| Library / Tipiṭaka / တိပိဋက • Tipiṭaka / ဓမ္မသင္ဂဏီ-မူလဋီကာ • Dhammasaṅgaṇī-mūlaṭīkā |
ပဋိပဒာစတုက္ကဝဏ္ဏနာ
Paṭipadācatukkavaṇṇanā
၁၇၆-၁၈၀. တသ္သ တသ္သ ဈာနသ္သ ဥပစာရန္တိ နီဝရဏဝိတက္ကဝိစာရနိကန္တိယာဒီနံ ဝူပသမာ ထိရဘူတော ကာမာဝစရသမာဓိ။ တဒနုဓမ္မတာတိ တဒနုရူပတာဘူတာ, သာ ပန တဒသ္သာဒသင္ခာတာ တဒသ္သာဒသမ္ပယုတ္တက္ခန္ဓသင္ခာတာ ဝာ မိစ္ဆာသတီတိ ဝဒန္တိ။ အဝိဂတနိကန္တိကာ တံတံပရိဟရဏသတီတိပိ ဝတ္တုံ ဝဋ္ဋတီတိ ဧဝဉ္စ ကတ္ဝာ ‘‘သတိယာ ဝာ နိကန္တိယာ ဝာ’’တိ ဝိကပ္ပော ကတော။ အာဂမနဝသေနာပိ စ ပဋိပဒာ ဟောန္တိယေဝာတိ ဣဒံ ကဒာစိ ဒုတိယာဒီနံ ပဌမာဒိအာဂမနကတပဋိပဒတံ သန္ဓာယ ဝုတ္တံ။ အပိ-သဒ္ဒော ဟိ အနေကန္တိကတံ ဒီပေတိ, ဧတသ္သ အနေကန္တိကတ္တာ ဧဝ စ ပာဠိယံ ဧကေကသ္မိံ ဈာနေ စတသ္သော ပဋိပဒာ စတ္တာရိ အာရမ္မဏာနိ သောဠသက္ခတ္တုကဉ္စ ဝိသုံ ဝိသုံ ယောဇိတံ။ အညထာ ဧကေကသ္မိံ ပဋိပဒာဒိမ္ဟိ နဝ နဝ ဈာနာနိ ယောဇေတဗ္ဗာနိ သိယုန္တိ။
176-180. Tassa tassa jhānassa upacāranti nīvaraṇavitakkavicāranikantiyādīnaṃ vūpasamā thirabhūto kāmāvacarasamādhi. Tadanudhammatāti tadanurūpatābhūtā, sā pana tadassādasaṅkhātā tadassādasampayuttakkhandhasaṅkhātā vā micchāsatīti vadanti. Avigatanikantikā taṃtaṃpariharaṇasatītipi vattuṃ vaṭṭatīti evañca katvā ‘‘satiyā vā nikantiyā vā’’ti vikappo kato. Āgamanavasenāpi ca paṭipadā hontiyevāti idaṃ kadāci dutiyādīnaṃ paṭhamādiāgamanakatapaṭipadataṃ sandhāya vuttaṃ. Api-saddo hi anekantikataṃ dīpeti, etassa anekantikattā eva ca pāḷiyaṃ ekekasmiṃ jhāne catasso paṭipadā cattāri ārammaṇāni soḷasakkhattukañca visuṃ visuṃ yojitaṃ. Aññathā ekekasmiṃ paṭipadādimhi nava nava jhānāni yojetabbāni siyunti.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဓမ္မသင္ဂဏီပာဠိ • Dhammasaṅgaṇīpāḷi / ရူပာဝစရကုသလံ • Rūpāvacarakusalaṃ
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā / ပဋိပဒာစတုက္ကံ • Paṭipadācatukkaṃ
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဓမ္မသင္ဂဏီ-အနုဋီကာ • Dhammasaṅgaṇī-anuṭīkā / ပဋိပဒာစတုက္ကာဒိဝဏ္ဏနာ • Paṭipadācatukkādivaṇṇanā
