| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၈. ပတိလီနသုတ္တဝဏ္ဏနာ
8. Patilīnasuttavaṇṇanā
၃၈. အဋ္ဌမေ ပနုဏ္ဏပစ္စေကသစ္စောတိ ‘‘ဣဒမေဝ ဒသ္သနံ သစ္စံ, ဣဒမေဝ သစ္စ’’န္တိ ဧဝံ ပာဋိဧက္ကံ ဂဟိတတ္တာ ပစ္စေကသင္ခာတာနိ ဒိဋ္ဌိသစ္စာနိ ပနုဏ္ဏာနိ နီဟဋာနိ ပဟီနာနိ အသ္သာတိ ပနုဏ္ဏပစ္စေကသစ္စော။ သမဝယသဋ္ဌေသနောတိ ဧတ္ထ အဝယာတိ အနူနာ, သဋ္ဌာတိ ဝိသ္သဋ္ဌာ, သမ္မာ အဝယာ သဋ္ဌာ ဧသနာ အသ္သာတိ သမဝယသဋ္ဌေသနော, သမ္မာ ဝိသ္သဋ္ဌသဗ္ဗဧသနောတိ အတ္ထော။ ပတိလီနောတိ နိလီနော ဧကီဘာဝံ ဥပဂတော။ ပုထုသမဏဗ္ရာဟ္မဏာနန္တိ ဗဟူနံ သမဏဗ္ရာဟ္မဏာနံ။ ဧတ္ထ စ သမဏာတိ ပဗ္ဗဇ္ဇူပဂတာ, ဗ္ရာဟ္မဏာတိ ဘောဝာဒိနော။ ပုထုပစ္စေကသစ္စာနီတိ ဗဟူနိ ပာဋေက္ကသစ္စာနိ။ နုဏ္ဏာနီတိ နီဟဋာနိ။ ပနုဏ္ဏာနီတိ သုဋ္ဌု နီဟဋာနိ။ စတ္တာနီတိ ဝိသ္သဋ္ဌာနိ။ ဝန္တာနီတိ ဝမိတာနိ။ မုတ္တာနီတိ ဆိန္နဗန္ဓနာနိ ကတာနိ။ ပဟီနာနီတိ ပဇဟိတာနိ။ ပဋိနိသ္သဋ္ဌာနီတိ ယထာ န ပုန စိတ္တံ အာရောဟန္တိ, ဧဝံ ပဋိနိသ္သဇ္ဇိတာနိ။ သဗ္ဗာနေဝေတာနိ ဂဟိတဂဟဏသ္သ ဝိသ္သဋ္ဌဘာဝဝေဝစနာနိ။
38. Aṭṭhame panuṇṇapaccekasaccoti ‘‘idameva dassanaṃ saccaṃ, idameva sacca’’nti evaṃ pāṭiekkaṃ gahitattā paccekasaṅkhātāni diṭṭhisaccāni panuṇṇāni nīhaṭāni pahīnāni assāti panuṇṇapaccekasacco. Samavayasaṭṭhesanoti ettha avayāti anūnā, saṭṭhāti vissaṭṭhā, sammā avayā saṭṭhā esanā assāti samavayasaṭṭhesano, sammā vissaṭṭhasabbaesanoti attho. Patilīnoti nilīno ekībhāvaṃ upagato. Puthusamaṇabrāhmaṇānanti bahūnaṃ samaṇabrāhmaṇānaṃ. Ettha ca samaṇāti pabbajjūpagatā, brāhmaṇāti bhovādino. Puthupaccekasaccānīti bahūni pāṭekkasaccāni. Nuṇṇānīti nīhaṭāni. Panuṇṇānīti suṭṭhu nīhaṭāni. Cattānīti vissaṭṭhāni. Vantānīti vamitāni. Muttānīti chinnabandhanāni katāni. Pahīnānīti pajahitāni. Paṭinissaṭṭhānīti yathā na puna cittaṃ ārohanti, evaṃ paṭinissajjitāni. Sabbānevetāni gahitagahaṇassa vissaṭṭhabhāvavevacanāni.
ကာမေသနာ ပဟီနာ ဟောတီတိ အနာဂာမိမဂ္ဂေန ပဟီနာ။ ဘဝေသနာ ပန အရဟတ္တမဂ္ဂေန ပဟီယတိ။ ‘‘ဗ္ရဟ္မစရိယံ ဧသိသ္သာမိ ဂဝေသိသ္သာမီ’’တိ ဧဝံ ပဝတ္တဇ္ဈာသယသင္ခာတာ ဗ္ရဟ္မစရိယေသနာပိ အရဟတ္တမဂ္ဂေနေဝ ပဋိပ္ပသ္သဒ္ဓိံ ဝူပသမံ ဂစ္ဆတိ။ ဒိဋ္ဌိဗ္ရဟ္မစရိယေသနာ ပန သောတာပတ္တိမဂ္ဂေနေဝ ပဋိပ္ပသမ္ဘတီတိ ဝေဒိတဗ္ဗာ။ ဧဝံ ခော, ဘိက္ခဝေတိ ဧဝံ စတုတ္ထဇ္ဈာနေန ပသ္သဒ္ဓကာယသင္ခာရော ဝူပသန္တအသ္သာသပသ္သာသော နာမ ဟောတိ။ အသ္မိမာနောတိ အသ္မီတိ ဥပ္ပဇ္ဇနကော နဝဝိဓမာနော။
Kāmesanā pahīnā hotīti anāgāmimaggena pahīnā. Bhavesanā pana arahattamaggena pahīyati. ‘‘Brahmacariyaṃ esissāmi gavesissāmī’’ti evaṃ pavattajjhāsayasaṅkhātā brahmacariyesanāpi arahattamaggeneva paṭippassaddhiṃ vūpasamaṃ gacchati. Diṭṭhibrahmacariyesanā pana sotāpattimaggeneva paṭippasambhatīti veditabbā. Evaṃ kho, bhikkhaveti evaṃ catutthajjhānena passaddhakāyasaṅkhāro vūpasantaassāsapassāso nāma hoti. Asmimānoti asmīti uppajjanako navavidhamāno.
ဂာထာသု ကာမေသနာ ဘဝေသနာတိ ဧတာ ဒ္ဝေ ဧသနာ, ဗ္ရဟ္မစရိယေသနာ သဟာတိ တာဟိယေဝ သဟ ဗ္ရဟ္မစရိယေသနာတိ တိသ္သောပိ ဧတာ။ ဣဓ ဌတ္ဝာ ဧသနာ ပဋိနိသ္သဋ္ဌာတိ ဣမိနာ ပဒေန သဒ္ဓိံ ယောဇနာ ကာတဗ္ဗာ။ ဣတိ သစ္စပရာမာသော, ဒိဋ္ဌိဋ္ဌာနာ သမုသ္သယာတိ ‘‘ဣတိ သစ္စံ ဣတိ သစ္စ’’န္တိ ဂဟဏပရာမာသော စ ဒိဋ္ဌိသင္ခာတာယေဝ ဒိဋ္ဌိဋ္ဌာနာ စ ယေ သမုသ္သိတတ္တာ ဥဂ္ဂန္တ္ဝာ ဌိတတ္တာ သမုသ္သယာတိ ဝုစ္စန္တိ, တေ သဗ္ဗေပိ။ ဣဓ ဌတ္ဝာ ဒိဋ္ဌိဋ္ဌာနာ သမူဟတာတိ ဣမိနာ ပဒေန သဒ္ဓိံ ယောဇနာ ကာတဗ္ဗာ။ ကသ္သ ပန ဧတာ ဧသနာ ပဋိနိသ္သဋ္ဌာ, ဧတေ စ ဒိဋ္ဌိဋ္ဌာနာ သမူဟတာတိ? သဗ္ဗရာဂဝိရတ္တသ္သ တဏ္ဟာက္ခယဝိမုတ္တိနော။ ယော ဟိ သဗ္ဗရာဂေဟိပိ ဝိရတ္တော, တဏ္ဟာက္ခယေ စ နိဗ္ဗာနေ ပဝတ္တာယ အရဟတ္တဖလဝိမုတ္တိယာ သမန္နာဂတော, ဧတသ္သ ဧသနာ ပဋိနိသ္သဋ္ဌာ, ဒိဋ္ဌိဋ္ဌာနာ စ သမူဟတာ ။ သ ဝေ သန္တောတိ သော ဧဝရူပော ကိလေသသန္တတာယ သန္တော။ ပသ္သဒ္ဓောတိ ဒ္ဝီဟိ ကာယစိတ္တပသ္သဒ္ဓီဟိ ပသ္သဒ္ဓော။ အပရာဇိတောတိ သဗ္ဗကိလေသေ ဇိနိတ္ဝာ ဌိတတ္တာ ကေနစိ အပရာဇိတော။ မာနာဘိသမယာတိ မာနသ္သ ပဟာနာဘိသမယေန။ ဗုဒ္ဓောတိ စတ္တာရိ သစ္စာနိ ဗုဇ္ဈိတ္ဝာ ဌိတော။ ဣတိ ဣမသ္မိံ သုတ္တေပိ ဂာထာသုပိ ခီဏာသဝောဝ ကထိတောတိ။
Gāthāsu kāmesanā bhavesanāti etā dve esanā, brahmacariyesanā sahāti tāhiyeva saha brahmacariyesanāti tissopi etā. Idha ṭhatvā esanā paṭinissaṭṭhāti iminā padena saddhiṃ yojanā kātabbā. Iti saccaparāmāso, diṭṭhiṭṭhānā samussayāti ‘‘iti saccaṃ iti sacca’’nti gahaṇaparāmāso ca diṭṭhisaṅkhātāyeva diṭṭhiṭṭhānā ca ye samussitattā uggantvā ṭhitattā samussayāti vuccanti, te sabbepi. Idha ṭhatvā diṭṭhiṭṭhānā samūhatāti iminā padena saddhiṃ yojanā kātabbā. Kassa pana etā esanā paṭinissaṭṭhā, ete ca diṭṭhiṭṭhānā samūhatāti? Sabbarāgavirattassa taṇhākkhayavimuttino. Yo hi sabbarāgehipi viratto, taṇhākkhaye ca nibbāne pavattāya arahattaphalavimuttiyā samannāgato, etassa esanā paṭinissaṭṭhā, diṭṭhiṭṭhānā ca samūhatā . Sa ve santoti so evarūpo kilesasantatāya santo. Passaddhoti dvīhi kāyacittapassaddhīhi passaddho. Aparājitoti sabbakilese jinitvā ṭhitattā kenaci aparājito. Mānābhisamayāti mānassa pahānābhisamayena. Buddhoti cattāri saccāni bujjhitvā ṭhito. Iti imasmiṃ suttepi gāthāsupi khīṇāsavova kathitoti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. ပတိလီနသုတ္တံ • 8. Patilīnasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈. ပတိလီနသုတ္တဝဏ္ဏနာ • 8. Patilīnasuttavaṇṇanā
