| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၆. ပာဋိဟာရိယကထာ
6. Pāṭihāriyakathā
၃၀. ‘‘တီဏိမာနိ , ဘိက္ခဝေ 1, ပာဋိဟာရိယာနိ။ ကတမာနိ တီဏိ? ဣဒ္ဓိပာဋိဟာရိယံ, အာဒေသနာပာဋိဟာရိယံ, အနုသာသနီပာဋိဟာရိယံ။
30. ‘‘Tīṇimāni , bhikkhave 2, pāṭihāriyāni. Katamāni tīṇi? Iddhipāṭihāriyaṃ, ādesanāpāṭihāriyaṃ, anusāsanīpāṭihāriyaṃ.
‘‘ကတမဉ္စ, ဘိက္ခဝေ, ဣဒ္ဓိပာဋိဟာရိယံ? ဣဓ, ဘိက္ခဝေ, ဧကစ္စော အနေကဝိဟိတံ ဣဒ္ဓိဝိဓံ ပစ္စနုဘောတိ – ဧကောပိ ဟုတ္ဝာ ဗဟုဓာ ဟောတိ , ဗဟုဓာပိ ဟုတ္ဝာ ဧကော ဟောတိ; အာဝိဘာဝံ တိရောဘာဝံ။ပေ.။ ယာဝ ဗ္ရဟ္မလောကာပိ ကာယေန ဝသံ ဝတ္တေတိ။ ဣဒံ ဝုစ္စတိ, ဘိက္ခဝေ, ဣဒ္ဓိပာဋိဟာရိယံ။
‘‘Katamañca, bhikkhave, iddhipāṭihāriyaṃ? Idha, bhikkhave, ekacco anekavihitaṃ iddhividhaṃ paccanubhoti – ekopi hutvā bahudhā hoti , bahudhāpi hutvā eko hoti; āvibhāvaṃ tirobhāvaṃ…pe… yāva brahmalokāpi kāyena vasaṃ vatteti. Idaṃ vuccati, bhikkhave, iddhipāṭihāriyaṃ.
‘‘ကတမဉ္စ , ဘိက္ခဝေ, အာဒေသနာပာဋိဟာရိယံ? ဣဓ, ဘိက္ခဝေ, ဧကစ္စော နိမိတ္တေန အာဒိသတိ – ‘ဧဝမ္ပိ တေ မနော, ဣတ္ထမ္ပိ တေ မနော, ဣတိပိ တေ စိတ္တ’န္တိ။ သော ဗဟုံ စေပိ အာဒိသတိ, တထေဝ တံ ဟောတိ, နော အညထာ။ ဣဓ ပန, ဘိက္ခဝေ, ဧကစ္စော န ဟေဝ ခော နိမိတ္တေန အာဒိသတိ, အပိ စ ခော မနုသ္သာနံ ဝာ အမနုသ္သာနံ ဝာ ဒေဝတာနံ ဝာ သဒ္ဒံ သုတ္ဝာ အာဒိသတိ – ‘ဧဝမ္ပိ တေ မနော, ဣတ္ထမ္ပိ တေ မနော, ဣတိပိ တေ စိတ္တ’န္တိ။ သော ဗဟုံ စေပိ အာဒိသတိ, တထေဝ တံ ဟောတိ, နော အညထာ။ ဣဓ ပန, ဘိက္ခဝေ, ဧကစ္စော န ဟေဝ ခော နိမိတ္တေန အာဒိသတိ, နပိ မနုသ္သာနံ ဝာ အမနုသ္သာနံ ဝာ ဒေဝတာနံ ဝာ သဒ္ဒံ သုတ္ဝာ အာဒိသတိ, အပိ စ ခော ဝိတက္ကယတော ဝိစာရယတော ဝိတက္ကဝိပ္ဖာရသဒ္ဒံ သုတ္ဝာ အာဒိသတိ – ‘ဧဝမ္ပိ တေ မနော, ဣတ္ထမ္ပိ တေ မနော, ဣတိပိ တေ စိတ္တ’န္တိ။ သော ဗဟုံ စေပိ အာဒိသတိ, တထေဝ တံ ဟောတိ, နော အညထာ။ ဣဓ ပန, ဘိက္ခဝေ, ဧကစ္စော န ဟေဝ ခော နိမိတ္တေန အာဒိသတိ, နပိ မနုသ္သာနံ ဝာ အမနုသ္သာနံ ဝာ ဒေဝတာနံ ဝာ သဒ္ဒံ သုတ္ဝာ အာဒိသတိ, နပိ ဝိတက္ကယတော ဝိစာရယတော ဝိတက္ကဝိပ္ဖာရသဒ္ဒံ သုတ္ဝာ အာဒိသတိ, အပိ စ ခော အဝိတက္ကံ အဝိစာရံ သမာဓိံ သမာပန္နသ္သ စေတသာ စေတော ပရိစ္စ ပဇာနာတိ – ‘ယထာ ဣမသ္သ ဘောတော မနောသင္ခာရာ ပဏိဟိတာ ဣမသ္သ 3 စိတ္တသ္သ အနန္တရာ အမုကံ နာမ ဝိတက္ကံ ဝိတက္ကယိသ္သတီ’တိ 4။ သော ဗဟုံ စေပိ အာဒိသတိ, တထေဝ တံ ဟောတိ, နော အညထာ။ ဣဒံ ဝုစ္စတိ, ဘိက္ခဝေ, အာဒေသနာပာဋိဟာရိယံ။
‘‘Katamañca, bhikkhave, ādesanāpāṭihāriyaṃ? Idha, bhikkhave, ekacco nimittena ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, api ca kho manussānaṃ vā amanussānaṃ vā devatānaṃ vā saddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, api ca kho vitakkayato vicārayato vitakkavipphārasaddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, napi vitakkayato vicārayato vitakkavipphārasaddaṃ sutvā ādisati, api ca kho avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa 5 cittassa anantarā amukaṃ nāma vitakkaṃ vitakkayissatī’ti 6. So bahuṃ cepi ādisati, tatheva taṃ hoti, no aññathā. Idaṃ vuccati, bhikkhave, ādesanāpāṭihāriyaṃ.
‘‘ကတမဉ္စ, ဘိက္ခဝေ, အနုသာသနီပာဋိဟာရိယံ? ဣဓ, ဘိက္ခဝေ, ဧကစ္စော ဧဝမနုသာသတိ – ‘ဧဝံ ဝိတက္ကေထ, မာ ဧဝံ ဝိတက္ကယိတ္ထ။ ဧဝံ မနသိ ကရောထ, မာ ဧဝံ မနသိ ကရိတ္ထ။ ဣဒံ ပဇဟထ, ဣဒံ ဥပသမ္ပဇ္ဇ ဝိဟရထာ’တိ။ ဣဒံ ဝုစ္စတိ, ဘိက္ခဝေ, အနုသာသနီပာဋိဟာရိယံ။ ဣမာနိ ခော, ဘိက္ခဝေ, တီဏိ ပာဋိဟာရိယာနိ’’။
‘‘Katamañca, bhikkhave, anusāsanīpāṭihāriyaṃ? Idha, bhikkhave, ekacco evamanusāsati – ‘evaṃ vitakketha, mā evaṃ vitakkayittha. Evaṃ manasi karotha, mā evaṃ manasi karittha. Idaṃ pajahatha, idaṃ upasampajja viharathā’ti. Idaṃ vuccati, bhikkhave, anusāsanīpāṭihāriyaṃ. Imāni kho, bhikkhave, tīṇi pāṭihāriyāni’’.
၃၁. နေက္ခမ္မံ ဣဇ္ဈတီတိ – ဣဒ္ဓိ။ ကာမစ္ဆန္ဒံ ပဋိဟရတီတိ – ပာဋိဟာရိယံ။ ယေ တေန နေက္ခမ္မေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘တံ ခော ပန နေက္ခမ္မံ ဧဝံ အာသေဝိတဗ္ဗံ, ဧဝံ ဘာဝေတဗ္ဗံ , ဧဝံ ဗဟုလီကာတဗ္ဗံ, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။
31. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Ye tena nekkhammena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana nekkhammaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
အဗ္ယာပာဒော ဣဇ္ဈတီတိ – ဣဒ္ဓိ။ ဗ္ယာပာဒံ ပဋိဟရတီတိ – ပာဋိဟာရိယံ။ ယေ တေန အဗ္ယာပာဒေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘သော ခော ပန အဗ္ယာပာဒော ဧဝံ အာသေဝိတဗ္ဗော, ဧဝံ ဘာဝေတဗ္ဗော, ဧဝံ ဗဟုလီကာတဗ္ဗော, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။
Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Ye tena abyāpādena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana abyāpādo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
အာလောကသညာ ဣဇ္ဈတီတိ – ဣဒ္ဓိ။ ထိနမိဒ္ဓံ ပဋိဟရတီတိ – ပာဋိဟာရိယံ။ ယေ တာယ အာလောကသညာယ သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘သာ ခော ပန အာလောကသညာ ဧဝံ အာသေဝိတဗ္ဗာ, ဧဝံ ဘာဝေတဗ္ဗာ, ဧဝံ ဗဟုလီကာတဗ္ဗာ, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။
Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ. Ye tāya ālokasaññāya samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Sā kho pana ālokasaññā evaṃ āsevitabbā, evaṃ bhāvetabbā, evaṃ bahulīkātabbā, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
အဝိက္ခေပော ဣဇ္ဈတီတိ – ဣဒ္ဓိ။ ဥဒ္ဓစ္စံ ပဋိဟရတီတိ – ပာဋိဟာရိယံ။ ယေ တေန အဝိက္ခေပေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘သော ခော ပန အဝိက္ခေပော ဧဝံ အာသေဝိတဗ္ဗော, ဧဝံ ဘာဝေတဗ္ဗော, ဧဝံ ဗဟုလီကာတဗ္ဗော, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။
Avikkhepo ijjhatīti – iddhi. Uddhaccaṃ paṭiharatīti – pāṭihāriyaṃ. Ye tena avikkhepena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana avikkhepo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ဓမ္မဝဝတ္ထာနံ ဣဇ္ဈတီတိ – ဣဒ္ဓိ။ ဝိစိကိစ္ဆံ ပဋိဟရတီတိ – ပာဋိဟာရိယံ။ ယေ တေန ဓမ္မဝဝတ္ထာနေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘တံ ခော ပန ဓမ္မဝဝတ္ထာနံ ဧဝံ အာသေဝိတဗ္ဗံ, ဧဝံ ဘာဝေတဗ္ဗံ, ဧဝံ ဗဟုလီကာတဗ္ဗံ, ဧဝံ တဒနုဓမ္မတာ, သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။
Dhammavavatthānaṃ ijjhatīti – iddhi. Vicikicchaṃ paṭiharatīti – pāṭihāriyaṃ. Ye tena dhammavavatthānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana dhammavavatthānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā, sati upaṭṭhāpetabbā’’ti – anusāsanīpāṭihāriyaṃ.
ဉာဏံ ဣဇ္ဈတီတိ – ဣဒ္ဓိ။ အဝိဇ္ဇံ ပဋိဟရတီတိ – ပာဋိဟာရိယံ။ ယေ တေန ဉာဏေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘တံ ခော ပန ဉာဏံ ဧဝံ အာသေဝိတဗ္ဗံ, ဧဝံ ဘာဝေတဗ္ဗံ, ဧဝံ ဗဟုလီကာတဗ္ဗံ, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။
Ñāṇaṃ ijjhatīti – iddhi. Avijjaṃ paṭiharatīti – pāṭihāriyaṃ. Ye tena ñāṇena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana ñāṇaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ပာမောဇ္ဇံ ဣဇ္ဈတီတိ – ဣဒ္ဓိ။ အရတိံ ပဋိဟရတီတိ – ပာဋိဟာရိယံ။ ယေ တေန ပာမောဇ္ဇေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘တံ ခော ပန ပာမောဇ္ဇံ ဧဝံ အာသေဝိတဗ္ဗံ, ဧဝံ ဘာဝေတဗ္ဗံ , ဧဝံ ဗဟုလီကာတဗ္ဗံ, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။ပေ.။။
Pāmojjaṃ ijjhatīti – iddhi. Aratiṃ paṭiharatīti – pāṭihāriyaṃ. Ye tena pāmojjena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana pāmojjaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
ပဌမံ ဈာနံ ဣဇ္ဈတီတိ – ဣဒ္ဓိ။ နီဝရဏေ ပဋိဟရတီတိ – ပာဋိဟာရိယံ။ ယေ တေန ပဌမေန ဈာနေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘တံ ခော ပန ပဌမံ ဈာနံ ဧဝံ အာသေဝိတဗ္ဗံ, ဧဝံ ဘာဝေတဗ္ဗံ, ဧဝံ ဗဟုလီကာတဗ္ဗံ, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။ပေ.။။
Paṭhamaṃ jhānaṃ ijjhatīti – iddhi. Nīvaraṇe paṭiharatīti – pāṭihāriyaṃ. Ye tena paṭhamena jhānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana paṭhamaṃ jhānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
အရဟတ္တမဂ္ဂော ဣဇ္ဈတီတိ – ဣဒ္ဓိ။ သဗ္ဗကိလေသေ ပဋိဟရတီတိ – ပာဋိဟာရိယံ။ ယေ တေန အရဟတ္တမဂ္ဂေန သမန္နာဂတာ, သဗ္ဗေ တေ ဝိသုဒ္ဓစိတ္တာ အနာဝိလသင္ကပ္ပာတိ – အာဒေသနာပာဋိဟာရိယံ။ ‘‘သော ခော ပန အရဟတ္တမဂ္ဂော ဧဝံ အာသေဝိတဗ္ဗော, ဧဝံ ဘာဝေတဗ္ဗော, ဧဝံ ဗဟုလီကာတဗ္ဗော, ဧဝံ တဒနုဓမ္မတာ သတိ ဥပဋ္ဌာပေတဗ္ဗာ’’တိ – အနုသာသနီပာဋိဟာရိယံ။
Arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Ye tena arahattamaggena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana arahattamaggo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
၃၂. နေက္ခမ္မံ ဣဇ္ဈတီတိ – ဣဒ္ဓိ။ ကာမစ္ဆန္ဒံ ပဋိဟရတီတိ – ပာဋိဟာရိယံ။ ယာ စ ဣဒ္ဓိ ယဉ္စ ပာဋိဟာရိယံ, ဣဒံ ဝုစ္စတိ ဣဒ္ဓိပာဋိဟာရိယံ။ အဗ္ယာပာဒော ဣဇ္ဈတီတိ – ဣဒ္ဓိ။ ဗ္ယာပာဒံ ပဋိဟရတီတိ – ပာဋိဟာရိယံ။ ယာ စ ဣဒ္ဓိ ယဉ္စ ပာဋိဟာရိယံ, ဣဒံ ဝုစ္စတိ ဣဒ္ဓိပာဋိဟာရိယံ။ အာလောကသညာ ဣဇ္ဈတီတိ – ဣဒ္ဓိ။ ထိနမိဒ္ဓံ ပဋိဟရတီတိ – ပာဋိဟာရိယံ။ပေ.။ အရဟတ္တမဂ္ဂော ဣဇ္ဈတီတိ – ဣဒ္ဓိ။ သဗ္ဗကိလေသေ ပဋိဟရတီတိ – ပာဋိဟာရိယံ။ ယာ စ ဣဒ္ဓိ ယဉ္စ ပာဋိဟာရိယံ, ဣဒံ ဝုစ္စတိ ဣဒ္ဓိပာဋိဟာရိယန္တိ ။
32. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ…pe… arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyanti .
ပာဋိဟာရိယကထာ နိဋ္ဌိတာ။
Pāṭihāriyakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ပာဋိဟာရိယကထာဝဏ္ဏနာ • Pāṭihāriyakathāvaṇṇanā
