பாதிமொக்க²ஸவனாரஹகதா²வண்ணனா

386. அத² ப⁴க³வா சிந்தேஸி ‘‘இதா³னி பி⁴க்கு²ஸங்கே⁴ அப்³பு³தோ³ ஜாதோ, அபரிஸுத்³தா⁴ புக்³க³லா உபோஸத²ங் ஆக³ச்ச²ந்தி, ந ச ததா²க³தோ அபரிஸுத்³தா⁴ய பரிஸாய உபோஸத²ங் உத்³தி³ஸதி, அனுத்³தி³ஸந்தே ச பி⁴க்கு²ஸங்க⁴ஸ்ஸ உபோஸதோ² பச்சி²ஜ்ஜதி, யன்னூனாஹங் இதோ பட்டா²ய பி⁴க்கூ²னஞ்ஞேவ பாதிமொக்கு²த்³தே³ஸங் அனுஜானெய்ய’’ந்தி, ஏவங் பன சிந்தெத்வா பி⁴க்கூ²னஞ்ஞேவ பாதிமொக்கு²த்³தே³ஸங் அனுஜானி . தேன வுத்தங் ‘‘அத² கோ² ப⁴க³வா…பே॰… பாதிமொக்க²ங் உத்³தி³ஸெய்யாதா²’’தி. தத்த² நதா³னாஹந்தி ந இதா³னி அஹங். உபோஸத²ங் ந கரிஸ்ஸாமி, பாதிமொக்க²ங் ந உத்³தி³ஸிஸ்ஸாமீதி பச்சேகங் ந-காரேன ஸம்ப³ந்தோ⁴. து³வித⁴ங் பாதிமொக்க²ங் ஆணாபாதிமொக்க²ங் ஓவாத³பாதிமொக்க²ந்தி. தேஸு ‘‘ஸுணாது மே ப⁴ந்தே’’திஆதி³கங் ஆணாபாதிமொக்க²ங், தங் ஸாவகாவ உத்³தி³ஸந்தி, ந பு³த்³தா⁴, யங் அன்வத்³த⁴மாஸங் உத்³தி³ஸீயதி. ‘‘க²ந்தீ பரமங்…பே॰… ஸப்³ப³பாபஸ்ஸ அகரணங்…பே॰… அனுபவாதோ³ அனுபகா⁴தோ…பே॰… ஏதங் பு³த்³தா⁴ன ஸாஸன’’ந்தி (தீ³॰ நி॰ 2.90; த⁴॰ ப॰ 183-185) இமா பன திஸ்ஸோ கா³தா² ஓவாத³பாதிமொக்க²ங் நாம, தங் பு³த்³தா⁴வ உத்³தி³ஸந்தி, ந ஸாவகா. ச²ன்னம்பி வஸ்ஸானங் அச்சயேன உத்³தி³ஸந்தி. தீ³கா⁴யுகபு³த்³தா⁴னஞ்ஹி த⁴ரமானகாலே அயமேவ பாதிமொக்கு²த்³தே³ஸோ, அப்பாயுகபு³த்³தா⁴னங் பன பட²மபோ³தி⁴யங்யேவ, ததோ பரங் இதரோ, தஞ்ச கோ² பி⁴க்கூ² ஏவ உத்³தி³ஸந்தி, ந பு³த்³தா⁴. தஸ்மா அம்ஹாகம்பி ப⁴க³வா வீஸதிவஸ்ஸமத்தங் இமங் ஓவாத³பாதிமொக்க²ங் உத்³தி³ஸித்வா இமங் அந்தராயங் தி³ஸ்வா ததோ பரங் ந உத்³தி³ஸி.

அட்டா²னந்தி அகாரணங். அனவகாஸோதி தஸ்ஸேவ வேவசனங். காரணஞ்ஹி திட்ட²தி எத்த² ப²லங் ததா³யத்தவுத்திதாயாதி ‘‘டா²ன’’ந்தி வுச்சதி, ஏவங் ‘‘அவகாஸோ’’திபி வுச்சதி. யந்தி கிரியாபராமஸனங். ந ச, பி⁴க்க²வே, ஸாபத்திகேன பாதிமொக்க²ங் ஸோதப்³ப³ந்திஆதி³ பத³த்த²தோ ஸுவிஞ்ஞெய்யங். வினிச்ச²யதோ பனெத்த² யங் வத்தப்³ப³ங், தங் அட்ட²கதா²ய வுத்தமேவ. தத்த² புரே வா பச்சா² வாதி ஞத்திதோ புப்³பே³ வா பச்சா² வா.