| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༦. པཱཊིཧཱརིཡཀཐཱ
6. Pāṭihāriyakathā
༣༠. ‘‘ཏཱིཎིམཱནི , བྷིཀྑཝེ 1, པཱཊིཧཱརིཡཱནི། ཀཏམཱནི ཏཱིཎི? ཨིདྡྷིཔཱཊིཧཱརིཡཾ, ཨཱདེསནཱཔཱཊིཧཱརིཡཾ, ཨནུསཱསནཱིཔཱཊིཧཱརིཡཾ།
30. ‘‘Tīṇimāni , bhikkhave 2, pāṭihāriyāni. Katamāni tīṇi? Iddhipāṭihāriyaṃ, ādesanāpāṭihāriyaṃ, anusāsanīpāṭihāriyaṃ.
‘‘ཀཏམཉྩ, བྷིཀྑཝེ, ཨིདྡྷིཔཱཊིཧཱརིཡཾ? ཨིདྷ, བྷིཀྑཝེ, ཨེཀཙྩོ ཨནེཀཝིཧིཏཾ ཨིདྡྷིཝིདྷཾ པཙྩནུབྷོཏི – ཨེཀོཔི ཧུཏྭཱ བཧུདྷཱ ཧོཏི , བཧུདྷཱཔི ཧུཏྭཱ ཨེཀོ ཧོཏི; ཨཱཝིབྷཱཝཾ ཏིརོབྷཱཝཾ…པེ॰… ཡཱཝ བྲཧྨལོཀཱཔི ཀཱཡེན ཝསཾ ཝཏྟེཏི། ཨིདཾ ཝུཙྩཏི, བྷིཀྑཝེ, ཨིདྡྷིཔཱཊིཧཱརིཡཾ།
‘‘Katamañca, bhikkhave, iddhipāṭihāriyaṃ? Idha, bhikkhave, ekacco anekavihitaṃ iddhividhaṃ paccanubhoti – ekopi hutvā bahudhā hoti , bahudhāpi hutvā eko hoti; āvibhāvaṃ tirobhāvaṃ…pe… yāva brahmalokāpi kāyena vasaṃ vatteti. Idaṃ vuccati, bhikkhave, iddhipāṭihāriyaṃ.
‘‘ཀཏམཉྩ , བྷིཀྑཝེ, ཨཱདེསནཱཔཱཊིཧཱརིཡཾ? ཨིདྷ, བྷིཀྑཝེ, ཨེཀཙྩོ ནིམིཏྟེན ཨཱདིསཏི – ‘ཨེཝམྤི ཏེ མནོ, ཨིཏྠམྤི ཏེ མནོ, ཨིཏིཔི ཏེ ཙིཏྟ’ནྟི། སོ བཧུཾ ཙེཔི ཨཱདིསཏི, ཏཐེཝ ཏཾ ཧོཏི, ནོ ཨཉྙཐཱ། ཨིདྷ པན, བྷིཀྑཝེ, ཨེཀཙྩོ ན ཧེཝ ཁོ ནིམིཏྟེན ཨཱདིསཏི, ཨཔི ཙ ཁོ མནུསྶཱནཾ ཝཱ ཨམནུསྶཱནཾ ཝཱ དེཝཏཱནཾ ཝཱ སདྡཾ སུཏྭཱ ཨཱདིསཏི – ‘ཨེཝམྤི ཏེ མནོ, ཨིཏྠམྤི ཏེ མནོ, ཨིཏིཔི ཏེ ཙིཏྟ’ནྟི། སོ བཧུཾ ཙེཔི ཨཱདིསཏི, ཏཐེཝ ཏཾ ཧོཏི, ནོ ཨཉྙཐཱ། ཨིདྷ པན, བྷིཀྑཝེ, ཨེཀཙྩོ ན ཧེཝ ཁོ ནིམིཏྟེན ཨཱདིསཏི, ནཔི མནུསྶཱནཾ ཝཱ ཨམནུསྶཱནཾ ཝཱ དེཝཏཱནཾ ཝཱ སདྡཾ སུཏྭཱ ཨཱདིསཏི, ཨཔི ཙ ཁོ ཝིཏཀྐཡཏོ ཝིཙཱརཡཏོ ཝིཏཀྐཝིཔྥཱརསདྡཾ སུཏྭཱ ཨཱདིསཏི – ‘ཨེཝམྤི ཏེ མནོ, ཨིཏྠམྤི ཏེ མནོ, ཨིཏིཔི ཏེ ཙིཏྟ’ནྟི། སོ བཧུཾ ཙེཔི ཨཱདིསཏི, ཏཐེཝ ཏཾ ཧོཏི, ནོ ཨཉྙཐཱ། ཨིདྷ པན, བྷིཀྑཝེ, ཨེཀཙྩོ ན ཧེཝ ཁོ ནིམིཏྟེན ཨཱདིསཏི, ནཔི མནུསྶཱནཾ ཝཱ ཨམནུསྶཱནཾ ཝཱ དེཝཏཱནཾ ཝཱ སདྡཾ སུཏྭཱ ཨཱདིསཏི, ནཔི ཝིཏཀྐཡཏོ ཝིཙཱརཡཏོ ཝིཏཀྐཝིཔྥཱརསདྡཾ སུཏྭཱ ཨཱདིསཏི, ཨཔི ཙ ཁོ ཨཝིཏཀྐཾ ཨཝིཙཱརཾ སམཱདྷིཾ སམཱཔནྣསྶ ཙེཏསཱ ཙེཏོ པརིཙྩ པཛཱནཱཏི – ‘ཡཐཱ ཨིམསྶ བྷོཏོ མནོསངྑཱརཱ པཎིཧིཏཱ ཨིམསྶ 3 ཙིཏྟསྶ ཨནནྟརཱ ཨམུཀཾ ནཱམ ཝིཏཀྐཾ ཝིཏཀྐཡིསྶཏཱི’ཏི 4། སོ བཧུཾ ཙེཔི ཨཱདིསཏི, ཏཐེཝ ཏཾ ཧོཏི, ནོ ཨཉྙཐཱ། ཨིདཾ ཝུཙྩཏི, བྷིཀྑཝེ, ཨཱདེསནཱཔཱཊིཧཱརིཡཾ།
‘‘Katamañca, bhikkhave, ādesanāpāṭihāriyaṃ? Idha, bhikkhave, ekacco nimittena ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, api ca kho manussānaṃ vā amanussānaṃ vā devatānaṃ vā saddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, api ca kho vitakkayato vicārayato vitakkavipphārasaddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, napi vitakkayato vicārayato vitakkavipphārasaddaṃ sutvā ādisati, api ca kho avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa 5 cittassa anantarā amukaṃ nāma vitakkaṃ vitakkayissatī’ti 6. So bahuṃ cepi ādisati, tatheva taṃ hoti, no aññathā. Idaṃ vuccati, bhikkhave, ādesanāpāṭihāriyaṃ.
‘‘ཀཏམཉྩ, བྷིཀྑཝེ, ཨནུསཱསནཱིཔཱཊིཧཱརིཡཾ? ཨིདྷ, བྷིཀྑཝེ, ཨེཀཙྩོ ཨེཝམནུསཱསཏི – ‘ཨེཝཾ ཝིཏཀྐེཐ, མཱ ཨེཝཾ ཝིཏཀྐཡིཏྠ། ཨེཝཾ མནསི ཀརོཐ, མཱ ཨེཝཾ མནསི ཀརིཏྠ། ཨིདཾ པཛཧཐ, ཨིདཾ ཨུཔསམྤཛྫ ཝིཧརཐཱ’ཏི། ཨིདཾ ཝུཙྩཏི, བྷིཀྑཝེ, ཨནུསཱསནཱིཔཱཊིཧཱརིཡཾ། ཨིམཱནི ཁོ, བྷིཀྑཝེ, ཏཱིཎི པཱཊིཧཱརིཡཱནི’’།
‘‘Katamañca, bhikkhave, anusāsanīpāṭihāriyaṃ? Idha, bhikkhave, ekacco evamanusāsati – ‘evaṃ vitakketha, mā evaṃ vitakkayittha. Evaṃ manasi karotha, mā evaṃ manasi karittha. Idaṃ pajahatha, idaṃ upasampajja viharathā’ti. Idaṃ vuccati, bhikkhave, anusāsanīpāṭihāriyaṃ. Imāni kho, bhikkhave, tīṇi pāṭihāriyāni’’.
༣༡. ནེཀྑམྨཾ ཨིཛ྄ཛྷཏཱིཏི – ཨིདྡྷི། ཀཱམཙྪནྡཾ པཊིཧརཏཱིཏི – པཱཊིཧཱརིཡཾ། ཡེ ཏེན ནེཀྑམྨེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘ཏཾ ཁོ པན ནེཀྑམྨཾ ཨེཝཾ ཨཱསེཝིཏབྦཾ, ཨེཝཾ བྷཱཝེཏབྦཾ , ཨེཝཾ བཧུལཱིཀཱཏབྦཾ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ།
31. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Ye tena nekkhammena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana nekkhammaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ཨབྱཱཔཱདོ ཨིཛ྄ཛྷཏཱིཏི – ཨིདྡྷི། བྱཱཔཱདཾ པཊིཧརཏཱིཏི – པཱཊིཧཱརིཡཾ། ཡེ ཏེན ཨབྱཱཔཱདེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘སོ ཁོ པན ཨབྱཱཔཱདོ ཨེཝཾ ཨཱསེཝིཏབྦོ, ཨེཝཾ བྷཱཝེཏབྦོ, ཨེཝཾ བཧུལཱིཀཱཏབྦོ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ།
Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Ye tena abyāpādena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana abyāpādo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ཨཱལོཀསཉྙཱ ཨིཛ྄ཛྷཏཱིཏི – ཨིདྡྷི། ཐིནམིདྡྷཾ པཊིཧརཏཱིཏི – པཱཊིཧཱརིཡཾ། ཡེ ཏཱཡ ཨཱལོཀསཉྙཱཡ སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘སཱ ཁོ པན ཨཱལོཀསཉྙཱ ཨེཝཾ ཨཱསེཝིཏབྦཱ, ཨེཝཾ བྷཱཝེཏབྦཱ, ཨེཝཾ བཧུལཱིཀཱཏབྦཱ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ།
Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ. Ye tāya ālokasaññāya samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Sā kho pana ālokasaññā evaṃ āsevitabbā, evaṃ bhāvetabbā, evaṃ bahulīkātabbā, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ཨཝིཀྑེཔོ ཨིཛ྄ཛྷཏཱིཏི – ཨིདྡྷི། ཨུདྡྷཙྩཾ པཊིཧརཏཱིཏི – པཱཊིཧཱརིཡཾ། ཡེ ཏེན ཨཝིཀྑེཔེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘སོ ཁོ པན ཨཝིཀྑེཔོ ཨེཝཾ ཨཱསེཝིཏབྦོ, ཨེཝཾ བྷཱཝེཏབྦོ, ཨེཝཾ བཧུལཱིཀཱཏབྦོ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ།
Avikkhepo ijjhatīti – iddhi. Uddhaccaṃ paṭiharatīti – pāṭihāriyaṃ. Ye tena avikkhepena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana avikkhepo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
དྷམྨཝཝཏྠཱནཾ ཨིཛ྄ཛྷཏཱིཏི – ཨིདྡྷི། ཝིཙིཀིཙྪཾ པཊིཧརཏཱིཏི – པཱཊིཧཱརིཡཾ། ཡེ ཏེན དྷམྨཝཝཏྠཱནེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘ཏཾ ཁོ པན དྷམྨཝཝཏྠཱནཾ ཨེཝཾ ཨཱསེཝིཏབྦཾ, ཨེཝཾ བྷཱཝེཏབྦཾ, ཨེཝཾ བཧུལཱིཀཱཏབྦཾ, ཨེཝཾ ཏདནུདྷམྨཏཱ, སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ།
Dhammavavatthānaṃ ijjhatīti – iddhi. Vicikicchaṃ paṭiharatīti – pāṭihāriyaṃ. Ye tena dhammavavatthānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana dhammavavatthānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā, sati upaṭṭhāpetabbā’’ti – anusāsanīpāṭihāriyaṃ.
ཉཱཎཾ ཨིཛ྄ཛྷཏཱིཏི – ཨིདྡྷི། ཨཝིཛྫཾ པཊིཧརཏཱིཏི – པཱཊིཧཱརིཡཾ། ཡེ ཏེན ཉཱཎེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘ཏཾ ཁོ པན ཉཱཎཾ ཨེཝཾ ཨཱསེཝིཏབྦཾ, ཨེཝཾ བྷཱཝེཏབྦཾ, ཨེཝཾ བཧུལཱིཀཱཏབྦཾ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ།
Ñāṇaṃ ijjhatīti – iddhi. Avijjaṃ paṭiharatīti – pāṭihāriyaṃ. Ye tena ñāṇena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana ñāṇaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
པཱམོཛྫཾ ཨིཛ྄ཛྷཏཱིཏི – ཨིདྡྷི། ཨརཏིཾ པཊིཧརཏཱིཏི – པཱཊིཧཱརིཡཾ། ཡེ ཏེན པཱམོཛྫེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘ཏཾ ཁོ པན པཱམོཛྫཾ ཨེཝཾ ཨཱསེཝིཏབྦཾ, ཨེཝཾ བྷཱཝེཏབྦཾ , ཨེཝཾ བཧུལཱིཀཱཏབྦཾ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ…པེ॰…།
Pāmojjaṃ ijjhatīti – iddhi. Aratiṃ paṭiharatīti – pāṭihāriyaṃ. Ye tena pāmojjena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana pāmojjaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
པཋམཾ ཛྷཱནཾ ཨིཛ྄ཛྷཏཱིཏི – ཨིདྡྷི། ནཱིཝརཎེ པཊིཧརཏཱིཏི – པཱཊིཧཱརིཡཾ། ཡེ ཏེན པཋམེན ཛྷཱནེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘ཏཾ ཁོ པན པཋམཾ ཛྷཱནཾ ཨེཝཾ ཨཱསེཝིཏབྦཾ, ཨེཝཾ བྷཱཝེཏབྦཾ, ཨེཝཾ བཧུལཱིཀཱཏབྦཾ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ…པེ॰…།
Paṭhamaṃ jhānaṃ ijjhatīti – iddhi. Nīvaraṇe paṭiharatīti – pāṭihāriyaṃ. Ye tena paṭhamena jhānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana paṭhamaṃ jhānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
ཨརཧཏྟམགྒོ ཨིཛ྄ཛྷཏཱིཏི – ཨིདྡྷི། སབྦཀིལེསེ པཊིཧརཏཱིཏི – པཱཊིཧཱརིཡཾ། ཡེ ཏེན ཨརཧཏྟམགྒེན སམནྣཱགཏཱ, སབྦེ ཏེ ཝིསུདྡྷཙིཏྟཱ ཨནཱཝིལསངྐཔྤཱཏི – ཨཱདེསནཱཔཱཊིཧཱརིཡཾ། ‘‘སོ ཁོ པན ཨརཧཏྟམགྒོ ཨེཝཾ ཨཱསེཝིཏབྦོ, ཨེཝཾ བྷཱཝེཏབྦོ, ཨེཝཾ བཧུལཱིཀཱཏབྦོ, ཨེཝཾ ཏདནུདྷམྨཏཱ སཏི ཨུཔཊྛཱཔེཏབྦཱ’’ཏི – ཨནུསཱསནཱིཔཱཊིཧཱརིཡཾ།
Arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Ye tena arahattamaggena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana arahattamaggo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
༣༢. ནེཀྑམྨཾ ཨིཛ྄ཛྷཏཱིཏི – ཨིདྡྷི། ཀཱམཙྪནྡཾ པཊིཧརཏཱིཏི – པཱཊིཧཱརིཡཾ། ཡཱ ཙ ཨིདྡྷི ཡཉྩ པཱཊིཧཱརིཡཾ, ཨིདཾ ཝུཙྩཏི ཨིདྡྷིཔཱཊིཧཱརིཡཾ། ཨབྱཱཔཱདོ ཨིཛ྄ཛྷཏཱིཏི – ཨིདྡྷི། བྱཱཔཱདཾ པཊིཧརཏཱིཏི – པཱཊིཧཱརིཡཾ། ཡཱ ཙ ཨིདྡྷི ཡཉྩ པཱཊིཧཱརིཡཾ, ཨིདཾ ཝུཙྩཏི ཨིདྡྷིཔཱཊིཧཱརིཡཾ། ཨཱལོཀསཉྙཱ ཨིཛ྄ཛྷཏཱིཏི – ཨིདྡྷི། ཐིནམིདྡྷཾ པཊིཧརཏཱིཏི – པཱཊིཧཱརིཡཾ…པེ॰… ཨརཧཏྟམགྒོ ཨིཛ྄ཛྷཏཱིཏི – ཨིདྡྷི། སབྦཀིལེསེ པཊིཧརཏཱིཏི – པཱཊིཧཱརིཡཾ། ཡཱ ཙ ཨིདྡྷི ཡཉྩ པཱཊིཧཱརིཡཾ, ཨིདཾ ཝུཙྩཏི ཨིདྡྷིཔཱཊིཧཱརིཡནྟི །
32. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ…pe… arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyanti .
པཱཊིཧཱརིཡཀཐཱ ནིཊྛིཏཱ།
Pāṭihāriyakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / པཱཊིཧཱརིཡཀཐཱཝཎྞནཱ • Pāṭihāriyakathāvaṇṇanā
