| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗಪಾಳಿ • Cūḷavaggapāḷi |
೪. ಪಟಿಞ್ಞಾತಕರಣಂ
4. Paṭiññātakaraṇaṃ
೨೦೦. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಾನಿ ಕರೋನ್ತಿ – ತಜ್ಜನೀಯಮ್ಪಿ, ನಿಯಸ್ಸಮ್ಪಿ, ಪಬ್ಬಾಜನೀಯಮ್ಪಿ, ಪಟಿಸಾರಣೀಯಮ್ಪಿ, ಉಕ್ಖೇಪನೀಯಮ್ಪಿ। ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ॰… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಾನಿ ಕರಿಸ್ಸನ್ತಿ – ತಜ್ಜನೀಯಮ್ಪಿ, ನಿಯಸ್ಸಮ್ಪಿ, ಪಬ್ಬಾಜನೀಯಮ್ಪಿ, ಪಟಿಸಾರಣೀಯಮ್ಪಿ, ಉಕ್ಖೇಪನೀಯಮ್ಪೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ॰… ‘‘ಸಚ್ಚಂ ಕಿರ, ಭಿಕ್ಖವೇ…ಪೇ॰… ‘‘ಸಚ್ಚಂ ಭಗವಾ’’ತಿ…ಪೇ॰… ವಿಗರಹಿತ್ವಾ…ಪೇ॰… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಂ ಕಾತಬ್ಬಂ – ತಜ್ಜನೀಯಂ ವಾ, ನಿಯಸ್ಸಂ ವಾ, ಪಬ್ಬಾಜನೀಯಂ ವಾ, ಪಟಿಸಾರಣೀಯಂ ವಾ, ಉಕ್ಖೇಪನೀಯಂ ವಾ। ಯೋ ಕರೇಯ್ಯ, ಆಪತ್ತಿ ದುಕ್ಕಟಸ್ಸ।
200. Tena kho pana samayena chabbaggiyā bhikkhū appaṭiññāya bhikkhūnaṃ kammāni karonti – tajjanīyampi, niyassampi, pabbājanīyampi, paṭisāraṇīyampi, ukkhepanīyampi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appaṭiññāya bhikkhūnaṃ kammāni karissanti – tajjanīyampi, niyassampi, pabbājanīyampi, paṭisāraṇīyampi, ukkhepanīyampī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave…pe… ‘‘saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, appaṭiññāya bhikkhūnaṃ kammaṃ kātabbaṃ – tajjanīyaṃ vā, niyassaṃ vā, pabbājanīyaṃ vā, paṭisāraṇīyaṃ vā, ukkhepanīyaṃ vā. Yo kareyya, āpatti dukkaṭassa.
೨೦೧. ‘‘ಏವಂ ಖೋ, ಭಿಕ್ಖವೇ, ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ, ಏವಂ ಧಮ್ಮಿಕಂ। ಕಥಞ್ಚ, ಭಿಕ್ಖವೇ, ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ?
201. ‘‘Evaṃ kho, bhikkhave, adhammikaṃ hoti paṭiññātakaraṇaṃ, evaṃ dhammikaṃ. Kathañca, bhikkhave, adhammikaṃ hoti paṭiññātakaraṇaṃ?
‘‘ಭಿಕ್ಖು ಪಾರಾಜಿಕಂ ಅಜ್ಝಾಪನ್ನೋ ಹೋತಿ। ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ಪಾರಾಜಿಕಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ಪಾರಾಜಿಕಂ ಅಜ್ಝಾಪನ್ನೋ , ಸಙ್ಘಾದಿಸೇಸಂ ಅಜ್ಝಾಪನ್ನೋ’ತಿ। ತಂ ಸಙ್ಘೋ ಸಙ್ಘಾದಿಸೇಸೇನ ಕಾರೇತಿ। ಅಧಮ್ಮಿಕಂ ಪಟಿಞ್ಞಾತಕರಣಂ।
‘‘Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, pārājikaṃ ajjhāpanno , saṅghādisesaṃ ajjhāpanno’ti. Taṃ saṅgho saṅghādisesena kāreti. Adhammikaṃ paṭiññātakaraṇaṃ.
‘‘ಭಿಕ್ಖು ಪಾರಾಜಿಕಂ ಅಜ್ಝಾಪನ್ನೋ ಹೋತಿ। ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ಪಾರಾಜಿಕಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ಪಾರಾಜಿಕಂ ಅಜ್ಝಾಪನ್ನೋ, ಥುಲ್ಲಚ್ಚಯಂ…ಪೇ॰… ಪಾಚಿತ್ತಿಯಂ…ಪೇ॰… ಪಾಟಿದೇಸನೀಯಂ…ಪೇ॰… ದುಕ್ಕಟಂ…ಪೇ॰… ದುಬ್ಭಾಸಿತಂ ಅಜ್ಝಾಪನ್ನೋ’ತಿ। ತಂ ಸಙ್ಘೋ ದುಬ್ಭಾಸಿತೇನ ಕಾರೇತಿ। ಅಧಮ್ಮಿಕಂ ಪಟಿಞ್ಞಾತಕರಣಂ।
‘‘Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, pārājikaṃ ajjhāpanno, thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno’ti. Taṃ saṅgho dubbhāsitena kāreti. Adhammikaṃ paṭiññātakaraṇaṃ.
‘‘ಭಿಕ್ಖು ಸಙ್ಘಾದಿಸೇಸಂ…ಪೇ॰… ಥುಲ್ಲಚ್ಚಯಂ…ಪೇ॰… ಪಾಚಿತ್ತಿಯಂ…ಪೇ॰… ಪಾಟಿದೇಸನೀಯಂ…ಪೇ॰… ದುಕ್ಕಟಂ…ಪೇ॰… ದುಬ್ಭಾಸಿತಂ ಅಜ್ಝಾಪನ್ನೋ ಹೋತಿ। ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ದುಬ್ಭಾಸಿತಂ ಆಯಸ್ಮಾ ಅಜ್ಝಾಪನ್ನೋ’ತಿ ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ದುಬ್ಭಾಸಿತಂ ಅಜ್ಝಾಪನ್ನೋ, ಪಾರಾಜಿಕಂ ಅಜ್ಝಾಪನ್ನೋ’ತಿ। ತಂ ಸಙ್ಘೋ ಪಾರಾಜಿಕೇನ ಕಾರೇತಿ। ಅಧಮ್ಮಿಕಂ ಪಟಿಞ್ಞಾತಕರಣಂ।
‘‘Bhikkhu saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti ? So evaṃ vadeti – ‘na kho ahaṃ, āvuso, dubbhāsitaṃ ajjhāpanno, pārājikaṃ ajjhāpanno’ti. Taṃ saṅgho pārājikena kāreti. Adhammikaṃ paṭiññātakaraṇaṃ.
‘‘ಭಿಕ್ಖು ದುಬ್ಭಾಸಿತಂ ಅಜ್ಝಾಪನ್ನೋ ಹೋತಿ। ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ದುಬ್ಭಾಸಿತಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ನ ಖೋ ಅಹಂ, ಆವುಸೋ, ದುಬ್ಭಾಸಿತಂ ಅಜ್ಝಾಪನ್ನೋ, ಸಙ್ಘಾದಿಸೇಸಂ…ಪೇ॰… ಥುಲ್ಲಚ್ಚಯಂ…ಪೇ॰… ಪಾಚಿತ್ತಿಯಂ…ಪೇ॰… ಪಾಟಿದೇಸನೀಯಂ…ಪೇ॰… ದುಕ್ಕಟಂ ಅಜ್ಝಾಪನ್ನೋ’ತಿ। ತಂ ಸಙ್ಘೋ ದುಕ್ಕಟೇನ ಕಾರೇತಿ। ಅಧಮ್ಮಿಕಂ ಪಟಿಞ್ಞಾತಕರಣಂ। ‘‘ಏವಂ ಖೋ, ಭಿಕ್ಖವೇ, ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ।
‘‘Bhikkhu dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, dubbhāsitaṃ ajjhāpanno, saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ ajjhāpanno’ti. Taṃ saṅgho dukkaṭena kāreti. Adhammikaṃ paṭiññātakaraṇaṃ. ‘‘Evaṃ kho, bhikkhave, adhammikaṃ hoti paṭiññātakaraṇaṃ.
‘‘ಕಥಞ್ಚ , ಭಿಕ್ಖವೇ, ಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ? ಭಿಕ್ಖು ಪಾರಾಜಿಕಂ ಅಜ್ಝಾಪನ್ನೋ ಹೋತಿ। ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ಪಾರಾಜಿಕಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ಆಮ, ಆವುಸೋ, ಪಾರಾಜಿಕಂ ಅಜ್ಝಾಪನ್ನೋ’ತಿ। ತಂ ಸಙ್ಘೋ ಪಾರಾಜಿಕೇನ ಕಾರೇತಿ। ಧಮ್ಮಿಕಂ ಪಟಿಞ್ಞಾತಕರಣಂ।
‘‘Kathañca , bhikkhave, dhammikaṃ hoti paṭiññātakaraṇaṃ? Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘āma, āvuso, pārājikaṃ ajjhāpanno’ti. Taṃ saṅgho pārājikena kāreti. Dhammikaṃ paṭiññātakaraṇaṃ.
‘‘ಭಿಕ್ಖು ಸಙ್ಘಾದಿಸೇಸಂ…ಪೇ॰… ಥುಲ್ಲಚ್ಚಯಂ…ಪೇ॰… ಪಾಚಿತ್ತಿಯಂ…ಪೇ॰… ಪಾಟಿದೇಸನೀಯಂ…ಪೇ॰… ದುಕ್ಕಟಂ…ಪೇ॰… ದುಬ್ಭಾಸಿತಂ ಅಜ್ಝಾಪನ್ನೋ ಹೋತಿ। ತಮೇನಂ ಚೋದೇತಿ ಸಙ್ಘೋ ವಾ, ಸಮ್ಬಹುಲಾ ವಾ, ಏಕಪುಗ್ಗಲೋ ವಾ – ‘ದುಬ್ಭಾಸಿತಂ ಆಯಸ್ಮಾ ಅಜ್ಝಾಪನ್ನೋ’ತಿ? ಸೋ ಏವಂ ವದೇತಿ – ‘ಆಮ, ಆವುಸೋ, ದುಬ್ಭಾಸಿತಂ ಅಜ್ಝಾಪನ್ನೋ’ತಿ। ತಂ ಸಙ್ಘೋ ದುಬ್ಭಾಸಿತೇನ ಕಾರೇತಿ। ಧಮ್ಮಿಕಂ ಪಟಿಞ್ಞಾತಕರಣಂ। ಏವಂ ಖೋ, ಭಿಕ್ಖವೇ, ಧಮ್ಮಿಕಂ ಹೋತಿ ಪಟಿಞ್ಞಾತಕರಣ’’ನ್ತಿ।
‘‘Bhikkhu saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti? So evaṃ vadeti – ‘āma, āvuso, dubbhāsitaṃ ajjhāpanno’ti. Taṃ saṅgho dubbhāsitena kāreti. Dhammikaṃ paṭiññātakaraṇaṃ. Evaṃ kho, bhikkhave, dhammikaṃ hoti paṭiññātakaraṇa’’nti.
Related texts:
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಸತಿವಿನಯಾದಿಕಥಾವಣ್ಣನಾ • Sativinayādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಟಿಞ್ಞಾತಕರಣಕಥಾವಣ್ಣನಾ • Paṭiññātakaraṇakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೪. ಪಟಿಞ್ಞಾತಕರಣಕಥಾ • 4. Paṭiññātakaraṇakathā
