| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. මුදුතරවග්‌ගො
2. Mudutaravaggo
1. පටිලාභසුත්‌තං
1. Paṭilābhasuttaṃ
481. ‘‘පඤ්‌චිමානි , භික්‌ඛවෙ, ඉන්‌ද්‍රියානි. කතමානි පඤ්‌ච? සද්‌ධින්‌ද්‍රියං…පෙ.… පඤ්‌ඤින්‌ද්‍රියං…පෙ.…. කතමඤ්‌ච, භික්‌ඛවෙ, සද්‌ධින්‌ද්‍රියං? ඉධ, භික්‌ඛවෙ, අරියසාවකො සද්‌ධො හොති, සද්‌දහති තථාගතස්‌ස බොධිං – ‘ඉතිපි සො භගවා අරහං සම්‌මාසම්‌බුද්‌ධො විජ්‌ජාචරණසම්‌පන්‌නො සුගතො ලොකවිදූ අනුත්‌තරො පුරිසදම්‌මසාරථි සත්‌ථා දෙවමනුස්‌සානං බුද්‌ධො භගවා’ති – ඉදං වුච්‌චති, භික්‌ඛවෙ, සද්‌ධින්‌ද්‍රියං.
481. ‘‘Pañcimāni , bhikkhave, indriyāni. Katamāni pañca? Saddhindriyaṃ…pe… paññindriyaṃ…pe…. Katamañca, bhikkhave, saddhindriyaṃ? Idha, bhikkhave, ariyasāvako saddho hoti, saddahati tathāgatassa bodhiṃ – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti – idaṃ vuccati, bhikkhave, saddhindriyaṃ.
‘‘කතමඤ්‌ච, භික්‌ඛවෙ, වීරියින්‌ද්‍රියං? යං ඛො, භික්‌ඛවෙ, චත්‌තාරො සම්‌මප්‌පධානෙ ආරබ්‌භ වීරියං පටිලභති – ඉදං වුච්‌චති, භික්‌ඛවෙ, වීරියින්‌ද්‍රියං.
‘‘Katamañca, bhikkhave, vīriyindriyaṃ? Yaṃ kho, bhikkhave, cattāro sammappadhāne ārabbha vīriyaṃ paṭilabhati – idaṃ vuccati, bhikkhave, vīriyindriyaṃ.
‘‘කතමඤ්‌ච , භික්‌ඛවෙ, සතින්‌ද්‍රියං? යං ඛො, භික්‌ඛවෙ, චත්‌තාරො සතිපට්‌ඨානෙ ආරබ්‌භ සතිං පටිලභති – ඉදං වුච්‌චති, භික්‌ඛවෙ, සතින්‌ද්‍රියං.
‘‘Katamañca , bhikkhave, satindriyaṃ? Yaṃ kho, bhikkhave, cattāro satipaṭṭhāne ārabbha satiṃ paṭilabhati – idaṃ vuccati, bhikkhave, satindriyaṃ.
‘‘කතමඤ්‌ච, භික්‌ඛවෙ, සමාධින්‌ද්‍රියං? ඉධ, භික්‌ඛවෙ, අරියසාවකො වොස්‌සග්‌ගාරම්‌මණං කරිත්‌වා ලභති සමාධිං, ලභති චිත්‌තස්‌ස එකග්‌ගතං – ඉදං වුච්‌චති, භික්‌ඛවෙ, සමාධින්‌ද්‍රියං.
‘‘Katamañca, bhikkhave, samādhindriyaṃ? Idha, bhikkhave, ariyasāvako vossaggārammaṇaṃ karitvā labhati samādhiṃ, labhati cittassa ekaggataṃ – idaṃ vuccati, bhikkhave, samādhindriyaṃ.
‘‘කතමඤ්‌ච, භික්‌ඛවෙ, පඤ්‌ඤින්‌ද්‍රියං? ඉධ, භික්‌ඛවෙ, අරියසාවකො පඤ්‌ඤවා හොති උදයත්‌ථගාමිනියා පඤ්‌ඤාය සමන්‌නාගතො අරියාය නිබ්‌බෙධිකාය සම්‌මා දුක්‌ඛක්‌ඛයගාමිනියා – ඉදං වුච්‌චති, භික්‌ඛවෙ, පඤ්‌ඤින්‌ද්‍රියං. ඉමානි ඛො, භික්‌ඛවෙ, පඤ්‌චින්‌ද්‍රියානී’’ති. පඨමං.
‘‘Katamañca, bhikkhave, paññindriyaṃ? Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā – idaṃ vuccati, bhikkhave, paññindriyaṃ. Imāni kho, bhikkhave, pañcindriyānī’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. පටිලාභසුත්‌තවණ්‌ණනා • 1. Paṭilābhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. පටිලාභසුත්‌තවණ්‌ණනා • 1. Paṭilābhasuttavaṇṇanā
