿಕ್ಖುನೀವಿಭಙ್ಗ • Bhikkhunīvibhaṅga / ೧. ಪಠಮಪಾಟಿದೇಸನೀಯಸಿಕ್ಖಾಪದಂ • 1. Paṭhamapāṭidesanīyasikkhāpadaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಭಿಕ್ಖುನೀವಿಭಙ್ಗ-ಅಟ್ಠಕಥಾ • Bhikkhunīvibhaṅga-aṭṭhakathā / ಪಾಟಿದೇಸನೀಯಸಿಕ್ಖಾಪದವಣ್ಣನಾ • Pāṭidesanīyasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾಟಿದೇಸನೀಯಸಿಕ್ಖಾಪದವಣ್ಣನಾ • Pāṭidesanīyasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಾಟಿದೇಸನೀಯಸಿಕ್ಖಾಪದವಣ್ಣನಾ • Pāṭidesanīyasikkhāpadavaṇṇanā
