| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
৪. পটিঞ্ঞাতকরণং
4. Paṭiññātakaraṇaṃ
২০০. তেন খো পন সমযেন ছব্বগ্গিযা ভিক্খূ অপ্পটিঞ্ঞায ভিক্খূনং কম্মানি করোন্তি – তজ্জনীযম্পি, নিযস্সম্পি, পব্বাজনীযম্পি, পটিসারণীযম্পি, উক্খেপনীযম্পি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অপ্পটিঞ্ঞায ভিক্খূনং কম্মানি করিস্সন্তি – তজ্জনীযম্পি, নিযস্সম্পি, পব্বাজনীযম্পি, পটিসারণীযম্পি, উক্খেপনীযম্পী’’তি! অথ খো তে ভিক্খূ ভগৰতো এতমত্থং আরোচেসুং…পে॰… ‘‘সচ্চং কির, ভিক্খৰে…পে॰… ‘‘সচ্চং ভগৰা’’তি…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, অপ্পটিঞ্ঞায ভিক্খূনং কম্মং কাতব্বং – তজ্জনীযং ৰা, নিযস্সং ৰা, পব্বাজনীযং ৰা, পটিসারণীযং ৰা, উক্খেপনীযং ৰা। যো করেয্য, আপত্তি দুক্কটস্স।
200. Tena kho pana samayena chabbaggiyā bhikkhū appaṭiññāya bhikkhūnaṃ kammāni karonti – tajjanīyampi, niyassampi, pabbājanīyampi, paṭisāraṇīyampi, ukkhepanīyampi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appaṭiññāya bhikkhūnaṃ kammāni karissanti – tajjanīyampi, niyassampi, pabbājanīyampi, paṭisāraṇīyampi, ukkhepanīyampī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave…pe… ‘‘saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, appaṭiññāya bhikkhūnaṃ kammaṃ kātabbaṃ – tajjanīyaṃ vā, niyassaṃ vā, pabbājanīyaṃ vā, paṭisāraṇīyaṃ vā, ukkhepanīyaṃ vā. Yo kareyya, āpatti dukkaṭassa.
২০১. ‘‘এৰং খো, ভিক্খৰে, অধম্মিকং হোতি পটিঞ্ঞাতকরণং, এৰং ধম্মিকং। কথঞ্চ, ভিক্খৰে, অধম্মিকং হোতি পটিঞ্ঞাতকরণং?
201. ‘‘Evaṃ kho, bhikkhave, adhammikaṃ hoti paṭiññātakaraṇaṃ, evaṃ dhammikaṃ. Kathañca, bhikkhave, adhammikaṃ hoti paṭiññātakaraṇaṃ?
‘‘ভিক্খু পারাজিকং অজ্ঝাপন্নো হোতি। তমেনং চোদেতি সঙ্ঘো ৰা, সম্বহুলা ৰা, একপুগ্গলো ৰা – ‘পারাজিকং আযস্মা অজ্ঝাপন্নো’তি? সো এৰং ৰদেতি – ‘ন খো অহং, আৰুসো, পারাজিকং অজ্ঝাপন্নো , সঙ্ঘাদিসেসং অজ্ঝাপন্নো’তি। তং সঙ্ঘো সঙ্ঘাদিসেসেন কারেতি। অধম্মিকং পটিঞ্ঞাতকরণং।
‘‘Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, pārājikaṃ ajjhāpanno , saṅghādisesaṃ ajjhāpanno’ti. Taṃ saṅgho saṅghādisesena kāreti. Adhammikaṃ paṭiññātakaraṇaṃ.
‘‘ভিক্খু পারাজিকং অজ্ঝাপন্নো হোতি। তমেনং চোদেতি সঙ্ঘো ৰা, সম্বহুলা ৰা, একপুগ্গলো ৰা – ‘পারাজিকং আযস্মা অজ্ঝাপন্নো’তি? সো এৰং ৰদেতি – ‘ন খো অহং, আৰুসো, পারাজিকং অজ্ঝাপন্নো, থুল্লচ্চযং…পে॰… পাচিত্তিযং…পে॰… পাটিদেসনীযং…পে॰… দুক্কটং…পে॰… দুব্ভাসিতং অজ্ঝাপন্নো’তি। তং সঙ্ঘো দুব্ভাসিতেন কারেতি। অধম্মিকং পটিঞ্ঞাতকরণং।
‘‘Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, pārājikaṃ ajjhāpanno, thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno’ti. Taṃ saṅgho dubbhāsitena kāreti. Adhammikaṃ paṭiññātakaraṇaṃ.
‘‘ভিক্খু সঙ্ঘাদিসেসং…পে॰… থুল্লচ্চযং…পে॰… পাচিত্তিযং…পে॰… পাটিদেসনীযং…পে॰… দুক্কটং…পে॰… দুব্ভাসিতং অজ্ঝাপন্নো হোতি। তমেনং চোদেতি সঙ্ঘো ৰা, সম্বহুলা ৰা, একপুগ্গলো ৰা – ‘দুব্ভাসিতং আযস্মা অজ্ঝাপন্নো’তি ? সো এৰং ৰদেতি – ‘ন খো অহং, আৰুসো, দুব্ভাসিতং অজ্ঝাপন্নো, পারাজিকং অজ্ঝাপন্নো’তি। তং সঙ্ঘো পারাজিকেন কারেতি। অধম্মিকং পটিঞ্ঞাতকরণং।
‘‘Bhikkhu saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti ? So evaṃ vadeti – ‘na kho ahaṃ, āvuso, dubbhāsitaṃ ajjhāpanno, pārājikaṃ ajjhāpanno’ti. Taṃ saṅgho pārājikena kāreti. Adhammikaṃ paṭiññātakaraṇaṃ.
‘‘ভিক্খু দুব্ভাসিতং অজ্ঝাপন্নো হোতি। তমেনং চোদেতি সঙ্ঘো ৰা, সম্বহুলা ৰা, একপুগ্গলো ৰা – ‘দুব্ভাসিতং আযস্মা অজ্ঝাপন্নো’তি? সো এৰং ৰদেতি – ‘ন খো অহং, আৰুসো, দুব্ভাসিতং অজ্ঝাপন্নো, সঙ্ঘাদিসেসং…পে॰… থুল্লচ্চযং…পে॰… পাচিত্তিযং…পে॰… পাটিদেসনীযং…পে॰… দুক্কটং অজ্ঝাপন্নো’তি। তং সঙ্ঘো দুক্কটেন কারেতি। অধম্মিকং পটিঞ্ঞাতকরণং। ‘‘এৰং খো, ভিক্খৰে, অধম্মিকং হোতি পটিঞ্ঞাতকরণং।
‘‘Bhikkhu dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, dubbhāsitaṃ ajjhāpanno, saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ ajjhāpanno’ti. Taṃ saṅgho dukkaṭena kāreti. Adhammikaṃ paṭiññātakaraṇaṃ. ‘‘Evaṃ kho, bhikkhave, adhammikaṃ hoti paṭiññātakaraṇaṃ.
‘‘কথঞ্চ , ভিক্খৰে, ধম্মিকং হোতি পটিঞ্ঞাতকরণং? ভিক্খু পারাজিকং অজ্ঝাপন্নো হোতি। তমেনং চোদেতি সঙ্ঘো ৰা, সম্বহুলা ৰা, একপুগ্গলো ৰা – ‘পারাজিকং আযস্মা অজ্ঝাপন্নো’তি? সো এৰং ৰদেতি – ‘আম, আৰুসো, পারাজিকং অজ্ঝাপন্নো’তি। তং সঙ্ঘো পারাজিকেন কারেতি। ধম্মিকং পটিঞ্ঞাতকরণং।
‘‘Kathañca , bhikkhave, dhammikaṃ hoti paṭiññātakaraṇaṃ? Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘āma, āvuso, pārājikaṃ ajjhāpanno’ti. Taṃ saṅgho pārājikena kāreti. Dhammikaṃ paṭiññātakaraṇaṃ.
‘‘ভিক্খু সঙ্ঘাদিসেসং…পে॰… থুল্লচ্চযং…পে॰… পাচিত্তিযং…পে॰… পাটিদেসনীযং…পে॰… দুক্কটং…পে॰… দুব্ভাসিতং অজ্ঝাপন্নো হোতি। তমেনং চোদেতি সঙ্ঘো ৰা, সম্বহুলা ৰা, একপুগ্গলো ৰা – ‘দুব্ভাসিতং আযস্মা অজ্ঝাপন্নো’তি? সো এৰং ৰদেতি – ‘আম, আৰুসো, দুব্ভাসিতং অজ্ঝাপন্নো’তি। তং সঙ্ঘো দুব্ভাসিতেন কারেতি। ধম্মিকং পটিঞ্ঞাতকরণং। এৰং খো, ভিক্খৰে, ধম্মিকং হোতি পটিঞ্ঞাতকরণ’’ন্তি।
‘‘Bhikkhu saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti? So evaṃ vadeti – ‘āma, āvuso, dubbhāsitaṃ ajjhāpanno’ti. Taṃ saṅgho dubbhāsitena kāreti. Dhammikaṃ paṭiññātakaraṇaṃ. Evaṃ kho, bhikkhave, dhammikaṃ hoti paṭiññātakaraṇa’’nti.
Related texts:
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সতিৰিনযাদিকথাৰণ্ণনা • Sativinayādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পটিঞ্ঞাতকরণকথাৰণ্ণনা • Paṭiññātakaraṇakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. পটিঞ্ঞাতকরণকথা • 4. Paṭiññātakaraṇakathā
