| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. পটিপত্তিৰগ্গৰণ্ণনা
4. Paṭipattivaggavaṇṇanā
৩১-৪০. অযাথাৰপটিপত্তি, ন যথাপটিপত্তি, হেতুম্হিপি ফলেপি অযাথাৰৰত্থুসাধনতো। একং সুত্তং ধম্মৰসেন কথিতং পটিপত্তিৰসেন। একং সুত্তং পুগ্গলৰসেন কথিতং পটিপন্নকৰসেন। সংসারমহোঘস্স পরতীরভাৰতো যো নং অধিগচ্ছতি, তং পারেতি গমেতীতি পারং, নিব্বানং, তব্বিধুরতায নত্থি এত্থ পারন্তি অপারং, সংসারোতি ৰুত্তং – ‘‘অপারাপারন্তি ৰট্টতো নিব্বান’’ন্তি। পারঙ্গতাতি অসেক্খে সন্ধায। যেপি গচ্ছন্তীতি সেক্খে। যেপি গমিস্সন্তীতি কল্যাণপুথুজ্জনে। পারগামিনোতি এত্থ কিত-সদ্দো তিকালৰাচীতি এৰং ৰুত্তং।
31-40.Ayāthāvapaṭipatti, na yathāpaṭipatti, hetumhipi phalepi ayāthāvavatthusādhanato. Ekaṃ suttaṃ dhammavasena kathitaṃ paṭipattivasena. Ekaṃ suttaṃ puggalavasena kathitaṃ paṭipannakavasena. Saṃsāramahoghassa paratīrabhāvato yo naṃ adhigacchati, taṃ pāreti gametīti pāraṃ, nibbānaṃ, tabbidhuratāya natthi ettha pāranti apāraṃ, saṃsāroti vuttaṃ – ‘‘apārāpāranti vaṭṭato nibbāna’’nti. Pāraṅgatāti asekkhe sandhāya. Yepi gacchantīti sekkhe. Yepi gamissantīti kalyāṇaputhujjane. Pāragāminoti ettha kita-saddo tikālavācīti evaṃ vuttaṃ.
তীরন্তি ওরিমতীরমাহ। তেন ৰুত্তং ‘‘ৰট্টমেৰ অনুধাৰতী’’তি। একন্তকাল়কত্তা চিত্তস্স অপভস্সরভাৰকরণতো কণ্হাভিজাতিহেতুতো চ ৰুত্তং ‘‘কণ্হন্তি অকুসলধম্ম’’ন্তি। ৰোদানভাৰতো চিত্তস্স পভস্সরভাৰকরণতো সুক্কাভিজাতিহেতুতো চ ৰুত্তং – ‘‘সুক্কন্তি কুসলধম্ম’’ন্তি। কিলেসমার-অভিসঙ্খারমার-মচ্চুমারানং পৰত্তিট্ঠানতায ওকং ৰুচ্চতি ৰট্টং, তব্বিধুরতায অনোকন্তি নিব্বানন্তি আহ – ‘‘ওকা অনোকন্তি ৰট্টতো নিব্বান’’ন্তি।
Tīranti orimatīramāha. Tena vuttaṃ ‘‘vaṭṭameva anudhāvatī’’ti. Ekantakāḷakattā cittassa apabhassarabhāvakaraṇato kaṇhābhijātihetuto ca vuttaṃ ‘‘kaṇhanti akusaladhamma’’nti. Vodānabhāvato cittassa pabhassarabhāvakaraṇato sukkābhijātihetuto ca vuttaṃ – ‘‘sukkanti kusaladhamma’’nti. Kilesamāra-abhisaṅkhāramāra-maccumārānaṃ pavattiṭṭhānatāya okaṃ vuccati vaṭṭaṃ, tabbidhuratāya anokanti nibbānanti āha – ‘‘okā anokanti vaṭṭato nibbāna’’nti.
পরমত্থতো সমণা ৰুচ্চন্তি অরিযা, সমণানং ভাৰো সামঞ্ঞং, অরিযমগ্গো, তেন অরণীযতো উপগন্তব্বতো সামঞ্ঞত্থো নিব্বানন্তি আহ – ‘‘সামঞ্ঞত্থন্তি নিব্বানং, তং হী’’তিআদি। ব্রহ্মঞ্ঞত্থন্তি এত্থাপি ইমিনা নযেন অত্থো ৰেদিতব্বো। ব্রহ্মঞ্ঞেন অরিযমগ্গেন। রাগক্খযোতি এত্থ ইতি-সদ্দো আদিসদ্দত্থো। তেন ‘‘দোসক্খযো মোহক্খযো’’তি পদদ্ৰযং সঙ্গণ্হাতি। ৰট্টতিযেৰাতি ৰদন্তি ‘‘রাগক্খযো’’তি। পরিযাযেন হি অরহত্তস্স ৰত্তব্বত্তাতি।
Paramatthato samaṇā vuccanti ariyā, samaṇānaṃ bhāvo sāmaññaṃ, ariyamaggo, tena araṇīyato upagantabbato sāmaññattho nibbānanti āha – ‘‘sāmaññatthanti nibbānaṃ, taṃ hī’’tiādi. Brahmaññatthanti etthāpi iminā nayena attho veditabbo. Brahmaññena ariyamaggena. Rāgakkhayoti ettha iti-saddo ādisaddattho. Tena ‘‘dosakkhayo mohakkhayo’’ti padadvayaṃ saṅgaṇhāti. Vaṭṭatiyevāti vadanti ‘‘rāgakkhayo’’ti. Pariyāyena hi arahattassa vattabbattāti.
পটিপত্তিৰগ্গৰণ্ণনা নিট্ঠিতা।
Paṭipattivaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
১. পঠমপটিপত্তিসুত্তং • 1. Paṭhamapaṭipattisuttaṃ
২. দুতিযপটিপত্তিসুত্তং • 2. Dutiyapaṭipattisuttaṃ
৩. ৰিরদ্ধসুত্তং • 3. Viraddhasuttaṃ
৪. পারঙ্গমসুত্তং • 4. Pāraṅgamasuttaṃ
৫. পঠমসামঞ্ঞসুত্তং • 5. Paṭhamasāmaññasuttaṃ
৬. দুতিযসামঞ্ঞসুত্তং • 6. Dutiyasāmaññasuttaṃ
৭. পঠমব্রহ্মঞ্ঞসুত্তং • 7. Paṭhamabrahmaññasuttaṃ
৮. দুতিযব্রহ্মঞ্ঞসুত্তং • 8. Dutiyabrahmaññasuttaṃ
৯. পঠমব্রহ্মচরিযসুত্তং • 9. Paṭhamabrahmacariyasuttaṃ
১০. দুতিযব্রহ্মচরিযসুত্তং • 10. Dutiyabrahmacariyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পটিপত্তিৰগ্গৰণ্ণনা • 4. Paṭipattivaggavaṇṇanā
