| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
9. படிக்³கா³ஹனித்³தே³ஸவண்ணனா
9. Paṭiggāhaniddesavaṇṇanā
106. இதா³னி ‘‘படிக்³கா³ஹோ’’தி பத³ங் வித்தா²ரேதுங் ‘‘தா³துகாமாபி⁴ஹாரோ சா’’திஆதி³ ஆரத்³த⁴ங். தத்த² தா³துகாமஸ்ஸ அபி⁴ஹாரோ தா³துகாமாபி⁴ஹாரோ. ஏதேன அஞ்ஞஸ்ஸ பத்தே பக்கி²பிதுங் ஆலுலெந்தஸ்ஸ பு²ஸிதானி உட்ட²ஹித்வா அஞ்ஞஸ்ஸ பத்தே ஸசே பதந்தி, படிக்³க³ஹணங் ந ருஹதீதி தீ³பிதங் ஹோதி. ஏரணக்க²மந்தி தா²மமஜ்ஜி²மேன புரிஸேன உக்கி²பனக்க²மங், ததோ மஹந்தே படிக்³க³ஹணங் ந ருஹதி. திதா⁴ தெ³ந்தேதி காயகாயப்படிப³த்³த⁴னிஸ்ஸக்³கி³யானங் வஸேன திதா⁴ தெ³ந்தே. தஸ்ஸ பி⁴க்கு²னோ காயகாயப்படிப³த்³தே⁴ஹி த்³விதா⁴ கா³ஹோதி அத்தோ². பஞ்சங்கோ³ ஏவங் பஞ்சங்கே³வங். தா³துகாமாபி⁴ஹாரோ ஏகங், ஹத்த²பாஸோ ஏகங், ஏரணக்க²மதா ஏகங், தே³வமனுஸ்ஸதிரச்சா²னக³தேஸு ஏகேன திதா⁴ தா³னமேகங், த்³விதா⁴ கா³ஹோ ஏகந்தி ஏவங் பஞ்சங்கா³னி ஹொந்தி.
106. Idāni ‘‘paṭiggāho’’ti padaṃ vitthāretuṃ ‘‘dātukāmābhihāro cā’’tiādi āraddhaṃ. Tattha dātukāmassa abhihāro dātukāmābhihāro. Etena aññassa patte pakkhipituṃ ālulentassa phusitāni uṭṭhahitvā aññassa patte sace patanti, paṭiggahaṇaṃ na ruhatīti dīpitaṃ hoti. Eraṇakkhamanti thāmamajjhimena purisena ukkhipanakkhamaṃ, tato mahante paṭiggahaṇaṃ na ruhati. Tidhā denteti kāyakāyappaṭibaddhanissaggiyānaṃ vasena tidhā dente. Tassa bhikkhuno kāyakāyappaṭibaddhehi dvidhā gāhoti attho. Pañcaṅgo evaṃ pañcaṅgevaṃ. Dātukāmābhihāro ekaṃ, hatthapāso ekaṃ, eraṇakkhamatā ekaṃ, devamanussatiracchānagatesu ekena tidhā dānamekaṃ, dvidhā gāho ekanti evaṃ pañcaṅgāni honti.
107. இதா³னி யேன காயப்படிப³த்³தே⁴ன படிக்³க³ஹணங் ந ருஹதி, தங் த³ஸ்ஸேதுங் ‘‘அஸங்ஹாரியே’’திஆதி³மாஹ. கா²ணுகே (பாசி॰ அட்ட²॰ 265) ப³ந்தி⁴த்வா ட²பிதமஞ்சாதி³ம்ஹி வா ப²லகே வா பாஸாணே வா அஸங்ஹாரியே ந ருஹதீதி அத்தோ². தத்த²ஜாதே பது³மினிபண்ணே வா கிங்ஸுகபண்ணாதி³ம்ஹி வா ந வட்டதி, ஸுகு²மே சிஞ்சஆதீ³னங் பண்ணே வா ந ருஹதி, யஞ்ச மஜ்ஜி²மபுரிஸோ ஸந்தா⁴ரேதுங் ந ஸக்கோதி, தஸ்மிங் அஸய்ஹபா⁴ரே ச படிக்³க³ஹோ ந ருஹதீதி அத்தோ².
107. Idāni yena kāyappaṭibaddhena paṭiggahaṇaṃ na ruhati, taṃ dassetuṃ ‘‘asaṃhāriye’’tiādimāha. Khāṇuke (pāci. aṭṭha. 265) bandhitvā ṭhapitamañcādimhi vā phalake vā pāsāṇe vā asaṃhāriye na ruhatīti attho. Tatthajāte paduminipaṇṇe vā kiṃsukapaṇṇādimhi vā na vaṭṭati, sukhume ciñcaādīnaṃ paṇṇe vā na ruhati, yañca majjhimapuriso sandhāretuṃ na sakkoti, tasmiṃ asayhabhāre ca paṭiggaho na ruhatīti attho.
108. இதா³னி படிக்³க³ஹணவிஜஹனங் த³ஸ்ஸேதுங் ‘‘ஸிக்கா²மரணலிங்கே³ஹீ’’திஆதி³ ஆரத்³த⁴ங். தத்தா²யங் பிண்ட³த்தோ² – ஸிக்கா²பச்சக்கா²னேன ச மரணேன ச லிங்க³பரிவத்தனேன ச ‘‘ந தங் தா³னி பரிபு⁴ஞ்ஜிஸ்ஸாமீ’’தி வா ‘‘ந புன படிக்³க³ஹெத்வா பரிபு⁴ஞ்ஜிஸ்ஸாமீ’’தி வா ஏவங் அனபெக்க²விஸ்ஸஜ்ஜனேன ச சோராதீ³ஹி வா அச்சே²தா³ ச அனுபஸம்பன்னஸ்ஸ தா³னா ச கா³ஹோ படிக்³கா³ஹோ உபஸம்மதி விஜஹதீதி. பி⁴க்கு²னியா பன ஸிக்கா²பச்சக்கா²னஸ்ஸ அபா⁴வா விப்³ப⁴மனேன ச விஜஹதீதி க³ஹேதப்³ப³ங்.
108. Idāni paṭiggahaṇavijahanaṃ dassetuṃ ‘‘sikkhāmaraṇaliṅgehī’’tiādi āraddhaṃ. Tatthāyaṃ piṇḍattho – sikkhāpaccakkhānena ca maraṇena ca liṅgaparivattanena ca ‘‘na taṃ dāni paribhuñjissāmī’’ti vā ‘‘na puna paṭiggahetvā paribhuñjissāmī’’ti vā evaṃ anapekkhavissajjanena ca corādīhi vā acchedā ca anupasampannassa dānā ca gāho paṭiggāho upasammati vijahatīti. Bhikkhuniyā pana sikkhāpaccakkhānassa abhāvā vibbhamanena ca vijahatīti gahetabbaṃ.
109-110
109-110
. இதா³னி படிக்³க³ஹெத்வா பரிபு⁴ஞ்ஜிதப்³ப³ங் த³ஸ்ஸேதுங் ‘‘அப்படிக்³க³ஹிதங் ஸப்³ப³’’ந்திஆதி³ வுத்தங். தஸ்ஸத்தோ² (கங்கா²॰ அட்ட²॰ த³ந்தபோனஸிக்கா²பத³) – சதுகாலிகபரியாபன்னங் அந்தமஸோ ரஜரேணும்பி அப்படிக்³க³ஹெத்வா ஸப்³ப³ங் பரிபு⁴ஞ்ஜதோ பாசித்தி. இதா³னி அப்படிக்³க³ஹெத்வா பரிபு⁴ஞ்ஜிதப்³ப³ங் த³ஸ்ஸேதுங் ‘‘ஸுத்³த⁴ஞ்ச நாதிப³ஹல’’ந்திஆதி³ வுத்தங். தத்த² ஸுத்³த⁴ஞ்சாதி அஞ்ஞேஸங் ரஸேன அஸம்மிஸ்ஸங். ஹிமோத³கஸமுத்³தோ³த³காதீ³ஸு படிக்³க³ஹணகிச்சங் நத்தி². லோணஞ்ச அஸ்ஸு ச லோணஸ்ஸு. எத்த² லோணங் நாம ஸரீரே உட்டி²தங். ஏதானி பன ஸப்³பா³னி அவிச்சி²ன்னானேவ கப்பந்தி, நேதரானி.
. Idāni paṭiggahetvā paribhuñjitabbaṃ dassetuṃ ‘‘appaṭiggahitaṃ sabba’’ntiādi vuttaṃ. Tassattho (kaṅkhā. aṭṭha. dantaponasikkhāpada) – catukālikapariyāpannaṃ antamaso rajareṇumpi appaṭiggahetvā sabbaṃ paribhuñjato pācitti. Idāni appaṭiggahetvā paribhuñjitabbaṃ dassetuṃ ‘‘suddhañca nātibahala’’ntiādi vuttaṃ. Tattha suddhañcāti aññesaṃ rasena asammissaṃ. Himodakasamuddodakādīsu paṭiggahaṇakiccaṃ natthi. Loṇañca assu ca loṇassu. Ettha loṇaṃ nāma sarīre uṭṭhitaṃ. Etāni pana sabbāni avicchinnāneva kappanti, netarāni.
111. இதா³னி அனங்க³லக்³கா³னிபி த³ஸ்ஸேதுங் ‘‘கூ³த²மத்திகமுத்தானீ’’திஆதி³மாஹ. ததா²விதே⁴தி ததா²விதே⁴ காலே, ஸப்பத³ட்ட²காலேதி அத்தோ². அஞ்ஞேஸங் பன அப்படிக்³க³ஹிதங் அனங்க³லக்³க³ங் ந வட்டதி. கஸ்மா ? ‘‘அனுஜானாமி, பி⁴க்க²வே, யங் கரொந்தோ படிக்³க³ண்ஹாதி, ஸ்வேவ படிக்³க³ஹோ கதோ, ந புன படிக்³க³ஹேதப்³போ³’’தி (மஹாவ॰ 268) வுத்தத்தா.
111. Idāni anaṅgalaggānipi dassetuṃ ‘‘gūthamattikamuttānī’’tiādimāha. Tathāvidheti tathāvidhe kāle, sappadaṭṭhakāleti attho. Aññesaṃ pana appaṭiggahitaṃ anaṅgalaggaṃ na vaṭṭati. Kasmā ? ‘‘Anujānāmi, bhikkhave, yaṃ karonto paṭiggaṇhāti, sveva paṭiggaho kato, na puna paṭiggahetabbo’’ti (mahāva. 268) vuttattā.
112. து³ரூபசிண்ணேதி து³ப்பராமட்டே² ப²லிகருக்க²வல்லிஆதி³ங் சாலெந்தஸ்ஸ வா ஆமிஸப⁴ரிதபா⁴ஜனங் அப்படிக்³க³ஹிதங் பராமஸந்தஸ்ஸ வா து³ரூபசிண்ணது³க்கடங் ஹோதீதி அத்தோ². ரஜோகிண்ணேதி பி⁴க்கா²ய சரந்தஸ்ஸ பத்தே பதிதரஜங் அப்படிக்³க³ஹெத்வா புன பி⁴க்க²ங் க³ண்ஹதோ வினயது³க்கடங் ஹோதீதி அத்தோ². அது²க்³க³ஹப்படிக்³க³ஹேதி அத² உக்³க³ஹப்படிக்³க³ஹே, அத்தனா ஏவ உக்³க³ஹெத்வா க³ஹிதேதி அத்தோ². அகப்பியகுடியங் அந்தோவுத்தே² ச யத்த² கத்த²சி பி⁴க்கு²னா ஸயங்பக்கே ச அத்தனா வா பரேன வா அகப்பியகுடியங் அந்தோபக்கே சாதி ஸப்³ப³த்த² து³க்கடந்தி அதி⁴ப்பாயோ. படிக்³கா³ஹவினிச்ச²யோ.
112.Durūpaciṇṇeti dupparāmaṭṭhe phalikarukkhavalliādiṃ cālentassa vā āmisabharitabhājanaṃ appaṭiggahitaṃ parāmasantassa vā durūpaciṇṇadukkaṭaṃ hotīti attho. Rajokiṇṇeti bhikkhāya carantassa patte patitarajaṃ appaṭiggahetvā puna bhikkhaṃ gaṇhato vinayadukkaṭaṃ hotīti attho. Athuggahappaṭiggaheti atha uggahappaṭiggahe, attanā eva uggahetvā gahiteti attho. Akappiyakuṭiyaṃ antovutthe ca yattha katthaci bhikkhunā sayaṃpakke ca attanā vā parena vā akappiyakuṭiyaṃ antopakke cāti sabbattha dukkaṭanti adhippāyo. Paṭiggāhavinicchayo.
படிக்³கா³ஹனித்³தே³ஸவண்ணனா நிட்டி²தா.
Paṭiggāhaniddesavaṇṇanā niṭṭhitā.
