| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੯. ਪਟਿਗ੍ਗਾਹਨਿਦ੍ਦੇਸવਣ੍ਣਨਾ
9. Paṭiggāhaniddesavaṇṇanā
੧੦੬. ਦਾਤੁਂ ਕਾਮੇਤੀਤਿ ਦਾਤੁਕਾਮੋ, ਤਸ੍ਸ ਅਭਿਹਾਰੋ ਈਸਕਮ੍ਪਿ ਓਣਮਨਾਦਿਨਾਭਿਹਰਣਨ੍ਤਿ ਤਪ੍ਪੁਰਿਸੋ, ਹਤ੍ਥਸ੍ਸ ਪਾਸੋ ਹਤ੍ਥਪਾਸੋ। ਰੁਲ਼੍ਹੀવਸੇਨ ਤੁ ਅਡ੍ਢਤੇਯ੍ਯਹਤ੍ਥੋ ਹਤ੍ਥਪਾਸੋ ਨਾਮ। ਸੋ ਚ ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਸਨਸ੍ਸ ਪਚ੍ਛਿਮਨ੍ਤਤੋ ਪਟ੍ਠਾਯ, ਸਚੇ ਠਿਤੋ, ਪਣ੍ਹਿਅਨ੍ਤਤੋ ਪਟ੍ਠਾਯ, ਸਚੇ ਨਿਪਨ੍ਨੋ, ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਪਾਰਿਮਨ੍ਤਤੋ ਪਟ੍ਠਾਯ ਦਾਯਕਸ੍ਸ ਨਿਸਿਨ੍ਨਸ੍ਸ ਠਿਤਸ੍ਸ વਾ ਠਪੇਤ੍વਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਪਰਿਚ੍ਛਿਨ੍ਦਿਤ੍વਾ વੇਦਿਤਬ੍ਬੋ। ਏਰਣਕ੍ਖਮਨ੍ਤਿ ਥਾਮਮਜ੍ਝਿਮੇਨ ਪੁਰਿਸੇਨ ਏਰਣਸ੍ਸ ਉਕ੍ਖਿਪਨਸ੍ਸ ਖਮਂ ਯੋਗ੍ਗਂ। વਤ੍ਥੁਸਦ੍ਦਾਪੇਕ੍ਖਂ ਨਪੁਂਸਕਤ੍ਤਂ। ਤਿਧਾ ਦੇਨ੍ਤੇਤਿ ਕਾਯਕਾਯਪ੍ਪਟਿਬਦ੍ਧਨਿਸ੍ਸਗ੍ਗਿਯਾਨਂ વਸੇਨ ਤੀਹਿ ਪਕਾਰੇਹਿ ਦਾਯਕੇ ਦਦਮਾਨੇ। ਤਤ੍ਥ ਯੇਨ ਕੇਨਚਿ ਸਰੀਰਾવਯવੇਨ ਅਨ੍ਤਮਸੋ ਪਾਦਙ੍ਗੁਲਿਯਾਪਿ ਦੀਯਮਾਨਂ ਕਾਯੇਨ ਦਿਨ੍ਨਂ ਨਾਮ ਹੋਤਿ, ਕਟਚ੍ਛੁਆਦੀਸੁ ਯੇਨ ਕੇਨਚਿ ਦੀਯਮਾਨਂ ਕਾਯਪ੍ਪਟਿਬਦ੍ਧੇਨ, ਕਾਯਤੋ ਪਨ ਕਾਯਪ੍ਪਟਿਬਦ੍ਧਤੋ વਾ ਮੋਚੇਤ੍વਾ ਹਤ੍ਥਪਾਸੇ ਠਿਤਸ੍ਸ ਕਾਯੇਨ વਾ ਕਾਯਪ੍ਪਟਿਬਦ੍ਧੇਨ વਾ ਪਾਤਿਯਮਾਨਂ ਨਿਸ੍ਸਗ੍ਗਿਯੇਨ ਪਯੋਗੇਨ ਦਿਨ੍ਨਂ ਨਾਮ। ਦ੍વਿਧਾ ਗਾਹੋਤਿ ਕਾਯਕਾਯਪ੍ਪਟਿਬਦ੍ਧਾਨਂ વਸੇਨ ਦ੍વੀਹਿ ਪਕਾਰੇਹਿ ਯੇਹਿ ਕੇਹਿਚਿ ਦੀਯਮਾਨਸ੍ਸ ਗਹਣਂ। ਏવਂ ਪਟਿਗ੍ਗਹੋ ਪਞ੍ਚਙ੍ਗੋਤਿ ਯੋਜਨਾ। ਪਞ੍ਚਙ੍ਗੋਤਿ ਪਞ੍ਚ ਅਙ੍ਗਾਨਿ ਯਸ੍ਸਾਤਿ ਬਹੁਬ੍ਬੀਹਿ।
106. Dātuṃ kāmetīti dātukāmo, tassa abhihāro īsakampi oṇamanādinābhiharaṇanti tappuriso, hatthassa pāso hatthapāso. Ruḷhīvasena tu aḍḍhateyyahattho hatthapāso nāma. So ca sace bhikkhu nisinno hoti, āsanassa pacchimantato paṭṭhāya, sace ṭhito, paṇhiantato paṭṭhāya, sace nipanno, yena passena nipanno, tassa pārimantato paṭṭhāya dāyakassa nisinnassa ṭhitassa vā ṭhapetvā pasāritahatthaṃ yaṃ āsannataraṃ aṅgaṃ, tassa orimantena paricchinditvā veditabbo. Eraṇakkhamanti thāmamajjhimena purisena eraṇassa ukkhipanassa khamaṃ yoggaṃ. Vatthusaddāpekkhaṃ napuṃsakattaṃ. Tidhā denteti kāyakāyappaṭibaddhanissaggiyānaṃ vasena tīhi pakārehi dāyake dadamāne. Tattha yena kenaci sarīrāvayavena antamaso pādaṅguliyāpi dīyamānaṃ kāyena dinnaṃ nāma hoti, kaṭacchuādīsu yena kenaci dīyamānaṃ kāyappaṭibaddhena, kāyato pana kāyappaṭibaddhato vā mocetvā hatthapāse ṭhitassa kāyena vā kāyappaṭibaddhena vā pātiyamānaṃ nissaggiyena payogena dinnaṃ nāma. Dvidhā gāhoti kāyakāyappaṭibaddhānaṃ vasena dvīhi pakārehi yehi kehici dīyamānassa gahaṇaṃ. Evaṃ paṭiggaho pañcaṅgoti yojanā. Pañcaṅgoti pañca aṅgāni yassāti bahubbīhi.
੧੦੭. ਇਦਾਨਿ ਅਨੇਰਣਕ੍ਖਮੇ ਚ ਕਿਸ੍ਮਿਞ੍ਚਿ ਕਾਯਪ੍ਪਟਿਬਦ੍ਧੇ ਚ ਪਟਿਗ੍ਗਹਣਾਰੋਹਨਂ ਦਸ੍ਸੇਤੁਂ ‘‘ਅਸਂਹਾਰਿਯੇ’’ਤਿਆਦਿਮਾਹ। ਤਤ੍ਥ ਅਸਂਹਾਰਿਯੇਤਿ ਆਨੇਤੁਮਸਕ੍ਕੁਣੇਯ੍ਯੇ ਫਲਕਪਾਸਾਣਾਦਿਮ੍ਹਿ। ਤਤ੍ਥਜਾਤੇਤਿ ਤੇਸੁਯੇવ ਰੁਕ੍ਖਾਦੀਸੁ ਜਾਤੇ ਕਿਂਸੁਕਪਦੁਮਿਨਿਪਣ੍ਣਾਦਿਕੇ। ਚਿਞ੍ਚਆਦੀਨਂ ਸੁਖੁਮੇ ਪਣ੍ਣੇਤਿ ਸਮ੍ਬਨ੍ਧੋ। ਤਾਨਿ ਹਿ ਸਨ੍ਧਾਰੇਤੁਂ ਨ ਸਕ੍ਕੋਨ੍ਤਿ। ਤੇਸਂ ਪਨ ਸਾਖਾਸੁ વਟ੍ਟਤਿ। ਆਦਿ-ਸਦ੍ਦੇਨ ‘‘ਅਙ੍ਗ’’ਨ੍ਤਿਆਦਿਕਂ ਸਙ੍ਗਣ੍ਹਾਤਿ। વਾ-ਸਦ੍ਦੋ ਸਮੁਚ੍ਚਯੇ। ਅਸਯ੍ਹਭਾਰੇਤਿ ਥਾਮਮਜ੍ਝਿਮਪੁਰਿਸੇਨ ਸਹਿਤੁਂ ਸਨ੍ਧਾਰੇਤੁਂ ਅਸਕ੍ਕੁਣੇਯ੍ਯੇ ਭਾਰੇ। ਸਬ੍ਬੇਸਂ ਪਟਿਗ੍ਗਹੋ ‘‘ਨ ਰੂਹਤੀ’’ਤਿ ਇਮਿਨਾ ਸਮ੍ਬਨ੍ਧੋ।
107. Idāni aneraṇakkhame ca kismiñci kāyappaṭibaddhe ca paṭiggahaṇārohanaṃ dassetuṃ ‘‘asaṃhāriye’’tiādimāha. Tattha asaṃhāriyeti ānetumasakkuṇeyye phalakapāsāṇādimhi. Tatthajāteti tesuyeva rukkhādīsu jāte kiṃsukapaduminipaṇṇādike. Ciñcaādīnaṃ sukhume paṇṇeti sambandho. Tāni hi sandhāretuṃ na sakkonti. Tesaṃ pana sākhāsu vaṭṭati. Ādi-saddena ‘‘aṅga’’ntiādikaṃ saṅgaṇhāti. Vā-saddo samuccaye. Asayhabhāreti thāmamajjhimapurisena sahituṃ sandhāretuṃ asakkuṇeyye bhāre. Sabbesaṃ paṭiggaho ‘‘na rūhatī’’ti iminā sambandho.
੧੦੮. ਇਦਾਨਿ ਪਟਿਗ੍ਗਹਣવਿਜਹਨਂ ਦਸ੍ਸੇਤਿ ‘‘ਸਿਕ੍ਖਾ’’ਤਿਆਦਿਨਾ। ਤਤ੍ਥ ਸਿਕ੍ਖਾਮਰਣਲਿਙ੍ਗੇਹੀਤਿ ਸਿਕ੍ਖਾਪਚ੍ਚਕ੍ਖਾਨੇਨ ਚ ਮਰਣੇਨ ਚ ਲਿਙ੍ਗਪਰਿવਤ੍ਤਨੇਨ ਚ। ਅਨਪੇਕ੍ਖવਿਸਗ੍ਗਤੋਤਿ ਨਤ੍ਥਿ ਅਪੇਕ੍ਖੋ ਏਤਸ੍ਸਾਤਿ ਅਨਪੇਕ੍ਖੋ, ਸੋવ વਿਸਗ੍ਗੋ, ਤਤੋ ਚ। ਅਚ੍ਛੇਦਾਤਿ ਚੋਰਾਦੀਹਿ ਅਚ੍ਛਿਨ੍ਦਿਤ੍વਾ ਗਹਣੇਨ। ਅਨੁਪਸਮ੍ਪਨ੍ਨਦਾਨਾਤਿ ਅਨੁਪਸਮ੍ਪਨ੍ਨਸ੍ਸ ਦਾਨੇਨ। ਚ-ਸਦ੍ਦੋ ਸਬ੍ਬਤ੍ਥ ਆਨੇਤਬ੍ਬੋ। ਗਾਹੋਤਿ ਪਟਿਗ੍ਗਹਣਂ। ਉਪਸਮ੍ਮਤੀਤਿ વਿਜਹਤਿ।
108. Idāni paṭiggahaṇavijahanaṃ dasseti ‘‘sikkhā’’tiādinā. Tattha sikkhāmaraṇaliṅgehīti sikkhāpaccakkhānena ca maraṇena ca liṅgaparivattanena ca. Anapekkhavisaggatoti natthi apekkho etassāti anapekkho, sova visaggo, tato ca. Acchedāti corādīhi acchinditvā gahaṇena. Anupasampannadānāti anupasampannassa dānena. Ca-saddo sabbattha ānetabbo. Gāhoti paṭiggahaṇaṃ. Upasammatīti vijahati.
੧੦੯-੧੦. ਇਦਾਨਿ ਅਪ੍ਪਟਿਗ੍ਗਹਿਤਂ ਪਰਿਭੋਗੇ ਦੋਸਂ ਦਸ੍ਸੇਤੁਂ ‘‘ਅਪ੍ਪਟਿਗ੍ਗਹਿਤ’’ਨ੍ਤਿਆਦਿਮਾਹ। ਤਤ੍ਥ ਸਬ੍ਬਨ੍ਤਿ ਚਤੁਕਾਲਿਕਪਰਿਯਾਪਨ੍ਨਂ ਸਕਲਮ੍ਪਿ। ਇਦਾਨਿ ਅਪ੍ਪਟਿਗ੍ਗਹੇਤ੍વਾ ਪਰਿਭੁਞ੍ਜਿਤਬ੍ਬਂ ਦਸ੍ਸੇਤੁਂ ‘‘ਸੁਦ੍ਧ’’ਨ੍ਤਿਆਦਿਮਾਹ। ਤਤ੍ਥ ਸੁਦ੍ਧਂ ਨਾਤਿਬਹਲਂ ਉਦਕਞ੍ਚ ਤਥਾ ਅਙ੍ਗਲਗ੍ਗਂ ਅવਿਚ੍ਛਿਨ੍ਨਂ ਦਨ੍ਤ…ਪੇ॰… ਗੂਥਕਞ੍ਚ ਲੋਣ…ਪੇ॰… ਕਰੀਸਕਞ੍ਚ ਕਪ੍ਪਤੇਤਿ ਸਮ੍ਬਨ੍ਧੋ। ਤਤ੍ਥ ਸੁਦ੍ਧਨ੍ਤਿ ਰਜਰੇਣੂਹਿ ਅਞ੍ਞਰਸੇਨ ਚ ਅਸਮ੍ਮਿਸ੍ਸਤਾਯ ਪਰਿਸੁਦ੍ਧਂ। ਨਾਤਿਬਹਲਨ੍ਤਿ ਯਂ ਕਸਿਤਟ੍ਠਾਨੇ ਬਹਲਮੁਦਕਂ વਿਯ ਮੁਖੇ વਾ ਹਤ੍ਥੇ વਾ ਨ ਲਗ੍ਗਂ, ਤਂ। ਅવਿਚ੍ਛਿਨ੍ਨਨ੍ਤਿ ਅਙ੍ਗਤੋ વਿਚ੍ਛਿਨ੍ਦਿਤ੍વਾ ਨ ਗਤਂ। ਦਨ੍ਤਾਨਿ ਚ ਅਕ੍ਖੀਨਿ ਚ ਕਣ੍ਣਞ੍ਚ ਦਨ੍ਤਕ੍ਖਿਕਣ੍ਣਂ ਪਾਣ੍ਯਙ੍ਗਤ੍ਤਾ, ਤਸ੍ਸ ਗੂਥਕਨ੍ਤਿ ਤਪ੍ਪੁਰਿਸੋ। ਲੋਣਂ ਸਰੀਰੁਟ੍ਠਿਤਂ। ਸਿਙ੍ਘਾਣੀਤਿ ਸਿਙ੍ਘਾਣਿਕਾ। વਿਚ੍ਛਿਨ੍ਨਂ ਨ ਪਟਿਗ੍ਗਹੇਤਬ੍ਬਂ।
109-10. Idāni appaṭiggahitaṃ paribhoge dosaṃ dassetuṃ ‘‘appaṭiggahita’’ntiādimāha. Tattha sabbanti catukālikapariyāpannaṃ sakalampi. Idāni appaṭiggahetvā paribhuñjitabbaṃ dassetuṃ ‘‘suddha’’ntiādimāha. Tattha suddhaṃ nātibahalaṃ udakañca tathā aṅgalaggaṃ avicchinnaṃ danta…pe… gūthakañca loṇa…pe… karīsakañca kappateti sambandho. Tattha suddhanti rajareṇūhi aññarasena ca asammissatāya parisuddhaṃ. Nātibahalanti yaṃ kasitaṭṭhāne bahalamudakaṃ viya mukhe vā hatthe vā na laggaṃ, taṃ. Avicchinnanti aṅgato vicchinditvā na gataṃ. Dantāni ca akkhīni ca kaṇṇañca dantakkhikaṇṇaṃ pāṇyaṅgattā, tassa gūthakanti tappuriso. Loṇaṃ sarīruṭṭhitaṃ. Siṅghāṇīti siṅghāṇikā. Vicchinnaṃ na paṭiggahetabbaṃ.
੧੧੧. ਇਦਾਨਿ ‘‘ਗੂਥਾ’’ਤਿਆਦਿਨਾ ਕਾਲੋਦਿਸ੍ਸਂ ਦਸ੍ਸੇਤਿ। ਤਥਾવਿਧੇਤਿ ਸਪ੍ਪਦਟ੍ਠਕ੍ਖਣਾਦਿਕੇ ਤਥਾવਿਧੇ ਕਾਲੇ। ਤਥਾ ਤਾਦਿਸੋ વਿਧੋ ਕਾਲੋ ਏਤਸ੍ਸਾਤਿ ਬਹੁਬ੍ਬੀਹਿ। ਸੇવੇਯ੍ਯਾਤਿ ਸੇવਨਂ ਕਰੇਯ੍ਯ, ਪਰਿਭੁਞ੍ਜੇਯ੍ਯਾਤਿ વੁਤ੍ਤਂ ਹੋਤਿ। ਅਸਨ੍ਤੇ ਕਪ੍ਪਕਾਰਕੇਤਿ ਏਤ੍ਥ ਦੁਬ੍ਬਚੋਪਿ ਅਸਮਤ੍ਥੋਪਿ ਕਪ੍ਪਿਯਕਾਰਕੋ ਅਸਨ੍ਤਪਕ੍ਖੇਯੇવ ਤਿਟ੍ਠਤੀਤਿ વੇਦਿਤਬ੍ਬੋ। ਕਾਲੋਦਿਸ੍ਸਤ੍ਤਾ ਪਨ ਛਾਰਿਕਾਯ ਅਸਤਿ ਅਲ੍ਲਦਾਰੁਂ ਰੁਕ੍ਖਤੋ ਛਿਨ੍ਦਿਤ੍વਾ ਕਾਤੁਂ, ਮਤ੍ਤਿਕਾਯ ਅਸਤਿ ਭੂਮਿਂ ਖਣਿਤ੍વਾਪਿ ਮਤ੍ਤਿਕਂ ਗਹੇਤੁਂ વਟ੍ਟਤਿ।
111. Idāni ‘‘gūthā’’tiādinā kālodissaṃ dasseti. Tathāvidheti sappadaṭṭhakkhaṇādike tathāvidhe kāle. Tathā tādiso vidho kālo etassāti bahubbīhi. Seveyyāti sevanaṃ kareyya, paribhuñjeyyāti vuttaṃ hoti. Asante kappakāraketi ettha dubbacopi asamatthopi kappiyakārako asantapakkheyeva tiṭṭhatīti veditabbo. Kālodissattā pana chārikāya asati alladāruṃ rukkhato chinditvā kātuṃ, mattikāya asati bhūmiṃ khaṇitvāpi mattikaṃ gahetuṃ vaṭṭati.
੧੧੨. ਦੁਰੂਪਚਿਣ੍ਣੇਤਿ ਦੁਟ੍ਠੁਂ ਉਪਚਿਣ੍ਣਂ ਆਮਟ੍ਠਂ ਦੁਰੂਪਚਿਣ੍ਣਂ। ਸਚੇ ਭਿਕ੍ਖੁ ਅਪ੍ਪਟਿਗ੍ਗਹਿਤਂ ਸਾਮਿਸਂ ਭਾਜਨਂ ਠਿਤਟ੍ਠਾਨਤੋ ਅਪਨੇਤ੍વਾ ਆਮਸਤਿ, ਪਿਧਾਨਂ ਆਮਸਤਿ, ਉਪਰਿ ਠਿਤਕਚવਰਾਦਿਂ ਛਡ੍ਡੇਤਿ, ਤਤ੍ਥਜਾਤਕਫਲਿਨਿਯਾ ਸਾਖਾਯ વਾ વਲ੍ਲਿਯਾ વਾ ਗਹੇਤ੍વਾ વਾ ਚਾਲੇਤਿ, ਦੁਰੂਪਚਿਣ੍ਣਂ ਨਾਮ ਹੋਤਿ। ਤਸ੍ਮਿਂ ਦੁਕ੍ਕਟਨ੍ਤਿ ਸਮ੍ਬਨ੍ਧੋ। ਫਲਰੁਕ੍ਖਂ ਪਨ ਅਪਸ੍ਸਯਿਤੁਂ વਾ ਤਤ੍ਥ ਕਣ੍ਟਕਂ વਾ ਬਨ੍ਧਿਤੁਂ વਟ੍ਟਤਿ। ਅਰਞ੍ਞੇ ਪਤਿਤਅਮ੍ਬਫਲਾਦਿਂ ‘‘ਸਾਮਣੇਰਸ੍ਸ ਦਸ੍ਸਾਮੀ’’ਤਿ ਆਹਰਿਤ੍વਾ ਦਾਤੁਂ વਟ੍ਟਤਿ। ਰਜੋਕਿਣ੍ਣੇਤਿ ਰਜਸਾ ਓਕਿਣ੍ਣੇ, ਤਸ੍ਮਿਂ ਪਤ੍ਤਾਦਿਕੇ ਯਂ ਕਿਞ੍ਚਿ ਪਟਿਗ੍ਗਣ੍ਹਤੋ વਿਨਯਦੁਕ੍ਕਟਂ ਹੋਤੀਤਿ ਅਤ੍ਥੋ। ਸਚੇ ਪਿਣ੍ਡਾਯ ਚਰਨ੍ਤਸ੍ਸ ਪਤ੍ਤੇ ਰਜਂ ਪਤਤਿ, ਪਟਿਗ੍ਗਹੇਤ੍વਾ ਭਿਕ੍ਖਾ ਗਣ੍ਹਿਤਬ੍ਬਾ । ‘‘ਪਟਿਗ੍ਗਹੇਤ੍વਾ ਦੇਥਾ’’ਤਿ વੁਤ੍ਤੇਪਿ ਆਕਿਰਨ੍ਤਿ, ਹਤ੍ਥਤੋ ਅਮੋਚੇਨ੍ਤੇਨੇવ ਪਟਿਗ੍ਗਾਹਾਪਕਸ੍ਸ ਸਨ੍ਤਿਕਂ ਨੇਤ੍વਾ ਪਟਿਗ੍ਗਹੇਤਬ੍ਬਂ। ਸਚੇ ਮਹਾવਾਤੋ ਤਤੋ ਤਤੋ ਰਜਂ ਪਾਤੇਤਿ, ਨ ਸਕ੍ਕਾ ਹੋਤਿ ਭਿਕ੍ਖਂ ਗਹੇਤੁਂ, ‘‘ਅਨੁਪਸਮ੍ਪਨ੍ਨਸ੍ਸ ਦਸ੍ਸਾਮੀ’’ਤਿ ਸੁਦ੍ਧਚਿਤ੍ਤੇਨ ਆਭੋਗਂ ਕਤ੍વਾ ਗਣ੍ਹਿਤੁਂ વਟ੍ਟਤਿ। ਤਂ ਪਨ ਤੇਨ ਦਿਨ੍ਨਂ વਾ વਿਸ੍ਸਾਸੇਨ વਾ ਪਟਿਗ੍ਗਹੇਤ੍વਾ ਪਰਿਭੁਞ੍ਜਿਤੁਂ વਟ੍ਟਤਿ।
112.Durūpaciṇṇeti duṭṭhuṃ upaciṇṇaṃ āmaṭṭhaṃ durūpaciṇṇaṃ. Sace bhikkhu appaṭiggahitaṃ sāmisaṃ bhājanaṃ ṭhitaṭṭhānato apanetvā āmasati, pidhānaṃ āmasati, upari ṭhitakacavarādiṃ chaḍḍeti, tatthajātakaphaliniyā sākhāya vā valliyā vā gahetvā vā cāleti, durūpaciṇṇaṃ nāma hoti. Tasmiṃ dukkaṭanti sambandho. Phalarukkhaṃ pana apassayituṃ vā tattha kaṇṭakaṃ vā bandhituṃ vaṭṭati. Araññe patitaambaphalādiṃ ‘‘sāmaṇerassa dassāmī’’ti āharitvā dātuṃ vaṭṭati. Rajokiṇṇeti rajasā okiṇṇe, tasmiṃ pattādike yaṃ kiñci paṭiggaṇhato vinayadukkaṭaṃ hotīti attho. Sace piṇḍāya carantassa patte rajaṃ patati, paṭiggahetvā bhikkhā gaṇhitabbā . ‘‘Paṭiggahetvā dethā’’ti vuttepi ākiranti, hatthato amocenteneva paṭiggāhāpakassa santikaṃ netvā paṭiggahetabbaṃ. Sace mahāvāto tato tato rajaṃ pāteti, na sakkā hoti bhikkhaṃ gahetuṃ, ‘‘anupasampannassa dassāmī’’ti suddhacittena ābhogaṃ katvā gaṇhituṃ vaṭṭati. Taṃ pana tena dinnaṃ vā vissāsena vā paṭiggahetvā paribhuñjituṃ vaṭṭati.
ਅਥਾਤਿ વਕ੍ਖਮਾਨਾਰਮ੍ਭੇ। ਉਗ੍ਗਹਪ੍ਪਟਿਗ੍ਗਹੇਤਿ ਉਗ੍ਗਹਿਤ੍ਥਾਤਿ ਉਗ੍ਗਹੋ, ਉਗ੍ਗਹਿਤਂ, ਤਸ੍ਸ ਪਟਿਗ੍ਗਹੋ, ਤਸ੍ਮਿਂ। ਅਪ੍ਪਟਿਗ੍ਗਹਿਤਭਾવਂ ਜਾਨਤੋ ਅਤ੍ਤਨਾ ਏવ ਉਗ੍ਗਹੇਤ੍વਾ ਗਹਣੇਤਿ ਅਧਿਪ੍ਪਾਯੋ। ਮਾਤਾਪਿਤੂਨਂ ਅਤ੍ਥਾਯ ਪਨ ਅਪ੍ਪਟਿਗ੍ਗਹੇਤ੍વਾ ਤੇਲਾਦੀਨਿ, ਛਾਯਤ੍ਥਾਯ ਸਾਖਾਦੀਨਿ વਾ ਗਹੇਤ੍વਾ ਪਚ੍ਛਤੋ ਭੁਞ੍ਜਿਤੁਕਾਮਤਾਯ ਪਟਿਗ੍ਗਹੇਤ੍વਾ ਪਰਿਭੁਞ੍ਜਿਤੁਂ વਟ੍ਟਤਿ। ਉਚ੍ਛੁਆਦੀਸੁ ਫਾਲਿਤੇਸੁ ਮਲਂ ਨ ਪਞ੍ਞਾਯਤਿ, ਮੂਲਭੇਸਜ੍ਜਾਦੀਨਿ ਪਿਸਨ੍ਤਾਨਂ વਾ ਕੋਟ੍ਟੇਨ੍ਤਾਨਂ વਾ ਨਿਸਦਨਿਸਦਪੋਤਕਉਦੁਕ੍ਖਲਮੁਸਲਾਨਿ ਖੀਯਨ੍ਤਿ, ਦਨ੍ਤਨ੍ਤਰੇ ਲਗ੍ਗਂ ਸੁਖੁਮਆਮਿਸਂ ਹੋਤਿ, ਰਸੋ ਨ ਪਞ੍ਞਾਯਤਿ, ਅਬ੍ਬੋਹਾਰਿਕਂ। ਅਨ੍ਤੋવੁਤ੍ਥੇਤਿ ਅਕਪ੍ਪਿਯਕੁਟਿਯਾ ਛਦਨਬ੍ਭਨ੍ਤਰੇ વੁਤ੍ਥੇਤਿ ਅਤ੍ਥੋ। ਸਯਂਪਕ੍ਕੇਤਿ ਅਤ੍ਤਨਾ ਯਤ੍ਥ ਕਤ੍ਥਚਿ ਪਕ੍ਕੇ। ਸਚੇ વਾਸਿਆਦਿਂ ਤਾਪੇਤ੍વਾ ਤਕ੍ਕਾਦੀਸੁ ਪਕ੍ਖਿਪਤਿ, ਏਤ੍ਤਾવਤਾਪਿ ਸਾਮਪਾਕਤੋ ਨ ਮੁਚ੍ਚਤਿ। ਪੁਰਿਮਕਾਲਿਕਦ੍વਯੇ ਪੁਨਪਾਕਞ੍ਹਿ ਠਪੇਤ੍વਾ ਯਂ ਕਿਞ੍ਚਿ ਆਮਿਸਂ ਭਿਕ੍ਖੁਨੋ ਪਚਿਤੁਂ ਨ વਟ੍ਟਤਿ। ਸਚੇਪਿਸ੍ਸ ਉਣ੍ਹਯਾਗੁਯਾ ਸੁਲਸਿਪਣ੍ਣਾਦੀਨਿ વਾ ਸਿਙ੍ਗਿવੇਰਂ વਾ ਪਕ੍ਖਿਪਨ੍ਤਿ, ਚਾਲੇਤੁਂ ਨ વਟ੍ਟਤਿ। ਉਤ੍ਤਣ੍ਡੁਲਂ ਭਤ੍ਤਂ ਲਭਿਤ੍વਾ ਪਿਦਹਿਤੁਂ ਨ વਟ੍ਟਤਿ। ਅਨ੍ਤੋਪਕ੍ਕੇਤਿ ਅਕਪ੍ਪਿਯਕੁਟਿਯਾ ਅਨ੍ਤੋ ਪਕ੍ਕੇ। ਸਬ੍ਬਤ੍ਥ ਦੁਕ੍ਕਟਨ੍ਤਿ ਸਮ੍ਬਨ੍ਧੋ।
Athāti vakkhamānārambhe. Uggahappaṭiggaheti uggahitthāti uggaho, uggahitaṃ, tassa paṭiggaho, tasmiṃ. Appaṭiggahitabhāvaṃ jānato attanā eva uggahetvā gahaṇeti adhippāyo. Mātāpitūnaṃ atthāya pana appaṭiggahetvā telādīni, chāyatthāya sākhādīni vā gahetvā pacchato bhuñjitukāmatāya paṭiggahetvā paribhuñjituṃ vaṭṭati. Ucchuādīsu phālitesu malaṃ na paññāyati, mūlabhesajjādīni pisantānaṃ vā koṭṭentānaṃ vā nisadanisadapotakaudukkhalamusalāni khīyanti, dantantare laggaṃ sukhumaāmisaṃ hoti, raso na paññāyati, abbohārikaṃ. Antovuttheti akappiyakuṭiyā chadanabbhantare vuttheti attho. Sayaṃpakketi attanā yattha katthaci pakke. Sace vāsiādiṃ tāpetvā takkādīsu pakkhipati, ettāvatāpi sāmapākato na muccati. Purimakālikadvaye punapākañhi ṭhapetvā yaṃ kiñci āmisaṃ bhikkhuno pacituṃ na vaṭṭati. Sacepissa uṇhayāguyā sulasipaṇṇādīni vā siṅgiveraṃ vā pakkhipanti, cāletuṃ na vaṭṭati. Uttaṇḍulaṃ bhattaṃ labhitvā pidahituṃ na vaṭṭati. Antopakketi akappiyakuṭiyā anto pakke. Sabbattha dukkaṭanti sambandho.
ਪਟਿਗ੍ਗਾਹਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Paṭiggāhaniddesavaṇṇanā niṭṭhitā.
