| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৮৩. পাতিমোক্খুদ্দেসকঅজ্ঝেসনাদি
83. Pātimokkhuddesakaajjhesanādi
১৫৫. অথ খো ভগৰা রাজগহে যথাভিরন্তং ৰিহরিত্ৰা যেন চোদনাৰত্থু তেন চারিকং পক্কামি। অনুপুব্বেন চারিকং চরমানো যেন চোদনাৰত্থু তদৰসরি। তেন খো পন সমযেন অঞ্ঞতরস্মিং আৰাসে সম্বহুলা ভিক্খূ ৰিহরন্তি । তত্থ থেরো ভিক্খু বালো হোতি অব্যত্তো। সো ন জানাতি উপোসথং ৰা উপোসথকম্মং ৰা, পাতিমোক্খং ৰা পাতিমোক্খুদ্দেসং ৰা। অথ খো তেসং ভিক্খূনং এতদহোসি – ‘‘ভগৰতা পঞ্ঞত্তং ‘থেরাধিকং পাতিমোক্খ’ন্তি, অযঞ্চ অম্হাকং থেরো বালো অব্যত্তো, ন জানাতি উপোসথং ৰা উপোসথকম্মং ৰা, পাতিমোক্খং ৰা পাতিমোক্খুদ্দেসং ৰা। কথং নু খো অম্হেহি পটিপজ্জিতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, যো তত্থ ভিক্খু ব্যত্তো পটিবলো তস্সাধেয্যং পাতিমোক্খন্তি।
155. Atha kho bhagavā rājagahe yathābhirantaṃ viharitvā yena codanāvatthu tena cārikaṃ pakkāmi. Anupubbena cārikaṃ caramāno yena codanāvatthu tadavasari. Tena kho pana samayena aññatarasmiṃ āvāse sambahulā bhikkhū viharanti . Tattha thero bhikkhu bālo hoti abyatto. So na jānāti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Atha kho tesaṃ bhikkhūnaṃ etadahosi – ‘‘bhagavatā paññattaṃ ‘therādhikaṃ pātimokkha’nti, ayañca amhākaṃ thero bālo abyatto, na jānāti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Kathaṃ nu kho amhehi paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, yo tattha bhikkhu byatto paṭibalo tassādheyyaṃ pātimokkhanti.
তেন খো পন সমযেন অঞ্ঞতরস্মিং আৰাসে তদহুপোসথে সম্বহুলা ভিক্খূ ৰিহরন্তি বালা অব্যত্তা। তে ন জানন্তি উপোসথং ৰা উপোসথকম্মং ৰা, পাতিমোক্খং ৰা পাতিমোক্খুদ্দেসং ৰা। তে থেরং অজ্ঝেসিংসু – ‘‘উদ্দিসতু, ভন্তে, থেরো পাতিমোক্খ’’ন্তি। সো এৰমাহ – ‘‘ন মে, আৰুসো, ৰত্ততী’’তি। দুতিযং থেরং অজ্ঝেসিংসু – ‘‘উদ্দিসতু, ভন্তে, থেরো পাতিমোক্খ’’ন্তি। সোপি এৰমাহ – ‘‘ন মে, আৰুসো, ৰত্ততী’’তি। ততিযং থেরং অজ্ঝেসিংসু – ‘‘উদ্দিসতু , ভন্তে, থেরো পাতিমোক্খ’’ন্তি। সোপি এৰমাহ – ‘‘ন মে, আৰুসো, ৰত্ততী’’তি। এতেনেৰ উপাযেন যাৰ সঙ্ঘনৰকং অজ্ঝেসিংসু – ‘‘উদ্দিসতু আযস্মা পাতিমোক্খ’’ন্তি। সোপি এৰমাহ – ‘‘ন মে, ভন্তে, ৰত্ততী’’তি। ভগৰতো এতমত্থং আরোচেসুং।
Tena kho pana samayena aññatarasmiṃ āvāse tadahuposathe sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Te theraṃ ajjhesiṃsu – ‘‘uddisatu, bhante, thero pātimokkha’’nti. So evamāha – ‘‘na me, āvuso, vattatī’’ti. Dutiyaṃ theraṃ ajjhesiṃsu – ‘‘uddisatu, bhante, thero pātimokkha’’nti. Sopi evamāha – ‘‘na me, āvuso, vattatī’’ti. Tatiyaṃ theraṃ ajjhesiṃsu – ‘‘uddisatu , bhante, thero pātimokkha’’nti. Sopi evamāha – ‘‘na me, āvuso, vattatī’’ti. Eteneva upāyena yāva saṅghanavakaṃ ajjhesiṃsu – ‘‘uddisatu āyasmā pātimokkha’’nti. Sopi evamāha – ‘‘na me, bhante, vattatī’’ti. Bhagavato etamatthaṃ ārocesuṃ.
ইধ পন, ভিক্খৰে, অঞ্ঞতরস্মিং আৰাসে তদহুপোসথে সম্বহুলা ভিক্খূ ৰিহরন্তি বালা অব্যত্তা। তে ন জানন্তি উপোসথং ৰা উপোসথকম্মং ৰা, পাতিমোক্খং ৰা পাতিমোক্খুদ্দেসং ৰা। তে থেরং অজ্ঝেসন্তি – ‘‘উদ্দিসতু, ভন্তে, থেরো পাতিমোক্খ’’ন্তি। সো এৰং ৰদেতি – ‘‘ন মে, আৰুসো, ৰত্ততী’’তি। দুতিযং থেরং অজ্ঝেসন্তি – ‘‘উদ্দিসতু, ভন্তে, থেরো পাতিমোক্খ’’ন্তি। সোপি এৰং ৰদেতি – ‘‘ন মে, আৰুসো, ৰত্ততী’’তি। ততিযং থেরং অজ্ঝেসন্তি – ‘‘উদ্দিসতু, ভন্তে, থেরো পাতিমোক্খ’’ন্তি। সোপি এৰং ৰদেতি – ‘‘ন মে, আৰুসো, ৰত্ততী’’তি। এতেনেৰ উপাযেন যাৰ সঙ্ঘনৰকং অজ্ঝেসন্তি – ‘‘উদ্দিসতু আযস্মা পাতিমোক্খ’’ন্তি। সোপি এৰং ৰদেতি – ‘‘ন মে, ভন্তে, ৰত্ততী’’তি। তেহি, ভিক্খৰে, ভিক্খূহি একো ভিক্খু সামন্তা আৰাসা সজ্জুকং পাহেতব্বো – গচ্ছাৰুসো, সংখিত্তেন ৰা ৰিত্থারেন ৰা পাতিমোক্খং পরিযাপুণিত্ৰান আগচ্ছাহীতি।
Idha pana, bhikkhave, aññatarasmiṃ āvāse tadahuposathe sambahulā bhikkhū viharanti bālā abyattā. Te na jānanti uposathaṃ vā uposathakammaṃ vā, pātimokkhaṃ vā pātimokkhuddesaṃ vā. Te theraṃ ajjhesanti – ‘‘uddisatu, bhante, thero pātimokkha’’nti. So evaṃ vadeti – ‘‘na me, āvuso, vattatī’’ti. Dutiyaṃ theraṃ ajjhesanti – ‘‘uddisatu, bhante, thero pātimokkha’’nti. Sopi evaṃ vadeti – ‘‘na me, āvuso, vattatī’’ti. Tatiyaṃ theraṃ ajjhesanti – ‘‘uddisatu, bhante, thero pātimokkha’’nti. Sopi evaṃ vadeti – ‘‘na me, āvuso, vattatī’’ti. Eteneva upāyena yāva saṅghanavakaṃ ajjhesanti – ‘‘uddisatu āyasmā pātimokkha’’nti. Sopi evaṃ vadeti – ‘‘na me, bhante, vattatī’’ti. Tehi, bhikkhave, bhikkhūhi eko bhikkhu sāmantā āvāsā sajjukaṃ pāhetabbo – gacchāvuso, saṃkhittena vā vitthārena vā pātimokkhaṃ pariyāpuṇitvāna āgacchāhīti.
অথ খো ভিক্খূনং এতদহোসি – ‘‘কেন নু খো পাহেতব্বো’’তি? ভগৰতো এতমত্থং আরোচেসুং। অনুজানামি, ভিক্খৰে, থেরেন ভিক্খুনা নৰং ভিক্খুং আণাপেতুন্তি। থেরেন আণত্তা নৰা ভিক্খূ ন গচ্ছন্তি। ভগৰতো এতমত্থং আরোচেসুং। ন, ভিক্খৰে, থেরেন আণত্তেন অগিলানেন ন গন্তব্বং। যো ন গচ্ছেয্য, আপত্তি দুক্কটস্সাতি।
Atha kho bhikkhūnaṃ etadahosi – ‘‘kena nu kho pāhetabbo’’ti? Bhagavato etamatthaṃ ārocesuṃ. Anujānāmi, bhikkhave, therena bhikkhunā navaṃ bhikkhuṃ āṇāpetunti. Therena āṇattā navā bhikkhū na gacchanti. Bhagavato etamatthaṃ ārocesuṃ. Na, bhikkhave, therena āṇattena agilānena na gantabbaṃ. Yo na gaccheyya, āpatti dukkaṭassāti.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অধম্মকম্মপটিক্কোসনাদিকথা • Adhammakammapaṭikkosanādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পাতিমোক্খুদ্দেসকঅজ্ঝেসনাদিকথাৰণ্ণনা • Pātimokkhuddesakaajjhesanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পাতিমোক্খুদ্দেসকঅজ্ঝেসনাদিকথাৰণ্ণনা • Pātimokkhuddesakaajjhesanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধম্মকম্মপটিক্কোসনাদিকথাৰণ্ণনা • Adhammakammapaṭikkosanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮৩. পাতিমোক্খুদ্দেসকঅজ্ঝেসনাদিকথা • 83. Pātimokkhuddesakaajjhesanādikathā
