| Library / Tipiṭaka / तिपिटक • Tipiṭaka / भिक्खुनीविभङ्ग-अट्ठकथा • Bhikkhunīvibhaṅga-aṭṭhakathā |
५. पाटिदेसनीयकण्डं (भिक्खुनीविभङ्गवण्णना)
5. Pāṭidesanīyakaṇḍaṃ (bhikkhunīvibhaṅgavaṇṇanā)
पाटिदेसनीयसिक्खापदवण्णना
Pāṭidesanīyasikkhāpadavaṇṇanā
पाटिदेसनीया नाम, खुद्दकानं अनन्तरा।
Pāṭidesanīyā nāma, khuddakānaṃ anantarā;
ये धम्मा अट्ठ आरुळ्हा, सङ्खेपेनेव सङ्गहं।
Ye dhammā aṭṭha āruḷhā, saṅkhepeneva saṅgahaṃ;
तेसं पवत्तते एसा, सङ्खेपेनेव वण्णना॥
Tesaṃ pavattate esā, saṅkhepeneva vaṇṇanā.
१२२८. यानि हि एत्थ पाळियं सप्पितेलादीनि निद्दिट्ठानि, तानियेव विञ्ञापेत्वा भुञ्जन्तिया पाटिदेसनीया। पाळिविनिमुत्तकेसु पन सब्बेसु दुक्कटं। सेसमेत्थ उत्तानमेव। अट्ठविधम्पि पनेतं पाटिदेसनीयं चतुसमुट्ठानं – कायतो कायवाचतो कायचित्ततो कायवाचाचित्ततो च समुट्ठाति, किरियं नोसञ्ञाविमोक्खं, अचित्तकं, पण्णत्तिवज्जं, कायकम्मं, वचीकम्मं, तिचित्तं, तिवेदनन्ति।
1228. Yāni hi ettha pāḷiyaṃ sappitelādīni niddiṭṭhāni, tāniyeva viññāpetvā bhuñjantiyā pāṭidesanīyā. Pāḷivinimuttakesu pana sabbesu dukkaṭaṃ. Sesamettha uttānameva. Aṭṭhavidhampi panetaṃ pāṭidesanīyaṃ catusamuṭṭhānaṃ – kāyato kāyavācato kāyacittato kāyavācācittato ca samuṭṭhāti, kiriyaṃ nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
पाटिदेसनीयवण्णना निट्ठिता।
Pāṭidesanīyavaṇṇanā niṭṭhitā.
पाटिदेसनीयकण्डं निट्ठितं।
Pāṭidesanīyakaṇḍaṃ niṭṭhitaṃ.
सेखिया पन उद्दिट्ठा, ये धम्मा पञ्चसत्तति।
Sekhiyā pana uddiṭṭhā, ye dhammā pañcasattati;
तेसं अनन्तरायेव, सत्ताधिकरणव्हया॥
Tesaṃ anantarāyeva, sattādhikaraṇavhayā.
महाविभङ्गे यो वुत्तो, तेसं अत्थविनिच्छयो।
Mahāvibhaṅge yo vutto, tesaṃ atthavinicchayo;
भिक्खुनीनं विभङ्गेपि, तादिसंयेव तं विदू॥
Bhikkhunīnaṃ vibhaṅgepi, tādisaṃyeva taṃ vidū.
यस्मा तस्मा विसुं तेसं, धम्मानं अत्थवण्णना।
Yasmā tasmā visuṃ tesaṃ, dhammānaṃ atthavaṇṇanā;
न वुत्ता तत्थ या वुत्ता, वुत्तायेव हि सा इधाति॥
Na vuttā tattha yā vuttā, vuttāyeva hi sā idhāti.
समन्तपासादिकाय विनयसंवण्णनाय
Samantapāsādikāya vinayasaṃvaṇṇanāya
भिक्खुनीविभङ्गवण्णना निट्ठिता।
Bhikkhunīvibhaṅgavaṇṇanā niṭṭhitā.
सब्बासवपहं एसा, निट्ठिता वण्णना यथा।
Sabbāsavapahaṃ esā, niṭṭhitā vaṇṇanā yathā;
सब्बासवपहं मग्गं, पत्वा पस्सन्तु निब्बुतिन्ति॥
Sabbāsavapahaṃ maggaṃ, patvā passantu nibbutinti.
उभतोविभङ्गट्ठकथा निट्ठिता।
Ubhatovibhaṅgaṭṭhakathā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / भिक्खुनीविभङ्ग • Bhikkhunīvibhaṅga / १. पठमपाटिदेसनीयसिक्खापदं • 1. Paṭhamapāṭidesanīyasikkhāpadaṃ
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पाटिदेसनीयसिक्खापदवण्णना • Pāṭidesanīyasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / पाटिदेसनीयसिक्खापदवण्णना • Pāṭidesanīyasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ५. पाटिदेसनीयसिक्खापद-अत्थयोजना • 5. Pāṭidesanīyasikkhāpada-atthayojanā
