| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā |
5. පාටිදෙසනීයකණ්‌ඩං (භික්‌ඛුනීවිභඞ්‌ගවණ්‌ණනා)
5. Pāṭidesanīyakaṇḍaṃ (bhikkhunīvibhaṅgavaṇṇanā)
පාටිදෙසනීයසික්‌ඛාපදවණ්‌ණනා
Pāṭidesanīyasikkhāpadavaṇṇanā
පාටිදෙසනීයා නාම, ඛුද්‌දකානං අනන්‌තරා;
Pāṭidesanīyā nāma, khuddakānaṃ anantarā;
යෙ ධම්‌මා අට්‌ඨ ආරුළ්‌හා, සඞ්‌ඛෙපෙනෙව සඞ්‌ගහං;
Ye dhammā aṭṭha āruḷhā, saṅkhepeneva saṅgahaṃ;
තෙසං පවත්‌තතෙ එසා, සඞ්‌ඛෙපෙනෙව වණ්‌ණනා.
Tesaṃ pavattate esā, saṅkhepeneva vaṇṇanā.
1228. යානි හි එත්‌ථ පාළියං සප්‌පිතෙලාදීනි නිද්‌දිට්‌ඨානි, තානියෙව විඤ්‌ඤාපෙත්‌වා භුඤ්‌ජන්‌තියා පාටිදෙසනීයා. පාළිවිනිමුත්‌තකෙසු පන සබ්‌බෙසු දුක්‌කටං. සෙසමෙත්‌ථ උත්‌තානමෙව. අට්‌ඨවිධම්‌පි පනෙතං පාටිදෙසනීයං චතුසමුට්‌ඨානං – කායතො කායවාචතො කායචිත්‌තතො කායවාචාචිත්‌තතො ච සමුට්‌ඨාති, කිරියං නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, වචීකම්‌මං, තිචිත්‌තං, තිවෙදනන්‌ති.
1228. Yāni hi ettha pāḷiyaṃ sappitelādīni niddiṭṭhāni, tāniyeva viññāpetvā bhuñjantiyā pāṭidesanīyā. Pāḷivinimuttakesu pana sabbesu dukkaṭaṃ. Sesamettha uttānameva. Aṭṭhavidhampi panetaṃ pāṭidesanīyaṃ catusamuṭṭhānaṃ – kāyato kāyavācato kāyacittato kāyavācācittato ca samuṭṭhāti, kiriyaṃ nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
පාටිදෙසනීයවණ්‌ණනා නිට්‌ඨිතා.
Pāṭidesanīyavaṇṇanā niṭṭhitā.
පාටිදෙසනීයකණ්‌ඩං නිට්‌ඨිතං.
Pāṭidesanīyakaṇḍaṃ niṭṭhitaṃ.
සෙඛියා පන උද්‌දිට්‌ඨා, යෙ ධම්‌මා පඤ්‌චසත්‌තති;
Sekhiyā pana uddiṭṭhā, ye dhammā pañcasattati;
තෙසං අනන්‌තරායෙව, සත්‌තාධිකරණව්‌හයා.
Tesaṃ anantarāyeva, sattādhikaraṇavhayā.
මහාවිභඞ්‌ගෙ යො වුත්‌තො, තෙසං අත්‌ථවිනිච්‌ඡයො;
Mahāvibhaṅge yo vutto, tesaṃ atthavinicchayo;
භික්‌ඛුනීනං විභඞ්‌ගෙපි, තාදිසංයෙව තං විදූ.
Bhikkhunīnaṃ vibhaṅgepi, tādisaṃyeva taṃ vidū.
යස්‌මා තස්‌මා විසුං තෙසං, ධම්‌මානං අත්‌ථවණ්‌ණනා;
Yasmā tasmā visuṃ tesaṃ, dhammānaṃ atthavaṇṇanā;
න වුත්‌තා තත්‌ථ යා වුත්‌තා, වුත්‌තායෙව හි සා ඉධාති.
Na vuttā tattha yā vuttā, vuttāyeva hi sā idhāti.
සමන්‌තපාසාදිකාය විනයසංවණ්‌ණනාය
Samantapāsādikāya vinayasaṃvaṇṇanāya
භික්‌ඛුනීවිභඞ්‌ගවණ්‌ණනා නිට්‌ඨිතා.
Bhikkhunīvibhaṅgavaṇṇanā niṭṭhitā.
සබ්‌බාසවපහං එසා, නිට්‌ඨිතා වණ්‌ණනා යථා;
Sabbāsavapahaṃ esā, niṭṭhitā vaṇṇanā yathā;
සබ්‌බාසවපහං මග්‌ගං, පත්‌වා පස්‌සන්‌තු නිබ්‌බුතින්‌ති.
Sabbāsavapahaṃ maggaṃ, patvā passantu nibbutinti.
උභතොවිභඞ්‌ගට්‌ඨකථා නිට්‌ඨිතා.
Ubhatovibhaṅgaṭṭhakathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 1. පඨමපාටිදෙසනීයසික්‌ඛාපදං • 1. Paṭhamapāṭidesanīyasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 5. පාටිදෙසනීයසික්‌ඛාපද-අත්‌ථයොජනා • 5. Pāṭidesanīyasikkhāpada-atthayojanā
