| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৬. পাটিহারিযকথা
6. Pāṭihāriyakathā
৩০. ‘‘তীণিমানি , ভিক্খৰে 1, পাটিহারিযানি। কতমানি তীণি? ইদ্ধিপাটিহারিযং, আদেসনাপাটিহারিযং, অনুসাসনীপাটিহারিযং।
30. ‘‘Tīṇimāni , bhikkhave 2, pāṭihāriyāni. Katamāni tīṇi? Iddhipāṭihāriyaṃ, ādesanāpāṭihāriyaṃ, anusāsanīpāṭihāriyaṃ.
‘‘কতমঞ্চ, ভিক্খৰে, ইদ্ধিপাটিহারিযং? ইধ, ভিক্খৰে, একচ্চো অনেকৰিহিতং ইদ্ধিৰিধং পচ্চনুভোতি – একোপি হুত্ৰা বহুধা হোতি , বহুধাপি হুত্ৰা একো হোতি; আৰিভাৰং তিরোভাৰং…পে॰… যাৰ ব্রহ্মলোকাপি কাযেন ৰসং ৰত্তেতি। ইদং ৰুচ্চতি, ভিক্খৰে, ইদ্ধিপাটিহারিযং।
‘‘Katamañca, bhikkhave, iddhipāṭihāriyaṃ? Idha, bhikkhave, ekacco anekavihitaṃ iddhividhaṃ paccanubhoti – ekopi hutvā bahudhā hoti , bahudhāpi hutvā eko hoti; āvibhāvaṃ tirobhāvaṃ…pe… yāva brahmalokāpi kāyena vasaṃ vatteti. Idaṃ vuccati, bhikkhave, iddhipāṭihāriyaṃ.
‘‘কতমঞ্চ , ভিক্খৰে, আদেসনাপাটিহারিযং? ইধ, ভিক্খৰে, একচ্চো নিমিত্তেন আদিসতি – ‘এৰম্পি তে মনো, ইত্থম্পি তে মনো, ইতিপি তে চিত্ত’ন্তি। সো বহুং চেপি আদিসতি, তথেৰ তং হোতি, নো অঞ্ঞথা। ইধ পন, ভিক্খৰে, একচ্চো ন হেৰ খো নিমিত্তেন আদিসতি, অপি চ খো মনুস্সানং ৰা অমনুস্সানং ৰা দেৰতানং ৰা সদ্দং সুত্ৰা আদিসতি – ‘এৰম্পি তে মনো, ইত্থম্পি তে মনো, ইতিপি তে চিত্ত’ন্তি। সো বহুং চেপি আদিসতি, তথেৰ তং হোতি, নো অঞ্ঞথা। ইধ পন, ভিক্খৰে, একচ্চো ন হেৰ খো নিমিত্তেন আদিসতি, নপি মনুস্সানং ৰা অমনুস্সানং ৰা দেৰতানং ৰা সদ্দং সুত্ৰা আদিসতি, অপি চ খো ৰিতক্কযতো ৰিচারযতো ৰিতক্কৰিপ্ফারসদ্দং সুত্ৰা আদিসতি – ‘এৰম্পি তে মনো, ইত্থম্পি তে মনো, ইতিপি তে চিত্ত’ন্তি। সো বহুং চেপি আদিসতি, তথেৰ তং হোতি, নো অঞ্ঞথা। ইধ পন, ভিক্খৰে, একচ্চো ন হেৰ খো নিমিত্তেন আদিসতি, নপি মনুস্সানং ৰা অমনুস্সানং ৰা দেৰতানং ৰা সদ্দং সুত্ৰা আদিসতি, নপি ৰিতক্কযতো ৰিচারযতো ৰিতক্কৰিপ্ফারসদ্দং সুত্ৰা আদিসতি, অপি চ খো অৰিতক্কং অৰিচারং সমাধিং সমাপন্নস্স চেতসা চেতো পরিচ্চ পজানাতি – ‘যথা ইমস্স ভোতো মনোসঙ্খারা পণিহিতা ইমস্স 3 চিত্তস্স অনন্তরা অমুকং নাম ৰিতক্কং ৰিতক্কযিস্সতী’তি 4। সো বহুং চেপি আদিসতি, তথেৰ তং হোতি, নো অঞ্ঞথা। ইদং ৰুচ্চতি, ভিক্খৰে, আদেসনাপাটিহারিযং।
‘‘Katamañca, bhikkhave, ādesanāpāṭihāriyaṃ? Idha, bhikkhave, ekacco nimittena ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, api ca kho manussānaṃ vā amanussānaṃ vā devatānaṃ vā saddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, api ca kho vitakkayato vicārayato vitakkavipphārasaddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, napi vitakkayato vicārayato vitakkavipphārasaddaṃ sutvā ādisati, api ca kho avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa 5 cittassa anantarā amukaṃ nāma vitakkaṃ vitakkayissatī’ti 6. So bahuṃ cepi ādisati, tatheva taṃ hoti, no aññathā. Idaṃ vuccati, bhikkhave, ādesanāpāṭihāriyaṃ.
‘‘কতমঞ্চ, ভিক্খৰে, অনুসাসনীপাটিহারিযং? ইধ, ভিক্খৰে, একচ্চো এৰমনুসাসতি – ‘এৰং ৰিতক্কেথ, মা এৰং ৰিতক্কযিত্থ। এৰং মনসি করোথ, মা এৰং মনসি করিত্থ। ইদং পজহথ, ইদং উপসম্পজ্জ ৰিহরথা’তি। ইদং ৰুচ্চতি, ভিক্খৰে, অনুসাসনীপাটিহারিযং। ইমানি খো, ভিক্খৰে, তীণি পাটিহারিযানি’’।
‘‘Katamañca, bhikkhave, anusāsanīpāṭihāriyaṃ? Idha, bhikkhave, ekacco evamanusāsati – ‘evaṃ vitakketha, mā evaṃ vitakkayittha. Evaṃ manasi karotha, mā evaṃ manasi karittha. Idaṃ pajahatha, idaṃ upasampajja viharathā’ti. Idaṃ vuccati, bhikkhave, anusāsanīpāṭihāriyaṃ. Imāni kho, bhikkhave, tīṇi pāṭihāriyāni’’.
৩১. নেক্খম্মং ইজ্ঝতীতি – ইদ্ধি। কামচ্ছন্দং পটিহরতীতি – পাটিহারিযং। যে তেন নেক্খম্মেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘তং খো পন নেক্খম্মং এৰং আসেৰিতব্বং, এৰং ভাৰেতব্বং , এৰং বহুলীকাতব্বং, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং।
31. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Ye tena nekkhammena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana nekkhammaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
অব্যাপাদো ইজ্ঝতীতি – ইদ্ধি। ব্যাপাদং পটিহরতীতি – পাটিহারিযং। যে তেন অব্যাপাদেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘সো খো পন অব্যাপাদো এৰং আসেৰিতব্বো, এৰং ভাৰেতব্বো, এৰং বহুলীকাতব্বো, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং।
Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Ye tena abyāpādena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana abyāpādo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
আলোকসঞ্ঞা ইজ্ঝতীতি – ইদ্ধি। থিনমিদ্ধং পটিহরতীতি – পাটিহারিযং। যে তায আলোকসঞ্ঞায সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘সা খো পন আলোকসঞ্ঞা এৰং আসেৰিতব্বা, এৰং ভাৰেতব্বা, এৰং বহুলীকাতব্বা, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং।
Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ. Ye tāya ālokasaññāya samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Sā kho pana ālokasaññā evaṃ āsevitabbā, evaṃ bhāvetabbā, evaṃ bahulīkātabbā, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
অৰিক্খেপো ইজ্ঝতীতি – ইদ্ধি। উদ্ধচ্চং পটিহরতীতি – পাটিহারিযং। যে তেন অৰিক্খেপেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘সো খো পন অৰিক্খেপো এৰং আসেৰিতব্বো, এৰং ভাৰেতব্বো, এৰং বহুলীকাতব্বো, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং।
Avikkhepo ijjhatīti – iddhi. Uddhaccaṃ paṭiharatīti – pāṭihāriyaṃ. Ye tena avikkhepena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana avikkhepo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ধম্মৰৰত্থানং ইজ্ঝতীতি – ইদ্ধি। ৰিচিকিচ্ছং পটিহরতীতি – পাটিহারিযং। যে তেন ধম্মৰৰত্থানেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘তং খো পন ধম্মৰৰত্থানং এৰং আসেৰিতব্বং, এৰং ভাৰেতব্বং, এৰং বহুলীকাতব্বং, এৰং তদনুধম্মতা, সতি উপট্ঠাপেতব্বা’’তি – অনুসাসনীপাটিহারিযং।
Dhammavavatthānaṃ ijjhatīti – iddhi. Vicikicchaṃ paṭiharatīti – pāṭihāriyaṃ. Ye tena dhammavavatthānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana dhammavavatthānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā, sati upaṭṭhāpetabbā’’ti – anusāsanīpāṭihāriyaṃ.
ঞাণং ইজ্ঝতীতি – ইদ্ধি। অৰিজ্জং পটিহরতীতি – পাটিহারিযং। যে তেন ঞাণেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘তং খো পন ঞাণং এৰং আসেৰিতব্বং, এৰং ভাৰেতব্বং, এৰং বহুলীকাতব্বং, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং।
Ñāṇaṃ ijjhatīti – iddhi. Avijjaṃ paṭiharatīti – pāṭihāriyaṃ. Ye tena ñāṇena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana ñāṇaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
পামোজ্জং ইজ্ঝতীতি – ইদ্ধি। অরতিং পটিহরতীতি – পাটিহারিযং। যে তেন পামোজ্জেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘তং খো পন পামোজ্জং এৰং আসেৰিতব্বং, এৰং ভাৰেতব্বং , এৰং বহুলীকাতব্বং, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং…পে॰…।
Pāmojjaṃ ijjhatīti – iddhi. Aratiṃ paṭiharatīti – pāṭihāriyaṃ. Ye tena pāmojjena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana pāmojjaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
পঠমং ঝানং ইজ্ঝতীতি – ইদ্ধি। নীৰরণে পটিহরতীতি – পাটিহারিযং। যে তেন পঠমেন ঝানেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘তং খো পন পঠমং ঝানং এৰং আসেৰিতব্বং, এৰং ভাৰেতব্বং, এৰং বহুলীকাতব্বং, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং…পে॰…।
Paṭhamaṃ jhānaṃ ijjhatīti – iddhi. Nīvaraṇe paṭiharatīti – pāṭihāriyaṃ. Ye tena paṭhamena jhānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana paṭhamaṃ jhānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
অরহত্তমগ্গো ইজ্ঝতীতি – ইদ্ধি। সব্বকিলেসে পটিহরতীতি – পাটিহারিযং। যে তেন অরহত্তমগ্গেন সমন্নাগতা, সব্বে তে ৰিসুদ্ধচিত্তা অনাৰিলসঙ্কপ্পাতি – আদেসনাপাটিহারিযং। ‘‘সো খো পন অরহত্তমগ্গো এৰং আসেৰিতব্বো, এৰং ভাৰেতব্বো, এৰং বহুলীকাতব্বো, এৰং তদনুধম্মতা সতি উপট্ঠাপেতব্বা’’তি – অনুসাসনীপাটিহারিযং।
Arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Ye tena arahattamaggena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana arahattamaggo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
৩২. নেক্খম্মং ইজ্ঝতীতি – ইদ্ধি। কামচ্ছন্দং পটিহরতীতি – পাটিহারিযং। যা চ ইদ্ধি যঞ্চ পাটিহারিযং, ইদং ৰুচ্চতি ইদ্ধিপাটিহারিযং। অব্যাপাদো ইজ্ঝতীতি – ইদ্ধি। ব্যাপাদং পটিহরতীতি – পাটিহারিযং। যা চ ইদ্ধি যঞ্চ পাটিহারিযং, ইদং ৰুচ্চতি ইদ্ধিপাটিহারিযং। আলোকসঞ্ঞা ইজ্ঝতীতি – ইদ্ধি। থিনমিদ্ধং পটিহরতীতি – পাটিহারিযং…পে॰… অরহত্তমগ্গো ইজ্ঝতীতি – ইদ্ধি। সব্বকিলেসে পটিহরতীতি – পাটিহারিযং। যা চ ইদ্ধি যঞ্চ পাটিহারিযং, ইদং ৰুচ্চতি ইদ্ধিপাটিহারিযন্তি ।
32. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ…pe… arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyanti .
পাটিহারিযকথা নিট্ঠিতা।
Pāṭihāriyakathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / পাটিহারিযকথাৰণ্ণনা • Pāṭihāriyakathāvaṇṇanā
