| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
পটিপদাচতুক্কং
Paṭipadācatukkaṃ
১৭৬-১৮০. ইদানি যস্মা এতং ঝানং নাম পটিপদাকমেন সিজ্ঝতি, তস্মা তস্স পটিপদাভেদং দস্সেতুং পুন কতমে ধম্মা কুসলাতিআদি আরদ্ধং। তত্থ দুক্খা পটিপদা অস্সাতি দুক্খপটিপদং। দন্ধা অভিঞ্ঞা অস্সাতি দন্ধাভিঞ্ঞং। ইতি দুক্খপটিপদন্তি ৰা দন্ধাভিঞ্ঞন্তি ৰা পথৰীকসিণন্তি ৰা তীণিপি ঝানস্সেৰ নামানি। দুক্খপটিপদং খিপ্পাভিঞ্ঞন্তিআদীসুপি এসেৰ নযো।
176-180. Idāni yasmā etaṃ jhānaṃ nāma paṭipadākamena sijjhati, tasmā tassa paṭipadābhedaṃ dassetuṃ puna katame dhammā kusalātiādi āraddhaṃ. Tattha dukkhā paṭipadā assāti dukkhapaṭipadaṃ. Dandhā abhiññā assāti dandhābhiññaṃ. Iti dukkhapaṭipadanti vā dandhābhiññanti vā pathavīkasiṇanti vā tīṇipi jhānasseva nāmāni. Dukkhapaṭipadaṃ khippābhiññantiādīsupi eseva nayo.
তত্থ পঠমসমন্নাহারতো পট্ঠায যাৰ তস্স তস্স ঝানস্স উপচারং উপ্পজ্জতি তাৰ পৰত্তা ঝানভাৰনা ‘পটিপদা’তি ৰুচ্চতি। উপচারতো পন পট্ঠায যাৰ অপ্পনা তাৰ পৰত্তা পঞ্ঞা ‘অভিঞ্ঞা’তি ৰুচ্চতি। সা পনেসা পটিপদা একচ্চস্স দুক্খা হোতি। নীৰরণাদিপচ্চনীকধম্মসমুদাচারগহনতায কিচ্ছা অসুখসেৰনাতি অত্থো। একচ্চস্স তদভাৰেন সুখা। অভিঞ্ঞাপি একচ্চস্স দন্ধা হোতি, মন্দা, অসীঘপ্পৰত্তি। একচ্চস্স খিপ্পা অমন্দা সীঘপ্পৰত্তি। তস্মা যো আদিতো কিলেসে ৰিক্খম্ভেন্তো দুক্খেন সসঙ্খারেন সপ্পযোগেন কিলমন্তো ৰিক্খম্ভেতি , তস্স দুক্খা পটিপদা নাম হোতি। যো পন ৰিক্খম্ভিতকিলেসো অপ্পনাপরিৰাসং ৰসন্তো চিরেন অঙ্গপাতুভাৰং পাপুণাতি, তস্স দন্ধাভিঞ্ঞা নাম হোতি। যো খিপ্পং অঙ্গপাতুভাৰং পাপুণাতি তস্স খিপ্পাভিঞ্ঞা নাম হোতি। যো কিলেসে ৰিক্খম্ভেন্তো সুখেন অকিলমন্তো ৰিক্খম্ভেতি, তস্স সুখা পটিপদা নাম হোতি।
Tattha paṭhamasamannāhārato paṭṭhāya yāva tassa tassa jhānassa upacāraṃ uppajjati tāva pavattā jhānabhāvanā ‘paṭipadā’ti vuccati. Upacārato pana paṭṭhāya yāva appanā tāva pavattā paññā ‘abhiññā’ti vuccati. Sā panesā paṭipadā ekaccassa dukkhā hoti. Nīvaraṇādipaccanīkadhammasamudācāragahanatāya kicchā asukhasevanāti attho. Ekaccassa tadabhāvena sukhā. Abhiññāpi ekaccassa dandhā hoti, mandā, asīghappavatti. Ekaccassa khippā amandā sīghappavatti. Tasmā yo ādito kilese vikkhambhento dukkhena sasaṅkhārena sappayogena kilamanto vikkhambheti , tassa dukkhā paṭipadā nāma hoti. Yo pana vikkhambhitakileso appanāparivāsaṃ vasanto cirena aṅgapātubhāvaṃ pāpuṇāti, tassa dandhābhiññā nāma hoti. Yo khippaṃ aṅgapātubhāvaṃ pāpuṇāti tassa khippābhiññā nāma hoti. Yo kilese vikkhambhento sukhena akilamanto vikkhambheti, tassa sukhā paṭipadā nāma hoti.
তত্থ যানি সপ্পাযাসপ্পাযানি চ পলিবোধুপচ্ছেদাদীনি পুব্বকিচ্চানি চ অপ্পনাকোসল্লানি চ ৰিসুদ্ধিমগ্গে চিত্তভাৰনানিদ্দেসে নিদ্দিট্ঠানি, তেসু যো অসপ্পাযসেৰী হোতি, তস্স দুক্খা পটিপদা দন্ধা চ অভিঞ্ঞা হোতি। সপ্পাযসেৰিনো সুখা পটিপদা খিপ্পা চ অভিঞ্ঞা। যো পন পুব্বভাগে অসপ্পাযং সেৰিত্ৰা অপরভাগে সপ্পাযসেৰী হোতি, পুব্বভাগে ৰা সপ্পাযং সেৰিত্ৰা অপরভাগে অসপ্পাযসেৰী, তস্স ৰোমিস্সকতা ৰেদিতব্বা। তথা পলিবোধুপচ্ছেদাদিকং পুব্বকিচ্চং অসম্পাদেত্ৰা ভাৰনং অনুযুত্তস্স দুক্খা পটিপদা হোতি, ৰিপরিযাযেন সুখা। অপ্পনাকোসল্লানি পন অসম্পাদেন্তস্স দন্ধা অভিঞ্ঞা হোতি, সম্পাদেন্তস্স খিপ্পা।
Tattha yāni sappāyāsappāyāni ca palibodhupacchedādīni pubbakiccāni ca appanākosallāni ca visuddhimagge cittabhāvanāniddese niddiṭṭhāni, tesu yo asappāyasevī hoti, tassa dukkhā paṭipadā dandhā ca abhiññā hoti. Sappāyasevino sukhā paṭipadā khippā ca abhiññā. Yo pana pubbabhāge asappāyaṃ sevitvā aparabhāge sappāyasevī hoti, pubbabhāge vā sappāyaṃ sevitvā aparabhāge asappāyasevī, tassa vomissakatā veditabbā. Tathā palibodhupacchedādikaṃ pubbakiccaṃ asampādetvā bhāvanaṃ anuyuttassa dukkhā paṭipadā hoti, vipariyāyena sukhā. Appanākosallāni pana asampādentassa dandhā abhiññā hoti, sampādentassa khippā.
অপিচ তণ্হাঅৰিজ্জাৰসেন সমথৰিপস্সনাকতাধিকারৰসেন চাপি এতাসং পভেদো ৰেদিতব্বো। তণ্হাভিভূতস্স হি দুক্খা পটিপদা হোতি, অনভিভূতস্স সুখা। অৰিজ্জাভিভূতস্স চ দন্ধা অভিঞ্ঞা হোতি, অনভিভূতস্স খিপ্পা। যো চ সমথে অকতাধিকারো তস্স দুক্খা পটিপদা হোতি, কতাধিকারস্স সুখা। যো পন ৰিপস্সনায অকতাধিকারো হোতি, তস্স দন্ধা অভিঞ্ঞা হোতি, কতাধিকারস্স খিপ্পা।
Apica taṇhāavijjāvasena samathavipassanākatādhikāravasena cāpi etāsaṃ pabhedo veditabbo. Taṇhābhibhūtassa hi dukkhā paṭipadā hoti, anabhibhūtassa sukhā. Avijjābhibhūtassa ca dandhā abhiññā hoti, anabhibhūtassa khippā. Yo ca samathe akatādhikāro tassa dukkhā paṭipadā hoti, katādhikārassa sukhā. Yo pana vipassanāya akatādhikāro hoti, tassa dandhā abhiññā hoti, katādhikārassa khippā.
কিলেসিন্দ্রিযৰসেন চাপি এতাসং পভেদো ৰেদিতব্বো। তিব্বকিলেসস্স হি মুদিন্দ্রিযস্স দুক্খা পটিপদা হোতি দন্ধা চ অভিঞ্ঞা, তিক্খিন্দ্রিযস্স পন খিপ্পা অভিঞ্ঞা। মন্দকিলেসস্স চ মুদিন্দ্রিযস্স সুখা পটিপদা হোতি দন্ধা চ অভিঞ্ঞা, তিক্খিন্দ্রিযস্স পন খিপ্পা অভিঞ্ঞাতি।
Kilesindriyavasena cāpi etāsaṃ pabhedo veditabbo. Tibbakilesassa hi mudindriyassa dukkhā paṭipadā hoti dandhā ca abhiññā, tikkhindriyassa pana khippā abhiññā. Mandakilesassa ca mudindriyassa sukhā paṭipadā hoti dandhā ca abhiññā, tikkhindriyassa pana khippā abhiññāti.
ইতি ইমাসু পটিপদাঅভিঞ্ঞাসু যো পুগ্গলো দুক্খায পটিপদায দন্ধায অভিঞ্ঞায ঝানং পাপুণাতি, তস্স তং ঝানং দুক্খপটিপদং দন্ধাভিঞ্ঞন্তি ৰুচ্চতি। সেসেসুপি এসেৰ নযো।
Iti imāsu paṭipadāabhiññāsu yo puggalo dukkhāya paṭipadāya dandhāya abhiññāya jhānaṃ pāpuṇāti, tassa taṃ jhānaṃ dukkhapaṭipadaṃ dandhābhiññanti vuccati. Sesesupi eseva nayo.
তত্থ ‘তদনুধম্মতা সতি সন্তিট্ঠতি ঠিতিভাগিনী পঞ্ঞা’তি (ৰিভ॰ ৭৯৯) এৰং ৰুত্তসতিযা ৰা তংতংঝাননিকন্তিযা ৰা ৰিক্খম্ভনে পটিপদা, তংতংঝানুপচারপ্পত্তস্স অপ্পনায পরিৰাসে অভিঞ্ঞা চ ৰেদিতব্বা। আগমনৰসেনাপি চ পটিপদা অভিঞ্ঞা হোন্তিযেৰ। দুক্খপটিপদঞ্হি দন্ধাভিঞ্ঞং পঠমজ্ঝানং পত্ৰা পৰত্তং দুতিযম্পি তাদিসমেৰ হোতি। ততিযচতুত্থেসুপি এসেৰ নযো। যথা চ চতুক্কনযে এৰং পঞ্চকনযেপি পটিপদাৰসেন চতুধা ভেদো ৰেদিতব্বো। ইতি পটিপদাৰসেনপি চত্তারো নৰকা ৰুত্তা হোন্তি। তেসু পাঠতো ছত্তিংস চিত্তানি, অত্থতো পন পঞ্চকনযে চতুক্কনযস্স পৰিট্ঠত্তা ৰীসতিমেৰ ভৰন্তীতি।
Tattha ‘tadanudhammatā sati santiṭṭhati ṭhitibhāginī paññā’ti (vibha. 799) evaṃ vuttasatiyā vā taṃtaṃjhānanikantiyā vā vikkhambhane paṭipadā, taṃtaṃjhānupacārappattassa appanāya parivāse abhiññā ca veditabbā. Āgamanavasenāpi ca paṭipadā abhiññā hontiyeva. Dukkhapaṭipadañhi dandhābhiññaṃ paṭhamajjhānaṃ patvā pavattaṃ dutiyampi tādisameva hoti. Tatiyacatutthesupi eseva nayo. Yathā ca catukkanaye evaṃ pañcakanayepi paṭipadāvasena catudhā bhedo veditabbo. Iti paṭipadāvasenapi cattāro navakā vuttā honti. Tesu pāṭhato chattiṃsa cittāni, atthato pana pañcakanaye catukkanayassa paviṭṭhattā vīsatimeva bhavantīti.
পটিপদাচতুক্কং।
Paṭipadācatukkaṃ.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / রূপাৰচরকুসলং • Rūpāvacarakusalaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / পটিপদাচতুক্কৰণ্ণনা • Paṭipadācatukkavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / পটিপদাচতুক্কাদিৰণ্ণনা • Paṭipadācatukkādivaṇṇanā
