| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
৪. পাতিমোক্খসৰনারহো
4. Pātimokkhasavanāraho
৩৮৬. অথ খো ভগৰা ভিক্খূ আমন্তেসি – ‘‘নদানাহং, ভিক্খৰে, ইতো পরং উপোসথং করিস্সামি, পাতিমোক্খং উদ্দিসিস্সামি। তুম্হেৰদানি, ভিক্খৰে, ইতো পরং উপোসথং করেয্যাথ, পাতিমোক্খং উদ্দিসেয্যাথ। অট্ঠানমেতং, ভিক্খৰে, অনৰকাসো যং তথাগতো অপরিসুদ্ধায পরিসায উপোসথং করেয্য, পাতিমোক্খং উদ্দিসেয্য। ন চ, ভিক্খৰে 1, সাপত্তিকেন পাতিমোক্খং সোতব্বং। যো সুণেয্য, আপত্তি দুক্কটস্স। অনুজানামি, ভিক্খৰে, যো সাপত্তিকো পাতিমোক্খং সুণাতি, তস্স পাতিমোক্খং ঠপেতুং। এৰঞ্চ পন, ভিক্খৰে, ঠপেতব্বং। তদহুপোসথে চাতুদ্দসে ৰা পন্নরসে ৰা তস্মিং পুগ্গলে সম্মুখীভূতে সঙ্ঘমজ্ঝে উদাহরিতব্বং –
386. Atha kho bhagavā bhikkhū āmantesi – ‘‘nadānāhaṃ, bhikkhave, ito paraṃ uposathaṃ karissāmi, pātimokkhaṃ uddisissāmi. Tumhevadāni, bhikkhave, ito paraṃ uposathaṃ kareyyātha, pātimokkhaṃ uddiseyyātha. Aṭṭhānametaṃ, bhikkhave, anavakāso yaṃ tathāgato aparisuddhāya parisāya uposathaṃ kareyya, pātimokkhaṃ uddiseyya. Na ca, bhikkhave 2, sāpattikena pātimokkhaṃ sotabbaṃ. Yo suṇeyya, āpatti dukkaṭassa. Anujānāmi, bhikkhave, yo sāpattiko pātimokkhaṃ suṇāti, tassa pātimokkhaṃ ṭhapetuṃ. Evañca pana, bhikkhave, ṭhapetabbaṃ. Tadahuposathe cātuddase vā pannarase vā tasmiṃ puggale sammukhībhūte saṅghamajjhe udāharitabbaṃ –
‘সুণাতু মে ভন্তে, সঙ্ঘো। ইত্থন্নামো পুগ্গলো সাপত্তিকো, তস্স পাতিমোক্খং ঠপেমি, ন তস্মিং সম্মুখীভূতে পাতিমোক্খং উদ্দিসিতব্ব’ন্তি ঠপিতং হোতি পাতিমোক্খ’’ন্তি।
‘Suṇātu me bhante, saṅgho. Itthannāmo puggalo sāpattiko, tassa pātimokkhaṃ ṭhapemi, na tasmiṃ sammukhībhūte pātimokkhaṃ uddisitabba’nti ṭhapitaṃ hoti pātimokkha’’nti.
তেন খো পন সমযেন ছব্বগ্গিযা ভিক্খূ ‘নাম্হে কোচি জানাতী’তি সাপত্তিকাৰ পাতিমোক্খং সুণন্তি। থেরা ভিক্খূ পরচিত্তৰিদুনো ভিক্খূনং আরোচেন্তি – ‘‘ইত্থন্নামো চ ইত্থন্নামো চ, আৰুসো, ছব্বগ্গিযা ভিক্খূ ‘নাম্হে কোচি জানাতী’তি সাপত্তিকাৰ পাতিমোক্খং সুণন্তী’’তি। অস্সোসুং খো ছব্বগ্গিযা ভিক্খূ – ‘‘থেরা কির ভিক্খূ পরচিত্তৰিদুনো অম্হে ভিক্খূনং আরোচেন্তি – ইত্থন্নামো চ ইত্থন্নামো চ, আৰুসো, ছব্বগ্গিযা ভিক্খূ ‘নাম্হে কোচি জানাতী’তি সাপত্তিকাৰ পাতিমোক্খং সুণন্তী’’তি।
Tena kho pana samayena chabbaggiyā bhikkhū ‘nāmhe koci jānātī’ti sāpattikāva pātimokkhaṃ suṇanti. Therā bhikkhū paracittaviduno bhikkhūnaṃ ārocenti – ‘‘itthannāmo ca itthannāmo ca, āvuso, chabbaggiyā bhikkhū ‘nāmhe koci jānātī’ti sāpattikāva pātimokkhaṃ suṇantī’’ti. Assosuṃ kho chabbaggiyā bhikkhū – ‘‘therā kira bhikkhū paracittaviduno amhe bhikkhūnaṃ ārocenti – itthannāmo ca itthannāmo ca, āvuso, chabbaggiyā bhikkhū ‘nāmhe koci jānātī’ti sāpattikāva pātimokkhaṃ suṇantī’’ti.
তে – পুরম্হাকং পেসলা ভিক্খূ পাতিমোক্খং ঠপেন্তীতি – পটিকচ্চেৰ সুদ্ধানং ভিক্খূনং অনাপত্তিকানং অৰত্থুস্মিং অকারণে পাতিমোক্খং ঠপেন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ সুদ্ধানং ভিক্খূনং অনাপত্তিকানং অৰত্থুস্মিং অকারণে পাতিমোক্খং ঠপেস্সন্তী’’তি! অথ খো তে ভিক্খূ ভগৰতো এতমত্থং আরোচেসুং…পে॰… ‘‘সচ্চং কির, ভিক্খৰে, ছব্বগ্গিযা ভিক্খূ সুদ্ধানং ভিক্খূনং অনাপত্তিকানং অৰত্থুস্মিং অকারণে পাতিমোক্খং ঠপেন্তী’’তি? ‘‘সচ্চং ভগৰা’’তি…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, সুদ্ধানং ভিক্খূনং অনাপত্তিকানং অৰত্থুস্মিং অকারণে পাতিমোক্খং ঠপেতব্বং। যো ঠপেয্য, আপত্তি দুক্কটস্স’’।
Te – puramhākaṃ pesalā bhikkhū pātimokkhaṃ ṭhapentīti – paṭikacceva suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapessantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapentī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, suddhānaṃ bhikkhūnaṃ anāpattikānaṃ avatthusmiṃ akāraṇe pātimokkhaṃ ṭhapetabbaṃ. Yo ṭhapeyya, āpatti dukkaṭassa’’.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / পাতিমোক্খসৰনারহকথা • Pātimokkhasavanārahakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পাতিমোক্খসৰনারহকথাৰণ্ণনা • Pātimokkhasavanārahakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পাতিমোক্খসৰনারহকথাদিৰণ্ণনা • Pātimokkhasavanārahakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. পাতিমোক্খসৰনারহকথা • 4. Pātimokkhasavanārahakathā
