| Library / Tipiṭaka / ਤਿਪਿਟਕ • Tipiṭaka / ਮਹਾવਗ੍ਗਪਾਲ਼ਿ • Mahāvaggapāḷi |
੬੯. ਪਾਤਿਮੋਕ੍ਖੁਦ੍ਦੇਸਾਨੁਜਾਨਨਾ
69. Pātimokkhuddesānujānanā
੧੩੩. ਅਥ ਖੋ ਭਗવਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏવਂ ਚੇਤਸੋ ਪਰਿવਿਤਕ੍ਕੋ ਉਦਪਾਦਿ – ‘‘ਯਂਨੂਨਾਹਂ ਯਾਨਿ ਮਯਾ ਭਿਕ੍ਖੂਨਂ ਪਞ੍ਞਤ੍ਤਾਨਿ ਸਿਕ੍ਖਾਪਦਾਨਿ, ਤਾਨਿ ਨੇਸਂ ਪਾਤਿਮੋਕ੍ਖੁਦ੍ਦੇਸਂ ਅਨੁਜਾਨੇਯ੍ਯਂ। ਸੋ ਨੇਸਂ ਭવਿਸ੍ਸਤਿ ਉਪੋਸਥਕਮ੍ਮ’’ਨ੍ਤਿ। ਅਥ ਖੋ ਭਗવਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ વੁਟ੍ਠਿਤੋ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ਇਧ ਮਯ੍ਹਂ, ਭਿਕ੍ਖવੇ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏવਂ ਚੇਤਸੋ ਪਰਿવਿਤਕ੍ਕੋ ਉਦਪਾਦਿ ‘ਯਂਨੂਨਾਹਂ ਯਾਨਿ ਮਯਾ ਭਿਕ੍ਖੂਨਂ ਪਞ੍ਞਤ੍ਤਾਨਿ ਸਿਕ੍ਖਾਪਦਾਨਿ, ਤਾਨਿ ਨੇਸਂ ਪਾਤਿਮੋਕ੍ਖੁਦ੍ਦੇਸਂ ਅਨੁਜਾਨੇਯ੍ਯਂ। ਸੋ ਨੇਸਂ ਭવਿਸ੍ਸਤਿ ਉਪੋਸਥਕਮ੍ਮ’ਨ੍ਤਿ। ਅਨੁਜਾਨਾਮਿ, ਭਿਕ੍ਖવੇ, ਪਾਤਿਮੋਕ੍ਖਂ ਉਦ੍ਦਿਸਿਤੁਂ। ਏવਞ੍ਚ ਪਨ, ਭਿਕ੍ਖવੇ, ਉਦ੍ਦਿਸਿਤਬ੍ਬਂ। ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
133. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘yaṃnūnāhaṃ yāni mayā bhikkhūnaṃ paññattāni sikkhāpadāni, tāni nesaṃ pātimokkhuddesaṃ anujāneyyaṃ. So nesaṃ bhavissati uposathakamma’’nti. Atha kho bhagavā sāyanhasamayaṃ paṭisallānā vuṭṭhito etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – idha mayhaṃ, bhikkhave, rahogatassa paṭisallīnassa evaṃ cetaso parivitakko udapādi ‘yaṃnūnāhaṃ yāni mayā bhikkhūnaṃ paññattāni sikkhāpadāni, tāni nesaṃ pātimokkhuddesaṃ anujāneyyaṃ. So nesaṃ bhavissati uposathakamma’nti. Anujānāmi, bhikkhave, pātimokkhaṃ uddisituṃ. Evañca pana, bhikkhave, uddisitabbaṃ. Byattena bhikkhunā paṭibalena saṅgho ñāpetabbo –
੧੩੪. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ। ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਉਪੋਸਥਂ ਕਰੇਯ੍ਯ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯ। ਕਿਂ ਸਙ੍ਘਸ੍ਸ ਪੁਬ੍ਬਕਿਚ੍ਚਂ? ਪਾਰਿਸੁਦ੍ਧਿਂ ਆਯਸ੍ਮਨ੍ਤੋ ਆਰੋਚੇਥ । ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਾਮਿ। ਤਂ ਸਬ੍ਬੇવ ਸਨ੍ਤਾ ਸਾਧੁਕਂ ਸੁਣੋਮ ਮਨਸਿ ਕਰੋਮ। ਯਸ੍ਸ ਸਿਯਾ ਆਪਤ੍ਤਿ , ਸੋ ਆવਿਕਰੇਯ੍ਯ। ਅਸਨ੍ਤਿਯਾ ਆਪਤ੍ਤਿਯਾ ਤੁਣ੍ਹੀ ਭવਿਤਬ੍ਬਂ। ਤੁਣ੍ਹੀਭਾવੇਨ ਖੋ ਪਨਾਯਸ੍ਮਨ੍ਤੇ ਪਰਿਸੁਦ੍ਧਾਤਿ વੇਦਿਸ੍ਸਾਮਿ। ਯਥਾ ਖੋ ਪਨ ਪਚ੍ਚੇਕਪੁਟ੍ਠਸ੍ਸ વੇਯ੍ਯਾਕਰਣਂ ਹੋਤਿ, ਏવਮੇવਂ 1 ਏવਰੂਪਾਯ ਪਰਿਸਾਯ ਯਾવਤਤਿਯਂ ਅਨੁਸ੍ਸਾવਿਤਂ ਹੋਤਿ। ਯੋ ਪਨ ਭਿਕ੍ਖੁ ਯਾવਤਤਿਯਂ ਅਨੁਸ੍ਸਾવਿਯਮਾਨੇ ਸਰਮਾਨੋ ਸਨ੍ਤਿਂ ਆਪਤ੍ਤਿਂ ਨਾવਿਕਰੇਯ੍ਯ, ਸਮ੍ਪਜਾਨਮੁਸਾવਾਦਸ੍ਸ ਹੋਤਿ। ਸਮ੍ਪਜਾਨਮੁਸਾવਾਦੋ ਖੋ ਪਨਾਯਸ੍ਮਨ੍ਤੋ ਅਨ੍ਤਰਾਯਿਕੋ ਧਮ੍ਮੋ વੁਤ੍ਤੋ ਭਗવਤਾ। ਤਸ੍ਮਾ, ਸਰਮਾਨੇਨ ਭਿਕ੍ਖੁਨਾ ਆਪਨ੍ਨੇਨ વਿਸੁਦ੍ਧਾਪੇਕ੍ਖੇਨ ਸਨ੍ਤੀ ਆਪਤ੍ਤਿ ਆવਿਕਾਤਬ੍ਬਾ; ਆવਿਕਤਾ ਹਿਸ੍ਸ ਫਾਸੁ ਹੋਤੀ’’ਤਿ।
134. ‘‘Suṇātu me, bhante, saṅgho. Yadi saṅghassa pattakallaṃ, saṅgho uposathaṃ kareyya, pātimokkhaṃ uddiseyya. Kiṃ saṅghassa pubbakiccaṃ? Pārisuddhiṃ āyasmanto ārocetha . Pātimokkhaṃ uddisissāmi. Taṃ sabbeva santā sādhukaṃ suṇoma manasi karoma. Yassa siyā āpatti , so āvikareyya. Asantiyā āpattiyā tuṇhī bhavitabbaṃ. Tuṇhībhāvena kho panāyasmante parisuddhāti vedissāmi. Yathā kho pana paccekapuṭṭhassa veyyākaraṇaṃ hoti, evamevaṃ 2 evarūpāya parisāya yāvatatiyaṃ anussāvitaṃ hoti. Yo pana bhikkhu yāvatatiyaṃ anussāviyamāne saramāno santiṃ āpattiṃ nāvikareyya, sampajānamusāvādassa hoti. Sampajānamusāvādo kho panāyasmanto antarāyiko dhammo vutto bhagavatā. Tasmā, saramānena bhikkhunā āpannena visuddhāpekkhena santī āpatti āvikātabbā; āvikatā hissa phāsu hotī’’ti.
੧੩੫. ਪਾਤਿਮੋਕ੍ਖਨ੍ਤਿ ਆਦਿਮੇਤਂ ਮੁਖਮੇਤਂ ਪਮੁਖਮੇਤਂ ਕੁਸਲਾਨਂ ਧਮ੍ਮਾਨਂ। ਤੇਨ વੁਚ੍ਚਤਿ ਪਾਤਿਮੋਕ੍ਖਨ੍ਤਿ। ਆਯਸ੍ਮਨ੍ਤੋਤਿ ਪਿਯવਚਨਮੇਤਂ ਗਰੁવਚਨਮੇਤਂ ਸਗਾਰવਸਪ੍ਪਤਿਸ੍ਸਾਧਿવਚਨਮੇਤਂ ਆਯਸ੍ਮਨ੍ਤੋਤਿ। ਉਦ੍ਦਿਸਿਸ੍ਸਾਮੀਤਿ ਆਚਿਕ੍ਖਿਸ੍ਸਾਮਿ ਦੇਸੇਸ੍ਸਾਮਿ ਪਞ੍ਞਪੇਸ੍ਸਾਮਿ ਪਟ੍ਠਪੇਸ੍ਸਾਮਿ વਿવਰਿਸ੍ਸਾਮਿ વਿਭਜਿਸ੍ਸਾਮਿ ਉਤ੍ਤਾਨਿਂ ਕਰਿਸ੍ਸਾਮਿ 3 ਪਕਾਸੇਸ੍ਸਾਮਿ। ਤਨ੍ਤਿ ਪਾਤਿਮੋਕ੍ਖਂ વੁਚ੍ਚਤਿ। ਸਬ੍ਬੇવ ਸਨ੍ਤਾਤਿ ਯਾવਤਿਕਾ ਤਸ੍ਸਾ ਪਰਿਸਾਯ ਥੇਰਾ ਚ ਨવਾ ਚ ਮਜ੍ਝਿਮਾ ਚ, ਏਤੇ વੁਚ੍ਚਨ੍ਤਿ ਸਬ੍ਬੇવ ਸਨ੍ਤਾਤਿ। ਸਾਧੁਕਂ ਸੁਣੋਮਾਤਿ ਅਟ੍ਠਿਂ ਕਤ੍વਾ ਮਨਸਿ ਕਤ੍વਾ ਸਬ੍ਬਚੇਤਸਾ 4 ਸਮਨ੍ਨਾਹਰਾਮ। ਮਨਸਿ ਕਰੋਮਾਤਿ ਏਕਗ੍ਗਚਿਤ੍ਤਾ ਅવਿਕ੍ਖਿਤ੍ਤਚਿਤ੍ਤਾ ਅવਿਸਾਹਟਚਿਤ੍ਤਾ ਨਿਸਾਮੇਮ। ਯਸ੍ਸ ਸਿਯਾ ਆਪਤ੍ਤੀਤਿ ਥੇਰਸ੍ਸ વਾ ਨવਸ੍ਸ વਾ ਮਜ੍ਝਿਮਸ੍ਸ વਾ, ਪਞ੍ਚਨ੍ਨਂ વਾ ਆਪਤ੍ਤਿਕ੍ਖਨ੍ਧਾਨਂ ਅਞ੍ਞਤਰਾ ਆਪਤ੍ਤਿ, ਸਤ੍ਤਨ੍ਨਂ વਾ ਆਪਤ੍ਤਿਕ੍ਖਨ੍ਧਾਨਂ ਅਞ੍ਞਤਰਾ ਆਪਤ੍ਤਿ। ਸੋ ਆવਿਕਰੇਯ੍ਯਾਤਿ ਸੋ ਦੇਸੇਯ੍ਯ, ਸੋ વਿવਰੇਯ੍ਯ, ਸੋ ਉਤ੍ਤਾਨਿਂ ਕਰੇਯ੍ਯ, ਸੋ ਪਕਾਸੇਯ੍ਯ ਸਙ੍ਘਮਜ੍ਝੇ વਾ ਗਣਮਜ੍ਝੇ વਾ ਏਕਪੁਗ੍ਗਲੇ વਾ। ਅਸਨ੍ਤੀ ਨਾਮ ਆਪਤ੍ਤਿ ਅਨਜ੍ਝਾਪਨ੍ਨਾ વਾ ਹੋਤਿ, ਆਪਜ੍ਜਿਤ੍વਾ વਾ વੁਟ੍ਠਿਤਾ। ਤੁਣ੍ਹੀ ਭવਿਤਬ੍ਬਨ੍ਤਿ ਅਧਿવਾਸੇਤਬ੍ਬਂ ਨ ਬ੍ਯਾਹਰਿਤਬ੍ਬਂ। ਪਰਿਸੁਦ੍ਧਾਤਿ વੇਦਿਸ੍ਸਾਮੀਤਿ ਜਾਨਿਸ੍ਸਾਮਿ ਧਾਰੇਸ੍ਸਾਮਿ। ਯਥਾ ਖੋ ਪਨ ਪਚ੍ਚੇਕਪੁਟ੍ਠਸ੍ਸ વੇਯ੍ਯਾਕਰਣਂ ਹੋਤੀਤਿ ਯਥਾ ਏਕੇਨ ਏਕੋ ਪੁਟ੍ਠੋ ਬ੍ਯਾਕਰੇਯ੍ਯ, ਏવਮੇવ ਤਸ੍ਸਾ ਪਰਿਸਾਯ ਜਾਨਿਤਬ੍ਬਂ ਮਂ ਪੁਚ੍ਛਤੀਤਿ। ਏવਰੂਪਾ ਨਾਮ ਪਰਿਸਾ ਭਿਕ੍ਖੁਪਰਿਸਾ વੁਚ੍ਚਤਿ। ਯਾવਤਤਿਯਂ ਅਨੁਸ੍ਸਾવਿਤਂ ਹੋਤੀਤਿ ਸਕਿਮ੍ਪਿ ਅਨੁਸ੍ਸਾવਿਤਂ ਹੋਤਿ, ਦੁਤਿਯਮ੍ਪਿ ਅਨੁਸ੍ਸਾવਿਤਂ ਹੋਤਿ, ਤਤਿਯਮ੍ਪਿ ਅਨੁਸ੍ਸਾવਿਤਂ ਹੋਤਿ। ਸਰਮਾਨੋਤਿ ਜਾਨਮਾਨੋ ਸਞ੍ਜਾਨਮਾਨੋ। ਸਨ੍ਤੀ ਨਾਮ ਆਪਤ੍ਤਿ ਅਜ੍ਝਾਪਨ੍ਨਾ વਾ ਹੋਤਿ, ਆਪਜ੍ਜਿਤ੍વਾ વਾ ਅવੁਟ੍ਠਿਤਾ। ਨਾવਿਕਰੇਯ੍ਯਾਤਿ ਨ ਦੇਸੇਯ੍ਯ, ਨ વਿવਰੇਯ੍ਯ, ਨ ਉਤ੍ਤਾਨਿਂ ਕਰੇਯ੍ਯ, ਨ ਪਕਾਸੇਯ੍ਯ ਸਙ੍ਘਮਜ੍ਝੇ વਾ ਗਣਮਜ੍ਝੇ વਾ ਏਕਪੁਗ੍ਗਲੇ વਾ। ਸਮ੍ਪਜਾਨਮੁਸਾવਾਦਸ੍ਸ ਹੋਤੀਤਿ। ਸਮ੍ਪਜਾਨਮੁਸਾવਾਦੇ ਕਿਂ ਹੋਤਿ? ਦੁਕ੍ਕਟਂ ਹੋਤਿ। ਅਨ੍ਤਰਾਯਿਕੋ ਧਮ੍ਮੋ વੁਤ੍ਤੋ ਭਗવਤਾਤਿ। ਕਿਸ੍ਸ ਅਨ੍ਤਰਾਯਿਕੋ? ਪਠਮਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਦੁਤਿਯਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਤਤਿਯਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਚਤੁਤ੍ਥਸ੍ਸ ਝਾਨਸ੍ਸ ਅਧਿਗਮਾਯ ਅਨ੍ਤਰਾਯਿਕੋ, ਝਾਨਾਨਂ વਿਮੋਕ੍ਖਾਨਂ ਸਮਾਧੀਨਂ ਸਮਾਪਤ੍ਤੀਨਂ ਨੇਕ੍ਖਮ੍ਮਾਨਂ ਨਿਸ੍ਸਰਣਾਨਂ ਪવਿવੇਕਾਨਂ ਕੁਸਲਾਨਂ ਧਮ੍ਮਾਨਂ ਅਧਿਗਮਾਯ ਅਨ੍ਤਰਾਯਿਕੋ। ਤਸ੍ਮਾਤਿ ਤਙ੍ਕਾਰਣਾ। ਸਰਮਾਨੇਨਾਤਿ ਜਾਨਮਾਨੇਨ ਸਞ੍ਜਾਨਮਾਨੇਨ। વਿਸੁਦ੍ਧਾਪੇਕ੍ਖੇਨਾਤਿ વੁਟ੍ਠਾਤੁਕਾਮੇਨ વਿਸੁਜ੍ਝਿਤੁਕਾਮੇਨ। ਸਨ੍ਤੀ ਨਾਮ ਆਪਤ੍ਤਿ ਅਜ੍ਝਾਪਨ੍ਨਾ વਾ ਹੋਤਿ, ਆਪਜ੍ਜਿਤ੍વਾ વਾ ਅવੁਟ੍ਠਿਤਾ। ਆવਿਕਾਤਬ੍ਬਾਤਿ ਆવਿਕਾਤਬ੍ਬਾ ਸਙ੍ਘਮਜ੍ਝੇ વਾ ਗਣਮਜ੍ਝੇ વਾ ਏਕਪੁਗ੍ਗਲੇ વਾ। ਆવਿਕਤਾ ਹਿਸ੍ਸ ਫਾਸੁ ਹੋਤੀਤਿ। ਕਿਸ੍ਸ ਫਾਸੁ ਹੋਤਿ? ਪਠਮਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਦੁਤਿਯਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਤਤਿਯਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਚਤੁਤ੍ਥਸ੍ਸ ਝਾਨਸ੍ਸ ਅਧਿਗਮਾਯ ਫਾਸੁ ਹੋਤਿ, ਝਾਨਾਨਂ વਿਮੋਕ੍ਖਾਨਂ ਸਮਾਧੀਨਂ ਸਮਾਪਤ੍ਤੀਨਂ ਨੇਕ੍ਖਮ੍ਮਾਨਂ ਨਿਸ੍ਸਰਣਾਨਂ ਪવਿવੇਕਾਨਂ ਕੁਸਲਾਨਂ ਧਮ੍ਮਾਨਂ ਅਧਿਗਮਾਯ ਫਾਸੁ ਹੋਤੀਤਿ।
135.Pātimokkhanti ādimetaṃ mukhametaṃ pamukhametaṃ kusalānaṃ dhammānaṃ. Tena vuccati pātimokkhanti. Āyasmantoti piyavacanametaṃ garuvacanametaṃ sagāravasappatissādhivacanametaṃ āyasmantoti. Uddisissāmīti ācikkhissāmi desessāmi paññapessāmi paṭṭhapessāmi vivarissāmi vibhajissāmi uttāniṃ karissāmi 5 pakāsessāmi. Tanti pātimokkhaṃ vuccati. Sabbeva santāti yāvatikā tassā parisāya therā ca navā ca majjhimā ca, ete vuccanti sabbeva santāti. Sādhukaṃ suṇomāti aṭṭhiṃ katvā manasi katvā sabbacetasā 6 samannāharāma. Manasi karomāti ekaggacittā avikkhittacittā avisāhaṭacittā nisāmema. Yassa siyā āpattīti therassa vā navassa vā majjhimassa vā, pañcannaṃ vā āpattikkhandhānaṃ aññatarā āpatti, sattannaṃ vā āpattikkhandhānaṃ aññatarā āpatti. So āvikareyyāti so deseyya, so vivareyya, so uttāniṃ kareyya, so pakāseyya saṅghamajjhe vā gaṇamajjhe vā ekapuggale vā. Asantī nāma āpatti anajjhāpannā vā hoti, āpajjitvā vā vuṭṭhitā. Tuṇhī bhavitabbanti adhivāsetabbaṃ na byāharitabbaṃ. Parisuddhāti vedissāmīti jānissāmi dhāressāmi. Yathā kho pana paccekapuṭṭhassa veyyākaraṇaṃ hotīti yathā ekena eko puṭṭho byākareyya, evameva tassā parisāya jānitabbaṃ maṃ pucchatīti. Evarūpā nāma parisā bhikkhuparisā vuccati. Yāvatatiyaṃ anussāvitaṃ hotīti sakimpi anussāvitaṃ hoti, dutiyampi anussāvitaṃ hoti, tatiyampi anussāvitaṃ hoti. Saramānoti jānamāno sañjānamāno. Santī nāma āpatti ajjhāpannā vā hoti, āpajjitvā vā avuṭṭhitā. Nāvikareyyāti na deseyya, na vivareyya, na uttāniṃ kareyya, na pakāseyya saṅghamajjhe vā gaṇamajjhe vā ekapuggale vā. Sampajānamusāvādassa hotīti. Sampajānamusāvāde kiṃ hoti? Dukkaṭaṃ hoti. Antarāyiko dhammo vutto bhagavatāti. Kissa antarāyiko? Paṭhamassa jhānassa adhigamāya antarāyiko, dutiyassa jhānassa adhigamāya antarāyiko, tatiyassa jhānassa adhigamāya antarāyiko, catutthassa jhānassa adhigamāya antarāyiko, jhānānaṃ vimokkhānaṃ samādhīnaṃ samāpattīnaṃ nekkhammānaṃ nissaraṇānaṃ pavivekānaṃ kusalānaṃ dhammānaṃ adhigamāya antarāyiko. Tasmāti taṅkāraṇā. Saramānenāti jānamānena sañjānamānena. Visuddhāpekkhenāti vuṭṭhātukāmena visujjhitukāmena. Santī nāma āpatti ajjhāpannā vā hoti, āpajjitvā vā avuṭṭhitā. Āvikātabbāti āvikātabbā saṅghamajjhe vā gaṇamajjhe vā ekapuggale vā. Āvikatā hissa phāsu hotīti. Kissa phāsu hoti? Paṭhamassa jhānassa adhigamāya phāsu hoti, dutiyassa jhānassa adhigamāya phāsu hoti, tatiyassa jhānassa adhigamāya phāsu hoti, catutthassa jhānassa adhigamāya phāsu hoti, jhānānaṃ vimokkhānaṃ samādhīnaṃ samāpattīnaṃ nekkhammānaṃ nissaraṇānaṃ pavivekānaṃ kusalānaṃ dhammānaṃ adhigamāya phāsu hotīti.
੧੩੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਭਗવਤਾ ਪਾਤਿਮੋਕ੍ਖੁਦ੍ਦੇਸੋ ਅਨੁਞ੍ਞਾਤੋਤਿ – ਦੇવਸਿਕਂ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਦੇવਸਿਕਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ। ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਉਪੋਸਥੇ ਪਾਤਿਮੋਕ੍ਖਂ ਉਦ੍ਦਿਸਿਤੁਨ੍ਤਿ।
136. Tena kho pana samayena bhikkhū – bhagavatā pātimokkhuddeso anuññātoti – devasikaṃ pātimokkhaṃ uddisanti. Bhagavato etamatthaṃ ārocesuṃ. Na, bhikkhave, devasikaṃ pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, uposathe pātimokkhaṃ uddisitunti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ਭਗવਤਾ ਉਪੋਸਥੇ ਪਾਤਿਮੋਕ੍ਖੁਦ੍ਦੇਸੋ ਅਨੁਞ੍ਞਾਤੋਤਿ – ਪਕ੍ਖਸ੍ਸ ਤਿਕ੍ਖਤ੍ਤੁਂ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਪਕ੍ਖਸ੍ਸ ਤਿਕ੍ਖਤ੍ਤੁਂ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ। ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਸਕਿਂ ਪਕ੍ਖਸ੍ਸ ਚਾਤੁਦ੍ਦਸੇ વਾ ਪਨ੍ਨਰਸੇ વਾ ਪਾਤਿਮੋਕ੍ਖਂ ਉਦ੍ਦਿਸਿਤੁਨ੍ਤਿ।
Tena kho pana samayena bhikkhū – bhagavatā uposathe pātimokkhuddeso anuññātoti – pakkhassa tikkhattuṃ pātimokkhaṃ uddisanti, cātuddase pannarase aṭṭhamiyā ca pakkhassa. Bhagavato etamatthaṃ ārocesuṃ. Na, bhikkhave, pakkhassa tikkhattuṃ pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, sakiṃ pakkhassa cātuddase vā pannarase vā pātimokkhaṃ uddisitunti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਯਥਾਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ ਸਕਾਯ ਸਕਾਯ ਪਰਿਸਾਯ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਨ, ਭਿਕ੍ਖવੇ, ਯਥਾਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ ਸਕਾਯ ਸਕਾਯ ਪਰਿਸਾਯ। ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਸਮਗ੍ਗਾਨਂ ਉਪੋਸਥਕਮ੍ਮਨ੍ਤਿ।
Tena kho pana samayena chabbaggiyā bhikkhū yathāparisāya pātimokkhaṃ uddisanti sakāya sakāya parisāya. Bhagavato etamatthaṃ ārocesuṃ. Na, bhikkhave, yathāparisāya pātimokkhaṃ uddisitabbaṃ sakāya sakāya parisāya. Yo uddiseyya, āpatti dukkaṭassa. Anujānāmi, bhikkhave, samaggānaṃ uposathakammanti.
ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਭਗવਤਾ ਪਞ੍ਞਤ੍ਤਂ ‘ਸਮਗ੍ਗਾਨਂ ਉਪੋਸਥਕਮ੍ਮ’ਨ੍ਤਿ। ਕਿਤ੍ਤਾવਤਾ ਨੁ ਖੋ ਸਾਮਗ੍ਗੀ ਹੋਤਿ, ਯਾવਤਾ ਏਕਾવਾਸੋ, ਉਦਾਹੁ ਸਬ੍ਬਾ ਪਥવੀ’’ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਏਤ੍ਤਾવਤਾ ਸਾਮਗ੍ਗੀ ਯਾવਤਾ ਏਕਾવਾਸੋਤਿ।
Atha kho bhikkhūnaṃ etadahosi – ‘‘bhagavatā paññattaṃ ‘samaggānaṃ uposathakamma’nti. Kittāvatā nu kho sāmaggī hoti, yāvatā ekāvāso, udāhu sabbā pathavī’’ti? Bhagavato etamatthaṃ ārocesuṃ. Anujānāmi, bhikkhave, ettāvatā sāmaggī yāvatā ekāvāsoti.
Footnotes:
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਗ੍ਗ-ਅਟ੍ਠਕਥਾ • Mahāvagga-aṭṭhakathā / ਸਨ੍ਨਿਪਾਤਾਨੁਜਾਨਨਾਦਿਕਥਾ • Sannipātānujānanādikathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਸਨ੍ਨਿਪਾਤਾਨੁਜਾਨਨਾਦਿਕਥਾવਣ੍ਣਨਾ • Sannipātānujānanādikathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਸਨ੍ਨਿਪਾਤਾਨੁਜਾਨਨਾਦਿਕਥਾવਣ੍ਣਨਾ • Sannipātānujānanādikathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਸਨ੍ਨਿਪਾਤਾਨੁਜਾਨਨਾਦਿਕਥਾવਣ੍ਣਨਾ • Sannipātānujānanādikathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੬੮. ਸਨ੍ਨਿਪਾਤਾਨੁਜਾਨਨਾਦਿਕਥਾ • 68. Sannipātānujānanādikathā
