| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
6. පාතිමොක්‌ඛසංවරසුත්‌තවණ්‌ණනා
6. Pātimokkhasaṃvarasuttavaṇṇanā
412. ඡට්‌ඨෙ පාතිමොක්‌ඛසංවරසංවුතොති චතුන්‌නං සීලානං ජෙට්‌ඨකසීලං දස්‌සෙන්‌තො එවමාහ. තිපිටකචූළනාගත්‌ථෙරො පනාහ – ‘‘පාතිමොක්‌ඛසංවරොව සීලං, ඉතරානි තීණි සීලන්‌ති වුත්‌තට්‌ඨානං නාම නත්‌ථී’’ති. වත්‌වා තං අනුජානන්‌තො ආහ – ‘‘ඉන්‌ද්‍රියසංවරො නාම ඡද්‌වාරරක්‌ඛණමත්‌තමෙව, ආජීවපාරිසුද්‌ධි ධම්‌මෙනෙව සමෙන පච්‌චයුප්‌පත්‌තිමත්‌තකං, පච්‌චයසන්‌නිස්‌සිතං පටිලද්‌ධපච්‌චයෙ ඉදමත්‌ථන්‌ති පච්‌චවෙක්‌ඛිත්‌වා පරිභුඤ්‌ජනමත්‌තකං. නිප්‌පරියායෙන පාතිමොක්‌ඛසංවරොව සීලං. යස්‌ස සො භින්‌නො, අයං ඡින්‌නසීසො විය පුරිසො හත්‌ථපාදෙ, සෙසානි රක්‌ඛිස්‌සතීති න වත්‌තබ්‌බො. යස්‌ස පන සො අරොගො, අයං අච්‌ඡින්‌නසීසො විය පුරිසො ජීවිතං, සෙසානි පුන පාකතිකානි කත්‌වා රක්‌ඛිතුම්‌පි සක්‌කොතී’’ති. තස්‌මා පාතිමොක්‌ඛසංවරොව සීලං, තෙන පාතිමොක්‌ඛසංවරෙන සංවුතොති පාතිමොක්‌ඛසංවරසංවුතො, උපෙතො සමන්‌නාගතොති අත්‌ථො.
412. Chaṭṭhe pātimokkhasaṃvarasaṃvutoti catunnaṃ sīlānaṃ jeṭṭhakasīlaṃ dassento evamāha. Tipiṭakacūḷanāgatthero panāha – ‘‘pātimokkhasaṃvarova sīlaṃ, itarāni tīṇi sīlanti vuttaṭṭhānaṃ nāma natthī’’ti. Vatvā taṃ anujānanto āha – ‘‘indriyasaṃvaro nāma chadvārarakkhaṇamattameva, ājīvapārisuddhi dhammeneva samena paccayuppattimattakaṃ, paccayasannissitaṃ paṭiladdhapaccaye idamatthanti paccavekkhitvā paribhuñjanamattakaṃ. Nippariyāyena pātimokkhasaṃvarova sīlaṃ. Yassa so bhinno, ayaṃ chinnasīso viya puriso hatthapāde, sesāni rakkhissatīti na vattabbo. Yassa pana so arogo, ayaṃ acchinnasīso viya puriso jīvitaṃ, sesāni puna pākatikāni katvā rakkhitumpi sakkotī’’ti. Tasmā pātimokkhasaṃvarova sīlaṃ, tena pātimokkhasaṃvarena saṃvutoti pātimokkhasaṃvarasaṃvuto, upeto samannāgatoti attho.
ආචාරගොචරසම්‌පන්‌නොති ආචාරෙන ච ගොචරෙන ච සම්‌පන්‌නො. අණුමත්‌තෙසූති අප්‌පමත්‌තකෙසු. වජ්‌ජෙසූති අකුසලධම්‌මෙසු. භයදස්‌සාවීති භයදස්‌සී. සමාදායාති සම්‌මා ආදියිත්‌වා. සික්‌ඛස්‌සු සික්‌ඛාපදෙසූති සික්‌ඛාපදෙසු තං තං සික්‌ඛාපදං සමාදියිත්‌වා සික්‌ඛ, යං යං පන කිඤ්‌චි සික්‌ඛාපදෙසු සික්‌ඛාකොට්‌ඨාසෙසු සික්‌ඛිතබ්‌බං කායිකං වා වාචසිකං වා, තං තං සබ්‌බං සම්‌මා ආදාය සික්‌ඛස්‌සූති අයමෙත්‌ථ සඞ්‌ඛෙපත්‌ථො. විත්‌ථාරො පන විසුද්‌ධිමග්‌ගෙ (විසුද්‌ධි. 1.14) වුත්‌තො. ඉති ඉමස්‌මිං සුත්‌තෙ පාතිමොක්‌ඛසංවරසීලමෙව කථිතං.
Ācāragocarasampannoti ācārena ca gocarena ca sampanno. Aṇumattesūti appamattakesu. Vajjesūti akusaladhammesu. Bhayadassāvīti bhayadassī. Samādāyāti sammā ādiyitvā. Sikkhassu sikkhāpadesūti sikkhāpadesu taṃ taṃ sikkhāpadaṃ samādiyitvā sikkha, yaṃ yaṃ pana kiñci sikkhāpadesu sikkhākoṭṭhāsesu sikkhitabbaṃ kāyikaṃ vā vācasikaṃ vā, taṃ taṃ sabbaṃ sammā ādāya sikkhassūti ayamettha saṅkhepattho. Vitthāro pana visuddhimagge (visuddhi. 1.14) vutto. Iti imasmiṃ sutte pātimokkhasaṃvarasīlameva kathitaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. පාතිමොක්‌ඛසංවරසුත්‌තං • 6. Pātimokkhasaṃvarasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. පාතිමොක්‌ඛසංවරසුත්‌තවණ්‌ණනා • 6. Pātimokkhasaṃvarasuttavaṇṇanā
