பாதிமொக்கு²த்³தே³ஸகதா²

150. நிதா³னங் உத்³தி³ஸித்வா அவஸேஸங் ஸுதேன ஸாவேதப்³ப³ந்தி ‘‘ஸுணாது மே ப⁴ந்தே ஸங்கோ⁴…பே॰… ஆவிகதா ஹிஸ்ஸ பா²ஸு ஹோதீ’’தி இமங் நிதா³னங் உத்³தி³ஸித்வா ‘‘உத்³தி³ட்ட²ங் கோ² ஆயஸ்மந்தோ நிதா³னங், தத்தா²யஸ்மந்தே புச்சா²மி – கச்சித்த² பரிஸுத்³தா⁴, து³தியம்பி புச்சா²மி…பே॰… ஏவமேதங் தா⁴ரயாமீதி. ஸுதா கோ² பனாயஸ்மந்தேஹி சத்தாரோ பாராஜிகா த⁴ம்மா…பே॰… அவிவத³மானேஹி ஸிக்கி²தப்³ப³’’ந்தி ஏவங் அவஸேஸங் ஸுதேன ஸாவேதப்³ப³ங். ஏதேன நயேன ஸேஸாபி சத்தாரோ பாதிமொக்கு²த்³தே³ஸா வேதி³தப்³பா³.

ஸவரப⁴யந்தி அடவிமனுஸ்ஸப⁴யங். ராஜந்தராயோதிஆதீ³ஸு ஸசே பி⁴க்கூ²ஸு ‘‘உபோஸத²ங் கரிஸ்ஸாமா’’தி நிஸின்னேஸு ராஜா ஆக³ச்ச²தி, அயங் ராஜந்தராயோ. சோரா ஆக³ச்ச²ந்தி, அயங் சோரந்தராயோ. த³வதா³ஹோ வா ஆக³ச்ச²தி, ஆவாஸே வா அக்³கி³ உட்ட²ஹதி, அயங் அக்³க³ந்தராயோ. மேகோ⁴ வா உட்டே²தி, ஓகோ⁴ வா ஆக³ச்ச²தி, அயங் உத³கந்தராயோ. ப³ஹூ மனுஸ்ஸா ஆக³ச்ச²ந்தி, அயங் மனுஸ்ஸந்தராயோ. பி⁴க்கு²ங் யக்கோ² க³ண்ஹாதி, அயங் அமனுஸ்ஸந்தராயோ. ப்³யக்³கா⁴த³யோ சண்ட³மிகா³ ஆக³ச்ச²ந்தி, அயங் வாளந்தராயோ. பி⁴க்கு²ங் ஸப்பாத³யோ ட³ங்ஸந்தி, அயங் ஸரீஸபந்தராயோ. பி⁴க்கு² கி³லானோ வா ஹோதி, காலங் வா கரோதி, வேரினோ வா தங் மாரேதுகாமா க³ண்ஹந்தி, அயங் ஜீவிதந்தராயோ. மனுஸ்ஸா ஏகங் வா ப³ஹூ வா பி⁴க்கூ² ப்³ரஹ்மசரியா சாவேதுகாமா க³ண்ஹந்தி, அயங் ப்³ரஹ்மசரியந்தராயோ. ஏவரூபேஸு அந்தராயேஸு ஸங்கி²த்தேன பாதிமொக்கோ² உத்³தி³ஸிதப்³போ³ , பட²மோ வா உத்³தே³ஸோ உத்³தி³ஸிதப்³போ³, ஆதி³ம்ஹி த்³வே தயோ சத்தாரோ வா. எத்த² ச து³தியாதீ³ஸு உத்³தே³ஸேஸு யஸ்மிங் அபரியோஸிதே அந்தராயோ ஹோதி, ஸோபி ஸுதேனேவ ஸாவேதப்³போ³.

அனஜ்ஜி²ட்டா²தி அனாணத்தா அயாசிதா வா. அஜ்ஜே²ஸனா செத்த² ஸங்கே⁴ன ஸம்மதத⁴ம்மஜ்ஜே²ஸகாயத்தா வா ஸங்க⁴த்தே²ராயத்தா வா, தஸ்மிங் த⁴ம்மஜ்ஜே²ஸகே அஸதி ஸங்க⁴த்தே²ரங் ஆபுச்சி²த்வா வா தேன யாசிதோ வா பா⁴ஸிதுங் லப⁴தி. ஸங்க⁴த்தே²ரேனாபி ஸசே விஹாரே ப³ஹூ த⁴ம்மகதி²கா ஹொந்தி, வாரபடிபாடியா வத்தப்³பா³ – ‘‘த்வங் த⁴ம்மங் ப⁴ண, த⁴ம்மங் கதே²ஹி, த⁴ம்மதா³னங் தே³ஹீ’’தி வா வுத்தேன தீஹிபி விதீ⁴ஹி த⁴ம்மோ பா⁴ஸிதப்³போ³. ‘‘ஓஸாரேஹீ’’தி வுத்தோ பன ஓஸாரேதுமேவ லப⁴தி, ‘‘கதே²ஹீ’’தி வுத்தோ கதே²துமேவ, ‘‘ஸரப⁴ஞ்ஞங் ப⁴ணாஹீ’’தி வுத்தோ ஸரப⁴ஞ்ஞமேவ. ஸங்க⁴த்தே²ரோபி ச உச்சதரே ஆஸனே நிஸின்னோ யாசிதுங் ந லப⁴தி. ஸசே உபஜ்ஜா²யோ சேவ ஸத்³தி⁴விஹாரிகோ ச ஹொந்தி, உபஜ்ஜா²யோ ச நங் உச்சாஸனே நிஸின்னோ ‘‘ப⁴ணாஹீ’’தி வத³தி, ஸஜ்ஜா²யங் அதி⁴ட்ட²ஹித்வா ப⁴ணிதப்³ப³ங். ஸசே பனெத்த² த³ஹரா பி⁴க்கூ² ஹொந்தி, தேஸங் ‘‘ப⁴ணாமீ’’தி ப⁴ணிதப்³ப³ங்.

ஸசே விஹாரே ஸங்க⁴த்தே²ரோ அத்தனோயேவ நிஸ்ஸிதகே ப⁴ணாபேதி, அஞ்ஞே மது⁴ரபா⁴ணகேபி நாஜ்ஜே²ஸதி, ஸோ அஞ்ஞேஹி வத்தப்³போ³ – ‘‘ப⁴ந்தே அஸுகங் நாம ப⁴ணாபேமா’’தி. ஸசே ‘‘ப⁴ணாபேதா²’’தி வா வத³தி, துண்ஹீ வா ஹோதி, ப⁴ணாபேதுங் வட்டதி. ஸசே பன படிபா³ஹதி, ந ப⁴ணாபேதப்³ப³ங். யதி³ அனாக³தேயேவ ஸங்க⁴த்தே²ரே த⁴ம்மஸவனங் ஆரத்³த⁴ங், புன ஆக³தே ட²பெத்வா ஆபுச்ச²னகிச்சங் நத்தி². ஓஸாரெத்வா பன கதெ²ந்தேன ஆபுச்சி²த்வா வா அட்ட²பெத்வாயேவ வா கதே²தப்³ப³ங், கதெ²ந்தஸ்ஸ புன ஆக³தேபி ஏஸேவ நயோ.

உபனிஸின்னகதா²யபி ஸங்க⁴த்தே²ரோவ ஸாமீ, தஸ்மா தேன ஸயங் வா கதே²தப்³ப³ங், அஞ்ஞோ வா பி⁴க்கு² ‘‘கதே²ஹீ’’தி வத்தப்³போ³, நோ ச கோ² உச்சதரே ஆஸனே நிஸின்னேன. மனுஸ்ஸானங் பன ‘‘ப⁴ணாஹீ’’தி வத்துங் வட்டதி. மனுஸ்ஸா அத்தனோ ஜானநகபி⁴க்கு²ங் ஆபுச்ச²ந்தி, தேன தே²ரங் ஆபுச்சி²த்வா கதே²தப்³ப³ங். ஸசே ஸங்க⁴த்தே²ரோ ‘‘ப⁴ந்தே இமே பஞ்ஹங் புச்ச²ந்தீ’’தி புட்டோ² ‘‘கதே²ஹீ’’தி வா ப⁴ணதி, துண்ஹீ வா ஹோதி, கதே²துங் வட்டதி. அந்தரக⁴ரே அனுமோத³னாதீ³ஸுபி ஏஸேவ நயோ. ஸசே ஸங்க⁴த்தே²ரோ விஹாரே வா அந்தரக⁴ரே வா ‘‘மங் அனாபுச்சி²த்வாபி கதெ²ய்யாஸீ’’தி அனுஜானாதி, லத்³த⁴கப்பியங் ஹோதி, ஸப்³ப³த்த² வத்துங் வட்டதி.

ஸஜ்ஜா²யங் கரொந்தேனாபி தே²ரோ ஆபுச்சி²தப்³போ³யேவ. ஏகங் ஆபுச்சி²த்வா ஸஜ்ஜா²யந்தஸ்ஸ அபரோ ஆக³ச்ச²தி, புன ஆபுச்ச²னகிச்சங் நத்தி². ஸசே விஸ்ஸமிஸ்ஸாமீதி ட²பிதஸ்ஸ ஆக³ச்ச²தி, புன ஆரப⁴ந்தேனாபி ஆபுச்சி²தப்³ப³ங். ஸங்க⁴த்தே²ரே அனாக³தேயேவ ஆரத்³த⁴ங் ஸஜ்ஜா²யந்தஸ்ஸாபி ஏஸேவ நயோ. ஏகேன ஸங்க⁴த்தே²ரேன ‘‘மங் அனாபுச்சா²பி யதா²ஸுக²ங் ஸஜ்ஜா²யாஹீ’’தி அனுஞ்ஞாதே யதா²ஸுக²ங் ஸஜ்ஜா²யிதுங் வட்டதி. அஞ்ஞஸ்மிங் பன ஆக³தே தங் ஆபுச்சி²த்வாவ ஸஜ்ஜா²யிதப்³ப³ங்.

151. அத்தனா வா அத்தானங் ஸம்மன்னிதப்³ப³ங்தி அத்தனா வா அத்தா ஸம்மன்னிதப்³போ³; புச்ச²ந்தேன பன பரிஸங் ஓலோகெத்வா ஸசே அத்தனோ உபத்³த³வோ நத்தி², வினயோ புச்சி²தப்³போ³.

153. கதேபி ஓகாஸே புக்³க³லங் துலயித்வாதி ‘‘அத்தி² நு கோ² மே இதோ உபத்³த³வோ, நத்தீ²’’தி ஏவங் உபபரிக்கி²த்வா. புரம்ஹாகந்தி பட²மங் அம்ஹாகங். படிகச்சேவாதி பட²மதரமேவ. புக்³க³லங் துலயித்வா ஓகாஸங் காதுந்தி ‘‘பூ⁴தமேவ நு கோ² ஆபத்திங் வத³தி, அபூ⁴த’’ந்தி ஏவங் உபபரிக்கி²த்வா ஓகாஸங் காதுங் அனுஜானாமீதி அத்தோ².