| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. பாதிமொக்க²ஸங்வரஸுத்தவண்ணனா
6. Pātimokkhasaṃvarasuttavaṇṇanā
412. ச²ட்டே² பாதிமொக்க²ஸங்வரஸங்வுதோதி சதுன்னங் ஸீலானங் ஜெட்ட²கஸீலங் த³ஸ்ஸெந்தோ ஏவமாஹ. திபிடகசூளனாக³த்தே²ரோ பனாஹ – ‘‘பாதிமொக்க²ஸங்வரோவ ஸீலங், இதரானி தீணி ஸீலந்தி வுத்தட்டா²னங் நாம நத்தீ²’’தி. வத்வா தங் அனுஜானந்தோ ஆஹ – ‘‘இந்த்³ரியஸங்வரோ நாம ச²த்³வாரரக்க²ணமத்தமேவ, ஆஜீவபாரிஸுத்³தி⁴ த⁴ம்மேனேவ ஸமேன பச்சயுப்பத்திமத்தகங், பச்சயஸன்னிஸ்ஸிதங் படிலத்³த⁴பச்சயே இத³மத்த²ந்தி பச்சவெக்கி²த்வா பரிபு⁴ஞ்ஜனமத்தகங். நிப்பரியாயேன பாதிமொக்க²ஸங்வரோவ ஸீலங். யஸ்ஸ ஸோ பி⁴ன்னோ, அயங் சி²ன்னஸீஸோ விய புரிஸோ ஹத்த²பாதே³, ஸேஸானி ரக்கி²ஸ்ஸதீதி ந வத்தப்³போ³. யஸ்ஸ பன ஸோ அரோகோ³, அயங் அச்சி²ன்னஸீஸோ விய புரிஸோ ஜீவிதங், ஸேஸானி புன பாகதிகானி கத்வா ரக்கி²தும்பி ஸக்கோதீ’’தி. தஸ்மா பாதிமொக்க²ஸங்வரோவ ஸீலங், தேன பாதிமொக்க²ஸங்வரேன ஸங்வுதோதி பாதிமொக்க²ஸங்வரஸங்வுதோ, உபேதோ ஸமன்னாக³தோதி அத்தோ².
412. Chaṭṭhe pātimokkhasaṃvarasaṃvutoti catunnaṃ sīlānaṃ jeṭṭhakasīlaṃ dassento evamāha. Tipiṭakacūḷanāgatthero panāha – ‘‘pātimokkhasaṃvarova sīlaṃ, itarāni tīṇi sīlanti vuttaṭṭhānaṃ nāma natthī’’ti. Vatvā taṃ anujānanto āha – ‘‘indriyasaṃvaro nāma chadvārarakkhaṇamattameva, ājīvapārisuddhi dhammeneva samena paccayuppattimattakaṃ, paccayasannissitaṃ paṭiladdhapaccaye idamatthanti paccavekkhitvā paribhuñjanamattakaṃ. Nippariyāyena pātimokkhasaṃvarova sīlaṃ. Yassa so bhinno, ayaṃ chinnasīso viya puriso hatthapāde, sesāni rakkhissatīti na vattabbo. Yassa pana so arogo, ayaṃ acchinnasīso viya puriso jīvitaṃ, sesāni puna pākatikāni katvā rakkhitumpi sakkotī’’ti. Tasmā pātimokkhasaṃvarova sīlaṃ, tena pātimokkhasaṃvarena saṃvutoti pātimokkhasaṃvarasaṃvuto, upeto samannāgatoti attho.
ஆசாரகோ³சரஸம்பன்னோதி ஆசாரேன ச கோ³சரேன ச ஸம்பன்னோ. அணுமத்தேஸூதி அப்பமத்தகேஸு. வஜ்ஜேஸூதி அகுஸலத⁴ம்மேஸு. ப⁴யத³ஸ்ஸாவீதி ப⁴யத³ஸ்ஸீ. ஸமாதா³யாதி ஸம்மா ஆதி³யித்வா. ஸிக்க²ஸ்ஸு ஸிக்கா²பதே³ஸூதி ஸிக்கா²பதே³ஸு தங் தங் ஸிக்கா²பத³ங் ஸமாதி³யித்வா ஸிக்க², யங் யங் பன கிஞ்சி ஸிக்கா²பதே³ஸு ஸிக்கா²கொட்டா²ஸேஸு ஸிக்கி²தப்³ப³ங் காயிகங் வா வாசஸிகங் வா, தங் தங் ஸப்³ப³ங் ஸம்மா ஆதா³ய ஸிக்க²ஸ்ஸூதி அயமெத்த² ஸங்கே²பத்தோ². வித்தா²ரோ பன விஸுத்³தி⁴மக்³கே³ (விஸுத்³தி⁴॰ 1.14) வுத்தோ. இதி இமஸ்மிங் ஸுத்தே பாதிமொக்க²ஸங்வரஸீலமேவ கதி²தங்.
Ācāragocarasampannoti ācārena ca gocarena ca sampanno. Aṇumattesūti appamattakesu. Vajjesūti akusaladhammesu. Bhayadassāvīti bhayadassī. Samādāyāti sammā ādiyitvā. Sikkhassu sikkhāpadesūti sikkhāpadesu taṃ taṃ sikkhāpadaṃ samādiyitvā sikkha, yaṃ yaṃ pana kiñci sikkhāpadesu sikkhākoṭṭhāsesu sikkhitabbaṃ kāyikaṃ vā vācasikaṃ vā, taṃ taṃ sabbaṃ sammā ādāya sikkhassūti ayamettha saṅkhepattho. Vitthāro pana visuddhimagge (visuddhi. 1.14) vutto. Iti imasmiṃ sutte pātimokkhasaṃvarasīlameva kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. பாதிமொக்க²ஸங்வரஸுத்தங் • 6. Pātimokkhasaṃvarasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. பாதிமொக்க²ஸங்வரஸுத்தவண்ணனா • 6. Pātimokkhasaṃvarasuttavaṇṇanā
