| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
4. පටිඤ්‌ඤාතකරණං
4. Paṭiññātakaraṇaṃ
200. තෙන ඛො පන සමයෙන ඡබ්‌බග්‌ගියා භික්‌ඛූ අප්‌පටිඤ්‌ඤාය භික්‌ඛූනං කම්‌මානි කරොන්‌ති – තජ්‌ජනීයම්‌පි, නියස්‌සම්‌පි, පබ්‌බාජනීයම්‌පි, පටිසාරණීයම්‌පි, උක්‌ඛෙපනීයම්‌පි. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛූ අප්‌පටිඤ්‌ඤාය භික්‌ඛූනං කම්‌මානි කරිස්‌සන්‌ති – තජ්‌ජනීයම්‌පි, නියස්‌සම්‌පි, පබ්‌බාජනීයම්‌පි, පටිසාරණීයම්‌පි, උක්‌ඛෙපනීයම්‌පී’’ති! අථ ඛො තෙ භික්‌ඛූ භගවතො එතමත්‌ථං ආරොචෙසුං…පෙ.… ‘‘සච්‌චං කිර, භික්‌ඛවෙ…පෙ.… ‘‘සච්‌චං භගවා’’ති…පෙ.… විගරහිත්‌වා…පෙ.… ධම්‌මිං කථං කත්‌වා භික්‌ඛූ ආමන්‌තෙසි – ‘‘න, භික්‌ඛවෙ, අප්‌පටිඤ්‌ඤාය භික්‌ඛූනං කම්‌මං කාතබ්‌බං – තජ්‌ජනීයං වා, නියස්‌සං වා, පබ්‌බාජනීයං වා, පටිසාරණීයං වා, උක්‌ඛෙපනීයං වා. යො කරෙය්‍ය, ආපත්‌ති දුක්‌කටස්‌ස.
200. Tena kho pana samayena chabbaggiyā bhikkhū appaṭiññāya bhikkhūnaṃ kammāni karonti – tajjanīyampi, niyassampi, pabbājanīyampi, paṭisāraṇīyampi, ukkhepanīyampi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū appaṭiññāya bhikkhūnaṃ kammāni karissanti – tajjanīyampi, niyassampi, pabbājanīyampi, paṭisāraṇīyampi, ukkhepanīyampī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave…pe… ‘‘saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, appaṭiññāya bhikkhūnaṃ kammaṃ kātabbaṃ – tajjanīyaṃ vā, niyassaṃ vā, pabbājanīyaṃ vā, paṭisāraṇīyaṃ vā, ukkhepanīyaṃ vā. Yo kareyya, āpatti dukkaṭassa.
201. ‘‘එවං ඛො, භික්‌ඛවෙ, අධම්‌මිකං හොති පටිඤ්‌ඤාතකරණං, එවං ධම්‌මිකං. කථඤ්‌ච, භික්‌ඛවෙ, අධම්‌මිකං හොති පටිඤ්‌ඤාතකරණං?
201. ‘‘Evaṃ kho, bhikkhave, adhammikaṃ hoti paṭiññātakaraṇaṃ, evaṃ dhammikaṃ. Kathañca, bhikkhave, adhammikaṃ hoti paṭiññātakaraṇaṃ?
‘‘භික්‌ඛු පාරාජිකං අජ්‌ඣාපන්‌නො හොති. තමෙනං චොදෙති සඞ්‌ඝො වා, සම්‌බහුලා වා, එකපුග්‌ගලො වා – ‘පාරාජිකං ආයස්‌මා අජ්‌ඣාපන්‌නො’ති? සො එවං වදෙති – ‘න ඛො අහං, ආවුසො, පාරාජිකං අජ්‌ඣාපන්‌නො , සඞ්‌ඝාදිසෙසං අජ්‌ඣාපන්‌නො’ති. තං සඞ්‌ඝො සඞ්‌ඝාදිසෙසෙන කාරෙති. අධම්‌මිකං පටිඤ්‌ඤාතකරණං.
‘‘Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, pārājikaṃ ajjhāpanno , saṅghādisesaṃ ajjhāpanno’ti. Taṃ saṅgho saṅghādisesena kāreti. Adhammikaṃ paṭiññātakaraṇaṃ.
‘‘භික්‌ඛු පාරාජිකං අජ්‌ඣාපන්‌නො හොති. තමෙනං චොදෙති සඞ්‌ඝො වා, සම්‌බහුලා වා, එකපුග්‌ගලො වා – ‘පාරාජිකං ආයස්‌මා අජ්‌ඣාපන්‌නො’ති? සො එවං වදෙති – ‘න ඛො අහං, ආවුසො, පාරාජිකං අජ්‌ඣාපන්‌නො, ථුල්‌ලච්‌චයං…පෙ.… පාචිත්‌තියං…පෙ.… පාටිදෙසනීයං…පෙ.… දුක්‌කටං…පෙ.… දුබ්‌භාසිතං අජ්‌ඣාපන්‌නො’ති. තං සඞ්‌ඝො දුබ්‌භාසිතෙන කාරෙති. අධම්‌මිකං පටිඤ්‌ඤාතකරණං.
‘‘Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, pārājikaṃ ajjhāpanno, thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno’ti. Taṃ saṅgho dubbhāsitena kāreti. Adhammikaṃ paṭiññātakaraṇaṃ.
‘‘භික්‌ඛු සඞ්‌ඝාදිසෙසං…පෙ.… ථුල්‌ලච්‌චයං…පෙ.… පාචිත්‌තියං…පෙ.… පාටිදෙසනීයං…පෙ.… දුක්‌කටං…පෙ.… දුබ්‌භාසිතං අජ්‌ඣාපන්‌නො හොති. තමෙනං චොදෙති සඞ්‌ඝො වා, සම්‌බහුලා වා, එකපුග්‌ගලො වා – ‘දුබ්‌භාසිතං ආයස්‌මා අජ්‌ඣාපන්‌නො’ති ? සො එවං වදෙති – ‘න ඛො අහං, ආවුසො, දුබ්‌භාසිතං අජ්‌ඣාපන්‌නො, පාරාජිකං අජ්‌ඣාපන්‌නො’ති. තං සඞ්‌ඝො පාරාජිකෙන කාරෙති. අධම්‌මිකං පටිඤ්‌ඤාතකරණං.
‘‘Bhikkhu saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti ? So evaṃ vadeti – ‘na kho ahaṃ, āvuso, dubbhāsitaṃ ajjhāpanno, pārājikaṃ ajjhāpanno’ti. Taṃ saṅgho pārājikena kāreti. Adhammikaṃ paṭiññātakaraṇaṃ.
‘‘භික්‌ඛු දුබ්‌භාසිතං අජ්‌ඣාපන්‌නො හොති. තමෙනං චොදෙති සඞ්‌ඝො වා, සම්‌බහුලා වා, එකපුග්‌ගලො වා – ‘දුබ්‌භාසිතං ආයස්‌මා අජ්‌ඣාපන්‌නො’ති? සො එවං වදෙති – ‘න ඛො අහං, ආවුසො, දුබ්‌භාසිතං අජ්‌ඣාපන්‌නො, සඞ්‌ඝාදිසෙසං…පෙ.… ථුල්‌ලච්‌චයං…පෙ.… පාචිත්‌තියං…පෙ.… පාටිදෙසනීයං…පෙ.… දුක්‌කටං අජ්‌ඣාපන්‌නො’ති. තං සඞ්‌ඝො දුක්‌කටෙන කාරෙති. අධම්‌මිකං පටිඤ්‌ඤාතකරණං. ‘‘එවං ඛො, භික්‌ඛවෙ, අධම්‌මිකං හොති පටිඤ්‌ඤාතකරණං.
‘‘Bhikkhu dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti? So evaṃ vadeti – ‘na kho ahaṃ, āvuso, dubbhāsitaṃ ajjhāpanno, saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ ajjhāpanno’ti. Taṃ saṅgho dukkaṭena kāreti. Adhammikaṃ paṭiññātakaraṇaṃ. ‘‘Evaṃ kho, bhikkhave, adhammikaṃ hoti paṭiññātakaraṇaṃ.
‘‘කථඤ්‌ච , භික්‌ඛවෙ, ධම්‌මිකං හොති පටිඤ්‌ඤාතකරණං? භික්‌ඛු පාරාජිකං අජ්‌ඣාපන්‌නො හොති. තමෙනං චොදෙති සඞ්‌ඝො වා, සම්‌බහුලා වා, එකපුග්‌ගලො වා – ‘පාරාජිකං ආයස්‌මා අජ්‌ඣාපන්‌නො’ති? සො එවං වදෙති – ‘ආම, ආවුසො, පාරාජිකං අජ්‌ඣාපන්‌නො’ති. තං සඞ්‌ඝො පාරාජිකෙන කාරෙති. ධම්‌මිකං පටිඤ්‌ඤාතකරණං.
‘‘Kathañca , bhikkhave, dhammikaṃ hoti paṭiññātakaraṇaṃ? Bhikkhu pārājikaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘pārājikaṃ āyasmā ajjhāpanno’ti? So evaṃ vadeti – ‘āma, āvuso, pārājikaṃ ajjhāpanno’ti. Taṃ saṅgho pārājikena kāreti. Dhammikaṃ paṭiññātakaraṇaṃ.
‘‘භික්‌ඛු සඞ්‌ඝාදිසෙසං…පෙ.… ථුල්‌ලච්‌චයං…පෙ.… පාචිත්‌තියං…පෙ.… පාටිදෙසනීයං…පෙ.… දුක්‌කටං…පෙ.… දුබ්‌භාසිතං අජ්‌ඣාපන්‌නො හොති. තමෙනං චොදෙති සඞ්‌ඝො වා, සම්‌බහුලා වා, එකපුග්‌ගලො වා – ‘දුබ්‌භාසිතං ආයස්‌මා අජ්‌ඣාපන්‌නො’ති? සො එවං වදෙති – ‘ආම, ආවුසො, දුබ්‌භාසිතං අජ්‌ඣාපන්‌නො’ති. තං සඞ්‌ඝො දුබ්‌භාසිතෙන කාරෙති. ධම්‌මිකං පටිඤ්‌ඤාතකරණං. එවං ඛො, භික්‌ඛවෙ, ධම්‌මිකං හොති පටිඤ්‌ඤාතකරණ’’න්‌ති.
‘‘Bhikkhu saṅghādisesaṃ…pe… thullaccayaṃ…pe… pācittiyaṃ…pe… pāṭidesanīyaṃ…pe… dukkaṭaṃ…pe… dubbhāsitaṃ ajjhāpanno hoti. Tamenaṃ codeti saṅgho vā, sambahulā vā, ekapuggalo vā – ‘dubbhāsitaṃ āyasmā ajjhāpanno’ti? So evaṃ vadeti – ‘āma, āvuso, dubbhāsitaṃ ajjhāpanno’ti. Taṃ saṅgho dubbhāsitena kāreti. Dhammikaṃ paṭiññātakaraṇaṃ. Evaṃ kho, bhikkhave, dhammikaṃ hoti paṭiññātakaraṇa’’nti.
Related texts:
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සතිවිනයාදිකථාවණ්‌ණනා • Sativinayādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පටිඤ්‌ඤාතකරණකථාවණ්‌ණනා • Paṭiññātakaraṇakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 4. පටිඤ්‌ඤාතකරණකථා • 4. Paṭiññātakaraṇakathā
