| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
4. பாதிமொக்க²ஸவனாரஹோ
4. Pātimokkhasavanāraho
386. அத² கோ² ப⁴க³வா பி⁴க்கூ² ஆமந்தேஸி – ‘‘நதா³னாஹங், பி⁴க்க²வே, இதோ பரங் உபோஸத²ங் கரிஸ்ஸாமி, பாதிமொக்க²ங் உத்³தி³ஸிஸ்ஸாமி. தும்ஹேவதா³னி, பி⁴க்க²வே, இதோ பரங் உபோஸத²ங் கரெய்யாத², பாதிமொக்க²ங் உத்³தி³ஸெய்யாத². அட்டா²னமேதங், பி⁴க்க²வே, அனவகாஸோ யங் ததா²க³தோ அபரிஸுத்³தா⁴ய பரிஸாய உபோஸத²ங் கரெய்ய, பாதிமொக்க²ங் உத்³தி³ஸெய்ய. ந ச, பி⁴க்க²வே 1, ஸாபத்திகேன பாதிமொக்க²ங் ஸோதப்³ப³ங். யோ ஸுணெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, யோ ஸாபத்திகோ பாதிமொக்க²ங் ஸுணாதி, தஸ்ஸ பாதிமொக்க²ங் ட²பேதுங். ஏவஞ்ச பன, பி⁴க்க²வே, ட²பேதப்³ப³ங். தத³ஹுபோஸதே² சாதுத்³த³ஸே வா பன்னரஸே வா தஸ்மிங் புக்³க³லே ஸம்முகீ²பூ⁴தே ஸங்க⁴மஜ்ஜே² உதா³ஹரிதப்³ப³ங் –
386. Atha kho bhagavā bhikkhū āmantesi – ‘‘nadānāhaṃ, bhikkhave, ito paraṃ uposathaṃ karissāmi, pātimokkhaṃ uddisissāmi. Tumhevadāni, bhikkhave, ito paraṃ uposathaṃ kareyyātha, pātimokkhaṃ uddiseyyātha. Aṭṭhānametaṃ, bhikkhave, anavakāso yaṃ tathāgato aparisuddhāya parisāya uposathaṃ kareyya, pātimokkhaṃ uddiseyya. Na ca, bhikkhave 2, sāpattikena pātimokkhaṃ sotabbaṃ. Yo suṇeyya, āpatti dukkaṭassa. Anujānāmi, bhikkhave, yo sāpattiko pātimokkhaṃ suṇāti, tassa pātimokkhaṃ ṭhapetuṃ. Evañca pana, bhikkhave, ṭhapetabbaṃ. Tadahuposathe cātuddase vā pannarase vā tasmiṃ puggale sammukhībhūte saṅghamajjhe udāharitabbaṃ –
‘ஸுணாது மே ப⁴ந்தே, ஸங்கோ⁴. இத்த²ன்னாமோ புக்³க³லோ ஸாபத்திகோ, தஸ்ஸ பாதிமொக்க²ங் ட²பேமி, ந தஸ்மிங் ஸம்முகீ²பூ⁴தே பாதிமொக்க²ங் உத்³தி³ஸிதப்³ப³’ந்தி ட²பிதங் ஹோதி பாதிமொக்க²’’ந்தி.
‘Suṇātu me bhante, saṅgho. Itthannāmo puggalo sāpattiko, tassa pātimokkhaṃ ṭhapemi, na tasmiṃ sammukhībhūte pātimokkhaṃ uddisitabba’nti ṭhapitaṃ hoti pātimokkha’’nti.
தேன கோ² பன ஸமயேன ச²ப்³ப³க்³கி³யா பி⁴க்கூ² ‘நாம்ஹே கோசி ஜானாதீ’தி ஸாபத்திகாவ பாதிமொக்க²ங் ஸுணந்தி. தே²ரா பி⁴க்கூ² பரசித்தவிது³னோ பி⁴க்கூ²னங் ஆரோசெந்தி – ‘‘இத்த²ன்னாமோ ச இத்த²ன்னாமோ ச, ஆவுஸோ, ச²ப்³ப³க்³கி³யா பி⁴க்கூ² ‘நாம்ஹே கோசி ஜானாதீ’தி ஸாபத்திகாவ பாதிமொக்க²ங் ஸுணந்தீ’’தி. அஸ்ஸோஸுங் கோ² ச²ப்³ப³க்³கி³யா பி⁴க்கூ² – ‘‘தே²ரா கிர பி⁴க்கூ² பரசித்தவிது³னோ அம்ஹே பி⁴க்கூ²னங் ஆரோசெந்தி – இத்த²ன்னாமோ ச இத்த²ன்னாமோ ச, ஆவுஸோ, ச²ப்³ப³க்³கி³யா பி⁴க்கூ² ‘நாம்ஹே கோசி ஜானாதீ’தி ஸாபத்திகாவ பாதிமொக்க²ங் ஸுணந்தீ’’தி.
Tena kho pana samayena chabbaggiyā bhikkhū ‘nāmhe koci jānātī’ti sāpattikāva pātimokkhaṃ suṇanti. Therā bhikkhū paracittaviduno bhikkhūnaṃ ārocenti – ‘‘itthannāmo ca itthannāmo ca, āvuso, chabbaggiyā bhikkhū ‘nāmhe koci jānātī’ti sāpattikāva pātimokkhaṃ suṇantī’’ti. Assosuṃ kho chabbaggiyā bhikkhū – ‘‘therā kira bhikkhū paracittaviduno amhe bhikkhūnaṃ ārocenti – itthannāmo ca itthannāmo ca, āvuso, chabbaggiyā bhikkhū ‘nāmhe koci jānātī’ti sāpattikāva pātimokkhaṃ suṇantī’’ti.
தே – புரம்ஹாகங் பேஸலா பி⁴க்கூ² பாதிமொக்க²ங் ட²பெந்தீதி – படிகச்சேவ ஸுத்³தா⁴னங் பி⁴க்கூ²னங் அனாபத்திகானங் அவத்து²ஸ்மிங் அகாரணே பாதிமொக்க²ங் ட²பெந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ஸுத்³தா⁴னங் பி⁴க்கூ²னங் அனாபத்திகானங் அவத்து²ஸ்மிங் அகாரணே பாதிமொக்க²ங் ட²பெஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கூ² ஸுத்³தா⁴னங் பி⁴க்கூ²னங் அனாபத்திகானங் அவத்து²ஸ்மிங் அகாரணே பாதிமொக்க²ங் ட²பெந்தீ’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ஸுத்³தா⁴னங் பி⁴க்கூ²னங் அனாபத்திகானங் அவத்து²ஸ்மிங் அகாரணே பாதிமொக்க²ங் ட²பேதப்³ப³ங். யோ ட²பெய்ய, ஆபத்தி து³க்கடஸ்ஸ’’.
Te – puramhākaṃ pesalā bhikkhū pātimokkhaṃ ṭhapentīti – paṭikacceva suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapessantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapentī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapetabbaṃ. Yo ṭhapeyya, āpatti dukkaṭassa’’.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பாதிமொக்க²ஸவனாரஹகதா² • Pātimokkhasavanārahakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாதிமொக்க²ஸவனாரஹகதா²வண்ணனா • Pātimokkhasavanārahakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாதிமொக்க²ஸவனாரஹகதா²தி³வண்ணனா • Pātimokkhasavanārahakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 4. பாதிமொக்க²ஸவனாரஹகதா² • 4. Pātimokkhasavanārahakathā
