| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. படிபன்னஸுத்தங்
8. Paṭipannasuttaṃ
488. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங் – இமானி கோ², பி⁴க்க²வே, பஞ்சிந்த்³ரியானி. இமேஸங் கோ², பி⁴க்க²வே, பஞ்சன்னங் இந்த்³ரியானங் ஸமத்தா பரிபூரத்தா அரஹங் ஹோதி, ததோ முது³தரேஹி அரஹத்தப²லஸச்சி²கிரியாய படிபன்னோ ஹோதி, ததோ முது³தரேஹி அனாகா³மீ ஹோதி, ததோ முது³தரேஹி அனாகா³மிப²லஸச்சி²கிரியாய படிபன்னோ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸகதா³கா³மிப²லஸச்சி²கிரியாய படிபன்னோ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி ஸோதாபத்திப²லஸச்சி²கிரியாய படிபன்னோ ஹோதி. யஸ்ஸ கோ², பி⁴க்க²வே, இமானி பஞ்சிந்த்³ரியானி ஸப்³பே³ன ஸப்³ப³ங் ஸப்³ப³தா² ஸப்³ப³ங் நத்தி², தமஹங் ‘பா³ஹிரோ புது²ஜ்ஜனபக்கே² டி²தோ’தி வதா³மீ’’தி. அட்ட²மங்.
488. ‘‘Pañcimāni, bhikkhave, indriyāni. Katamāni pañca? Saddhindriyaṃ…pe… paññindriyaṃ – imāni kho, bhikkhave, pañcindriyāni. Imesaṃ kho, bhikkhave, pañcannaṃ indriyānaṃ samattā paripūrattā arahaṃ hoti, tato mudutarehi arahattaphalasacchikiriyāya paṭipanno hoti, tato mudutarehi anāgāmī hoti, tato mudutarehi anāgāmiphalasacchikiriyāya paṭipanno hoti, tato mudutarehi sakadāgāmī hoti, tato mudutarehi sakadāgāmiphalasacchikiriyāya paṭipanno hoti, tato mudutarehi sotāpanno hoti, tato mudutarehi sotāpattiphalasacchikiriyāya paṭipanno hoti. Yassa kho, bhikkhave, imāni pañcindriyāni sabbena sabbaṃ sabbathā sabbaṃ natthi, tamahaṃ ‘bāhiro puthujjanapakkhe ṭhito’ti vadāmī’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. படிபன்னஸுத்தவண்ணனா • 8. Paṭipannasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. படிபன்னஸுத்தவண்ணனா • 8. Paṭipannasuttavaṇṇanā
