| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༩. པཊིགྒཱཧནིདྡེསཝཎྞནཱ
9. Paṭiggāhaniddesavaṇṇanā
༡༠༦. ཨིདཱནི ‘‘པཊིགྒཱཧོ’’ཏི པདཾ ཝིཏྠཱརེཏུཾ ‘‘དཱཏུཀཱམཱབྷིཧཱརོ ཙཱ’’ཏིཨཱདི ཨཱརདྡྷཾ། ཏཏྠ དཱཏུཀཱམསྶ ཨབྷིཧཱརོ དཱཏུཀཱམཱབྷིཧཱརོ། ཨེཏེན ཨཉྙསྶ པཏྟེ པཀྑིཔིཏུཾ ཨཱལུལེནྟསྶ ཕུསིཏཱནི ཨུཊྛཧིཏྭཱ ཨཉྙསྶ པཏྟེ སཙེ པཏནྟི, པཊིགྒཧཎཾ ན རུཧཏཱིཏི དཱིཔིཏཾ ཧོཏི། ཨེརཎཀྑམནྟི ཐཱམམཛ྄ཛྷིམེན པུརིསེན ཨུཀྑིཔནཀྑམཾ, ཏཏོ མཧནྟེ པཊིགྒཧཎཾ ན རུཧཏི། ཏིདྷཱ དེནྟེཏི ཀཱཡཀཱཡཔྤཊིབདྡྷནིསྶགྒིཡཱནཾ ཝསེན ཏིདྷཱ དེནྟེ། ཏསྶ བྷིཀྑུནོ ཀཱཡཀཱཡཔྤཊིབདྡྷེཧི དྭིདྷཱ གཱཧོཏི ཨཏྠོ། པཉྩངྒོ ཨེཝཾ པཉྩངྒེཝཾ། དཱཏུཀཱམཱབྷིཧཱརོ ཨེཀཾ, ཧཏྠཔཱསོ ཨེཀཾ, ཨེརཎཀྑམཏཱ ཨེཀཾ, དེཝམནུསྶཏིརཙྪཱནགཏེསུ ཨེཀེན ཏིདྷཱ དཱནམེཀཾ, དྭིདྷཱ གཱཧོ ཨེཀནྟི ཨེཝཾ པཉྩངྒཱནི ཧོནྟི།
106. Idāni ‘‘paṭiggāho’’ti padaṃ vitthāretuṃ ‘‘dātukāmābhihāro cā’’tiādi āraddhaṃ. Tattha dātukāmassa abhihāro dātukāmābhihāro. Etena aññassa patte pakkhipituṃ ālulentassa phusitāni uṭṭhahitvā aññassa patte sace patanti, paṭiggahaṇaṃ na ruhatīti dīpitaṃ hoti. Eraṇakkhamanti thāmamajjhimena purisena ukkhipanakkhamaṃ, tato mahante paṭiggahaṇaṃ na ruhati. Tidhā denteti kāyakāyappaṭibaddhanissaggiyānaṃ vasena tidhā dente. Tassa bhikkhuno kāyakāyappaṭibaddhehi dvidhā gāhoti attho. Pañcaṅgo evaṃ pañcaṅgevaṃ. Dātukāmābhihāro ekaṃ, hatthapāso ekaṃ, eraṇakkhamatā ekaṃ, devamanussatiracchānagatesu ekena tidhā dānamekaṃ, dvidhā gāho ekanti evaṃ pañcaṅgāni honti.
༡༠༧. ཨིདཱནི ཡེན ཀཱཡཔྤཊིབདྡྷེན པཊིགྒཧཎཾ ན རུཧཏི, ཏཾ དསྶེཏུཾ ‘‘ཨསཾཧཱརིཡེ’’ཏིཨཱདིམཱཧ། ཁཱཎུཀེ (པཱཙི॰ ཨཊྛ॰ ༢༦༥) བནྡྷིཏྭཱ ཋཔིཏམཉྩཱདིམྷི ཝཱ ཕལཀེ ཝཱ པཱསཱཎེ ཝཱ ཨསཾཧཱརིཡེ ན རུཧཏཱིཏི ཨཏྠོ། ཏཏྠཛཱཏེ པདུམིནིཔཎྞེ ཝཱ ཀིཾསུཀཔཎྞཱདིམྷི ཝཱ ན ཝཊྚཏི, སུཁུམེ ཙིཉྩཨཱདཱིནཾ པཎྞེ ཝཱ ན རུཧཏི, ཡཉྩ མཛ྄ཛྷིམཔུརིསོ སནྡྷཱརེཏུཾ ན སཀྐོཏི, ཏསྨིཾ ཨསཡ྄ཧབྷཱརེ ཙ པཊིགྒཧོ ན རུཧཏཱིཏི ཨཏྠོ།
107. Idāni yena kāyappaṭibaddhena paṭiggahaṇaṃ na ruhati, taṃ dassetuṃ ‘‘asaṃhāriye’’tiādimāha. Khāṇuke (pāci. aṭṭha. 265) bandhitvā ṭhapitamañcādimhi vā phalake vā pāsāṇe vā asaṃhāriye na ruhatīti attho. Tatthajāte paduminipaṇṇe vā kiṃsukapaṇṇādimhi vā na vaṭṭati, sukhume ciñcaādīnaṃ paṇṇe vā na ruhati, yañca majjhimapuriso sandhāretuṃ na sakkoti, tasmiṃ asayhabhāre ca paṭiggaho na ruhatīti attho.
༡༠༨. ཨིདཱནི པཊིགྒཧཎཝིཛཧནཾ དསྶེཏུཾ ‘‘སིཀྑཱམརཎལིངྒེཧཱི’’ཏིཨཱདི ཨཱརདྡྷཾ། ཏཏྠཱཡཾ པིཎྜཏྠོ – སིཀྑཱཔཙྩཀྑཱནེན ཙ མརཎེན ཙ ལིངྒཔརིཝཏྟནེན ཙ ‘‘ན ཏཾ དཱནི པརིབྷུཉྫིསྶཱམཱི’’ཏི ཝཱ ‘‘ན པུན པཊིགྒཧེཏྭཱ པརིབྷུཉྫིསྶཱམཱི’’ཏི ཝཱ ཨེཝཾ ཨནཔེཀྑཝིསྶཛྫནེན ཙ ཙོརཱདཱིཧི ཝཱ ཨཙྪེདཱ ཙ ཨནུཔསམྤནྣསྶ དཱནཱ ཙ གཱཧོ པཊིགྒཱཧོ ཨུཔསམྨཏི ཝིཛཧཏཱིཏི། བྷིཀྑུནིཡཱ པན སིཀྑཱཔཙྩཀྑཱནསྶ ཨབྷཱཝཱ ཝིབྦྷམནེན ཙ ཝིཛཧཏཱིཏི གཧེཏབྦཾ།
108. Idāni paṭiggahaṇavijahanaṃ dassetuṃ ‘‘sikkhāmaraṇaliṅgehī’’tiādi āraddhaṃ. Tatthāyaṃ piṇḍattho – sikkhāpaccakkhānena ca maraṇena ca liṅgaparivattanena ca ‘‘na taṃ dāni paribhuñjissāmī’’ti vā ‘‘na puna paṭiggahetvā paribhuñjissāmī’’ti vā evaṃ anapekkhavissajjanena ca corādīhi vā acchedā ca anupasampannassa dānā ca gāho paṭiggāho upasammati vijahatīti. Bhikkhuniyā pana sikkhāpaccakkhānassa abhāvā vibbhamanena ca vijahatīti gahetabbaṃ.
༡༠༩-༡༡༠
109-110
. ཨིདཱནི པཊིགྒཧེཏྭཱ པརིབྷུཉྫིཏབྦཾ དསྶེཏུཾ ‘‘ཨཔྤཊིགྒཧིཏཾ སབྦ’’ནྟིཨཱདི ཝུཏྟཾ། ཏསྶཏྠོ (ཀངྑཱ॰ ཨཊྛ॰ དནྟཔོནསིཀྑཱཔད) – ཙཏུཀཱལིཀཔརིཡཱཔནྣཾ ཨནྟམསོ རཛརེཎུམྤི ཨཔྤཊིགྒཧེཏྭཱ སབྦཾ པརིབྷུཉྫཏོ པཱཙིཏྟི། ཨིདཱནི ཨཔྤཊིགྒཧེཏྭཱ པརིབྷུཉྫིཏབྦཾ དསྶེཏུཾ ‘‘སུདྡྷཉྩ ནཱཏིབཧལ’’ནྟིཨཱདི ཝུཏྟཾ། ཏཏྠ སུདྡྷཉྩཱཏི ཨཉྙེསཾ རསེན ཨསམྨིསྶཾ། ཧིམོདཀསམུདྡོདཀཱདཱིསུ པཊིགྒཧཎཀིཙྩཾ ནཏྠི། ལོཎཉྩ ཨསྶུ ཙ ལོཎསྶུ། ཨེཏྠ ལོཎཾ ནཱམ སརཱིརེ ཨུཊྛིཏཾ། ཨེཏཱནི པན སབྦཱནི ཨཝིཙྪིནྣཱནེཝ ཀཔྤནྟི, ནེཏརཱནི།
. Idāni paṭiggahetvā paribhuñjitabbaṃ dassetuṃ ‘‘appaṭiggahitaṃ sabba’’ntiādi vuttaṃ. Tassattho (kaṅkhā. aṭṭha. dantaponasikkhāpada) – catukālikapariyāpannaṃ antamaso rajareṇumpi appaṭiggahetvā sabbaṃ paribhuñjato pācitti. Idāni appaṭiggahetvā paribhuñjitabbaṃ dassetuṃ ‘‘suddhañca nātibahala’’ntiādi vuttaṃ. Tattha suddhañcāti aññesaṃ rasena asammissaṃ. Himodakasamuddodakādīsu paṭiggahaṇakiccaṃ natthi. Loṇañca assu ca loṇassu. Ettha loṇaṃ nāma sarīre uṭṭhitaṃ. Etāni pana sabbāni avicchinnāneva kappanti, netarāni.
༡༡༡. ཨིདཱནི ཨནངྒལགྒཱནིཔི དསྶེཏུཾ ‘‘གཱུཐམཏྟིཀམུཏྟཱནཱི’’ཏིཨཱདིམཱཧ། ཏཐཱཝིདྷེཏི ཏཐཱཝིདྷེ ཀཱལེ, སཔྤདཊྛཀཱལེཏི ཨཏྠོ། ཨཉྙེསཾ པན ཨཔྤཊིགྒཧིཏཾ ཨནངྒལགྒཾ ན ཝཊྚཏི། ཀསྨཱ ? ‘‘ཨནུཛཱནཱམི, བྷིཀྑཝེ, ཡཾ ཀརོནྟོ པཊིགྒཎྷཱཏི, སྭེཝ པཊིགྒཧོ ཀཏོ, ན པུན པཊིགྒཧེཏབྦོ’’ཏི (མཧཱཝ॰ ༢༦༨) ཝུཏྟཏྟཱ།
111. Idāni anaṅgalaggānipi dassetuṃ ‘‘gūthamattikamuttānī’’tiādimāha. Tathāvidheti tathāvidhe kāle, sappadaṭṭhakāleti attho. Aññesaṃ pana appaṭiggahitaṃ anaṅgalaggaṃ na vaṭṭati. Kasmā ? ‘‘Anujānāmi, bhikkhave, yaṃ karonto paṭiggaṇhāti, sveva paṭiggaho kato, na puna paṭiggahetabbo’’ti (mahāva. 268) vuttattā.
༡༡༢. དུརཱུཔཙིཎྞེཏི དུཔྤརཱམཊྛེ ཕལིཀརུཀྑཝལླིཨཱདིཾ ཙཱལེནྟསྶ ཝཱ ཨཱམིསབྷརིཏབྷཱཛནཾ ཨཔྤཊིགྒཧིཏཾ པརཱམསནྟསྶ ཝཱ དུརཱུཔཙིཎྞདུཀྐཊཾ ཧོཏཱིཏི ཨཏྠོ། རཛོཀིཎྞེཏི བྷིཀྑཱཡ ཙརནྟསྶ པཏྟེ པཏིཏརཛཾ ཨཔྤཊིགྒཧེཏྭཱ པུན བྷིཀྑཾ གཎྷཏོ ཝིནཡདུཀྐཊཾ ཧོཏཱིཏི ཨཏྠོ། ཨཐུགྒཧཔྤཊིགྒཧེཏི ཨཐ ཨུགྒཧཔྤཊིགྒཧེ, ཨཏྟནཱ ཨེཝ ཨུགྒཧེཏྭཱ གཧིཏེཏི ཨཏྠོ། ཨཀཔྤིཡཀུཊིཡཾ ཨནྟོཝུཏྠེ ཙ ཡཏྠ ཀཏྠཙི བྷིཀྑུནཱ སཡཾཔཀྐེ ཙ ཨཏྟནཱ ཝཱ པརེན ཝཱ ཨཀཔྤིཡཀུཊིཡཾ ཨནྟོཔཀྐེ ཙཱཏི སབྦཏྠ དུཀྐཊནྟི ཨདྷིཔྤཱཡོ། པཊིགྒཱཧཝིནིཙྪཡོ།
112.Durūpaciṇṇeti dupparāmaṭṭhe phalikarukkhavalliādiṃ cālentassa vā āmisabharitabhājanaṃ appaṭiggahitaṃ parāmasantassa vā durūpaciṇṇadukkaṭaṃ hotīti attho. Rajokiṇṇeti bhikkhāya carantassa patte patitarajaṃ appaṭiggahetvā puna bhikkhaṃ gaṇhato vinayadukkaṭaṃ hotīti attho. Athuggahappaṭiggaheti atha uggahappaṭiggahe, attanā eva uggahetvā gahiteti attho. Akappiyakuṭiyaṃ antovutthe ca yattha katthaci bhikkhunā sayaṃpakke ca attanā vā parena vā akappiyakuṭiyaṃ antopakke cāti sabbattha dukkaṭanti adhippāyo. Paṭiggāhavinicchayo.
པཊིགྒཱཧནིདྡེསཝཎྞནཱ ནིཊྛིཏཱ།
Paṭiggāhaniddesavaṇṇanā niṭṭhitā.
