| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၆၉. ပာတိမောက္ခုဒ္ဒေသာနုဇာနနာ
69. Pātimokkhuddesānujānanā
၁၃၃. အထ ခော ဘဂဝတော ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ‘‘ယံနူနာဟံ ယာနိ မယာ ဘိက္ခူနံ ပညတ္တာနိ သိက္ခာပဒာနိ, တာနိ နေသံ ပာတိမောက္ခုဒ္ဒေသံ အနုဇာနေယ္ယံ။ သော နေသံ ဘဝိသ္သတိ ဥပောသထကမ္မ’’န္တိ။ အထ ခော ဘဂဝာ သာယန္ဟသမယံ ပဋိသလ္လာနာ ဝုဋ္ဌိတော ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ဣဓ မယ္ဟံ, ဘိက္ခဝေ, ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ ‘ယံနူနာဟံ ယာနိ မယာ ဘိက္ခူနံ ပညတ္တာနိ သိက္ခာပဒာနိ, တာနိ နေသံ ပာတိမောက္ခုဒ္ဒေသံ အနုဇာနေယ္ယံ။ သော နေသံ ဘဝိသ္သတိ ဥပောသထကမ္မ’န္တိ။ အနုဇာနာမိ, ဘိက္ခဝေ, ပာတိမောက္ခံ ဥဒ္ဒိသိတုံ။ ဧဝဉ္စ ပန, ဘိက္ခဝေ, ဥဒ္ဒိသိတဗ္ဗံ။ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
133. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘yaṃnūnāhaṃ yāni mayā bhikkhūnaṃ paññattāni sikkhāpadāni, tāni nesaṃ pātimokkhuddesaṃ anujāneyyaṃ. So nesaṃ bhavissati uposathakamma’’nti. Atha kho bhagavā sāyanhasamayaṃ paṭisallānā vuṭṭhito etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – idha mayhaṃ, bhikkhave, rahogatassa paṭisallīnassa evaṃ cetaso parivitakko udapādi ‘yaṃnūnāhaṃ yāni mayā bhikkhūnaṃ paññattāni sikkhāpadāni, tāni nesaṃ pātimokkhuddesaṃ anujāneyyaṃ. So nesaṃ bhavissati uposathakamma’nti. Anujānāmi, bhikkhave, pātimokkhaṃ uddisituṃ. Evañca pana, bhikkhave, uddisitabbaṃ. Byattena bhikkhunā paṭibalena saṅgho ñāpetabbo –
၁၃၄. ‘‘သုဏာတု မေ, ဘန္တေ, သင္ဃော။ ယဒိ သင္ဃသ္သ ပတ္တကလ္လံ, သင္ဃော ဥပောသထံ ကရေယ္ယ, ပာတိမောက္ခံ ဥဒ္ဒိသေယ္ယ။ ကိံ သင္ဃသ္သ ပုဗ္ဗကိစ္စံ? ပာရိသုဒ္ဓိံ အာယသ္မန္တော အာရောစေထ ။ ပာတိမောက္ခံ ဥဒ္ဒိသိသ္သာမိ။ တံ သဗ္ဗေဝ သန္တာ သာဓုကံ သုဏောမ မနသိ ကရောမ။ ယသ္သ သိယာ အာပတ္တိ , သော အာဝိကရေယ္ယ။ အသန္တိယာ အာပတ္တိယာ တုဏ္ဟီ ဘဝိတဗ္ဗံ။ တုဏ္ဟီဘာဝေန ခော ပနာယသ္မန္တေ ပရိသုဒ္ဓာတိ ဝေဒိသ္သာမိ။ ယထာ ခော ပန ပစ္စေကပုဋ္ဌသ္သ ဝေယ္ယာကရဏံ ဟောတိ, ဧဝမေဝံ 1 ဧဝရူပာယ ပရိသာယ ယာဝတတိယံ အနုသ္သာဝိတံ ဟောတိ။ ယော ပန ဘိက္ခု ယာဝတတိယံ အနုသ္သာဝိယမာနေ သရမာနော သန္တိံ အာပတ္တိံ နာဝိကရေယ္ယ, သမ္ပဇာနမုသာဝာဒသ္သ ဟောတိ။ သမ္ပဇာနမုသာဝာဒော ခော ပနာယသ္မန္တော အန္တရာယိကော ဓမ္မော ဝုတ္တော ဘဂဝတာ။ တသ္မာ, သရမာနေန ဘိက္ခုနာ အာပန္နေန ဝိသုဒ္ဓာပေက္ခေန သန္တီ အာပတ္တိ အာဝိကာတဗ္ဗာ; အာဝိကတာ ဟိသ္သ ဖာသု ဟောတီ’’တိ။
134. ‘‘Suṇātu me, bhante, saṅgho. Yadi saṅghassa pattakallaṃ, saṅgho uposathaṃ kareyya, pātimokkhaṃ uddiseyya. Kiṃ saṅghassa pubbakiccaṃ? Pārisuddhiṃ āyasmanto ārocetha . Pātimokkhaṃ uddisissāmi. Taṃ sabbeva santā sādhukaṃ suṇoma manasi karoma. Yassa siyā āpatti , so āvikareyya. Asantiyā āpattiyā tuṇhī bhavitabbaṃ. Tuṇhībhāvena kho panāyasmante parisuddhāti vedissāmi. Yathā kho pana paccekapuṭṭhassa veyyākaraṇaṃ hoti, evamevaṃ 2 evarūpāya parisāya yāvatatiyaṃ anussāvitaṃ hoti. Yo pana bhikkhu yāvatatiyaṃ anussāviyamāne saramāno santiṃ āpattiṃ nāvikareyya, sampajānamusāvādassa hoti. Sampajānamusāvādo kho panāyasmanto antarāyiko dhammo vutto bhagavatā. Tasmā, saramānena bhikkhunā āpannena visuddhāpekkhena santī āpatti āvikātabbā; āvikatā hissa phāsu hotī’’ti.
၁၃၅. ပာတိမောက္ခန္တိ အာဒိမေတံ မုခမေတံ ပမုခမေတံ ကုသလာနံ ဓမ္မာနံ။ တေန ဝုစ္စတိ ပာတိမောက္ခန္တိ။ အာယသ္မန္တောတိ ပိယဝစနမေတံ ဂရုဝစနမေတံ သဂာရဝသပ္ပတိသ္သာဓိဝစနမေတံ အာယသ္မန္တောတိ။ ဥဒ္ဒိသိသ္သာမီတိ အာစိက္ခိသ္သာမိ ဒေသေသ္သာမိ ပညပေသ္သာမိ ပဋ္ဌပေသ္သာမိ ဝိဝရိသ္သာမိ ဝိဘဇိသ္သာမိ ဥတ္တာနိံ ကရိသ္သာမိ 3 ပကာသေသ္သာမိ။ တန္တိ ပာတိမောက္ခံ ဝုစ္စတိ။ သဗ္ဗေဝ သန္တာတိ ယာဝတိကာ တသ္သာ ပရိသာယ ထေရာ စ နဝာ စ မဇ္ဈိမာ စ, ဧတေ ဝုစ္စန္တိ သဗ္ဗေဝ သန္တာတိ။ သာဓုကံ သုဏောမာတိ အဋ္ဌိံ ကတ္ဝာ မနသိ ကတ္ဝာ သဗ္ဗစေတသာ 4 သမန္နာဟရာမ။ မနသိ ကရောမာတိ ဧကဂ္ဂစိတ္တာ အဝိက္ခိတ္တစိတ္တာ အဝိသာဟဋစိတ္တာ နိသာမေမ။ ယသ္သ သိယာ အာပတ္တီတိ ထေရသ္သ ဝာ နဝသ္သ ဝာ မဇ္ဈိမသ္သ ဝာ, ပဉ္စန္နံ ဝာ အာပတ္တိက္ခန္ဓာနံ အညတရာ အာပတ္တိ, သတ္တန္နံ ဝာ အာပတ္တိက္ခန္ဓာနံ အညတရာ အာပတ္တိ။ သော အာဝိကရေယ္ယာတိ သော ဒေသေယ္ယ, သော ဝိဝရေယ္ယ, သော ဥတ္တာနိံ ကရေယ္ယ, သော ပကာသေယ္ယ သင္ဃမဇ္ဈေ ဝာ ဂဏမဇ္ဈေ ဝာ ဧကပုဂ္ဂလေ ဝာ။ အသန္တီ နာမ အာပတ္တိ အနဇ္ဈာပန္နာ ဝာ ဟောတိ, အာပဇ္ဇိတ္ဝာ ဝာ ဝုဋ္ဌိတာ။ တုဏ္ဟီ ဘဝိတဗ္ဗန္တိ အဓိဝာသေတဗ္ဗံ န ဗ္ယာဟရိတဗ္ဗံ။ ပရိသုဒ္ဓာတိ ဝေဒိသ္သာမီတိ ဇာနိသ္သာမိ ဓာရေသ္သာမိ။ ယထာ ခော ပန ပစ္စေကပုဋ္ဌသ္သ ဝေယ္ယာကရဏံ ဟောတီတိ ယထာ ဧကေန ဧကော ပုဋ္ဌော ဗ္ယာကရေယ္ယ, ဧဝမေဝ တသ္သာ ပရိသာယ ဇာနိတဗ္ဗံ မံ ပုစ္ဆတီတိ။ ဧဝရူပာ နာမ ပရိသာ ဘိက္ခုပရိသာ ဝုစ္စတိ။ ယာဝတတိယံ အနုသ္သာဝိတံ ဟောတီတိ သကိမ္ပိ အနုသ္သာဝိတံ ဟောတိ, ဒုတိယမ္ပိ အနုသ္သာဝိတံ ဟောတိ, တတိယမ္ပိ အနုသ္သာဝိတံ ဟောတိ။ သရမာနောတိ ဇာနမာနော သဉ္ဇာနမာနော။ သန္တီ နာမ အာပတ္တိ အဇ္ဈာပန္နာ ဝာ ဟောတိ, အာပဇ္ဇိတ္ဝာ ဝာ အဝုဋ္ဌိတာ။ နာဝိကရေယ္ယာတိ န ဒေသေယ္ယ, န ဝိဝရေယ္ယ, န ဥတ္တာနိံ ကရေယ္ယ, န ပကာသေယ္ယ သင္ဃမဇ္ဈေ ဝာ ဂဏမဇ္ဈေ ဝာ ဧကပုဂ္ဂလေ ဝာ။ သမ္ပဇာနမုသာဝာဒသ္သ ဟောတီတိ။ သမ္ပဇာနမုသာဝာဒေ ကိံ ဟောတိ? ဒုက္ကဋံ ဟောတိ။ အန္တရာယိကော ဓမ္မော ဝုတ္တော ဘဂဝတာတိ။ ကိသ္သ အန္တရာယိကော? ပဌမသ္သ ဈာနသ္သ အဓိဂမာယ အန္တရာယိကော, ဒုတိယသ္သ ဈာနသ္သ အဓိဂမာယ အန္တရာယိကော, တတိယသ္သ ဈာနသ္သ အဓိဂမာယ အန္တရာယိကော, စတုတ္ထသ္သ ဈာနသ္သ အဓိဂမာယ အန္တရာယိကော, ဈာနာနံ ဝိမောက္ခာနံ သမာဓီနံ သမာပတ္တီနံ နေက္ခမ္မာနံ နိသ္သရဏာနံ ပဝိဝေကာနံ ကုသလာနံ ဓမ္မာနံ အဓိဂမာယ အန္တရာယိကော။ တသ္မာတိ တင္ကာရဏာ။ သရမာနေနာတိ ဇာနမာနေန သဉ္ဇာနမာနေန။ ဝိသုဒ္ဓာပေက္ခေနာတိ ဝုဋ္ဌာတုကာမေန ဝိသုဇ္ဈိတုကာမေန။ သန္တီ နာမ အာပတ္တိ အဇ္ဈာပန္နာ ဝာ ဟောတိ, အာပဇ္ဇိတ္ဝာ ဝာ အဝုဋ္ဌိတာ။ အာဝိကာတဗ္ဗာတိ အာဝိကာတဗ္ဗာ သင္ဃမဇ္ဈေ ဝာ ဂဏမဇ္ဈေ ဝာ ဧကပုဂ္ဂလေ ဝာ။ အာဝိကတာ ဟိသ္သ ဖာသု ဟောတီတိ။ ကိသ္သ ဖာသု ဟောတိ? ပဌမသ္သ ဈာနသ္သ အဓိဂမာယ ဖာသု ဟောတိ, ဒုတိယသ္သ ဈာနသ္သ အဓိဂမာယ ဖာသု ဟောတိ, တတိယသ္သ ဈာနသ္သ အဓိဂမာယ ဖာသု ဟောတိ, စတုတ္ထသ္သ ဈာနသ္သ အဓိဂမာယ ဖာသု ဟောတိ, ဈာနာနံ ဝိမောက္ခာနံ သမာဓီနံ သမာပတ္တီနံ နေက္ခမ္မာနံ နိသ္သရဏာနံ ပဝိဝေကာနံ ကုသလာနံ ဓမ္မာနံ အဓိဂမာယ ဖာသု ဟောတီတိ။
135.Pātimokkhanti ādimetaṃ mukhametaṃ pamukhametaṃ kusalānaṃ dhammānaṃ. Tena vuccati pātimokkhanti. Āyasmantoti piyavacanametaṃ garuvacanametaṃ sagāravasappatissādhivacanametaṃ āyasmantoti. Uddisissāmīti ācikkhissāmi desessāmi paññapessāmi paṭṭhapessāmi vivarissāmi vibhajissāmi uttāniṃ karissāmi 5 pakāsessāmi. Tanti pātimokkhaṃ vuccati. Sabbeva santāti yāvatikā tassā parisāya therā ca navā ca majjhimā ca, ete vuccanti sabbeva santāti. Sādhukaṃ suṇomāti aṭṭhiṃ katvā manasi katvā sabbacetasā 6 samannāharāma. Manasi karomāti ekaggacittā avikkhittacittā avisāhaṭacittā nisāmema. Yassa siyā āpattīti therassa vā navassa vā majjhimassa vā, pañcannaṃ vā āpattikkhandhānaṃ aññatarā āpatti, sattannaṃ vā āpattikkhandhānaṃ aññatarā āpatti. So āvikareyyāti so deseyya, so vivareyya, so uttāniṃ kareyya, so pakāseyya saṅghamajjhe vā gaṇamajjhe vā ekapuggale vā. Asantī nāma āpatti anajjhāpannā vā hoti, āpajjitvā vā vuṭṭhitā. Tuṇhī bhavitabbanti adhivāsetabbaṃ na byāharitabbaṃ. Parisuddhāti vedissāmīti jānissāmi dhāressāmi. Yathā kho pana paccekapuṭṭhassa veyyākaraṇaṃ hotīti yathā ekena eko puṭṭho byākareyya, evameva tassā parisāya jānitabbaṃ maṃ pucchatīti. Evarūpā nāma parisā bhikkhuparisā vuccati. Yāvatatiyaṃ anussāvitaṃ hotīti sakimpi anussāvitaṃ hoti, dutiyampi anussāvitaṃ hoti, tatiyampi anussāvitaṃ hoti. Saramānoti jānamāno sañjānamāno. Santī nāma āpatti ajjhāpannā vā hoti, āpajjitvā vā avuṭṭhitā. Nāvikareyyāti na deseyya, na vivareyya, na uttāniṃ kareyya, na pakāseyya saṅghamajjhe vā gaṇamajjhe vā ekapuggale vā. Sampajānamusāvādassa hotīti. Sampajānamusāvāde kiṃ hoti? Dukkaṭaṃ hoti. Antarāyiko dhammo vutto bhagavatāti. Kissa antarāyiko? Paṭhamassa jhānassa adhigamāya antarāyiko, dutiyassa jhānassa adhigamāya antarāyiko, tatiyassa jhānassa adhigamāya antarāyiko, catutthassa jhānassa adhigamāya antarāyiko, jhānānaṃ vimokkhānaṃ samādhīnaṃ samāpattīnaṃ nekkhammānaṃ nissaraṇānaṃ pavivekānaṃ kusalānaṃ dhammānaṃ adhigamāya antarāyiko. Tasmāti taṅkāraṇā. Saramānenāti jānamānena sañjānamānena. Visuddhāpekkhenāti vuṭṭhātukāmena visujjhitukāmena. Santī nāma āpatti ajjhāpannā vā hoti, āpajjitvā vā avuṭṭhitā. Āvikātabbāti āvikātabbā saṅghamajjhe vā gaṇamajjhe vā ekapuggale vā. Āvikatā hissa phāsu hotīti. Kissa phāsu hoti? Paṭhamassa jhānassa adhigamāya phāsu hoti, dutiyassa jhānassa adhigamāya phāsu hoti, tatiyassa jhānassa adhigamāya phāsu hoti, catutthassa jhānassa adhigamāya phāsu hoti, jhānānaṃ vimokkhānaṃ samādhīnaṃ samāpattīnaṃ nekkhammānaṃ nissaraṇānaṃ pavivekānaṃ kusalānaṃ dhammānaṃ adhigamāya phāsu hotīti.
၁၃၆. တေန ခော ပန သမယေန ဘိက္ခူ – ဘဂဝတာ ပာတိမောက္ခုဒ္ဒေသော အနုညာတောတိ – ဒေဝသိကံ ပာတိမောက္ခံ ဥဒ္ဒိသန္တိ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, ဒေဝသိကံ ပာတိမောက္ခံ ဥဒ္ဒိသိတဗ္ဗံ။ ယော ဥဒ္ဒိသေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, ဥပောသထေ ပာတိမောက္ခံ ဥဒ္ဒိသိတုန္တိ။
136. Tena kho pana samayena bhikkhū – bhagavatā pātimokkhuddeso anuññātoti – devasikaṃ pātimokkhaṃ uddisanti. Bhagavato etamatthaṃ ārocesuṃ. Na, bhikkhave, devasikaṃ pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, uposathe pātimokkhaṃ uddisitunti.
တေန ခော ပန သမယေန ဘိက္ခူ – ဘဂဝတာ ဥပောသထေ ပာတိမောက္ခုဒ္ဒေသော အနုညာတောတိ – ပက္ခသ္သ တိက္ခတ္တုံ ပာတိမောက္ခံ ဥဒ္ဒိသန္တိ, စာတုဒ္ဒသေ ပန္နရသေ အဋ္ဌမိယာ စ ပက္ခသ္သ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, ပက္ခသ္သ တိက္ခတ္တုံ ပာတိမောက္ခံ ဥဒ္ဒိသိတဗ္ဗံ။ ယော ဥဒ္ဒိသေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, သကိံ ပက္ခသ္သ စာတုဒ္ဒသေ ဝာ ပန္နရသေ ဝာ ပာတိမောက္ခံ ဥဒ္ဒိသိတုန္တိ။
Tena kho pana samayena bhikkhū – bhagavatā uposathe pātimokkhuddeso anuññātoti – pakkhassa tikkhattuṃ pātimokkhaṃ uddisanti, cātuddase pannarase aṭṭhamiyā ca pakkhassa. Bhagavato etamatthaṃ ārocesuṃ. Na, bhikkhave, pakkhassa tikkhattuṃ pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, sakiṃ pakkhassa cātuddase vā pannarase vā pātimokkhaṃ uddisitunti.
တေန ခော ပန သမယေန ဆဗ္ဗဂ္ဂိယာ ဘိက္ခူ ယထာပရိသာယ ပာတိမောက္ခံ ဥဒ္ဒိသန္တိ သကာယ သကာယ ပရိသာယ။ ဘဂဝတော ဧတမတ္ထံ အာရောစေသုံ။ န, ဘိက္ခဝေ, ယထာပရိသာယ ပာတိမောက္ခံ ဥဒ္ဒိသိတဗ္ဗံ သကာယ သကာယ ပရိသာယ။ ယော ဥဒ္ဒိသေယ္ယ, အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, သမဂ္ဂာနံ ဥပောသထကမ္မန္တိ။
Tena kho pana samayena chabbaggiyā bhikkhū yathāparisāya pātimokkhaṃ uddisanti sakāya sakāya parisāya. Bhagavato etamatthaṃ ārocesuṃ. Na, bhikkhave, yathāparisāya pātimokkhaṃ uddisitabbaṃ sakāya sakāya parisāya. Yo uddiseyya, āpatti dukkaṭassa. Anujānāmi, bhikkhave, samaggānaṃ uposathakammanti.
အထ ခော ဘိက္ခူနံ ဧတဒဟောသိ – ‘‘ဘဂဝတာ ပညတ္တံ ‘သမဂ္ဂာနံ ဥပောသထကမ္မ’န္တိ။ ကိတ္တာဝတာ နု ခော သာမဂ္ဂီ ဟောတိ, ယာဝတာ ဧကာဝာသော, ဥဒာဟု သဗ္ဗာ ပထဝီ’’တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဧတ္တာဝတာ သာမဂ္ဂီ ယာဝတာ ဧကာဝာသောတိ။
Atha kho bhikkhūnaṃ etadahosi – ‘‘bhagavatā paññattaṃ ‘samaggānaṃ uposathakamma’nti. Kittāvatā nu kho sāmaggī hoti, yāvatā ekāvāso, udāhu sabbā pathavī’’ti? Bhagavato etamatthaṃ ārocesuṃ. Anujānāmi, bhikkhave, ettāvatā sāmaggī yāvatā ekāvāsoti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / သန္နိပာတာနုဇာနနာဒိကထာ • Sannipātānujānanādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သန္နိပာတာနုဇာနနာဒိကထာဝဏ္ဏနာ • Sannipātānujānanādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သန္နိပာတာနုဇာနနာဒိကထာဝဏ္ဏနာ • Sannipātānujānanādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / သန္နိပာတာနုဇာနနာဒိကထာဝဏ္ဏနာ • Sannipātānujānanādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၆၈. သန္နိပာတာနုဇာနနာဒိကထာ • 68. Sannipātānujānanādikathā
