| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. படிபதா³ஸுத்தங்
2. Paṭipadāsuttaṃ
44. ஸாவத்தி²னிதா³னங். ‘‘ஸக்காயஸமுத³யகா³மினிஞ்ச வோ, பி⁴க்க²வே, படிபத³ங் தே³ஸெஸ்ஸாமி, ஸக்காயனிரோத⁴கா³மினிஞ்ச படிபத³ங். தங் ஸுணாத². கதமா ச, பி⁴க்க²வே, ஸக்காயஸமுத³யகா³மினீ படிபதா³? இத⁴, பி⁴க்க²வே, அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ, ரூபங் அத்ததோ ஸமனுபஸ்ஸதி, ரூபவந்தங் வா அத்தானங்; அத்தனி வா ரூபங், ரூபஸ்மிங் வா அத்தானங். வேத³னங் அத்ததோ… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி, விஞ்ஞாணவந்தங் வா அத்தானங்; அத்தனி வா விஞ்ஞாணங், விஞ்ஞாணஸ்மிங் வா அத்தானங். அயங் வுச்சதி, பி⁴க்க²வே, ‘ஸக்காயஸமுத³யகா³மினீ படிபதா³, ஸக்காயஸமுத³யகா³மினீ படிபதா³’தி. இதி ஹித³ங், பி⁴க்க²வே, வுச்சதி ‘து³க்க²ஸமுத³யகா³மினீ ஸமனுபஸ்ஸனா’தி. அயமேவெத்த² அத்தோ²’’.
44. Sāvatthinidānaṃ. ‘‘Sakkāyasamudayagāminiñca vo, bhikkhave, paṭipadaṃ desessāmi, sakkāyanirodhagāminiñca paṭipadaṃ. Taṃ suṇātha. Katamā ca, bhikkhave, sakkāyasamudayagāminī paṭipadā? Idha, bhikkhave, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto, rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Vedanaṃ attato… saññaṃ… saṅkhāre… viññāṇaṃ attato samanupassati, viññāṇavantaṃ vā attānaṃ; attani vā viññāṇaṃ, viññāṇasmiṃ vā attānaṃ. Ayaṃ vuccati, bhikkhave, ‘sakkāyasamudayagāminī paṭipadā, sakkāyasamudayagāminī paṭipadā’ti. Iti hidaṃ, bhikkhave, vuccati ‘dukkhasamudayagāminī samanupassanā’ti. Ayamevettha attho’’.
‘‘கதமா ச, பி⁴க்க²வே, ஸக்காயனிரோத⁴கா³மினீ படிபதா³? இத⁴, பி⁴க்க²வே, ஸுதவா அரியஸாவகோ அரியானங் த³ஸ்ஸாவீ அரியத⁴ம்மஸ்ஸ கோவிதோ³ அரியத⁴ம்மே ஸுவினீதோ, ஸப்புரிஸானங் த³ஸ்ஸாவீ ஸப்புரிஸத⁴ம்மஸ்ஸ கோவிதோ³ ஸப்புரிஸத⁴ம்மே ஸுவினீதோ, ந ரூபங் அத்ததோ ஸமனுபஸ்ஸதி, ந ரூபவந்தங் வா அத்தானங் ; ந அத்தனி வா ரூபங், ந ரூபஸ்மிங் வா அத்தானங். ந வேத³னங் அத்ததோ… ந ஸஞ்ஞங்… ந ஸங்கா²ரே… ந விஞ்ஞாணங் அத்ததோ ஸமனுபஸ்ஸதி, ந விஞ்ஞாணவந்தங் வா அத்தானங்; ந அத்தனி வா விஞ்ஞாணங், ந விஞ்ஞாணஸ்மிங் வா அத்தானங். அயங் வுச்சதி, பி⁴க்க²வே, ‘ஸக்காயனிரோத⁴கா³மினீ படிபதா³, ஸக்காயனிரோத⁴கா³மினீ படிபதா³’தி. இதி ஹித³ங், பி⁴க்க²வே, வுச்சதி ‘து³க்க²னிரோத⁴கா³மினீ ஸமனுபஸ்ஸனா’தி. அயமேவெத்த² அத்தோ²’’தி. து³தியங்.
‘‘Katamā ca, bhikkhave, sakkāyanirodhagāminī paṭipadā? Idha, bhikkhave, sutavā ariyasāvako ariyānaṃ dassāvī ariyadhammassa kovido ariyadhamme suvinīto, sappurisānaṃ dassāvī sappurisadhammassa kovido sappurisadhamme suvinīto, na rūpaṃ attato samanupassati, na rūpavantaṃ vā attānaṃ ; na attani vā rūpaṃ, na rūpasmiṃ vā attānaṃ. Na vedanaṃ attato… na saññaṃ… na saṅkhāre… na viññāṇaṃ attato samanupassati, na viññāṇavantaṃ vā attānaṃ; na attani vā viññāṇaṃ, na viññāṇasmiṃ vā attānaṃ. Ayaṃ vuccati, bhikkhave, ‘sakkāyanirodhagāminī paṭipadā, sakkāyanirodhagāminī paṭipadā’ti. Iti hidaṃ, bhikkhave, vuccati ‘dukkhanirodhagāminī samanupassanā’ti. Ayamevettha attho’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. படிபதா³ஸுத்தவண்ணனா • 2. Paṭipadāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. படிபதா³ஸுத்தவண்ணனா • 2. Paṭipadāsuttavaṇṇanā
