| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
5. පාටිදෙසනීයසික්‌ඛාපද-අත්‌ථයොජනා
5. Pāṭidesanīyasikkhāpada-atthayojanā
ඛුද්‌දකානං අනන්‌තරා පාටිදෙසනීයා නාම අට්‌ඨ යෙ ධම්‌මා සඞ්‌ඛෙපෙනෙව සඞ්‌ගහං ආරූළ්‌හා සඞ්‌ගීතිකාරෙහි, තෙසං අට්‌ඨන්‌නං පාටිදෙසනීයනාමකානං ධම්‌මානං සඞ්‌ඛෙපෙනෙව එසා වණ්‌ණනා පවත්‌තතෙති යොජනා.
Khuddakānaṃ anantarā pāṭidesanīyā nāma aṭṭha ye dhammā saṅkhepeneva saṅgahaṃ ārūḷhā saṅgītikārehi, tesaṃ aṭṭhannaṃ pāṭidesanīyanāmakānaṃ dhammānaṃ saṅkhepeneva esā vaṇṇanā pavattateti yojanā.
1228. යානි සබ්‌බිතෙලාදීනීති සම්‌බන්‌ධො. හීති විත්‌ථාරො. එත්‌ථාති අට්‌ඨසු පාටිදෙසනීයෙසු. පාළිවිනිමුත්‌තකෙසූති පාළිතො විනිමුත්‌තකෙසු. සබ්‌බෙසූති අඛිලෙසු සබ්‌බිතෙලාදීසූති.
1228.Yāni sabbitelādīnīti sambandho. Hīti vitthāro. Etthāti aṭṭhasu pāṭidesanīyesu. Pāḷivinimuttakesūti pāḷito vinimuttakesu. Sabbesūti akhilesu sabbitelādīsūti.
භික්‌ඛුනිවිභඞ්‌ගෙ පාටිදෙසනීයවණ්‌ණනාය යොජනා සමත්‌තා.
Bhikkhunivibhaṅge pāṭidesanīyavaṇṇanāya yojanā samattā.
පනාති පක්‌ඛන්‌තරජොතකො. යෙ ධම්‌මා උද්‌දිට්‌ඨාති සම්‌බන්‌ධො. තෙසන්‌ති පාටිදෙසනීයානං. පුන තෙසන්‌ති සෙඛියඅධිකරණසමථධම්‌මානං.
Panāti pakkhantarajotako. Ye dhammā uddiṭṭhāti sambandho. Tesanti pāṭidesanīyānaṃ. Puna tesanti sekhiyaadhikaraṇasamathadhammānaṃ.
තන්‌ති අත්‌ථවිනිච්‌ඡයං, විදූ වදන්‌තීති සම්‌බන්‌ධො. යකාරො පදසන්‌ධිකරො. අයං පනෙත්‌ථ යොජනා – තෙසං පාටිදෙසනීයානං අනන්‌තරා යෙ ච සෙඛියා පඤ්‌චසත්‌තති යෙ ච ධම්‌මා, චසද්‌දො ලුත්‌තනිද්‌දිට්‌ඨො, අධිකරණව්‌හයා අධිකරණසමථනාමකා සත්‌ත යෙ ච ධම්‌මා භගවතා උද්‌දිට්‌ඨා, තෙසං සෙඛියඅධිකරණසමථධම්‌මානං යො අත්‌ථවිනිච්‌ඡයො විභඞ්‌ගෙ මයා වුත්‌තො, තාදිසමෙව තං අත්‌ථවිනිච්‌ඡයං භික්‌ඛුනීනං විභඞ්‌ගෙපි විදූ වදන්‌ති යස්‌මා, තස්‌මා තෙසං ධම්‌මානං සෙඛියඅධිකරණසමථධම්‌මානං යා අත්‌ථවණ්‌ණනා තත්‌ථ මහාවිභඞ්‌ගෙ විසුං මයා න වුත්‌තා. ඉමා අත්‌ථවණ්‌ණනා ඉධාපි භික්‌ඛුනීනං විභඞ්‌ගෙපි, පිසද්‌දො ලුත්‌තනිද්‌දිට්‌ඨො, මයා න වුත්‌තායෙවාති. නකාරො ද්‌වීසු කිරියාසු යොජෙතබ්‌බො.
Tanti atthavinicchayaṃ, vidū vadantīti sambandho. Yakāro padasandhikaro. Ayaṃ panettha yojanā – tesaṃ pāṭidesanīyānaṃ anantarā ye ca sekhiyā pañcasattati ye ca dhammā, casaddo luttaniddiṭṭho, adhikaraṇavhayā adhikaraṇasamathanāmakā satta ye ca dhammā bhagavatā uddiṭṭhā, tesaṃ sekhiyaadhikaraṇasamathadhammānaṃ yo atthavinicchayo vibhaṅge mayā vutto, tādisameva taṃ atthavinicchayaṃ bhikkhunīnaṃ vibhaṅgepi vidū vadanti yasmā, tasmā tesaṃ dhammānaṃ sekhiyaadhikaraṇasamathadhammānaṃ yā atthavaṇṇanā tattha mahāvibhaṅge visuṃ mayā na vuttā. Imā atthavaṇṇanā idhāpi bhikkhunīnaṃ vibhaṅgepi, pisaddo luttaniddiṭṭho, mayā na vuttāyevāti. Nakāro dvīsu kiriyāsu yojetabbo.
‘‘සබ්‌බාසවපහං මග්‌ගං, පුඤ්‌ඤකම්‌මෙන චිමිනා;
‘‘Sabbāsavapahaṃ maggaṃ, puññakammena ciminā;
උප්‌පාදෙත්‌වා සසන්‌තානෙ, සත්‌තා පස්‌සන්‌තු නිබ්‌බුති’’න්‌ති.
Uppādetvā sasantāne, sattā passantu nibbuti’’nti.
අයං ගාථා එතරහි පොත්‌ථකෙසු නත්‌ථි, ටීකාසු පන අත්‌ථි. තස්‌මා එවමෙත්‌ථ යොජනා වෙදිතබ්‌බා – ඉමිනා පුඤ්‌ඤකම්‌මෙන ච විභඞ්‌ගවණ්‌ණනාය කතෙන ඉමිනා පුඤ්‌ඤකම්‌මෙන ච අඤ්‌ඤෙන පුඤ්‌ඤකම්‌මෙන ච. චසද්‌දො හි අවුත්‌තසම්‌පිණ්‌ඩනත්‌ථො. සත්‌තා සබ්‌බෙ සත්‌තා සබ්‌බාසවපහං සබ්‌බෙසං ආසවානං විඝාතකං මග්‌ගං අරහත්‌තමග්‌ගං සසන්‌තානෙ අත්‌තනො නියකජ්‌ඣත්‌තෙ උප්‌පාදෙත්‌වා ජනෙත්‌වා නිබ්‌බුතිං ඛන්‌ධපරිනිබ්‌බානං ඤාණාලොචනෙන පස්‌සන්‌තූති.
Ayaṃ gāthā etarahi potthakesu natthi, ṭīkāsu pana atthi. Tasmā evamettha yojanā veditabbā – iminā puññakammena ca vibhaṅgavaṇṇanāya katena iminā puññakammena ca aññena puññakammena ca. Casaddo hi avuttasampiṇḍanattho. Sattā sabbe sattā sabbāsavapahaṃ sabbesaṃ āsavānaṃ vighātakaṃ maggaṃ arahattamaggaṃ sasantāne attano niyakajjhatte uppādetvā janetvā nibbutiṃ khandhaparinibbānaṃ ñāṇālocanena passantūti.
ඉති සමන්‌තපාසාදිකාය විනයසංවණ්‌ණනාය
Iti samantapāsādikāya vinayasaṃvaṇṇanāya
භික්‌ඛුනිවිභඞ්‌ගවණ්‌ණනාය
Bhikkhunivibhaṅgavaṇṇanāya
යොජනා සමත්‌තා.
Yojanā samattā.
ජාදිලඤ්‌ඡිතනාමෙන, නෙකානං වාචිතො මයා;
Jādilañchitanāmena, nekānaṃ vācito mayā;
භික්‌ඛුනීනං විභඞ්‌ගස්‌ස, සමත්‌තො යොජනානයොති.
Bhikkhunīnaṃ vibhaṅgassa, samatto yojanānayoti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 1. පඨමපාටිදෙසනීයසික්‌ඛාපදං • 1. Paṭhamapāṭidesanīyasikkhāpadaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
